Kaisarea Kɛ Mra Be Mli Kristofoi Lɛ

KAISAREA ni ji blema ŋshɔnaa maŋtiase, ni Herode kpeteŋkpele lɛ to be fioo ko dani afɔ Yesu Kristo lɛ, efee he ni atsa shi ayana nibii sɔrɔtoi babaoo yɛ nyɛsɛɛ nɛɛ. “King Herod’s Dream,” ni akɛtsɔɔ nibii ni ana nɛɛ, efee nɔ ni akɛmiikpa shi yɛ Amerika Kooyigbɛ agbɛnɛ.a

Herode yatao Roma maŋtsɛ Kaisare Augusto hiɛnyam. No hewɔ lɛ etsɛ maŋtiase lɛ akɛ Kaisarea (ni eshishi ji, “Eji Kaisare Nɔ”) ni etsɛ elɛjiadaamɔ he lɛ Sebastos (Hela kɛha “Augusto”) . Herode nitsulɔi lɛ fee lɛjiadaamɔ he ko ni yɔɔ naakpɛɛ ni ekolɛ eeenyɛ ehe lɛji oha, ni amɛma sɔlemɔ tsu fɛfɛo ko kɛ amaga wulu ko yɛ mli kɛha maŋtsɛ lɛ jamɔ.

Roma Maŋnɔkwɛmɔ He Gbɛjianɔtoo

Kaisarea bafee Roma amralofoi lɛ ashihilɛ he​—mɛi ni yeɔ Yudea nɔ lɛ. Kaisarea bafee Roma maŋkwramɔŋ kɛ tawuu mli nitsumɔi ashihemɔ he. Biɛ ji he ni asraafoiatsɛ Kornelio kɛ “ewekumɛi kɛ enanemɛi” lɛ bafee klɛŋklɛŋ mɛi ni folɔko ketia ni jeee Yudafoi ji amɛ ni kpɛlɛ Kristojamɔ nɔ yɛ. (Bɔfoi lɛ Asaji, yitso 10) Sanekpakpashiɛlɔ Filipo tee Kaisarea; nakai nɔŋŋ ji bɔfo Petro. Lɛji komɛi ni bɔfo Paulo ta mli kɛfa gbɛ yɛ emaŋsɛɛ sanekpakpashiɛmɔ nitsumɔ lɛ mli lɛ ekomɛi baa Kaisarea lɛjiadaamɔ hei lɛ. Paulo kɛ Luka hi Filipo, mɔ ni eka shi faŋŋ akɛ eyahi shi yɛ jɛmɛ ni eyɔɔ biyei ejwɛ ni sɔmɔɔ Nyɔŋmɔ lɛ ashia yɛ afi 56 Ŋ.B. lɛ mli.​—Bɔfoi lɛ Asaji 8:​40; 12: 18, 19; 18:​21, 22; 21:​8, 9.

Kaisarea ji he ni akɛ Paulo ba koni ebapue yɛ Roma amralo Felike hiɛ. Biɛ hu ji he ni Paulo wie ewiemɔi ni ehe gbɛi lɛ etsɔɔ Festo akɛ: “Mikɛ misane lɛ miiha Kaisare yeli!” lɛ yɛ.​—Bɔfoi lɛ Asaji, yitsei 23-26.

Nɔ ni Ajiea lɛ Kpo Atsɔɔ Lɛ

Kɛ obote he ni tamɔ nɛkɛ lɛ, onaa Tyche ni ji Kaisarea nyɔŋmɔyoo lɛ he amaga. Egbɛi lɛ shishi ji “Henianaa” aloo “Shade Kpakpa.” Shi Kristofoi ni yɔɔ jɛmɛ lɛ kɛ amɛhe efɔɔɔ henianaa loo shade nyɔŋmɔyei anɔ, shi moŋ amɛkɛ amɛhiɛ fɔɔ anɔkwale Nyɔŋmɔ lɛ, Yehowa nɔ. Amɛyɛ hemɔkɛyeli hu yɛ Yesu Kristo mli, mɔ ni Maŋtsɛ Herode bɔ mɔdɛŋ ni egbe lɛ lɛ. Kɛ obote tsui enyɔ ni tsara nɔ lɛ amli lɛ, Obaana bɔ ni shitsalɔi yana nibii ni amɛna yɛ Kaisarea lɛ kɛ bɔ ni atswa lɛjiadaamɔ he lɛ aha lɛ hu. Agbɛnɛ, yɛ tsu ni ji ejwɛ lɛ mli lɛ, Obaana nibii ni he hiaa titri ni ana yɛ Kaisarea lɛ eko ni afee ehe nɔkwɛmɔ nɔ ama shi. Eji Roma amralo ni akɛ Yesu Kristo tee ehiɛ lɛ he niŋmaa pɛ ni ale. Nɔ ni aŋma lɛ kaneɔ akɛ: “Pontio Pilato, Yudea nɔyelɔ.”

Agbɛnɛ jwiɛtɛi shika bibii enyɔ ni yɔɔ miishɛɛ waa yɛ nɛkɛ tsu nɛɛ mli. Nɔ ni aŋma yɛ klɛŋklɛŋ nɔ (ni yɔɔ ninejurɔgbɛ) lɛ nɔ ji: “Zion heyeli afi ni ji enyɔ.” Nɔ ni yɔɔ nɔ ni ji enyɔ lɛ nɔ ji: “Zion kpɔmɔ afi ni ji ejwɛ.” Woloŋlelɔi tsɔɔ akɛ afee nɛkɛ shika nɛɛ yɛ afi 67 Ŋ.B. kɛ 69 Ŋ.B. mli. “Heyeli” ni awieɔ he yɛ biɛ lɛ ji be mli ni Yudafoi lɛ hiɛ Yerusalem lɛ, yɛ sɛɛ mli beni Cestio Galo gbala Roma asraafoi ni tutuaa maŋ lɛ kɛjɛ he yɛ afi 66 Ŋ.B. lɛ.

Nakai amɛhe shi ni amɛgbala lɛ ha foijee kɛmiijɛ Yerusalem lɛ fee nɔ ni baanyɛ aba. Gbɔmɛi ni heɔ Yesu yeɔ lɛ jo foi, ejaakɛ ekɛɛ amɛ pɔtɛɛ akɛ: “Shi kɛ nyɛna akɛ abɔ ŋsra awo Yerusalem he lɛ, belɛ nyɛnaa nyɛlea akɛ efitemɔ lɛ eshɛ. No mli lɛ mɛi ni yɔɔ Yudea lɛ ajo foi aya gɔji lɛ anɔ, ni mɛi ni yɔɔ maŋ lɛŋ lɛ aje kpo, ni mɛi ni yɔɔ akrowai akaba maŋ.” (Luka 21:​20, 21) Eka shi faŋŋ akɛ, mɛi ni fee nɛkɛ “kunimyeli” shikai nɛɛ leee hiɛkpatamɔ ni mɛɔ amɛ lɛ he nɔ ko kwraa!

Roma asraafoi lɛ ku amɛsɛɛ amɛba yɛ afi 70 Ŋ.B., amɛye Yerusalem nɔ kunim, ni amɛkpata sɔlemɔ tsu lɛ hiɛ. Taakɛ Josephus tsɔɔ lɛ, amɛgbe Yudafoi ni amɛbabua amɛhe naa yɛ maŋtiase lɛ mli kɛha Hehoo lɛ yeli lɛ fe akpeiakpe kome. Roma tatsɛ Tito ye nɛkɛ kunimyeli nɛɛ akɛ gbijurɔ​—kɛ enyɛmi Domitian fɔmɔgbi​—kɛ shwɛmɔi ni tee nɔ yɛ Kaisarea shwɛmɔ he lɛ. Jɛmɛ ji he ni ashɛrɛ gbokɛlɛfoi 2,500 aha kooloi awuiyelɔi, asha amɛ, aloo agbe amɛ yɛ amɛ tabilɔi ashwɛmɔi amli. Nɔ ni yɔɔ tsu ni nyiɛ sɛɛ lɛ mli ji Efeso fɔmɔ nyɔŋmɔyoo Artemi ni yɔɔ fufɔi babaoo lɛ amaga. Nɛkɛ nyɔŋmɔyoo nɛɛ nɔŋŋ jalɔi lɛ fee basabasa yɛ Efeso beni Paulo shiɛɔ yɛ jɛmɛ ni ha mɛi pii kpoo amaga jamɔ ni amɛyanyiɛ Yesu Kristo sɛɛ lɛ.​—Bɔfɔi lɛ Asaji 19:​23-41.

Kpuji ni ejwara ni akɛtsɔɔ lɛ tsɔɔ bɔ ni klɛŋklɛŋ afii oha lɛ mli gbɛfaa etee hiɛ eha taakɛ Ŋmalɛi lɛ jieɔ lɛ kpo lɛ. Yɛ blema nibii atoo he kome ko pɛ ni agbele naa lɛ mli lɛ, ana su nii ni ashɔ loo kpuji ni jɛ hei ni yɔɔ shɔŋŋ ni bɛŋkɛɛɛ amɛhe tamɔ Yugoslavia, Italia, Spania, kɛ ekolɛ Afrika Kooyigbɛ. Akɛni enɛ tsɔɔ gbɛfaa kakadaji hewɔ lɛ, anuɔ nɔ hewɔ ni gbɛfalɔi baanyɛ ajɛ Roma Maŋtsɛyeli lɛ mli hei ni yɔɔ shɔŋŋ lɛ fɛɛ aba Yerusalem yɛ Pentekoste yɛ afi 33 Ŋ.B. lɛ. Jɛmɛ ji he ni mɛi pii nu sanekpakpa lɛ yɛ amɛ diɛŋtsɛ amɛwiemɔi amli, ni amɛbatsɔmɔ heyelilɔi, ni abaptisi amɛ. Eka shi faŋŋ akɛ, amɛteŋ mɛi komɛi kɛ sanekpakpa lɛ ku amɛsɛɛ kɛtee amɛ diɛŋtsɛ amɛ shikpɔji anɔ kɛjɛ lɛji ni amɛyatara mli yɛ Kaisarea lɛ amli.​—Bɔfɔi lɛ Asaji, yitso 2.

Nɔ ni yɔɔ tsu ni nyiɛ enɛ sɛɛ lɛ mli ji tɛ tao yɛŋ ko ni hiɛ koji ejwɛ ni marmara tɛ ni aŋmala nɔ ni jɛ afii ohai etɛ loo ejwɛ lɛ mli lɛ fai komɛi yɔɔ nɔ. Nɔ ni yɔɔ nɔ kɛjɛ shishijee ji osɔfoi awekui 24 ni ajara mli ni ato bɔ ni amɛsɔmɔɔ yɛ Yerusalem sɔlemɔ tsu lɛ mli lɛ naa yɛ nɔ lɛ. Nakai sɔlemɔ tsu lɛ eka shi amaŋfɔ afii ohai babaoo, shi Yudafoi lɛ yɛ hiɛnɔkamɔ akɛ etsɛŋ ni abaaku sɛɛ atswa ama shi. Yɛ afii ohai babaoo sɛɛ lɛ, amɛmiisɔle lolo akɛ Nyɔŋmɔ baasaa ato nakai osɔfoi aweku lɛ gbɛjianɔ yɛ amɛgbii lɛ amli. Shi atswaaa sɔlemɔ tsu lɛ amaaa shi. Yesu egba ehiɛkpatamɔ. Ni dani aaakpata hiɛ lɛ, bɔfo Paulo, ni eji Yudanyo, kɛ tsutsu Farisinyo lɛ tsɔɔ akɛ Nyɔŋmɔ kɛ nɔ ko kpakpa eto nakai sɔlemɔ tsu lɛ najiaŋ​—sɔlemɔ tsu ni da, mumɔŋ nɔ, ni Yerusalem nɔ ni akɛ niji ma lɛ fee he mfoniri, loo okadi, aloo akɛdamɔ shi aha no.​—Mateo 23:​37–24:2; Hebribii, yitsei 8, 9.

Afii ohai babaoo ho ni nɔyelɔi ba ni amɛtee. Kaisarea amaŋfɔfeemɔ lɛ ba shi agbɛnɛ, kɛbote su kɛ ŋshɔ mli. Jɛmɛ amɛyɔɔ ni amɛmiimɛ shitsalɔi, ni amɛshitsaa lɛ eye ebua wɔ ni wɔnu nibii babaoo ni kɔɔ blema bei amli saji ahe kɛ agbɛnɛ nibii ni wɔkaneɔ yɛ Nyɔŋmɔ Wiemɔ ni ji Biblia lɛ mli lɛ ekomɛi ashishi lɛ.

[Shishigbɛ niŋmai]

[Mfoniri ni yɔɔ baafa 24]

Kaisarea “shade kpakpa” nyɔŋmɔyoo Tyche

[Hei ni Mfonirii ni yɔɔ baafa 23 lɛ Jɛ]

Pictorial Archive (Near Eastern History) Est.

Courtesy of the Natural History Museum of Los Angeles County

[Hei ni Mfonirii ni yɔɔ baafa 24 lɛ Jɛ]

Aaron Levin

Israel Department of Antiquities and Museums; photographs from Israel Museum, Jerusalem

Courtesy of the Natural History Museum of Los Angeles County