Abu Amɛ Jalɔi “Kɛha Wala”

“Atsɔ mɔ kome jalɛ nɔ abu mɛi fɛɛ bem kɛha wala.”​—ROMABII 5:⁠18.

 1. Namɛi jalɛ he kumai kɛ hɔmɔ yeɔ amɛ lɛ, ni abaaha amɛtɔrɔ yɛ mɛɛ gbɛ nɔ?

“MIISHƐƐ ji mɛi ni jalɛ he hɔmɔ kɛ kumai yeɔ amɛ lɛ, akɛni amɛaatɔrɔ hewɔ Iɛ.” (Mateo 5:​6, NW) Jeee mɛi ni “amɛnɔ ji ŋwɛi maŋtsɛyeli lɛ” pɛ ji mɛi ni baatɔrɔ yɛ jalɛ he kumai ni yeɔ amɛ lɛ hewɔ, shi kɛha mɛi ni “shikpɔŋ lɛ aaatsɔ amɛnɔ” lɛ hu. (Mateo 5:​10; Lala 37:29) Kui enyɔ nɛɛ fɛɛ yɛ hiɛnɔkamɔ kome lɛ ni bɔfo Petro wie he beni eŋma akɛ: “Shi yɛ [Nyɔŋmɔ] eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ” lɛ. (2 Petro 3:13) Hɛɛ, Yehowa Nyɔŋmɔ ewo shi yɛ jalɛ Ŋwɛi nɔyeli hee ni ji “ŋwɛi maŋtsɛyeli lɛ” kɛ jalɛ “shikpɔŋ hee” aloo adesa weku yɛ paradeiso shikpɔŋ nɔ lɛ he.

 2. Mɛɛ wekukpaa ka Yehowa, jalɛ kɛ wɔhiɛnɔkamɔ kɛha Gbɛjianɔtoo Hee ni toiŋjɔlɛ yɔɔ mli lɛ teŋ?

² Shi mɛɛ shishinumɔ diɛŋtsɛ esa akɛ ana yɛ jalɛ ŋwɛi hee kɛ jalɛ shikpɔŋ hee lɛ he? Enɛ tsɔɔ akɛ esa akɛ ŋwɛi nɔyeli hee lɛ kɛ adesai ni enɛ yeɔ amɛnɔ yɛ shikpɔŋ nɔ lɛ fɛɛ ayɔse Nyɔŋmɔ taomɔ nii yɛ nɔ ni ja kɛ nɔ ni ejaaa he lɛ. Yehowa ji “jalɛ shihilɛ he.” (Yeremia 50:​7, NW) Jalɛ ji enɔyeli lɛ shishitoo aloo emaŋtsɛsɛi lɛ shihilɛ he yɛ jeŋ muu fɛɛ. (Hiob 37:​23, 24; Lala 89:15) Bɔni afee ni toiŋjɔlɛ ahi jeŋ muu lɛ fɛɛ lɛ, ebiɔ ni Yehowa bɔɔ nii lɛ ayɔse hegbɛ ni eyɔɔ akɛ ekɛ tɛi ni efolɔ eshwie shi yɛ nɔ ni ja kɛ nɔ ni ji efɔŋ he mamɔɔ shi. Yɛ gbɛ kroko nɔ lɛ, wɔhiɛnɔkamɔ kɛha jalɛ Gbɛjianɔtoo Hee lɛ damɔ tɛi ni Yehowa efolɔ eshwie shi ni hiɔ shi daa lɛ anɔ.​—Lala 145:⁠17.

 3. Yɛ jalɔ kwraa ni Yehowa ji hewɔ lɛ, mɛɛ sanebimɔ baa jwɛŋmɔ mli?

³ Agbɛnɛ sanebimɔ lɛ teɔ shi yɛ nɔ̃ hewɔ ni jalɔ kɛ mɔ krɔŋkrɔŋ Yehowa Nyɔŋmɔ nyɛɔ ekɛ nɔfɔŋfeelɔi ni jeee jalɔi yeɔ lɛ he. (Okɛto Yesaia 59:2; Habakuk 1:13 he.) Te efeɔ tɛŋŋ ni yɛ be mli ni ekaa he eyeɔ ejalɛ taomɔ nii ni nɔ kwɔlɔ lɛ anɔkwale lɛ, ehalaa mɛi ni baaná “ŋwɛi hee” kɛ jalɛ nɔyeli lɛ mli gbɛfaŋ nɔ lɛ kɛjɛɔ adesai eshafeelɔi ateŋ ni ekpɛlɛɔ mɛi ni baaná “shikpɔŋ hee” ni jalɛ hiɔ mli lɛ anɔ akɛ eshieŋtsɛmɛi lɛ? Bɔni afee ni wɔha sanebimɔ nɛɛ hetoo lɛ, esa ni wɔnu Biblia tsɔɔmɔ ni kɔɔ bembuu aloo jalɛ ni abuɔ ahaa mɔ lɛ shishi.

Gbɛjianɔtoo Ni Haa Anaa Mɔbɔ

 4. Mɛni hewɔ adesa ni egbee shi lɛ hiɛ Nyɔŋmɔ nyɔmɔ babaoo lɛ, ni mɛni hewɔ wɔnyɛŋ wɔye wɔhe kɛjɛ nyɔmɔ nɛɛ mli lɛ?

⁴ Akɛ esha toɔ nyɔmɔ he yɛ Ŋmalɛi lɛ amli. (Kwɛmɔ Mateo 6:​12, 14; 18:​21-35; Luka 11:⁠4.) Gbɔmɛi fɛɛ lɛ eshafeelɔi ni, yɛ no hewɔ lɛ, amɛhiɛ Nyɔŋmɔ nyɔmɔ babaoo diɛŋtsɛ. “Esha dɛŋ nyɔmɔwoo lɛ gbele ni.” (Romabii 6:23) Akɛni amɛblematsɛ Adam hɔɔ amɛ “ewo esha shishi” hewɔ lɛ, eseshibii nɛɛ nyɛŋ akpɔ amɛhe kɛjɛ nyɔmɔ ni tsii nɛɛ shishi. (Romabii 7:14) Nyɔmɔtsɛ lɛ gbele pɛ ji nɔ ni haa ebayeɔ ehe, “ejaakɛ mɔ ni egbo lɛ, abulɛ bem kɛjɛ esha lɛ mli.” (Romabii 6:⁠7) Nitsumɔ kpakpa ko bɛ ni eshafeelɔ lɛ tsuɔ yɛ ewala shihilɛ mli ni baanyɛ ahá nɔ ni Adam laaje lɛ, aloo ni baanyɛ ahá ená jalɛ shidaamɔ yɛ Nyɔŋmɔ hiɛ.​—Lala 49:​8, 10; Romabii 3:⁠20.

 5. Mɛɛ gbɛ nɔ Yehowa tsɔ ekɛ heyeli ha adesai ni efee esha lɛ yɛ be mli ni etee nɔ ekɛ bulɛ ha ejalɛsaneyeli ni yeɔ emuu lɛ?

⁵ Te Yehowa baafee tɛŋŋ eha adesa ni egbee shi lɛ ana heyeli ní ekuuu lɛ diɛŋtsɛ ejalɛ tɛi ni efolɔ eshwie shi lɛ amli hu? Hetoo lɛ jieɔ Yehowa nilee kɛ eduromɔ kpo faŋŋ. Bɔfo Paulo tsɔɔ enɛ mli fɛfɛo yɛ ewolo ni eŋma eyaha Romabii lɛ mli. Eŋma akɛ: “Ni akɛ eduromɔ lɛ buɔ amɛ [nɔshafeelɔi] bem yaka kɛtsɔɔ kpɔmɔ ni yɔɔ Kristo Yesu mli lɛ nɔ, lɛ ji mɔ ni Nyɔŋmɔ jie to akɛ kpatamɔ nɔ kɛtsɔ elá lɛ nɔ hemɔkɛyeli nɔ, koni ejie jalɛ lɛ kpo, yɛ ehiɛ ni eku efɔ eshai ni afee sa lɛ anɔ yɛ Nyɔŋmɔ tsuishiŋmɛɛ mli lɛ hewɔ; koni ejie ejalɛ lɛ etsɔɔ yɛ benɛ be nɛɛ mli ni eye bem ni ebu mɔ ni heɔ Yesu nɔ yeɔ lɛ hu bem.”​—Romabii 3:​24-26.

 6. (a) Yɛ mɛɛ gbɛ nɔ atsu Yehowa jalɛ tɛi ni efolɔ eshwie shi lɛ ahe nii yɛ Kristo afɔleshaa lɛ mli, ni yɛ no hewɔ lɛ, mɛni Yehowa sumɔɔ ni efee? (b) Nyɔŋmɔ buɔ jalɛ ehaa mɔ ni yɔɔ hemɔkɛyeli lɛ yɛ mɛɛ gbɛ nɔ?

⁶ Yɛ Yehowa duromɔ naa lɛ, ekpɛlɛ Yesu afɔle lɛ nɔ yɛ Adam seshibii ahewɔ. (1 Petro 2:24) . Enɛ ji nɔ ni kɛ lɛ yeɔ egbɔ aloo afɔleshaa ni kɛ lɛ kpãa, ejaakɛ ákɛ gbɔmɔ ni yeɔ emuu lɛ, Yesu hé nɔ ni nuu Adam ni yeɔ emuu lɛ laaje lɛ ekoŋŋ. (Kwɛmɔ 2 Mose 21:​23; 1 Timoteo 2:⁠6.) Akɛni átsu jalɛ kojomɔ he nii hewɔ lɛ, Yehowa miisumɔ ni ‘etsumɔ’ aloo ‘egbe’ esha ni abu aha “mɔ ni heɔ Yesu nɔ eyeɔ lɛ.” (Yesaia 44:​22; Bɔfoi lɛ Asaji 3:19) Kɛ́ gbɔmɔ ni tamɔ nɛkɛ lɛ tee nɔ ehi shi anɔkwafo lɛ, ‘jeee enɔtɔmɔi lɛ kɛkɛ Yehowa ebuuu ehãaa lɛ,’ shi E-buɔ jalɛ ehaa lɛ. (2 Korintobii 5:19) Yɛ gbɛjianɔtoo ni haa anaa mɔbɔ nɛɛ hewɔ lɛ, ‘aha mɛi pii etsɔmɔ jalɔi.’ (Romabii 5:19) Bembuu lɛ fã ko ji enɛ, Nyɔŋmɔ nifeemɔ ni haa abuɔ gbɔmɔ mɔ ni yeee fɔ. (Bɔfoi lɛ Asaji 13:​38, 39) Namɛi ji mɛi ni abu amɛ bem aloo ábu jalɔi yɛ nibii agbɛjianɔtoo nɛɛ mli lɛ?

“Mɛi Krɔŋkrɔŋ” 144,000

 7. Abu Kristo jalɔ yɛ mɛɛ gbɛ nɔ, ni enɛ gbele gbɛ kɛha mɛni?

⁷ Yɛ efɔmɔsu naa lɛ, ehe ehiaaa ni abu jalɛ aha Kristo, ejaakɛ jalɔ diɛŋtsɛ ji lɛ. (1 Petro 3:18) Beni eye anɔkwale kɛyashi egbele mli akɛ gbɔmɔ ni yeɔ emuu (“naagbee Adam”) ni ekɛ wala hegbɛ ni eyɔɔ yɛ shikpɔŋ nɔ lɛ esha afɔle sɛɛ lɛ, Yesu Tsɛ Yehowa tee lɛ shi kɛjɛ gbohii ateŋ. ‘Abu Yesu bem yɛ mumɔŋ’ ni tsɔɔ akɛ, abu jalɛ aha lɛ yɛ lɛ diɛŋtsɛ ejalɛ nitsumɔ naa ni atee lɛ shi akɛ “mumɔ ni haa mɔ yi naa wala” (1 Korintobii 15:​45; 1 Timoteo 3:16) Kɛtsɔ ehe ni ekɛsha afɔle yɛ gbele mli lɛ nɔ lɛ, egbele gbɛ ni Yehowa baanyɛ atsɔ nɔ abu jalɛ aha hii kɛ yei ni yɔɔ hemɔkɛyeli.​—Romabii 10:⁠4.

 8, 9. (a) Namɛi ji klɛŋklɛŋbii ni baana jalɛ ni abuɔ mɔ lɛ he sɛɛ, ni yɛ mɛni hewɔ? (b) Namɛi feɔ “ŋwɛi hee” lɛ, ni mɛni nɔ maŋtsɛ amɛbaaye?

⁸ Eka shi faŋŋ akɛ, mɛi ni Yehowa halaa amɛ kɛfeɔ jalɛ “ŋwɛi hee” aloo Maŋtsɛyeli nɔyeli yɛ Maŋtsɛ Yesu Kristo shishi lɛ ji klɛŋklɛŋ bii ni baana emɔbɔnalɛ gbɛjianɔtoo nɛɛ he sɛɛ yɛ nibii agbɛjianɔtoo nɛɛ mli. Daniel wolo lɛ tsɔɔ ŋwɛi nifeemɔ nɛɛ mli etsɔɔ akɛ ena Kristo ni ji gbɔmɔ Bi lɛ ni enine eshɛ “nɔyeli kɛ anunyam kɛ maŋtsɛyeli” nɔ bɔni afee ni “majimaji kɛ asafoi kɛ wiemɔi [ni yɔɔ shikpɔŋ nɔ] lɛ fɛɛ asɔmɔ lɛ.” Kɛkɛ ni Daniel tee nɔ etsɔɔ akɛ aŋɔ “maŋtsɛyeli lɛ kɛ nɔyeli lɛ” aha ‘Mɔ ni yɔɔ ŋwɛi Shɔŋŋ ni ji Yehowa lɛ mɛi krɔŋkrɔŋi lɛ.’​—Daniel 7:​13, 14, 18, 27; Okɛto Kpojiemɔ 5:​8-10 he.

⁹ Atsɔɔ nakai “mɛi krɔŋkrɔŋi” ni ahala amɛ koni amɛkɛ Toobi Yesu Kristo aye maŋtsɛ yɛ ŋwɛi Zion Gɔŋ lɛ nɔ lɛ ayibɔ akɛ 144,000 ‘ni ahe amɛ kɛjɛ gbɔmɛi ateŋ.’ (Kpojiemɔ 14:​1-5) Mɛnɛɛmɛi, kɛ Kristo feɔ Yehowa nibii agbɛjianɔtoo hee lɛ jalɛ “ŋwɛi hee” lɛ.

Abu Amɛ Jalɔi​—Yɛ Mɛɛ Gbɛ Nɔ Ni Mɛni Hewɔ?

10. (a) Mɛɛ Biblia mli wolo wieɔ bembuu he fe fɛɛ, ni namɛi eŋma enɛ ayaha? (b) Biblia tsɔɔmɔ ni kɔɔ bembuu he lɛ kɔɔ namɛi ahe titri?

¹⁰ Biblia mli wolo ni ŋwanejee ko bɛ he akɛ eyɛ faŋŋ yɛ gbɔmɛi ni Nyɔŋmɔ buɔ amɛ bem nɛɛ ahe wiemɔ mli ji Paulo wolo ni eŋma eyaha Romabii lɛ. Yɛ miishɛɛ mli lɛ, eŋma wolo nɛɛ eyaha “mɛi krɔŋkrɔŋi ni atsɛ amɛ” lɛ. (Romabii 1:​1, 7) Enɛ tsɔɔ nɔ̃ hewɔ ni akɛ ‘bembuu’ aloo jalɛ ni abuɔ ahaa mɔ taakɛ Paulo tsɔɔ mli lɛ tsuɔ nii yɛ “mɛi krɔŋkrɔŋi” 144,000 lɛ ahe lɛ.

11. Mɛɛ wekukpaa ka hemɔkɛyeli, nitsumɔi kɛ bembuu loo jalɛ teŋ?

¹¹ Shishinumɔ ni yɔɔ nɔ ni Paulo tsɔɔ yɛ Romabii awolo lɛ mli lɛ ji akɛ Yudanyo loo Jeŋmaŋnyo nyɛŋ ana jalɛ shidaamɔ yɛ Nyɔŋmɔ hiɛ kɛtsɔ nitsumɔi anɔ, ní ekɔɔɔ he eko akɛ atsu enɛ yɛ Mose Mla lɛ naa aloo yɛ fɔmɔsu mla lɛ nɔ yeli mli. (Romabii 2:​14, 15; 3:​9, 10, 19, 20) Abaanyɛ abu Yudanyo kɛ Jeŋmaŋnyo fɛɛ jalɔi, shi ja enɛ damɔ hemɔkɛyeli yɛ Kristo kpɔmɔ afɔle lɛ mli lɛ pɛ nɔ. (Romabii 3:​22-24, 29, 30) Shi, ŋaawoo ni yɔɔ Romabii awolo lɛ naagbee yitsei (12-15) lɛ amli lɛ tsɔɔ akɛ esa ni akɛ nitsumɔi ni saa Nyɔŋmɔ hiɛ afĩ hemɔkɛyeli ni tamɔ nɛkɛ sɛɛ, taakɛ bɔ ni Yakobo hu tsɔɔ mli lɛ. (Yakobo 2:​14-17) Nɔ ni nakai nitsumɔi lɛ tsɔɔ pɛ ji akɛ Kristofonyo ni abu lɛ bem lɛ yɛ hemɔkɛyeli ni he hiaa dani Nyɔŋmɔ abu lɛ bem lɛ.

12, 13. (a) Mɛni hewɔ ehe hiaa ni abu “mɛi krɔŋkrɔŋi” 144,000 lɛ bem loo jalɔi lɛ? (b) Mɛni amɛkɛ wala hegbɛi lɛ tsuɔ?

¹² Agbɛnɛ, mɛɛ yiŋtoo krɛdɛɛ hewɔ ni ehe hiaa ni abu Kristofoi ni ji “mɛi krɔŋkrɔŋi ni atsɛ amɛ” nɛɛ jalɔi lɛ? Biɛ ji heni jalɛ ni abuɔ ahaa mɔ lɛ he yiŋtoo ni ji enyɔ lɛ baa mli yɛ, ni ji Nyɔŋmɔ ni aaabu mɔ lɛ akɛ esa wala akɛ E-bi adesa ni yeɔ emuu. Yɛ nɔ ni atsɛ amɛ akɛ amɛbatsu yɛ jalɛ “ŋwɛi hee” lɛ mli hewɔ lɛ, esa akɛ 144,000 lɛ akpoo ni amɛkɛ naanɔ wala he hiɛnɔkamɔi fɛɛ ni amɛyɔɔ yɛ shikpɔŋ nɔ lɛ asha afɔle kɛya naanɔ. (Lala 37:​29; 115:16) Amɛgboɔ afɔleshaa gbele yɛ shishinumɔ nɛɛ naa. ‘Amɛkɛ amɛhe haa gbele ni tamɔ Kristo nɔ lɛ.’​—Filipibii 3:​8-11.

¹³ Amrɔ nɛɛ, yɛ shishitoo mla ni akɛ mamɔ shi yɛ Mose Mla lɛ mli lɛ kɛ gbeekpamɔ naa lɛ, esa akɛ afɔleshãa fɛɛ ni akɛbahaa Yehowa lɛ afee nɔ ni kpa ko bɛ he. (3 Mose 22:​21; 5 Mose 15:21) Awie “mɛi krɔŋkrɔŋi” 144,000 nɛɛ ahe akɛ “jalɔi ni ehi kɛwula shi.”​—Hebribii 12:⁠23.

Aŋɔ Amɛ Akɛ Mumɔŋ Bii

14, 15. (a) Mɛɛ tsakemɔ yɛ esha gbɛfaŋ 144,000 lɛ tsɔ mli? (b) Ateɔ amɛ shi yɛ “wala ni etsɔ ehee mli” yɛ mɛɛ gbɛ nɔ?

¹⁴ Beni amɛyɔɔ heloo mli lolo lɛ, nɛkɛ “jalɔi” nɛɛ tsɔɔ okadi gbele mli. Bɔfo Paulo tsɔɔ mli akɛ: “Wɔ ni wɔgboi wɔha esha lɛ, te aaafee tɛŋŋ ni wɔhiɛ aaakamɔ yɛ emli loloŋ? Aloo nyɛleee akɛ wɔteŋ mɛi abɔ ni abaptisi wɔ awo Kristo Yesu mli lɛ, egbele lɛ mli abaptisi wɔ awo? No hewɔ lɛ akɛ baptisimɔ ni abaptisi wɔ awo egbele lɛ mli lɛ efu wɔ kɛ lɛ fɛɛ, koni taakɛ bɔ ni atee Kristo shi kɛjɛ gbohii ateŋ yɛ tsɛ lɛ anunyam naa lɛ, nakai nɔŋŋ kɛ wɔ hu wɔnyiɛ yɛ wala ni etsɔ ehee mli . . . akɛ asɛŋ wɔgbɔmɔtso momo lɛ afata ehe, koni esha gbɔmɔtso lɛ hiɛ akpata ni wɔkasɔmɔ esha lɛ dɔŋŋ lɛ. Ejaakɛ mɔ ni egbo lɛ, abu lɛ bem kɛjɛ esha lɛ mli.”​—Romabii 6:​2-7.

¹⁵ Beni amɛyɔɔ adesa wala mli lɛ, “mɛi krɔŋkrɔŋi” 144,000 ni amɛteŋ mɛi fioo pɛ eshwɛ yɛ shikpɔŋ nɔ yɛ naagbee be nɛɛ mli lɛ ‘egboi amɛha esha.’ Yɛ amɛgbele yɛ okadi gbɛ nɔ nɛɛ sɛɛ lɛ, ateɔ “mɛi krɔŋkrɔŋi ni atsɛ amɛ” nɛɛ ashi kɛbaa “wala ni etsɔ ehee mli.” Akɛni abu amɛ jalɔi hewɔ lɛ, Yehowa baanyɛ ekɛ emumɔ lɛ afɔ amɛ bɔni afee ni amɛtsɔmɔ emumɔŋ “bii.” ‘Afɔɔ amɛ ehee’ ni aŋɔɔ amɛ akɛ “Nyɔŋmɔ bii.” (Yohane 3:3; Romabii 8:​9-16)a Amɛtsɔmɔɔ mumɔŋ Israelbii ni aŋɔɔ amɛ awoɔ kpaŋmɔ hee lɛ mli.​—Yeremia 31:​31-34; Luka 22:​20; Romabii 9:⁠6.

Osɔfoyeli Kɛ Maŋtsɛyeli Gboshiniyelɔi

16. “Mɛi krɔŋkrɔŋi” 144,000 lɛ batsɔmɔɔ gboshiniyelɔi yɛ mɛni mli?

¹⁶ Akɛ mɛi ni aŋɔ amɛ akɛ Nyɔŋmɔ mumɔŋ “bii” lɛ, “mɛi krɔŋkrɔŋi” 144,000 nɛɛ hu batsɔmɔɔ ‘gboshiniyelɔi.’ (Galatabii 4:​5-7) Paulo ŋma eyaha enanemɛi Kristofoi ni akɛ mumɔ efɔ́ amɛ lɛ akɛ: “Ni kɛ́ bii ji wɔ lɛ, belɛ niyelɔi hu ji wɔ, Nyɔŋmɔ niyelɔi kɛ Kristo nanemɛi niyelɔi, kɛji eyɛ mli, akɛ wɔkɛ lɛ naa amanehulu lɛ, koni awo wɔkɛ lɛ hiɛ nyam hu.” (Romabii 8:17) Mɛni ji Kristo gboshinii lɛ? Yehowa efee lɛ Maŋtsɛ kɛ Osɔfo “yɛ Melkizedek gbɛjianɔ lɛ naa kɛmiiya naanɔ.” (Hebribii 6:​19, 20; 7:⁠1) Ákɛ Kristo “nanemɛi gboshiniyelɔi” lɛ, Yehowa efɔ̀ Kristofoi ni akɛ mumɔ efɔ amɛ lɛ mu akɛ mumɔŋ osɔfoi. (2 Korintobii 1:​21; 1 Petro 2:⁠9) Agbɛnɛ, yiŋtoi titrii hewɔ ni Yehowa bu amɛ jalɔi lɛ ateŋ ekome ji ni amɛkɛ “mɔ kome ni ji Yesu Kristo lɛ aye maŋtsɛ yɛ wala mli” yɛ sɛɛ mli.​—Romabii 5:⁠17.

17. (a) Eyɛ mli akɛ abu amɛ bem loo jalɔi moŋ, shi mɛni ebiɔ ni Kristofoi ni afɔ amɛ mu lɛ afee daa gbi? (b) Amɛnine shɛɔ amɛ nyɔmɔwoo nɔ yɛ mɛɛ gbɛ nɔ?

¹⁷ Shi beni amɛyɔɔ shikpɔŋ nɔ lɛ, eyɛ mli akɛ abu Kristofoi ni afɔ amɛ mu nɛɛ jalɔi moŋ, shi esa akɛ amɛka he amɛwu amɛshi amɛ nɔshafeemɔ henumɔi lɛ. (Romabii 7:​15-20) Kristo lá lɛ he miihia amɛ bɔni afee ni etsuu amɛhe kɛjɛ amɛdaa gbi esha ni amɛfeɔ yɛ emuu ni amɛyeee hewɔ lɛ mli. (1 Yohane 1:7; 2:​1, 2) Kɛ́ amɛye anɔkwale kɛyashi amɛshikpɔŋ nɔ wala lɛ naagbee lɛ, amɛgboiɔ diɛŋtsɛ ni ateɔ amɛ shi kɛyaa “gboshinii ni fiteee ni he bɛ kpa ko ni ekwaaa” ni ji amɛgbɛfaŋnɔ yɛ jalɛ “ŋwɛi hee” lɛ mli.​—1 Petro 1:​3, 4; 2 Petro 3:⁠13.