‘Mumɔ Lɛ Diɛŋtsɛ Yeɔ Odase’

1-2. Mɛɛ naakpɛɛ nɔ ko tee nɔ afi 33 Ŋ.B. Pentekoste gbi lɛ nɔ?

FEEMƆ nɔ ni tee nɔ yɛ Yerusalem Hɔgbaa leebi ko yɛ afi 33 Ŋ.B. lɛ he mfoniri okwɛ. Yudafoi lɛ miiye Pentekoste gbi jurɔ lɛ, ni Yesu kaselɔi aaafee 120 ekpe yɛ shĩa ko ŋwɛi asa nɔ. (Bɔf. 1:13-15; 2:1) Gbii fioo dani be nɛɛ baashɛ lɛ, Yesu ekɛɛ amɛ akɛ amɛya nɔ amɛhi Yerusalem, ejaakɛ ebaahã amɛ nikeenii krɛdɛɛ ko. (Bɔf. 1:4, 5) Kɛkɛ ni nɔ ko ni sa kadimɔ ba. Ani ole nɔ ni ji?

² “Trukaa lɛ, gbɛɛmɔ ko ni tamɔ kɔɔyɔɔ ni miitswa waa jɛ ŋwɛi ba, ni ejije yɛ shĩa ni amɛtara mli lɛ mli fɛɛ.” Kɛkɛ ni “la ni tamɔ lilɛii” bamamɔ amɛyiteŋ, ni ‘mumɔ krɔŋkrɔŋ lɛ yimɔ amɛ obɔbɔ.’ (Bɔf. 2:2-4) Yehowa tsɔ gbɛ ni yɔɔ naakpɛɛ nɛɛ nɔ efɔse emumɔ krɔŋkrɔŋ lɛ eshwie kaselɔi nɛɛ anɔ. (Bɔf. 1:8) Amɛji klɛŋklɛŋ mɛi ni akɛ mumɔ krɔŋkrɔŋ lɛ fɔ amɛ mub koni amɛná hiɛnɔkamɔ akɛ amɛkɛ Yesu baaye nɔ yɛ ŋwɛi.

 3. Mɛni hã mɛi ni afɔ amɛ mu yɛ Pentekoste gbi lɛ nɔ lɛ na faŋŋ akɛ akɛ mumɔ krɔŋkrɔŋ lɛ efɔ amɛ mu?

³ Ŋwanejee ko bɛ he akɛ, kaselɔi ni bua amɛhe naa yɛ nakai ŋwɛi asa lɛ nɔ lɛ ahiɛ kpaŋ nɔ ni tee nɔ nakai gbi lɛ nɔ kɔkɔɔkɔ. Nɔ ko ni je la ni tamɔ lilɛi bama amɛteŋ mɔ fɛɛ mɔ yiteŋ, ni amɛbɔi wiemɔi srɔtoisrɔtoi wiemɔ. (Bɔf. 2:5-12) Naakpɛɛ nii nɛɛ hã amɛna faŋŋ akɛ, Yehowa kɛ mumɔ krɔŋkrɔŋ lɛ efɔ amɛ mu. Shi ani no tsɔɔ akɛ Kristofonyo fɛɛ Kristofonyo ni afɔ lɛ mu lɛ na naakpɛɛ okadi ko be ni afɔ lɛ mu lɛ? Ni kɛ́ Yehowa baafɔ mɔ ko mu lɛ, ani eyɛ be pɔtɛɛ ko ni ekɛfeɔ nakai? Dabi. Te wɔfeɔ tɛŋŋ wɔleɔ enɛ?

 4. Kɛ́ Yehowa baafɔ mɔ ko mu lɛ, ani eyɛ be pɔtɛɛ ko ni ekɛfeɔ nakai? Tsɔɔmɔ mli.

⁴ Hã wɔsusu be ni Nyɔŋmɔ fɔɔ mɔ ko mu lɛ he wɔkwɛ. Yɛ afi 33 Ŋ.B. Pentekoste gbi lɛ nɔ lɛ, jeee Kristofoi aaafee 120 lɛ pɛ afɔ amɛ mu. Sɛɛ mli yɛ nakai gbi lɛ nɔŋŋ nɔ lɛ, afɔ mɛi aaafee 3,000 hu mu, ni afɔ amɛ mu be ni abaptisi amɛ lɛ nɔŋŋ. (Bɔf. 2:37, 38, 41) Shi jeee nakai ebaa lɛ yɛ Kristofoi fɛɛ ni afɔɔ amɛ mu lɛ agbɛfaŋ. Akɛ nɔkwɛmɔnɔ lɛ, be ni abaptisi Samariabii lɛ, jeee nakai gbi lɛ nɔŋŋ nɔ afɔ amɛ mu. (Bɔf. 8:14-17) Ni eyɛ naakpɛɛ waa akɛ, yɛ Kornelio kɛ mɛi ni babua amɛhe naa yɛ eshĩa lɛ agbɛfaŋ po lɛ, afɔ amɛ mu dani abaptisi amɛ.​—Bɔf. 10:44-48.

 5. Yɛ nɔ ni awie yɛ 2 Korintobii 1:21, 22 lɛ naa lɛ, mɛɛ gbɛ nɔ Yehowa tsɔɔ efɔɔ mɔ ko mu?

⁵ Agbɛnɛ, hã wɔsusu gbɛ ni atsɔɔ nɔ akɛ mumɔ krɔŋkrɔŋ fɔɔ mɔ ko mu lɛ hu he wɔkwɛ. Mɛi komɛi yɛ ni kɛ́ afɔ amɛ mu lɛ, amɛnuɔ he akɛ amɛsaaa mɛi ni kulɛ Yehowa halaa amɛ akɛ amɛya ŋwɛi. Amɛteŋ mɛi komɛi biɔ amɛhe akɛ, ‘Mɛni hewɔ Nyɔŋmɔ hala mi?’ Shi mɛi komɛi hu yɛ ni amɛbiii amɛhe nakai. Kɛ̃lɛ, amɛbi amɛhe sane jio, amɛbiii amɛhe sane jio lɛ, gbɛ kome too lɛ nɔŋŋ nɔ atsɔ afɔ amɛ mu. Bɔfo Paulo wie akɛ: “Be ni nyɛhe nyɛye sɛɛ lɛ, atsɔ enɔ akɛ mumɔ krɔŋkrɔŋ ni awo he shi lɛ sɔo nyɛnaa,c ni no ji wɔgboshinii lɛ he nɔmimaa.” (Efe. 1:13, 14; shn.) No hewɔ lɛ, Yehowa tsɔɔ emumɔ krɔŋkrɔŋ lɛ nɔ ehãa Kristofoi nɛɛ náa “nɔmimaa” loo amɛnaa faŋŋ akɛ, ehala amɛ koni wɔsɛɛ lɛ, amɛhi shi kɛya naanɔ yɛ ŋwɛi, shi jeee shikpɔŋ lɛ nɔ.​—Kanemɔ 2 Korintobii 1:21, 22.

 6. Mɛni esa akɛ Kristofoi ni afɔ amɛ mu lɛ ateŋ mɔ fɛɛ mɔ afee koni enine ashɛ ejweremɔnɔ lɛ nɔ yɛ ŋwɛi?

⁶ Kɛ́ afɔ Kristofonyo ko mu lɛ, ani no tsɔɔ akɛ bɔ fɛɛ bɔ ni fee lɛ ebaaya ŋwɛi? Dabi. Eyɛ mli akɛ ená nɔmimaa akɛ ebaaya ŋwɛi moŋ, shi ja eye Yehowa anɔkwa kɛyawula shi dani enine baashɛ jweremɔnɔ lɛ nɔ. No hewɔ lɛ, esa akɛ ehã ŋaa nɛɛ ni bɔfo Petro wo lɛ ahi ejwɛŋmɔŋ, akɛ: “Nyɛmimɛi, nyɛbɔa mɔdɛŋ fɛɛ ni nyɛaanyɛ ni nyɛhã nyɛtsɛmɔ kɛ nyɛhalamɔ lɛ afee nɔ ni ama nɔ mi ahã nyɛ, ejaakɛ kɛ́ nyɛtee nɔ nyɛfee nibii nɛɛ, nyɛgbeŋ shi kɔkɔɔkɔ.”​—2 Pet. 1:10; Fip. 3:12-14; Heb. 3:1; Kpo. 2:10.

 7. Te mɔ ko feɔ tɛŋŋ eleɔ akɛ Nyɔŋmɔ ehala lɛ akɛ eya ŋwɛi?

⁷ Shi te mɔ ko feɔ tɛŋŋ eleɔ akɛ Nyɔŋmɔ ehala lɛ akɛ eya ŋwɛi? Wɔnaa hetoo lɛ faŋŋ yɛ sane ko ni Paulo wie yɛ wolo ko ni eŋma eyahã nyɛmimɛi ni yɔɔ Roma, “ni atsɛ amɛ koni amɛbatsɔmɔ mɛi krɔŋkrɔŋi lɛ” mli. Ekɛɛ amɛ akɛ: “Jeee nyɔŋyeli mumɔ ní hãa asheɔ gbeyei ekoŋŋ lɛ nyɛná, shi moŋ nyɛná biiatsɔmɔ mumɔ, ni ji mumɔ ni hãa wɔbolɔɔ akɛ: ‘Aba, Ataa!’ lɛ. Mumɔ lɛ diɛŋtsɛ kɛ wɔmumɔ lɛ yeɔ odase akɛ Nyɔŋmɔ bii ji wɔ.” (Rom. 1:7; 8:15, 16) No hewɔ lɛ, Nyɔŋmɔ tsɔɔ mumɔ krɔŋkrɔŋ lɛ nɔ ehãa mɛi ni afɔ amɛ mu lɛ leɔ faŋŋ akɛ, amɛkɛ Yesu baaye nɔ akɛ maŋtsɛmɛi yɛ ŋwɛi.​—1 Tes. 2:12.

 8. Mɛni awie yɛ 1 Yohane 2:20, 27 lɛ ni hãa wɔnaa akɛ, kɛ́ afɔ Kristofonyo ko mu lɛ, ehe ehiaaa ni mɔ ko maa nɔ mi ehãa lɛ akɛ afɔ lɛ mu?

⁸ Yehowa diɛŋtsɛ hãa mɛi fɛɛ ni ehala amɛ akɛ amɛya ŋwɛi lɛ náa nɔmimaa akɛ, efɔ amɛ mu. (Kanemɔ 1 Yohane 2:20, 27.) Ehe miihia ni atsɔɔ Kristofoi ni afɔ amɛ mu lɛ Yehowa he nii, tamɔ bɔ ni atsɔɔ mɛi ni afɔko amɛ mu lɛ ehe nii lɛ nɔŋŋ. Shi ehe ehiaaa ni mɔ ko ama nɔ mi ahã amɛ akɛ afɔ amɛ mu. Mɛni hewɔ? Ejaakɛ Yehowa kɛ mumɔ krɔŋkrɔŋ lɛ, ni ji hewalɛ ni fe fɛɛ ni yɔɔ je lɛ mli lɛ, ema nɔ mi ehã amɛ momo!

 9. Tamɔ bɔ ni wɔnaa yɛ Efesobii 1:18 lɛ, kɛ́ afɔ mɔ ko mu lɛ, mɛni baa?

⁹ Ewa kɛhã Nyɔŋmɔ tsuji ni yɔɔ ŋmɛnɛ ni afɔko amɛ mu lɛ ateŋ mɛi babaoo akɛ amɛbaanu bɔ ni mɛi ni afɔ amɛ mu lɛ nu he amɛhã be ni afɔ amɛ mu lɛ shishi. Enɛ bɛ naakpɛɛ, ejaakɛ Nyɔŋmɔ bɔ wɔ ni wɔhi shi kɛya naanɔ yɛ shikpɔŋ lɛ nɔ, jeee ŋwɛi. (1 Mo. 1:28; Lala 37:29) Shi Yehowa ehala adesai komɛi ni amɛya ŋwɛi. No hewɔ lɛ, kɛ́ efɔ amɛ mu lɛ, ehãa bɔ ni amɛsusuɔ nii ahe amɛhãa lɛ tsakeɔ kwraa, koni amɛjwɛŋmɔ aya hiɛnɔkamɔ ni asaa ato amɛ yɛ ŋwɛi lɛ nɔ.​—Kanemɔ Efesobii 1:18.

10. Kɛ́ akɛɛ ‘afɔ mɔ ko ekoŋŋ’ lɛ, te etsɔɔ tɛŋŋ? (Kwɛmɔ shishigbɛ niŋmaa lɛ hu.)

¹⁰ Yesu wie akɛ, kɛ́ Yehowa kɛ mumɔ krɔŋkrɔŋ lɛ fɔ Kristofonyo ko mu lɛ, belɛ ‘afɔ lɛ ekoŋŋ,’ loo ‘ajɛ ŋwɛi afɔ lɛ.’d Agbɛnɛ hu, ewie nɔ ko ni hãa wɔnaa faŋŋ akɛ, mɛi ni afɔko amɛ mu lɛ nyɛŋ anu bɔ ni mɛi ni afɔ amɛ mu lɛ nuɔ he amɛhãa kɛ́ ‘afɔ amɛ ekoŋŋ’ loo ‘ajɛ mumɔ mli afɔ amɛ’ lɛ shishi jogbaŋŋ.​—Yoh. 3:3-8; shn.

11. Mɛɛ gbɛ nɔ Kristofoi ni afɔ amɛ mu lɛ ajwɛŋmɔ tsake kwraa be ni akɛ mumɔ krɔŋkrɔŋ lɛ fɔ amɛ mu lɛ?

¹¹ Kristofoi ni afɔ amɛ mu lɛ ajwɛŋmɔ tsake kwraa be ni akɛ mumɔ krɔŋkrɔŋ lɛ fɔ amɛ mu lɛ. Yɛ mɛɛ gbɛ nɔ? Dani Yehowa baafɔ amɛ mu lɛ, no mli lɛ amɛhiɛnɔkamɔ ji akɛ amɛbaahi shi kɛya naanɔ yɛ shikpɔŋ lɛ nɔ. Amɛkɛ miishɛɛ kpa be ni Yehowa baajie efɔŋfeemɔ fɛɛ kɛje shikpɔŋ lɛ nɔ ni esaa nɔ fɛfɛo lɛ gbɛ. Ekolɛ, amɛfee amɛhe mfoniri ni amɛkɛ miishɛɛ miihere amɛwekumɛi kɛ amɛnanemɛi ni abaatee amɛ shi lɛ atuu. No hewɔ lɛ, mɛni hã amɛjwɛŋmɔ tsake? Jeee tɔlɛ kɛ haomɔi ni amɛkɛkpeɔ yɛ shihilɛ mli lɛ ni hã amɛtsake amɛjwɛŋmɔ. Mɛi komɛi susuɔ akɛ kɛ́ wɔbaahi shi kɛya naanɔ lɛ, shikpɔŋ lɛ nɔ shihilɛ baaje wɔtsine, ejaakɛ wɔbaata shi efolo ni wɔnaaa nɔ ni wɔkɛ wɔbe tsuɔ. Shi jeee susumɔ ni tamɔ nɛkɛ hewɔ Kristofoi nɛɛ tsake amɛjwɛŋmɔ lɛ. Ni asaŋ, amɛnuuu he akɛ amɛhi fe mɛi ni sa akɛ ahã amɛhi shikpɔŋ lɛ nɔ. Be ni Nyɔŋmɔ hala amɛ lɛ, lɛ diɛŋtsɛ etsɔ emumɔ krɔŋkrɔŋ lɛ nɔ etsake bɔ ni amɛsusuɔ nii ahe amɛhãa lɛ kɛ amɛhiɛnɔkamɔ lɛ.

12. Yɛ nɔ ni awie yɛ 1 Petro 1:3, 4 lɛ naa lɛ, te Kristofoi ni afɔ amɛ mu lɛ nuɔ he amɛhãa tɛŋŋ yɛ amɛhiɛnɔkamɔ lɛ he?

¹² Ekolɛ, mɛi ni afɔ amɛ mu lɛ ateŋ mɛi komɛi nuɔ he akɛ amɛsaaa mɛi ni ahãa amɛ hegbɛ kpele nɛɛ. Shi amɛyiŋ efeee amɛ kɔshikɔshi bibioo po yɛ amɛhalamɔ lɛ he. Moŋ lɛ, amɛmii shɛɔ amɛhe ni amɛdaa Yehowa shi waa yɛ hiɛnɔkamɔ nɛɛ ni ehã amɛ lɛ hewɔ.​—Kanemɔ 1 Petro 1:3, 4.

13. Ani mɛi ni afɔ amɛ mu lɛ miishwe gbele? Tsɔɔmɔ mli.

¹³ Ani enɛ tsɔɔ akɛ mɛi ni afɔ amɛ mu lɛ miishwe gbele? Dabi. Be ni Paulo wieɔ bɔ ni amɛnuɔ he amɛhãa lɛ he lɛ, ekɛ amɛheloo gbɔmɔtsei lɛ to mama tsũ he, ni ewie akɛ: “Anɔkwa, wɔ mɛi ni wɔyɔɔ mama tsũ nɛɛ mli lɛ kɛ̃mɔɔ, ni nibii miinyɛ wɔnɔ, ejaakɛ wɔsumɔɔɔ akɛ wɔjie enɛ wɔfɔ̃ shi, shi moŋ wɔmiisumɔ ni wɔwo ekroko lɛ, koni wala ami nɔ ni gboɔ lɛ.” (2 Kor. 5:4) No hewɔ lɛ, Kristofoi nɛɛ eshweee gbele. Amɛhiɛ sɔɔ wala ni amɛyɔɔ lɛ, ni daa gbi lɛ, amɛmiisumɔ ni amɛkɛ amɛwekumɛi kɛ amɛnanemɛi afee ekome kɛsɔmɔ Yehowa. Kɛ̃lɛ, amɛhiɛ kpaaa hiɛnɔkamɔ ni Nyɔŋmɔ ehã amɛ lɛ nɔ, ekɔɔɔ he eko nɔ ni amɛfeɔ.​—1 Kor. 15:53; 2 Pet. 1:4; 1 Yoh. 3:2, 3; Kpo. 20:6.

14. Mɛni hewɔ wɔnyɛŋ wɔdamɔ saji ni abi yɛ kuku nɛɛ mli lɛ ahetoi lɛ anɔ wɔtsɔɔ kɛji afɔ wɔ mu loo afɔko wɔ mu?

¹⁴ Ani eefee bo akɛ Yehowa ehala bo akɛ obaaya ŋwɛi? Kɛ́ nakai ni lɛ, susumɔ sanebimɔi ni he hiaa waa ni nyiɛ sɛɛ nɛɛ ahe okwɛ: Ani onuɔ he akɛ Yehowa suɔmɔnaa nii ni obaafee lɛ he miihia kwraa fe nibii krokomɛi fɛɛ? Ani obɔɔ mɔdɛŋ waa yɛ shiɛmɔ nitsumɔ lɛ mli? Ani okɛ hiɛdɔɔ kaseɔ Biblia lɛ? Ani osumɔɔ ni opɛi “Nyɔŋmɔ nibii ni mli kwɔlɔ lɛ” amli? (1 Kor. 2:10) Ani onuɔ he akɛ Yehowa ejɔɔ mɔdɛŋ ni obɔɔ yɛ shiɛmɔ nitsumɔ lɛ mli lɛ nɔ, ni ehã ewo yibii kpakpai? Ani osumɔɔ mɛi krokomɛi asane waa, ni onuɔ he akɛ sɔ̃ kã onɔ akɛ oye obua amɛ ni amɛbasɔmɔ Yehowa? Ani ona nibii pɔtɛi komɛi ni tsɔɔ akɛ Yehowa eye ebua bo waa yɛ shihilɛ mli? Kɛ́ ohã sanebimɔi nɛɛ fɛɛ hetoo akɛ hɛɛ lɛ, ani no tsɔɔ akɛ Nyɔŋmɔ ehala bo efata mɛi ni baaya ŋwɛi lɛ ahe? Dabi. Mɛni hewɔ? Ejaakɛ Nyɔŋmɔ tsuji fɛɛ baanyɛ aná henumɔi kɛ susumɔi ni atsɔɔ yɛ sanebimɔi nɛɛ amli lɛ, ekɔɔɔ he eko kɛji afɔ amɛ mu loo afɔko amɛ mu. Yehowa baanyɛ etsɔ emumɔ krɔŋkrɔŋ lɛ nɔ ehã etsuji fɛɛ aná ekãa kɛfee esuɔmɔnaa nii, ekɔɔɔ he eko hiɛnɔkamɔ ni amɛyɔɔ. Anɔkwa, kɛ́ oyiŋ miifee bo kɔshikɔshi, ni onaaa kɛji obaaya ŋwɛi loo oyaŋ ŋwɛi lɛ, etsɔɔ akɛ, ofataaa mɛi ni Yehowa ehala kɛhã hiɛnɔkamɔ nɛɛ ahe. Mɛi ni Yehowa ehala lɛ ayiŋ efeee amɛ kɔshikɔshi yɛ amɛhalamɔ lɛ he! Amɛyɛ nɔmimaa yɛ he!

15. Mɛni tsɔɔ akɛ jeee mɛi fɛɛ ni Nyɔŋmɔ droɔ amɛ emumɔ krɔŋkrɔŋ lɛ baaya ŋwɛi?

¹⁵ Biblia lɛ wieɔ Yehowa tsuji anɔkwafoi pii ni Yehowa hã amɛ emumɔ krɔŋkrɔŋ lɛ, tsɛ amɛbɛ ŋwɛi hiɛnɔkamɔ lɛ ahe. Akɛ nɔkwɛmɔnɔ lɛ, Yehowa kɛ emumɔ krɔŋkrɔŋ lɛ kudɔ David. (1 Sam. 16:13) Mumɔ krɔŋkrɔŋ lɛ ye ebua lɛ ni ebale Yehowa jogbaŋŋ, ni etsirɛ lɛ ni eŋmala Biblia lɛ fãi komɛi po. (Mar. 12:36) Fɛɛ sɛɛ lɛ, bɔfo Petro wie akɛ, “David ekwɔɔɔ kɛyaaa ŋwɛi.” (Bɔf. 2:34) Susumɔ Yohane Baptisilɔ lɛ hu he okwɛ. Biblia lɛ wieɔ akɛ ‘mumɔ krɔŋkrɔŋ lɛ yi lɛ obɔ.’ (Luka 1:13-16) Yesu wie akɛ, yɛ adesai fɛɛ ni ehi shi pɛŋ lɛ ateŋ lɛ, mɔ ko bɛ ni fe Yohane. Shi ewie kɛfata he akɛ, Yohane fataaa mɛi ni baaye nɔ akɛ maŋtsɛmɛi yɛ ŋwɛi lɛ ahe. (Mat. 11:10, 11) Yehowa tsɔ emumɔ krɔŋkrɔŋ lɛ nɔ ekɛ hii nɛɛ tsu nibii wuji, shi ehãaa amɛ ŋwɛi hiɛnɔkamɔ lɛ. Ani no tsɔɔ akɛ amɛsaaa mɛi ni kɛ Yesu yeɔ nɔ yɛ ŋwɛi, aloo akɛ amɛhemɔkɛyeli lɛ mli waaa bɔ ni abaahã amɛya ŋwɛi? Dabi, etsɔɔɔ nakai. Nɔ pɛ ni etsɔɔ ji akɛ, kɛ́ atee amɛ shi lɛ, amɛbaahi shi kɛya naanɔ yɛ Paradeiso lɛ mli yɛ shikpɔŋ lɛ nɔ.​—Yoh. 5:28, 29; Bɔf. 24:15.

16. Mɛni ji Nyɔŋmɔ tsuji ni yɔɔ ŋmɛnɛ lɛ ateŋ mɛi babaoo ahiɛnɔkamɔ?

¹⁶ Nyɔŋmɔ tsuji ni yɔɔ ŋmɛnɛ lɛ ateŋ mɛi babaoo eyaŋ ŋwɛi. Amɛhiɛnɔkamɔ ji akɛ, amɛ kɛ hii kɛ yei anɔkwafoi babaoo ni hi shi yɛ blema, tamɔ Abraham, Sara, David, kɛ Yohane Baptisilɔ lɛ baahi shikpɔŋ lɛ nɔ akɛ Nyɔŋmɔ Maŋtsɛyeli lɛ shishi bii.​—Heb. 11:10.

17. Mɛɛ sanebimɔi abaahã hetoo yɛ nikasemɔ ni nyiɛ sɛɛ lɛ mli?

¹⁷ Ŋmɛnɛ lɛ, Nyɔŋmɔ tsuji ni afɔ amɛ mu lɛ ateŋ mɛi komɛi yɛ wɔteŋ lolo yɛ shikpɔŋ lɛ nɔ. (Kpo. 12:17) Enɛ hewɔ lɛ, ekolɛ wɔbaasumɔ ni wɔle sanebimɔi ni nyiɛ sɛɛ nɛɛ ahetoo: Te esa akɛ mɛi ni afɔ amɛ mu lɛ afee amɛnii amɛhã tɛŋŋ? Kɛ́ mɔ ko ni yɔɔ wɔsafo lɛ mli lɛ bɔi blodo lɛ yeli kɛ wain lɛ numɔ yɛ Kaimɔ lɛ shishi lɛ, te esa akɛ wɔfee wɔnii wɔhã tɛŋŋ yɛ ehe? Ni kɛ́ wɔyɔse akɛ mɛi ni kɛɛ afɔ amɛ mu lɛ ayi miifa hu? Ani esa akɛ egba wɔnaa? Abaahã sanebimɔi nɛɛ hetoo yɛ nikasemɔ ni nyiɛ sɛɛ lɛ mli.