“Nyɔŋmɔ Sumɔ Wɔ Nɛkɛ”
“Kɛ́ Nyɔŋmɔ sumɔ wɔ nɛkɛ lɛ, esa akɛ wɔ hu wɔsumɔsumɔɔ wɔhe.”—1 YOHANE 4:11.
1. Mɛni hewɔ gbɔmɛi akpekpei abɔ baabua amɛhe naa yɛ Maŋtsɛyeli Asai anɔ kɛ kpee hei krokomɛi yɛ je lɛŋ fɛɛ, yɛ March 23 yɛ hulushinyɔɔ sɛɛ lɛ?
YƐ Hɔgbaa, March 23, 1997, yɛ hulushinyɔɔ sɛɛ lɛ, ŋwanejee ko bɛ he akɛ gbɔmɛi ni amɛyi fa fe 13,000,000 baabua amɛhe naa yɛ je lɛŋ fɛɛ yɛ Maŋtsɛyeli Asai anɔ kɛ kpee hei krokomɛi ni Yehowa Odasefoi kpeɔ yɛ lɛ. Mɛni hewɔ? Ejaakɛ suɔmɔ kpele fe fɛɛ ni Nyɔŋmɔ ejie lɛ kpo etsɔɔ gbɔmɛi adesai lɛ esa amɛtsuii ahe. Yesu Kristo gbala jwɛŋmɔ kɛtee nakai Nyɔŋmɔ suɔmɔ lɛ he odaseyeli kpeteŋkpele lɛ nɔ, ni ekɛɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.”—Yohane 3:16.
2. Mɛɛ sanebimɔi ni kɔɔ bɔ ni wɔhere Nyɔŋmɔ suɔmɔ lɛ nɔ wɔha lɛ he wɔ fɛɛ wɔbaanyɛ wɔbi wɔhe ni ehe aba sɛɛnamɔ aha wɔ?
2 Be mli ni wɔsusuɔ suɔmɔ ni Nyɔŋmɔ ejie kpo etsɔɔ lɛ he lɛ, wɔɔfee jogbaŋŋ akɛ wɔɔbi wɔhe akɛ, ‘Ani mihiɛ sɔɔ nɔ ni Nyɔŋmɔ efee lɛ lɛlɛŋ? Ani bɔ ni mihiɔ shi mihaa lɛ yeɔ nakai hiɛsɔɔ lɛ he odase?’
“Nyɔŋmɔ lɛ, Suɔmɔ Ji Lɛ”
3. (a) Mɛni hewɔ suɔmɔ kpojiemɔ jeee nɔ ni ekaaa kɛha Nyɔŋmɔ? (b) Hewalɛ kɛ nilee jeɔ kpo yɛ enibɔɔ nitsumɔi lɛ amli yɛ mɛɛ gbɛ nɔ?
3 Suɔmɔ kpojiemɔ diɛŋtsɛ jeee nɔ ko ni ekaaa yɛ Nyɔŋmɔ gbɛfaŋ, ejaakɛ “Nyɔŋmɔ lɛ, suɔmɔ ji lɛ.” (1 Yohane 4:8) Suɔmɔ ji esu ni nɔ kwɔ fe fɛɛ. Beni esaa shikpɔŋ lɛ nɔ koni adesai ahi nɔ lɛ, gɔji lɛ anɔ ni ehole kɛ nui lɛ ni ebua naa ewo kpaakpoi kɛ ŋshɔi amli lɛ fee hewalɛ kpojiemɔ ni hãa mɔ he jɔ̃ɔ ehe waa. (1 Mose 1:9, 10) Beni Nyɔŋmɔ hã nu shibɔlemɔ kɛ kɔɔyɔɔ kpakpa ni wɔmuɔ, ni ji oxygen hu shibɔlemɔ bɔi nitsumɔ, beni efee wala bɔɔ nii bibii kwraa ni akɛ hiŋmɛi enaaa amɛ lɛ babaoo ni anyɛŋ akane, kɛ kwɛɛnii sɔrɔtoi abɔ ni baatsake shikpɔŋ lɛ mli tsofa hewalɛ ni amɛfee lɛ niyenii ni adesai baanyɛ agbala awo amɛgbɔmɔtsei amli bɔni afee ni ebaa amɛwala yi, beni eto adebɔɔ nibii ni akɛkadiɔ afi lɛ mli bei sɔrɔtoi lɛ ahe gbɛjianɔ koni ekɛ gbii kɛ nyɔji asɛɛjɛkɛmɔ yɛ shibɔlemɔ ŋulami Shikpɔŋ lɛ nɔ lɛ akpa gbee lɛ, enɛ jie nilee kpele diɛŋtsɛ kpo. (Lala 104:24; Yeremia 10:12) Ni kɛlɛ, nɔ ni sa kadimɔ waa fe fɛɛ yɛ adebɔɔ nibii ni anaa lɛ mli ji Nyɔŋmɔ suɔmɔ lɛ he odaseyeli.
4. Mɛɛ Nyɔŋmɔ suɔmɔ lɛ he odaseyeli esa akɛ wɔ fɛɛ wɔna ni wɔhiɛ asɔ yɛ adebɔɔ nibii ni wɔnaa lɛ amli?
4 Nii anaasaa wieɔ Nyɔŋmɔ suɔmɔ lɛ he etsɔɔ wɔ kɛ́ wɔkɔ̃ aduawa bɔdɔɔ ko ni etsu, ni eka shi faŋŋ akɛ jeee akɛ afee koni wɔye ni eha wɔ hewalɛ kɛkɛ, shi moŋ koni eha wɔna miishɛɛ hu lɛ. Wɔhiŋmɛii naa ehe odaseyeli ni tɔmɔ ko bɛ he yɛ hulushinyɔɔ ni hãa mɔ he jɔ̃ɔ ehe, ŋulamii babaoo ni jeɔ yɛ ŋwɛi gbɛkɛ beni jeŋ tse, fɔfɔii sɔrɔtoi abɔ ni hiɛ sui sɔrɔtoi babaoo ni yɔɔ fɛo, kooloi abii ashwɛmɔi, kɛ nanemɛi aŋmɔlɔ ni miishɛɛ yɔɔ mli lɛ mli. Wɔ gugɔ hãa wɔleɔ kɛji wɔmiimu, ni wɔnu agbiɛnaa be mli fɔfɔii aŋma he lɛ. Wɔ toii nuɔ he yɛ be mli ni wɔnuɔ faa mli nui ni jɛɔ ŋwɛi eshwieɔ shi lɛ gbɛɛmɔ, loofɔji alala, kɛ wɔsuɔlɔi agbee lɛ. Wɔnuɔ he kɛ́ wɔsuɔlɔ ko fua wɔ kɛ miishɛɛ. Kooloi komɛi yɛ ni amɛyɛ nyɛmɔi ni amɛkɛnaa nii, amɛkɛnuɔ gbɛɛmɔi, loo amɛkɛnuɔ nibii aŋma, bɔ ni adesai nyɛŋ nakai amɛfee. Shi gbɔmɔ adesa, ni abɔ lɛ yɛ Nyɔŋmɔ subaŋ nɔ lɛ, yɛ nyɛmɔ ni ekɛnuɔ Nyɔŋmɔ suɔmɔ lɛ he, bɔ ni kooloo ko kwraa nyɛŋ nakai efee.—1 Mose 1:27.
5. Yehowa jie suɔmɔ babaoo kpo etsɔɔ Adam kɛ Hawa yɛ mɛɛ gbɛ nɔ?
5 Beni Yehowa Nyɔŋmɔ bɔ klɛŋklɛŋ adesai, Adam kɛ Hawa lɛ, ekɛ esuɔmɔ lɛ he odaseyeli bɔle amɛhe fɛɛ kɛkpe. Efee abɔɔ, ni ji paradeiso, ni eha tsei sɔrɔtoi fɛɛ kwɛ̃ yɛ mli. Efee faa koni eha nu ahi mli, ni ekɛ loofɔji kɛ kooloi ni he yɔɔ miishɛɛ wo mli fɛɛ obɔ. Ekɛ enɛ fɛɛ hã Adam kɛ Hawa akɛ amɛshia. (1 Mose 2:8-10, 19) Yehowa kɛ amɛ hi shi akɛ ebii, ejeŋ muu fɛɛ weku lɛ fã. (Luka 3:38) Yɛ Eden ni ekɛhã amɛ akɛ nɔkwɛmɔ nɔ nɛɛ hewɔ lɛ, nɛkɛ klɛŋklɛŋ adesai enyɔ nɛɛ aŋwɛi Tsɛ lɛ kɛ nitsumɔ ni hãa mɔ tsui nyɔɔ emli, ni ji Paradeiso lɛ ni amɛaalɛɛ mli ni ekpele shikpɔŋ muu lɛ fɛɛ nɔ lɛ wo amɛdɛŋ. Amɛbaahã shikpɔŋ lɛ ayi obɔ kɛ amɛshwiei.—1 Mose 1:28.
6. (a) Te onuɔ atuatsemɔ gbɛ ni Adam kɛ Hawa kɔ lɛ he ohaa tɛŋŋ? (b) Mɛni baanyɛ atsɔɔ akɛ wɔkase nii kɛjɛ nɔ ni ba yɛ Eden lɛ mli, ni ákɛ wɔna nakai nilee lɛ he sɛɛ?
6 Shi no sɛɛ be fioo mli lɛ, Adam kɛ Hawa kɛ toiboo he kaa, anɔkwayeli he kaa ko kpe. Klɛŋklɛŋ lɛ mɔ kome, no sɛɛ lɛ mɔ kroko lɛ hu ejieee hiɛsɔɔ kpo yɛ suɔmɔ ni ajie lɛ kpo atsɔɔ amɛ lɛ he. Nɔ ni amɛfee lɛ hãa mɔ he jɔ̃ɔ ehe waa. Amɛbɛ naajiemɔ ko yɛ he! Nɔ ni jɛ mli ba ji akɛ, amɛlaaje amɛkɛ Nyɔŋmɔ teŋ wekukpaa lɛ, ni ashwie amɛ kɛjɛ eweku lɛ mli, ni ashwie amɛ kɛjɛ Eden hu. Wɔnuɔ nibii ni jɛ amɛ esha lɛ mli kɛba lɛ he lolo ŋmɛnɛ. (1 Mose 2:16, 17; 3:1-6, 16-19, 24; Romabii 5:12) Shi ani wɔkase nɔ ko kɛjɛ nɔ ni ba lɛ mli? Te wɔhereɔ Nyɔŋmɔ suɔmɔ lɛ nɔ wɔhaa tɛŋŋ? Ani yiŋkpɛi ni wɔfeɔ daa gbi lɛ tsɔɔ akɛ wɔhiɛ sɔɔ esuɔmɔ lɛ?—1 Yohane 5:3.
7. Yɛ nɔ ni Adam kɛ Hawa fee lɛ fɛɛ sɛɛ lɛ, Yehowa jie suɔmɔ kpo etsɔɔ amɛshwiei yɛ mɛɛ gbɛ nɔ?
7 Hiɛsɔɔ ni anaa faŋŋ akɛ wɔ klɛŋklɛŋ fɔlɔi ni ji adesai lɛ ejieee lɛ kpo kwraa yɛ nibii fɛɛ ni Nyɔŋmɔ efee eha amɛ lɛ he lɛ tsimɔɔɔ Nyɔŋmɔ diɛŋtsɛ suɔmɔ lɛ nɔ. Musuŋtsɔlɛ ni eyɔɔ kɛha adesai ni no mli lɛ afɔko amɛ—ni wɔ mɛi ni wɔyɔɔ wala mli bianɛ lɛ fata he—lɛ hewɔ lɛ, Nyɔŋmɔ ŋmɛ Adam kɛ Hawa gbɛ koni amɛna weku dani amɛgboi. (1 Mose 5:1-5; Mateo 5:44, 45) Eji efeee nakai kulɛ, afɔŋ wɔteŋ mɔ ko mɔ ko. Kɛtsɔ esuɔmɔnaa nii ni ejie lɛ kpo fiofio lɛ nɔ lɛ, Yehowa kɛ nɔdaamɔ nɔ hu hã kɛha hiɛnɔkamɔ, kɛha Adam shwiei fɛɛ ni baajie hemɔkɛyeli kpo lɛ. (1 Mose 3:15; 22:18; Yesaia 9:6, 7) Nɔ ni fata egbɛjianɔtoo lɛ he ji gbɛ ni gbɔmɛi ni jɛ jeŋmaji fɛɛ mli lɛ aaatsɔ nɔ, ni amɛnine ashɛ nɔ ni Adam laaje lɛ lɛ nɔ ekoŋŋ, ni ji, wala ni eye emuu akɛ Nyɔŋmɔ jeŋ muu fɛɛ weku lɛ mli bii ni ekpɛlɛɔ amɛnɔ. Efee enɛ kɛtsɔ kpɔmɔ nɔ ni ekɛha lɛ nɔ.
Mɛni Hewɔ Kpɔmɔ Nɔ He Hiaa Lɛ?
8. Mɛni hewɔ Nyɔŋmɔ nyɛŋ awo akpɔ kɛkɛ akɛ eyɛ mli akɛ esa akɛ Adam kɛ Hawa agboi moŋ, shi esaaa ni amɛshwiei toibolɔi lɛ ateŋ mɔ ko gboɔ lɛ?
8 Ani ehe miihia lɛlɛŋ akɛ awo kpɔmɔ nɔ jara ko, ni ji gbɔmɔ adesa wala? Ani kulɛ Nyɔŋmɔ nyɛŋ awo akpɔ kɛkɛ akɛ, eyɛ mli akɛ esa akɛ Adam kɛ Hawa agboi yɛ amɛ atuatsemɔ lɛ hewɔ moŋ, shi amɛshwiei fɛɛ ni baabo Nyɔŋmɔ toi lɛ baanyɛ ahi shi kɛya naanɔ? Yɛ adesa susumɔ ni eyaaa shɔŋŋ lɛ naa lɛ, ekolɛ enɛ baafee tamɔ nɔ ni nilee yɛ mli. Shi, Yehowa lɛ, “esumɔɔ jalɛ kɛ jalɛsaneyeli.” (Lala 33:5) Ní Adam kɛ Hawa batsɔmɔ eshafeelɔi lɛ sɛɛ dani amɛfɔ bii; no hewɔ lɛ afɔɔɔ nakai bii lɛ eko kwraa akɛ mɔ ni eye emuu. (Lala 51:7) Akɛ esha fɔ amɛ fɛɛ, ni esha he toigbalamɔ ji gbele. Eji Yehowa ku ehiɛ efɔ̃ enɛ nɔ kulɛ, mɛɛ nɔkwɛmɔ nɔ no aaafee afɔ̃ shi aha ejeŋ muu fɛɛ weku lɛ mli bii lɛ? Enyɛŋ eku ehiɛ efɔ̃ lɛ diɛŋtsɛ ejalɛ tɛi ni efolɔ eshwie shi lɛ anɔ. Ejie bulɛ kpo yɛ jalɛsaneyeli taomɔ nii ahe. Mɔ ko mɔ ko nyɛŋ awie ashi gbɛ ni Nyɔŋmɔ tsɔ nɔ etsu saji ni ba lɛ ahe nii lɛ kɔkɔɔkɔ yɛ gbɛ ni ja nɔ.—Romabii 3:21-23.
9. Taakɛ ŋwɛi jalɛsaneyeli he taomɔ nii biɔ lɛ, mɛɛ kpɔmɔ nɔ nɛkɛ he hiaa?
9 Belɛ, mɛɛ gbɛ nɔ aaatsɔ ni akɛ nɔdaamɔ nɔ ni sa ahã, kɛha Adam shwiei ni baafee toiboo amɛha Yehowa yɛ suɔmɔ mli lɛ akpɔmɔ? Kɛji adesa ni eye emuu baagbo afɔleshaa gbele lɛ, jalɛsaneyeli baanyɛ aŋmɛ gbɛ ni nakai wala ni eye emuu lɛ jarawalɛ lɛ kɛ nɔ ni baatsimɔ mɛi ni kɛ hemɔkɛyeli baakpɛlɛ nakai kpɔmɔ nɔ lɛ nɔ lɛ ahe eshai anɔ lɛ ahã. Akɛni gbɔmɔ kome, Adam he eshai ji nɔ ni eha adesai aweku muu lɛ fɛɛ etsɔmɔ eshafeelɔi hewɔ lɛ, adesa kroko ni eye emuu lɛ lá ni efɔse eshwie shi, ni kɛ ejarawalɛ lɛ yeɔ egbɔ lɛ, baanyɛ ahã jalɛsaneyeli ŋsɛnii lɛ aŋmɛ pɛpɛɛpɛ. (1 Timoteo 2:5, 6) Shi nɛgbɛ abaanyɛ aná gbɔmɔ ni tamɔ nɛkɛ yɛ?
Te Jarawalɛ lɛ Da Hã Tɛŋŋ?
10. Mɛni hewɔ Adam shwiei nyɛɛɛ amɛkɛ kpɔmɔ nɔ lɛ ahã lɛ?
10 Mɔ ko kwraa bɛ eshafeelɔ Adam shwiei lɛ ateŋ ni baanyɛ ekɛ nɔ ni he hiaa lɛ ahã koni aku sɛɛ akɛhe wala gbɛkpamɔi ni Adam elaaje lɛ lɛ ekoŋŋ. “Mɔ ko mɔ ko nyɛŋ enyɛmi ekpɔ̃, loo ni eeeha Nyɔŋmɔ eyinii, (ejaakɛ amɛsusuma kpɔmɔ nii lɛ jara wa tsɔ, ni ehaa eŋmɛɔ he kwraa), koni ehi shi daa, ni ekana gbonyobu.” (Lala 49:8-10) Yɛ nɔ najiaŋ ni eeeshi adesai ni amɛbɛ hiɛnɔkamɔ ko kwraa lɛ, Yehowa diɛŋtsɛ jɛ mɔbɔnalɛ mli eto gbɛjianɔ.
11. Mɛɛ gbɛ nɔ Yehowa tsɔ ekɛ adesa wala ni eye emuu ni he hiaa kɛha kpɔmɔ nɔ ni sa lɛ hã?
11 Yehowa tsuuu ŋwɛibɔfo ko kɛbaaa shikpɔŋ nɔ koni ekɛ adesa gbɔmɔtso ni eŋɔ ehã ehe lɛ abafɔ̃ shi ní ekwa efee akɛ egbo, yɛ be mli ni eyɛ wala mli lolo akɛ mumɔ. Shi moŋ, etsɔ naakpɛɛ nii ni Nyɔŋmɔ, mɔ ni ji Bɔlɔ lɛ pɛ baanyɛ afee lɛ nɔ ejie binuu ni yɔɔ ŋwɛi lɛ wala-hewalɛ kɛ subaŋ he okadii ebawo yoo ko, ni ji Heli, ni jɛ Yuda akutso lɛ mli lɛ, biyoo Maria fɔmɔ kotoku mli. Nyɔŋmɔ nitsumɔ hewalɛ, ni ji emumɔ krɔŋkrɔŋ lɛ, baa gbekɛ lɛ yi beni edaa yɛ enyɛ musuŋ lɛ, ni afɔ lɛ akɛ adesa ni eye emuu. (Luka 1:35; 1 Petro 2:22) Kɛkɛ ni jara ni he hiaa koni akɛ kpɔmɔ nɔ lɛ ahã ni akɛtsu ŋwɛi jalɛsaneyeli taomɔ nii ahe nii kɛmɔ shi lɛ he hegbɛ baje nɛkɛ mɔ nɛɛ dɛŋ.—Hebribii 10:5.
12. (a) Yesu ji Nyɔŋmɔ “bi koome” yɛ mɛɛ shishinumɔ naa? (b) Tsumɔ ni Nyɔŋmɔ tsu mɔnɛ kɛba koni ekɛ kpɔmɔ nɔ lɛ abahã lɛ maa suɔmɔ ni E-yɔɔ kɛha wɔ lɛ nɔ mi yɛ mɛɛ gbɛ nɔ?
12 Bii akpekpei akpei abɔ ni yɔɔ ŋwɛi lɛ ateŋ namɔ Yehowa kɛ nitsumɔ nɛɛ wo edɛŋ? Ekɛwo mɔ ni awie ehe yɛ Ŋmalɛi lɛ amli akɛ “ebi koome lɛ” dɛŋ. (1 Yohane 4:9) Akɛ wiemɔ nɛɛ tsuɔ nii, jeee kɛmiitsɔɔ mɔ ni ebatsɔ beni afɔ lɛ akɛ adesa lɛ, shi moŋ bɔ ni eji yɛ ŋwɛi dani abafɔ lɛ akɛ adesa lɛ. Lɛ pɛ ji mɔ ni Yehowa bɔ lɛ tɛɛ ni mɔ ko mɔ ko kwraa yelikɛbuamɔ fataaa he. Lɛ ji bɔɔ nii fɛɛ ateŋ Kromɔbi. Lɛ ji mɔ ni Nyɔŋmɔ kɛ lɛ tsu nii ni ekɛ bɔɔ nii krokomɛi fɛɛ ba shihilɛ mli. Ŋwɛibɔfoi lɛ ji Nyɔŋmɔ bii, taakɛ bɔ ni Adam ji Nyɔŋmɔ bi lɛ. Shi awieɔ Yesu he akɛ eyɛ “tsɛ lɛ bi koome lɛ anunyam.” Awieɔ akɛ eyɛ “tsɛ lɛ mlishi.” (Yohane 1:14, 18) Ekɛ Tsɛ lɛ yɛ wekukpaa ni bɛŋkɛ kpaakpa, yitsoŋsaneyeli yɛ mli, kɛ suɔmɔ wekukpaa. Eyɛ suɔmɔ ni e-Tsɛ yɔɔ kɛha adesai lɛ eko. Abɛi 8:30, 31 wieɔ bɔ ni e-Tsɛ nuɔ he ehaa yɛ Bi nɛɛ he kɛ bɔ ni Bi lɛ hu nuɔ he ehaa yɛ adesai ahe lɛ he akɛ: “Mimii shɛɔ mihe daa, mishwɛɔ yɛ [Yehowa] hiɛ be fɛɛ be, . . . ni [mi, Yesu, Yehowa Nitsulɔ Ŋaalɔ, ni ji nilee ni ajie lɛ kpo yɛ gbɔmɔ su mli lɛ], minaa gbɔmɛi abii ahe miishɛɛ.” Nɛkɛ Bi ni jara wa fe fɛɛ nɛɛ ji mɔ ni Nyɔŋmɔ tsu lɛ kɛba shikpɔŋ nɔ koni ekɛ kpɔmɔ nɔ lɛ abahã. No hewɔ lɛ, kwɛ bɔ ni shishinumɔ yɔɔ Yesu wiemɔ nɛɛ mli ha, akɛ: “Nyɔŋmɔ sumɔ je lɛ aahu akɛ eŋɔ e-Bi koome lɛ eha”!—Yohane 3:16, NW.
13, 14. Mɛni esa akɛ Biblia mli sane ni aŋma, ni tsɔɔ ka ni Abraham ka akɛ ekɛ Isak baasha afɔle lɛ, aye abua ni wɔnu shishi yɛ nɔ ni Yehowa fee lɛ he? (1 Yohane 4:10)
13 Bɔni afee ni eye ebua wɔ ni wɔnu nɔ ni no tsɔɔ lɛ shishi yɛ gbɛ ko nɔ lɛ, Nyɔŋmɔ kɛ famɔ hã Abraham, be babaoo dani Yesu ba shikpɔŋ lɛ nɔ, aaafee afii 3,890 ni eho nɛ, akɛ: “Agbɛnɛ ŋɔɔ obi Isak ni ji obi koome ni odɔɔ ehe lɛ, ni oyiŋ oya Moria shikpɔŋ lɛ nɔ, ni okɛ lɛ ayashã shaa afɔle yɛ jɛi, yɛ gɔji lɛ ateŋ ekome ni matsɔɔo lɛ nɔ.” (1 Mose 22:1, 2) Abraham bo toi yɛ hemɔkɛyeli mli. Okɛ ohe awo Abraham shihilɛ mli okwɛ. Kɛji obinuu ji lɛ, obinuu koome pɛ ni osumɔɔ lɛ waa lɛ, kulɛ mɛni obaafee? Mɛɛ henumɔi obaaná beni ogbaa lai kɛha shaa afɔle lɛ, ni nyɛkɛ gbii babaoo fãa gbɛ kɛyaa Moria shikpɔŋ lɛ nɔ, ni okɛ obi lɛ fɔ̃ɔ afɔleshaa latɛ lɛ nɔ lɛ?
14 Mɛni hewɔ fɔlɔ ni yɔɔ musuŋtsɔlɛ náa henumɔi ni tamɔ nɛkɛ lɛ? Klɛŋklɛŋ Mose 1:27 kɛɔ akɛ Nyɔŋmɔ bɔ gbɔmɔ yɛ E-subaŋ nɔ. Wɔ henumɔi ni ji suɔmɔ kɛ musuŋtsɔlɛ lɛ jieɔ suɔmɔ kɛ musuŋtsɔlɛ ni Yehowa diɛŋtsɛ yɔɔ lɛ kpo yɛ gbɛ bibioo pɛ nɔ. Yɛ Abraham sane lɛ mli lɛ, Nyɔŋmɔ kɛ ehe wo mli, no hewɔ lɛ akɛ Isak eshaaa afɔle lɛ diɛŋtsɛ. (1 Mose 22:12, 13; Hebribii 11:17-19) Shi, yɛ lɛ diɛŋtsɛ egbɛfaŋ lɛ, Yehowa etsĩii kpɔmɔ nɔ lɛ ni ekɛaaha lɛ naa, eyɛ mli akɛ enɛ feemɔ ha lɛ diɛŋtsɛ kɛ e-Bi lɛ fɛɛ laaje nii wulu. Nɔ ni afee lɛ jɛɛɛ gbɛnaa nii ni Nyɔŋmɔ nuɔ he akɛ ekã enɔ akɛ etsu he nii mli, shi moŋ, ákɛ mlihilɛ krɛdɛɛ ko ni wɔsaaa lɛ kpojiemɔ. Ani wɔjieɔ hiɛsɔɔ kpo yɛ he kɛmɔɔ shi?—Hebribii 2:9.
Nɔ ni Ehaa Wɔnyɛɔ Wɔnáa
15. Kpɔmɔ nɔ lɛ esa mɛi ashihilɛ he yɛ nibii agbɛjianɔtoo nɛɛ mli po yɛ mɛɛ gbɛ nɔ?
15 Nakai gbɛjianɔ ni Nyɔŋmɔ jɛ suɔmɔ mli eto lɛ ena hewalɛ ni mli wa waa yɛ mɛi ni kpɛlɛɔ nɔ yɛ hemɔkɛyeli mli lɛ ashihilɛ nɔ. Tsutsu lɛ, kulɛ amɛtse amɛhe kɛjɛ Nyɔŋmɔ he, yɛ esha hewɔ. Taakɛ e-Wiemɔ lɛ kɛɔ lɛ, kulɛ amɛ ji ‘henyɛlɔi, ejaakɛ amɛjwɛŋmɔi yɛ nitsumɔi fɔji anɔ.’ (Kolosebii 1:21-23) Shi amɛbatsɔmɔ mɛi ni ‘akɛ Nyɔŋmɔ Bi lɛ gbele lɛ ekpata amɛkɛ Nyɔŋmɔ teŋ.’ (Romabii 5:8-10) Akɛni amɛtsake amɛshihilɛ gbɛ, ni amɛkpɛlɛ eshaifaa ni Nyɔŋmɔ kɛhaa mɛi ni náa Kristo afɔleshaa lɛ mli hemɔkɛyeli lɛ nɔ hewɔ lɛ, akɛ henilee ni mli tse eduro amɛ.—Hebribii 9:14; 1 Petro 3:21.
16. Mɛɛ jɔɔmɔi akɛhaa asafoku bibioo lɛ yɛ kpɔmɔ nɔ lɛ mli hemɔkɛyeli ni amɛyɔɔ lɛ hewɔ?
16 Yehowa ekpã duromɔ ni amɛsaaa, ni ji hegbɛ ni amɛna akɛ amɛfata e-Bi lɛ he yɛ ŋwɛi Maŋtsɛyeli lɛ mli lɛ mli eha mɛnɛɛmɛi ateŋ mɛi fioo ko, ni ji asafoku bibioo, kɛ yiŋtoo akɛ amɛaatsu Nyɔŋmɔ shishijee yiŋtoo kɛha shikpɔŋ lɛ he nii. (Luka 12:32) Ahala mɛnɛɛmɛi “kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli . . . [koni amɛfee] maŋtsɛmɛi kɛ osɔfoi [amɛha] wɔ-Nyɔŋmɔ lɛ, ni [amɛaaye] maŋtsɛ yɛ shikpɔŋ lɛ nɔ.” (Kpojiemɔ 5:9, 10) Bɔfo Paulo ŋma wolo eyaha mɛnɛɛmɛi akɛ: ‘Nyɛná bii atsɔmɔ mumɔ, mɔ mli ni wɔbolɔɔ yɛ akɛ: ‘Aba, ataa!’ lɛ. Lɛ Mumɔ lɛ diɛŋtsɛ kɛ wɔmumɔ lɛ yeɔ odase akɛ Nyɔŋmɔ bii ji wɔ. Ni kɛ bii ji wɔ lɛ, belɛ niyelɔi hu ji wɔ, Nyɔŋmɔ niyelɔi kɛ Kristo nanemɛi niyelɔi.’ (Romabii 8:15-17) Kpɛlɛmɔ ni Nyɔŋmɔ kpɛlɛɔ amɛnɔ akɛ ebii lɛ hewɔ lɛ, ahaa amɛnine shɛɔ wekukpaa ni jara wa, ni Adam laaje lɛ lɛ nɔ; shi akɛ hegbɛi krokomɛi ni ji ŋwɛi sɔɔmɔ—ni Adam naaa eko lɛ, baafata he aha nɛkɛ bii nɛɛ. Belɛ, ebɛ naakpɛɛ akɛ bɔfo Yohane wie akɛ: “Nyɛkwɛa suɔmɔ bɔ sɔŋŋ ni tsɛ lɛ eŋɔsumɔ wɔ, akɛ atsɛ wɔ Nyɔŋmɔ bii ni wɔji nɛɛ”! (1 Yohane 3:1) Jeee mla naa suɔmɔ (a·gaʹpe) pɛ Nyɔŋmɔ jieɔ lɛ kpo etsɔɔ mɛnɛɛmɛi, shi moŋ suɔmɔ ni hedɔɔ yɔɔ mli (phi·liʹa) hu, ni kadiɔ ekomefeemɔ ni hiɔ anɔkwa nanemɛi ateŋ lɛ.—Yohane 16:27.
17. (a) Mɛɛ hegbɛ akɛhaa mɛi fɛɛ ni náa kpɔmɔ nɔ lɛ mli hemɔkɛyeli lɛ? (b) Mɛni “Nyɔŋmɔ bii lɛ anunyam heyeli lɛ” baatsɔɔ kɛha amɛ?
17 Yehowa gbeleɔ hegbɛ naa ehaa mɛi krokomɛi hu—ni ji mɛi fɛɛ ni náa Nyɔŋmɔ mlihilɛ gbɛjianɔtoo kɛha wala kɛtsɔ Yesu Kristo nɔ lɛ mli hemɔkɛyeli lɛ—koni amɛna amɛkɛ lɛ teŋ wekukpaa ni jara wa ni Adam laaje lɛ lɛ. Bɔfo Paulo tsɔɔ mli akɛ: “Bɔɔ nii [ni ji adesai bɔɔ nii ni jɛ Adam mli] lɛ agbɛkwɛmɔ kpɛ̃kpɛ̃ɛkpɛ̃ lɛ miimɛ Nyɔŋmɔ bii lɛ akpojiemɔ lɛ [ni ji akɛ, amɛmiimɛ be mli ni odaseyeli baaje kpo faŋŋ akɛ Nyɔŋmɔ bii, ni fata Kristo he akɛ ŋwɛi Maŋtsɛyeli lɛ gboshiniyelɔi lɛ, miifee nibii kpakpai diɛŋtsɛ yɛ adesai ahewɔ]. Ejaakɛ aŋɔ bɔɔ nii lɛ awo yakayaka nii ashishi [afɔ amɛ yɛ esha mli kɛ gbele gbɛkpamɔ, ni gbɛ ko kwraa bɛ ni amɛbaanyɛ amɛtsɔ nɔ amɛkpɔ̃ amɛhe], jeee amɛ diɛŋtsɛ amɛsuɔmɔ naa, shi moŋ yɛ mɔ ni ba amɛ shi lɛ hewɔ, yɛ nɔhiɛkamɔ [ni Nyɔŋmɔ kɛha lɛ] mli; akɛ bɔɔ nii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.” (Romabii 8:19-21) Mɛni nakai heyeli lɛ baatsɔɔ? Ákɛ akpɔ̃ amɛ kɛjɛ esha kɛ gbele nyɔŋyeli mli. Amɛbaaná jwɛŋmɔŋ kɛ gbɔmɔtsoŋ emuuyeli, Paradeiso akɛ amɛshia, kɛ naanɔ wala ni amɛbaaná amɛ emuuyeli lɛ mli ŋɔɔmɔ yɛ mli, koni amɛjie amɛ hiɛsɔɔ kpo amɛtsɔɔ Yehowa, anɔkwa Nyɔŋmɔ kome pɛ lɛ. Ni mɛɛ gbɛ nɔ enɛɛmɛi fɛɛ tsɔ kɛba? Kɛtsɔ Nyɔŋmɔ Bi koome lɛ kpɔmɔ afɔleshaa lɛ nɔ.
18. Mɛni wɔbaafee yɛ March 23, yɛ hulushinyɔɔ sɛɛ, ni mɛni hewɔ?
18 Yɛ Nisan 14, afi 33 Ŋ.B. lɛ, Yesu to egbele lɛ Kaimɔ shishi, yɛ ŋwɛitsu ko nɔ yɛ Yerusalem. Egbele lɛ kaimɔ he gbijurɔ ni ayeɔ daa afi lɛ ebatsɔ nifeemɔ ko ni he hiaa waa yɛ anɔkwa Kristofoi fɛɛ ashihilɛ mli. Yesu diɛŋtsɛ kɛ famɔ ha akɛ: “Nyɛfea enɛ ni nyɛŋɔkai mi.” (Luka 22:19) Yɛ 1997 mli lɛ, abaafee Kaimɔ lɛ yɛ hulushinyɔɔ sɛɛ yɛ March 23 (ni ji be mli ni Nisan 14 jeɔ shishi lɛ). Nɔ ko kwraa bɛ ni he baahia yɛ nakai gbi lɛ nɔ, fe akɛ aaahi jɛmɛ kɛha nɛkɛ Kaimɔ nifeemɔ nɛɛ.
Te Obaaha Hetoo Tɛŋŋ?
◻ Nyɔŋmɔ ejie suɔmɔ babaoo kpo etsɔɔ adesai yɛ mɛɛ gbɛi anɔ?
◻ Mɛni hewɔ ehe hiaa akɛ aná adesa wala ni eye emuu ni akɛkpɔ̃ Adam shwiei lɛ?
◻ Mɛɛ nɔ kpele Yehowa laaje beni ekɛ kpɔmɔ nɔ lɛ hã lɛ?
◻ Mɛni kpɔmɔ nɔ lɛ hãa wɔnaa hegbɛ akɛ wɔɔna?
[Mfoniri ni yɔɔ baafa 10]
Nyɔŋmɔ kɛ e-Bi koome lɛ hã