Yitso Nyɔŋmai Enyɔ Kɛ Ekome
Yehowa Yiŋtoo Yeɔ Omanye yɛ Anunyam Mli
1, 2. (a) Mɛni ji Yehowa yiŋtoo yɛ ebɔɔ nii ni yɔɔ jwɛŋmɔ lɛ ahe? (b) Namɛi fata Nyɔŋmɔ jálɔi aweku ni efee ekome lɛ he?
BƆƆ nii fɛɛ ni yɔɔ jwɛŋmɔ lɛ efee ekome kɛmiijá anɔkwa Nyɔŋmɔ kome pɛ lɛ, ni amɛ fɛɛ amɛmiiná anunyam heyeli mli ŋɔɔmɔ ákɛ Nyɔŋmɔ bii—no ji Yehowa yiŋtoo ni suɔmɔ yɔɔ mli. No hu ji nɔ ni mɛi ni sumɔɔ jalɛ nifeemɔ lɛ kɛ hiɛdɔɔ shweɔ waa ni amɛná.
2 Yehowa je shishi akɛ ebaaha nɛkɛ anunyam yiŋtoo nɛɛ aba mli beni eje enibɔɔ nitsumɔi ashishi lɛ. E-klɛŋklɛŋ bɔɔ nɔ ji Binuu ní kɛjɛ eshitee lɛ sɛɛ kɛbaa nɛɛ lɛ, eji ‘Nyɔŋmɔ anunyam lɛ kpɛmɔ kɛ esu lɛ henɔ lɛ.’ (Hebribii 1:1-3) Binuu nɛɛ yɛ srɔto, ejaakɛ Nyɔŋmɔ kome pɛ bɔ lɛ. No sɛɛ lɛ, nɛkɛ Binuu nɛɛ nɔ abaatsɔ ni akɛ mɛi krokomɛi fɛɛ aba shihilɛ mli: klɛŋklɛŋ lɛ, bɔfoi lɛ yɛ ŋwɛi, kɛkɛ lɛ, adesai yɛ shikpɔŋ nɔ. (Hiob 38:7; Luka 3:38) Mɛnɛɛmɛi fɛɛ feɔ jeŋ muu fɛɛ weku kome. Yehowa ji Nyɔŋmɔ kɛha amɛ fɛɛ, Jeŋ Muu Fɛɛ Maŋtsɛ, kɛ amɛ-Tsɛ ni yɔɔ suɔmɔ hu.
3. (a) Mɛɛ gboshinii wɔ fɛɛ wɔná kɛjɛ wɔ klɛŋklɛŋ fɔlɔi lɛ aŋɔɔ? (b) Mɛɛ gbɛjianɔ ni suɔmɔ yɔɔ mli Yehowa to kɛha Adam shwiei?
3 Beni abu wɔ klɛŋklɛŋ fɔlɔi ni ji adesai lɛ gbele fɔ akɛ mɛi ni jɛ amɛsuɔmɔ mli amɛfee esha lɛ, ashwie amɛ kɛjɛ Eden, ni Nyɔŋmɔ kpoo amɛ. Amɛbafeee ejeŋ muu fɛɛ weku lɛ fã dɔŋŋ. (1 Mose 3:22-24; 5 Mose 32:4, 5) Wɔ fɛɛ wɔji amɛshwiei, no hewɔ lɛ akɛ esha sui fɔ wɔ. Shi Yehowa le akɛ Adam kɛ Hawa shwiei lɛ ateŋ mɛi komɛi baasumɔ jalɛ nifeemɔ. No hewɔ lɛ E-jɛ esuɔmɔ mli eto gbɛjianɔ koni mɛnɛɛmɛi anine anyɛ ashɛ “Nyɔŋmɔ bii lɛ anunyam heyeli lɛ” nɔ.—Romabii 8:20, 21.
Gbɛhe ni Duromɔ Yɔɔ Mli lɛ Ŋmɛɛ Israel
4. Mɛɛ hegbɛ Yehowa kɛha blema Israel?
4 Beni Yehowa bɔ Adam sɛɛ aaafee afii 2,500 lɛ, ekɛ hegbɛ ha adesai komɛi koni amɛkɛ Lɛ aba wekukpaa krɛdɛɛ ko mli. Ehala blema Israel koni amɛbafee ewebii, ni ekɛ e-Mla lɛ ha amɛ. (1 Mose 12:1, 2) Efee amɛ maŋ, ni ekɛ amɛ tsu eyiŋtoo he nii. (5 Mose 14:1, 2; Yesaia 43:1) Shi kɛlɛ, amɛyɛ esha kɛ gbele nyɔŋyeli shishi lolo, no hewɔ lɛ amɛnáaa anunyam heyeli ni Adam kɛ Hawa ná mli ŋɔɔmɔ kɛjɛ shishijee lɛ eko.
5. Te fee tɛŋŋ ni wekukpaa krɛdɛɛ ni Israelbii lɛ yɔɔ yɛ Nyɔŋmɔ hiɛ lɛ ŋmɛɛ amɛ lɛ?
5 Kɛlɛ, Israelbii lɛ ná duromɔ shidaamɔ yɛ Nyɔŋmɔ hiɛ. Gbɛnaa nii hu kã amɛnɔ akɛ amɛkɛ bulɛ aha Yehowa ákɛ amɛ-Tsɛ, ni amɛtsu nii ni kɛ eyiŋtoo kpãa gbee. Yesu ma bɔ ni nakai gbɛnaa nii lɛ he nitsumɔ he hiaa ha lɛ nɔ mi. (Mateo 5:43-48) Shi, Israel maŋ lɛ efeee enɛ. Beni nakai Yudafoi lɛ kɛɔ akɛ, “tsɛ kome wɔyɔɔ, lɛ ji Nyɔŋmɔ” lɛ, Yesu jaje akɛ amɛnifeemɔi kɛ su ni amɛjieɔ lɛ kpo amɛtsɔɔ lɛ tsɔɔ akɛ nɔ ni amɛkɛɔ lɛ ji amale. (Yohane 8:41, 44, 47) Nyɔŋmɔ fo Mla lɛ mli yɛ afi 33 Ŋ.B., ni wekukpaa krɛdɛɛ ni Israel kɛ lɛ yɔɔ lɛ ba naagbee. Shi ani enɛ tsɔɔ akɛ gbɔmɛi nyɛŋ aná amɛkɛ Nyɔŋmɔ teŋ wekukpaa kpakpa mli ŋɔɔmɔ dɔŋŋ?
“Nibii lɛ ni Yɔɔ Ŋwɛi lɛ” Anaabuamɔ
6. Mɛni ji yiŋtoo ni yɔɔ “nɔkwɛmɔ gbɛjianɔtoo” ni Paulo tsĩ tã yɛ Efesobii 1:9, 10 lɛ sɛɛ?
6 Bɔfo Paulo tsɔɔ akɛ adesai ateŋ mɛi komɛi baanyɛ aná amɛkɛ Nyɔŋmɔ teŋ wekukpaa krɛdɛɛ mli ŋɔɔmɔ. Ákɛ nɔkwɛmɔnɔ lɛ, yɛ gbɛjianɔ ni Yehowa eto koni mɛi ni tsɔɔ hemɔkɛyeli lɛ anyɛ atsɔmɔ E-shiabii lɛ hewɔ lɛ, Paulo ŋma akɛ: “[Nyɔŋmɔ] eha wɔle esuɔmɔnaa nii amli teemɔŋ sane krɔŋkrɔŋ lɛ. Eji nɔ ni sa ehiɛ ni eto eyiŋ yɛ he yɛ lɛ diɛŋtsɛ emli kɛha nɔkwɛmɔ gbɛjianɔtoo yɛ be ni ato lɛ naagbee, nɔ ni ji ákɛ, koni ebua nibii fɛɛ anaa ekoŋŋ yɛ Kristo lɛ mli, nibii lɛ ni yɔɔ ŋwɛi lɛ kɛ nibii lɛ ni yɔɔ shikpɔŋ lɛ nɔ lɛ.” (Efesobii 1:9, 10, NW) Nɛkɛ “nɔkwɛmɔ gbɛjianɔtoo” nɛɛ damɔ Yesu Kristo nɔ. Lɛ enɔ atsɔɔ akɛ adesai baa nɔkpɛlɛmɔ shidaamɔ mli yɛ Nyɔŋmɔ hiɛ. Amɛteŋ mɛi fioo ko yɛ gbɛkpamɔ akɛ amɛaahi ŋwɛi. Amɛteŋ mɛi ni fa kwraa baahi shikpɔŋ nɔ kɛya naanɔ.
7. Namɛi ji “nibii lɛ ni yɔɔ ŋwɛi lɛ”?
7 Klɛŋklɛŋ lɛ, kɛjɛ Pentekoste afi 33 Ŋ.B. kɛbaa ni agbala jwɛŋmɔ kɛtee “nibii lɛ ni yɔɔ ŋwɛi lɛ,” ni ji mɛi ni kɛ Kristo baafee niyelɔi yɛ ŋwɛi Maŋtsɛyeli lɛ mli lɛ anɔ. Yɛ hemɔkɛyeli ni amɛyɔɔ yɛ Yesu afɔleshaa lɛ jara lɛ mli hewɔ lɛ, Nyɔŋmɔ bu amɛ jalɔi. (Romabii 5:1, 2) Yɛ be ni sa mli lɛ, akɛ Yudafoi kɛ Jeŋmajiaŋbii fata he, ni “nibii lɛ ni yɔɔ ŋwɛi lɛ” ayibɔ baafee 144,000. (Galatabii 3:26-29; Kpojiemɔ 14:1) Amɛteŋ shwɛɛnii ko pɛ yɔɔ shikpɔŋ nɔ lolo.
“Nibii lɛ ni Yɔɔ Shikpɔŋ lɛ Nɔ lɛ” Anaabuamɔ
8. Namɛi ji “nibii lɛ ni yɔɔ shikpɔŋ lɛ nɔ lɛ,” ni mɛɛ wekukpaa kã amɛkɛ Yehowa teŋ?
8 Nakai nɔkwɛmɔ gbɛjianɔtoo lɛ nɔŋŋ miibua “nibii lɛ ni yɔɔ shikpɔŋ lɛ nɔ lɛ” anaa. Aabua gbɔmɛi akpekpei abɔ naa bianɛ kɛ gbɛkpamɔ akɛ amɛbaahi shikpɔŋ nɔ kɛya naanɔ. Amɛkɛ Maŋtsɛyeli niyelɔi lɛ ateŋ shwɛɛnii lɛ efee ekome kɛmiijie Yehowa gbɛi lɛ yi ni amɛwóɔ ejamɔ nɔ. (Yesaia 2:2, 3; Zefania 3:9) Amɛtsɛɔ Yehowa hu akɛ “Tsɛ” ejaakɛ amɛyɔseɔ lɛ akɛ wala jɛɛhe. Ni amɛnáa nɔkpɛlɛmɔ shidaamɔ mli ŋɔɔmɔ yɛ ehiɛ yɛ hemɔkɛyeli ni amɛyɔɔ yɛ Yesu lá ni efɔse eshwie shi lɛ mli lɛ hewɔ. (Kpojiemɔ 7:9, 14) Shi, akɛni amɛyeee emuu lolo hewɔ lɛ, amɛnɔ ni aaakpɛlɛ kwraa akɛ Nyɔŋmɔ bii lɛ baaba mli yɛ wɔsɛɛ be mli.
9. Mɛɛ shiwoo Romabii 8:21 kɛhaa adesai?
9 Mɛi ni yɔɔ shikpɔŋ nɔ hiɛnɔkamɔ nɛɛ kɛ hehiamɔ miimɛ be ni adesa bɔɔ nii lɛ “baaye amɛhe kɛjɛ fitemɔ nyɔŋyeli lɛ mli.” (Romabii 8:21) Nakai heyeli lɛ baaje shishi yɛ be mli ni Kristo kɛ eŋwɛi tai lɛ kɛ amanehulu kpeteŋkpele lɛ eba naagbee kɛtsɔ Harmagedon ni ekɛaafo sɛɛ lɛ nɔ. Enɛ baatsɔɔ Satan yiwalɛ nibii agbɛjianɔtoo lɛ fɛɛ hiɛkpatamɔ, ni nɔ ni baanyiɛ sɛɛ aba ji Kristo ni yɔɔ Maŋtsɛyeli hewalɛ mli lɛ Afii Akpe Nɔyeli lɛ mli jɔɔmɔi lɛ.—Kpojiemɔ 19:17-21; 20:6.
10. Mɛɛ yijiemɔ lala Yehowa tsuji baalá?
10 Kwɛ miishɛɛ diɛŋtsɛ ni eeeji beni Yehowa tsuji ni yɔɔ shikpɔŋ nɔ lɛ feɔ ekome kɛjajeɔ etsuji ni yɔɔ ŋwɛi lɛ ahenumɔi, mɛi ni kɛ nyamɔ jajeɔ akɛ: “Onitsumɔi lɛ dara ni amɛyɛ naakpɛɛ, [Yehowa, NW] Nyɔŋmɔ Ofe; ogbɛ̀i lɛ ja ni anɔkwa ji amɛ, [bo naanɔi a-Maŋtsɛ, NW]. Namɔ po sheŋo gbeyei, [Yehowa, NW] ni ewoŋ ogbɛi lɛ hiɛ nyam? Ejaakɛ bo okome too ji mɔ krɔŋkrɔŋ; ejaakɛ jeŋmaji lɛ fɛɛ aaaba ni amɛbajá yɛ ohiɛ, ejaakɛ ajie ojalɛ nii lɛ ashi faŋŋ.” (Kpojiemɔ 15:3, 4) Hɛɛ, Yehowa tsuji fɛɛ baafee ekome yɛ anɔkwa Nyɔŋmɔ kome pɛ lɛ jamɔ mli. Abaatee gbohii lɛ po shi, ni abaaha amɛ hegbɛ ni amɛfata he kɛhole amɛgbeei anɔ kɛjie Yehowa yi.—Bɔfoi lɛ Asaji 24:15.
Heyeli ni Yɔɔ Naakpɛɛ Miiba
11. Mɛɛ heyeli ni yɔɔ naakpɛɛ mɛi ni baaje amanehulu kpeteŋkpele lɛ mli lɛ baaná mli ŋɔɔmɔ?
11 Beni amanehulu kpeteŋkpele lɛ, ni Harmagedon kɛbaa naagbee lɛ ejie efɔŋfeemɔ kɛjɛ shikpɔŋ lɛ nɔ sɛɛ lɛ, Satan Abonsam efeŋ ‘nibii agbɛjianɔtoo nɛɛ nɔ nyɔŋmɔ’ dɔŋŋ. Ehe ebahiaŋ ni Yehowa jálɔi ana nɔ̃ yɛ Satan hewalɛ fɔŋ lɛ shishi dɔŋŋ. (2 Korintobii 4:4; Kpojiemɔ 20:1, 2) Apasa jamɔ maleŋ Yehowa he, ni etsuŋ nii akɛ hewalɛ ni gbálaa adesa weku lɛ teŋ dɔŋŋ. Anɔkwa Nyɔŋmɔ lɛ tsuji nuŋ jalɛ sane ni ayeee kɛ amɛshishiumɔ yɛ nɔyeli mli onukpai adɛŋ lɛ he dɔŋŋ. Mɛɛ heyeli ni yɔɔ naakpɛɛ po abaaná mli ŋɔɔmɔ nɛkɛ!
12. Mɛɛ gbɛ nɔ abaatsɔ aha mɔ fɛɛ mɔ aye ehe kɛjɛ esha kɛ nɔ ni jɛ mli ba lɛ mli?
12 Ákɛ Yesu ji “Nyɔŋmɔ [Toobi lɛ, NW] ni wóɔ je lɛ he esha lɛ kɛyaa” lɛ, ekɛ efɔleshaa lɛ jara lɛ baatsu nii ni ekɛjie adesai ahe eshai lɛ kɛya. (Yohane 1:29) Beni Yesu yɔɔ shikpɔŋ nɔ lɛ, kɛ́ ekɛ mɔ ko he eshai ke lɛ lɛ, etsaa mɔ ni akɛ ehe eshai eke lɛ lɛ hu helai koni ekɛye enɛ he odase. (Mateo 9:1-7; 15:30, 31) Nakai nɔŋŋ hu ákɛ Nyɔŋmɔ ŋwɛi Maŋtsɛyeli lɛ nɔ Maŋtsɛ lɛ, Kristo Yesu baatsɔ naakpɛɛ gbɛ nɔ etsa shwilafoi, mumuii, toimulɔi, obubuafoi, mɛi ni yeɔ jwɛŋmɔŋ helai kɛ mɛi ni helai krokomɛi gbaa amɛnaa lɛ. (Kpojiemɔ 21:3, 4) Mɛi ni feɔ toiboo lɛ fɛɛ baana ni “esha mla” lɛ egbo kwraa yɛ amɛmli bɔni afee ni amɛsusumɔi kɛ amɛnifeemɔi afee nɔ ni sa amɛ diɛŋtsɛ kɛ Nyɔŋmɔ hiɛ. (Romabii 7:21-23) Beni Afii Akpe lɛ aaaba naagbee lɛ, no mli lɛ akɛ amɛ eba adesa emuuyeli mli, yɛ anɔkwa Nyɔŋmɔ kome pɛ lɛ ‘subaŋ kɛ ehenɔ’ lɛ mli.—1 Mose 1:26.
13. Yɛ Afii Akpe Nɔyeli lɛ naagbee lɛ, mɛni Kristo baafee, ni mɛni baajɛ mli aba?
13 Beni Kristo kɛ adesai eba emuuyeli mli lɛ, agbɛnɛ ekɛ hegbɛ ni akɛha lɛ kɛha nitsumɔ nɛɛ baaku sɛɛ aha Tsɛ lɛ ekoŋŋ: “Eeeŋɔ maŋtsɛyeli lɛ eha Nyɔŋmɔ kɛ tsɛ lɛ, ni eeefo nɔyeli fɛɛ kɛ hegbɛ fɛɛ kɛ hewalɛ fɛɛ sɛɛ lɛ. Shi ja eye maŋtsɛ kɛyashi beyinɔ ni eeeŋɔ henyɛlɔi lɛ fɛɛ eto enajiashi.” (1 Korintobii 15:24, 25) No mli lɛ Maŋtsɛyeli lɛ Afii Akpe Nɔyeli lɛ etsu eyiŋtoo he nii egbe naa; no hewɔ lɛ ehe ebahiaŋ ni nɔyeli ni kwɛ sɛɛ nɛɛ ahi Yehowa kɛ adesai ateŋ dɔŋŋ. Ni akɛni no mli lɛ ajie esha kɛ gbele kɛtee kwraa, ni akpɔ̃ adesai hewɔ lɛ, Yesu he ni baahia akɛ Kpɔlɔ lɛ baa naagbee. Biblia lɛ tsɔɔ mli akɛ: “[Bi lɛ] lɛ diɛŋtsɛ hu eeeŋɔ ehe eto [Mɔ] ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ ayitso.”—1 Korintobii 15:28.
14. Abaaha adesai fɛɛ ni eye emuu lɛ atsɔ mɛni mli, ni mɛni hewɔ?
14 Yɛ enɛ sɛɛ lɛ, akɛ hegbɛ baaha adesai ni eye emuu lɛ ni amɛjie lɛ kpo amɛtsɔɔ akɛ nɔ ni amɛhala ji ni amɛsɔmɔ anɔkwa Nyɔŋmɔ kome pɛ lɛ kɛya naanɔ. No hewɔ lɛ, dani Yehowa aaaŋɔ amɛ jogbaŋŋ ákɛ ebii lɛ, ekɛ naagbee kaa baaka nakai adesai ni eye emuu lɛ fɛɛ. Abaafɛne Satan kɛ edaimonioi lɛ kɛjɛ bu kwɔŋkwɔŋ lɛ mli. Enɛ yeŋ mɛi ni sumɔɔ Yehowa jogbaŋŋ lɛ awui ko kɛyaŋ shɔŋŋ. Shi abaakpata mɔ fɛɛ mɔ ni yeee anɔkwa ni eeeŋmɛ gbɛ ni alaka lɛ ni egbo Yehowa nɔ toi lɛ hiɛ kwraa kɛya naanɔ, kɛfata shishijee atuatselɔ lɛ kɛ edaimonioi lɛ ahe.—Kpojiemɔ 20:7-10.
15. Mɛɛ shihilɛ baahi Yehowa bɔɔ nii ni yɔɔ jwɛŋmɔ lɛ fɛɛ ateŋ shikome ekoŋŋ?
15 Agbɛnɛ Yehowa baaŋɔ adesai fɛɛ ni eye emuu ni fiɔ jeŋ muu fɛɛ maŋtsɛ ni Nyɔŋmɔ ji lɛ sɛɛ yɛ naagbee kaa lɛ mli lɛ akɛ ebii. Kɛjɛ nakai be lɛ nɔ kɛyaa lɛ, amɛbaaná Nyɔŋmɔ bii lɛ anunyam heyeli lɛ mli ŋɔɔmɔ kɛmɔ shi akɛ Nyɔŋmɔ jeŋ muu fɛɛ weku lɛ fã. Bɔɔ nii ni yɔɔ jwɛŋmɔ yɛ ŋwɛi kɛ shikpɔŋ nɔ lɛ fɛɛ baafee ekome shikome ekoŋŋ ni amɛjá lɛ ákɛ anɔkwa Nyɔŋmɔ kome pɛ lɛ. No mli lɛ Yehowa yiŋtoo eye omanye yɛ anunyam mli! Ani oosumɔ ni ofee nakai naanɔ jeŋ muu fɛɛ weku ni yɔɔ miishɛɛ lɛ fã? Kɛji nakai ni lɛ, belɛ wɔmiiwo bo hewalɛ ni obo nɔ ni Biblia lɛ kɛɔ yɛ 1 Yohane 2:17 lɛ toi, akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”
Sanegbaa ni Akɛtiɔ Mli
• Mɛɛ wekukpaa kã Yehowa jálɔi fɛɛ kɛ lɛ teŋ dani Eden atuatsemɔ lɛ ba?
• Mɛɛ gbɛnaa nii kã mɛi ni ji Nyɔŋmɔ tsuji lɛ anɔ?
• Namɛi hu baaba abatsɔmɔ Nyɔŋmɔ bii, ni enɛ kɔɔ Yehowa yiŋtoo yɛ jamɔ ni efee ekome he lɛ he yɛ mɛɛ gbɛ nɔ?
[Mfoniri ni yɔɔ baafa 190]
Adesai ni feɔ toiboo baaná wala mli ŋɔɔmɔ yɛ jeŋ muu fɛɛ paradeiso mli