Yehowa Mumɔ Lɛ Tsɔɔ Ewebii Agbɛ

“Omumɔ lɛ hi; ha etsɔɔ mi gbɛ yɛ jalɛ shikpɔŋ nɔ!”​—LALA 143:​10, New World Translation.

 1, 2. Mɛni baanyɛ ekɛ haomɔ aba Yehowa tsuji anɔkwafoi anɔ?

‘MINUƆ he akɛ mihao waa! Nɛgbɛ po mana miishɛjemɔ ko kɛjɛ? Ani Nyɔŋmɔ ekpoo mi?’ Ani onuɔ he nakai? Kɛ onuɔ he nakai lɛ be lɛ jeee okomeŋ. Eyɛ mli akɛ Yehowa tsuji anɔkwafoi lɛ yɛ mumɔŋ paradeiso ni shwereɔ lɛ mli moŋ, shi amɛkɛ naagbai, piŋmɔi kɛ kaai ni haoɔ mɔ ni baa adesai fɛɛ nɔ lɛ kpeɔ yɛ bei komɛi amli.​—1 Korintobii 10:⁠13.

² Ekolɛ kaa ko ni sɛɛ tsɛɔ waa loo naagba wulu ko ka enɔ. Ekole ooye awerɛho yɛ suɔlɔ ko gbele he, ni obaanu he akɛ eshwɛ okome too. Aloo ekolɛ otsui miiye yɛ oshieŋtsɛ ko hela he. Shihilɛi ni tamɔ nɛkɛ haŋ ona miishɛɛ kɛ toiŋjɔlɛ ni ebaanyɛ ewo ohemɔkɛyeli po he gbeyei. Mɛni esa akɛ ofee?

Bi Nyɔŋmɔ ni Ekɛ Emumɔ lɛ Ahao

 3. Kɛji akɛ nɔ ko miishɔ̃ sui komɛi tamɔ toiŋjɔlɛ kɛ miishɛɛ kɛmiijɛ odɛŋ lɛ, mɛɛ nii ni nilee yɔɔ mli ni esa akɛ ofee?

³ Kɛ nɔ ko haaa ona toiŋjɔlɛ, miishɛɛ, loo Nyɔŋmɔ gbeyeishemɔ su kpakpa ko lɛ, ebaafee nɔ ni nilee yɔɔ mli akɛ ooosɔle obi ni ona Nyɔŋmɔ mumɔ krɔŋkrɔŋ loo enifeemɔ hewalɛ lɛ. Mɛni hewɔ? Ejaakɛ Yehowa mumɔ lɛ woɔ yibii kpakpai ni yeɔ buaa Kristofonyo lɛ koni enyɛ edamɔ naagbai, piŋmɔi, kɛ kaai anaa. Yɛ be mli ni bɔfo Paulo ebɔ kɔkɔ yɛ “heloo lɛ nitsumɔi” ahe lɛ, eŋma akɛ: “Shi mumɔ lɛ yibii ji suɔmɔ, miishɛɛ, toiŋjɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, henɔyeli. Enɛɛmɛi lɛ mla ko eguuu.”​—Galatabii 5:​19-23.

 4. Kɛ okɛ kaa ko miikpe lɛ, mɛni hewɔ ebaafee nɔ ni sa jogbaŋŋ akɛ oootsɔɔ nɔ ni ji lɛ diɛŋtsɛ yɛ osɔlemɔi amli lɛ?

⁴ Yɛ kaa ni ekolɛ okɛkpeɔ lɛ hewɔ lɛ, obaayoo akɛ oshara eba mlijɔlɛ loo heshibaa su ni ooolaaje lɛ he. Kɛkɛ lɛ feemɔ nii tɛ̃ɛ ni osɔle oha Yehowa Nyɔŋmɔ ni eha bo emumɔ lɛ yibii ni ji mlijɔlɛ lɛ. Kɛ kaa ko ka onɔ lɛ, be lɛ yibii ni ji henɔyeli he miihia bo titri. Shi ebaafee nɔ ni sa hu akɛ ooosɔle obi ŋwɛi yelikɛbuamɔ ni oku kaa lɛ naa, koni ajieo kɛjɛ Satan dɛŋ, ni ona nilee ni he hiaa ni aaaha oŋmɛ otsui shi yɛ kaa lɛ mli.​—Mateo 6:​13; Yakobo 1:​5, 6.

 5. Kɛ shihilɛ lɛ miihao bo aahu akɛ oleee mumɔ lɛ yibii po ni esa akɛ osɔle yɛ he lɛ, mɛni abaanyɛ afee?

⁵ Shi yɛ bei komɛi amli lɛ, shihilɛi lɛ baahao bo aahu loo eeefutu ojwɛŋmɔ aahu akɛ oleee nɔ mumɔ lɛ yibii ni he hiaa bo. Yɛ anɔkwale mli lɛ, miishɛɛ, toiŋjɔlɛ, mlijɔlɛ kɛ sui kpakpai krokomɛi lɛ fɛɛ baaba abaje oshara mli. Kɛkɛ lɛ mɛni? Mɛni hewɔ obiii ni Nyɔŋmɔ aha bo mumɔ krɔŋkrɔŋ lɛ diɛŋtsɛ koni eha yibii ni he hiaa lɛ ashwere yɛ osane lɛ mli? Yibii ni he hiaa lɛ baanyɛ afee suɔmɔ loo miishɛɛ loo toiŋjɔlɛ aloo mumɔ lɛ yibii sɔrɔtoi lɛ ni akɛfutu. Agbɛnɛ sɔlemɔ koni Nyɔŋmɔ aye abua bo koni oŋmɛɛ ohe oha mumɔ lɛ gbɛtsɔɔmɔ, ejaakɛ ekɛtsuɔ nii ni ekɛtsɔɔ ewebii agbɛ.

Yehowa Miisumɔ ni Eye Ebua

 6. Mɛɛ gbɛ nɔ Yesu tsɔ ema nɔ mi eha esɛɛnyiɛlɔi lɛ akɛ ehe miihia ni asɔle ni akakpa lɛ?

⁶ Beni Yesu Kristo kaselɔi lɛ bi lɛ ni etsɔɔ amɛ sɔlemɔ lɛ, efa ko wo amɛ hewalɛ ni amɛsɔle amɛbi Nyɔŋmɔ mumɔ lɛ. Klɛŋklɛŋ lɛ Yesu kɛ nɔkwɛmɔ nɔ ko ni baatsirɛ amɛ ni amɛsɔle daa ha amɛ. Ekɛɛ: “Nyɛteŋ namɔ ni yɔɔ shieŋtsɛ ni eeetee eŋɔɔ nyɔɔŋ teŋ, ni eyakɛɛ lɛ akɛ: ‘Faa mi aboloi etɛ, ejaakɛ mishieŋtsɛ ko ejɛ gbɛ ebato mi, ni mibɛ nɔ ko ni mikɛbaama ehiɛ’? Ni mɔ ni yɔɔ tsuŋ lɛ aaahere nɔ akɛ: ‘Kaagba minaa; aŋa shinaa lɛ momo, ni mi kɛ mibii jwere saa nɔ, minyɛŋ shi mate ni mahao.’ Miikɛɛ nyɛ akɛ, kɛ ka eshieŋtsɛ ni ji lɛ lɛ hewɔŋ kulɛ eteŋ shi ni eha lɛ, shi enaagbamɔ lɛ hewɔ lɛ eeete shi kɛ̃ ni eeeha lɛ bɔ fɛɛ bɔ ni etaoɔ.”​—Luka 11:​5-8.

 7. Mɛni ji Yesu wiemɔi ni yɔɔ Luka 11:​11-13 lɛ mli agugu, ni mɛɛ nɔmimaa amɛkɛhaa wɔ yɛ Nyɔŋmɔ yɛ emumɔ lɛ he?

⁷ Yehowa miisumɔ ni eye ebua etsuji anɔkwafoi ni amɛjɔɔ amɛhe nɔ lɛ ateŋ mɔ fɛɛ mɔ, ni eboɔ amɛnibimɔi lɛ atoi. Shi kɛji akɛ gbɔmɔ ni tamɔ nɛkɛ lɛ ‘tee nɔ ebi,’ taakɛ Yesu wo hewalɛ lɛ, enɛ tsɔɔ nɔ ni eshweɔ yɛ etsuiŋ ni eji hemɔkɛyeli kpojiemɔ. (Luka 11:​9, 10) Kristo kɛfata he akɛ: “Shi mɛɛ tsɛ yɔɔ nyɛteŋ ni kɛji ebi bi lɛ aboloo, ni eeeha lɛ tɛ? Aloo kɛji ebi lɛ loo lɛ, ni eeeŋɔ onufu efee loo eha lɛ? Aloo kɛji ebi wuɔwɔlɔ lɛ, ni eeeŋɔ nyɔŋmɔŋkrakro eha lɛ? Belɛ kɛji nyɛ ni nyɛji mɛi fɔji lɛ, nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛɔ nɔŋŋ nyɛ-Tsɛ ni yɔɔ ŋwɛi lɛ eŋɔŋ mumɔ krɔŋkrɔŋ ehaŋ mɛi ni biɔ lɛ lɛ?” (Luka 11:​11-13) Kɛji akɛ shikpɔŋ nɔ fɔlɔ ko ni yi wa yɛ gbɛ ko nɔ yɛ esha su ni akɛfɔ lɛ hewɔ lɛ kɛ nibii kpakpai haa ebi lɛ, eyɛ faŋŋ akɛ wɔŋwɛi Tsɛ lɛ baaya nɔ ekɛ emumɔ krɔŋkrɔŋ lɛ aha etsuji anɔkwafoi lɛ ateŋ mɔ fɛɛ mɔ ni kɛ heshibaa biɔ enɛ lɛ.

 8. Lala 143:10 kɔɔ David, Yesu, kɛ Nyɔŋmɔ tsuji ni yɔɔ ŋmɛnɛŋmɛnɛ beaŋ lɛ ahe yɛ mɛɛ gbɛ nɔ?

⁸ Bɔni afee ni wɔna Nyɔŋmɔ mumɔ lɛ he sɛɛ lɛ, esa akɛ wɔsumɔ akɛ wɔɔnyiɛ egbɛtsɔɔmɔ sɛɛ taakɛ David fee lɛ. Esɔle akɛ: “’Tsɔɔmɔ mi ni mafee osuɔmɔnaa nii, ejaakɛ bo ji mi-Nyɔŋmɔ. Omumɔ lɛ hi; ha etsɔɔ mi gbɛ yɛ jalɛ shikpɔŋ nɔ.” ( Lala 143:​10, NW) David ni Israel Maŋtsɛ Saul eha etsɔ kobɔfo lɛ miisumɔ ni Nyɔŋmɔ mumɔ lɛ atsɔɔ lɛ gbɛ koni ena nɔmimaa akɛ gbɛ ni enyiɛ nɔ lɛ ja. Yɛ be ko mli lɛ, Abiatar kɛ efod ni osɔfoi lɛ kɛbiɔ nɔ ni ji Nyɔŋmɔ suɔmɔnaa nii lɛ ba. Ákɛ osɔfo ni damɔ Nyɔŋmɔ najiaŋ lɛ, Abiatar tsɔɔ David nɔ ni esa akɛ efee ni ekɛsa Yehowa hiɛ. (1 Samuel 22:​17–23:​12; 30:​6-8) Taakɛ David ji lɛ, Yehowa mumɔ lɛ nyiɛ Yesu hiɛ, ni enɛ hu efee anɔkwale yɛ Kristo sɛɛnyiɛlɔi ni afɔ amɛ mu akɛ kuu lɛ ahe. Amɛbaje gbɛhe ko ni tamɔ nɔ ni akpoo amɛ mli yɛ adesai ahiɛ yɛ afi 1918-19 mli, ni amɛjamɔ mli henyɛlɔi lɛ susu akɛ amɛbaanyɛ amɛkpata amɛhiɛ. Mɛi ni afɔ amɛ mu nɛɛ sɔle koni atsɔɔ amɛ gbɛ kɛjɛ shihilɛ ni haaa amɛnyɛ nɔ ko amɛfee nɛɛ mli, ni Nyɔŋmɔ bo amɛsɔlemɔi lɛ atoi, ni ejie amɛ yɛ 1919 mli, ni eha amɛna ekãa ekoŋŋ yɛ esɔɔmɔ mli. ( Lala 143:​7-9) Yɛ anɔkwale mli lɛ, Yehowa mumɔ lɛ miiye kɛmiibua ni eetsɔɔ ewebii lɛ agbɛ yɛ nakai be lɛ mli, taakɛ efeɔ kɛbashi ŋmɛnɛ gbi nɛɛ.

Bɔ Ni Mumɔ lɛ Yeɔ Ebuaa

 9. (a) Mumɔ krɔŋkrɔŋ lɛ tsuɔ nii akɛ “yelikɛbualɔ” yɛ mɛɛ gbɛ nɔ? (b) Te wɔfeɔ tɛŋŋ wɔleɔ akɛ mumɔ krɔŋkrɔŋ lɛ jeee gbɔmɔ? (Kwɛmɔ shishigbɛ niŋmaa lɛ.)

⁹ Yesu Kristo tsɛ mumɔ krɔŋkrɔŋ lɛ akɛ “yelikɛbualɔ.” Akɛ nɔkwɛmɔ nɔ lɛ, ekɛɛ esɛɛnyiɛlɔi lɛ akɛ: “Mabi Tsɛ lɛ, ni eeeha nyɛ yelikɛbualɔ kroko koni ekɛ nyɛ ahi shi kɛya naanɔ, anɔkwale mumɔ lɛ ni je lɛ nyɛɛɛ ahe, ejaakɛ enaaa lɛ ni asaŋ eleee lɛ lɛ. Nyɛle lɛ, ejaakɛ ekɛ nyɛ hiɔ shi ni eyɛ nyɛmli.” Kɛfata nibii krokomɛi ahe lɛ, nakai “yelikɛbualɔ” Iɛ baafee tsɔɔlɔ, ejaakɛ Kristo wo shi akɛ: “Shi yelikɛbualɔ lɛ ni ji mumɔ krɔŋkrɔŋ lɛ, ni Tsɛ lɛ baatsu yɛ migbɛi amli lɛ, lɛ eeetsɔɔ nyɛ nii fɛɛ, ni eeekai nyɛ nii fɛɛ ni mikɛɛ nyɛ lɛ.” Mumɔ lɛ baaye Kristo he odase hu, ni ema nɔ mi kɛha ekaselɔi lɛ akɛ: “Nyɛ sɛɛnamɔ hewɔ miyaa lɛ. Ejaakɛ kɛji miyaaa lɛ, yelikɛbualɔ lɛ baŋ nyɛŋɔɔ; shi kɛji mitee lɛ, matsu lɛ kɛba nyɛŋɔɔ.”​—Yohane 14:​16, 17, 26; 15:​26; 16:​7,a NW.

10. Yɛ mɛɛ gbɛi anɔ mumɔ krɔŋkrɔŋ lɛ efee yelikɛbualɔ yɛ?

¹⁰ Yesu jɛ ŋwɛi efɔse mumɔ krɔŋkrɔŋ ni ewo shi yɛ he lɛ eshwie esɛɛnyiɛlɔi lɛ anɔ yɛ Pentekoste gbi lɛ nɔ yɛ afi 33 Ŋ.B. (Bɔfoi lɛ Asaji 1:​4, 5; 2:​1-11) Akɛ yelikɛbualɔ lɛ, mumɔ lɛ ha amɛna Nyɔŋmɔ suɔmɔnaa nii kɛ eyiŋtoo he shishinumɔ ni yaa hiɛ ni egbele egbalɛ Wiemɔ lɛ naa eha amɛ. (1 Korintobii 2:​10-16; Kolosebii 1:​9, 10; Hebribii 9:​8-10) Nakai yelikɛbualɔ lɛ hu wo Yesu kaselɔi lɛ hewalɛ ni amɛfee odasefoi yɛ shikpɔŋ lɛ fɛɛ nɔ. (Luka 24:​49; Bɔfoi lɛ Asaji 1:8; Efesobii 3:​5, 6) Ŋmɛnɛ, mumɔ krɔŋkrɔŋ lɛ baanyɛ aye abua Kristofonyo ni ejɔɔ ehe nɔ lɛ koni eda yɛ nilee mli kɛ ekɛ ehe ha mumɔŋ nibii ni Nyɔŋmɔ etsɔ “tsulɔ anɔkwafo kɛ nilelɔ” lɛ nɔ eto he gbɛjianɔ lɛ. (Mateo 24:​45-47) Nyɔŋmɔ mumɔ lɛ baanyɛ ekɛ yelikɛbuamɔ aha kɛtsɔ ekãa kɛ hewalɛ ni he hiaa ni akɛaaye odase akɛ Yehowa tsuji lɛ ateŋ mɔ kome ni ekɛaaha lɛ nɔ. (Mateo 10:​19, 20; Bɔfoi lɛ Asaji 4:​29-31) Shi mumɔ krɔŋkrɔŋ lɛ yeɔ buaa Nyɔŋmɔ webii yɛ gbɛi krokomɛi hu nɔ.

“Kɛ Ŋtsɔidɔɔmɔi ni Anyɛŋ Akɛɛ”

11. Kɛ kaa ko fee tamɔ nɔ ni anyɛɛɛ naa adamɔ lɛ, mɛni esa akɛ Kristofonyo lɛ afee?

¹¹ Kɛ Kristofonyo ko kɛ kaai ni tamɔ nɔ ni enyɛɛɛ edamɔ naa miikpe lɛ, mɛni esa akɛ efee? Esa akɛ esɔle ni ebi mumɔ krɔŋkrɔŋ lɛ, ni eha etsu enitsumɔ lɛ! Paulo kɛɛ: “Mumɔ lɛ hu yeɔ buaa wɔgbedemɔi lɛ, ejaakɛ nɔ ni wɔɔsɔle wɔbi ni ja lɛ, wɔleee; shi moŋ mumɔ lɛ diɛŋtsɛ kɛ ŋtsɔidɔɔmɔi ni anyɛŋ akɛɛ lɛ damɔɔ mli haa wɔ. Shi mɔ ni taoɔ tsuii amli lɛ le nɔ ni ji mumɔ lɛ jwɛŋmɔ lɛ, ejaakɛ edamɔɔ mli ehaa mɛi krɔŋkrɔŋi lɛ bɔ ni sa Nyɔŋmɔ hiɛ.”​—Romabii 8:​26, 21.

12, 13. (a) Yɛ mɛɛ gbɛ nɔ Romabii 8:​26, 27 kɔɔ sɔlemɔi ni afeɔ yɛ shihilɛi ni kaa mɔ waa amli lɛ ahe? (b) Mɛni Paulo kɛ ehefatalɔi lɛ fee beni akaa amɛ waa yɛ Asia niiaŋ lɛ?

¹² Nakai mɛi krɔŋkrɔŋi lɛ ni Nyɔŋmɔ mumɔ lɛ damɔɔ mli haa amɛ lɛ ji Yesu sɛɛnyiɛlɔi ni afɔ amɛ mu, ni yɔɔ ŋwɛi hiɛnɔkamɔ lɛ. Shi kɛji akɛ oyɛ ŋwɛi tsɛmɔ loo shikpɔŋ nɔ hiɛnɔkamɔ hu lɛ, akɛ Kristofonyo lɛ, obaanyɛ ona yelikɛbuamɔ kɛjɛ Nyɔŋmɔ mumɔ krɔŋkrɔŋ lɛ dɛŋ. Yɛ bei komɛi amli lɛ Yehowa haa sɔlemɔi pɔtɛɛ komɛi ahetoo. Yɛ bei komɛi amli hu lɛ, bɔ ni ohao sɔŋŋ hewɔ lɛ onyɛɛɛ otsɔɔ ohenumɔi lɛ amli yɛ wiemɔi amli, ni nɔ ni obaanyɛ ofee pɛ ji ni okpa Yehowa fai kɛ ŋtsɔidɔɔmɔi ni awieee. Yɛ anɔkwale mli lɛ, ekolɛ oleŋ nɔ ni hi fe fɛɛ kɛha bo, ni obaanyɛ obi nɔ ni ejaaa lɛ po, ja osɔle obi ni ona mumɔ krɔŋkrɔŋ lɛ. Nyɔŋmɔ le akɛ oosumɔ ni esuɔmɔnaa nii aba mli, ni ele nɔ ni he hiaa bo diɛŋtsɛ lɛ jogbaŋŋ. Agbɛnɛ hu, etsɔ emumɔ krɔŋkrɔŋ lɛ nɔ eha aŋmala sɔlemɔi pii yɛ e-Wiemɔ lɛ mli, ni nɛkɛ sɔlemɔi nɛɛ kɔɔ shihilɛi ni kaa mɔ lɛ ahe. (2 Timoteo 3:​16, 17; 2 Petro 1:21) No hewɔ lɛ, Yehowa baanyɛ ana henumɔi ni ajie amɛ kpo yɛ mumɔ naa sɔlemɔi nɛɛ amli lɛ akɛ wiemɔi ni obaasumɔ ni ojaje akɛ etsuji lɛ ateŋ mɔ kome, ni ebaanyɛ eha nɛkɛ sɔlemɔi nɛɛ ahetoo eha bo.

¹³ Ekolɛ Paulo kɛ ehefatalɔi lɛ nyɛɛɛ ale nɔ ni esa akɛ amɛsɔle yɛ he yɛ be mli ni amɛkɛ amanehului kpeɔ yɛ Asia niiaŋ lɛ. Akɛni ‘amɛba nɔnyɛɛ ni naa wa waa shishi fe bɔ ni amɛaanyɛ po hewɔ lɛ, amɛnu he yɛ amɛmli akɛ amɛnine eshɛ gbele fɔbuu nɔ.’ Shi amɛbi ni mɛi krokomɛi asɔle aha amɛ, ni amɛkɛ ahiɛ fɔ Nyɔŋmɔ, mɔ ni baanyɛ atee gbohii ashi lɛ nɔ, ni ehere amɛyiwala (2 Korintobii 1:​8-11) Kwɛ miishɛjemɔ sane ni eji akɛ Yehowa Nyɔŋmɔ boɔ etsuji anɔkwafoi lɛ asɔlemɔi atoi ni etsuɔ he nii!

14. Mɛɛ nɔ kpakpa ko baaba kɛ Yehowa ŋmɛ gbɛ ni kaa ko tee nɔ kɛyashi be ko mli?

¹⁴ Kaai sɔrɔtoi baa Nyɔŋmɔ webii agbɛjianɔtoo lɛ nɔ yɛ bei babaoo mli. Taakɛ wɔtsɔ wɔhiɛ wɔna lɛ, awa amɛyi yɛ Jeŋ Ta l be lɛ mli. Eyɛ mli akɛ no mli lɛ amɛbɛ amɛgbɛhe lɛ he shishinumɔ ni mli ka shi faŋŋ, ni yɛ enɛ hewɔ lɛ amɛleee nɔ diɛŋtsɛ ni amɛaasɔle amɛbi moŋ, shi gbalɛ sɔlemɔi yɛ Yehowa Wiemɔ lɛ mli ni eha enɛɛmɛi ahetoo eha amɛ. (Lala 69, 102, 126; Yesaia, yitso 12) Shi mɛni, kɛ Yehowa ŋmɛ gbɛ koni kaa ko aya nɔ kɛyashi be ko? Nɔ ni baajɛ enɛ mli aba ji odaseyeli, ebaanyɛ etsirɛ mɛi komɛi ni amɛmɔ anɔkwale lɛ mli, ni ehaa Kristofoi naa hegbɛ amɛjieɔ nyɛmimɛi asuɔmɔ kpo kɛtsɔɔ sɔlemɔ ni amɛsɔleɔ amɛhaa mɛi krokomɛi loo yelikɛbuamɔ ni amɛkɛhaa nanemɛi heyelilɔi ni naa amanehulu lɛ nɔ. (Yohane 13:​34, 35; 2 Korintobii 1:11) Kaimɔ akɛ Yehowa tsɔɔ ewebii lɛ agbɛ kɛtsɔɔ emumɔ krɔŋkrɔŋ lɛ nɔ, efeɔ nɔ ni hi fe fɛɛ kɛhaa amɛ, ni etsuɔ saji ahe nii be fɛɛ be yɛ gbɛ ni aaawo egbɛi krɔŋkrɔŋ lɛ hiɛ nyam ni etsuu he lɛ nɔ.​—2 Mose 9:​16; Mateo 6:⁠9.

Kaafee Mumɔ lɛ Nidɔɔnii Kɔkɔɔkɔ

15. Kristofoi baanyɛ amɛkɛ amɛhe afɔ Yehowa mumɔ lɛ nɔ ni efee mɛni yɛ amɛgbɛfaŋ?

¹⁵ No hewɔ lɛ kɛ oji Yehowa tsulɔ lɛ, sɔlemɔ ni ona mumɔ krɔŋkrɔŋ lɛ yɛ kaai kɛ bei krokomɛi amli. No sɛɛ lɛ kwɛmɔ ni onyiɛ egbɛtsɔɔmɔ sɛɛ, ejaakɛ Paulo ŋma akɛ: “Nyɛkafea Nyɔŋmɔ mumɔ krɔŋkrɔŋ lɛ nidɔɔnii, [nɔ] mli ni asɔo nyɛnaa yɛ ato kpɔmɔ gbi lɛ.” (Efesobii 4:30) Nyɔŋmɔ mumɔ lɛ ji, ni eka he eji naasɔomɔ nɔ, loo ‘nɔ ni baaba lɛ he okadi’ kɛha Kristofoi anɔkwafoi ni afɔ amɛ mu lɛ​—ni ji akɛ, ŋwɛi shihilɛ ni gbele bɛ mli. (2 Korintobii 1:​22; Romabii 8:​15; 1 Korintobii 15:​50-57; Kpojiemɔ 2:10) Kristofoi ni afɔ amɛ mu lɛ kɛ mɛi ni yɔɔ shikpɔŋ nɔ shihilɛ he hiɛnɔkamɔ lɛ fɛɛ baanyɛ amɛkɛ amɛhe afɔ Yehowa mumɔ lɛ nɔ ni efee babaoo eha amɛ. Ebaanyɛ ekudɔ amɛ yɛ anɔkwayeli shihilɛ gbɛ nɔ ni eye ebua amɛ ni amɛkpoo esha nitsumɔi ni haaa ana Nyɔŋmɔ nɔkpɛlɛmɔ, ni ehaa emumɔ krɔŋkrɔŋ lɛ laajeɔ, kɛ naanɔ wala ni anyɛɛɛ ana lɛ.​—Galatabii 5:​19-21.

16, 17. Mɛɛ gbɛ nɔ Kristofonyo aaatsɔ afee mumɔ Iɛ nidɔɔnii yɛ?

¹⁶ Te Kristofonyo aaafee tɛŋŋ afee mumɔ lɛ nidɔɔnii, ekolɛ yɛ gbɛ ni tsɔɔ akɛ ehiɛ ka he loo ehiɛ kaaa he lɛ nɔ? Yehowa kɛ emumɔ lɛ tsuɔ nii koni eha ekomefeemɔ ashwere, ni akɛhala hii ni sa yɛ asafo lɛ mli. No hewɔ lɛ, kɛji akɛ asafo lɛ mlinyo ko wie huhuuhu eshi onukpai ni ahala amɛ lɛ, egbe amɛhe guɔ kɛfo shi, kɛ nibii krokomɛi ni tamɔ nakai lɛ, belɛ jeee Nyɔŋmɔ mumɔ lɛ ni kɛ toiŋjɔlɛ kɛ ekomefeemɔ baa lɛ sɛɛ enyiɛ lɛ. Efee mɔ ni miifee mumɔ krɔŋkrɔŋ lɛ nidɔɔnii​—1 Korintobii 1:​10; 3:​1-4, 16, 17; 1 Tesalonikabii 5:​12, 13; Yuda 16.

¹⁷ Yɛ be mli ni Paulo ŋmaa wolo eyaha Kristofoi ni yɔɔ Efeso lɛ, ebɔ kɔkɔ eshi sui ni ji amale, mlifu ni aŋmɛɛɛ he, juu, wiemɔ sha, ajwamaŋbɔɔ he miishɛɛ ni anaa yɛ gbɛ ni ejaaa nɔ, hiɛgbejianii, kɛ fɛoyeli ni esaaa. Kɛ Kristofonyo ŋmɛ gbɛ ni ekpalaŋ kɛtee nibii ni tamɔ nɛkɛ he lɛ, belɛ eeete shi eewo Biblia mli ŋaawoo ni jɛ mumɔŋ lɛ. (Efesobii 4:​17-29; 5:​1-5) Hɛɛ, ni eefee Nyɔŋmɔ mumɔ lɛ nidɔɔnii kɛmiishɛ he ko.

18. Mɛni baanyɛ aba Kristofonyo fɛɛ Kristofonyo ni jeɔ shishi ekuɔ ehiɛ eshwieɔ Nyɔŋmɔ Wiemɔ ni jɛ mumɔŋ lɛ mli ŋaawoo nɔ lɛ nɔ?

¹⁸ Yɛ anɔkwale mli lɛ, Kristofonyo fɛɛ Kristofonyo ni jeɔ shishi ekuɔ ehiɛ eshwieɔ Yehowa Wiemɔ ni jɛ mumɔŋ lɛ mli ŋaawoo lɛ nɔ lɛ baanyɛ aje shishi ana sui loo kadimɔ nii komɛi ni nɔ ni baajɛ mli aba ji esha ni ajeɔ gbɛ afeɔ kɛ ŋwɛi duromɔ ni alaajeɔ. Eyɛ mli akɛ ekolɛ ekɛ ehe woko eshafeemɔ mli bianɛ moŋ, shi ebaanyɛ efee mɔ ni kɛ ehiɛ etsɔɔ gbɛ ni tamɔ nɛkɛ nɔ tsɔmɔ. Kristofonyo ni tamɔ nɛkɛ ni miite shi kɛmiiwo mumɔ lɛ gbɛtsɔɔmɔ lɛ miifee lɛ nidɔɔnii. No hewɔ lɛ eete shi eewo Yehowa, mumɔ krɔŋkrɔŋ Jɛɛhe lɛ hu, ni eefee lɛ nidɔɔnii. Mɔ ni sumɔɔ Nyɔŋmɔ lɛ sumɔŋ akɛ eeefee nakai kɔkɔɔkɔ!

Yaa nɔ Osɔle ni Ona hiamɔ Krɔŋkrɔŋ

19. Mɛni hewɔ Yehowa mumɔ lɛ he hiaa ewebii lɛ waa ŋmɛnɛ nakai lɛ?

¹⁹ Kɛ oji Yehowa tsulɔ lɛ, yaa nɔ osɔle ni ona emumɔ krɔŋkrɔŋ lɛ. Nɛkɛ “naagbee gbii” nɛɛ, kɛ amɛjaramɔ bei nɛɛ amli titri Nyɔŋmɔ mumɔ lɛ yelikɛbuamɔ he hiaa Kristofoi (2 Timoteo 3:​1-5) Abonsam kɛ edaimonioi lɛ ni ashwie amɛ kɛjɛ ŋwɛi, ni agbɛnɛ amɛbɛŋkɛ shikpɔŋ nɛɛ nɔ lɛ egri ewo Yehowa gbɛjianɔtoo lɛ. Nɔ hewɔ lɛ be nɛɛ mli titri Nyɔŋmɔ mumɔ krɔŋkrɔŋ lɛ he hiaa ewebii lɛ fe be fɛɛ, koni enyiɛ amɛhiɛ ni ekudɔ amɛ, koni amɛnyɛ amɛŋmɛ amɛtsui shi yɛ shihilɛi ni mli wawai kɛ yiwaai amli​—Kpojiemɔ 12:​7-12.

20, 21. Mɛni hewɔ esa akɛ onyiɛ Yehowa Wiemɔ, emumɔ lɛ kɛ egbɛjianɔtoo lɛ gbɛtsɔɔmɔ sɛɛ lɛ?

²⁰ Jiemɔ hiɛsɔɔ kpo yɛ yelikɛbuamɔ ni Yehowa Nyɔŋmɔ tsɔɔ emumɔ krɔŋkrɔŋ lɛ nɔ ekɛhaa lɛ he be fɛɛ be. Nyiɛmɔ gbɛtsɔɔmɔ ni Biblia lɛ ni ji e-Wiemɔ ni jɛ mumɔŋ lɛ kɛhaa lɛ sɛɛ. Okɛ Nyɔŋmɔ shikpɔŋ nɔ gbɛjianɔtoo ni emumɔ lɛ nyiɛɔ ehiɛ lɛ afee ekome. Kaaŋmɛ gbɛ ni okpalaŋ kɛmiiya nifeemɔ gbɛ ko ni kɛ ŋmalɛ lɛ kpaaa gbee, ni baafee mumɔ krɔŋkrɔŋ lɛ nidɔɔnii ni ooofee nɔ, ejaakɛ nɔ ni baajɛ enɛ mli aba ji ejiemɔ kɛmiijɛ onɔ, ni ekɛ mumɔŋ oshara diɛŋtsɛ baaba.​—Lala 51:⁠13.

²¹ Ni Yehowa mumɔ lɛ aaatsɔɔ mɔ ko gbɛ lɛ pɛ ji gbɛ ni atsɔɔ nɔ akɛsaa ehiɛ ni anaa shihilɛ ni toiŋjɔlɛ kɛ miishɛɛ yɔɔ mli. Kaimɔ hu akɛ, Yesu tsɛ mumɔ krɔŋkrɔŋ lɛ akɛ “yelikɛbualɔ,” loo “miishɛjelɔ.” (Yohane 14:​16, NW, shishigbɛ niŋmaa) No nɔ Nyɔŋmɔ tsɔɔ ni eshɛjeɔ Kristofoi amii ni ewajeɔ amɛ koni amɛnyɛ amɛdamɔ amɛkaai anaa. (2 Korintobii 1:​3, 4) Mumɔ lɛ woɔ Yehowa webii ahewalɛ ni amɛshiɛ sanekpakpa lɛ, ni eyeɔ ebuaa amɛ ni amɛkaiɔ Ŋmalɛ mli saji otii ni he hiaa ni baaha amɛnyɛ amɛye odase ni mɔɔ shi. (Luka 12:​11, 12; Yohane 14:​25, 26; Bɔfoi lɛ Asaji 1:​4-8; 5:32) Kristofoi baanyɛ atsɔ sɔlemɔ kɛ mumɔ lɛ kudɔmɔ nɔ amɛkɛ ŋwɛi nilee akpee amɛhemɔkɛyeli he kaai anaa. No hewɔ lɛ, amɛyaa nɔ amɛsɔleɔ amɛbiɔ Nyɔŋmɔ mumɔ krɔŋkrɔŋ lɛ yɛ wala shihilɛ mli nibii fɛɛ mli. Nɔ ni jɛɔ mli baa ji akɛ, Yehowa mumɔ lɛ tsɔɔ ewebii lɛ gbɛ.

[Shishigbɛ niŋmai]

Mɛni Ji Ohetooi?

◻ Mɛni hewɔ esa akɛ osɔle obi Yehowa mumɔ krɔŋkrɔŋ lɛ?

◻ Mumɔ krɔŋkrɔŋ lɛ ji yelikɛbualɔ yɛ mɛɛ gbɛ nɔ?

◻ Mumɔ krɔŋkrɔŋ lɛ nidɔɔnii ni afeɔ lɛ tsɔɔ mɛni, ni te wɔɔfee tɛŋŋ wɔkwa nakai feemɔ?

◻ Mɛni hewɔ esa akɛ wɔya nɔ wɔsɔle wɔbi mumɔ krɔŋkrɔn lɛ ni wɔnyiɛ egbɛtsɔɔmɔ sɛɛ lɛ?

[Mfoniri ni yɔɔ baafa 15]

Taakɛ bɔ ni tsɛ ni yɔɔ suɔmɔ kɛ nibii kpakpai haa ebi lɛ, nakai nɔŋŋ hu Yahowa kɛ mumɔ krɔŋkrɔŋ haa etsuji ni sɔleɔ amɛbiɔ enɛ lɛ

[Mfoniri ni yɔɔ baafa 17]

Ani ole bɔ ni Nyɔŋmɔ mumɔ lɛ damɔɔ mli ehaa Kristofoi ni sɔleɔ lɛ?