Nyɔŋmɔ Nilee Lɛ Jeɔ Kpo Faŋŋ Yɛ Adebɔɔ Nibii Amli

“Mɔ ni tsɔɔ wɔ nilee fe shikpɔŋ lɛ nɔ kooloi lɛ, kɛ ŋaa hu fe ŋwɛi loofɔji lɛ.”—HIOB 35:11.

LOOFƆJI yɛ nyɛmɔi ni yɔɔ naakpɛɛ. Mɛi ni feɔ kɔɔyɔŋ lɛji lɛ nyaa bɔ ni loofɔji filikiɔ yɛ kɔɔyɔŋ kɛbɔleɔ shi lɛ he waa diɛŋtsɛ. Loofɔji komɛi nyɛɔ amɛfilikiɔ kilomitai akpei abɔ kɛtsɔɔ ŋshɔ ko ni kã shi shwaŋŋ hiɛ ni amɛyashɛɔ he ni amɛyaa lɛ pɛpɛɛpɛ ní amɛduuu gbɛ.

Nyɛmɔ kroko ni sa kadimɔ waa ni loofɔji yɔɔ—nɔ ko ni haa anaa nilee ni amɛ-Feelɔ lɛ yɔɔ—ji nyɛmɔ ni amɛyɔɔ ni amɛkɛgbaa sane kɛtsɔ bolɔmɔi kɛ lalai anɔ lɛ. Susumɔ nɔkwɛmɔnii komɛi ahe okwɛ.

Loofɔji Kɛ Amɛhe Gbaa Sane

Loofɔji henɔi komɛi jeɔ sanegbaa shishi po dani afɛlɛɔ amɛ. Ákɛ nɔkwɛmɔnɔ lɛ, trakɔ yoo nyɛɔ eŋmɛɔ wɔji aaashɛ kpaanyɔ, ni eŋmɛɔ wɔji nɛɛ ekome daa gbi. Kɛ́ bii ni yɔɔ wɔji lɛ amli lɛ fɛɛ dara yɛ be kome too lɛ nɔŋŋ mli lɛ, no lɛ esa akɛ wɔji lɛ fɛɛ afɛlɛ yɛ gbii kpaanyɔ mli. Kɛ́ ebalɛ nakai lɛ, ebaabi ni trakɔ nyɛ lɛ akwɛ ebii ni amɛye otsi kome lɛ ni yɛ nakai beaŋ nɔŋŋ lɛ eya nɔ ebu wɔlɔ ni eshwɛ ni fɛlɛko lɛ nɔ, ni enɛ baafee nitsumɔ ko ni wa. Nɔ ni tamɔɔɔ nakai lɛ, wɔji kpaanyɔ ni trakɔ lɛ bu nɔ lɛ fɛɛ fɛlɛɔ yɛ ŋmɛlɛtswai ekpaa pɛ mli. Te feɔ tɛŋŋ ni enyɛɔ ebaalɛ nakai? Niiamlipɛilɔi etsɔɔ akɛ, yiŋtoo titri kome hewɔ ni enyɛɔ ebaalɛ nakai ji akɛ bii ni yɔɔ wɔji ni fɛlɛko lɛ amli lɛ kɛ amɛhe gbaa sane, ni yɛ gbɛ ko nɔ lɛ amɛtoɔ gbɛjianɔ koni amɛ fɛɛ amɛfɛlɛ yɛ be kome too mli.

Kɛ́ loofɔji lɛ dara lɛ, bei pii lɛ amɛteŋ hii lɛ ji mɛi ni láa. Be titri ni amɛfeɔ nakai ji be mli ni amɛtaoɔ amɛkɛ yoo ko aná bɔlɛ lɛ, ni amɛfeɔ enɛ koni amɛkɛbu amɛshihilɛhe lɛ he loo koni amɛkɛha loofɔlɔ yoo ko asumɔ amɛ. Kɛ́ wɔɔkɛɛ lɛ, loofɔji henɔi akpei abɔ ni yɔɔ lɛ ateŋ eko fɛɛ eko yɛ amɛ diɛŋtsɛ amɛwiemɔ, ni no haa yei lɛ yooɔ amɛhefatalɔi ni ji amɛhenɔi lɛ.

Bei titrii ni loofɔji fɔɔ lámɔ ji leebi maŋkpa kɛ hulu shinyɔɔ be mli, ni amɛfeɔ nakai yɛ yiŋtoo kpakpa ko hewɔ. Yɛ nɛkɛ bei nɛɛ amli lɛ, kɔɔyɔɔ etswaaa tsɔ ni bolɔmɔ hu ni haŋ anu amɛlala lɛ he bɛ tsɔ. Niiamlipɛilɔi eyɔse akɛ anuɔ lalai ni loofɔji láa lɛ ahe jogbaŋŋ shii toi 20 yɛ leebi kɛ gbɛkɛnaashi mli fe bɔ ni anuɔ he yɛ shwane mli.

Eyɛ mli akɛ bei pii lɛ hii lɛ ji mɛi ni láa moŋ, shi hii kɛ yei lɛ fɛɛ kpãa bɛji srɔtoi, loo amɛbolɔɔ kpitiokpitio, ni enɛɛmɛi fɛɛ hiɛ shishinumɔi srɔtoi. Ákɛ nɔkwɛmɔnɔ lɛ, loofɔlɔ henɔ ko ni atsɛɔ lɛ Chaffinch lɛ kpãa loo eboɔ yɛ gbɛ̀i srɔtoi nɛɛhu sɔŋŋ nɔ. Kɛ́ loofɔlɔ awuiyelɔ ko nyiɛ kɔɔyɔɔ lɛ mli—tamɔ loofɔlɔ awuiyelɔ ko ni miitao kooloo ko emɔ—lɛ, amɛyɛ kpãmɔ kome ni amɛkpãa kɛbɔɔ kɔkɔ yɛ enɛ he, shi amɛyɛ kpãmɔ kroko hu ni amɛkpãa kɛbɔɔ kɔkɔ akɛ kooloo awuiyelɔ ko nyiɛ shikpɔŋ kɛmiifo shi eetao nɔ ko emɔ.

Nikeenii ko ni Nɔ Bɛ

Eji anɔkwale akɛ nilee ni Yehowa kɛwo loofɔji amli lɛ yɛ naakpɛɛ. Shi nyɛmɔi ni adesai yɔɔ ni amɛkɛgbaa sane lɛ yɛ naakpɛɛ kwraa fe enɛ. Hiob 35:11 lɛ kɛɔ akɛ, Nyɔŋmɔ eha adesai “ŋaa hu fe ŋwɛi loofɔji lɛ.” Nɔ ko ni haa adesai feɔ srɔto kwraa yɛ kooloi ahe ji nyɛmɔ ni amɛyɔɔ ni amɛkɛgbaa susumɔi ni bɛ faŋŋ ni yɔɔ hwanyaŋŋ ahe saji kɛtsɔ gbeei ni jɛɔ amɛsɛ̃kpãai lɛ amli kɛbaa lɛ nɔ, aloo kɛtsɔ amɛgbɔmɔtsei lɛ kɛ nitsumɔ nɔ.

Ákɛ mɛi ni tamɔɔɔ bɔɔ nii krokomɛi lɛ, etamɔ nɔ ni akɛ nyɛmɔ ni haa anyɛɔ akaseɔ wiemɔi ni yɔɔ hwanyaŋŋ fɔ́ adesai. Wolo tɛtrɛɛ ni ji American Scientist ni emli saji yɔɔ Internet lɛ nɔ lɛ kɛɛ akɛ: “Abifabii nyɛɔ amɛkaseɔ wiemɔi ni amɛfɔlɔi kɛ amɛ ewieee lɛ po; ni gbekɛbii ni nuuu nii lɛ hu feɔ amɛ diɛŋtsɛ amɛmumuii awiemɔ kɛji atsɔɔɔ amɛ eko yɛ shĩa.”

Te Enɛ Saa Ohe Ehaa Tɛŋŋ?

Kɛ́ onu loofɔlɔ ko lala ni ŋɔɔ jogbaŋŋ he loo onu ni gbekɛ ko ni miikase wiemɔ lɛ fã enaa klɛŋklɛŋ kwraa lɛ, te enɛ saa ohe ehaa tɛŋŋ? Ani oyɔseɔ Nyɔŋmɔ nilee lɛ yɛ nibii ni ebɔ lɛ amli?

Beni lalatsɛ David jwɛŋ gbɛ nɔ ni atsɔ afee lɛ lɛ nɔ lɛ sɛɛ lɛ, enɛ tsirɛ lɛ ni ekɛɛ Nyɔŋmɔ akɛ: “Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ; onitsumɔi lɛ yɛ naakpɛɛ, ni misusuma le enɛ krɛdɛɛ.” (Lala 139:14) Ekã shi faŋŋ akɛ, kɛ́ otee nɔ okɛ hiɛsɔɔ pɛi bɔ ni Nyɔŋmɔ nilee lɛ jeɔ kpo faŋŋ yɛ adebɔɔ nibii amli lɛ mli lɛ, ebaaha hemɔkɛyeli ni oyɔɔ yɛ emli akɛ ebaaha bo gbɛtsɔɔmɔi ni hi jogbaŋŋ lɛ mli awa diɛŋtsɛ.

Nyɔŋmɔ Hewalɛ Lɛ Jeɔ Kpo Faŋŋ Yɛ Ŋulamii Amli

“Nyɛholea nyɛhiŋmɛii anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛii; enyɛmɔ ni fa kɛ ehewalɛ kpele lɛ hewɔ lɛ amɛteŋ ekome folo po eshwɛɛɛ.”—YESAIA 40:26.

WƆHULU lɛ ji ŋulami ni da bɔ ni sa kɛkɛ. Shi fɛɛ sɛɛ lɛ, eda kwraa fe shikpɔŋ lɛ toi 330,000. Ŋulamii ni bɛŋkɛ shikpɔŋ lɛ ateŋ babaoo shɛɛɛ hulu lɛ dalɛ. Shi ŋulamii krokomɛi, tamɔ nɔ ni atsɛɔ lɛ V382 Cygni lɛ nɛkɛ lɛ dara kwraa fe wɔhulu lɛ, kɛ́ hooo kwraa lɛ amɛdara fe hulu lɛ toi 27 sɔŋŋ.

Hewalɛ enyiɛ wɔhulu lɛ kɛhaa? Feemɔ bɔ ni la ko naa baawa eha lɛ he mfoniri yɛ ojwɛŋmɔŋ okwɛ kɛji okɛ la lɛ teŋ jɛkɛmɔ ji kilomitai 15, shi loloolo lɛ oonu dɔlɛ ni jɛɔ la lɛ mli kɛbaa lɛ he. Kɛ́ hooo kwraa lɛ, hulu lɛ kɛ shikpɔŋ lɛ teŋ jɛkɛmɔ aaafee kilomitai akpekpei 150. Kɛlɛ, gbi ni hulu lɛ tsoɔ waa lɛ, dɔlɛ ni jɛɔ hulu lɛ mli kɛbaa lɛ naa wa aahu akɛ ebaanyɛ eha mɔ hewolo nɔ ato totrofɛ! Naakpɛɛ sane ji akɛ, hewalɛ ni jɛɔ hulu lɛ mli lɛ mli aaafee akpekpei toi akpe mli ekome pɛ shɛɔ shikpɔŋ lɛ nɔ. Fɛɛ sɛɛ lɛ, hewalɛ bibioo nɛɛ ni jɛɔ hulu lɛ mli kɛbaa lɛ fa aahu akɛ enyɛɔ ebaa wala ni yɔɔ shibɔlemɔ ŋulami nɛɛ nɔ lɛ yi.

Yɛ anɔkwale mli lɛ, adebɔɔ nibii ahe nilelɔi ebu akɔntaa akɛ, kɛ́ abua hewalɛ fɛɛ ni jɛɔ wɔhulu lɛ mli kɛbaa lɛ naa lɛ, efa aahu akɛ ebaanyɛ eha shibɔlemɔ ŋulamii komekomei aaafee akpekpei toi akpekpei 31 ni daramɔ tamɔ shikpɔŋ lɛ aná hulu la. Aloo kɛ́ wɔɔsusu hewalɛ babaoo nɛɛ he yɛ gbɛ kroko nɔ lɛ: Kuu ko ni pɛiɔ nibii ni yɔɔ ŋwɛiniiaŋ lɛ mli, ni ji Space Weather Prediction Center (ni afoɔ lɛ kuku akɛ SWPC) lɛ bɔ amaniɛ yɛ amɛ-Internet lɛ nɔ saji ataomɔhe lɛ akɛ, kɛ́ abaanyɛ abua hewalɛ fɛɛ ni jɛɔ hulu lɛ mli kɛbaa lɛ naa yɛ hiŋmɛitswaa kome pɛ mli lɛ, ebaanyɛ eha United States “aná srawa hewalɛ ni ekɛtsuɔ nii amrɔ nɛɛ babaoo aahu kɛyashi wɔsɛɛ afii 9,000,000.”

Hewalɛ ni yɔɔ hulu lɛ mli lɛ jɛɔ eteŋ tuuntu kɛbaa—ni enɛ ji nuklea hewalɛ ko ni buaa atɔm srɔtoi anaa kɛfeɔ hewalɛ babaoo. Hulu lɛ da waa diɛŋtsɛ, ni eteŋ hu mli kwɔ aahu akɛ eheɔ afii akpekpei abɔ dani hewalɛ ni jɛɔ hulu lɛ teŋ lɛ jeɔ kpo kɛbashɛɔ hulu lɛ hiɛ. SWPC Internet lɛ nɔ saji ataomɔhe lɛ bɔ amaniɛ akɛ: “Kɛ́ Hulu lɛ aaafɔ̃ɔ hewalɛ ni ejieɔ lɛ kpo lɛ ŋmɛnɛ lɛ, ebaahe afii 50,000,000 sɔŋŋ dani abaayɔse enɛ he nɔ ko yɛ Shikpɔŋ lɛ nɔ!”

Agbɛnɛ susumɔ anɔkwa sane nɛɛ he okwɛ: Kɛji owo ohiɛ nɔ okwɛ ŋwɛi gbɛkɛ ko ni ŋwɛi etse lɛ, onaa ŋulamii akpei abɔ, ni enɛɛmɛi ateŋ eko fɛɛ eko kɛ hewalɛ babaoo ni tamɔ wɔhulu lɛ nɔ̃ lɛ haa. Ni adebɔɔ nibii ahe nilelɔi ebu akɔntaa akɛ ayɛ ŋulamii akpekpei akpei toi akpekpei akpei abɔ yɛ jeŋ muu lɛ fɛɛ!

Nɛgbɛ ŋulamii nɛɛ fɛɛ jɛ? Amrɔ nɛɛ, niiamlitaolɔi babaoo heɔ amɛyeɔ akɛ jeŋ muu lɛ fɛɛ ba trukaa aaafee afii akpekpei toi akpei 14 ni eho nɛ, yɛ yiŋtoi komɛi ní kɛbashi ŋmɛnɛ lɛ amɛnuuu shishi lɛ hewɔ. Biblia lɛ feɔ lɛ faŋŋ akɛ: “Shishijee mli lɛ Nyɔŋmɔ bɔ ŋwɛi kɛ shikpɔŋ.” (1 Mose 1:1) Belɛ, ebɛ naakpɛɛ mɔ akɛ abaanyɛ awie Mɔ ni bɔ ŋulamii ni haa hewalɛ babaoo nɛɛ he akɛ eyɛ ‘hewalɛ kpele.’—Yesaia 40:26.