Yitso 7
Nɔ ni Wɔleɔ yɛ Efɔŋ ni Nyɔŋmɔ Eŋmɛ Gbɛ Lɛ Mli
1. (a) Eji Yehowa kpata Eden atuatselɔi lɛ ahiɛ amrɔ nɔŋŋ kulɛ, te enɛ baasa wɔhe aha tɛŋŋ? (b) Shi mɛɛ gbɛjianɔ ni suɔmɔ yɔɔ mli Yehowa eto kɛha wɔ?
YƐ NAAGBAI ni baaba wɔnɔ yɛ shihilɛ mli lɛ fɛɛ sɛɛ lɛ, fɔ ni afɔ wɔ lɛ jeee jalɛsane ni Nyɔŋmɔ yeee. Ekɛ emuuyeli ke klɛŋklɛŋ adesai lɛ ni eha amɛ Paradeiso akɛ amɛshia. Eji ekpata amɛhiɛ beni amɛtse atua lɛ sɛɛ nɔŋŋ kulɛ adesa weku ni wɔle kɛ amɛhe helai, ohia kɛ efɔŋfeemɔ ehiŋ shi. Shi yɛ emɔbɔnalɛ naa lɛ Yehowa ŋmɛ Adam kɛ Hawa gbɛ koni amɛna weku ko dani amɛgboi, eyɛ mli akɛ weku nɛɛ baana emuu ni ayeee. Etsɔ Kristo nɔ eto gbɛjianɔ eha Adam seshibii ni yɔɔ hemɔkɛyeli lɛ koni amɛnine ashɛ nɔ ni Adam laaje lɛ nɔ—naanɔ wala yɛ shihilɛi ni baaha ana wala mli ŋɔɔmɔ ni fe fɛɛ lɛ mli.—5 Mose 32:4, 5; Yoh. 10:10.
2. Ani afee enɛɛmɛi fɛɛ kɛha wɔyiwalaheremɔ pɛ?
2 Anyɛŋ akane sɛɛnamɔi ni enɛ kɛbahaa wɔ lɛ. Shi wɔkaseɔ kɛjɛɔ nɔ ni aŋma afɔ shi yɛ Biblia lɛ mli lɛ mli akɛ ekɔɔ nɔ ko ni he hiaa waa kwraa fe wɔ diɛŋtsɛ wɔyiwalaheremɔ he.
YƐ EGBƐI KPETEŊKPELE LƐ HEWƆ
3. Mɛni he eba sane yɛ Yehowa yiŋtoo kɛha shikpɔŋ lɛ kɛ adesai lɛ mlibaa lɛ he?
3 Yehowa gbɛi lɛ, kɛ egbɛi kpakpa akɛ Jeŋ Muu Fɛɛ Maŋtsɛ kɛ Nyɔŋmɔ anɔkwafo lɛ fata eyiŋtoo ni kɔɔ shikpɔŋ lɛ kɛ adesai ahe lɛ mlibaa lɛ he. Yɛ gbɛhe mli ni Yehowa yɔɔ lɛ hewɔ lɛ, toiŋjɔlɛ kɛ agbɛnɛ bɔni afee ni ahi aha jeŋ muu lɛ fɛɛ biɔ ni akɛ woo ni sa egbɛi lɛ fɛɛ aha lɛ koni mɔ fɛɛ mɔ afee toiboo aha lɛ.
4. Mɛni diɛŋtsɛ fata nakai yiŋtoo lɛ he?
4 Beni ebɔ Adam kɛ Hawa sɛɛ lɛ, ekɛ nitsumɔ wo amɛdɛŋ ni amɛtsu. Efee lɛ faŋŋ kɛha amɛ akɛ eyiŋtoo jeee ni amɛye shikpɔŋ lɛ fɛɛ nɔ, ni no hewɔ lɛ alɛɛ Paradeiso lɛ husui amli pɛ kɛkɛ, shi moŋ ni aha klɛŋklɛŋ nuu kɛ yoo, Adam kɛ Hawa shwiei ayi nɔ obɔ. (1 Mose 1:28) Ani yiŋtoo nɛɛ baafite yɛ amɛ esha lɛ hewɔ, koni nɔ ni baajɛ mli aba lɛ atsɔ ahorabɔɔ aha Nyɔŋmɔ gbɛi lɛ?
5. (a) Taakɛ 1 Mose 2:17 tsɔɔ lɛ, mɛɛ be mli ni mɔ fɛɛ mɔ ni aaaye ekpakpa kɛ efɔŋ lee tso lɛ nɔ yibii lɛ eko lɛ baagbo? (b) Yehowa ha enɛ ba mli yɛ mɛɛ gbɛ nɔ, yɛ be mli ni ekɛ bulɛ haa eyiŋtoo ni kɔɔ gbɔmɛi ni aaayi shikpɔŋ lɛ nɔ obɔ lɛ he lɛ?
5 Yehowa ebɔ Adam kɔkɔ akɛ kɛji egbo toi ni eye ekpakpa kɛ efɔŋ lee tso lɛ eko lɛ gbo ebaagbo yɛ “gbi nɔ ni” eeeye eko lɛ. (1 Mose 2:17) Nyɔŋmɔ ye ewiemɔ lɛ anɔkwale, beni Adam fee esha lɛ pɛ kɛkɛ ni Yehowa tsɛ nɔtɔlɔi lɛ koni ekɛ amɛ akojo ni ebu amɛ gbele fɔ. Amɛnyɛŋ amɛjo toigbalamɔ lɛ naa foi. Yɛ kojomɔ naa lɛ, Adam kɛ Hawa gboi nakai gbi lɛ nɔŋŋ yɛ Nyɔŋmɔ hiɛ. (Okɛto Luka 20:37, 38 he.) Shi bɔni afee ni etsu lɛ diɛŋtsɛ eyiŋtoo ni ejaje ni kɔɔ shikpɔŋ lɛ ni aaafɔ bii awo nɔ obɔ lɛ he lɛ he nii lɛ, Yehowa ŋmɛ amɛ gbɛ koni amɛfɔ weku ko dani amɛgboi diɛŋtsɛ, kɛjɛ nɔ. Kɛlɛ akɛni Nyɔŋmɔ hiɛ lɛ afii 1,000 tamɔ gbi kome hewɔ lɛ, beni Adam wala ba naagbee yɛ afii 930 mli lɛ, enɛ ba yɛ “gbi” kome mli. (1 Mose 5:3-5; okɛto Lala 90:4; 2 Petro 3:8 he.) No hewɔ lɛ abu Yehowa anɔkwayeli lɛ bem yɛ be mli ni abaatsu toigbalamɔ lɛ he nii lɛ mli, ni eyiŋtoo akɛ eeeha Adam shwiei ayi shikpɔŋ lɛ nɔ lɛ fiteee. Shi nɔ ni etsɔɔ ji akɛ aŋmɛ adesai efɔŋfeelɔi agbɛ koni amɛhi shi kɛyashi be ko.
6, 7. (a) Mɛni 2 Mose 9:15, 16 tsɔɔ yɛ nɔ hewɔ ni Yehowa ŋmɛɔ efɔŋ feelɔ gbɛ ni ehi shi be fioo lɛ? (b) Ajie Yehowa hewalɛ lɛ kpo yɛ mɛɛ gbɛ nɔ yɛ Farao sane lɛ mli, ni mɛɛ gbɛ nɔ atsɔ aha ale E-gbɛi lɛ? (d) No hewɔ lɛ mɛni baajɛ mli aba yɛ yiwalɛ nibii agbɛjianɔtoo nɛɛ naagbee?
6 Nɔ ni Yehowa kɛɛ Mizraim nɔyelɔ lɛ yɛ Mose gbii lɛ amli lɛ hu tsɔɔ nɔ hewɔ ni Nyɔŋmɔ eŋmɛ efɔŋfeelɔi agbɛ koni amɛya nɔ amɛhi shi be fioo ko lɛ. Beni Farao kɛɛ eŋmɛɛɛ gbɛ koni Israelbii lɛ ashi Mizraim lɛ, Yehowa kpataaa ehiɛ amrɔ nɔŋŋ. Akɛ haomɔi nyɔŋma ba shikpɔŋ lɛ nɔ, ni etsɔɔ Yehowa hewalɛ ni yɔɔ naakpɛɛ lɛ yɛ gbɛi sɔrɔtoi anɔ. Yɛ be mli ni ebɔɔ nɔ ni ji kpawo lɛ he kɔkɔ lɛ, Yehowa kɛɛ Farao akɛ kulɛ afo lɛ Farao kɛ ewebii lɛ kɛjɛ shikpɔŋ lɛ nɔ. Yehowa kɛɛ: “Shi kɛlɛ, enɛ hewɔ miha odamɔ shi, koni majie mihewalɛ kpo matsɔɔ bo, ni atsi migbɛi ata yɛ jeŋ fɛɛ.”—2 Mose 9:15, 16.
7 Abale Yehowa gbɛi lɛ yɛ jeŋ fɛɛ lɛlɛŋ, yɛ be mli ni ejie Israel lɛ. Ŋmɛnɛ, yɛ nɔ ni miihe ashɛ afii 3,500 sɛɛ lɛ, hiɛ kpako nɔ ni efee lɛ nɔ. Jeee akɛ ajaje Yehowa diɛŋtsɛ gbɛi lɛ atsɔɔ, shi anɔkwale ni kɔɔ Mɔ ni hiɛ nakai gbɛi lɛ hu he. Enɛ ha abale Yehowa akɛ Nyɔŋmɔ ni yeɔ ekpaŋmɔi anɔ ni efaa etsuji ahe. Enɛ hu tsɔɔ akɛ yɛ hewalɛ ni fe fɛɛ ni eyɔɔ lɛ hewɔ lɛ, nɔ ko nɔ ko bɛ ni baatsi eyiŋtoo naa. Nɔ ni abayoo waa po ji yiwalɛ gbɛjianɔtoo muu lɛ fɛɛ ni anaa kɛ nɔ ni anaaa lɛ hiɛkpatamɔ ni baa lɛ. Nakai hewalɛ ni fe fɛɛ lɛ kpojiemɔ kɛ anunyam ni ekɛbaaba Yehowa gbɛi lɛ nɔ lɛ baafee nii ni hiɛ kpaŋ nɔ gbi ko gbi ko yɛ jeŋ muu fɛɛ yinɔsane mli. Emli sɛɛnamɔi lɛ asɛɛ efoŋ!—Ezek. 38:23; Kpoj. 19:1, 2.
‘OO BƆ NI NYƆŊMƆ NILEE MLI KWƆ HA NƐ’
8. Mɛni nibii krokomɛi Paulo woɔ wɔ hewalɛ ni wɔsusu he?
8 Bɔfo Paulo tee sanebimɔ ko shi yɛ wolo ni eŋma eyaha Romabii lɛ mli akɛ: “Ani Nyɔŋmɔ yeɔ sane ko ni ejaaa?” Kɛkɛ ni eha hetoo kɛtsɔ Nyɔŋmɔ mɔbɔnalɛ nɔ mi ni ema kɛ agbɛnɛ kɛtsɔ nɔ ni Yehowa kɛɛ Farao lɛ nɔ mi ni ema lɛ nɔ. Agbɛnɛ egbala anɔkwale ni eji akɛ wɔ adesai lɛ tamɔ su yɛ gbɛshɔlɔ dɛŋ lɛ kɛba jwɛŋmɔ mli. Ani su lɛ baanyɛ awie huhuuhu ashi nɔ ni akɛ lɛ shɔ̃ɔ lɛ? Paulo kɛfata he akɛ: “Shi kɛ Nyɔŋmɔ miisumɔ akɛ ejie emlifu kpo etsɔɔ ni eha ale ehe ni wa lɛ, ni kɛlɛ eŋmɛɔ eyi shi babaoo ehiɛɔ mlifu nii ni sa fitemɔ lɛ; ni asaŋ kɛ ehaa aleɔ enunyam falɛ lɛ hu yɛ emɔbɔnalɛ nii ni asaa ato aha anunyam lɛ anɔ lɛ, mɛni obaakɛɛ? Shi nakai atsɛ wɔ hu, jeee mɛi ni jɛ Yudafoi lɛ ateŋ lɛ kɛkɛ, shi mɛi ni jɛ jeŋmaji ateŋ lɛ hu.”—Rom. 9:14-24.
9. (a) Namɛi ji “mlifu nii ni sa fitemɔ” lɛ? (b) Mɛni hewɔ Yehowa eŋmɛ etsui shi babaoo yɛ amɛ basabasafeemɔ lɛ fɛɛ sɛɛ lɛ, ni mɛni baajɛ mli aba yɛ naagbee ni baafee nɔ ni hi kɛha mɛi ni sumɔɔ lɛ lɛ?
9 Kɛjɛ be mli ni Yehowa kɛ gbalɛ wiemɔ ni aŋma yɛ 1 Mose 3:15 lɛ ha kɛbaa nɛɛ, Satan kɛ eseshi lɛ efee “mlifu nii ni sa fitemɔ.” Yehowa etee nɔ eŋmɛ etsui shi yɛ nɛkɛ be nɛɛ fɛɛ mli. Efɔŋfeelɔi etee nɔ eye egbɛi lɛ ahe fɛo; amɛwa etsuji lɛ ayi ni amɛgbe e-Bi lɛ po. Shi Yehowa eto etsui shi babaoo, ni enɛ efee sɛɛnamɔ ni hiɔ shi daa kɛha etsuji. Bɔɔ nii fɛɛ ena hegbɛ amɛna oshara ni jɛɔ atua ni atseɔ ashiɔ Nyɔŋmɔ lɛ mli baa lɛ. Yɛ nakai beaŋ nɔŋŋ lɛ, Yesu gbele lɛ kɛ nɔ ni abaatsɔ nɔ akpɔ adesai toibolɔi ha, koni ‘afite Abonsam nitsumɔi lɛ hu.’—1 Yoh. 3:8; Heb. 2:14, 15.
10. Mɛni hewɔ Yehowa etee nɔ eŋmɛ etsui shi eha efɔŋ feelɔi lɛ yɛ afii 1,900 ni eho nɛɛ fɛɛ mli?
10 Kɛjɛ be mli ni atee Yesu shi kɛjɛ gbohii ateŋ lɛ sɛɛ nɔ ni fe afii 1,900 nɛɛ, Yehowa etee nɔ ehiɛ “mlifu nii” lɛ amli, ni etsi amɛhiɛkpatamɔ lɛ naa. Mɛni hewɔ? Ejaakɛ eesaa yoo lɛ seshi lɛ fa ni ji enyɔ lɛ, mɛi ni baafata Yesu Kristo he yɛ ŋwɛi Maŋtsɛyeli lɛ mli lɛ. (Gal. 3:29) Mɛnɛɛmɛi, ni amɛyibɔ ji 144,000 lɛ ji “mɔbɔnalɛ nii” ni bɔfo Paulo wie he lɛ. Klɛŋklɛŋ lɛ afɔ nine atsɛ aŋkroaŋkroi ni ji Yudafoi ni amɛbafee nɛkɛ kuu nɛɛ. Kɛkɛ ni akɛ Samariabii ni afolɔ amɛ ketia lɛ fata he, ni yɛ naagbee lɛ, Jeŋmajiaŋbii. Yehowa kɛ tsuishiŋmɛɛ babaoo etsu eyiŋtoo lɛ he nii, ni enyɛɛɛ mɔ ko nɔ ni mɔ lɛ asɔmɔ lɛ, shi efɔseɔ jɔɔmɔi babaoo eshwieɔ mɛi ni kɛ hiɛsɔɔ kpɛlɛɔ egbɛjianɔtoo ni suɔmɔ yɔɔ mli lɛ nɔ lɛ anɔ. Amrɔ nɛɛ nakai ŋwɛi kuu lɛ anaabuamɔ lɛ miihe aba naagbee kwraa.
11. Mɛɛ kuu kroko naa Yehowa tsuishiŋmɛɛ lɛ he sɛɛ bianɛ?
11 Shi shikpɔŋ lɛ nɔ bii hu? Yɛ Nyɔŋmɔ be ni sa mli lɛ abaatee akpekpei toi akpei abɔ shi kɛjɛ gbohii ateŋ akɛ Maŋtsɛyeli lɛ shishibii yɛ shikpɔŋ nɔ. Agbɛnɛ, kɛjɛ 1935 Ŋ.B. lɛ mli titri kɛbaa nɛɛ, Yehowa tsuishiŋmɛɛ lɛ eha anyɛ abua “asafo babaoo” ko naa kɛjɛ jeŋmaji fɛɛ mli afee amɛ ekome kɛha yiwalaheremɔ.—Kpoj. 7:9, 10; Yoh. 10:16.
12. (a) Yɛ enɛ hewɔ lɛ, mɛni wɔkase yɛ Yehowa diɛŋtsɛ he? (b) Te ofeɔ onii ohaa tɛŋŋ yɛ bɔ ni Yehowa etsu saji nɛɛ ahe nii eha lɛ hewɔ?
12 Ani ayeee jalɛ sane ko yɛ enɛɛmɛi fɛɛ mli? Aye jalɛ sane! Kɛji akɛ Nyɔŋmɔ tsi efɔŋfeelɔi, “mlifu nii” lɛ ahiɛkpatamɔ eto koni ejie musuŋtsɔlɛ kpo etsɔɔ mɛi krokomɛi koni ekɛ eyiŋtoo akpa gbee lɛ, ani mɔ ko baanyɛ awie enɛ he efɔŋ yɛ gbɛ ni ja nɔ? Moŋ, yɛ be mli ni wɔnaa eyiŋtoo lɛ mli faŋŋ lɛ, wɔkaseɔ babaoo yɛ Yehowa diɛŋtsɛ he. Wɔnaa kpɛɔ wɔhe yɛ bɔ ni esu kɛ ebaŋ lɛ jeɔ kpo yɛ gbɛi sɔrɔtoi anɔ lɛ hewɔ—ejalɛsaneyeli, emɔbɔnalɛ, etsuishiŋmɛɛ, kɛ enilee ni jeɔ kpo yɛ gbɛi sɔrɔtoi anɔ lɛ. Bɔ ni Yehowa kɛ nilee etsu sane lɛ he nii lɛ baadamɔ shi kɛya naanɔ akɛ anɔkwale ni eji akɛ gbɛ ni etsɔɔ nɔ eyeɔ nɔ lɛ ji nɔ ni hi fe fɛɛ lɛ he odaseyeli. Wɔkɛ bɔfo Paulo fɛɛ kɛɔ akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ! Ekojomɔi lɛ anyɛɛɛ shishi ana, ni egbɛi lɛ hu anyɛɛɛ sɛɛ mo aja!”—Rom. 11:33.
HEGBƐ NI WƆKƐAATSƆƆ WƆ HETUU-KƐHAMƆ
13. (a) Mɛɛ hegbɛ akɛhaa wɔ kɛ wɔ diɛŋtsɛ lɛ wɔna nɔ̃ loo wɔpiŋ? (b) Mɛni baaye abua wɔ ni wɔkpɛlɛ enɛ nɔ yɛ nilee mli?
13 Shihilɛi komɛi yɛ ni haa mɔ naa nɔ waa diɛŋtsɛ ejaakɛ Nyɔŋmɔ kpatako efɔŋfeelɔi ahiɛ ni ekɛ adesai asaamɔ ni agba he sane afɔ shi lɛ aba. Te wɔfeɔ wɔnii yɛ enɛ he wɔhaa tɛŋŋ? Ani wɔnaa akɛ hegbɛ yɛ enɛɛmɛi amli ni wɔɔtsɔ nɔ wɔtse Yehowa gbɛi lɛ he kɛjɛ ahorabɔɔ ni akɛbaa nɔ lɛ he ni wɔha Abonsam atsɔ amalelɔ? Kɛ wɔha ŋaawoo akɛ: “Mibi, feemɔ ohe nilelɔ, ni oha mitsui anyɔ mimli, ni mana hetoo maha mɔ ni bɔɔ mi ahora” lɛ hi wɔjwɛŋmɔ mli lɛ, eeewo wɔ hewalɛ ni wɔnyɛ wɔfee nakai. (Abɛi 27:11) Satan, mɔ ni bɔɔ Yehowa ahora lɛ, kɛɛ akɛ kɛji akɛ gbɔmɛi laaje amɛheloo gbɛfaŋ nibii fɛɛ ni amɛpiŋ yɛ gbɔmɔtso mli hu lɛ, amɛbaashwa Nyɔŋmɔ, ni amɛbaalomɔ lɛ po. (Hiob 1:9-11; 2:4, 5) Wɔhaa Yehowa tsui nyaa kɛ wɔtsɔ anɔkwayeli nɔ wɔtsɔɔ akɛ enɛ bɛ mli yɛ wɔgbɛfaŋ yɛ haomɔi ni aaaba wɔnɔ lɛ fɛɛ sɛɛ. Wɔyɛ hekɛnɔfɔɔ kwraa akɛ Yehowa yɛ suɔmɔ kɛha ewebii, ni akɛ yɛ be ni sa mli lɛ, taakɛ eba mli yɛ Hiob gbɛfaŋ lɛ, Yehowa baawo wɔ nyɔmɔ babaoo kɛ wɔye anɔkwa.—Yak. 5:11; Hiob 42:10-16.
14. Kɛ wɔkɛ wɔhe fɔ Yehowa nɔ yɛ be mli ni wɔmiitsɔ kaai amli lɛ, mɛɛ sɛɛnamɔi krokomɛi baanyɛ aba wɔnɔ?
14 Kɛ wɔkɛ wɔhe fɔ Yehowa nɔ yɛ be mli ni kaai baa wɔnɔ lɛ, wɔbaanyɛ wɔna sui ni ekaaa ni hi fe fɛɛ. Yɛ nibii ni Yesu na amanehulu yɛ mli lɛ hewɔ lɛ, “ekase toiboo” yɛ gbɛ ni efeko nakai da lɛ nɔ. Wɔ hu wɔbaanyɛ wɔkase—ni wɔna tsuishiŋmɛɛ, tsuishitoo kɛ Yehowa jalɛ gbɛi lɛ ahe hiɛsɔɔ ni mli kwɔ. Ani wɔkɛ tsuishitoo baakpɛlɛ tsɔsemɔ lɛ nɔ?—Heb. 5:8, 9; 12:11; Yak. 1:2-4.
15. Yɛ be mli ni wɔŋmɛɔ wɔtsui shi yɛ piŋmɔ mli lɛ, mɛɛ gbɛ nɔ ehe baaba sɛɛnamɔ aha mɛi krokomɛi yɛ?
15 Mɛi krokomɛi hu baana nɔ ni wɔfeɔ. Yɛ nɔ ni baa wɔnɔ yɛ jalɛ nifeemɔ he suɔmɔ ni wɔyɔɔ lɛ hewɔ lɛ, be baashɛ ni amɛteŋ mɛi komɛi baayoo mɛi ni ji Kristo “nyɛmimɛi” diɛŋtsɛ ŋmɛnɛ, ni kɛ amɛkɛ ‘enyɛmimɛi’ lɛ fee ekome yɛ jamɔ mli lɛ, amɛnine baanyɛ ashɛ naanɔ wala he jɔɔmɔi lɛ anɔ. (Mat. 25:34-36, 40, 46) Yehowa kɛ e-Bi lɛ miisumɔ ni amɛna nakai hegbɛ lɛ. Ani wɔmiisumɔ lɛ nakai? Ani wɔmiisumɔ ni wɔtsɔ shihilɛ ni wa mli koni nakai feemɔ ahi?
16. Bɔ ni wɔsusuɔ piŋmɔi ni baa wɔnɔ nɛɛ ahe wɔhaa lɛ kɔɔ ekomefeemɔ he sane lɛ he yɛ mɛɛ gbɛ nɔ?
16 Kwɛ bɔ ni ehi jogbaŋŋ po kɛ wɔsusu shihilɛ mli nibii ni mli wawai lɛ ahe akɛ hegbɛi ni wɔna ni wɔkɛaatsɔɔ wɔhe ni wɔtuu wɔha Yehowa kɛ agbɛnɛ gbɛfaŋnɔ ni wɔɔna yɛ esuɔmɔnaa nifeemɔ mli lɛ! Nakai ni wɔɔfee lɛ baaye odase akɛ wɔmiitsi kɛmiibɛŋkɛ ekome ni wɔkɛ Nyɔŋmɔ kɛ Kristo aaafee lɛ he diɛŋtsɛ, nɔ ni Yesu sɔle yɛ he eha anɔkwa Kristofoi fɛɛ lɛ.—Yoh. 17:20, 21.
Sanegbaa Ni Akɛtiɔ Mli
● Yehowa ejie bulɛ kpele kpo yɛ lɛ diɛŋtsɛ egbɛi lɛ he yɛ be mli ni eŋmɛɔ efɔŋ feemɔ gbɛ lɛ yɛ mɛɛ gbɛ nɔ?
● Yɛ mɛɛ gbɛ nɔ “mlifu nii” ni Nyɔŋmɔ ŋmɛ etsui shi yɛ he lɛ eha emɔbɔnalɛ mli ekpa aahu kɛbashɛ wɔnɔ?
● Mɛni esa akɛ wɔbɔ mɔdɛŋ ni wɔna yɛ shihilɛi ni kɔɔ piŋmɔi ni baa wɔ diɛŋtsɛ wɔnɔ lɛ ahe lɛ mli?