Ani Esa Akɛ Anɔkwale Kristofoi Fɛɛ Afee Sɔɔlɔi?
“Shi nibii nɛɛ fɛɛ jɛ Nyɔŋmɔ dɛŋ, mɔ ni tsɔ Yesu Kristo nɔ ekpata Iɛ diɛŋtsɛ ekɛ wɔ teŋ, ni ekɛ kpatamɔ sɔɔmɔ Iɛ ha wɔ Iɛ.”—2 KORINTOBII 5:18
1. Te shihilɛ lɛ yɔɔ tɛŋŋ yɔɔ osɔfoi akuu ko ni aaahi shi yɛ asafo lɛ mli yɛ Paulo gbii lɛ amli lɛ he?
1 SƆRƆTOFEEMƆ ko bɛ osɔfoi kɛ asafoŋbii ateŋ [yɛ bɔfo Paulo gbii lɛ amli] ejaakɛ osɔfoi bɛ.” Nakai wiemɔi ni hɛleɔ mɔ shi ni je kpo yɛ London Times lɛ mli lɛ jieɔ shishijee anɔkwale ni kɔɔ klɛŋklɛŋ Kristo jamɔ he lɛ kpo. Mligbalamɔ ko bɛ osɔfoi kɛ asafoŋbii ateŋ. Ani enɛ tsɔɔ akɛ Kristofoi asafo lɛ bɛ mɛi ni nyiɛɔ amɛhiɛ ni anaa amɛ? Ni ani sɔɔlɔi yɛ shishinumɔ ko mli hu bɛ lo?
2. Mɛɛ hiɛnyiɛmɔ nɛkɛ yɔɔ yɛ mra be mli asafo lɛ mli? (Filipibii 1:1)
2 Be ko, yɛ Pentekoste, afi 33 Ŋ.B. sɛɛ, yɛ be mli ni Kristofoi ni afɔ amɛ mu lɛ ayi bɔi famɔ ni amɛbatsɔmɔ akpei babaoo lɛ, ehe bahia ni ahala mɛi ni edara yɛ mumɔŋ yɛ asafo fɛɛ asafo mli lɛ koni amɛsɔmɔ akɛ nɔkwɛlɔi kɛ asafoŋ sɔɔlɔi. Shi amɛfeee osɔfoi akuu ko. Amɛhalamɔ lɛ damɔɔɔ university aloo osɔfoi anikasemɔ he ko mli nitsumɔ nɔ. Awooo amɛ nyɔmɔ ko yɛ amɛsɔɔmɔi lɛ ahewɔ. Amɛji gbɔmɛi heshibalɔi ni hiɛ mumɔŋ hesaai, ni mumɔ krɔŋkrɔŋ lɛ ehala amɛ koni amɛkwɛ asafo ku lɛ nɔ. Shi ani amɛ pɛ ji mɛi ni shiɛɔ ‘Maŋtsɛyeli lɛ he sanekpakpa lɛ’?I Ani amɛ pɛ ji sɔɔlɔi ni yɔɔ asafo lɛ mli?—Mateo 24: 14; Bɔfoi lɛ Asaji 20:17, 18; 1 Petro 5:1-3; 1 Timoteo 3:1-10.
3, 4. Taakɛ Paulo tsɔɔ lɛ, namɛi na gbɛfaŋnɔ yɛ Kristofoi asɔɔmɔ lɛ mli?
3 Paulo ŋaawoo ni yɔɔ ewoji ni eŋmala Kristofoi ni yɔɔ Korinto lɛ mli lɛ haa sanebimɔi nɛɛ ahetoo. Kadimɔ bɔ ni eje ewolo ni ji enyɔ lɛ shishi lɛ: “Paulo, . . . ŋma yaha Nyɔŋmɔ asafo ni yɔɔ Korinto lɛ kɛ hetselɔi fɛɛ ni yɔɔ Akaia muu lɛ fɛɛ lɛ.” Ŋwanejee ko bɛ enɛ he—eŋma eyaha Kristofoi aku ni afɔ amɛ mu ni yɔɔ Korinto kɛ Akaia lɛ fɛɛ, jeee kɛha mɛi ni nyiɛɔ hiɛ lɛ kɛkɛ. No hewɔ lɛ, ewiemɔi ni kɔɔ Kristofoi asɔɔmɔ nitsumɔ lɛ he lɛ kɔɔ “hetselɔi fɛɛ” he. Yɛ nɔ ni ekɛ Timoteo tsu lɛ hewɔ lɛ, ekɛɛ akɛ: “Akɛ nɔ ni wɔhiɛ nɛkɛ sɔɔmɔ nɛɛ, taakɛ bɔ ni ana wɔ mɔbɔ lɛ, wɔtsui efaaa.” “Shi nibii nɛɛ fɛɛ jɛ Nyɔŋmɔ dɛŋ, mɔ ni tsɔ Yesu Kristo nɔ ekpata lɛ diɛŋtsɛ ekɛ wɔ teŋ, ni ekɛ kpatamɔ sɔɔmɔ lɛ hawɔ lɛ . . . No hewɔ Iɛ wɔji bɔfoi yɛ Kristo najiaŋ, tamɔ akɛ Nyɔŋmɔ etsɔ wɔnɔ ekɛ mɛi miiwie.” Etee nɔ akɛ: “Ni asaŋ wɔtooo mɔ ko mɔ ko pampi yɛ nɔ ko nɔ ko mli, koni akagbe tsɔɔmɔ lɛ he guɔ; shi moŋ, nɔ fɛɛ nɔ mli lɛ, wɔkɛ wɔhe tsɔɔ akɛ Nyɔŋmɔ sɔɔlɔi yɛ tsuishiŋmɛɛ babaoo mli.”—2 Korintobii 1:1; 4:1; 5:18-20; 6:3, 4.
4 Nɛkɛ wiemɔi nɛɛ tsɔɔ akɛ esa akɛ Kristofonyo fɛɛ Kristofonyo ni afɔ lɛ mu afee sɔɔlɔ kɛ bɔfo eha Kristo Kɛha mɛɛ yiŋtoo hewɔ? Yɛ je lɛ esha lɛ hewɔ lɛ, “mɛi kpɔji ji amɛ yɛ Nyɔŋmɔ wala gbɛfaŋ” ni kpatamɔ sɔɔmɔ lɛ he miihia koni gbɔmɛi toibolɔi kɛ anɔkwafoi ni jɛ jeŋmaji fɛɛ mli atsɔ Kristo nɔ abaná amɛ kɛ Jeŋ Muu Fɛɛ Nuŋtsɔ Yehowa teŋ wekukpaa—Efesobii 4:18; Romabii 5:1, 2.
5, 6. Paulo ma nɛkɛ jwɛŋmɔ nɛɛ nɔ mi yɛ ewolo ni eŋma eyaha Romabii lɛ mli yɛ mɛɛ gbɛ nɔ?
5 Paulo ŋma eyaha asafo ni yɔɔ Roma lɛ akɛ: “Shi moŋ te [Nyɔŋmɔ Wiemɔ lɛ] ekɛɔ tɛŋŋ? ‘Bɛŋkɛmɔ wiemɔ lɛ ebɛŋkɛo yɛ odaaŋ kɛ otsui mli fɛɛ’; no nɔŋŋ ji hemɔkɛyeli wiemɔ lɛ ni wɔshiɛɔ lɛ. Shi kɛji okɛ onaabu jaje akɛ Yesu ji Nuŋtsɔ lɛ, ni ohe oye yɛ otsui mli akɛ Nyɔŋmɔ tee lɛ shi kɛjɛ gbohii ateŋ lɛ, aaahere oyiwala. Ejaakɛ tsui akɛheɔ ayeɔ kɛshɛɔ jalɛ he, ni naaabu akɛjajeɔ kɛshɛɔ yiwalaheremɔ he.—Romabii 10:8-10.
6 Ani Paulo miiwie kɛmiitsɔɔ mɛi fioo ko ni ahala amɛ? Jeee nakai ewiemɔ lɛ shishijee tsɔɔ, ejaakɛ eŋma akɛ: “Kɛyaha mɛi ni Nyɔŋmɔ sumɔɔ . . . ni yɔɔ Roma lɛ fɛɛ.” Ni ekɛfata he akɛ: “Miitsɔ Yesu Kristo nɔ miida mi-Nyɔŋmɔ lɛ shi yɛ nyɛ fɛɛ nyɛhewɔ akɛ agbaa nyɛ hemɔkɛyeli lɛ he sane yɛ je lɛŋ fɛɛ.” Eka shi faŋŋ akɛ, Paulo kɛ eŋaawoo kɛ hewalɛwoo ni yitso 10 lɛ fata he lɛ miiha asafo muu lɛ fɛɛ. Hegbɛ ni ayɔɔ akɛ akɛ naabu ajaje sanekpakpa lɛ faŋŋ lɛ he hegbɛ yɛ kɛha mɛi fɛɛ. Yɛ anɔkwale mli lɛ, ewo esane naatsɔɔmɔ lɛ mli hewalɛ kɛtsɔ nɔ ni ekɛfata he nɛɛ nɔ: “Shi te amɛaafee tɛŋŋ ni amɛaabo amɛtsɛ mɔ ni amɛheko lɛ amɛyeko lɛ? Ni te aaafee tɛŋŋ ni amɛaahe mɔ ni amɛnuko ehe sane lɛ amɛyeŋ? Ni asaŋ te aaafee tɛŋŋ ni amɛaanu kɛ shiɛlɔ ko bɛ lɛ? Ni te aaafee tɛŋŋ ni amɛaashiɛ kɛ atsuko amɛ lɛ? Taakɛ bɔ ni aŋma akɛ: ‘Kwɛ bɔ ni hejɔlɛ he sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!’”—Romabii 1:7, 8; 10:14, 15.
7. Anɔkwale Kristo jamɔ yɛ sɔrɔto yɛ jamɔi krokomɛi lɛ ahe yɛ mɛɛ gbɛ nɔ? (Luka 19:36-40)
7 Kwɛ bɔ ni enɛ ji hewalɛwoo wiemɔ kɛha Kristofonyo fɛɛ Kristofonyo ni afɔ lɛ mu lɛ? No tsɔɔ akɛ esa akɛ amɛteŋ mɔ fɛɛ mɔ ana Maŋtsɛyeli lɛ he sane ni hereɔ mɛi ayiwala ni agbɛɔ ashwaa lɛ he miishɛɛ. Hɛɛ, yɛ Nyɔŋmɔ hiɛ lɛ, amɛnaji baanyɛ afee nɔ ni yɔɔ fɛo ni eyɛ “fɛo” hu yɛ okadi gbɛ nɔ. Mɛni hewɔ? Ejaakɛ anɔkwale Kristo jamɔ jeee pɛsɛmkunya jamɔ ni haa mɛi susuɔ amɛ pɛ amɛhe, amɛtsiɔ amɛhe kɛjɛɔ mɛi ahe ni amɛkãa dioofeemɔ he kita. Nɔ ni tamɔɔɔ nakai lɛ, ehaa Kristofoi asɔɔmɔ nitsumɔ shwereɔ, ni ajieɔ enɛ kpo yɛ wiemɔ kɛ nifeemɔ mli. Ákɛ Paulo hiɛ yɛ ehe nɔ yɛ enɛ he lɛ, anaa enɛ kɛtsɔɔ bɔ ni egba mli ejaje nɛɛ nɔ: “Kɛji mijajeee sanekpakpa lɛ, kpoo ha mi!”—1 Korintobii 9:16; Yesaia 52:7.
8. Mɛɛ sanebimɔi ni he maa saa mɛi pii ahe ŋmɛnɛ?
8 Shi anɔkwale Kristofoi akpei abɔ ni akɛ mumɔ krɔŋkrɔŋ lɛ efɔko amɛ mu akɛni amɛhiɛnɔkamɔ ji naanɔ wala yɛ shikpɔŋ nɔ, shi jeee ŋwɛi lɛ hu? Ani esa akɛ amɛ hu amɛfee sɔɔlɔi?—Lala 37:29; 2 Petro 3:13.
Ani “Asafo Babaoo” Lɛ Mli Bii Ji Sɔɔlɔi?
9. Mɛɛ nitsumɔ mɛi ni jɛ “asafo babaoo” lɛ ateŋ lɛ kɛ amɛhe woɔ mli?
9 Kpojiemɔ wolo lɛ kɛ nakai sanebimɔi lɛ ahetoo lɛ fã haa. Akɛ nɔkwɛmɔ nɔ lɛ, yɛ be mli ni Yohane ena nakai mɛi ni afɔ amɛ mu lɛ asafo ni ji 144,000 lɛ yɛ ninaa mli lɛ sɛɛ lɛ, etee nɔ ekɛɛ akɛ: “Nii nɛɛ asɛɛ lɛ mikwɛ, ni naa, asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli damɔ maŋtsɛsɛi lɛ hiɛ kɛ toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛŋ, ni amɛbolɔɔ kɛ gbee ni wa amɛkɛɛ: ‘Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ kɛ toobi lɛ nɔ!’” Eka shi faŋŋ akɛ, nɛkɛ mɛi ni abuaa amɛnaa bianɛ koni amɛje amanehulu kpeteŋkpele lɛ mli lɛ kɛ amɛkadimɔ nii akɛ Kristofoi lɛ eteee. Amɛkɛ “gbee ni wa” miijaje he ni amɛyiwalaheremɔ lɛ jɛ. Mɛɛ gbɛ amɛtsɔɔ nɔ amɛfeɔ nakai yɛ ekomefeemɔ mli yɛ? Ekomɛi ji yelikɛbuamɔ ni amɛkɛhaa shwɛɛnii ni afɔ amɛ mu lɛ ni amɛyi faaa lɛ koni amɛba gbalɛi kɛ famɔi ni kɔɔ amɛsɔɔmɔ nitsumɔ ni he hiaa lɛ he lɛ aba mli.—Kpojiemɔ 7:9, 10, 14.
10, 11. (a) Mɛɛ famɔ Yesu kɛba esɛɛnyiɛlɔi lɛ dani ekwɔ kɛtee ŋwɛi? (b) Mɛɛ gbalɛ esa akɛ aba mli yɛ wɔbe nɛɛ mli?
10 Ákɛ nɔkwɛmɔ nɔ lɛ, nɛkɛ asafo babaoo ni anyɛɛɛ akane amɛ nɛɛ miitsu nitsumɔ ko ni he hiaa yɛ Yesu famɔ akɛ ashiɛ ni atsɔɔ nii ni ekɛha ekaselɔi anɔkwafoi lɛ yɛ Galilea lɛ he. Yesu kɛɛ yɛ nakai be lɛ mli akɛ: “Aŋɔ hegbɛ fɛɛ aha mi yɛ shikpɔŋ nɔ. No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa tsɛ lɛ kɛ bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛnyɛ lɛ anɔ.” Akɛ nakai famɔ lɛ ha Kristofoi fɛɛ, jeee osɔfoi akuu ko ni ahala amɛ.—Matɛo 28:18-20;1 Korintobii 15: 6
11 Yesu famɔ lɛ kɔɔ gbalɛ ni ekɛha yɛ “nibii agbɛjianɔtoo lɛ naagbee” lɛ he lɛ he waa. Ekɛɛ akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” Te atsu nɛkɛ famɔ akɛ ashiɛ Maŋtsɛyeli lɛ he sane lɛ yɛ jeŋ fɛɛ yɛ yinɔ kome mli lɛ he nii aha tɛŋŋ? Eka shi faŋŋ akɛ Kristofoi ni afɔ amɛ mu lɛ ateŋ akpei abɔ ko ni amɛnɔ gbɔɔ yɛ be fɛɛ mli lɛ pɛ nyɛŋ atsu nɛkɛ yiwalaheremɔ nitsumɔ nɛɛ. Kulɛ ebaafee nitsumɔ ko ni anyɛŋ atsu!—Mateo 24:3, 14; Luka 21:32.
12. Mɛni ji nɔ ni mɛi ni afɔ amɛ mu lɛ kɛ miishɛɛ yɔseɔ ŋmɛnɛ?
12 “Kristo nanemɛi niyelɔi” ni afɔ amɛ mu lɛ yɛ miishɛɛ akɛ amɛaayoo gbɛfaŋnɔ ni sɔɔlɔi ni jɛ “asafo babaoo” lɛ mli ni amɛyibɔ fe akpekpei enyɔ lɛ naa yɛ Maŋtsɛyeli lɛ he sane lɛ gbɛɛ-kɛ-shwamɔ yɛ jeŋ fɛɛ yɛ be kuku ni tamɔ nɛkɛ mli lɛ. Yɛ 1930 afii lɛ amli po lɛ, anɔkwale Kristofoi pii kpɛlɛ sɔɔmɔ nitsumɔ he gbɛnaa nii yɛ shikpɔji anɔ lɛ nɔ ni amɛkɛ amɛhe ha koni amɛsɔmɔ yɛ he ni sɔɔmɔ lɛ he hiaa waa yɛ. Wɔmiida shi yɛ he kɛ afɔleshaa he nɔkwɛmɔ nɔ ni nɛkɛ nyɛmimɛi hii kɛ yei, kɛ́ amɛji mɛi ni afɔ amɛ mu lɛ ateŋ mɛi komɛi aloo “toi krokomɛi” lɛ ateŋ mɛi komɛi jio, nɛɛ fee lɛ, ejaakɛ Maŋtsɛyeli nitsumɔ lɛ hé shi waa yɛ shikpɔji babaoo nɔ yɛ Europa, Afrika, Asia, kɛ Amerika maji lɛ anɔ.—Romabii 8:17.
13. (a) Yehowa eha nitsumɔ lɛ etee hiɛ oyayaayai kɛjɛ 1943 yɛ mɛɛ gbɛ nɔ? (Yesaia 60: 22) (b) Mɛɛ gbɛfaŋnɔ “asafo babaoo” lɛ mlibii ena yɛ maŋsɛɛ sanekpakpa shiɛmɔ nitsumɔ lɛ mli?
13 Dani 1943 aaashɛ lɛ, “tsulɔ anɔkwafo kɛ nilelɔ” kuu lɛ ni ji Kristofoi ni afɔ amɛ mu lɛ akuu lɛ na akɛ ehe-miihia ni ato maŋsɛɛ sanekpakpa skul ko ama shi koni sɔɔlɔi ni ji Kristofoi anine ashɛ tsɔsemɔ nɔ koni atsɔ no nɔ asaa amɛ kɛ yiŋtoo akɛ amɛbaagbele shiɛmɔ nitsumɔ lɛ mli yɛ shikpɔji krokomɛi anɔ koni amɛha sɔɔmɔ lɛ ashwere. Kɛjɛ be mli ni agbele skul nɛɛ naa yɛ 1943 kɛbashi March 4, 1984 lɛ, nakai Gilead Skul (“Gilead” yɛ Hebri wiemɔ mli lɛ shishi ji odaseyeli kuu) lɛ etsɔse mɛi 6,100 ni átsu amɛteŋ mɛi ni fa kɛtee maŋsɛɛ shikpɔji anɔ yɛ je lɛŋ he fɛɛ he. Nɛkɛ mɛi ni amɛkase nii yɛ Gilead nɛɛ ateŋ 292 (oha fɛɛ mli 4.8) pɛ kɛɔ akɛ amɛfata kuu ni afɔ amɛ mu lɛ ahe, no hewɔ lɛ sɔɔlɔi ni ájɛ gbɛ atsɔse amɛ nɛɛ ateŋ mɛi ni fa ji mɛi ni jɛ “asafo babaoo” lɛ ateŋ. Amɛkpɛlɛ Kristofoi asɔɔmɔ nitsumɔ lɛ nɔ taakɛ Yehowa Odasefoi ni yoo je lɛŋ he fɛɛ he efee lɛ, ákɛ eji Kristofoi ashihilɛ lɛ fa yɛ be mli ni amɛjɔɔ amɛhe no amɛha Yehowa kɛtsɔ Kristo Yesu nɔ lɛ.—Mateo 24:45-47; Hebribii 10:7.
Nitsumɔ Ni Atu He Aha ni Damɔ Mɛni Nɔ?
14, 15. Kristofoi asɔɔmɔ nitsumɔ ni ámɛtu amɛhe amɛha no lɛ damɔ mɛni nɔ? (Mateo 22:37-40)
14 Ani no tsɔɔ akɛ Kristofoi yɛ amɛ diɛŋtsɛ amɛ daa gbi nitsumɔ ni amɛtu amɛhe amɛha no, aloo tsɛmɔ ni jɛ Nyɔŋmɔ ŋɔɔ koni amɛkɛ amɛhe awo sɔɔmɔ lɛ mli? Eji anɔkwale akɛ mɛi komɛi yɛ Kristendom ni ámɛtsɔɔ amɛ “daa gbi nitsumɔ ni amɛtu amɛhe amɛha” lɛ akɛ eji henumɔŋ niiashikpamɔ ko ni naa wa waa, tamɔ nɔ ni Nyɔŋmɔ tsɛ̃ amɛ tɛ̃ɛ ewo esɔɔmɔ mli. Shi ani Kristofoi asɔɔmɔ lɛ damɔ nɔ ko ni sɛɛ etsɛɛɛ tamɔ henumɔ kɛkɛ nɔ?
15 Beni bɔfo Paulo wie sɔomɔ krɔŋkrɔŋ ni akɛhaa Nyɔŋmɔ le he lɛ, mɛni ji nɔ ni etsɔɔ akɛ edamɔ nɔ aloo eji eshishitoo nii? Eŋma akɛ: “No hewɔ lɛ, enyɛmimɛi, mikɛ Nyɔŋmɔ mlitsɔlɛi miikpanyɛ fai, akɛ nyɛŋo nyɛ gbɔmɔ tsei lɛ nyɛdamɔ shi akɛ afɔle ni hiɛ ka ni he tse, ni sa Nyɔŋmɔ hiɛ, sɔɔmɔ krɔŋkrɔŋ kɛ nyɛjwɛŋmɔŋ hewalɛ [“akɛ jamɔ nifeemɔ ko ni jwɛŋmɔ yɔɔ mli,” Phillips; “ãkɛ bɔɔ nii ni yɔɔ jwɛŋmɔ,” The New English Bible, shishigbɛ niŋmaa].” Hɛɛ, sɔɔmɔ krɔŋkrɔŋ ni akɛhaa Nyɔŋmɔ lɛ damɔ jwɛŋmɔ nɔ. Mɛni hewɔ? Ejaakɛ mɔ lɛ henɔjɔɔmɔ kɛ wekukpaa ni ka ekɛ Yehowa teŋ lɛ damɔ enɔkwa Nyɔŋmɔ lɛ he nilee nɔ. No hewɔ lɛ, Kristofonyo lɛ tsɛmɔ kɛmiiha sɔɔmɔ lɛ jeee nɔ ni jɛ henumɔŋ nifeemɔ ko kɛkɛ, eyɛ mli akɛ eji niiashikpamɔ diɛŋtsɛ ko ni yɔɔ miishɛɛ. Eyɛ kanyamɔ ko ni ma shi shiŋŋ—suɔmɔ kɛha Nyɔŋmɔ kɛ naanyo.—Romabii 12:1; Yohane 17:3.
16. Ani be fɛɛ ni akɛtsuɔ heloo gbɛfaŋ nitsumɔ lɛ tsiɔ mɔ ko naa koni ekɛfee sɔɔlɔ loo minister? (Bɔfoi lɛ Asaji 18:1-5)
16 Shi ekolɛ obaabi akɛ, Ani mra be mli Kristofoi lɛ hu ji sɔɔlɔi loo ministers kɛji akɛ amɛyɛ heloo gbɛfaŋ nitsumɔ ko ni heɔ amɛbe fɛɛ aloo amɛji yeigbayei? Hɛɛ, nakai amɛji. Ekolɛ amɛbe lɛ mli fa fioo ko pɛ amɛkɛwoɔ Kristofoi asɔɔmɔ lɛ mli, ni amɛkɛshiɛɔ ni amɛkɛtsɔɔ mɛi anii, shi no ji amɛyiŋtoo titri yɛ shihilɛ mli. Amɛle akɛ ehe miihia ni ‘amɛha amɛle lɛ akpɛ’ ákɛ Kristo enɔkwa kaselɔi. No tsoɔ akɛ amɛji nitsulɔi kɛ sɔɔlɔi loo ministers jeeŋmɔ dani Kristendom bana enitsulɔi kɛ esafoi akuu lɛ.—Mateo 5:16; 1 Petro 2:9.
Amɛ Sɔɔmɔ Nitsumɔ lɛ he Odaseyeli
17, 18. (a) Mɛɛ Shishitoo mla ni kɔɔ mɔ fɛɛ mɔ he Kristo kɛfɔ shi yɛ anɔkwale Kristofoi ahe? (b) Mɛni ji sɔɔlɔ bo Minister lɛ yijiemɔ wolo diɛŋtsɛ?
17 Mɛɛ gbɛ nɔ Yehowa Odasefoi tsɔɔ yɛ akɛ amɛji sɔɔlɔi loo ministers kɛji amɛbɛ yijiemɔ wolo aloo eko ni tamɔ university nɔ̃ hu? Ojogbaŋŋ, mɛɛ gbɛ klɛŋklɛŋ Kristofoi lɛ tsɔ nɔ amɛha ale akɛ amɛji sɔɔlɔi loo ministers? Kristo diɛŋtsɛ kɛ nɔ ni ebaadamɔ nɔ ayoo amɛ lɛ ha: “Tso fɛɛ tso ni ji ekpakpa lɛ woɔ yibii kpakpai.” Esa akɛ sɔɔlɔi ni ji Kristofoi awo “yibii kpakpai,” ni nɔ ni fata he ji kaselɔi afeemɔ nitsumɔ lɛ.—Mateo 7 :17.
18 Bɔfo Paulo tsɔɔ mli yɛ nɛkɛ gbɛ nɔ: “Aso wɔsaa wɔbɔi wɔhe yijiemɔ, aloo ehia wɔ, tamɔ mɛi komɛi, ákɛ wɔhiɛɔ yijiemɔ woji kɛbahaa nyɛ, aloo nɛkɛ woji nɛɛ kɛjɛ nyɛdɛŋ lo! Nyɛji wɔ wolo ni aŋma awo wɔtsuii amli ni mɛi fɛɛ lɛ ni amɛkaneɔ; ni ajie nyɛ faŋŋ atsɔɔ akɛ nyɛji Kristo wolo ni wɔsɔmɔ yɛ he, ni jeee blɛgi, shi moŋ Nyɔŋmɔ hiɛkalɔ lɛ mumɔ lɛ akɛŋma, jeee yɛ tɛ taoii anɔ, shi moŋ tsui ni ji heloo taoii anɔ.” Te fee tɛŋŋ ni aŋma nii yɛ tsui nɔ nɛɛ? Kɛtsɔ hemɔkɛyeli wiemɔ ni tamɔ dumɔwu lɛ shiɛmɔ ni atɛo yɛ tsui mli lɛ nɔ.Nɔ ni nyiɛ sɛɛ ji akɛ nɛkɛ dumɔwu nɛɛ kanya mɔ ni nine eshɛ nɔ lɛ koni lɛ hu eshiɛ yiwalaheremɔ he sane kome too lɛ nɔŋŋ etsɔɔ mɛi krokomɛi.—2 Korintobii 3:1-3.
19. Mɛɛ yijiemɔ wolo ni yɔɔ faŋŋ Yehowa Odasefoi yɔɔ akɛ sɔɔlɔi loo ministers?
19 Ani Yehowa Odasefoi yɛ ‘Kristo wolo ni amɛŋma ákɛ sɔɔlɔi’ ni yeɔ amɛhe odase? Anɔkwalei lɛ diɛŋtsɛ wieɔ. Yɛ afi 1931 mli lɛ, be mli ni amɛkpɛlɛ amɛgbɛi ni yɔɔ sɔrɔto lɛ nɔ lɛ, no mli lɛ, Odasefoi aaafee 50,000 shiɛɔ yɛ je lɛŋ he fɛɛ he. Amaniɛbɔɔ ni je kpo yɛ 1983 lɛ tsɔɔ yifalɛ ni fe fɛɛ ni ji sɔɔlɔi loo ministers 2,652,000 ni miishiɛ Maŋtsɛyeli he sane lɛ yɛ asafoi 46,235 mli. Hɛɛ, asafoi ni yɔɔ bianɛ lɛ ayibɔ miihe atamɔ Odasefoi ni yɔɔ 1931 mli lɛ ayibɔ! Yɛ anɔkwale mli lɛ aŋmala anɔkwale lɛ yɛ tsuii akpekpei abɔ nɔ yɛ nyɛsɛɛ afii nyɔŋma-nyɔŋmai fioo ni eho nɛɛ amli—ni enɛ ji Yehowa Odasefoi asɔɔmɔ lɛ he odaseyeli ni anyɛŋ aje he ŋwane—Yesaia 43:10-12.
20. Akɛ sɔɔlɔi ni ji Kristofoi lɛ, mɛni he hiaa wɔ ŋmɛnɛ? Mɛɛ sanebimɔi eshwɛ lolo ni abaaha hetoo?
20 Sɔɔlɔi loo ministers ni ji Kristofoi babaoo ahe ehia ŋmɛnɛ fe be fɛɛ. Be lɛ faaa dɔŋŋ, ni nikpamɔ lɛ fa. Ni enɛ ji yiŋtoo titri hewɔ ni ehe hiaa ni wɔhe asa, ni wɔfee sɔɔlɔi ni shiɛɔ ni tsɔɔ nii yɛ gbɛ ni woɔ yibii nɔ. Te wɔɔfee tɛŋŋ wɔfee nakai? Te wɔɔfee tɛŋŋ wɔtsɔmɔ sɔɔlɔi loo ministers ni woɔ yibii? Ani Kristo kɛ bɔfoi lɛ anɔkwɛmɔ nii lɛ ahe yɛ sɛɛnamɔ kɛha wɔ ŋmɛnɛ ní wɔbaanyɛ wɔtsu he nii?—Efesobii 5:15, 16; Mateo 9:37, 38.a
[Shishigbɛ niŋmaa]
a Ajie kɛjɛ August 15, 1984 Watchtower lɛ mli.
Saji Otii ni Akɛtiɔ Mli
◻ Te wɔfeɔ tɛŋŋ wɔleɔ okɛ esa akɛ Kristo sɛɛnyiɛlɔi ni afɔ emɛ mu lɛ fɛɛ afee sɔɔlɔi loo ministers?
◻ Mɛni nitsumɔ “asafo babaoo” lɛ etsu yɛ ŋmɛnɛŋmɛnɛ gbii nɛɛ amli sɔɔmɔ lɛ mli?
◻ Kristofoi adaa gbi nitsumɔ ni amɛto amɛhe amɛha ni ji sɔɔmɔ lɛ damɔ mɛni nɔ?
◻ Mɛɛ odaseyeli Yehowa Odasefoi jieɔ lɛ kpo ni tsɔɔ ákɛ akɛ sɔɔmɔ nitsumɔ ewo amɛdɛŋ?
[Mfonirii ni yɔɔ baafa 8]
Agbele Gilead Skul lɛ naa yɛ 1943, yɛ South Lansing, New York. Skul lɛ shi jɛmɛ kɛba Brooklyn, New York yɛ afi 1961
[Mfonirii ni yɔɔ baafa 9]
Gilead Skul Iɛ yaa nɔ esaa sɔɔlɔi loo ministers kɛhaa sɔɔmɔ yɛ maŋsɛɛ yɛ amɛtsũ hee ní bɛŋkɛ Brooklyn Bridge lɛ mli