Abaanyɛ Asumɔ Naanyo
YESU KRISTO nɔkwɛmɔ nɔ ni kɔɔ Samarianyo lɛ he lɛ tsɔɔ nɔ ni anɔkwa naanyo suɔmɔ ji diɛŋtsɛ. (Luka 10:25- 87) Yesu tsɔɔ hu akɛ: “‘Suɔmɔ Nuŋtsɔ [Yehowa] o-Nyɔŋmɔ lɛ, kɛ otsui muu lɛ fɛɛ, kɛ osusuma muu lɛ fɛɛ, kɛ ojwɛŋmɔ muu lɛ fɛɛ.’ Kitai lɛ amli otu kɛ ewulu nɛ. Ní nɔ ni nyiɛ sɛɛ lɛ tamɔ no, akɛ: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’”—Mateo 22:37-39.
Taakɛ mɛi pii ji lɛ, ani onaa akɛ ewa kɛha bo akɛ ooosumɔ onaanyo ni jɛ weku loo maŋ kroko nɔ ja mɛi ni jɛ bo diɛŋtsɛ onɔ̃ mli pɛ? Ekolɛ nakai enɛ ji ejaakɛ okase bɔ ni akwɛɔ mɛi ahiɛaŋ kɛ jalɛ sane ni ayeee ni akɛ eko efee bo hu. Ekolɛ bo loo osuɔlɔi ena amanehulu yɛ gbɔmɛi ni jɛ weku loo maŋ kroko mli lɛ adɛŋ.
Akɛni Yesu tsɔɔ akɛ Nyɔŋmɔ kitai lɛ ateŋ ekome ji akɛ wɔsumɔ wɔnaanyo hewɔ lɛ, abaanyɛ aye henumɔi ni mli wa nɛɛ anɔ kunim. Nɔ ni haa anyɛɔ afeɔ nakai ji ni osusu mɛi fɛɛ he taakɛ Nyɔŋmɔ kɛ Kristo feɔ lɛ. Nyɛhaa wɔsusua Yesu kɛ mra be mli Kristofoi lɛ anɔkwɛmɔ nɔ yɛ enɛ gbɛfaŋ lɛ he.
Yesu Nɔkwɛmɔ nɔ Kpakpa Lɛ
Klɛŋklɛŋ afii oha lɛ mli Yudafoi lɛ sumɔɔɔ Samariabii ni hiɔ he ko ni kã Yudea kɛ Galilea teŋ lɛ asane kwraa. Be ko lɛ Yudafoi ni teɔ shi woɔ Yesu lɛ kɛ henɔwomɔ bi lɛ akɛ: “Ani jeee egbɛnaa wɔkɛɔ akɛ Samarianyo jio, ni daimonio hu yɛ omli?” (Yohane 8:48) Bɔ ni amɛnyɛɔ Samariabii nɛɛ sɔŋŋ ha hewɔ lɛ, Yudafoi lɛ ateŋ mɛi komɛi lomɔɔ Samariabii lɛ yɛ faŋŋ mli yɛ amɛ kpeehei lɛ po ni amɛsɔleɔ daa gbi koni akaha Samariabii lɛ naanɔ wala.
Ŋwanejee ko bɛ he akɛ nɛkɛ hetsɛ̃ ni naa wa nɛɛ he nilee ni Yesu yɔɔ lɛ hewɔ ni ekɛ nɔkwɛmɔ nɔ ni kɔɔ Samarianyo ni jie ehe kpo akɛ naanyo diɛŋtsɛ kɛtsɔ Yudanyo ni ojotswalɔi yi lɛ lɛ ni ekwɛ lɛ lɛ he lɛ ha lɛ. Kulɛ te Yesu baaha Yudanyo ni le mla lɛ sanebimɔ: “Ni namɔ ji minaanyo?” lɛ hetoo eha tɛŋŋ? (Luka 10:29) Ojogbaŋŋ, kulɛ Yesu baanyɛ aha hetoo tɛ̃ɛ akɛ: “Jeee Yudafoi pɛ ji onanemɛi shi moŋ gbɔmɛi krokomɛi kɛ agbɛnɛ mɔ ni ji Samarianyo po.” Shi ebaawa kɛha Yudafoi akɛ amɛaakpɛlɛ enɛ nɔ. No hewɔ lɛ egba nɔkwɛmɔ nɔ ni kɔɔ Yudanyo ko ni Samarianyo na lɛ mɔbɔ lɛ he. Nɛkɛ gbɛ nɔ Yesu ye ebua Yudafoi toibolɔi lɛ koni amɛmu sane naa akɛ abaakpa anɔkwa naanyo suɔmɔ diɛŋtsɛ lɛ mli aha mɛi ni jeee Yudafoi hu.
Yesu bɛ hetsɛ̃ kɛha Samariabii. Yɛ be mli ni efaa gbɛ kɛtsɔɔ Samaria be ko lɛ, eyajɔɔ ehe yɛ nu bu ko he beni ekaselɔi lɛ etee maŋ ko ni bɛŋkɛ jɛmɛ lɛ mli koni amɛyatao niyenii lɛ. Beni Samaria yoo ko ba nuyɛɛ lɛ, ekɛɛ lɛ akɛ: “Ha mi nu lɛ eko manu.” Akɛni Yudafoi kɛ Samariabii bɛ nɔ ko feemɔ hewɔ lɛ, yoo lɛ bi lɛ akɛ: “Te tɛŋŋ ni bo Yudanyo lɛ obaa mi Samaria yoo lɛ nu ní onu hu?” Kɛkɛ ni Yesu ye lɛ odase, ni ejaje etsɔɔ lɛ po yɛ faŋŋ mli akɛ lɛ ji Mesia lɛ. Etsu enɛ he nii kɛtsɔ maŋ lɛ mli ni etee koni eyatsɛ mɛi koni amɛbabo lɛ toi nɔ. Mɛni jɛ mli ba? “Samariabii lɛ ni jɛ nakai maŋ lɛ mli lɛ ateŋ mɛi pii he enɔ ye.” Mɛɛ nɔ kpakpa po jɛ mli ba nɛkɛ, ejaakɛ Yudafoi ni ehi amɛteŋ yɛ nakai be lɛ mli lɛ asubaŋ lɛ nako enɔ hewalɛ!—Yohane 4:4-42.
Nyɔŋmɔ Kwɛɛɛ Mɛi Ahiɛaŋ
Nyɔŋmɔ yiŋtoo ji ni Yesu ashiɛ aha Yudafoi lɛ titri, “Israel we tooi ni elaaje lɛ.” (Mateo 15:24) No hewɔ lɛ emra be mli kaselɔi lɛ ji Yudafoi. Shi beni afɔse mumɔ krɔŋkrɔŋ lɛ ashwie shi yɛ Pentekoste afi 33 Ŋ.B. lɛ sɛɛ afii etɛ pɛ lɛ, Yehowa fee lɛ faŋŋ akɛ eesumɔ ni Yudafoi ni heɔ yeɔ lɛ akpã kaselɔ-feemɔ nitsumɔ lɛ mli kɛya gbɔmɛi ni yɔɔ jeŋmaji lɛ amli lɛ, Jeŋmajiaŋbii lɛ anɔ.
Yɛ Yudafoi ajwɛŋmɔ mli lɛ, Samarianyo ni mɔ ko aaasumɔ lɛ tamɔ mɔ lɛ diɛŋtsɛ he lɛ baafee nɔ ni wa. Ebaafee nɔ ni wa waa po akɛ aaajie naanyo suɔmɔ kpo atsɔɔ Jeŋmaŋnyo foolɔ, gbɔmɛi ni kɛ Yudafoi bɛ nɔ ko feemɔ fe bɔ ni Samariabii ji. Yɛ be mli ni ewieɔ su ni Yudafoi hiɛ yɛ Jeŋmajiaŋbii lɛ ahe lɛ, The International Standard Bible Encyclopaedia lɛ jaje akɛ: “Wɔnaa hi ni ahiɔ, heguɔgbee kɛ hetsɛ̃ waa ni ayɔɔ yɛ Kpaŋmɔ Hee lɛ bei lɛ amli. Abuɔ amɛ [Jeŋmajiaŋbii lɛ] akɛ amɛhe tseee, mla eŋmɛɛɛ gbɛ ni akɛ amɛ abɔ naanyo. Amɛji Nyɔŋmɔ kɛ E-webii lɛ ahenyɛlɔi, aŋmɛɛɛ amɛ gbɛ ni amɛna Nyɔŋmɔ he nilee ja atsake amɛ awo Yuda jamɔ mli da, ni yɛ enɛ mli po lɛ, anyɛɛɛ akɛ amɛ abɔ gbagbalii kɛmɔ shi taakɛ eji yɛ blema bei lɛ amli lɛ. Agu Yudafoi lɛ akɛ amɛkawo amɛ ŋaa, ni kɛ amɛbi saji ni kɔɔ Nyɔŋmɔ he lɛ, esa akɛ alomɔ amɛ.”
Yɛ be mli ni mɛi pii hiɛ jwɛŋmɔ ni tamɔ nɛkɛ mli lɛ, Yehowa ha bɔfo Petro na ninaa ko ni akɛɛ lɛ yɛ mli akɛ ‘ekatsɛ nibii ni Nyɔŋmɔ etsuu he lɛ akɛ amɛhe tseee.’ Kɛkɛ ni Nyɔŋmɔ kudɔ lɛ kɛtee Jeŋmaŋnyo Kornelio shia. Petro ye Kristo he odase etsɔɔ Kornelio, eweku lɛ, kɛ Jeŋmajiaŋbii krokomɛi. Petro kɛɛ: “Lɛlɛŋ miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” Beni Petro shiɛɔ lolo lɛ, mumɔ krɔŋkrɔŋ ba heyelilɔi heei lɛ anɔ, kɛkɛ ni abaptisi amɛ, ni amɛbatsɔmɔ klɛŋklɛŋ Jeŋmajiaŋbii ni ji Kristo sɛɛnyiɛlɔi.—Bɔfoi lɛ Asaji, yitso 10.
Yesu sɛɛnyiɛlɔi Yudafoi lɛ kpɛlɛ nɔ ni yaa nɔ nɛɛ nɔ, amɛyoo akɛ Yesu famɔ akɛ ‘afee jeŋmaji lɛ fɛɛ amli gbɔmɛi lɛ kaselɔi’ lɛ kɔɔɔ Yudafoi ni yɔɔ maji fɛɛ mli lɛ pɛ he, shi Jeŋmajiaŋbii hu fata he. (Mateo 28:19, 20; Bɔfoi lɛ Asaji 11:18) Akɛni amɛye hetsɛ ni amɛyɔɔ kɛha Jeŋmajiaŋbii lɛ nɔ kunim hewɔ lɛ, amɛkɛ ekaa to shiɛmɔ nitsumɔ ko tafaa he gbɛjianɔ, koni amɛfee jeŋmajiaŋbii lɛ kaselɔi. Abaanyɛ akɛɛ yɛ no sɛɛ nɔ ni shɛɛɛ afii 30 akɛ, ashiɛ sanekpakpa lɛ “atsɔɔ bɔɔ nii fɛɛ ni yɔɔ ŋwɛi shishi lɛ.”—Kolosebii 1:23.
Mɔ ní nyiɛ shiɛmɔ nitsumɔ nɛɛ hiɛ ji bɔfo Paulo, ní eji Yudanyo Kristofonyo hu. Dani eeetsɔ Kristo sɛɛnyiɛlɔ lɛ, no mli lɛ eji Farisifoi ajamɔ kuu lɛ mli nyo ni yɔɔ ekaa. Jeee Jeŋmajiaŋbii pɛ amɛbuuu shi amɛbuuu amɛ diɛŋtsɛ amɛmaŋ bii ni ji gbɔmɛi foji lɛ po. (Luka 18:11, 12) Shi Paulo haaa jwɛŋmɔ ni ahiɛ nɛɛ agbala lɛ kɛjɛ naanyo suɔmɔ ni eeejie kpo etsɔɔ mɛi krokomɛi lɛ mli. Shi moŋ ebatsɔ “jeŋmaji abɔfo,” etuu ewala fɛɛ eha kaselɔfeemɔ nitsumɔ lɛ yɛ Mediteranea shikpɔji lɛ fɛɛ nɔ.—Romabii 11:13.
Atswia Paulo tɛi, ayi lɛ, ni awo lɛ tsuŋ yɛ esɔɔmɔ nitsumɔ be lɛ mli. (Bɔfoi lɛ Asaji 14:19; 16:22, 23) Ani niiashikpamɔ ni naa wa nɛɛ ha emli fu ni emu sane naa akɛ eefite ebe yɛ maji komɛi kɛ wekui komɛi ahe efolo? Dabi kwraa. Ele akɛ gbɔmɛi aŋkroaŋkroi ni hiɛ tsuijurɔ egbɛ eshwa wekui kɛ majianɔbii sɔrɔtoi babaoo lɛ amli yɛ egbii lɛ amli.
Kɛ Paulo na Jeŋmajiaŋbii komɛi ni miisumɔ ni atsɔɔ amɛ Nyɔŋmɔ gbɛi lɛ, enaa suɔmɔ kɛhaa amɛ. Akɛ nɔkwɛmɔ nɔ lɛ, eŋma Tesalonikabii lɛ akɛ: “Wɔmli jɔ yɛ nyɛteŋ, taakɛ bɔ ni biianyɛ hiɛɔ lɛ diɛŋtsɛ ebii dɔdɔɔdɔ lɛ. Ni akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.” (1 Tesalonikabii 2:7, 8) Nɛkɛ wiemɔi ni jɛ tsuiŋ nɛɛ tsɔɔ akɛ Paulo sumɔɔ Jeŋmajiaŋbii ni yɔɔ Tesalonika lɛ jogbaŋŋ, ni eŋmɛɛɛ gbɛ ni nɔ ko afite wekukpaa kpakpa mli miishɛɛ ni ekɛ amɛ naa lɛ.
Aatsu Naanyo Suɔmɔ He Nii
Ŋmɛnɛ, mɛi ni kɛ amɛhe bɔɔ Kristofoi asafo lɛ he lɛ naa naanyo suɔmɔ kɛhaa gbɔmɛi ni jɛ wekui fɛɛ mli, taakɛ eji yɛ klɛŋklɛŋ afii oha lɛ mli lɛ. Akɛni anɔkwa Kristofoi kɛ Nyɔŋmɔ gbeyeishemɔ susuɔ mɛi krokomɛi ahe, ni amɛgbaa amɛ Maŋtsɛyeli lɛ he sanekpakpa lɛ hewɔ lɛ, amɛha bɔ ni amɛnuɔ gbɔmɛi ni eji amɛkɛ amɛhe ebɔɔɔ asafo lɛ he kulɛ amɛyaleŋ amɛ lɛ shishi amɛhaa lɛ mli elɛɛ. Amɛyɛ nyɛmimɛi asuɔmɔ po kɛha amɛ. (Yohane 13:34, 35) Enɛ baanyɛ afee bo hu oniiashikpamɔ.
Suɔmɔ ni tamɔ nɛkɛ yɛ Yehowa Odasefoi ateŋ, eyɛ mli akɛ anaa amɛ yɛ shikpɔji 229 anɔ ni amɛdamɔ shi kɛha “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi.” (Kpojiemɔ 7:9) Akɛ je muu fɛɛ nyɛmifeemɔ lɛ, amɛfee ekome yɛ Yehowa jamɔ mli, yɛ bɔ ni amɛkpooɔ akɛ amɛkɛ amɛhe aaawo wekui amli béi kɛ bienyɛyelii amli lɛ hewɔ, kɛ agbɛnɛ yɛ kpoomɔ ni amɛkpoɔ gbɔmɛi ahe jwɛŋmɔ fɔŋ ní anaa ni haaa gbɔmɛi kɛ amɛhe ana naanyobɔɔ ni miishɛɛ yɔɔ mli lɛ hewɔ.
Okɛ Odasefoi lɛ abɔ, ni obaana bɔ ni gbɔmɛi ni jɛ wekui kɛ maji sɔrɔtoi anɔ feɔ Nyɔŋmɔ suɔmɔnaa nii amɛhaa. Obaanyɛ ona bɔ ni naanyo suɔmɔ tsuɔ nii ehaa yɛ be mli ni amɛjajeɔ Nyɔŋmɔ Maŋtsɛyeli lɛ he sanekpakpa lɛ. Hɛɛ, ni yɛ amɛ asafoi lɛ amli hu lɛ, okɛ mɛi ni mli hi, ni yeɔ anɔkwa, ni kɛ amɛshihilɛ tsɔɔ akɛ amɛkase bɔ ni amɛaasumɔ amɛnanemɛi diɛŋtsɛ lɛ baakpe.
[Mfoniri ni yɔɔ baafa 6]
Obaana gbɔmɛi ni yɔɔ miishɛɛ ni jɛ jeŋmaji sɔrɔtoi fɛɛ mli yɛ Yehowa Odasefoi asafoi lɛ amli
[He ni Mfoniri ni yɔɔ baafa 4 lɛ Jɛ]
Beni Samarianyo ni Na Mɔbɔ lɛ Shɛ Gbɔiatoohe/The Doré Bible Illustrations/Dover Publications, Inc