“Namɔ Ebale Yehowa Jwɛŋmɔ?”
“Ejaakɛ ‘namɔ ebale Yehowa Jwɛŋmɔ, aloo numɔ ebatsɔ eŋaawolɔ?’”—ROMABII 11:34; YESAIA 40:13, Greek Septuagint Version.
1. (a) Mɛɛ sane ni biɔ hetoo-hamɔ Paulo tsɛ sɛɛ kɛjɛ Yesaia 40:13? (b) Wiemɔ titri ko ni yɔɔ sane ni etsɛ sɛɛ lɛ mli lɛ yɛ sɔrɔto yɛ shishijee Hebri lɛ he yɛ mɛɛ gbɛ nɔ?
1 NƆ NI fe afii 2,700 ni eho nɛ ni akɛ sane ko ni biɔ hetoohamɔ fɔ blema Israel maŋ lɛ hiɛ, ni be ko Yudanyo Farisinyo ko ŋɔ sanebimɔ nɛɛ ekɛfee wiemɔ yɛ ewolo ni eŋma yɛ Romabii 11:34 lɛ mli: “Ejaakɛ, ‘namɔ ebale Yehowa jwɛŋmɔ, aloo namɔ ebatsɔ eŋaawolɔ?’” Bɔfo Paulo ŋma bɔ ni sanebimɔi nɛɛ yɔɔ lɛ kɛjɛ blema Hela Septuagint Version lɛ mli ŋmalɛ ni ji Yesaia 40:13, ni nɛkɛ shishitsɔɔmɔ nɛɛ kɛ wiemɔ “jwɛŋmɔ” (nous) tsu nii fe wiemɔ “mumɔ” taakɛ anaa yɛ shishijee Hebri ŋmalɛ lɛ mli lɛ.
2. Te wɔnuɔ adesa “jwɛŋmɔ” lɛ shishi wɔhaa tɛŋŋ? Feemɔ enɛ he nɔkwɛmɔ nɔ.
2 Agbɛnɛ, mɛni ji nɔ ni wiemɔ ni jɛ mumɔŋ, “Yehowa jwɛŋmɔ” lɛ tsɔɔ? Akɛ bɔɔ nii ni ji adesai lɛ, yɛ wɔgbɛfaŋ lɛ, jwɛŋmɔ lɛ damɔ shi kɛha gbɛ ni wɔtsɔɔ nɔ wɔsusuɔ loo wɔjwɛŋɔ nii ahe. Akɛ nɔkwɛmɔ nɔ lɛ, wɔbaanyɛ ‘wɔto wɔyiŋ’ ni wɔná “nɔ ni Kristo jwɛŋ lɛ, . . . nɔŋŋ.” (Filipibii 2:5; agbɛnɛ kwɛmɔ 1 Mose 11:6.) Wɔ jwɛŋmɔŋ nyɛmɔi lɛ anɔ kwɔlɔ kwraa fe kooloo fɛɛ kooloo nɔ̃.
3-5. (a) Mɛni Yesaia 55:8, 9 tsɔɔ akɛ eji Yehowa “jwɛŋmɔ” lɛ? (b) Mɛni hewɔ ejeee nɔ ko ni yɔɔ naakpɛɛ akɛ Paulo aaawie taakɛ aŋma yɛ Romabii 11:33 lɛ? (d) Mɛni bɔfo lɛ tsɔɔ yɛ nɔ ni ewie yɛ Romabii 11:34 lɛ hewɔ? (e) Mɛni hewɔ niŋmalɔi ni hi shi dani Kristofoi abe lɛ shɛ lɛ nyɛŋ ale Yehowa “jwɛŋmɔ” lɛ?
3 Nɔ ni Yehowa Nyɔŋmɔ, ni ji Bɔlɔ lɛ yɔɔ yɛ ejwɛŋmɔ mli lɛ nɔ kwɔ kwraa fe nɔ ni wɔ adesai bɔɔ nii ni wɔyeee emuu nɛɛ baanyɛ ana yɛ wɔjwɛŋmɔ mli aloo wɔɔnyɛ ni wɔ diɛŋtsɛ lɛ wɔsusu he. Egbalaa jwɛŋmɔ kɛbaa anɔkwale ni he hiaa nɛɛ nɔ yɛ gbalɛ ni yɔɔ Yesaia 55:8, 9 lɛ, he ni aŋma yɛ akɛ: “Shi jeee mijwɛŋmɔi lɛ ji nyɛjwɛŋmɔi lɛ, ni jeee nyɛgbɛ̀i lɛ ji migbɛi lɛ, Yehowa kɛɛ; shi bɔ ni ŋwɛi kwɔ fe shikpɔŋ lɛ, nakai migbɛ́i lɛ kwɔ fe nyɛgbɛ̀i lɛ, ni mijwɛŋmɔi lɛ hu kwɔ fe nyɛjwɛŋmɔi lɛ!” No hewɔ lɛ esusuɔ nibii ni hi jogbaŋŋ he ehaa ebɔɔ nii ni ji adesai, titri lɛ kɛha mɛi ni kɛ lɛ boteɔ kpaŋmɔ wekukpaa mli lɛ, fe bɔ ni wɔ ni ji bɔɔ nii ni yɔɔ shikpɔŋ nɛɛ nɔ lɛ baanyɛ ato he gbɛjianɔ. Belɛ ebɛ naakpɛɛ tsɔ̃ akɛ, yɛ be mli ni éwie Yehowa gbɛjianɔtoo lɛ fa ko ni yɔɔ naakpɛɛ lɛ kɛ gbɛ ni atsɔɔ nɔ atsuɔ he nii lɛ he lɛ, enɛ nyɛ̃ “jeŋmaji abɔfo” lɛ nɔ ni ejaje akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ, ekojomɔi lɛ anyɛɛɛ shishi ana, ni egbɛ̀i lɛ hu anyɛɛɛ sɛɛ mo aja!” (Romabii 11:13, 33) Eka shi faŋŋ akɛ, gbɔmɔ ko bɛ ni enyɛ etsɔ hiɛ etao Yehowa gbɛ̀i lɛ amli eha lɛ. No hewɔ lɛ, bɔfo lɛ ni mumɔ yɔɔ enɔ lɛ tee nɔ ewie akɛ: “Ejaakɛ ‘namɔ ebale Yehowa jwɛŋmɔ (noun) , aloo hamɔ ebatsɔ eŋaawolɔ?’” (Romabii 11: 34, NW) Jerusalem Bible lɛ kaneɔ yɛ biɛ akɛ: “Namɔ po yɔɔ ni ebaanyɛ ele Nuŋtsɔ lɛ jwɛŋmɔ? Namɔ baanyɛ afee eŋaawolɔ?
4 Bɔfo lɛ kɛ nakai wiemɔi lɛ etsɔɔɔ akɛ, yɛ be mli ni Nyɔŋmɔ ejie nɔ ni yɔɔ ejwɛŋmɔ mli lɛ kpo lɛ sɛɛ lɛ, gbɔmɔ nyɛŋ ale aloo enu E-jwɛŋmɔ lɛ shishi Dabi! Ejaakɛ Nyɔŋmɔ ejie ejwɛŋmɔ lɛ kpo etsɔɔ wɔ adesai lɛ yɛ e-Wiemɔ ni jɛ mumɔŋ, Ŋmalɛ Krɔŋkrɔŋ lɛ baafai lɛ amli. Nɔ ni bɔfo lɛ tsɔɔ ji akɛ, gbɔmɔ ko nyɛŋ ajɛ lɛ diɛŋtsɛ esuɔmɔ mli eto eyiŋ yɛ nɔ ko he kɛtsɔ lɛ diɛŋtsɛ ejwɛŋmɔŋ nyɛmɔi anaa ni ekɛtsɔ nɔ ni Nyɔŋmɔ diɛŋtsɛ eto eyiŋ yɛ he lɛ hiɛ ni ekɛ Nyɔŋmɔ nɔ̃ lɛ aja pɛpɛɛpɛ! Kɛ Nyɔŋmɔ tsɔko hiɛ ejieko nɔ ko kpo lɛ, gbɔmɔ ko nyɛŋ atsɔ hiɛ atsɔɔ nɔ ni Nyɔŋmɔ baafee. Yɛ anɔkwale mli lɛ, belɛ dani ŋwɛi kpojiemɔ ni yɔɔ Biblia lɛ mli lɛ aaaba lɛ, no mli lɛ gbɔmɔ ko nyɛko ale “Yehowa jwɛŋmɔ.” Mɛi ni ŋmala Ŋmalɛ Krɔŋkrɔŋ lɛ mli woji 39 lɛ kɛtsɔ Kristofoi aniŋmalɔi lɛ ahiɛ lɛ ateŋ mɔ ko nyɛɛɛ afee nakai, mlahalɔ Mose po nyɛɛɛ afee nakai.
5 Akɛ nɔkwɛmɔ nɔ lɛ, mɔ ko mɔ ko bɛ ni baanyɛ anu nɔ ni yɔɔ Yehowa jwɛŋmɔ mli yɛ bɔ ni ekɛ Abraham kɛ eseshibii lɛ ye ha lɛ shishi, ni mɔ ko mɔ ko bɛ ni baanyɛ anu bɔ ni enɛɛmɛi fɛɛ kɔɔ saji ni ba yɛ Ŋ.B. klɛŋklɛŋ afii oha lɛ mli lɛ he lɛ shishi.
Yehowa “Jwɛŋmɔ” Yɛ “Mutso” Lɛ He
6. (a) Mɛɛ shiwoo Paulo wieɔ he yɛ Romabii yitso 11 lɛ? (b) Aduro Abraham babaoo yɛ mɛɛ gbɛ nɔ, ni yɛ mɛni hewɔ?
6 Bɔfo lɛ wie “Abraham seshi” ni agba he sane afɔ shi lɛ he kɛjɛ Romabii, yitso 11 shishijee kɛbashi kuku 34. Taakɛ nɔ ni Mose ŋma fɔ shi yɛ 1 Mose 12:8 kɛ 22:17, 18 lɛ tsɔɔ lɛ, Yehowa Nyɔŋmɔ wo shi akɛ ebaajɔɔ blematsɛ Abraham kɛtsɔ eshwiei, aloo “seshi” lɛ nɔ; seshi nɛɛ mli aloo kɛtsɔ enɔ Abraham Nyɔŋmɔ lɛ baajɔɔ shikpɔŋ lɛ nɔ wekui kɛ jeŋmaji fɛɛ yɛ ebe ni sa mli. Mɛɛ shiwoo ni yɔɔ nyam po eeenyɛ etsɔ eyelɔ nɛkɛ, ni mɛɛ hemɔkɛyeli kɛ toiboo he nyɔmɔwoo eeeji kɛaaha Abraham akɛ eeetsɔ nakai shiwoo lɛ yelɔ!
7. (a) Mfoniri-feemɔ mli “mutso” lɛ fai lɛ damɔ shi kɛha namɔ? (b) “Tso niji” lɛ anine baashɛ mɛni nɔ? (d) Mɛni yɔɔ Yehowa “jwɛŋmɔ” mli ni no mli lɛ enako ejie lɛ kpo lolo yɛ “seshi” lɛ he?
7 Bɔfo lɛ kɛ nɔ ni yɔɔ Yehowa jwɛŋmɔ mli kɛjɛ shishijee lɛ to mutso ni daa he, tso ni ebu yɛ emaŋ ni ji Israel shikpɔŋ lɛ nɔ lɛ he. Yɛ nɛkɛ mfoniri nɛɛ kɛ gbeekpamɔ naa lɛ, nɛkɛ okadi mutso nɛɛ shishifa ji Abraham diɛŋtsɛ. Tso lɛ tsoku, ni kwɛ̃ kɛjɛ Abraham, ákɛ okadi shishifa lɛ mli lɛ bafee esuɔmɔ bi Isak, enabi Yakob loo Israel, kɛ Yakob bihii 12 lɛ, mɛi ni bafee tsɛmɛi kɛha Israel akutsei 12 lɛ. Yɛ fɔmɔsu naa lɛ, mɛi ni jɛ nakai blematsɛmɛi 12 lɛ amli lɛ fɛɛ ji tso niji ni mamɔ nakai okadi mutso lɛ nɔ. Yɛ enɛ hewɔ lɛ, amɛji mɛi pɔtɛɛ ni baatsɔmɔ shiwoo “Abraham seshi” lɛ ni amɛnɔ abaatsɔ ajɔɔ wekui kɛ jeŋmaji fɛɛ ni yɔɔ shikpɔŋ lɛ nɔ yɛ Nyɔŋmɔ yiŋtoo loo “jwɛŋmɔ” ni suɔmɔ yɔɔ mli lɛ naa lɛ. Shi nɔ ni amɛleee yɛ nɛkɛ “seshi” nɛɛ he ji akɛ ebafeŋ heloo naa gbɔmɔ ko ni jɛ blematsɛ Abraham mli, ejaakɛ ebaafee mumɔŋ “seshi.” No hewɔ lɛ etsɛ baafee mɔ ko ni da fe Abraham, ni enɔ kwɔ kwraa fe lɛ. Jeee mɔ ko mɔ ko tsɛ nɛɛ baafee akɛ ja Wala-Halɔ Kpeteŋkpele lɛ, Yehowa Nyɔŋmɔ diɛŋtsɛ. Belɛ agbɛnɛ namɔ baafee mɔ titri yɛ nɛkɛ “seshi” nɛɛ mli?
8. (a) Te fee tɛŋŋ ni Yesu batsɔ Mɔ ni da fe Isak lɛ? (b) Mɛni hewɔ Yesu afɔleshaa lɛ kɛ ŋwɛi ni atee lɛ shi kɛtee lɛ he hiɛɔ kɛha shikpɔŋ nɔ wekui fɛɛ ajɔɔmɔ lɛ?
8 Nɛkɛ mɔ nɛɛ da fe Isak, Abraham gbɔlɛ be mli binuu lɛ. “Gbɔmɔ Kristo Yesu” ji mɔ ni ji Isak seshinyo shi enɔ kwɔ fe Isak kɛ ebi Yakob loo Israel, kɛ Yakob bihii 12 lɛ ni fee Israel maŋ lɛ shishitooi 12 lɛ. (1 Timoteo 2:5) Abifao ni abaatsɛ lɛ akɛ Yesu lɛ baafee “Nyɔŋmɔ Bi,” ejaakɛ Yehowa Nyɔŋmɔ mumɔ lɛ ji nɔ ni ha enyɛ Maria obalayoo fro lɛ ŋɔlɛ hɔ́. Yɛ anɔkwale mli lɛ, ajie ewala kɛjɛ mumɔŋ shihilɛ he lɛ kɛbawo Maria musuŋ, ni ewu Yosef ji Yesu shikpɔŋ nɔ tsɛ kɛkɛ ni kwɛ lɛ, (Luka, yitsei 1-3) Shi, taakɛ saji lɛ ba ha lɛ, Yesu batsɔɔɔ mɔ ni jɔɔ shikpɔŋ lɛ nɔ wekui kɛ jeŋmaji fɛɛ ákɛ gbɔmɔ ni yɔɔ shikpɔŋ nɔ. Eji anɔkwale akɛ, kɛtsɔ egbɔmɔtso ni esha bɛ mli ni yeɔ emuu ni ekɛsha afɔle yɛ Kalvary yɛ Yerusalem sɛɛ yɛ afi 33 Ŋ.B. lɛ nɔ lɛ, Yesu baanyɛ asɔmɔ agbɛnɛ akɛ mɔ ni abaatsɔ enɔ ajɔɔ adesai fɛɛ. Shi yɛ egbele sɛɛ gbi ni ji etɛ lɛ nɔ yɛ afi 33 Ŋ.B. lɛ, Yehowa Nyɔŋmɔ, eŋwɛi Tsɛ lɛ tee lɛ shi kɛjɛ gbohii ateŋ ni yɛ no sɛɛ lɛ eku esɛɛ kɛtee ŋwɛi akɛ Nyɔŋmɔ mumɔŋ Bi. Jɛmɛ ji he ni ebaajɛ ejɔɔ shikpɔŋ lɛ nɔ wekui kɛ jeŋmaji fɛɛ lɛ.
9. (a) Okadi matso lɛ shishinumɔ lɛ mli balɛɛ agbɛnɛ yɛ mɛɛ gbɛ nɔ? (b) Mumɔŋ tso niji lɛ ayiɔ hɔ feɔ enyiɛ, ni te wɔfeɔ tɛŋŋ wɔleɔ enɛ? (d) Mɛɛ gbɛ nɔ Galatabii 3:28, 29 haa wɔnuɔ nɛkɛ “niji” nɛɛ ashishi faŋŋ?
9 Yɛ shishinumɔ nɛɛ naa lɛ, bɔfo lɛ nɔkwɛmɔ nɔ ni kɔɔ mutso lɛ he lɛ banaa shishinumɔ hee ni mli lɛɛ waa diɛŋtsɛ. Mumɔŋ mutso lɛ “shishifa” lɛ bafeɔ Yehowa Nyɔŋmɔ, mɛi fɛɛ a-Wala-Halɔ Kpeteŋkpele lɛ, Mɔ ni da fe blematsɛ Abraham lɛ. Nɛkɛ Abraham Kpeteŋkpele nɛɛ Bi koome lɛ ji Yesu Kristo, Mɔ ni da fe Isak lɛ. Nɛkɛ Isak Kpeteŋkpele nɛɛ ji Kristofoi asafo lɛ ni akɛ Abraham Kpeteŋkpele, Yehowa Nyɔŋmɔ, mumɔ lɛ efɔ́ amɛ lɛ yitso. Kristofoi asafo lɛ mli bii ji mumɔŋ tso niji ni kwɛ̃ɔ yɛ teokrase mutso lɛ nɔ, ni taakɛ Kpojiemɔ 7 :1-8 kɛ 14:1-3 lɛ tsɔɔ lɛ, yɛ naagbee lɛ amɛyibɔ baafee 144,000. No hewɔ lɛ wɔkaneɔ yɛ Galatabii 3:28, 29 akɛ: “Yudanyo bɛ lɛ, Helanyo hu bɛ dɔŋŋ; nyɔŋ bɛ lɛ, odehe hu bɛ dɔŋŋ; nuu bɛ lɛ, yoo hu bɛ dɔŋŋ: ejaakɛ nyɛ fɛɛ, mɔ kome ji nyɛ yɛ Kristo Yesu mli. Shi kɛ Kristo nii ji nyɛ lɛ, belɛ Abraham seshibii ji nyɛ, kɛ gboshiniyelɔi hu yɛ shiwoo lɛ naa.”
10. (a) Ŋamɛi ji klɛŋklɛŋbii ni hegbɛ yɔɔ kɛha emɛ akɛ amɛbaatsɔmɔ mumɔŋ niji lɛ? (b) Amɛteŋ namɛi “ahere amɛyiwala” lɛ, ni yɛ mɛɛ gbɛ no Paulo tsɛ gbalɛ ko koni ekɛtsɔɔ enɛ mli?
10 Akɛni heloo naa Yudafoi ni yɔɔ Yesu gbii lɛ amli lɛ ji eheloo naa nyɛmimɛi, ni amɛjɛ blematsɛ Abraham mli kɛtsɔ heloo naa fɔmɔ nɔ hewɔ lɛ, amɛbafee klɛŋklɛŋbii ni baatsɔmɔ nakai mumɔŋ mutso lɛ “niji.” Amɛkɛ Abraham Kpeteŋkpele lɛ ebote Mla kpaŋmɔ mli kɛtsɔ Mose ni ji teŋdamɔlɔ lɛ nɔ. Yesu Kristo baaa mɔ ko ŋɔɔ tɛ̃ɛ yɛ shikpɔŋ nɔ, shi moŋ “Israel we tooi ni elaaje lɛ” ŋɔɔ eba. (Mateo 10:6) No hewɔ lɛ klɛŋklɛŋbii ni batsɔmɔ “tso niji” yɛ nakai mumɔŋ mutso lɛ ni eshishifa ji Yehowa Nyɔŋmɔ lɛ nɔ lɛ ji heloo naa Yudafoi, Yesu Kristo bɔfoi anɔkwafoi 12 lɛ kɛ heloo naa Yudafoi akpei krokomɛi. Shi heloo naa Yudafoi lɛ ateŋ “shwɛɛnii” fioo ko pɛ “ahere amɛyiwala” ni amɛbatsɔmɔ Abraham Kpeteŋkpele lɛ seshibii kɛ “shiwoo” lɛ yelɔi, taakɛ ágba afɔ shi yɛ Yesaia 10:22 lɛ. Paulo tsɛ nɛkɛ gbalɛ nɛɛ sɛɛ yɛ Romabii 9:27.
11. (a) Mɛɛ be afolɔ mɛi ni akpaa amɛ gbɛ akɛ amɛbaatsɔmɔ “niji” lɛ ashwie? (b) Te fee tɛŋŋ ni atɛo ŋaŋmutso “niji” yɛ nɔ, ni atɛo yɛ mɛɛ mutso nɔ?
11 Mɛi ni baanyɛ atsɔmɔ “tso niji” ni jɛ “Abraham seshibii” lɛ ateŋ lɛ folɔmɔ kɛmiijɛ tso lɛ nɔ lɛ je shishi yɛ be mli ni atsake Samariabii ni afo amɛ ketia lɛ, ni ebaye emuu kwraa no sɛɛ afii etɛ kɛ fã yɛ Yesu Kristo, Isak Kpeteŋkpele lɛ gbele kɛ eshitee lɛ sɛɛ. Nakai be lɛ mli bɔfo Petro tsake heyelilɔi foolɔi, klɛŋklɛŋbii ni jeee Yudafoi, Roma asraafoi oha atsɛ Kornelio kɛ eweku lɛ kɛ enanemɛi heyelilɔi lɛ, yɛ sɛɛ mli beni akɛ Yehowa mumɔ lɛ efɔ amɛ mu ni afɔ́ amɛ ni abaptisi amɛ lɛ sɛɛ. (Bɔfoi lɛ Asaji, yitso 10) Nɛkɛ gbɛ nɔ atsɔ abatɛo ŋaŋmutso lɛ “niji” lɛ yɛ mumɔŋ mutso ni Yehowa Nyɔŋmɔ ji “shishifa” ni haa wala lɛ nɔ.
12. (a) Mɛni baaba kɛ “niji” ni afolɔ ashwie lɛ tsake amɛtsui? Feemɔ enɛ he nɔkwɛmɔ nɔ. (b) Enɛ feɔ mɛni he nɔkwɛmɔ nɔ? (d) Te esa akɛ wɔhere Yehowa “jwɛŋmɔ” nɛɛ ni ajie lɛ kpo aha wɔ lɛ nɔ wɔha tɛŋŋ, taakɛ Paulo fee lɛ?
12 Shi, kɛji akɛ heloo naa Yudafoi ni afolɔ amɛ kɛjɛ tso lɛ nɔ lɛ aaasusu saji ahe ni amɛaatsake, tamɔ Akwila kɛ Priskila fee lɛ, abaaku sɛɛ atɛo amɛ awo mumɔŋ hegbɛ ni heloo naa Yudafoi lɛ laaje kɛtsɔ he ni amɛheee Isak Kpeteŋkpele, Yesu Kristo amɛyeee hewɔ lɛ nɔ. (Bɔfoi lɛ Asaji 18:1-4, 26; Romabii 16:3; 1 Korintobii 16:19) Enɛ fee Yehowa Nyɔŋmɔ, Abraham Kpeteŋkpele lɛ duromɔ he nɔkwɛmɔ nɔ. Nɛkɛ ejurɔfeemɔ ni yɔɔ naakpɛɛ ni Yehowa Nyɔŋmɔ jie lɛ kpo etsɔɔ heloo naa Yudafoi ni Nyɔŋmɔ sumɔɔ amɛ lolo yɛ amɛblematsɛmɛi lɛ ahewɔ lɛ ji nɔ ni ha bɔfo lɛ jaje akɛ, “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ!” Ani Yehowa “jwɛŋmɔ” lɛ kpojiemɔ yɛ nɛkɛ gbɛ nɔ nɛɛ teeɔ wɔ hu wɔ hiɛsɔɔ ni jɛ tsuiŋ tɔ̃ɔ lɛ shi?
Mɔ Tsui Fɛɛ kɛ Jwɛŋmɔ ni Ekɛaasumɔ Nyɔŋmɔ
13, 14. (a.) Te fee tɛŋŋ ni Nyɔŋmɔ kɛ Mla lɛ ha, ni kɛha mɛɛ yiŋtoo? (b) Mɛni Yesu kɛɛ yɛ nakai Mla lɛ he, ni mɛɛ “tsui” etsɔɔ yɛ biɛ lɛ? (d) Mɛɛ kitai enyɔ Yesu tsɛ sɛɛ lɛ, ni mɛni hewɔ esa akɛ wɔye nɔ?
13 Yehowa Nyɔŋmɔ kɛ blematsɛ Abraham heloo naa seshibii, Israel maŋ lɛ fee kpaŋmɔ ko, ni gbalɔ Mose sɔmɔ yɛ mli akɛ teŋdamɔlɔ. Enɛ ba mli jeeŋmɔ yɛ afi 1513 D.Ŋ.B., yɛ Sinai Shikpɔŋ ni Shwɛ Fioo Nu Abɔle lɛ lɛ nɔ kɛ agbɛnɛ yɛ Sinai Gɔŋ lɛ he. Jɛmɛ eha amɛ e-Mla yɛ. Bɔfo Paulo ŋma yɛ nɛkɛ Mla nɛɛ he akɛ: “No hewɔ lɛ Mla lɛ etsɔ wɔtsɔselɔ kɛmiiya Kristo ŋɔɔ, koni hemɔkɛyeli mli abawɔ bem yɛ.” (Galatabii 3:24) Agbɛnɛ mɛni ji no ni Yesu Kristo kɛɛ yɛ Mla ni atsɔ Mose nɔ akɛha lɛ he? Beni abi lɛ nɔ ni ji Mla lɛ mli “kita wulu fe fɛɛ” lɛ he sane lɛ, Yesu ha hetoo akɛ: “‘Suɔmɔ Yehowa o-Nyɔŋmɔ lɛ, kɛ otsui [Hela: kar·diʹa] fɛɛ kɛ osusuma [psy·kheʹ] fɛɛ kɛ ojwɛŋmɔ [di·a·noiʹa] fɛɛ.’ Enɛ ji klɛŋklɛŋ kita kɛ nɔ ni da fe fɛɛ. Nɔ ni ji enyɔ, ni tamɔ enɛ lɛ ji, ‘suɔmɔ onaanyo tamɔ bo diɛŋtsɛ ohe.’ Kitai enyɔ nɛɛ anɔ Mla lɛ kɛ Gbalɔi lɛ fɛɛ tsotsoro.” (Mateo 22:35-40, NW) Akɛ tsui lɛ miito jwɛŋmɔ lɛ he yɛ biɛ, ni tsɔɔ akɛ esa akɛ efee “tsui” yɛ okadi gbɛ nɔ.
14 Yesu miitsɛ wiemɔ kɛmiijɛ 5 Mose 6:5 yɛ biɛ: “Ni suɔmɔ Yehowa, o-Nyɔŋmɔ lɛ kɛ otsui [Hebri: le·bab] fɛɛ kɛ osusuma [neʹphesh] fɛɛ kɛ ohewalɛ fɛɛ.” Agbɛnɛ hu 3 Mose 19:18 kaneɔ akɛ: “Suɔmɔ onaanyo taakɛ bɔ ni osumɔɔ bo diɛŋtsɛ ohe lɛ; mi ji Yehowa.” No hewɔ lɛ Yesu kɛ nakai Mose Mla kpaŋmɔ lɛ mli kitai enyɔ lɛ ye klɛŋklɛŋ gbɛhe akɛ nɔ ni da fe fɛɛ ni ekome nyiɛ ekroko lɛ sɛɛ. Ŋmɛnɛ, wɔbɛ Mose Mla lɛ shishi, shi nakai shishitoo taomɔ nii lɛ abe hoko. Esa akɛ wɔye nɔ.
15. (a) Mɛni tsirɛɔ heloo tsui lɛ ni etsuɔ nii, ni te etsuɔ nii ehaa tɛŋŋ? (b) Mɛɛ wekukpaa ka heloo tsui lɛ kɛ ansɔ lɛ kɛ jwɛŋmɔ lɛ teŋ?
15 Wɔle akɛ “wala mumɔ” lɛ ji nɔ ni tsirɛɔ heloo tsui lɛ. (Kpojiemɔ 11:11; 1 Mose 7:22) Nɛkɛ wala hewalɛ nɛɛ tsirɛɔ heloo ni wala yɔɔ mli lɛ tsui lɛ koni eshi lá ni haa wala lɛ kɛya gbɔmɔtso muu lɛ hei sɔrɔtoi fɛɛ, ni ansɔ lɛ hu fata he. Yehowa Nyɔŋmɔ kɛɛ: “Heloo fɛɛ heloo susuma [neʹphesh] lɛ, elá lɛ nɔŋŋ mli ewala lɛ yɔɔ; hewɔ ni mikɛɛ Israelbii lɛ akɛ: Nyɛkayea loo ko loo ko lá; ejaakɛ heloo fɛɛ heloo wala [susuma] ji elá lɛ.” (3 Mose 17: 14) Kɛ gbɔmɔtso muu lɛ fɛɛ aaahi wala mli lɛ, belɛ esa akɛ heloo tsui lɛ ashi lá ni haa wala lɛ kɛya efai lɛ fɛɛ mli, kɛji akɛ nɛkɛ lá ni bɔleɔ shi nɛɛ baa kɛtsɔɔ mɔ lɛ heloo tsui ni Nyɔŋmɔ ebɔ eha lɛ lɛ nɔ aloo kɛtsɔɔ tsui ni jɛ mɔ kroko mli ni atɛo awo emli lɛ nɔ aloo kɛtsɔɔ tsui ni akɛ tsɔne efee ni ejeee heloo ni enuuu nii ahe ni aaashi lá nɛɛ kɛbɔle shi lɛ hu nɔ jio. No hewɔ lɛ ashiɔ lá lɛ kɛyaa ansɔ lɛ mli, ni akanyaa ejwɛŋmɔŋ nyɛmɔi lɛ ni jwɛŋmɔ lɛ tsuɔ nii. Belɛ ebafeɔ faŋŋ akɛ, heloo tsui lɛ lɛɔ ansɔ lɛ kɛtsɔɔ lá ni wala hewalɛ yɔɔ mli, “wala mumɔ” lɛ ni ekɛhaa lɛ lɛ nɔ. Kɛji akɛ mɔ ko le enɛ aloo eleee hu jio, tsui lɛ yaa nɔ eshiɔ lá kɛyaa ansɔ lɛ kɛ gbɔmɔtso lɛ mli he fɛɛ he.
16. (a) Taakɛ Biblia lɛ tsɔɔ lɛ, mɛni ji okadi tsui lɛ? (b) Mɛni ataoɔ yɛ wɔdɛŋ yɛ Yehowa ni wɔɔsumɔ lɛ kɛ ‘wɔtsui fɛɛ’ lɛ mli? (d) Wɔsumɔɔ lɛ kɛ ‘wɔjwɛŋmɔ fɛɛ’ yɛ mɛɛ gbɛ nɔ?
16 Shi nyɛhaa wɔkwɛa nii kɛtekea adesa he loo tsui ni akɛ fãi fee nɛɛ. Taakɛ ákɛtsu nii yɛ Biblia lɛ mli lɛ, tsui lɛ damɔ shi kɛha kanyamɔi kɛ agbɛnɛ henumɔi ajɛɛhe. Enɛ ji okadi tsui lɛ, ni yɛ anɔkwale mli lɛ eji wɔmligbɛ gbɔmɔ lɛ diɛŋtsɛ lɛ. Átsɔɔ mli yɛ 1 Petro 3:4 akɛ eji “‘tsuiiaŋ gbɔmɔ ni aŋɔtee lɛ” (NW) , “gbɔmɔ ni etee ehe yɛ tsui mli lɛ” (Revised Standard Version) , “omligbɛ gbɔmɔ lɛ” (New International Version) . Nakai eji akɛ afãa wɔ ni wɔsumɔ Yehowa Nyɔŋmɔ kɛ ‘wɔtsui lɛ fɛɛ.’ Afãa wɔ hu ni wɔsumɔ Yehowa Nyɔŋmɔ kɛ wɔsusuma muu lɛ fɛɛ, kɛ wɔgbɔmɔtso muu lɛ fɛɛ. Enɛ biɔ ni wɔsumɔ anɔkwa Nyɔŋmɔ hiɛkalɔ kome lɛ, Ofe lɛ, kɛ wɔhewalɛ fɛɛ ni wɔkudɔ wɔhewalɛ loo nyɛmɔ fɛɛ kɛha Nyɔŋmɔ suɔmɔnaa nii ni ajie lɛ kpo lɛ feemɔ kɛ enitsumɔ lɛ ni wɔɔtsu wɔgbe naa yɛ “nibii agbɛjianɔtoo nɛɛ naagbee” nɛɛ mli. (Mateo 24:3, NW) Nɔ ni fata enɛ he ji akɛ, esa akɛ wɔsumɔ Biblia lɛ Nyɔŋmɔ lɛ kɛ wɔ “jwɛŋmɔ” fɛɛ, wɔ jwɛŋmɔŋ nyɛmɔi fɛɛ.—Marko 12:29-31.
17. (a) Kɛ wɔsumɔɔ Yehowa kɛ wɔtsui kɛ wɔjwɛŋmɔ fee lɛ, mɛni nɔ mi abaamɛ aha wɔ? (b) Taakɛ Filipibii 4:7 tsɔɔ lɛ, Nyɔŋmɔ toiŋjɔlɛ lɛ baasa wɔtsuii kɛ wɔjwɛŋmɔi ahe yɛ mɛɛ gbɛ nɔ?
17 Eka shi faŋŋ ni ehe ehiaaa ni awie he akɛ kɛji akɛ wɔjie suɔmɔ ni wɔyɔɔ kɛha Yehowa Nyɔŋmɔ lɛ kpo kɛ wɔtsui kɛ wɔjwɛŋmɔ fɛɛ lɛ, eeefee lɛ miishɛɛ hu akɛ eeeha wɔsɔlemɔi ahetoo, ni nɛkɛ nɔmimaa nɛɛ baaha wɔye wɔhe kɛjɛ yeyeeye-feemɔi fɛɛ mli. Wɔbaana toiŋjɔlɛ ni je ni efee hamahama nɛɛ naaa ni enuuu shishi lɛ mli ŋɔɔmɔ. Mɛni hewɔ? Ejaakɛ taakɛ bɔfo Paulo ma nɔ mi eha Kristofoi ni esumɔɔ amɛ ni yɔɔ blema Filipi, yɛ Hela lɛ, “Nyɔŋmɔ toiŋjɔlɛ ni fe jwɛŋmɔi [Hela: noun] fɛɛ lɛ aaabu nyɛtsuii [kar·diʹas] kɛ nyɛ jwɛŋmɔŋ nyɛmɔi [no·eʹma·ta,: “jwɛŋmɔi,” Authorized Version; RS] lɛ ahe kɛtsɔ Yesu Kristo nɔ.” (Filipibii 4:7, NW) Enɛ haŋ wɔ okadi tsui lɛ afee yeyeeye yɛ oyaiyeli mli ni aaatsɔ atsu kanyamɔi kɛ henumɔi ahe nii yɛ gbɛ ni ejaaa nɔ koni ehao wɔ, ni ehaŋ wɔ jwɛŋmɔŋ nyɛmɔi loo jwɛŋmɔ lɛ afutu loo efite. Kristofonyo lɛ baaya nɔ atiu gbɛ ni tamɔ nɛkɛ taakɛ Nyɔŋmɔ Biblia lɛ ni jɛ mumɔŋ lɛ tsɔɔ lɛ, kɛ yelikɛbuamɔ ni jɛ Hiɛnyiɛlɔ, Kristo Yesu hu dɛŋ.a
[Shishigbɛ niŋmaa]
a Ajie kɛjɛ September 1, 1984 Watchtower lɛ mli.
Ani Obaanyɛ Oha Hetoo?
◻ Mɛni ji Yehowa “jwɛŋmɔ” lɛ shishi?
◻ Mɛɛ gbɛ nɔ Paulo tsɔ ekɛ teokrase mutso lɛ tso nii ni ekɛfee Yehowa “jwɛŋmɔ” Iɛ he nɔkwɛmɔ nɔ?
◻ Mɛni ji okadi “tsui” lɛ?
◻ “Tsui” kɛ “jwɛŋmɔ” lɛ kɔɔ Nyɔŋmɔ ni wɔɔsumɔ lɛ lɛ he yɛ mɛɛ gbɛ nɔ?
[Mfoniri ni yɔɔ baafa 9]
Teokrase mutso lɛ: Afolɔ Yudafoi toigbolɔi “niji” lɛ kɛjɛ nɔ, ni akɛ Samariabii ni atsake amɛ kɛ jeŋmajiaŋbii foolɔi bafo amɛnajiaŋ
[Mfoniri ni yɔɔ baafa 11]
Heloo tsui lɛ shiɔ lá ni haa wala kɛyaa ansɔ lɛ mli