“Nyɛfea Krɔŋkrɔŋ yɛ Nyɛjeŋba Fɛɛ Mli”

“Bɔ ni mɔ ni tsɛ nyɛ lɛ yɔɔ krɔŋkrɔŋ lɛ, nyɛ hu nyɛfea krɔŋkrɔŋ yɛ nyɛjeŋba fɛɛ mli; ejaakɛ aŋma akɛ: ‘Nyɛfea krɔŋkrɔŋ, ejaakɛ krɔŋkrɔŋ ji mi.’ ”—1 PETRO 1:15, 16.

 1. Mɛni hewɔ Petro wo Kristofoi hewalɛ ni amɛfee krɔŋkrɔŋ lɛ?

MƐNI hewɔ bɔfo Petro kɛ ŋaawoo ni yɔɔ yiteŋgbɛ nɛɛ ha lɛ? Ejaakɛ ena akɛ ehe miihia ni Kristofonyo fɛɛ Kristofonyo abu esusumɔi kɛ enifeemɔi ahe, bɔni afee ni eha amɛkɛ Yehowa krɔŋkrɔŋ feemɔ lɛ akpa gbee. Enɛ hewɔ lɛ, ekɛɛ kɛtsɔ wiemɔi ni yɔɔ yiteŋgbɛ lɛ hiɛ akɛ: “Nyɛfimɔa nyɛjwɛŋmɔ hɛ, nyɛhiɛ akãa shi . . . Nyɛfea nyɛhe tamɔ bii toibolɔi, ni nyɛkaba nyɛjeŋ yɛ sá beni nyɛleee nɔ ko lɛ mli akɔnɔi lɛ anaa dɔŋŋ.”—1 Petro 1:13, 14.

 2. Mɛni hewɔ wɔ akɔnɔi ahe tseee dani wɔbale anɔkwale lɛ?

² Wɔ tsutsu akɔnɔi lɛ ahe tseee. Mɛni hewɔ? Ejaakɛ wɔteŋ mɛi pii nyiɛɔ je lɛ nifeemɔ gbɛi asɛɛ dani wɔbakpɛlɛ Kristofoi anɔkwale lɛ nɔ. Petro le enɛ beni eŋma faŋŋ akɛ: “Efa ha wɔ akɛ wala be ni eho momo lɛ mli lɛ wɔtsu jeŋmajiaŋbii atsui naa nii lɛ, ni wɔba wɔjeŋ yɛ nyenyeŋtswibɔɔi, akɔnɔi, daatɔi, shwɛmɔi, fufeemɔi kɛ wɔŋjamɔi ni ahiɔ lɛ amli.” Yɛ anɔkwale mli lɛ, Petro etsiii nifeemɔi ni he tseee, ni ale jogbaŋŋ yɛ wɔ ŋmɛnɛŋmɛnɛ je nɛɛ mli lɛ atã, ejaakɛ no beaŋ lɛ aleee.—1 Petro 4:3, 4.

3, 4. (a) Mɛɛ gbɛ nɔ wɔɔtsɔ wɔwuu wɔshi akɔnɔi fɔji? (b) Ani esa akɛ Kristofoi afee mɛi ni bɛ henumɔ? Tsɔɔmɔ mli.

³ Ani oyoo akɛ nɛkɛ akɔnɔi nɛɛ ji nibii ni heloo lɛ, kɛ henumɔi, kɛ kanyamɔi naa he miishɛɛ waa? Kɛ wɔŋmɛ gbɛ ni enɛɛmɛi na wɔnɔ hewalɛ lɛ, no lɛ wɔsusumɔi kɛ wɔ nifeemɔi bafeɔ nɔ ni he tseee yɛ gbɛ ni waaa kwraa nɔ. Enɛ feɔ bɔ ni ehe hiaa ni wɔha wɔ jwɛŋmɔŋ nyɛmɔ akudɔ wɔ nifeemɔi lɛ he nɔkwɛmɔ nɔ. Paulo wie he yɛ nɛkɛ gbɛ nɔ akɛ: “No hewɔ lɛ, anyɛmimɛi, mikɛ Nyɔŋmɔ mlitsɔlɛi miikpa nyɛ fai, akɛ nyɛŋɔ nyɛ gbɔmɔtsei lɛ nyɛdamɔ shi akɛ afɔle ni hiɛ kã ni he tse ni sa Nyɔŋmɔ hiɛ, ni nyɛjamɔ lɛ afee mumɔŋ jamɔ.”—Romabii 12:1, 2.

⁴ Kɛ wɔkɛ afɔleshaa ni yɔɔ krɔŋkrɔŋ aaaha Nyɔŋmɔ lɛ, no lɛ esa akɛ wɔha wɔjwɛŋmɔŋ nyɛmɔ aye wɔnɔ, shi jeee wɔhenumɔi. Kwɛ mɛi abɔ ni kɛ amɛhe woɔ jeŋba shara mli ejaakɛ amɛŋmɛɔ amɛ henumɔi agbɛ ni ekudɔɔ amɛjeŋba! No etsɔɔɔ akɛ esa akɛ wɔtsimɔ wɔhenumɔi anaa; kulɛ, te wɔɔfee tɛŋŋ ni wɔjie miishɛɛ kpo yɛ Yehowa sɔɔmɔ mli? Shi kɛlɛ, kɛ wɔmiitao wɔwo mumɔ lɛ yibii lɛ moŋ fe ni wɔɔwo heloo lɛ nitsumɔi lɛ, no lɛ esa akɛ wɔtsake wɔjwɛŋmɔ kwraa ni ekɛ bɔ ni Kristo susuɔ nii ahe ehaa lɛ akpa gbee.—Galatabii 5:22, 23; Filipibii 2:5.

Shihilɛ ni Yɔɔ Krɔŋkrɔŋ, Jara ni Yɔɔ Krɔŋkrɔŋ

 5. Mɛni hewɔ Petro hiɛ yɔɔ ehe nɔ yɛ bɔ ni krɔŋkrɔŋ feemɔ he hiaa he lɛ?

⁵ Mɛni hewɔ Petro hiɛ yɔɔ ehe nɔ waa yɛ bɔ ni Kristofoi akrɔŋkrɔŋ feemɔ he hiaa ha lɛ he lɛ? Ejaakɛ ele jara ni yɔɔ krɔŋkrɔŋ ni awo ni akɛkpɔ̃ adesai toibolɔi lɛ jogbaŋŋ diɛŋtsɛ. Eŋma akɛ: “Nyɛle akɛ jeee nibii ni fiteɔ, taakɛ jwiɛtɛi loo shika, aŋɔkpɔ̃ nyɛ kɛjɛ nyɛ yaka jeŋba ni nyɛna kɛjɛ nyɛtsɛmɛi lɛ aŋɔɔ lɛ mli, shi moŋ, kɛ Kristo mɔ ni tamɔ toobi ni he bɛ kpa loo ŋmãmɔ nɔ ko lɛ lá ni jara wa lɛ.” (1 Petro 1:18, 19) Hɛɛ, krɔŋkrɔŋ feemɔ Jɛɛhe, Yehowa Nyɔŋmɔ, tsu e-Bi koome lɛ, ‘Mɔ Krɔŋkrɔŋ lɛ,’ kɛba shikpɔŋ nɔ koni ebawo kpɔmɔ nɔ ni baaha gbɔmɛi ana amɛkɛ Nyɔŋmɔ teŋ wekukpaa kpakpa lɛ he nyɔmɔ.—Yohane 3:16; 6:69; 2 Mose 28:36; Mateo 20:28.

 6. (a) Mɛni hewɔ ni ebɛ mlɛo kɛha wɔ akɛ wɔɔdi jeŋba ni he tse sɛɛ lɛ? (b) Mɛni baanyɛ aye abua wɔ ni wɔha wɔjeŋba he atse?

⁶ Shi kɛlɛ, esa akɛ wɔyoo akɛ ebɛ mlɛo akɛ aaahi shihilɛ ni yɔɔ krɔŋkrɔŋ mli yɛ Satan jeŋ ni efite nɛɛ mli. Etsɔɔ anɔkwa Kristofoi, ni miibɔ mɔdɛŋ akɛ amɛaahi shi yɛ enibii agbɛjianɔtoo nɛɛ mli lɛ tsɔne. (Efesobii 6:12; 1 Timoteo 6:9, 10) Nɔnyɛɛi ni heloonaa nitsumɔ, weku shitee-kɛ-woo, hefɛoyeli yɛ skul, kɛ tipɛŋfoi anɔnyɛɛ kɛbaa lɛ biɔ ni mɔ ana mumɔŋ shidaamɔ ni mli wa waa ni enyɛ ekɛhiɛ krɔŋkrɔŋ feemɔ mli. No maa nitsumɔ ni he hiaa ni wɔ teemɔŋ nikasemɔ kɛ Kristofoi akpeei ni wɔɔya daa lɛ tsuɔ lɛ nɔ mi. Paulo wo Timoteo ŋaa akɛ: “Hiɛmɔ tsamɔ wiemɔi ni onu yɛ minaa lɛ akadi lɛ mli yɛ hemɔkɛyeli kɛ suɔmɔ ni yɔɔ Kristo Yesu mli lɛ mli.” (2 Timoteo 1:13) Wɔnuɔ nakai tsamɔ wiemɔi lɛ yɛ wɔ Maŋtsɛyeli Asa lɛ nɔ, kɛ agbɛnɛ yɛ wɔ teemɔŋ Biblia kasemɔ hu mli. Amɛbaanyɛ amɛye amɛbua wɔ ni wɔfee krɔŋkrɔŋ yɛ wɔjeŋba mli daa gbi, yɛ shihilɛi sɔrɔtoi babaoo mli.

Jeŋba ni He Tse yɛ Weku lɛ Mli

 7. Te esa akɛ krɔŋkrɔŋ feemɔ asa wɔ weku shihilɛ he aha tɛŋŋ?

⁷ Beni Petro tsɛ 3 Mose 11:44 lɛ sɛɛ lɛ, ekɛ Hela wiemɔ haʹgi·os tsu nii, ni eshishinumɔ ji, “atsi he kɛjɛ esha he, no hewɔ lɛ ajɔɔ he nɔ aha Nyɔŋmɔ, afee krɔŋŋ.” (An Expository Dictionary of New Testament Words, ni W. E. Vine fee) Te esa akɛ enɛ asa wɔhe yɛ wɔ Kristofoi aweku shihilɛ mli aha tɛŋŋ? Eka shi faŋŋ akɛ etsɔɔ akɛ esa akɛ wɔ weku shihilɛ adamɔ suɔmɔ nɔ, ejaakɛ “Nyɔŋmɔ lɛ, suɔmɔ ji lɛ.” (1 Yohane 4:8) Suɔmɔ ni haa akɛ he shãa afɔle lɛ ji mũ ni haa wekukpaa ni yɔɔ gbalashihilɛ mli hefatalɔi ateŋ, kɛ fɔlɔi kɛ bii hu ateŋ lɛ tsuɔ nii jogbaŋŋ.—1 Korintobii 13:4-8; Efesobii 5:28, 29, 33; 6:4; Kolosebii 3:18, 21.

8, 9. (a) Mɛɛ shihilɛ bei komɛi lɛ ebaa yɛ Kristofoi ashia mli? (b) Mɛɛ ŋaawoo kpakpa Biblia lɛ kɛhaa yɛ sane nɛɛ he?

⁸ Ekolɛ wɔbaasusu akɛ nɛkɛ suɔmɔ nɛɛ diɛŋtsɛ baaje kpo yɛ Kristofoi aweku lɛ mli. Shi kɛlɛ, esa akɛ wɔkpɛlɛ nɔ akɛ jeee be fɛɛ be suɔmɔ jeɔ kpo yɛ Kristofoi ashiai komɛi amli, tamɔ bɔ ni kulɛ esa akɛ eje kpo lɛ. Ekolɛ anaa wɔ akɛ wɔjieɔ suɔmɔ kpo yɛ Maŋtsɛyeli Asa lɛ nɔ, shi kwɛ bɔ ni ekolɛ wɔ krɔŋkrɔŋ feemɔ lɛ laajeɔ kwraa yɛ gbɛ ni yɔɔ mlɛo nɔ yɛ shia mli shihilɛ gbɛfaŋ. Kɛkɛ lɛ ekolɛ trukaa nɔŋŋ ni wɔhiɛ baakpa nɔ akɛ ŋa lɛ kã he eji wɔ nyɛmi yoo Kristofonyo, loo wu lɛ kã he eji nyɛmi nuu (ekolɛ asafoŋ sɔɔlɔ loo onukpa) ni tamɔ mɔ ni abuɔ lɛ yɛ Maŋtsɛyeli Asa lɛ nɔ lɛ nɔŋŋ. Wɔmli baafũ, ni ebaanyɛ eha naataamɔ wiemɔi ni mli wawai ate shi. Ni jeŋbai sɔrɔtoi enyɔ po baanyɛ abote wɔshihilɛ mli fiofio. Kɛkɛ lɛ ejeee wu kɛ ŋa wekukpaa ni tamɔ Kristo nɔ lɛ dɔŋŋ, shi moŋ nuu kɛ yoo kɛkɛ ni kɛ amɛhe kpaaa gbee. Amɛhiɛ kpaa nɔ akɛ esa akɛ shihilɛ ni he tse ahi shia lɛ mli. Ekolɛ amɛjeɔ shishi amɛkɛ amɛhe wieɔ tamɔ jeŋbii. Kwɛ bɔ ni enɛ baanyɛ eha wiemɔ ni he tseee, kɛ jɛmɔ wiemɔi aje amɛnaa yɛ gbɛ ni waaa kwraa nɔ!—Abɛi 12:18; okɛto Bɔfoi lɛ Asaji 15:37-39 he.

⁹ Shi, Paulo woɔ ŋaa akɛ: “Wiemɔ sha ko wiemɔ sha ko [Hela, loʹgos sa·prosʹ, “wiemɔ ni buleɔ mɔ,” ni no hewɔ lɛ ehe tseee] akaje nyɛnaa kwraa; shi moŋ wiemɔ ni hi ni ehia, koni eha mɔ nane amɔ shi, ni akɛduro mɛi ni nuɔ lɛ.” Ni enɛ miitsɔɔ mɛi fɛɛ ni yɔɔ shia lɛ mli ni nuɔ wiemɔ nɛɛ, ni gbekɛbii lɛ fata he.—Efesobii 4:29; Yakobo 3:8-10.

10. Ŋaawoo ni kɔɔ krɔŋkrɔŋ feemɔ he lɛ saa gbekɛbii ahe yɛ mɛɛ gbɛ nɔ?

¹⁰ Agbɛnɛ hu, nɛkɛ krɔŋkrɔŋ feemɔ he gbɛtsɔɔmɔi nɛɛ kɔɔ gbekɛbii ni yɔɔ Kristofoi aweku mli lɛ ahe nakai nɔŋŋ. Kwɛ bɔ ni eyɔɔ mlɛo kɛha amɛ akɛ amɛaajɛ skul amɛba shia, ní amɛbɔi amɛtipɛŋfoi jeŋbii lɛ atuatsemɔ wiemɔi kɛ wiemɔi ni bulɛ bɛ mli lɛ kasemɔ! Gbekɛbii, nyɛkakplaŋa kɛyaa subaŋi ni gbekɛbii hii ni bɛ tsɔsemɔ kpakpa, ni amɛjɛ́ Yehowa gbalɔ lɛ, ni amɛyɔɔ amɛ henɔi ŋmɛnɛ, ni wiemɔi ni he tseee, kɛ musubɔɔ wiemɔi jɛɔ amɛdaaŋ lɛ, jie lɛ kpo lɛ ahe. (2 Maŋtsɛmɛi 2:23, 24) Esaaa ni gbɔmɛi ni feɔ hejɔ̃ waa loo amɛsusuuu he akɛ amɛaawie wiemɔi kpakpai lɛ awiemɔi ni he tseee lɛ buleɔ owiemɔ. Akɛ Kristofoi lɛ, esa akɛ wɔ wiemɔ he atse, efee nɔ ni ŋɔɔ, nɔ ni tswaa mɔ emaa shi, ni ejieɔ mlihilɛ kpo, ni ‘ŋoo yɔɔ mli.’ Esa akɛ ekadi wɔ akɛ esoro wɔ yɛ gbɔmɛi krokomɛi ahe.—Kolosebii 3:8-10; 4:6.

Krɔŋkrɔŋ Feemɔ kɛ Wɔ Weku Mlibii ni Heee Yeee

11. Mɛni hewɔ krɔŋkrɔŋ ni wɔɔfee lɛ etsɔɔɔ akɛ esa akɛ wɔbu wɔhe jalɔi lɛ?

¹¹ Yɛ be mli ni wɔkɛ hiɛmiamɔ bɔɔ mɔdɛŋ akɛ wɔɔjie krɔŋkrɔŋ feemɔ kpo lɛ, esaaa ni wɔnaa wɔhe tamɔ nɔ ni wɔhi ni wɔji jalɔi hu fe mɛi krokomɛi, titri lɛ yɛ be mli ni wɔkɛ weku mlibii ni heee yeee yeɔ lɛ. Kɛ hoo lɛ, esa akɛ wɔ Kristofoi asu ni ji mlihilɛ lɛ aye abua amɛ ni amɛna akɛ esoro wɔ kwraa yɛ gbɛ kpakpa nɔ, akɛ wɔle bɔ ni ajieɔ suɔmɔ kɛ musuŋtsɔlɛ kpo, taakɛ Samarianyo kpakpa ni yɔɔ Yesu abɛbua lɛ mli lɛ fee lɛ.—Luka 10:30-37.

12. Kristofoi ni ebote gbalashihilɛ mli lɛ baanyɛ aha amɛhefatalɔi ana anɔkwale lɛ he miishɛɛ babaoo yɛ mɛɛ gbɛ nɔ?

¹² Petro ma bɔ ni subaŋ kpakpa ni wɔɔjie lɛ kpo yɛ weku mlibii ni heee yeee lɛ agbɛfaŋ lɛ he hiaa lɛ nɔ mi beni eŋma ŋamɛi Kristofoi akɛ: “Nakai nɔŋŋ nyɛ yeigbayei lɛ hu, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, koni, kɛ mɛi komɛi booo wiemɔ lɛ toi tete lɛ, ashi wiemɔ lɛ sɛɛ ni atsɔ yei lɛ ajeŋba nɔ ni nine ashɛ amɛnɔ, ejaakɛ amɛnaa nyɛjeŋba ni hetsemɔ kɛ gbeyeishemɔ yɔɔ mli lɛ.” Ŋa Kristofonyo (loo wu, yɛ enɛ gbɛfaŋ lɛ) baanyɛ aha ehefatalɔ ni heee yeee lɛ ana anɔkwale lɛ he miishɛɛ babaoo kɛji ejeŋba he tse, ni esusuɔ mɔ he, ni ejieɔ bulɛ kpo hu. Enɛ tsɔɔ akɛ esaaa ni ehaa eteokrase gbɛjianɔtoo feɔ kpɛŋŋ, bɔni afee ni ehefatalɔ ni heee yeee lɛ akanu he akɛ ebuuu lɛ loo eku ehiɛ efɔ̃ enɔ.a—1 Petro 3:1, 2.

13. Mɛɛ gbɛ nɔ bei komɛi lɛ onukpai kɛ asafoŋ sɔɔlɔi baanyɛ aye abua wumɛi ni heee yeee lɛ ni amɛhiɛ asɔ anɔkwale lɛ?

¹³ Bei komɛi lɛ, onukpai kɛ asafoŋ sɔɔlɔi baanyɛ aye abua kɛtsɔ le ni amɛaale wu ni heee yeee lɛ yɛ naanyobɔɔ kɛ sharamɔ gbɛfaŋ lɛ nɔ. Ebaanyɛ etsɔ nɛkɛ gbɛ nɔ ele Odasefoi akɛ gbɔmɛi ni tamɔ mɛi krokomɛi fɛɛ, gbɔmɛi kpakpai ni yɔɔ nibii, kɛ saji sɔrɔtoi babaoo ahe miishɛɛ, shi jeee Biblia lɛ pɛ. Yɛ shihilɛ ko mli lɛ, onukpa ko jie miishɛɛ kpo yɛ wu ko hiɛtserɛjiemɔ ni ji loo-shamɔ he. Enɛ jie gbɛtsii nii lɛ kwraa ni enyɛ ekɛ lɛ je naanyobɔɔ shishi. Yɛ naagbee lɛ, nakai wu lɛ batsɔ nyɛmi nuu ni abaptisi lɛ. Yɛ shihilɛ kroko hu mli lɛ, wu ko ni heee yeee lɛ náa tiitrai ahe miishɛɛ waa. Onukpai lɛ anijiaŋ ejeee wui yɛ ehe. Amɛteŋ mɔ kome kase nakai loofɔji lɛ ahe nii, ni no sɛɛ gbi kroko ni ekɛ nuu lɛ kpe lɛ, enyɛ ekɛ lɛ je nɛkɛ loofɔji ni esumɔɔ amɛsane waa nɛɛ ahe sanegbaa shishi! No hewɔ lɛ, krɔŋkrɔŋ ni wɔɔfee lɛ etsɔɔɔ akɛ esa akɛ wɔfee kpɛŋŋ loo mɛi ni yɔɔ nibii fioo pɛ he nilee.—1 Korintobii 9:20-23.

Mɛɛ Gbɛ nɔ Wɔɔtsɔ Wɔfee Krɔŋkrɔŋ yɛ Asafo lɛ Mli?

14. (a) Mɛni ji gbɛ̀i ni Satan tsɔɔ nɔ ekɛfiteɔ asafo lɛ ekome? (b) Mɛɛ gbɛ nɔ wɔɔtsɔ wɔte shi wɔshi Satan tsɔne?

¹⁴ Mɔ heguɔgbelɔ ji Satan Abonsam, ejaakɛ Hela gbɛi kɛha Abonsam, ni ji di·aʹbo·los, shishi ji “naafolɔlɔ” loo “mɔ heguɔgbelɔ.” Heguɔgbee ji nibii ni akɛle lɛ lɛ ateŋ ekome, ni ebɔɔ mɔdɛŋ ni ekɛtsu nii yɛ asafo lɛ mli. Gbɛ ni ekɛtsuɔ nii fe fɛɛ ji oshekuyeli. Ani wɔŋmɛɔ gbɛ ni wɔfee mɛi ni elaka wɔ yɛ nɛkɛ subaŋ ni he tseee nɛɛ mli? Mɛɛ gbɛ nɔ eeetsɔ eba lɛ nakai? Kɛtsɔ oshekuyeli lɛ shishijee, kɛ egbɛɛ-kɛ-shwamɔ, loo etoiboo nɔ. Abɛbua ni nilee yɔɔ mli lɛ kɛɔ akɛ: “Kutumpɔfo gbɛɔ béi eshwãa, ni ablɛbi wielɔ tserɛɔ shieŋtsɛmɛi ateŋ.” (Abɛi 16:28) Mɛni akɛkuɔ oshekuyeli kɛ heguɔgbee naa? Esa akɛ wɔkwɛ akɛ wɔ wiemɔ tswaa mɔ emaa shi be fɛɛ be, ni edamɔ suɔmɔ nɔ. Kɛ wɔtao sui kpakpai yɛ wɔnyɛmimɛi ahe moŋ fe nibii ni wɔsusuɔ akɛ eji amɛ gbɔjɔmɔi lɛ, ebaaha wɔ sanegbaa aŋɔɔ be fɛɛ be, ni ebaakɔ mumɔŋ nibii ahe. Kaimɔ akɛ ewaaa akɛ aaawie ashi mɔ. Ni mɔ ni yeɔ mɛi krokomɛi ahe osheku etsɔɔ bo lɛ baanyɛ aye bo hu ohe osheku etsɔɔ mɛi krokomɛi!—1 Timoteo 5:13; Tito 2:3.

15. Mɛɛ Kristo sui komɛi baaye abua ni eha mɛi fɛɛ ni yɔɔ asafo lɛ mli lɛ afee krɔŋkrɔŋ?

¹⁵ Ehe miihia ni wɔ fɛɛ wɔna Kristo jwɛŋmɔ lɛ eko, bɔni afee ni wɔha asafo lɛ afee krɔŋkrɔŋ, ni wɔle akɛ esu ni nɔ kwɔ fe fɛɛ ji suɔmɔ. Enɛ hewɔ lɛ, Paulo wo Kolosebii lɛ ŋaa ni amɛna musuŋtsɔlɛ tamɔ Kristo: “No hewɔ lɛ, akɛ nɔ ni Nyɔŋmɔ halamɔ bii, mɛi krɔŋkrɔŋi kɛ suɔmɔ mɛi ji nyɛ nɛɛ lɛ, nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo . . . , ni nyɛkɛfafaa nyɛhe . . . Enɛɛmɛi fɛɛ sɛɛ lɛ nyɛwoa suɔmɔ ni ji emuuyeli kpaa lɛ.” Kɛkɛ ni ekɛfata he akɛ: “Ni nyɛhaa [Kristo, NW] hejɔlɛ lɛ ayea lumɔ yɛ nyɛtsuii amli.” Eka shi faŋŋ akɛ kɛ wɔyɛ nɛkɛ mumɔ ni haa akɛ sane keɔ lɛ, no lɛ wɔbaanyɛ wɔhiɛ asafo lɛ ekomefeemɔ kɛ ekrɔŋkrɔŋ feemɔ lɛ mli.—Kolosebii 3:12-15.

Ani Wɔ Krɔŋkrɔŋ Feemɔ lɛ Jeɔ Kpo yɛ Wɔ Akutso Mli?

16. Mɛni hewɔ esa akɛ wɔ jamɔ ni yɔɔ krɔŋkrɔŋ lɛ afee miishɛɛ jamɔ lɛ?

¹⁶ Wɔ akutsoŋbii hu? Te amɛnaa wɔ amɛhaa tɛŋŋ? Ani wɔjieɔ miishɛɛ ni yɔɔ anɔkwale lɛ mli lɛ kpo, loo wɔhaa amɛnaa lɛ tamɔ jatsu ko? Kɛ wɔyɛ krɔŋkrɔŋ tamɔ bɔ ni Yehowa yɔɔ krɔŋkrɔŋ lɛ, no lɛ esa akɛ eje kpo faŋŋ yɛ wɔ wiemɔ kɛ wɔjeŋba mli. Esa akɛ ana faŋŋ akɛ wɔ jamɔ ni yɔɔ krɔŋkrɔŋ lɛ ji jamɔ ni miishɛɛ yɔɔ mli. Mɛni hewɔ? Ejaakɛ Yehowa wɔ-Nyɔŋmɔ lɛ, miishɛɛ Nyɔŋmɔ ni, ni esumɔɔ ni mɛi ni jaa lɛ lɛ hu ana miishɛɛ. Enɛ hewɔ lɛ, lalatsɛ lɛ nyɛ ewie Yehowa webii ni hi shi blema lɛ ahe akɛ: “Ajɔɔ [miishɛɛ ji, NW] maŋ ni Yehowa ji e-Nyɔŋmɔ lɛ!” Ani wɔjieɔ nakai miishɛɛ lɛ kpo? Ani wɔbii hu haa anaa faŋŋ akɛ amɛmii shɛɔ amɛhe kɛji amɛfata Yehowa webii ahe yɛ Maŋtsɛyeli Asa lɛ nɔ kɛ kpeei ashishi?—Lala 89:16, 17; 144:15b.

17. Mɛni wɔbaanyɛ wɔfee yɛ gbɛ pɔtɛɛ nɔ ni wɔkɛtsɔɔ krɔŋkrɔŋ feemɔ ni ŋmɛɔ pɛpɛɛpɛ?

¹⁷ Wɔbaanyɛ wɔjie wɔ krɔŋkrɔŋ feemɔ ni ŋmɛɔ pɛpɛɛpɛ hu kpo kɛtsɔ ekomefeemɔ mumɔ kɛ mlihilɛ ni wɔɔjie kpo wɔtsɔɔ wɔ akutsoŋbii lɛ nɔ. Bei komɛi lɛ ehe hiaa ni akutsoŋbii afee ekome kɛtsu nɔ ko, ekolɛ ni akɛsaa akutso lɛ mli aloo, taakɛ eji yɛ maji komɛi amli lɛ, ni akɛye abua kɛsaa gbɛi bibii kɛ gbɛjegbɛi wuji. Yɛ enɛ gbɛfaŋ lɛ, wɔ krɔŋkrɔŋ feemɔ lɛ baanyɛ eje kpo yɛ bɔ ni wɔkwraa wɔ abɔɔi, wɔshiai amli, loo wɔ nibii krokomɛi wɔhaa lɛ mli. Kɛji wɔshĩɔ jwɛi wɔshwieɔ shi loo wɔhaa wɔkpo nɔ woɔ muji loo efeɔ haŋtsii, ekolɛ kɛ tsɔnei memeji po ni efite ni mɛi fɛɛ naa kɛji amɛmiiho lɛ, ani wɔbaanyɛ wɔkɛɛ akɛ wɔkɛ wɔ akutsoŋbii yeɔ kɛ bulɛ?—Kpojiemɔ 11:18.

Krɔŋkrɔŋ Feemɔ yɛ Nitsumɔ He kɛ Skul

18. (a) Mɛni ji jaramɔ shihilɛ kɛha Kristofoi ŋmɛnɛ? (b) Ebaanyɛ esoro wɔ yɛ je lɛ he yɛ mɛɛ gbɛ nɔ?

¹⁸ Bɔfo Paulo ŋma wolo eyaha Kristofoi ni hi Korinto maŋ ni bɛ krɔŋkrɔŋ lɛ mli akɛ: “Miŋma yɛ wolo lɛ mli akɛ nyɛkɛ ajwamaŋbɔlɔi akabɔ; jeee je nɛŋ ajwamaŋbɔlɔi loo hiɛjoolɔi loo amimyelɔi loo wɔŋjalɔi ahe kwraa miwieɔ nɛɛ, ejaakɛ amɛ ni kulɛ ja nyɛje je lɛŋ.” (1 Korintobii 5:9, 10) Jaramɔ shihilɛ ji enɛ kɛha Kristofoi, ejaakɛ esa akɛ amɛkɛ gbɔmɛi ni kɛ amɛhe woɔ jeŋba shara mli loo mɛi ni bɛ jeŋba kpakpa afutu daa gbi. Enɛ feɔ emuuyeli he kaa kpele diɛŋtsɛ, titri lɛ yɛ hiŋmɛigbelemɔi ni awoɔ bɔlɛnamɔ ni akɛhaoɔ mɔ, juu-kɛ-fɔ̃, kɛ anɔkwale ni ayeee he hewalɛ loo akpɛlɛɔ nɔ lɛ amli. Wɔnyɛŋ wɔba tɛi ni wɔfolɔ wɔha wɔhe lɛ ashi yɛ nɛkɛ hei nɛɛ bɔni afee ni wɔtamɔ “mɛi krokomɛi fɛɛ” yɛ mɛi ni ebɔle wɔ lɛ ahiɛ. Shi moŋ, esa akɛ wɔ Kristofoi ajeŋba ni mlihilɛ yɔɔ mli, shi kɛlɛ eyɔɔ sɔrɔto lɛ aha mɛi ni yɔɔ sɛɛyoomɔ, mɛi ni yooɔ amɛmumɔŋ hiamɔ nii, ni amɛmiitao nibii kpakpai lɛ ana wɔ akɛ esoro wɔ.—Mateo 5:3; 1 Petro 3:16, 17.

19. (a) Mɛɛ kaai nyɛ gbekɛbii lɛ kɛkpeɔ yɛ skul? (b) Mɛni fɔlɔi baanyɛ afee ni amɛkɛfi amɛbii lɛ kɛ amɛjeŋba ni he tse lɛ sɛɛ?

¹⁹ Nakai nɔŋŋ hu wɔbii lɛ kɛ kaai babaoo kpeɔ yɛ skul. Ani nyɛ fɔlɔi lɛ, yasaraa skul ni nyɛbii lɛ yaa lɛ? Ani nyɛle shihilɛ ni yaa nɔ yɛ jɛmɛ? Ani nyɛkɛ tsɔɔlɔi lɛ naa naanyobɔɔ kɛha gbeekpamɔ? Mɛni hewɔ sanebimɔi nɛɛ ahe hiaa lɛ? Ejaakɛ yɛ je lɛŋ maji wuji pii amli lɛ, skul sɔrɔtoi lɛ etsɔmɔ hei ni akɛ he woɔ awuiyeli, tsofai fɔji kɛ nitsumɔ, kɛ bɔlɛnamɔ mli yɛ. Te nyɛbii lɛ aaafee tɛŋŋ ni amɛhiɛ amɛ emuuyeli kɛ amɛjeŋba ni yɔɔ krɔŋkrɔŋ lɛ mli, kɛji amɛnaaa amɛfɔlɔi ni nuɔ amɛ shishi lɛ asɛɛfimɔ kwraa kɛmɔɔɔ shi? Paulo wo fɔlɔi aŋaa yɛ gbɛ ni ja nɔ akɛ: “Nyɛ tsɛmɛi lɛ, nyɛkawoa nyɛbii amli la, koni amɛtsui akafã.” (Kolosebii 3:21) Gbɛ kome ni atsɔɔ nɔ awoɔ gbekɛbii amli la ji nu ni anuuu amɛ daa gbi naagbai kɛ kaai ashishi. Hesaamɔ kɛha kaai ni akɛkpeɔ yɛ skul lɛ jeɔ shishi yɛ mumɔŋ shihilɛ ni yɔɔ Kristofoi ashia lɛ mli.—5 Mose 6:6-9; Abɛi 22:6.

20. Mɛni hewɔ krɔŋkrɔŋ feemɔ he hiaa wɔ fɛɛ lɛ?

²⁰ Yɛ naamuu mli lɛ, mɛni hewɔ krɔŋkrɔŋ feemɔ he hiaa kɛha wɔ fɛɛ lɛ? Ejaakɛ etsuɔ nii akɛ hebuu nɔ̃ ni wɔkɛkpeeɔ Satan je lɛ kɛ esusumɔi lɛ atutuamɔi anaa. Eji jɔɔmɔ bianɛ, ni ebaafee jɔɔmɔ hu wɔsɛɛ. Eyeɔ ebuaa wɔ ni wɔnaa nɔmimaa yɛ wala ni baafee wala diɛŋtsɛ yɛ jalɛ jeŋ hee lɛ mli lɛ he. Eyeɔ ebuaa wɔ ni wɔfeɔ Kristofoi ni ŋmɛɔ pɛpɛɛpɛ, mɛi ni anyɛɔ abɛŋkɛɔ amɛ, ni akɛ amɛ gbaa sane—jeee mɛi ni yɔɔ shɛii kɛ keketee be fɛɛ be. Yɛ ekukufoo mli lɛ, ehaa wɔtamɔɔ Kristo.—1 Timoteo 6:19.

[Shishigbɛ niŋmaa]

Ani Okaiɔ?

◻ Mɛni hewɔ Petro na akɛ ehe miihia ni ewo Kristofoi aŋaa yɛ krɔŋkrɔŋ feemɔ he lɛ?

◻ Mɛni hewɔ ebɛ mlɛo akɛ aaahi krɔŋkrɔŋ feemɔ shihilɛ mli lɛ?

◻ Mɛni wɔ fɛɛ wɔbaanyɛ wɔfee ni wɔkɛha krɔŋkrɔŋ feemɔ aya hiɛ yɛ weku lɛ mli?

◻ Kɛji asafo lɛ aaaya nɔ ehi shi krɔŋkrɔŋ lɛ, mɛɛ subaŋ ni he tseee esa akɛ wɔtsi wɔhe kɛjɛ he?

◻ Mɛɛ gbɛ nɔ wɔɔtsɔ wɔhi shi krɔŋkrɔŋ yɛ nitsumɔ he kɛ skul?

[Mfonirii ni yɔɔ baafa 16, 17]

Akɛ Yehowa Odasefoi lɛ, esa akɛ wɔna miishɛɛ yɛ Nyɔŋmɔ sɔɔmɔ kɛ nitsumɔi krokomɛi amli