Efɔŋ Nɔ Kunimyeli

“MƐƐ hewɔ po ni nɛkɛ gbee gbonyo nɛɛ aaalomɔ minuntsɔ maŋtsɛ? Ha maya ni mayajie eyitso yɛ enɔ!” Nɛkɛ nibimɔ nɛɛ jɛ Abishai ni ji Israel asraafonyo nukpa ko ŋɔɔ. Nakai ji bɔ ni ekɛ mlifu fee enii eha beni enu ni Benyaminnyo ni atsɛɔ lɛ Shimei lɛ kɛ hetsɛ̃ jɛ́ enuntsɔ, Maŋtsɛ David lɛ.​—⁠2 Samuel 16:​5-9.

Abishai miiŋmɛɛ ehe kɛmiiha jeŋ nilee ni akɛtsuɔ nii waa ŋmɛnɛ lɛ​—⁠shishitoo mla ni tsɔɔ efɔŋ ni akɛtoɔ efɔŋ najiaŋ lɛ. Hɛɛ, Abishai miisumɔ ni eha Shimei apiŋ yɛ jɛmɔ wiemɔi ni ekɛtsu nii eshi David lɛ hewɔ.

Shi, te David fee enii yɛ he eha tɛŋŋ? David eŋmɛɛɛ Abishai gbɛ, ni ekɛɛ: “Nyɛŋmɛaa lɛ gbɛ.” Eyɛ mli akɛ David leee naafolɔmɔi ni Shimei kɛshwieɔ enɔ lɛ he eko moŋ, shi ekɛ heshibaa ye kaa lɛ nɔ koni ekafee eko eto najiaŋ. Yɛ no najiaŋ lɛ, eshi sane lɛ yɛ Yehowa dɛŋ.​—⁠2 Samuel 16:​10-13.

Beni David ku sɛɛ kɛba emaŋtsɛsɛi lɛ nɔ beni ejo ebinuu atuatsemɔ ni yeee omanye lɛ naa foi lɛ, mɛi ni ba klɛŋklɛŋ koni amɛbaŋa lɛ ní amɛbi edɛŋ eshaifaa lɛ ateŋ mɔ kome ji Shimei. Shikome ekoŋŋ lɛ, Abishai miitao koni egbe lɛ, shi shikome ekoŋŋ lɛ, David eŋmɛɛɛ nakai feemɔ gbɛ.​—⁠2 Samuel 19:​15-23.

Yɛ nɛkɛ be nɛɛ mli lɛ, David tsɔɔ akɛ eji mɔ ni sa, ní feɔ Yesu Kristo he mfoniri, mɔ ni bɔfo Petro ŋma yɛ ehe akɛ: “Mɔ ni, beni ajɛɔ lɛ lɛ, ejɛɛɛ mɔ ko etooo najiaŋ, . . . shi moŋ etu esane ewo mɔ ni kojoɔ jalɛ naa lɛ dɛŋ.”​—⁠1 Petro 2:⁠23.

Ŋmɛnɛ, awoɔ Kristofoi aŋaa koni ‘amɛjwɛŋ heshibaa jwɛŋmɔ, amɛkɛ efɔŋ akato efɔŋ najiaŋ.’ (1 Petro 3:​8, 9) Kɛ wɔkɛ nɔkwɛmɔnɔ ni David kɛ Yesu Kristo fee amɛfɔ̃ shi lɛ tsu nii lɛ, wɔ hu wɔbaanyɛ ‘wɔya nɔ wɔkɛ ekpakpafeemɔ aye efɔŋ nɔ kunim.’​—⁠Romabii 12:​17-21.