Bɔ ni Kristofonyo Buɔ Nɔyeli Hegbɛ Ehaa
“Hegbɛ ko bɛ ni jɛɛɛ Nyɔŋmɔ ŋɔɔ.”—ROMABII 13:1.
1. Mɛni hewɔ abaanyɛ awie akɛ Yehowa ji Hegbɛ ni Nɔ Kwɔ Fe Fɛɛ lɛ?
HEGBƐ kɛ nɔ ko feelɔ loo bɔlɔ ni aji lɛ tsaa. Mɔ ni Nɔ Kwɔ Fe Fɛɛ, ni ha adebɔɔ nibii, nɔ ni wala yɔɔ amɛmli kɛ nɔ ni wala bɛ amɛmli fɛɛ ba shihilɛ mli ji Yehowa Nyɔŋmɔ. Ŋwanejee ko bɛ he akɛ lɛ ji Hegbɛ ni Nɔ Kwɔ Fe Fɛɛ. Anɔkwa Kristofoi kɛ ŋwɛi bɔɔnii ni wie nɛkɛ lɛ ahenumɔi lɛ kpaa gbee, akɛ: “Yehowa, wɔ-Nyɔŋmɔ, bo ji mɔ ni sa akɛ oŋɔ anunyam kɛ woo kɛ hewalɛ lɛ, ejaakɛ bo obɔ nibii fɛɛ, ni osuɔmɔnaa amɛyɔɔ ni abɔ amɛ.”—Kpojiemɔ 4:11, New World Translation.
2. Mra be mli adesai nɔyelɔi kpɛlɛ nɔ yɛ shishinumɔ ko naa akɛ amɛbɛ adebɔɔ naa hegbɛ akɛ amɛyeɔ amɛnanemɛi adesai anɔ yɛ mɛɛ gbɛ nɔ, ni mɛni Yesu kɛɛ Pontio Pilato?
2 Anɔkwale ni eji akɛ mra be mli adesai nɔyelɔi lɛ ateŋ mɛi pii bɔ mɔdɛŋ akɛ amɛaatao mla naa sɛɛfimɔ kɛha amɛnɔyeli hegbɛi lɛ kɛtsɔ tsɛmɔ ni amɛtsɛ amɛhe nyɔŋmɔ aloo nyɔŋmɔ ko najiaŋdamɔlɔ lɛ nɔ lɛ tsɔɔ nɔkpɛlɛmɔ ni wiemɔ bɛ mli, akɛ adesa ko bɛ fɔmɔ mli hegbɛ akɛ eyeɔ adesai krokomɛi anɔ maŋtsɛ.a (Yeremia 10:23) Mla naa hegbɛ jɛɛhe pɛ ni yɔɔ ji Yehowa Nyɔŋmɔ. Kristo kɛɛ Roma amralo Pontio Pilato, ni yeɔ Yudea nɔ lɛ akɛ: “Kɛ jeee ŋwɛi ajɛ aŋɔhao lɛ, kulɛ onaŋ hewalɛ ko yɛ minɔ.”—Yohane 19:11.
“Hegbɛ ko Bɛ ni Jɛɛɛ Nyɔŋmɔ Ŋɔɔ”
3. Mɛni bɔfo Paulo wie yɛ “hegbɛi ni yeɔ nɔ lɛ” ahe, ni mɛɛ sanebimɔi Yesu kɛ Paulo wiemɔi lɛ teeɔ lɛ shi?
3 Bofɔ Paulo ŋma wolo eyaha Kristofoi ni yɔɔ Roma Maŋtsɛyeli lɛ nɔyeli shishi lɛ akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ. Ejaakɛ hegbɛ ko bɛ ni jɛɛɛ Nyɔŋmɔ ŋɔɔ; shi hegbɛi ni yɔɔ lɛ, Nyɔŋmɔ to.” (Romabii 13:1) Mɛni Yesu tsɔɔ beni ewie akɛ hegbɛ ni Pilato yɔɔ lɛ, “ŋwɛi ajɛ” aŋɔha lɛ lɛ? Ni mɛɛ gbɛ nɔ Paulo bu maŋkwramɔŋ hegbɛi ni yeɔ nɔ yɛ egbii lɛ amli lɛ akɛ Nyɔŋmɔ ji mɔ ni kɛ amɛ wo hegbɛi ni amɛyɔɔ mli lɛ yɛ? Ani amɛmiitsɔɔ akɛ Yehowa diɛŋtsɛ ji mɔ ni halaa je nɛŋ maŋkwramɔŋ nɔyelɔi aŋkroaŋkroi ni yeɔ nɔ lɛ?
4. Mɛni Yesu kɛ Paulo tsɛ Satan, ni mɛɛ wiemɔ ko ni Satan wie Yesu ejeee he ŋwane?
4 Mɛɛ gbɛ nɔ eeetsɔ ebalɛ nakai, akɛni Yesu tsɛ Satan akɛ “je nɛŋ lumɔ lɛ,” ni bɔfo Paulo hu wo lɛ gbɛi akɛ “je nɛŋ nyɔŋmɔ lɛ”? (Yohane 12:31; 16:11; 2 Korintobii 4:4) Kɛfata he lɛ, beni ekaa Yesu lɛ, Satan kɛɛ lɛ akɛ ekɛ “je nɛŋ maŋtsɛyelii lɛ fɛɛ” anɔ “hegbɛ” baaha lɛ, ejaakɛ ewie akɛ akɛ nɛkɛ hegbɛ nɛɛ ewo edɛŋ. Yesu kpoo enihamɔ lɛ, shi ejeee he ŋwane akɛ nakai hegbɛ lɛ, Satan nɔ ni, ni ebaanyɛ ekɛha mɔ ni esumɔɔ.—Luka 4:5-8.
5. (a) Te esa akɛ wɔnu Yesu kɛ Paulo wiemɔi ni kɔɔ adesai anɔyeli hegbɛi ahe lɛ shishi wɔha tɛŋŋ? (b) Mɛɛ shishinumɔ naa abaanyɛ awie yɛ akɛ hegbɛi ni yeɔ nɔ lɛ “Nyɔŋmɔ to”?
5 Yehowa kɛ je nɛɛ nɔyeli wo Satan dɛŋ kɛtsɔ gbɛ ni eŋmɛ lɛ ni ehi shi yɛ etuatsemɔ lɛ sɛɛ, kɛ beni eka Adam kɛ Hawa, ni eha amɛtse maŋtsɛ ni E-ji lɛ hu hiɛ atua lɛ nɔ. (1 Mose 3:1-6; okɛto 2 Mose 9:15, 16 he.) No hewɔ lɛ, Yesu, kɛ Paulo wiemɔi lɛ tsɔɔ akɛ beni klɛŋklɛŋ adesai enyɔ ni hi Eden lɛ kpoo teokrase, aloo Nyɔŋmɔ nɔyeli lɛ, Yehowa ŋmɛ adesai ni etse amɛhe nɛɛ gbɛ koni amɛto nɔyeli gbɛi ni baaha amɛhi shihilɛ mli gbɛjianɔtoo ko shishi lɛ ahe gbɛjianɔ. Bei komɛi lɛ, Yehowa haa nɔyelɔi loo nɔyelii komɛi gbeɔ shi bɔni afee ni ekɛtsu eyiŋtoo he nii. (Daniel 2:19-21) Eŋmɛɔ ekrokomɛi hu gbɛ ni amɛyaa nɔ amɛyeɔ nɔ. Abaanyɛ awie nɔyelɔi ni Yehowa ŋmɛɔ gbɛ ni amɛyeɔ nɔ lɛ ahe akɛ “Nyɔŋmɔ to.”
Mra be Mli Kristofoi kɛ Roma Nɔyelɔi Lɛ
6. Te mra be mli Kristofoi lɛ bu Roma nɔyelɔi lɛ amɛha tɛŋŋ, ni mɛni hewɔ?
6 Mra be mli Kristofoi lɛ kɛ Yudafoi ajamɔ kui ni tee Romabii ni ebahe Israel shikpɔŋ lɛ yinɔ apam ni amɛkɛ amɛ wuu lɛ efeee ekome. Shii abɔ ni Roma nɔyelɔi lɛ, kɛ amɛ mla gbɛjianɔtoo ni aŋma afɔ shi lɛ kwɛɔ ni shihilɛ kpakpa hiɔ shikpɔŋ nɔ kɛ ŋshɔ hiɛ; ní amɛgbala nu jɔɔi ni akɛtsɛɔ nu, gbɛjegbɛi, kɛ nu hiɛ agbai; ni amɛhaa shihilɛ kpakpa hiɔ shi kɛha mɔ fɛɛ mɔ lɛ, Kristofoi buɔ amɛ akɛ ‘Nyɔŋmɔ sɔɔlɔ’ [aloo, “tsulɔ,” NW shishigbɛ niŋmaa] ji amɛ, kɛha amɛhilɛ.’ (Romabii 13:3, 4) Mla kɛ gbɛjianɔtoo ni yɔɔ lɛ ha shihilɛ kpakpa hi shi, ni enɛ ha Kristofoi lɛ shiɛ sanekpakpa lɛ kɛtee hei babaoo, taakɛ Yesu fã amɛ lɛ. (Mateo 28:19, 20) Amɛbaanyɛ amɛjɛ henilee kpakpa mli amɛwo too ni Romabii lɛ biɔ lɛ, kɛ akɛ shikai lɛ ekomɛi tsuɔ yiŋtoi ni Nyɔŋmɔ ekpɛlɛɛɛ nɔ lɛ ahe nii po.—Romabii 13:5-7.
7, 8. (a) Mɛni Romabii 13:1-7 lɛ kanemɔ jogbaŋŋ jieɔ lɛ kpo, ni mɛni emli sane lɛ tsɔɔ? (b) Mɛɛ shihilɛi ashishi Roma nɔyelɔi lɛ tsuuu nii yɛ akɛ “Nyɔŋmɔ sɔɔlɔ” lɛ, ni yɛ enɛ gbɛfaŋ lɛ, mɛɛ su mra be mli Kristofoi lɛ jie lɛ kpo?
7 Romabii yitso 13 lɛ klɛŋklɛŋ kukuji kpawo lɛ kanemɔ jogbaŋŋ jieɔ lɛ kpo akɛ maŋkwramɔŋ “hegbɛi ni yeɔ nɔ lɛ” ji “Nyɔŋmɔ sɔɔlɔ” koni ejie mɛi ni feɔ ekpakpa lɛ ayi, ni egbala mɛi ni feɔ nibii fɔji lɛ atoi. Emli sane lɛ tsɔɔ akɛ Nyɔŋmɔ ji mɔ ni tsɔɔ nɔ ni ji ekpakpa kɛ nɔ ni ji efɔŋ, shi jeee hegbɛi ni yeɔ nɔ lɛ. No hewɔ lɛ, kɛ Roma maŋtsɛ wulu lɛ aloo maŋkwramɔŋ hegbɛ kroko ko bi ni afee nibii ni Nyɔŋmɔ egu akɛ akafee, aloo yɛ gbɛ kroko nɔ lɛ, etsĩ nii ni Nyɔŋmɔ biɔ ni afee lɛ naa lɛ, no lɛ etsuuu nii akɛ Nyɔŋmɔ sɔɔlɔ dɔŋŋ. Yesu jaje akɛ: “Nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ.” (Mateo 22:21) Kɛ Roma Maŋ lɛ bi nibii ni ji Nyɔŋmɔ nɔ, tamɔ jamɔ aloo mɔ ko wala lɛ, no lɛ anɔkwa Kristofoi nyiɛɔ bɔfoi lɛ aŋaawoo lɛ sɛɛ, akɛ: “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.”—Bɔfoi lɛ Asaji 5:29, NW.
8 Kpoomɔ ni mra be mli Kristofoi lɛ kpoo akɛ amɛkɛ amɛhe wooo maŋtsɛ jamɔ kɛ wɔŋjamɔ mli, ni amɛkpaaa Kristofoi akpeeiyaa, ni amɛkpaŋ sanekpakpa lɛ hu shiɛmɔ lɛ kɛ yiwaa ba. Aheɔ ayeɔ waa akɛ agbe bɔfo Paulo yɛ Maŋtsɛ Nero famɔ naa. Maŋtsɛmɛi krokomɛi, titri lɛ, Domitian, Marcus Aurelius, Septimius Severus, Decius, kɛ Diocletian, hu wa mra be mli Kristofoi lɛ ayi. Beni nɛkɛ maŋtsɛmɛi nɛɛ kɛ hegbɛi ni yeɔ nɔ yɛ amɛshishi lɛ waa Kristofoi ayi lɛ, eka shi faŋŋ akɛ amɛtsuuu nii akɛ “Nyɔŋmɔ sɔɔlɔ.”
9. (a) Mɛni kã he eji anɔkwale lolo yɛ maŋkwramɔŋ hegbɛi ni yeɔ nɔ lɛ ahe, ni namɔ ŋɔɔ maŋkwramɔŋ kooloo lɛ naa hewalɛ kɛ hegbɛ kɛjɛɔ? (b) Mɛni abaanyɛ ajɛ nilee mli awie yɛ Kristofoi aheshibaa kɛha hegbɛi ni yeɔ nɔ lɛ he?
9 Enɛɛmɛi fɛɛ feɔ lɛ faŋŋ akɛ eyɛ mli akɛ maŋkwramɔŋ hegbɛi ni yeɔ nɔ lɛ tsuɔ nii yɛ gbɛi komɛi anɔ akɛ “Nyɔŋmɔ gbɛjianɔtoo” koni eha adesai ashihilɛ gbɛjianɔtoo kpakpa ahi shi moŋ, shi amɛkã he amɛji je lɛŋ nibii agbɛjianɔtoo ni Satan ji enyɔŋmɔ lɛ fã lolo. (1 Yohane 5:19) Amɛfata jeŋ muu fɛɛ maŋkwramɔ gbɛjianɔtoo ni akɛ “kooloo” ni yɔɔ Kpojiemɔ 13:1, 2 lɛ fee he mfoniri lɛ he. Nakai kooloo lɛ naa ehewalɛ kɛ ehegbɛ kɛjɛɔ “drako kpeteŋkpele,” Satan Abonsam ŋɔɔ. (Kpojiemɔ 12:9) Enɛ hewɔ lɛ, nilee yɛ mli akɛ heshibaa ni Kristofoi feɔ amɛhaa nɛkɛ hegbɛi nɛɛ yawaa he ko, shi jeee nɔ ni husu bɛ he.—Okɛto Daniel 3:16-18 he.
Bulɛ Kpakpa Kɛha Nɔyeli Hegbɛi
10, 11. (a) Mɛɛ gbɛ nɔ Paulo tsɔɔ yɛ akɛ esa akɛ wɔbu mɛi ni hiɛ hegbɛi lɛ? (b) Mɛɛ gbɛ nɔ, ni mɛni hewɔ abaanyɛ asɔle “aha maŋtsɛmɛi kɛ mɛi fɛɛ ni yeɔ onukpai lɛ”?
10 Shi kɛlɛ, enɛ etsɔɔɔ akɛ esa akɛ Kristofoi aje ekaa ni amɛkɛjie atuatsemɔ su kpo yɛ maŋkwramɔŋ hegbɛi ni yeɔ nɔ lɛ agbɛfaŋ. Eji anɔkwale akɛ nɛkɛ gbɔmɛi nɛɛ ateŋ mɛi babaoo ji mɛi ni esaaa bulɛ yɛ amɛ teemɔŋ shihilɛ, loo nɔ ni mɛi fɛɛ le lɛ amli. Ni kɛlɛ, bɔfoi lɛ tsɔ amɛnɔkwɛmɔ nɔ kɛ amɛŋaawoo lɛ nɔ amɛtsɔɔ akɛ esa akɛ ajie bulɛ kpo atsɔɔ gbɔmɛi ni yɔɔ nɔyeli hegbɛi amli lɛ. Beni Paulo yapue yɛ Maŋtsɛ Herode Agripa II ni kɛ enyɛmiyoo yɔɔ akɛ eŋa lɛ hiɛ lɛ, ekɛ lɛ wie kɛ bulɛ ni sa lɛ akɛ nɔyelɔ.—Bɔfoi lɛ Asaji 26:2, 3, 25.
11 Paulo wie po akɛ eja gbɛ akɛ wɔɔtsĩ je lɛŋ nɔyelɔi atã yɛ wɔsɔlemɔi amli, titri lɛ kɛji ehe miihia ni amɛfee yiŋkpɛi ni saa wɔwala kɛ Kristofoi anitsumɔ lɛ he. Eŋma akɛ: “Agbɛnɛ nɔ klɛŋklɛŋ ni miwoɔ he ŋaa ji akɛ ahiɛ faikpamɔi, sɔlemɔi, mlidaamɔi, shidaai amli, aha gbɔmɛi fɛɛ, aha maŋtsɛmɛi kɛ mɛi fɛɛ ni yeɔ onukpai lɛ, koni wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli. Ejaakɛ enɛ hi ni eŋɔɔ Nyɔŋmɔ ni ji wɔ Yiwalaherelɔ lɛ naa, mɔ ni sumɔɔ akɛ ahere gbɔmɛi fɛɛ ayiwala, koni amɛshɛ anɔkwale lɛ lee mli.” (1 Timoteo 2:1-4) Bulɛ su ni wɔɔná wɔha nɛkɛ hegbɛi ni yeɔ nɔ nɛɛ baanyɛ aha amɛŋmɛ wɔ gbɛ ni wɔya nɔ wɔtsu wɔnitsumɔ ni ji mɔdɛŋ ni wɔbɔɔ ni ahere “gbɔmɛi fɛɛ” ayiwala lɛ kɛ heyeli babaoo.
12, 13. (a) Mɛɛ ŋaawoo ni ŋmɛɔ pɛpɛɛpɛ, ni kɔɔ hegbɛi ahe Petro kɛha? (b) Mɛɛ gbɛ nɔ wɔɔtsɔ wɔku “gbɔmɛi ni bɛ yitsoŋ,” ni haa mɛi naa Yehowa Odasefoi ahe jwɛŋmɔ fɔŋ lɛ “akwashiafeemɔ lɛ naa”?
12 Bɔfo Petro ŋma akɛ: “No hewɔ lɛ nyɛbaa nyɛhe shi nyɛhaa gbɔmɛi agbɛjianɔtoo fɛɛ gbɛjianɔtoo, yɛ Nuŋtsɔ lɛ hewɔ, maŋtsɛ mɔ ni yeɔ nɔ lɛ jio, lumɛi ni etsu yɛ efɔŋ feelɔi aweletɔɔ hewɔ kɛ ekpakpa feelɔi ayijiemɔ hewɔ lɛ jio. Ejaakɛ nakai ji Nyɔŋmɔ suɔmɔnaa nii lɛ, akɛ ekpakpa-feemɔ nyɛkɛaatsimɔ gbɔmɛi ni bɛ yitsoŋ lɛ akwashiafeemɔ lɛ naa, tamɔ odehei, shi jeee mɛi ni ŋɔɔ odeheyeli nɛɛ amɛfeɔ efɔŋ nɔhaanɔ, shi moŋ tamɔ Nyɔŋmɔ tsuji. Nyɛwoa mɛi fɛɛ; nyɛsumɔa nyɛnyɛmimɛi; nyɛshea Nyɔŋmɔ gbeyei; nyɛwoa maŋtsɛ.” (1 Petro 2:13-17) Mɛɛ ŋaawoo ni ŋmɛɔ pɛpɛɛpɛ nɛ! Esa akɛ wɔna heshibaa kwraa wɔha Nyɔŋmɔ akɛ etsuji, ni wɔkɛ heshibaa ni husu yɔɔ he, kɛ bulɛ aha maŋkwramɔŋ nɔyelɔi ni atsu amɛ ni amɛgbala efɔŋ feelɔi atoi lɛ.
13 Akpa shi ana akɛ je lɛŋ nɔyelɔi lɛ ateŋ mɛi babaoo hiɛ susumɔi ni ejaaa kwraa yɛ Yehowa Odasefoi ahe. Ni bei pii lɛ, enɛ jɛɔ saji ni ejaaa ni Nyɔŋmɔ webii ahenyɛlɔi amalelɔi kɛɔ amɛ lɛ hewɔ. Aloo ekolɛ eeenyɛ efee akɛ nɔ fɛɛ nɔ ni amɛle yɛ wɔhe lɛ jɛ adafitswaa saji, ni bei komɛi lɛ amɛkwɛɔ mɛi ahiɛaŋ yɛ amɛ saji aŋmalamɔ mli lɛ amli. Bei komɛi lɛ wɔbaanyɛ wɔkumɔ nɛkɛ jwɛŋmɔ fɔŋ ni amɛna nɛɛ kɛtsɔ bulɛ su ni wɔɔjie lɛ kpo lɛ nɔ, kɛ agbɛnɛ, kɛ eeehi lɛ, kɛtsɔ Yehowa Odasefoi anitsumɔ kɛ amɛhemɔkɛyelii amlitsɔɔmɔ ni ja pɛpɛɛpɛ ni wɔkɛaaha nɔyelɔi lɛ nɔ. Jehovah’s Witnesses in the Twentieth Century wolo bibioo lɛ kɛ mlitsɔɔmɔ ni mli kã shi faŋŋ haa maŋ onukpai ni bɛ deka lɛ. Kɛ amɛmiitao amɛle nibii jogbaŋŋ kɛmɔ shi lɛ, no lɛ abaanyɛ akɛ Jehovah’s Witnesses—Proclaimers of God’s Kingdom wolo lɛ, ni ji dɛŋdade fɛfɛo ni sa akɛ ana eko yɛ maji kɛ maji wuji awojiatoo he fɛɛ mli lɛ eko aha amɛ.
Nɔyeli Hegbɛ yɛ Kristofoi Ashiai Amli
14, 15. (a) Mɛni ji nɔyeli hegbɛ ni yɔɔ Kristofoi ashia mli lɛ nɔdaamɔ nɔ? (b) Mɛni esa akɛ efee ŋamɛi Kristofoi asu yɛ amɛwumɛi ahe, ni mɛni hewɔ?
14 Eka shi faŋŋ akɛ, kɛ Nyɔŋmɔ biɔ ni Kristofoi ajie bulɛ kpo amɛtsɔɔ je lɛŋ hegbɛi lɛ, no lɛ esa akɛ amɛjie kpo amɛtsɔɔ nɔyeli hegbɛ ni Nyɔŋmɔ eto ema shi yɛ Kristofoi ashiai amli lɛ hu. Bɔfo Paulo tsɔɔ yitsoyeli he shishitoo mla ni yɔɔ Yehowa webii ateŋ lɛ mli yɛ gbɛ ni mli kã shi faŋŋ nɔ. Eŋma akɛ: “Shi miisumɔ akɛ nyɛle akɛ nuu fɛɛ nuu yitso ji Kristo, ni yoo fɛɛ yoo hu yitso ji nuu, ni Kristo yitso ji Nyɔŋmɔ.” (1 Korintobii 11:3) Enɛ ji teokrase, loo Nyɔŋmɔ nɔyeli shishitoo mla lɛ. Mɛni enɛ biɔ ni afee?
15 Bulɛ kɛha teokrase jeɔ shishi yɛ shia lɛ mli. Ŋa Kristofonyo ni ejieee bulɛ ni sa kpo etsɔɔɔ hegbɛ ni ewu yɔɔ—kɛ nuu lɛ ji heyelilɔ jio, ejeee heyelilɔ jio lɛ—jeee teokrase nifeemɔ. Paulo wo Kristofoi aŋaa akɛ: “Nyɛbabaa nyɛhe shi nyɛhaa nyɛhe yɛ Kristo gbeyeishemɔ mli. Nyɛ yeigbayei lɛ, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, taakɛ bɔ ni nyɛfeɔ nyɛhaa Nuŋtsɔ lɛ, ejaakɛ wu lɛ ji ŋa lɛ yitso, taakɛ bɔ ni Kristo hu ji asafo lɛ yitso, ni lɛ nɔŋŋ ji gbɔmɔtso lɛ yiwalaherelɔ lɛ. Shi taakɛ bɔ ni asafo lɛ baa ehe shi ehaa Kristo lɛ, nakai nɔŋŋ yei lɛ hu afee aha amɛ diɛŋtsɛ amɛwumɛi lɛ yɛ nɔ fɛɛ nɔ mli.” (Efesobii 5:21-24) Bɔ ni esa akɛ Kristofoi hii aba amɛhe shi amɛha Kristo yitsoyeli lɛ, nakai nɔŋŋ esa akɛ Kristofoi yei hu ayoo nilee ni yɔɔ heshibaa ni amɛaafee amɛha hegbɛ ni Nyɔŋmɔ kɛha amɛwumɛi lɛ mli. Enɛ baaha amɛna mligbɛ tsui ni nyɔɔ mɔ mli waa, kɛ nɔ ni he hiaa fe no lɛ, Yehowa dɛŋ jɔɔmɔi hu.
16, 17. (a) Gbekɛbii ni atsɔse amɛ yɛ Kristofoi ashiai amli lɛ baanyɛ amɛha esoro amɛ yɛ gbekɛbii pii ahe ŋmɛnɛ yɛ mɛɛ gbɛ nɔ, ni mɛɛ nɔ ko ni woɔ mɔ hewalɛ amɛyɔɔ? (b) Mɛɛ gbɛ nɔ Yesu fee nɔkwɛmɔ nɔ kpakpa eha gbekɛbii ŋmɛnɛ, ni mɛni awoɔ amɛ hewalɛ ni amɛfee?
16 Teokrase gbekɛbii hu naa miishɛɛ akɛ amɛaajie bulɛ ni sa kpo amɛtsɔɔ amɛfɔlɔi. Agba afɔ shi yɛ yinɔbii ni ji gbekɛbii yɛ naagbee gbii nɛɛ amli lɛ ahe akɛ amɛbaafee “fɔlɔi anɔ toigbolɔi.” (2 Timoteo 3:1, 2) Shi Nyɔŋmɔ Wiemɔ ni jɛ mumɔŋ lɛ kɛɔ Kristofoi gbekɛbii akɛ: “Nyɛ bii lɛ, nyɛboa nyɛfɔlɔi atoi yɛ nibii fɛɛ gbɛfaŋ; ejaakɛ no sa Nuŋtsɔ lɛ hiɛ jogbaŋŋ.” (Kolosebii 3:20) Bulɛ ni ajieɔ kpo atsɔɔ fɔlɔi ahegbɛ lɛ saa Yehowa hiɛ ni ekɛ edɛŋ jɔɔmɔ baa.
17 Enɛ jeɔ kpo faŋŋ yɛ Yesu sane lɛ mli. Luka sane lɛ kɛɔ akɛ: “Ni ekɛ amɛ [efɔlɔi lɛ] yiŋ kɛtee Nazaret, ni eba ehe shi eha amɛ. . . . Ni Yesu tee ehiɛ yɛ nilee kɛ dalɛ kɛ duromɔ mli yɛ Nyɔŋmɔ kɛ gbɔmɛi ahiɛ.” (Luka 2:51, 52) Yesu eye afii 12 yɛ nakai beaŋ, ni Hela feemɔ-wiemɔ su ni akɛtsu nii yɛ biɛ lɛ maa nɔ mi akɛ “etee nɔ eba ehe shi” eha efɔlɔi. No hewɔ lɛ eheshibaa lɛ baaa naagbee beni eye afii nyɔŋma kɛ etɛ kɛyaa. Kɛji nyɛ obalaŋtai lɛ, nyɛmiitao nyɛya hiɛ yɛ mumɔŋ, yɛ Yehowa kɛ gbɔmɛi ni yɔɔ Nyɔŋmɔ gbeyeishemɔ lɛ ahiɛ duromɔ hu mli lɛ, no lɛ esa akɛ nyɛjie bulɛ kpo nyɛtsɔɔ hegbɛ, yɛ nyɛshia lɛ mli kɛ esɛɛ fɛɛ.
Nɔyeli Hegbɛ yɛ Asafo lɛ Mli
18. Namɔ ji Kristofoi asafo lɛ Yitso, ni namɛi ekɛ hegbɛ eha?
18 Beni ewieɔ bɔ ni gbɛjianɔtoo kpakpa he hiaa yɛ Kristofoi asafo lɛ mli lɛ he lɛ, Paulo ŋma akɛ: “Nyɔŋmɔ lɛ, ejeee sakasaka feemɔ Nyɔŋmɔ, shi moŋ hejɔlɛ Nyɔŋmɔ ni. . . . Afee nii fɛɛ bɔ ni yɔɔ fɛo kɛ gbɛnaa gbɛnaa [aloo, “yɛ gbɛjianɔtoo naa,” NW, shishigbɛ niŋmaa].” (1 Korintobii 14:33, 40) Kristo, ni ji Kristofoi asafo lɛ Yitso lɛ kɛ hegbɛ eha hii anɔkwafoi, bɔni afee ni nibii fɛɛ aya nɔ yɛ gbɛjianɔtoo kpakpa naa. Wɔkaneɔ akɛ: “Lɛ nɔŋŋ eha mɛi komɛi tsɔmɔ bɔfoi, ni mɛi komɛi gbalɔi, mɛi komɛi hu sanekpakpa jajelɔi, ni mɛi komɛi hu nɔkwɛlɔi kɛ tsɔɔlɔi, koni aŋɔsaa hetselɔi lɛ aha sɔɔmɔ nitsumɔ lɛ . . . Shi moŋ wɔfee anɔkwafoi yɛ suɔmɔ mli, ni wɔdara yɛ nibii fɛɛ gbɛfaŋ yɛ lɛ Kristo lɛ nɔŋŋ ni ji yitso lɛ he.”—Efesobii 4:11, 12, 15.
19. (a) Namɔ Kristo ehala eto eshikpɔŋ nɔ nibii fɛɛ ni eyɔɔ lɛ nɔ, ni namɛi ekɛ hegbɛ krɛdɛɛ ko eha amɛ? (b) Mɛɛ hegbɛ ni akɛhaa mɛi krokomɛi yaa nɔ yɛ Kristofoi asafo lɛ mli, ni mɛni enɛ biɔ yɛ wɔ gbɛfaŋ?
19 Kristo ehala kuu ni ji “tsulɔ anɔkwafo kɛ nilelɔ” lɛ koni ekwɛ “enii fɛɛ kwa,” aloo Maŋtsɛyeli lɛ he nibii ni yɔɔ shikpɔŋ nɔ lɛ anɔ yɛ nɛkɛ naagbee gbii nɛɛ amli. (Mateo 24:45-47) Taakɛ eji yɛ klɛŋklɛŋ afii oha lɛ mli lɛ, tsulɔ nɛɛ najiaŋdamɔlɔ ji Kristofoi hii ni afɔ amɛ mu lɛ anɔyeli kuu ko, mɛi ni Kristo kɛ hegbɛ eha amɛ akɛ amɛkpɛ yiŋ ni amɛhala nɔkwɛlɔi krokomɛi lɛ. (Bɔfoi lɛ Asaji 6:2, 3; 15:2) Ni Nɔyeli Kuu lɛ hu kɛ hegbɛi haa Nitsumɔ He Ajinafoi Akui, kpokpai wuji kɛ kpokpai anɔkwɛlɔi, kɛ onukpai ni yɔɔ Yehowa Odasefoi asafoi fe 73,000 ni yɔɔ shikpɔŋ lɛ nɔ fɛɛ lɛ ateŋ eko fɛɛ eko mli. Nɛkɛ Kristofoi hii ni etuu amɛhe amɛha nɛɛ sa sɛɛfimɔ kɛ bulɛ ni wɔkɛaaha amɛ.—1 Timoteo 5:17.
20. Mɛɛ nɔkwɛmɔ nɔ tsɔɔ akɛ Yehowa naaa mɛi ni bɛ bulɛ kɛha amɛnanemɛi Kristofoi ni hiɛ hegbɛi lɛ ahe miishɛɛ?
20 Yɛ bulɛ ni sa akɛ wɔna wɔha mɛi ni yɔɔ hegbɛi yɛ Kristofoi asafo lɛ mli lɛ gbɛfaŋ lɛ, abaanyɛ akɛto heshibaa ni sa akɛ wɔjie kpo wɔtsɔɔ je lɛŋ hegbɛi ni yeɔ nɔ lɛ he yɛ gbɛ ni yɔɔ miishɛɛ nɔ. Kɛ mɔ ko ku adesai amla ko ni Nyɔŋmɔ kpɛlɛɔ nɔ mli lɛ, yɛ anɔkwale mli lɛ, toigbalamɔ ni “lumɛi” lɛ kɛbaa enɔ lɛ ji Nyɔŋmɔ mlifu kpojiemɔ “yɛ mɔ ni tsuɔ nifɔjianii lɛ nɔ” yɛ gbɛ ko nɔ. (Romabii 13:3, 4) Kɛji Yehowa mli fuɔ mɔ ni kuɔ adesai amlai amli, ni ebɛ bulɛ ni sa kɛha je lɛŋ hegbɛi ni yeɔ nɔ lɛ, no lɛ kwɛ bɔ ni enaŋ he miishɛɛ kwraa kɛji Kristofonyo ni ejɔɔ ehe nɔ lɛ ku Biblia shishitoo mlai amli, ni ejieee bulɛ kpo etsɔɔɔ enanemɛi Kristofoi ni hiɛ hegbɛi lɛ!
21. Mɛɛ Ŋmalɛ naa ŋaawoo wɔɔna miishɛɛ akɛ wɔɔnyiɛ sɛɛ, ni mɛni he abaasusu yɛ nikasemɔ ni nyiɛ sɛɛ lɛ mli?
21 Yɛ nɔ najiaŋ ni wɔɔkɔ atuatsemɔ loo heyeli su ni kɛ Nyɔŋmɔ mlifu aaaba wɔnɔ moŋ lɛ, wɔɔnyiɛ Paulo ŋaawoo ni ekɛha Kristofoi ni hi Filipi lɛ sɛɛ, akɛ: “No hewɔ lɛ, nyɛ mɛi ni misumɔɔ, taakɛ bɔ ni nyɛboɔ toi daa nɛɛ, jeee beni mikɛ nyɛ yɔɔ lɛ kɛkɛ, shi moŋ titri lɛ agbɛnɛ ni mibɛ nyɛŋɔɔ nɛɛ hu lɛ, nyɛkɛ gbeyeishemɔ kɛ he kpokpomɔ atsũa nyɛ diɛŋtsɛ nyɛ yiwalaheremɔ lɛ he nii; ejaakɛ suɔmɔ ni aaasumɔ jio, feemɔ ni aaafee jio, Nyɔŋmɔ ji mɔ ni tsuɔ fɛɛ yɛ nyɛmli yɛ emlihilɛ naa. Nyɛfea nii fɛɛ ni huhuuhu wiemɔ kɛ ŋwanejee akahi mli; koni nyɛhe akahi shwamɔ, ni nyɛfee mɛi krɔŋŋi, Nyɔŋmɔ bii ni he bɛ kpa ko yɛ yinɔ kɔɔdɔŋ ni bɛ eŋɛlɛ nɔ nɛɛ teŋ, mɛi ateŋ ni nyɛtsoa tamɔ kanei yɛ je nɛŋ.” (Filipibii 2:12-15) Ákɛ mɛi ni tamɔɔɔ amrɔ nɛɛ yinɔ kɔɔdɔŋ ni bɛ eŋɛlɛ nɔ, ni kɛ hegbɛ he naagba ebafɔ lɛ diɛŋtsɛ enɔ nɛɛ, Yehowa webii kɛ klalo-feemɔ baa amɛhe shi amɛhaa hegbɛ. Enɛ hewɔ lɛ ehe baa sɛɛnamɔ kɛhaa amɛ, taakɛ wɔbaana yɛ sane ni nyiɛ sɛɛ lɛ mli lɛ.
[Shishigbɛ niŋmai]
a Kwɛmɔ sane ni aŋma kɛtsɔ enɛ hiɛ lɛ.
Yɛ Emlitii Mli Lɛ
◻ Namɔ ji Hegbɛ ni Nɔ Kwɔ Fe Fɛɛ, ni mɛni hewɔ ehegbɛ lɛ ja yɛ mla naa lɛ?
◻ Mɛɛ shishinumɔ naa abaanyɛ awie yɛ akɛ hegbɛi ni yeɔ nɔ lɛ “Nyɔŋmɔ to”?
◻ Mɛɛ be mli hegbɛi ni yeɔ nɔ lɛ efeee “Nyɔŋmɔ sɔɔlɔ” dɔŋŋ?
◻ Mɛɛ hegbɛ he gbɛjianɔtoo yɔɔ Kristofoi awekui amli?
◻ Mɛɛ hegbɛ ni akɛhaa mɛi krokomɛi yɔɔ Kristofoi asafo lɛ mli?
[Mfoniri ni yɔɔ baafa 18]
Yesu jaje akɛ: “Nyɛŋɔa Kaisare nii nyɛhaa Kaisare”