Nyiɛmɔ Yesu Nyɔŋmɔ Jamɔ Hetuu-Kɛhamɔ He Nɔkwɛmɔ Nɔ Lɛ Sɛɛ

“Nɔ ko ni agba mli faŋŋ akɛ eda kpeteŋkpele ji Nyɔŋmɔ jamɔ [hetuu-kɛhamɔ] teemɔŋ sane lɛ: ‘[Yesu] . . . jie ehe shi faŋŋ yɛ[heloo mli.’”​—1 Timoteo 3:⁠16.

 1. (a) Mɛɛ sanebimɔ hi shi aahu fe afii 4,000 ni ahaaa hetoo (b) Mɛɛ be ni yɛ mɛɛ gbɛ nɔ aha hetoo lɛ?

EJI sanebimɔ ko ni hi shi fe afii 4,000 ni ahaaa hetoo. Kɛjɛ be mli ni klɛŋklɛŋ gbɔmɔ, Adam, nyɛɛɛ ahiɛ emuuyeli mli lɛ sɛɛ lɛ, sanebimɔ lɛ ji: Te aaafee tɛŋŋ ajie Nyɔŋmɔ jamɔ hetuu-kɛhamɔ kpo yɛ adesai ateŋ? Yɛ naagbee lɛ, yɛ klɛŋklɛŋ afii oha Ŋ.B. mli lɛ, beni Nyɔŋmɔ Bi lɛ ba shikpɔŋ nɔ lɛ, akɛ hetoo lɛ ha. Yesu Kristo jie bɔ ni ekɛ ehe ekpɛtɛ Yehowa he gbagbalii lɛ kpo yɛ esusumɔ, ewiemɔ kɛ nifeemɔi fɛɛ mli. No hewɔ lɛ ejie ‘Nyɔŋmɔ jamɔ hetuu-kɛhamɔ teemɔŋ sane krɔŋkrɔŋ’ lɛ kpo, ni efee gbɛ ni adesai ni amɛjɔɔ amɛhe nɔ lɛ baatsɔ nɔ ahiɛ nɛkɛ hetuu-kɛhamɔ nɛɛ mli lɛ he nɔkwɛmɔ nɔ.​—1 Timoteo 3:⁠16.

 2. Yɛ Nyɔŋmɔ jamɔ hetuu-kɛhamɔ sɛɛdii mli lɛ, mɛni hewɔ esa akɛ wɔjwɛŋ Yesu nɔkwɛmɔ nɔ lɛ he jogbaŋŋ?

² Yɛ be mli ni wɔdiɔ Nyɔŋmɔ jamɔ hetuu-kɛhamɔ sɛɛ akɛ Kristofoi ni amɛjɔɔ amɛhe nɔ ni abaptisi amɛ lɛ, wɔbaafee jogbaŋŋ akɛ ‘wɔɔjwɛŋ’ Yesu nɔkwɛmɔ nɔ lɛ ‘he.’ (Hebribii 12:⁠3) Mɛni hewɔ? Yɛ yiŋtoi enyɔ hewɔ. Klɛŋklɛŋ lɛ, Yesu nɔkwɛmɔ nɔ lɛ baanyɛ aye abua wɔ ni wɔna Nyɔŋmɔ jamɔ hetuu-kɛhamɔ. Yesu le e-Tsɛ lɛ jogbaŋŋ fe mɔ fɛɛ mɔ. (Yohane 1:18) No hewɔ lɛ bɔ ni Yesu nyɛ ekase Yehowa gbɛi kɛ esui lɛ jogbaŋŋ ha hewɔ lɛ ebaanyɛ ekɛɛ akɛ: “Mɔ ni ena mi lɛ, ena Tsɛ lɛ.” (Yohane 14:⁠9) Wɔbaanyɛ wɔtsɔ Yesu shihilɛ kɛ esɔɔmɔ lɛ nɔ wɔna Yehowa mlihilɛ sui lɛ ahe hiɛsɔɔ ni mli kwɔ, ni enɛ baawo bɔ ni wɔkɛ wɔhe ekpɛtɛ wɔ-Tsɛ ni yɔɔ suɔmɔ lɛ he lɛ mli hewalɛ. Nɔ ni ji enyɔ lɛ, Yesu nɔkwɛmɔ nɔ lɛ baanyɛ aye abua wɔ ni wɔjie Nyɔŋmɔ jamɔ hetuu-kɛhamɔ kpo. Eto jeŋba ni jieɔ Nyɔŋmɔ jamɔ hetuu-kɛhamɔ kpo lɛ he nɔkwɛmɔ nɔ ni yeɔ emuu efɔ shi. No hewɔ lɛ wɔbaafee jogbaŋŋ akɛ wɔɔsusu bɔ ni wɔɔfee ni ‘wɔwo Kristo,’ ni ji akɛ, wɔŋɔ lɛ akɛ nɔkwɛmɔ nɔ, ni wɔkase enɔkwɛmɔ nɔ lɛ he.​—Romabii 13:⁠14.

 3. Mɛni esa akɛ efata Biblia kasemɔ ni wɔ diɛŋtsɛ wɔfeɔ yɛ teemɔŋ lɛ he, ni mɛni hewɔ?

³ Jeee nɔ fɛɛ nɔ ni Yesu wie ni efee lɛ aŋmala ashwie shi. (Yohane 21:25) No hewɔ lɛ, esa akɛ nibii ni atsɔ mumɔ lɛ kanyamɔ nɔ aŋmala ashwie shi lɛ afee nibii ni esa akɛ wɔnya he diɛŋtsɛ. No hewɔ lɛ esa akɛ wɔkɛ daa Sanekpakpa ni kɔɔ Yesu shihilɛ he lɛ kanemɔ afata wɔ teemɔŋ Biblia kasemɔ he. Shi kɛji akɛ nikanemɔ ni tamɔ nɛkɛ baaye abua wɔ ni wɔtiu Nyɔŋmɔ jamɔ hetuu-kɛhamɔ sɛɛ lɛ, belɛ esa akɛ wɔŋɔ be ni wɔkɛ hiɛsɔɔ ajwɛŋ nɔ ni wɔkaneɔ lɛ nɔ. Esa akɛ wɔha wɔhiɛ ahi wɔhe nɔ hu ni wɔkwɛ nii kɛteke nɔ ni yɔɔ faŋŋ lɛ.

Bɔ ni Tsɛ lɛ Ji lɛ, Nakai Bi lɛ Ji

 4. (a) Mɛni tsɔɔ akɛ Yesu ji mɔ ko ni yɔɔ miishɛɛ ni enuɔ nii ahe waa? (b) Mɛɛ hegbɛ Yesu diɛŋtsɛ ŋɔ yɛ be mli ni ekɛ mɛi krokomɛi yeɔ lɛ?

⁴ Susumɔ nɔkwɛmɔ nɔ ko he. Yesu ji nuu ni yɔɔ miishɛɛ ni yɔɔ henumɔ waa. Kadimɔ kɛjɛ Marko 10:​1, 10, 13, 17, kɛ 35 akɛ gbɔmɛi ni amɛye afii sɔrɔtoi ni amɛjɛ shihilɛi sɔrɔtoi amli nyɛɔ amɛbɛŋkɛɔ lɛ. Ehole gbekɛbii anɔ ehiɛ amɛ yɛ edɛŋ fe shikome. (Marko 9:​36; 10:16) Mɛni hewɔ gbɔmɛi, gbekɛbii po nuɔ he akɛ amɛhe jɔɔ amɛ kɛ amɛba Yesu masɛi lɛ? Ejɛ bɔ ni eyɔɔ amɛhe miishɛɛ diɛŋtsɛ yɛ anɔkwayeli mli lɛ hewɔ. (Marko 1:​40, 41) Enɛ jeɔ kpo yɛ bɔ ni yɛ bei babaoo mli lɛ eŋɔɔ hegbɛ lɛ ni lɛ moŋ eyaa gbɔmɛi ni yelikɛbuamɔ he ehia amɛ lɛ aŋɔɔ lɛ mli. No hewɔ lɛ, wɔkaneɔ akɛ Nuŋtsɔ lɛ “na” Nain yoo okulafo lɛ ni atere ebinuu ni egbo lɛ kɛmiiya. Kɛkɛ ni “eba ni ebata adeka lɛ he” ni etee gbekɛ nuu lɛ shi, ni nɔ ko nɔ ko bɛ ni tsɔɔ akɛ abi lɛ ni efee nakai da. (Luka 7:​13-15) Agbɛnɛ hu, ejɛ esuɔmɔ mli etsa yoo ko ni edɔ kɔmɔɔ ni enyɛɛɛ emli ekpa kwraa lɛ kɛ nuu ko ni yeɔ fuumɔ hela lɛ ni jeee akɛ atsɛ lɛ ni ebafee nakai da.​—Luka 13:​11-13; 14:​1-4.

 5. Mɛni ji nɔ ni nɛkɛ saji ni kɔɔ Yesu sɔɔmɔ nitsumɔ lɛ he lɛ tsɔɔ wɔ yɛ Yehowa sui kɛ egbɛi ahe?

⁵ Kɛ okane saji ni tamɔ nɛkɛ lɛ, wa ni obi bo diɛŋtsɛ ohe akɛ: ‘Akɛni Yesu kase e-Tsɛ lɛ yɛ emuuyeli mli hewɔ lɛ, mɛni ji nɔ ni nɛkɛ saji nɛɛ kɛɔ yɛ Yehowa sui kɛ egbɛi ahe?’ Esa akɛ enɛ ama nɔ mi aha wɔ akɛ Yehowa ji Nyɔŋmɔ ni yɔɔ miishɛɛ ni nuɔ nii ahe waa. Bɔ ni enyaa adesai aweku lɛ he babaoo hewɔ lɛ no tsirɛ lɛ koni etsɔ hiɛ ni ekɛ amɛ aye. Ehe ehiaaa ni atsɔ eyiŋ kɛ lakamɔ koni ekɛ e-Bi lɛ aha “yɛ mɛi pii akpɔmɔ hewɔ.” (Mateo 20:​28; Yohane 3:16) Etaoɔ hegbɛi koni ‘ena’ mɛi ni baajɛ amɛsuɔmɔ mli amɛsɔmɔ lɛ lɛ ‘ahe tsui.’ (5 Mose 10:15) Taakɛ Biblia lɛ kɛɔ lɛ: “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.”​—2 Kronika 16:⁠9.

 6. Mɛni jɛɔ mli baa kɛ wɔsusu miishɛɛ ni Yehowa yɔɔ kɛ bɔ ni enuɔ nii ahe babaoo taakɛ e-Bi lɛ fee he nɔkwɛmɔ nɔ lɛ he aloo wɔjie lɛ kpo lɛ?

⁶ Miishɛɛ ni Yehowa yɔɔ kɛ henumɔ ni mli kwɔ ni enaa ehaa mɛi nɛɛ ahesusumɔ, taakɛ e-Bi lɛ fee he nɔkwɛmɔ nɔ lɛ, baasa otsui he, ni ebaaha hiɛsɔɔ ayi otsui mli obɔ kɛha E-mlihilɛ kɛ sui kpakpai ni yɔɔ fɛo lɛ. Nɔ ni baajɛ mli aba ji akɛ enɛ baagbala bo kɛbɛŋkɛ lɛ. Enɛ baatsirɛ bo ni otsi obɛŋkɛ lɛ yɛ heyeli mli yɛ sɔlemɔ mli yɛ be fɛɛ mli yɛ shihilɛi fɛɛ hu shishi. (Lala 65:⁠3) Ebaawo bɔ ni okɛ ohe kpɛtɛɔ ehe gbagbalii lɛ mli hewalɛ.

 7. Yɛ be mli ni wɔsusu miishɛɛ ni Yehowa yɔɔ kɛ bɔ ni enuɔ nii ahe kɛyaa shɔŋŋ lɛ he lɛ, mɛni esa akɛ obi bo diɛŋtsɛ ohe, ni mɛni hewɔ?

⁷ Shi kaimɔ akɛ, Nyɔŋmɔ jamɔ hetuu-kɛhamɔ kɔɔ nibii babaoo he fe jamɔ henumɔ pɛ kɛkɛ he. Taakɛ Biblia nilelɔ R. Lenski ŋma lɛ, “nɔ ni fata he ji wɔ gbeyeishemɔ, jamɔ sui kɛ nifeemɔi ni jɛɔ mli baa.” (Nɔ ni atsɔmɔ lɛ ji wɔnɔ.) No hewɔ lɛ yɛ be mli ni osusu miishɛɛ ni Yehowa yɔɔ kɛ ehenumɔ ni mli kwɔ ni Yesu jie lɛ kpo lɛ he lɛ, bi bo diɛŋtsɛ ohe akɛ: ‘Te mafee tɛŋŋ matamɔ Yehowa babaoo yɛ enɛ mli hu? Ani mɛi krokomɛi naa mi akɛ mɔ ni anyɛɔ abɛŋkɛɔ lɛ?’ Kɛ oji fɔlɔ lɛ, esa akɛ obii anyɛ abɛŋkɛ bo. Ni kɛji oji asafoŋ onukpa lɛ, eka shi faŋŋ akɛ esa akɛ anyɛ abɛŋkɛ bo. Belɛ mɛni baanyɛ aha ofee mɔ ni anyɛɔ abɛŋkɛɔ lɛ babaoo? Miishɛɛ kɛ henumɔ ni mli kwɔ. Esa akɛ ona mɛi krokomɛi ahe miishɛɛ yɛ anɔkwayeli diɛŋtsɛ fɛɛ mli. Kɛ osusuɔ mɛi krokomɛi ahe diɛŋtsɛ ni oosumɔ ni okɛ ohe aha yɛ amɛhewɔ lɛ, amɛbaanu enɛ he ni amɛbaabɛŋkɛ bo.

 8. (a) Mɛni esa akɛ oha ehi ojwɛŋmɔ mli yɛ be mli ni okaneɔ Biblia mli saji ni kɔɔ Yesu he lɛ? (b) Mɛni wɔkaseɔ yɛ Yehowa he kɛjɛɔ saji ni atsɛ sɛɛ yɛ shishigbɛ niŋmaa lɛ mli lɛ mli?

⁸ No hewɔ lɛ yɛ be mli ni okaneɔ Biblia mli saji ni kɔɔ Yesu he lɛ, ha ahi ojwɛŋmɔ mli akɛ obaanyɛ okase babaoo yɛ Yehowa he akɛ mɔ diɛŋtsɛ kɛjɛ nibii ni Yesu kɛɛ ni efee lɛ mli.a Ni kɛji akɛ hiɛsɔɔ ni oyɔɔ kɛhaa Nyɔŋmɔ sui, taakɛ Yesu jie lɛ kpo lɛ, tsirɛ bo koni obɔ mɔdɛŋ ni otamɔ Lɛ babaoo lɛ, belɛ ooye o-Nyɔŋmɔ jamɔ hetuu-kɛhamɔ lɛ he odase.

Nyɔŋmɔ Jamɔ Hetuu-Kɛhamɔ ni Akɛaatsu Nii yɛ Weku Mlibii Ateŋ

 9, 10. (a) Yɛ mɛɛ gbɛ nɔ Yesu suɔmɔ kɛ bɔ ni esusuɔ enyɛ, Maria he lɛ je kpo beni eshwɛ fioo ni ebaagbo lɛ? (b) Mɛni hewɔ, eka shi faŋŋ akɛ Yesu kɛ Maria nɔkwɛmɔ wo bɔfo Yohane dɛŋ, shi jeee eheloo naa nyɛmimɛi lɛ ateŋ mɔ ko dɛŋ lɛ?

⁹ Yesu Kristo shihilɛ kɛ esɔɔmɔ nitsumɔ lɛ jieɔ babaoo kpo yɛ bɔ ni esa akɛ ajie Nyɔŋmɔ jamɔ hetuu-kɛhamɔ kpo atsɔɔ lɛ mli. Nɔkwɛmɔ nɔ ko ni saa mɔ he waa ji nɔ ni aŋma afɔ shi yɛ Yohane 19:​25-27, he ni wɔkaneɔ yɛ akɛ: “Shi Yesu nyɛ kɛ enyɛmi yoo, Maria, Klopa ŋa lɛ, kɛ Maria Magdalena damɔ Yesu sɛŋmɔtso lɛ masɛi. No hewɔ lɛ, beni Yesu na enyɛ kɛ kaselɔ [Yohane] ni esumɔɔ lɛ lɛ damɔ shi lɛ, ekɛɛ enyɛ akɛ: Awo, obi nɛ! Fee sɛɛ lɛ ekɛɛ kaselɔ lɛ akɛ: Naa, Onyɛ nɛ! Ni kɛjɛ nakai ŋmɛlɛtswaa lɛ nɔ lɛ kaselɔ lɛ ŋɔ lɛ kɛtee lɛ diɛŋtsɛ ewe.”

¹⁰ Susumɔ he okwɛ! Beni eshwɛ bei fioo ni ebaaŋmɛɛ eshikpɔŋ nɔ shihilɛ lɛ he lɛ, Yesu suɔmɔ kɛ bɔ ni esusuɔ mɛi ahe lɛ tsirɛ lɛ koni ekɛ enyɛ, Maria, (ni eka shi faŋŋ akɛ no mli lɛ etsɔ okulafo) lɛ awo bɔfo Yohane ni esumɔɔ lɛ lɛ dɛŋ akɛ ekwɛ enɔ. Shi mɛni hewɔ Yohane, shi jeee Yesu heloo naa nyɛmimɛi lɛ ateŋ mɔ kome? Ejaakɛ jeee Maria gbɔmɔtsoŋ kɛ heloo naa hiamɔ nii pɛ kɛkɛ Yesu susuɔ he, shi moŋ titri lɛ emumɔŋ hilɛ-kɛhamɔ. Ni bɔfo Yohane (ni eka shi faŋŋ akɛ eeefee Yesu nyɛkwɛ bi) lɛ etsɔɔ akɛ eyɛ hemɔkɛyeli, yɛ be mli ni odaseyeli ko bɛ ni tsɔɔ akɛ Yesu heloo naa nyɛmimɛi lɛ etsɔmɔ heyelilɔi yɛ nakai be lɛ mli.​—Mateo 12:​46-50; Yohane 7:⁠5.

11. (a) Taakɛ Paulo tsɔɔ lɛ, te Kristofonyo aaafee tɛŋŋ atsu Nyɔŋmɔ jamɔ hetuu-kɛhamɔ he nii yɛ lɛ diɛŋtsɛ eshia mli? (b) Mɛni hewɔ Kristofonyo anɔkwafo lɛ toɔ gbɛjianɔ kɛhaa efɔlɔi ni amɛdara lɛ?

¹¹ Agbɛnɛ, enɛ ji Nyɔŋmɔ jamɔ hetuu-kɛhamɔ kpojiemɔ yɛ mɛɛ gbɛ nɔ? Bɔfo Paulo tsɔɔ mli akɛ: “Yei okulafoi ni ji okulafoi lɛlɛŋ lɛ, wo amɛ. Shi kɛ yoo okulafo ko yɛ bii loo nabii lɛ, amɛkase Nyɔŋmɔ gbeyeishemɔ [hetuu-kɛhamɔ] yɛ amɛ diɛŋtsɛ amɛwe tsutsu, ni amɛto amɛfɔlɔi lɛ anajiaŋ pɛpɛɛpɛ; ejaakɛ enɛ yɛ fɛo ni eŋɔɔ Nyɔŋmɔ naa.” (1 Timoteo 5:​3, 4) Paulo kɛɔ akɛ, ni mɔ ko kɛ woo aaaha efɔlɔi kɛtsɔ heloo naa yelikɛbuamɔ ni ekɛaaha amɛ yɛ be mli ni ehe ehia lɛ ji Nyɔŋmɔ jamɔ hetuu-kɛhamɔ kpojiemɔ. Yɛ mɛɛ gbɛ nɔ? Yehowa ji weku gbɛjianɔtoo lɛ Shishijelɔ, ni efaa gbekɛbii akɛ amɛkɛ woo aha amɛfɔlɔi. (Efesobii 3:​14, 15; 6:​1-3) No hewɔ lɛ, Kristofonyo anɔkwafo lɛ yɔseɔ akɛ jeee akɛ nɛkɛ weku mli gbɛnaa nii nɛɛ ahe nitsumɔ jieɔ suɔmɔ ni mɔ ko yɔɔ kɛhaa efɔlɔi lɛ kpo kɛkɛ, shi moŋ etsɔɔ woo loo gbeyeishemɔ ni ayɔɔ kɛhaa Nyɔŋmɔ kɛ toiboo kɛha efamɔi.​—Okɛto Kolosebii 3:20 he.

12. Te ooofee tɛŋŋ ojie Nyɔŋmɔ jamɔ hetuu-kɛhamɔ kpo yɛ ofɔlɔi ni amɛdara lɛ ahe, ni mɛni esa akɛ efee oyiŋtoo?

¹² Belɛ te ooofee tɛŋŋ otsu Nyɔŋmɔ jamɔ hetuu-kɛhamɔ he nii yɛ oweku lɛ mlibii lɛ ahe? Nɔ ni enɛ tsɔɔ ji ni oto gbɛjianɔ ni okwɛ ofɔlɔi ni amɛdara lɛ amumɔŋ kɛ heloo naa hiamɔ nii anɔ, taakɛ Yesu fee lɛ. Nakai ni ofeŋ Iɛ baajie Nyɔŋmɔ jamɔ hetuu-kɛhamɔ ni bɛ lɛ kpo. (Okɛto 2 Timoteo 8:​2, 3, 5 he.) Kristofonyo ni ejɔɔ ehe nɔ lɛ kwɛɔ efɔlɔi ni ehia amɛ lɛ anɔ, ni jeee yɛ mlihilɛ loo nitsumɔ ni ka enɔ hewɔ, shi moŋ akɛni esumɔɔ eweku lɛ hewɔ, ni eyɔseɔ bɔ ni Yehowa buɔ gbɛnaa nii ni tamɔ nɛkɛ he nitsumɔ lɛ waa lɛ. No hewɔ lɛ, fɔlɔi ni amɛdara lɛ anɔ ni eeekwɛ lɛ ji Nyɔŋmɔ jamɔ hetuu-kɛhamɔ kpojiemɔ.b

13. Te tsɛ ni ji Kristofonyo lɛ aaafee tɛŋŋ atsu Nyɔŋmɔ jamɔ hetuu-kɛhamɔ he nii yɛ eweku lɛ teŋ?

¹³ Abaanyɛ atsu Nyɔŋmɔ jamɔ hetuu-kɛhamɔ he nii yɛ shia lɛ mli yɛ gbɛi krokomɛi anɔ. Akɛ nɔkwɛmɔ nɔ lɛ, gbɛnaa nii ka Kristofonyo tsɛ lɛ nɔ akɛ ekwɛ eweku lɛ heloo naa, henumɔŋ, kɛ mumɔŋ hiamɔ nii anɔ. No hewɔ lɛ, kɛfata heloo naa nibii ni ekɛhaa amɛ lɛ he lɛ, ejɛɔ suɔmɔ mli etoɔ gbɛjianɔ kɛhaa daa weku Biblia kasemɔ. Etoɔ be he gbɛjianɔ koni ekɛ eweku lɛ ana sɔɔmɔ nitsumɔ lɛ mli gbɛfaŋnɔ daa. Eŋmɛɔ pɛpɛɛpɛ, ni eyɔseɔ bɔ ni hejɔɔmɔ kɛ hiɛtserɛjiemɔ he hiaa amɛ lɛ hu. Ekɛ nibii ni he hiaa yeɔ klɛŋklɛŋ gbɛhe yɛ nilee mli, eŋmɛɛɛ gbɛ koni asafo lɛ mli nitsumɔi aha eku ehiɛ eshwie eweku lɛ nɔ. (1 Timoteo 3:​5, 12) Mɛni hewɔ efeɔ enɛɛmɛi fɛɛ? Jeee yɛ nitsumɔ ni ka enɔ ni enuɔ he nakai lɛ pɛ hewɔ, shi moŋ yɛ suɔmɔ ni eyɔɔ kɛhaa eweku lɛ hewɔ. Eyɔseɔ bɔ ni Yehowa buɔ weku kwɛmɔ akɛ nɔ ko ni he hiaa lɛ. No hewɔ lɛ yɛ be mli ni etsuɔ egbɛnaa nii akɛ wu kɛ tsɛ lɛ he nii lɛ, belɛ eetsu Nyɔŋmɔ jamɔ hetuu-kɛhamɔ he nii.

14. Te Kristofonyo ŋa lɛ aaafee tɛŋŋ ajie Nyɔŋmɔ jamɔ hetuu-kɛhamɔ po yɛ shia?

¹⁴ Gbɛnaa nii hu ka ŋamɛi ni ji Kristofoi anɔ akɛ amɛtsu Nyɔŋmɔ jamɔ hetuu-kɛhamɔ he nii yɛ shia. Yɛ mɛɛ gbɛ nɔ? Biblia lɛ kɛɔ akɛ esa akɛ ŋa lɛ “aba ehe shi” aha ewu ni ekɛ ‘bulɛ ni mli kwɔ’ aha lɛ. (Efesobii 5:​22, 33) Kɛji akɛ wu lɛ jeee heyelilɔ po lɛ, esa akɛ yoo lɛ “aba ehe shi” aha lɛ. (1 Petro 3:⁠1) Kristofonyo yoo lɛ jieɔ nɛkɛ heshibaa akɛ ŋa nɛɛ kpo kɛtsɔɔ ewu lɛ sɛɛ ni efiɔ yɛ eyiŋkpɛi amli bei abɔ ni enɛɛmɛi eteee shi ewooo Nyɔŋmɔ mlai lɛ nɔ. (Bɔfoi lɛ Asaji 5:29) Ni mɛni hewɔ yoo lɛ kpɛlɛɔ nitsumɔ ni tamɔ nɛkɛ nɔ? Jeee akɛ esumɔɔ ewu lɛ kɛkɛ, shi moŋ titri lɛ eyɔseɔ akɛ “no saa Nuŋtsɔ lɛ hiɛ”​—ni ji akɛ, eji Nyɔŋmɔ gbɛjianɔtoo kɛha weku lɛ. (Kolosebii 3:18) No hewɔ lɛ, bɔ ni ejɛɔ esuɔmɔ mli ebaa ehe shi ehaa ewu lɛ bafeɔ e-Nyɔŋmɔ jamɔ hetuu-kɛhamɔ lɛ kpojiemɔ.

“No Hewɔ Miba”

15. Yesu jie Nyɔŋmɔ jamɔ hetuu-kɛhamɔ kpo yɛ gbɛ ni ekaaa nɔ yɛ mɛɛ gbɛ nɔ?

¹⁵ Gbɛi ni ekaaa ni Yesu tsɔ nɔ ejie Nyɔŋmɔ jamɔ hetuu-kɛhamɔ kpo lɛ ekome ji ni ‘ejaje Nyɔŋmɔ Maŋtsɛyeli lɛ he sanekpakpa lɛ.’ (Luka 4:43) Beni abaptisi lɛ yɛ Yordan Faa lɛ mli yɛ afi 29 Ŋ.B. sɛɛ lɛ, Yesu kɛ afii etɛ kɛ fa ni nyiɛ sɛɛ lɛ wo nɛkɛ nitsumɔ ni he hiaa fe fɛɛ nɛɛ mli. Etsɔɔ mli akɛ: “No hewɔ miba.” (Marko 1:​38; Yohane 18:37) Shi enɛ ji e-Nyɔŋmɔ jamɔ hetuu-kɛhamɔ lɛ kpojiemɔ yɛ mɛɛ gbɛ nɔ?

16, 17. (a) Mɛni kanya Yesu koni ekɛ ehe awo shiɛmɔ kɛ nitsɔɔmɔ mli waa lɛ? (b) Mɛni hewɔ Yesu sɔɔmɔ nitsumɔ ni ji shiɛmɔ kɛ nitsɔɔmɔ lɛ ji e-Nyɔŋmɔ jamɔ hetuu-kɛhamɔ lɛ kpojiemɔ lɛ?

¹⁶ Kaimɔ akɛ Nyɔŋmɔ jamɔ hetuu-kɛhamɔ kɔɔ shihilɛ yɛ gbɛ ni aaasa Nyɔŋmɔ hiɛ lɛ he ejaakɛ osumɔɔ lɛ ni ohiɛ sɔɔ esui kpakpai ni yɔɔ fɛo lɛ jogbaŋŋ. Belɛ mɛni ji nɔ ni kanya Yesu koni ekɛ enaagbee afii ni eye yɛ shikpɔŋ nɛɛ nɔ lɛ awo shiɛmɔ kɛ nitsɔɔmɔ mli waa nɛkɛ? Ani eji nitsumɔ loo gbɛnaa nii ko henumɔ kɛkɛ? Ŋwanejee ko bɛ he akɛ esusuɔ gbɔmɛi ahe. (Mateo 9:​35, 36) Ni eyɔse jogbaŋŋ akɛ mumɔ krɔŋkrɔŋ ni akɛfɔ lɛ mu lɛ hala lɛ ni ekɛ nitsumɔ wo edɛŋ koni etsu esɔɔmɔ lɛ he nii. (Luka 4:​16-21) Ni kɛlɛ, eyiŋtoi loo kanyamɔi lɛ yaa shɔŋŋ fe nakai.

¹⁷ Yesu kɛɛ ebɔfoi lɛ yɛ eshikpɔŋ nɔ shihilɛ lɛ naagbee gbɛkɛ lɛ akɛ: “Miisumɔ Tsɛ lɛ.” (Yohane 14:31) Nakai suɔmɔ lɛ damɔ Yehowa sui diɛŋtsɛ lɛ ahe nilee ni mli kwɔ nɔ. (Luka 10:22) Akɛni tsui ni eyi kɛ hiɛsɔɔ ni mli kwɔ tsirɛɔ lɛ hewɔ lɛ, Yesu nya Nyɔŋmɔ suɔmɔnaa nifeemɔ he. (Lala 40:⁠9) Eji “ŋmaa” kɛha lɛ​—nɔ ko ni he hiaa kɛha wala, nɔ ko ni ŋɔɔ enaa. (Yohane 4:34) Eto okadi ni yeɔ emuu yɛ ‘maŋtsɛyeli taomɔ klɛŋklɛŋ’ mli, moŋ fe ni akɛ he aaaye klɛŋklɛŋ gbɛhe. (Mateo 6:33) No hewɔ lɛ ejeee nɔ ni efee loo abɔ ni efee shi moŋ nɔ hewɔ ni efee enɛ lɛ ji nɔ ni ha eshiɛmɔ kɛ nitsɔɔmɔ sɔɔmɔ lɛ fee Nyɔŋmɔ jamɔ hetuu-kɛhamɔ kpojiemɔ lɛ.

18. Mɛni hewɔ sɔɔmɔ nitsumɔ lɛ mli gbɛfaŋnɔ ko kɛkɛ ni aaana lɛ etsɔɔɔ Nyɔŋmɔ jamɔ hetuu-kɛhamɔ kpojiemɔ diɛŋtsɛ lɛ?

¹⁸ Te wɔbaafee tɛŋŋ wɔnyiɛ “okadi” ni ji Yesu, nɔkwɛmɔ nɔ lɛ sɛɛ yɛ enɛ mli? (1 Petro 2:21) Mɔ fɛɛ mɔ ni boɔ Yesu ninefɔɔ akɛ “oba ni obanyiɛ misɛɛ” lɛ toi lɛ bafeɔ mɔ ni ŋwɛi nitsumɔ bakaa enɔ akɛ eshiɛ Maŋtsɛyeli lɛ he sanekpakpa lɛ ni efee kaselɔi. (Luka 18:​22; Mateo 24:​14; 28:​19, 20) Ani enɛ tsɔɔ akɛ kɛ wɔna sanekpakpa lɛ jajemɔ mli gbɛfaŋnɔ ko lɛ, belɛ wɔmiidi Nyɔŋmɔ jamɔ hetuu-kɛhamɔ sɛɛ? Jeee nakai etsɔɔ. Kɛ wɔkɛ wɔhe wo sɔɔmɔ nitsumɔ lɛ mli jabejabe ko aloo wɔkɛ be fioo ko pɛ tsu enɛ lɛ, aloo koni wɔkɛsa wɔweku mlibii loo mɛi krokomɛi ahiɛ kɛkɛ lɛ, anyɛŋ abu enɛ akɛ ‘Nyɔŋmɔ jamɔ hetuu-kɛhamɔ nifeemɔ’ kwraa.​—2 Petro 3:⁠11.

19. (a) Mɛni esa akɛ efee yiŋtoo titri hewɔ ni wɔkɛ wɔhe,woɔ sɔɔmɔ nitsumɔ lɛ mli? (b) Mɛni baa yɛ be mli ni suɔmɔ ni mli kwɔ ni wɔyɔɔ kɛha Nyɔŋmɔ lɛ kanyaa wɔ lɛ?

¹⁹ Taakɛ Yesu ji lɛ, esa akɛ wɔkanyamɔi lɛ aya shɔŋŋ. Yesu kɛɛ: “Ni suɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ [kanyamɔi, akɔnɔi, kɛ mligbɛ gbɔmɔ lɛ henumɔi] kɛ osusuma fɛɛ [oshihilɛ kɛ wala fɛɛ] kɛ ojwɛŋmɔ fɛɛ [onilee fɛɛ] kɛ onyɛmɔ fɛɛ.” Kɛkɛ ni woloŋmalɔ ko ni kɔɔ sane sɛɛ kɛfata he akɛ: “Efe shaa afɔlei kɛ afɔlei fɛɛ.” (Marko 12:​30, 33, 34) No hewɔ lɛ jeee nɔ ni wɔfeɔ lɛ pɛ ji sane lɛ shi moŋ nɔ hewɔ ni wɔfeɔ nakai lɛ hu. Esa akɛ suɔmɔ kɛha Nyɔŋmɔ ni mli kwɔ diɛŋtsɛ ni kɔɔ wɔshihilɛ mli nibii fɛɛ kwa he lɛ afee yiŋtoo titri kɛha nɔ ni wɔfeɔ yɛ sɔɔmɔ nitsumɔ lɛ mli lɛ. Kɛ nɛkɛ sane lɛ ji lɛ, wɔtsui enyɔŋ wɔmli kɛ nɔ ko fioo ko kɛkɛ ni wɔkɛaaha yɛ sɔɔmɔ lɛ mli, shi moŋ nɔ ko baakanya wɔ ni wɔjie bɔ ni wɔ-Nyɔŋmɔ jamɔ hetuu-kɛhamɔ lɛ mli kwɔ ha lɛ kpo kɛtsɔ nɔ ni fe fɛɛ ni wɔɔfee lɛ nɔ. (2 Timoteo 2:15) Yɛ nakai beaŋ nɔŋŋ lɛ, kɛ nɔ ni kanyaa wɔ ji suɔmɔ kɛha Nyɔŋmɔ lɛ, wɔfeŋ keketee ni wɔwieŋ wɔshiŋ mɛi krokomɛi, ni wɔkɛ wɔ sɔɔmɔ nitsumɔ lɛ miito mɛi krokomɛi anɔ he.​—Galatabii 6:⁠4.

20. Te wɔɔfee tɛŋŋ ni Yesu nɔkwɛmɔ nɔ yɛ Nyɔŋmɔ jamɔ hetuu-kɛhamɔ sɛɛdii mli lɛ he aba sɛɛnamɔ yɛ gbɛ ni mɔɔ shi nɔ aha wɔ?

²⁰ Kwɛ bɔ ni wɔbaanyɛ wɔda shi akɛ Yehowa ejie Nyɔŋmɔ jamɔ hetuu-kɛhamɔ he teemɔŋ sane lɛ kpo etsɔɔ wɔ! Kɛ wɔkase nibii ni Yesu kɛɛ ni efee lɛ jogbaŋŋ ni wɔbɔ mɔdɛŋ wɔkase lɛ lɛ, ebaaye ebua wɔ ni wɔna Nyɔŋmɔ jamɔ hetuu-kɛhamɔ ni wɔjie lɛ kpo babaoo wɔtsɔɔ. Yehowa baajɔɔ wɔ babaoo hu yɛ be mli ni wɔnyiɛɔ Yesu nɔkwɛmɔ nɔ lɛ sɛɛ yɛ Nyɔŋmɔ jamɔ hetuu-kɛhamɔ mli akɛ Kristofoi ni amɛjɔɔ amɛhe nɔ ni abaptisi amɛ lɛ.​—1 Timoteo 4:​7, 8.

[Shishigbɛ niŋmai]

Ani Okaiɔ?

◻ Mɛni hewɔ esa akɛ wɔsusu Yesu nɔkwɛmɔ nɔ Iɛ he yɛ Nyɔŋmɔ jamɔ hetuu-kɛhamɔ sɛɛdii mli Iɛ?

◻ Mɛni wɔkaseɔ yɛ Yehowa he kɛjɛɔ miishɛɛ kɛ henumɔ ni mli kwɔ ni Yesu fee he nɔkwɛmɔ nɔ lɛ mli?

◻ Te wɔɔfee tɛŋŋ wɔjie Nyɔŋmɔ jamɔ hetuu-kɛhamɔ kpo yɛ weku lɛ mlibii lɛ ahe?

◻ Mɛni esa akɛ efee wɔyiŋtoo loo kanyamɔ bɔni afee ni wɔ sɔɔmɔ nitsumɔ Iɛ afee Nyɔŋmɔ jamɔ hetuu-kɛhamɔ kpojiemɔ?

[Mfoniri ni yɔɔ baafa 11]

Gbɛnaa nii ka Kristofonyo tsɛ Iɛ nɔ akɛ ekwɛ eweku Iɛ heloo naa, henumɔ, kɛ mumɔŋ hiamɔ nii anɔ

[Piture on page 13]

“Shi kɛ yoo okulafo ko yɛ bii loo nabii lɛ, . . . amɛto amɛfɔlɔi lɛ anajiaŋ pɛpɛɛpɛ.”