NIKASEMƆ 35
Bɔ Ni Wɔbaafee Wɔkpɛ Yiŋ Kpakpai
Wɔteŋ mɔ fɛɛ mɔ yɛ yiŋ komɛi ni esa akɛ ekpɛ. Bɔ ni wɔbaakpɛ yiŋ srɔtoi nɛɛ wɔhã lɛ baanyɛ awa wɔ loo ewaŋ wɔ, ni ebaanyɛ esa naanyobɔɔ ni yɔɔ wɔ kɛ Yehowa teŋ lɛ hu he. Akɛ nɔkwɛmɔnɔ lɛ, ekolɛ ebaabi ni wɔkpɛ wɔyiŋ yɛ he ni wɔbaahi, nɔ ni wɔbaafee kɛkwɛ wɔhe, loo kɛji wɔbote gbãla mli loo wɔkabote mli lɛ he. Kɛ́ wɔkpɛ yiŋ kpakpai lɛ, wɔbaaná miishɛɛ ni Yehowa hu baaná wɔhe miishɛɛ.
1. Mɛɛ gbɛ nɔ Biblia lɛ baanyɛ awa bo ni okpɛ yiŋ kpakpai?
Dani obaakpɛ yiŋ ko lɛ, sɔlemɔ obi Yehowa ni ewa bo, ní no sɛɛ lɛ otao bɔ ni enaa sane lɛ ehãa lɛ, yɛ Biblia lɛ mli. (Kanemɔ Abɛi 2:3-6.) Saji lɛ ekomɛi yɛ ni Yehowa ewo mla ni yɔɔ faŋŋ yɛ he. Kɛ́ nakai ni lɛ, nɔ ni hi fe fɛɛ ni obaanyɛ ofee ji, ni oye mla lɛ nɔ.
Ni kɛ́ Biblia lɛ woko mla ni yɔɔ faŋŋ yɛ sane lɛ he hu? Loloolo lɛ, Yehowa baatsɔɔ bo gbɛ “yɛ gbɛ ni esa akɛ onyiɛ nɔ lɛ nɔ.” (Yesaia 48:17) Yɛ mɛɛ gbɛ nɔ? Shishitoo mlai loo ŋaawoi komɛi yɛ ni baanyɛ awa bo. Biblia mli shishitoo mlai loo ŋaawoi ji anɔkwa saji komɛi ni hãa wɔleɔ Nyɔŋmɔ susumɔi loo bɔ ni enuɔ he ehãa yɛ saji ahe. Bei pii lɛ, kɛ́ wɔkane sane ko yɛ Biblia lɛ mli lɛ ehãa wɔnaa bɔ ni Nyɔŋmɔ nuɔ he ehãa yɛ nɔ ko he. Kɛ́ wɔna bɔ ni Yehowa nuɔ he ehãa lɛ, no baahã wɔkpɛ yiŋ ni baasa ehiɛ.
2. Mɛni he esa akɛ osusu dani okpɛ yiŋ ko?
Biblia lɛ kɛɛ: “Hiɛtɛ̃lɔ kwɛɔ enajifaamɔi jogbaŋŋ.” (Abɛi 14:15) Enɛ tsɔɔ akɛ, esa akɛ osusu yiŋ srɔtoisrɔtoi ni obaanyɛ okpɛ yɛ sane ko he lɛ he, dani okɔ amɛmli ekome. Be ni osusuɔ yiŋ srɔtoi ni obaanyɛ okpɛ lɛ eko fɛɛ eko he lɛ, bi ohe akɛ: ‘Mɛɛ ŋaa Biblia lɛ ewo yɛ sane lɛ he? Ani yiŋkpɛɛ nɛɛ baahã mitoiŋ ajɔ mi? Te ebaasa mɛi krokomɛi ahe ehã tɛŋŋ? Nɔ ni he hiaa fe fɛɛ lɛ, ani ebaahã Yehowa aná miishɛɛ?’—5 Mose 32:29.
Yehowa yɛ hegbɛ ni etsɔɔ wɔ nɔ ni hi kɛ nɔ ni ehiii. Kɛ́ wɔná wɔle emlai kɛ eshishitoo mlai lɛ jogbaŋŋ ni wɔtswa wɔfai shi akɛ wɔkɛbaatsu nii lɛ, belɛ wɔmiitsɔse wɔhenilee lɛ ji no. Henilee ji henumɔ ko ni hãa wɔnaa nɔ ni ji ekpakpa kɛ nɔ ni ji efɔŋ. (Romabii 2:14, 15) Kɛ́ wɔtsɔse wɔhenilee lɛ ebaahã wɔkpɛ yiŋ kpakpai.
KASEMƆ PII OFATA HE
Obaana bɔ ni Biblia mli shishitoo mlai kɛ wɔhenilee lɛ waa wɔ koni wɔkpɛ yiŋ.
3. Hã Biblia lɛ atsɔɔ bo gbɛ
Kɛ́ wɔmiikpɛ yiŋ ko lɛ, mɛɛ gbɛ nɔ Biblia mli shishitoo mlai baanyɛ awa wɔ? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
Mɛni ji heyeli?
Mɛni hewɔ Yehowa eŋmɛ wɔ gbɛ ni wɔkpɛ yiŋ wɔhã wɔhe?
Mɛni ekɛhã wɔ ni baawa wɔ ni wɔkpɛ yiŋ kpakpai?
Nyɛkanea Efesobii 5:15, 16 lɛ, ni obaana Biblia mli shishitoo mla ko yɛ jɛmɛ. No sɛɛ lɛ, nyɛkwɛa bɔ ni wɔbaafee ‘wɔkɛ wɔbe atsu nii jogbaŋŋ’ koni . . .
wɔkane Biblia lɛ daa gbi.
wɔtsɔ wu, ŋa, fɔlɔ, binuu, loo biyoo kpakpa.
wɔya asafoŋ kpeei daa.
4. Tsɔsemɔ ohenilee lɛ koni okpɛ yiŋ kpakpai
Kɛ́ Biblia lɛ ewo mla ni yɔɔ faŋŋ yɛ sane ko he lɛ, ewaaa akɛ wɔbaakpɛ yiŋ kpakpa yɛ he. Shi kɛ́ awoko mla yɛ sane lɛ he hu? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
Mɛɛ nibii komɛi nyɛmi yoo lɛ fee kɛtsɔse ehenilee koni ekpɛ yiŋ ni baasa Yehowa hiɛ?
Mɛni hewɔ esaaa akɛ wɔbiɔ mɛi ni amɛkpɛ yiŋ ni esa akɛ wɔ wɔkpɛ lɛ amɛhã wɔ lɛ? Nyɛkanea Hebribii 5:14 lɛ, ni nyɛsusua sanebimɔi nɛɛ ahe:
Etamɔ nɔ ni kɛ́ wɔhã mɛi kpɛ yiŋ amɛhã wɔ lɛ, wɔhe baajɔ wɔ moŋ, shi mɛni kɛ mɛni esa akɛ wɔle mlikpamɔ?
Mɛni baawa bo ni otsɔse ohenilee lɛ koni onyɛ okpɛ yiŋ kpakpai?
Wɔhenilee lɛ tamɔ map, ebaanyɛ etsɔɔ wɔ gbɛ ni esa akɛ wɔkɔ yɛ shihilɛ mli
5. Susumɔ mɛi krokomɛi ahenilee he
Jeee be fɛɛ be wɔ fɛɛ wɔbaakpɛ yiŋ kome too yɛ sane ko he. Mɛni kɛ́ wɔfee lɛ, no baatsɔɔ akɛ wɔsusuɔ mɛi krokomɛi ahenilee he? Susumɔ saji enyɔ nɛɛ ahe okwɛ:
Sane 1: Nyɛmi yoo ko ni sumɔɔ makeup feemɔ lɛ fã kɛtee asafo kroko mli. Shi egbaa nyɛmimɛi yei ni yɔɔ jɛmɛ lɛ ateŋ mɛi pii anaa kɛ́ amɛna ni mɔ ko efee makeup.
Nyɛkanea Romabii 15:1 kɛ 1 Korintobii 10:23, 24 lɛ, ni nyɛsusua sanebimɔi nɛɛ ahe:
Yɛ ŋmalɛi nɛɛ anaa lɛ, mɛni nakai nyɛmi yoo lɛ baanyɛ akpɛ eyiŋ akɛ ebaafee? Kɛ́ ohenilee ŋmɛɔ bo gbɛ ni ofee nɔ ko, ni oyɛ mɔ ko ni henilee eŋmɛɛɛ lɛ gbɛ ni efee nakai nii lɛ masɛi lɛ, mɛni obaafee?
Sane 2: Nyɛmi nuu ko le akɛ Biblia lɛ ewieee eshiii daanumɔ, shi ehala akɛ enuŋ dãa kwraa. Afɔ̃ lɛ nine kɛtee he ko, ni ena ni nyɛmimɛi lɛ miinu dãa.
Nyɛkanea Jajelɔ 7:16 kɛ Romabii 14:1, 10 lɛ, ni nyɛsusua sanebimɔi nɛɛ ahe:
Yɛ ŋmalɛi nɛɛ anaa lɛ, mɛɛ yiŋ nyɛmi nuu lɛ baanyɛ akpɛ? Kɛ́ ona mɔ ko miifee nɔ ko ni ohenilee eŋmɛɛɛ bo gbɛ akɛ ofee lɛ, mɛni obaafee?
Mɛɛ nibii kɛ́ ofee lɛ obaanyɛ okpɛ yiŋ kpakpai?
1. Sɔlemɔ obi Yehowa ni ewa bo ni ona nɔ ni esa akɛ ofee.—Yakobo 1:5.
2. Taomɔ nii amli yɛ Biblia lɛ kɛ asafo lɛ woji kɛ nibii amli koni ona ŋaawoi ni kɔɔ sane lɛ he. Obaanyɛ okɛ nyɛmimɛi ni yɔɔ niiashikpamɔ lɛ hu asusu he.
3. Susumɔ nɔ ni baajɛ mli aba lɛ he—bɔ ni yiŋ ni otaoɔ okpɛ lɛ baasa ohenilee kɛ mɛi krokomɛi ahenilee he.
MƐI KOMƐI KƐƆ AKƐ: “Oyɛ hegbɛ ni ofeɔ nɔ fɛɛ nɔ ni osumɔɔ. Nɔ ni mɛi krokomɛi susuɔ lɛ he ehiaaa?”
Mɛni hewɔ esa akɛ wɔsusu bɔ ni Nyɔŋmɔ kɛ mɛi krokomɛi baanu he ahã lɛ he lɛ?
EMLI OTI
Kɛ́ wɔsusu bɔ ni Yehowa nuɔ he ehãa yɛ sane ko he, kɛ bɔ ni wɔnifeemɔi baanyɛ asa mɛi krokomɛi ahe ehã lɛ he lɛ, wɔbaakpɛ yiŋ kpakpai.
Mɛni Okase?
Mɛni baawa bo ni okpɛ yiŋ ni baasa Yehowa hiɛ?
Te ooofee tɛŋŋ otsɔse ohenilee lɛ?
Mɛni kɛ́ ofee lɛ no baatsɔɔ akɛ osusuɔ mɛi krokomɛi ahenilee he?
EHE SAJI KROKOMƐI
Mɛni baawa bo ni okpɛ yiŋ ni baahã naanyobɔɔ ni yɔɔ okɛ Nyɔŋmɔ teŋ lɛ mli awa?
Obaana gbɛi komɛi ni Yehowa tsɔɔ nɔ ewoɔ wɔ ŋaa.
Obaana otii komɛi ni wa nuu ko ni enyɛ ekpɛ yiŋ ko ni wa.
Obaana bɔ ni obaafee osa Yehowa hiɛ kɛ́ ewoko mla ni yɔɔ faŋŋ yɛ sane ko he lɛ he saji krokomɛi.
“Ani Biblia Mli Mla He Miihia Bo Be Fɛɛ Be?” (Buu-Mɔɔ, December 1, 2003)