Esoro Bo Yɛ Je Lɛ He Yɛ Mɛɛ Gbɛ Nɔ?
“Nyɔŋmɔ jamɔ ni he tse ni ehe bɛ muji ko yɛ Nyɔŋmɔ kɛ Tsɛ Iɛ hiɛ ji enɛ, . . . ni eto ehe kɛjɛ je lɛŋ koni ekawo ehe muji.”—Yakobo 1:27.
1, 2. Namɔ kɛɛ ekɛ Kristofoi baafee gbɔmɛi sɔrɔto yɛ je lɛ he lɛ? Mɛni hewɔ esa akɛ Yehowa Odasefoi akpa gbɛ ekɛ amɛbaafee gbɔmɛi sɔrɔto yɛ je lɛ mli?
1 YESU ji klɛŋklɛŋ mɔ ni kɛɛ akɛ esaaa akɛ Kristofoi feɔ je lɛ fa. (Yohane 15:19) Ni beni esɔleɔ ehaa e-Tsɛ yɛ gbɛkɛ ni enɔ je tsɛremɔ egbo lɛ, anu ni eekɛɛ: “Miŋɔ owiemɔ lɛ miha amɛ ni je lɛ miinyɛ amɛ ejaakɛ amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” Kɛkɛ ni no sɛɛ nɔŋŋ ni eti mli ekoŋŋ akɛ: “Amɛjɛɛɛ je Iɛ mli, taakɛ bɔ ni mi hu mijɛɛɛ je lɛ mli lɛ.”—Yohane 17:14, 16.
2 Kristendom jamɔi pii ebɔɔɔ mɔdɛŋ ko kwraa akɛ amɛbaaha nɛkɛ wiemɔi nɛɛ aba mli. Shi Yehowa Odasefoi wieɔ akɛ Kristofoi ni yɔɔ ŋmɛnɛ lɛ bɛ nɔ ni amɛbaahala akɛ ja amɛhi shi akɛ mɛi ni etse amɛhe kɛjɛ je lɛ he. Amɛle akɛ Satan ji je nɛɛ nɔ lumɔ. (Yohane 14:30; 1 Yohane 5:19) Ní mɔ ko aaafee je lɛ fa lɛ tsɔɔ akɛ ebaahɔ Satan hewalɛ shishi Yakobo bɔ kɔkɔ akɛ: “Mɔ fɛɛ mɔ ni sumɔɔ akɛ etsɔ je nɛɛ hedɔlɔ lɛ etsɔ Nyɔŋmɔ henyɛlɔ.” (Yakobo 4:4) No hewɔ lɛ, esa akɛ wɔkpa gbɛ akɛ wɔbaafee sɔrɔto.
3. Mɛɛ nibii nɛkɛ haa Yehowa Odasefoi feɔ sɔrɔto yɛ mɛi ni ebɔle amɛhe lɛ ehe lɛ?
3 Shi esoro Yehowa Odasefoi yɛ mɛɛ gbɛ nɔ? Yesu kɛɛ akɛ Kristofoi ehiŋ je Iɛ yɛ gbɔmɔtsoŋ. (Yohane 17:15) Ni eji anɔkwale akɛ Yehowa Odasefoi hiɔ shi yɛ ekutsei amli, ni amɛteŋ mɛi pii hiɔ shi akɛ mɛi ni boteɔ gbalashihilɛ mli ni amɛfɔɔ bii ni amɛnaa wekui tamɔ bɔ ni mɛi krokomɛi hu feɔ lɛ. Esa akɛ amɛhu amɛtao nitsumɔ, amɛdamɔ nibii ajara ni waa lɛ anaa, amɛwo too. Ni kɛlɛ, amɛyɛ sɔrɔto. Amerika adafitswaa wolo ko mli jamɔ he niŋmalɔ ko ŋma yɛ amɛhe ni etsɔɔ nɔ hewɔ ni esusuɔ akɛ nakai amɛji lɛ mli yɛ nɛkɛ gbɛ nɔ. Ekɛɛ akɛ: “Nɔ ni haa esoroɔ Odasefoi kwraa yɛ mɛi ni wieɔ shiɔ amɛ lɛ ahe, ji akɛ ekolɛ amɛshihilɛ fɛɛ—bɔ ni amɛtsuɔ amɛŋmlɛtswaai ahe nii kɛ mɛi ahe nii ni amɛkɛtsuɔ—lɛ ji nɔ ko ni ebɔle amɛhemɔkɛyelii ahe.” Nakai pɛpɛɛpɛ eji! Yehowa Odasefoi ejɔɔ amɛhe nɔ kwraa amɛha Yehowa Nyɔŋmɔ. Amɛheɔ eshiwooi ni yɔɔ Biblia lɛ mli lɛ amɛyeɔ, ni amɛkɛ hiɛdɔɔ tsuɔ Nyɔŋmɔ kitai ni ekɛha amɛ lɛ fɛɛ he nii. (1 Yohane 5:3) Enɛ feɔ amɛ sɔrɔto.
4. Mɛni nibii nɛkɛ haa je lɛ he ni atsiɔ he kɛjɛɔ lɛ feɔ nɔ ni sa lɛ? No hewɔ lɛ, mɛni esa akɛ wɔ fɛɛ wɔfee yɛ be kɛ bei amli?
4 Shi, nɛkɛ amɛhe ni amɛtse nɛɛ jeee nɔ ni mɛi sumɔɔ aloo nɔ ni yɔɔ mlɛo. Nɔnyɛɛ akɛ mɛi afee nɔ ni mɛi krokomɛi feɔ lɛ mli wa yɛ wɔ daagbi shihilɛi amli. Wɔteŋ mɛi nii yɛ henumɔ ko akɛ wɔkafee mɛi ni yɔɔ sɔrɔto tsɔ yɛ mɛi krokomɛi ahe. Kɛ saji ni kɔɔ he ni akɛwooo maŋ saji amli miite shi lɛ, ebiɔ hekɛnɔfɔɔ ni mli wa dani mɔ afee mɔ ni yɔɔ sɔrɔto ni boɔ Yehowa famɔi atoi. (Bɔfoi lɛ Asaji 5:29; 15: 28, 29) No hewɔ lɛ, eji nilee gbɛ akɛ mɔ aŋkro fɛɛ aŋkro aaapɛi lɛ diɛŋtsɛ eshihilɛ mli ekwɛ yɛ be kɛ bei amli koni ekwɛ bɔ ni eshidaamɔ yɔɔ yɛ sane ni kɔɔ je lɛ he ni aaatsi he kɛjɛ he lɛ mli.—2 Korintobii 13:5.
Ekãa Yɛ Sɔɔmɔ Nitsumɔ Lɛ Mli
5. (a.) Mɛni ji nɔ ni mɛi komɛi ni jeee Odasefoi lɛ kɛɔ yɛ ekãa ni Yehowa Odasefoi kɛtsuɔ shiɛmɔ nitsumɔ lɛ he nii lɛ he? (b) Mɛni ji Biblia mli shishitoo mlai komɛi ni tsirɛɔ Odasefoi lɛ ni amɛkɛ ekaa tsuɔ nii yɛ nɛkɛ nitsumɔ nɛɛ mli lɛ?
5 Akɛ nɔkwɛmɔ nɔ lɛ, ale Yehowa Odasefoi jogbaŋŋ yɛ ekãa ni amɛyɔɔ yɛ amɛshiɛmɔ mli lɛ hewɔ. Enɛ feɔ amɛ sɔrɔto lɛlɛŋ. Mɛi komɛi jieɔ amɛyi yɛ enɛ hewɔ. Ni mɛi krokomɛi hu mli fuɔ yɛ enɛ hu hewɔ. Maŋsɛɛ Sanekpakpa shiɛlɔi ni jɛ sanekpakpa shiɛmɔ gbɛjianɔtoo ko mli bɔ amaniɛ akɛ he fɛɛ he ni amɛaaya yɛ je lɛ mli lɛ mɛi ni amɛkɛkpeɔ ji maŋ bii ni kɛ ekãa miishiɛ akɛ Yehowa Odasefoi! Amɛwoji lɛ ekome kɛɛ akɛ, “Okɛ Maŋsɛɛ sanekpakpa shiɛlɔ ko awie kakadaŋŋ yɛ he fɛɛ he yɛ je lɛ mli yɛ shihilɛi ni yɔɔ maŋ ni eyɔɔ mli lɛ he, ni obaanu ni aatsi Yehowa Odasefoi ata.” Mɛni hewɔ Odasefoi lɛ yɔɔ ekaa babaoo yɛ nitsumɔ nɛɛ mli lɛ? Hetoo lɛ ji akɛ sanekpakpa lɛ shiɛmɔ ji Nyɔŋmɔ suɔmɔnaanii kɛ anɔkwale Kristofonyo kadimɔnii. (Mateo 28:19, 20; Efesobii 6:14, 15; Kpojiemɔ 22:17) Ŋmɛnɛ, nɛkɛ Yehowa Odasefoi ashiɛmɔ nɛɛ ji anɔkwale ni amɛyeɔ Nyɔŋmɔ Maŋtsɛyeli lɛ kɛ bɔ ni amɛsumɔɔ akɛ amɛaaaye amɛbua mɛi krokomɛi ni amɛja Yehowa Iɛ he nɔkwɛmɔ nɔ yɛ maŋ fɛɛ hiɛ—Yesaia 2:2-4; Mateo 24:14.
6. Mɛni ji sanebimɔi komɛi ni esa akɛ wɔbi wɔ diɛŋtsɛ wɔhe koni wɔkɛpɛi bɔ ni wɔnuɔ Maŋtsɛyeli lɛ he sanekpakpa lɛ shiɛmɔ nitsumɔ lɛ he wɔhaa lɛ mli?
6 Te shiɛmɔ nitsumɔ lɛ he hiaa ha bo tɛŋŋ? Yɛ je lɛ mli lɛ, mɛi pii ji mɛi ni nuɔ he akɛ ni aaatsu nii ni ana nɔ ko aye, aloo hiɛtserɛjiemɔ po he hiaa fe jamɔ mli nifeemɔi (2 Timoteo 3:4; 1 Yohane 2:16) Shi, Paulo ŋma Timoteo akɛ: “Ohiɛ ahi ohe nɔ kɛ tsɔɔmɔ lɛ nɔ, hii shi yɛ nii nɛɛ amli, ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.” (1 Timoteo 4:16) Ani ohiɛ jwɛŋmɔ ni tamɔ nɛkɛ? Agbɛnɛ hu ani okaiɔ bɔfo Petro kɔkɔbɔɔ lɛ akɛ esa akɛ ‘oha bɔni Yehowa gbi Iɛ baa lɛ ahi ojwɛŋmɔ mli’ lɛ? (2 Petro 3:12) Kɛji nakai ni lɛ, belɛ ole akɛ Maŋtsɛyeli lɛ he sanekpakpa shiɛmɔ ji sane ni he hiaa. Enɛ baatsirɛ bo ni ofee nii yɛ gbɛi ni baaha efee mɛi ni jeee Odasefoi lɛ naakpɛɛ nɔ.
7. Mɛni mɛi komɛi efee yɛ shiɛmɔ nitsumɔ lɛ he? Mɛni hewɔ?
7 Akɛ nɔkwɛmɔ nɔ lɛ, John, skul tsɔɔlɔ ko ni yɔɔ Ghana, kɛ hiɛdɔɔ susu Ŋmalɛi lɛ ahe. No hewɔ lɛ, ekpa enitsumɔ lɛ bɔni afee ni ekɛ be babaoo agba Maŋtsɛyeli lɛ he sane etsɔɔ ekutseiaŋbii. Brian, gbekɛnuu ni ji Ŋleshinyo, kɛ hegbɛ ni ena akɛ eeeya University lɛ sha afɔle koni etsɔ bee fɛɛ shiɛlɔ; Eve, Amerika obalayoo fioo ko shi kɔlegi yɛ be mli ni eye be fioo ko yɛ jɛmɛ kɛha nɛkɛ yiŋtoo nɛɛ nɔŋŋ. Ani nɛkɛ obalaŋtai nɛɛ leee gbɛjianɔtoo loo amɛbɛ jwɛŋmɔ? Yɛ anɔkwale mli lɛ, kɛha mɔ fɛɛ mɔ ni kɛ hiɛdɔɔ susuɔ Biblia lɛ he lɛ, jwɛŋmɔ kɛ shishinumɔ yɛ nɔ ni amɛfee lɛ mli. Ejeee nɔ ni kɛ amɛwɔsɛɛ be woɔ oshara mli kwraa, shi amɛmiiye kɛmiibua ni efi shi shiŋŋ moŋ. Taakɛ Paulo wie lɛ, nitsumɔ ni amɛhala lɛ tsɔɔ yiwalaheremɔ, ‘kɛha amɛ kɛ mɛi ni boɔ amɛtoi lɛ.’—1 Timoteo 4:16.
Jeŋba Ko Ni Yɔɔ Sɔrɔto
8. Mɛɛ Biblia Shishitoo mla ni yɔɔ Hebribii 1:9 hu yeɔ buaa ni efeɔ Yehowa Odasefoi sɔrɔto?
8 Naa shishitoo mla kroko ni haa Kristofoi feɔ sɔrɔto yɛ je lɛ he: “Osumɔɔ jalɛ ni onyɛɔ efɔŋfeemɔ.” (Hebribii 1:9) Kɛ wɔsusu emli wiemɔi lɛ ahe lɛ, Yesu Kristo he awieɔ nɛɛ, shi Yehowa Odasefoi le akɛ amɛkɛ tɛi ni afɔlɔ ashwie shi hu haa Kristofoi (1 Petro 2:21) Esa akɛ wɔsumɔ nɔ ni Nyɔŋmɔ kɛɔ akɛ eja lɛ ni wɔnyɛ nɔ ni Nyɔŋmɔ kɛɔ akɛ eji efɔŋ lɛ.
9. (a) Mɛɛ mlakwamɔ nifeemɔi komɛi yɔɔ? (b) Ni mɛɛ gbɛ nɔ su ni Kristofoi asafo lɛ hiɛ yɛ mlakwamɔ nifeemɔi ahe lɛ yɔɔ sɔrɔto yɛ je lɛ nɔ̃ he?
9 Bɔfo Paulo tsɔɔ mlakwamɔ nifeemɔi komɛi ni yɔɔ nɛkɛ wiemɔi nɛɛ amli akɛ: “Ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii loo julɔi loo hiɛjoolɔi loo daatɔlɔi loo mɛi ajɛlɔi loo amimyelɔi anine shɛŋ Nyɔŋmɔ maŋtsɛyeli lɛ nɔ kwraa.” (1 Korintobii 6:9-10) Ŋmɛnɛ, je lɛ ŋmɛɔ nɔ fɛɛ nɔ ni ehiii lɛ feemɔ gbɛ, titri, lɛ yɛ saji ni kɔɔ jeŋba he lɛ mli. Shi anyɛŋ atsake nɛkɛ Biblia mli tɛi ni afolɔ ashwie shi lɛ. Biblia lɛ kɛɔ akɛ esa ákɛ akɛ suɔmɔ aye abua Kristofonyo fɛɛ Kristofonyo ni kɛ ehe woɔ jeŋba shara mli nifeemɔi amli Iɛ koni etsake egbɛ. (Galatabii 6:1; Yakobo 5:19, 20) Kɛ esumɔɔɔ akɛ etsake lɛ, belɛ esa akɛ Kristofoi atsi amɛhe kɛjɛ ehe aloo amɛkwa lɛ.—1 Korintobii 5:9-13.
10. Mɛni hewɔ esa akɛ Yehowa Odasefoi abu amɛhe kɛjɛ efɔŋfeemɔ loo mlakwamɔ nifeemɔi ahe lɛ?
10 Mɛi komɛi ewie akɛ gbɛ ni tamɔ nɛkɛ ni atsɔɔ nɔ atsuɔ saji ahe nii lɛ tsɔɔ suɔmɔ ni bɛ aloo akɛ eyɛ keketee tsɔ. Amɛsumɔɔ bɔ ni je lɛ kuɔ ehiɛ eshwieɔ nifeemɔi ni tamɔ nɛkɛ lɛ anɔ lɛ. Ani onuɔ he nakai nɔŋŋ? Aloo oyɔseɔ akɛ asafoŋ nifeemɔ ni tamɔ nɛkɛ lɛ tsɔɔ bɔ ni anyɛɔ enɔfɔŋfeemɔi lɛ, shi jeee suɔmɔ ni abɛ kɛha eshafeelɔ lɛ. Ni ani onuɔ shishi akɛ esa akɛ Kristofoi asafo lɛ afee enii yɛ nɛkɛ gbɛ nɔ kɛ́ eeehi shi akɛ Kristofoi asafo? Yakobo kɛɛ: “Jamɔ ni Nyɔŋmɔ ni ji wɔ Tsɛ lɛ kpɛlɛɔ nɔ akɛ eyɔɔ krɔŋŋ ni tɔmɔ ko bɛ he ji enɛ: . . . ni mɔ ko atsi ehe koni je lɛ akawo ehe muji.” (Yakobo 1:27, New International Version) Te aaafee tɛŋŋ ni kuu ko aaakɛɛ akɛ eyɛ anɔkwale jamɔ lɛ kɛ eŋmɛ gbɛ ni esha ni hiɛdɔɔ yɔɔ mli bule nakai kuu Iɛ?
11. Tɛi ni afolɔ ashwie shi aha Kristofonyo lɛ naa Kristofonyo lɛ wiemɔ nɔ hewalɛ yɛ mɛɛ gbɛ nɔ?
11 ‘Efɔŋ’ ni Kristofonyo ‘nyɛɛɔ’ lɛ yaa shɔŋŋ. Biblia lɛ kɛɔ akɛ: “Shi ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ akatsi ta tete yɛ nyɛteŋ, taakɛ bɔ ni sa mɛi krɔŋkrɔŋi, kɛ hiɛgbeji anitsumɔ kɛ yakayaka wiemɔ kɛ fɛoyeli hu ni esaaa lɛ.” (Efesobii 5:3, 4) No hewɔ lɛ, ale Kristofoi diɛŋtsɛ akɛ amɛkɛ yakayaka wiemɔ aloo yakayaka fɛoyelii tsuuu nii aloo mɛi ni nyaaa bɔlɛnamɔ he wiemɔi ni he tseee lɛ ahe. Jwɛŋmɔi ni mli tse kɛ wiemɔi ni mli tse miilaaje yɛ be fɛɛ mli ŋmɛnɛ.
12. Esoro Yehowa Odasefoi yɛ je lɛ he yɛ mɛɛ gbɛ nɔ kɛ eba hiɛtserɛjiemɔ he?
12 Esoro Yehowa Odasefoi po kɛ eba hiɛtserɛjiemɔ hu gbɛfaŋ. Akɛni “jeŋ muu lɛ fɛɛ ka mɔ fɔŋ lɛ hewalɛ mli” hewɔ lɛ, amɛle bɔ ni amɛaafee ni amɛkwɛ jogbaŋŋ yɛ hiɛtserɛjiemɔi ni je lɛ kɛhaa lɛ he. (1 Yohane 5:19) Amɛtsiɔ amɛhe kɛjɛɔ kuu shwɛmɔi, woji tɛtrɛbii video, sinii, lalai kɛ televishin nɔ nibii ni jieɔ daimonioi loo bɔlɛnamɔ he nibii aloo ni maa awuyeli ni ehiii kwraa lɛ nɔ mi lɛ ahe kwraa. Amɛkwɛɔ amɛhe nɔ jogbaŋŋ hu yɛ emli nɔ ni akɛɛ atsɛɔ lɛ weku hiɛtserɛjiemɔ ni ŋmɛɔ bɔlɛnamɔ ni esaaa gbɛ ni Kristofoi nyɛŋ akpɛlɛ nɔ lɛ he. (1 Korintobii 15:33) Mɔ fɛɛ mɔ ni buɔ Biblia mli saji lɛ akɛ eji hiɛdɔɔ sane lɛ taoŋ hiɛtserɛjiemɔ kɛ nibii ni esaaa akɛ atsiɔ ta po yɛ Kristofoi ateŋ lɛ mli.
13. Ani eji nii ni akwɛɛɛ kɛyaaa shɔŋŋ yɛ amɛhe naa ni amɛtsiɔ yɛ hiɛtserɛjiemɔ he sane lɛ mli lɛ hewɔ? Tsɔɔmɔ mli.
13 Ani enɛ ji jwɛŋmɔ ni ohiɛ? Aloo onuɔ he akɛ jwɛŋmɔ ni tamɔ nɛkɛ lɛ haa Yehowa Odasefoi feɔ mɛi ni susuuu nii ahe kɛyaaa shɔŋŋ aloo amɛyɔɔ keketee tsɔ? Kɛji nakai ni Iɛ, belɛ susumɔ enɛ he: Kɛji akɛ abayoo akɛ niyenii ko ehiii ni ebaanyɛ eye awui no hewɔ lɛ ajie yɛ shwapoi amli lɛ, mɛi ni heɔ nɛkɛ niyenii nɛɛ ewieee akɛ aatsi amɛheyeli naa ejaakɛ amɛnine shɛɛɛ nɛkɛ niyenii nɛɛ nɔ amɛhe dɔŋŋ. Shi moŋ, eŋɔɔ amɛnaa akɛ abaa amɛyi koni nɛkɛ niyenii nɛɛ akaye amɛ awui. Nakai nɔŋŋ Yehowa Odasefoi ewieee huhuuhu akɛ aatsi amɛheyeli naa kɛ́ atsɔɔ amɛ akɛ je lɛ hiɛtserɛjiemɔi babaoo yɛ ni oshara yɛ mli Iɛ. Shi moŋ, eŋɔɔ amɛnaa akɛ abaa amɛyi kɛjɛ oshara ni hiɛtserɛjiemɔi nɛɛ kɛbaa Iɛ he.
Amɛsumɔɔ Amɛhe
14. Mɛɛ su ji nɔ ni Yesu kɛɛ akɛ ebaaha Kristofoi asafo lɛ afee sɔrɔto yɛ jeŋ ni ebɔle amɛ lɛ he?
14 Naa yiŋtoo kroko ni haa Kristofonyo tsiɔ ehe kɛjɛɔ je lɛ he lɛ. Gbɛkɛ ni enɔ jetsɛremɔ ebaagbo lɛ, Yesu kɛɛ esɛɛnyiɛlɔi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaaale akɛ mikaselɔi ji nyɛ.” (Yohane 13:35) Mɛni hewɔ suɔmɔ baafee okadi aha mɛi ni yɔɔ sɛɛ lɛ? Ejaakɛ, kɛ asusu fɛɛ he lɛ, shihilɛi ni yɔɔ je lɛ mli ŋmɛnɛ lɛ tamɔ bɔ pɛ ni Paulo kɛɛ akɛ ebaaba lɛ: “Gbɔmɛi aaatsɔmɔ hesuɔlɔi, shikasuɔlɔi mɛi ni edɔɔɔ mɔ he.” (2 Tim. 3:2, 3) Kɛ shihilɛ lɛ batamɔ nɛkɛ lɛ, gbɔmɛi akuu ko ni baahi shi yɛ jeŋ fɛɛ ni baana suɔmɔ amɛha amɛhe lɛ baafee naakpɛɛ nii ni ekaaa. Nɛkɛ nifeemɔ nɛɛ yɛ Yehowa Odasefoi ateŋ.—1 Petro 2:17
15. Mɛɛ shihilɛi baa ni haa Yehowa Odasefoi naa hegbɛ akɛ amɛaajie suɔmɔ kpo amɛtsɔɔ amɛhe?
15 Ayɔseɔ nɛkɛ suɔmɔ nɛɛ waa ni yɛ be babaoo mli lɛ mɛi ni yɔɔ sɛɛ lɛ wieɔ Odasefoi lɛ ahe kɛ́ amɛkpe kutuu yɛ amɛkpeei ashishi. Kɛ oshara wulu ko ba lɛ, Odasefoi lɛ shɛɔ he ni eshara lɛ eba yɛ Iɛ oya, ni amɛbayeɔ amɛbuaa amɛnyɛmimɛi. Ni yɛ asafo lɛ mli po Iɛ, anɔkwale Kristofoi jieɔ suɔmɔ kɛ mɛi ahe susumɔ kpo amɛtsoɔ amɛhe. Kɛji akɛ mɛi komɛi yɛ ni shishinumɔ bɛ amɛteŋ po lɛ, amɛbɔɔ mɔdɛŋ waa akɛ ‘amɛkɛ amɛhe aaahi shi ni amɛŋɔ-fa amɛhe yaka.’—Kolosebii 3:12-14.
Amɛtɔtɔɔɔ Mɛi Krokomɛi Anane
16. (a) Mɛɛ shihilɛ Paulo wie he ni ha klɛŋklɛŋ afii oha lɛ mli Krisofoi lɛ na hegbɛ akɛ amɛaajie suɔmɔ ni mli kwɔ kpo amɛtsɔɔ amɛhe? (b) Mɛɛ shishitoo mlai etsɔɔ mli ni abaanyɛ akɛto ŋmɛnɛŋmɛnɛ beaŋ nibii pii ahe?
16 Nɛkɛ suɔmɔ nɛɛ haa Odasefoi lɛ feɔ sɔrɔto yɛ gbɛ kroko no. Ŋmɛnɛ, mɛi pii susuɔ hegbɛi ni amɛyoo Iɛ ahe ni amɛkɛ awuŋayeli buɔ enɛɛmɛi ahe. Shi bɔfo Paulo fo tɛ ko ni yɔɔ sɔrɔto efo shi: “Nyɛhaa wɔtiua hejɔlɛ nibii kɛ nibii ni wɔkɛaaha wɔnanemɛi anane amɔ shi moŋ.” (Romabii 14:19) Kɛ okwɛ sane Iɛ mli lɛ, Paulo miiwie naagba ko ni yɔɔ ni kɔɔ niyenii he yɛ nakai be lɛ mli. Kristofoi ni tamɔɔɔ Yudafoi ni yɔɔ Mose Mla lɛ shishi lɛ yɛ hegbɛ akɛ amɛyeɔ nɔ fɛɛ nɔ ni amɛsumɔɔ bei abɔ ni amɛjeee fulɔi. Shi, mɛi komɛi ni nyaŋeɔ niyenii komɛi kɛjɛ amɛgbekɛbiiashi lɛ hao waa beni amɛbana ni amɛnanemɛi Kristofoi lɛ miiye nakai niyenii lɛ. Shi ani nakai Kristofoi lɛ ma nɔ mi doo akɛ amɛyɛ hegbɛ akɛ amɛyeɔ nɔ fɛɛ nɔ ni amɛsumɔɔ yɛ gbɛ fɛɛ gbɛ nɔ? Kɛ amɛboɔ Paulo ŋaawoo Iɛ toi Iɛ, amɛfeŋ nakai. Ekɛɛ akɛ: “Ehi akɛ oyeee loo ni asaŋ onuuu wein loo nɔ ko ni aaato onyɛmi pampi.” (Romabii 14: 21) Mɛɛ ŋaawoo ni suɔmɔ yɔɔ mli nɛ! Ani obaanyɛ ona bɔ ni eeekudɔ wɔ yɛ hei komɛi hu lɛ?
17, 18. (a) Mɛɛ gbɛ nɔ abaanyɛ akɛ shishitoo mla ni yɔɔ Romabii 14:21 lɛ ato dãa ni wa numɔ he sane lɛ he? (b) Mɛɛ gbɛ nɔ abaanyɛ akɛto atadewoo loo mamabumɔ he? (d) Mɛɛ hei krokomɛi hu kɛ́ akɛ nɛkɛ shishitoo mla nɛɛ nɔŋŋ tsu nii yɛ lɛ eeeye ebua wɔ ni wɔjie suɔmɔ kpo wɔtsɔɔ wɔhe?
17 Akɛ nɔkwɛmɔ nɔ lɛ, Biblia lɛ ŋmɛɔ Kristofoi agbɛ ni amɛnu daa ni wa kɛ hiɛshikamɔ. (1 Timoteo 3:8; 5:23) Mɛi komɛi yɛ ni amɛtaooo ni amɛnu daa ni wa he fũ kwraa. Mɛi komɛi leee numɔ aloo amɛnyɛŋ amɛnu. Kɛ otee henaabuamɔ ko shishi kɛ mɔ ko ni tamɔ nakai lɛ, ani obaasumɔ ni onyɛ enɔ aloo owo lɛ hiɛgbele akɛ ebafata ohe yɛ daa ni wa lɛ numɔ mli? Aloo bo diɛŋtsɛ lɛ onuŋ eko bɔni afee ni okagba enaa?
18 Susuma nɔkwɛmɔ nɔ kroko he: atadewoo loo mamabumɔ he sane lɛ. Biblia lɛ etsɔɔɔ nɔ atadei loo mamai ni esa akɛ Kristofonyo lɛ awo aloo abu, eyɛ mli akɛ okɛɔ akɛ esa akɛ afee kɛ hiɛshikamɔ ni ehe atse. (1 Timoteo 2: 9) Ŋmɛnɛ maji pii yɛ ni amɛyɛ atadei komɛi ahe mlai ni maŋ bii lɛ kpɛlɛɔ nɔ akɛ esa akɛ awo. Yɛ be babaoo mli lɛ, nɛkɛ mlai nɛɛ ŋmɛɔ sɔrɔtofeemɔ ni sa gbɛ. Shi kɛ́ agba kɛjɛ enɛ he lɛ, ebafeɔ tamɔ atade ni mɔ ni woɔ lɛ susuɔ lɛ pɛ ehe, ajwamaŋ atade ko aloo mɔ ni etsi ehe kɛjɛ nɔ ni afɔɔ feemɔ he. Esa akɛ Kristofoi ni ji hii kɛ yei fɛɛ aha sane nɛɛ ahi amɛjwɛŋmɔ mli. Ani nyɛmiisumɔ ni nyɛtsi nyɛ heyeli yɛ atadewoo loo mamabumɔ he sane nɛɛ mli lɛ naa yɛ sanekpakpa lɛ hewɔ bɔni afee ni nyɛkatɔtɔ nyɛnyɛmimɛi anane?
19-21. (a) Mɛni hewɔ Yehowa Odasefoi tsuɔ nii koni amɛhiɛ amɛhe ni amɛtsi kɛjɛ je lɛ he lɛ mli? (b) Mɛɛ nibii krokomɛi amli hu esa akɛ wɔbɔ mɔdɛŋ ni wɔmɔ wɔhe ni wɔtsi kɛjɛ je he lɛ mli yɛ?
19 Hɛɛ, Yesu sane lɛ ja beni ekɛɛ akɛ Kristofoi “jɛɛɛ je lɛ mli lɛ.” (Yohane 17:16) Yehowa Odasefoi yɛ sɔrɔto diɛŋtsɛ yɛ sanekpakpa lɛ shiɛmɔ mli, yɛ nɔ ni ehiii ni amɛtsiɔ amɛhe kɛjɛɔ helɛ mli, yɛ suɔmɔ kɛ mɛi krokomɛi ahe susumɔ mli. Amɛhe ni amɛtsiɔ kɛjɛɔ je lɛ he nɛɛ kɛ jɔɔmɔi bahaa Odasefoi, jeee bibioo, ejaakɛ ebuɔ amɛhe kɛjɛɔ naagbai babaoo ni haoɔ je lɛ ŋmɛnɛ lɛ ahe.
20 Ani obuɔ nɛkɛ je ni atsiɔ he kɛjɛɔ be nɛɛ akɛ jwetri, ni ani odiɔ sɛɛ yɛ oshihilɛ mli? Kaimɔ akɛ kɛji akɛ Yehowa Odasefoi tsiii amɛhe kɛjɛɛɛ je lɛ he lɛ, amɛbaatamɔ je lɛ ni Satan Abonsam ji enyɔŋmɔ lɛ nɔŋŋ. (2 Korintobii 4:4) Anyɛŋ ayoo amɛ dɔŋŋ yɛ faŋŋ mli akɛ ‘mɛi krɔŋkrɔŋi’ ni amɛnyɛŋ amɛfee mɛi ni “kɛ je lɛ woko amɛhe muji.” No hewɔ lɛ, amɛnyɛŋ amɛna “jamɔ ni he tse ni he bɛ muji ko yɛ Nyɔŋmɔ hiɛ.” (Yakobo 1:27, The Jerusalem Bible; 1 Petro 1:14-16) Kɛ ona bo diɛŋtsɛ ohe akɛ ooshwe ni oná ni kulɛ otamɔ je lɛ, belɛ, kaimɔ kɔkɔbɔɔ ni yɔɔ Yakobo 4:4 lɛ.
21 Bɔfo Paulo gba fɔ shi akɛ su kroko baahe shi babaoo yɛ je lɛŋ ŋmɛnɛ. Ekɛɛ akɛ gbɔmɔi baafee “shikasuɔlɔi.” (2 Timoteo 3:1, 2) Ewiemɔi lɛ ji anɔkwale, ejaakɛ shikasuɔmɔ etsɔ hewalɛ kpele ákɛ kɛha mɛi pii lɛ, no ji hewalɛ ni da fe fɛɛ yɛ amɛshihilɛ mli. Ani Kristofoi yɛ sɔrɔto yɛ enɛ mli hu? Ani wɔɔnyɛ wɔje ŋmɛnɛŋmɛnɛ je nɛɛ mli ni wɔjeee ‘shikasuɔlɔi’? Wɔbaasusu enɛ he yɛ nikasemɔ ni nyiɛ enɛ sɛɛ lɛ mli.a
[Shishigbɛ niŋmaa]
a Ajie kɛjɛ April 1, 1985 Watchtower lɛ mli.
Ani Obaanyɛ Okai?
◻ Mɛni hewɔ esa akɛ Kristofonyo akpa gbɛ akɛ ebaafee sɔrɔto yɛ je lɛ he?
◻ Mɛɛ ŋmalɛi yeɔ buaa Yehowa Odasefoi ni amɛnaa shiɛmɔ nitsumɔ lɛ he jwɛŋmɔ ni ja lɛ?
◻ Mɛɛ gbɛi sɔrɔtoi anɔ nɛkɛ Hebribii 1:9 kɛ nitsumɔ haa Yehowa Odasefoi feɔ sɔrɔto yɛ je lɛ he?
◻ Mɛɛ hewalɛ shishitoo mla ni atsɔɔ mli yɛ Romabii 14:21 lɛ kɛ nitsumɔ naa yɛ amɛjeŋba nɔ?
[Mfoniri ni yɔɔ baafa 23]
Yehowa Odasefoi ekase bɔ ni amɛaafee ni amɛkwɛ jogbaŋŋ yɛ hiɛtserɛjiemɔ ni je lɛ kɛhaa lɛ he