Nyɛwoa Nyɛhe Hewalɛ Yɛ Be Mli Ni Gbi Lɛ Bɛŋkɛɔ Lɛ
“Nyɛwowoa nyɛhe hewalɛ, ni titri Iɛ akɛni nyɛnaa akɛ gbi Iɛ miibɛŋkɛ nɛɛ.”—HEBRIBII 10:25, New World Translation.
1, 2. Mɛɛ gbi bɛŋkɛɔ lɛ, ni mɛni esa akɛ efee Yehowa webii asubaŋ?
MƐI ni ŋmɛnɛ amɛnaa wiemɔ akɛ, ‘Nyɛbaa ni nyɛbayɛa wala-nu lɛ’ mli gbɛfaŋnɔ lɛ tseee amɛhe. Yɛ be mli ni Yehowa kunimyeli gbi kpeteŋkpele lɛ bɛŋkɛɔ lɛ, amɛkɛ Biblia mli ŋaawoo nɛɛ tsuɔ nii: “Ni nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa [hewalɛ], ni titri lɛ akɛni nyɛnaa akɛ gbi lɛ miibɛŋkɛ nɛɛ.”—Hebribii 10:24, 25.
2 Ŋmalɛi lɛ gbaa yɛ nakai “gbi” lɛ he akɛ “Yehowa gbi.” (2 Petro 3:10) Yɛ bei abɔ ni Yehowa ji Ŋwɛi Flooflonyo kɛ, Nyɔŋmɔ ni he wa fe fɛɛ nɛɛ, gbi ko gbi ko bɛ ni baafee nɔ ni fe egbi Iɛ. (Bɔfoi lɛ Asaji 2:20) Etsɔɔ enɔyeli akɛ jeŋ muu fɛɛ Nyɔŋmɔ lɛ bembuu. Nakai gbi ni eko bɛ ni he hiaa tamɔ no lɛ miibɛŋkɛ.
3. Yehowa gbi lɛ miibɛŋkɛ kɛmiiha Kristofoi ni yɔɔ klɛŋklɛŋ afii oha lɛ mli lɛ yɛ mɛɛ gbɛ nɔ, ni wɔ ni wɔyɔɔ shihilɛ mli ŋmɛnɛ lɛ hu?
3 Bɔfo Paulo kɛɛ Kristofoi ni yɔɔ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli lɛ akɛ Yehowa gbi lɛ miibɛŋkɛ. Amɛmiikpa nakai gbi lɛ baa lɛ gbɛ, shi yɛ no beaŋ lɛ gbi lɛ baa baahe nɔ ni fe afii 1,900. (2 Tesalonikabii 2:1-3) Yɛ nakai anɔkwa sane lɛ fɛɛ sɛɛ lɛ, esa akɛ awo amɛ hewalɛ ejaakɛ nakai gbi lɛ baaba kɛ̃, ni kɛji akɛ Kristofoi lɛ mia amɛhiɛ amɛtee nɔ yɛ nakai hemɔkɛyeli lɛ mli lɛ, amɛbaabote nakai gbi ni ajɔɔ lɛ mli. (2 Timoteo 4:8) Ana ni nakai gbi lɛ miibɛŋkɛ yɛ no beaŋ. Shi kɛha wɔ mɛi ni wɔyɔɔ ŋmɛnɛ lɛ, Yehowa gbi lɛ ebɛŋkɛ lɛlɛŋ. Biblia gbalɛ mlibaa ni yɔɔ naakpɛɛ lɛ fɛɛ yeɔ nɛkɛ sane ni kanyaa miishɛɛ nɛɛ he odase. Etsɛŋ ni abaatsuu Yehowa, wɔ-Nyɔŋmɔ lɛ gbɛi lɛ he kɛya naanɔi fɛɛ mli.—Luka 11:2.
Gbɛi Krɔŋkrɔŋ lɛ Wo Hewalɛ
4. Taakɛ Kpojiemɔ 19:6 tsɔɔ lɛ, namɔ baafee Maŋtsɛ lɛ, ni te afeɔ tɛŋŋ ayɔseɔ egbɛi lɛ?
4 Esa akɛ adesa weku muu lɛ fɛɛ anya gbɛi krɔŋkrɔŋ lɛ he. Today’s English Version lɛ kɛɔ akɛ: “Nyɛjiea Nyɔŋmɔ yi, ejaakɛ Nuŋtsɔ wɔ-Nyɔŋmɔ Ofe lɛ ji Maŋtsɛ!” (Kpojiemɔ 19:6) Taakɛ nakai afii ohai 20 Biblia shishitsɔɔmɔ lɛ tsɔɔ lɛ, lɛ ji Nuŋtsɔ lɛ, Nyɔŋmɔ ofe lɛ. Nakai shishitsɔɔmɔ lɛ kɛ agbɛnɛ ŋmɛnɛŋmɛnɛ beaŋ shishitsɔɔmɔi babaoo kɛ ŋwɛi Gbɔmɔ ni jeɔ shishi eyeɔ nɔ akɛ Maŋtsɛ lɛ gbɛi haaa. Shi gbɛi krɔŋkrɔŋ lɛ yɛ sanejajemɔ ni ji “Haleluyah!” (“Jiemɔ Yah yi” loo “Jiemɔ Yehowa yi”) ni anaa yɛ Revised Standard Version, New International Version, kɛ Moffatt shishitsɔɔmɔ ni kɔɔ Kpojiemɔ 19:6 he lɛ mli. Aha gbɛi krɔŋkrɔŋ lɛ nɔ yɛ Biblia shishitsɔɔmɔi amli yɛ wɔ Ŋmɛnɛŋmɛnɛ Be nɛɛ mli titri. Shi taakɛ wɔbaana lɛ, nakai gbɛi lɛ efee hewalɛwoo nɔ babaoo kɛha Nyɔŋmɔ webii yɛ blema kɛ ŋmɛnɛŋmɛnɛ beaŋ fɛɛ.
5, 6. (a) Mɛni hewɔ ehe hiaa ni Mose ale Nyɔŋmɔ ni edamɔ enajiaŋ lɛ gbɛi lɛ? (b) Te enɛ baanyɛ ana Israelbii lɛ anɔ hewalɛ aha tɛŋŋ yɛ be mli ni Mose jie gbɛi krɔŋkrɔŋ lɛ kpo lɛ?
5 Wɔkaiɔ akɛ beni Ŋwɛi Flooflonyo lɛ tsu Mose kɛtee Israelbii ni amɛtsɔmɔ nyɔji yɛ Mizraim shikpɔŋ lɛ nɔ lɛ aŋɔɔ lɛ, sanebimɔ ni kɔɔ mɔ ni tsu lɛ lɛ he lɛ te shi yɛ gbɔmɛi ni atsu Mose kɛtee amɛŋɔɔ lɛ ajwɛŋmɔi amli. Mose kpa gbɛ akɛ Yudafoi ni naa nɔ lɛ baasumɔ ni amɛle Nyɔŋmɔ ni edamɔ enajiaŋ lɛ gbɛi. Wɔkaneɔ yɛ enɛ he yɛ 2 Mose 3:15 akɛ: “Ni Nyɔŋmɔ saa kɛɛ Mose akɛ: ‘Bɔ ni okɛɛ Israelbii lɛ nɛ, “Yehowa, nyɛtsɛmɛi a-Nyɔŋmɔ lɛ ni ji Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ tsu mi nyɛŋɔɔ nɛɛ.’” Enɛ ji migbɛi kɛyaa naanɔ, ni enɛ ji mikaimɔ kɛyaa yinɔi fɛɛ.”
6 Beni ama nɛkɛ sane nɛɛ nɔ mi aha amɛ lɛ, Israelbii lɛ baanu he akɛ awo amɛ hewalɛ waa. Anɔkwa Nyɔŋmɔ kome pɛ ni ji Yehowa, ema amɛyiwalaheremɔ nɔ mi. Ni kwɛ bɔ ni eji hewalɛwoo ha akɛ aaana hegbɛ ni ale Nyɔŋmɔ yɛ be mli ni efeɔ lɛ diɛŋtsɛ egbɛi lɛ shishinumɔ he nɔkwɛmɔ nɔ—ni jeee akɛ ekɛ henɔwomɔ miitse ehe lɛ! —2 Mose 3:13; 4:29-31.
7. (a) Te wɔfeɔ tɛŋŋ wɔleɔ akɛ Yesu kaselɔi lɛ le gbɛi krɔŋkrɔŋ lɛ? (b) Te fee tɛŋŋ ni atsi Nyɔŋmɔ gbɛi lɛ kɛtee sɛɛ?
7 Nuŋtsɔ Yesu Kristo kaselɔi lɛ hu nu he akɛ gbɛi krɔŋkrɔŋ lɛ ni ji Yehowa, kɛ nɔ ni edamɔ shi kɛha lɛ ewo amɛ hewalɛ babaoo. (Yohane 17:6, 26) Yɛ Yesu shikpɔŋ nɔ sɔɔmɔ nitsumɔ lɛ mli lɛ, eka shi faŋŋ akɛ etsiii gbɛi krɔŋkrɔŋ lɛ kɛyaaa sɛɛ, ni jeee eyiŋtoo ji ni eha lɛ diɛŋtsɛ egbɛi, Yesu lɛ, aye klɛŋklɛŋ gbɛhe. Beni anɔkwa Kristofoi ahemɔkɛyeli lɛ he hemɔkɛyeli kwamɔ ni agba afɔ shi lɛ je shishi lɛ dani atsi gbɛi krɔŋkrɔŋ lɛ kɛtee sɛɛ, hɛɛ, ni atsumɔ enɛ kwraa kɛjɛ Kristofoi asanegbaa mli. (Bɔfoi lɛ Asaji 20:29, 30) Kɛ aje shishi akɛ woo babaoo bɔi Nyɔŋmɔ Bi lɛ gbɛi lɛ hamɔ, ni enɛ ha Tsɛ lɛ gbɛi lɛ nɔ lɛ, no mli mɛi ni kɛɔ akɛ amɛji Kristofoi lɛ baana akɛ amɛjamɔ ni amɛkɛhaa Tsɛ lɛ efee nɔ ni kɔɔɔ mɔ ko he, nɔ ni weku mli ekomefeemɔ bɛ mli, ni yɛ no hewɔ lɛ ewooo mɔ hewalɛ kwraa.
8. Kɛjɛ be mli ni aŋɔ gbɛi ni ji Yehowa Odasefoi lɛ kɛbaa nɛɛ, mɛni etee nɔ eba Nyɔŋmɔ webii anɔ?
8 No hewɔ lɛ eji sane ni abaanyɛ adamɔ nɔ ana miishɛɛ ni nɔ bɛ beni Majimaji Ateŋ Biblia Kaselɔi Akuu ni kɛ amɛhe ebɔ Buu Mɔɔ Asafo lɛ he lɛ kpɛlɛ gbɛi ni ji Yehowa Odasefoi lɛ nɔ yɛ 1931 lɛ. Jeee akɛ ehaa mɔ naa miishɛɛ kɛkɛ, shi ewoɔ mɔ hewalɛ waa diɛŋtsɛ. Yɛ enɛ hewɔ lɛ, Biblia kaselɔi lɛ ni aha amɛ gbɛi hee lɛ baanyɛ awo amɛhe hewalɛ.—Okɛto Yesaia 43:12 he.
9. Te anɔkwa Kristofoi nuɔ Mɔ ni amɛji Odasefoi kɛha lɛ lɛ he amɛhaa tɛŋŋ?
9 Nɔ ni jɛ mli ba ji akɛ, anɔkwa Kristofoi ni yɔɔ ŋmɛnɛ lɛ naa akɛ esa akɛ amɛyoo Mɔ ni amɛji ehe Odasefoi ni agba afɔ shi lɛ, taakɛ Yesu Kristo, amɛhiɛnyiɛlɔ lɛ fee, yɛ be mli ni eyɔɔ shikpɔŋ nɛɛ nɔ lɛ. (Kpojiemɔ 1:1, 2) Hɛɛ, amɛyɔseɔ lɛ akɛ mɔ pɛ ni egbɛi ji Yehowa.—Lala 83:19.
Miishɛɛ kɛ Mumɔ Krɔŋkrɔŋ Yimɔ Amɛ Obɔbɔ
10-12. (a) Mɛni baanyɛ ajɛ nifeemɔ hewalɛ lɛ ni ba Yesu sɛɛnyiɛlɔi lɛ anɔ lɛ mli aba? (b) Te Yehowa Odasefoi ni miishɛɛ ekanya amɛ lɛ baasumɔ ni amɛkɛ amɛhe aye aha tɛŋŋ?
10 Yesu Kristo kɛɛ yɛ eshɛɛ wiemɔi ni ekɛha ebɔfoi lɛ yɛ be mli ni amɛmli gbalaa lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ anɔ. Ni naa, mi lɛ, mikɛ nyɛ yɛ daa kɛyashi jeŋ naagbee lɛ.”—Mateo 28:19, 20.
11 Kadimɔ akɛ esa akɛ abaptisi Kristofoi heei ni atsɔɔ amɛ nii lɛ yɛ mumɔ krɔŋkrɔŋ lɛ gbɛi amli. Mumɔ krɔŋkrɔŋ nɛɛ jee gbɔmɔ, shi moŋ Yehowa Nyɔŋmɔ nifeemɔ hewalɛ, ni etsɔɔ Yesu Kristo nɔ ekɛtsuɔ nii. Yehowa Nyɔŋmɔ tsɔ Yesu nɔ efɔse nɛkɛ nifeemɔ hewalɛ nɛɛ eshwie Yesu Kristo sɛɛnyiɛlɔi ni amɛjɔɔ amɛhe nɔ lɛ anɔ yɛ Pentekoste. (Bɔfoi lɛ Asaji 2:33) Nɛkɛ mumɔ krɔŋkrɔŋ nɛɛ yimɔ amɛmli obɔbɔ, ni mumɔ krɔŋkrɔŋ lɛ wiemɔi loo yibii lɛ ekome ji miishɛɛ. (Galatabii 5:22, 23; Efesobii 5:18-20) Miishɛɛ ji su ko ni kanyaa mɔ. Mumɔ krɔŋkrɔŋ lɛ miishɛɛ lɛ baayimɔ kaselɔi lɛ obɔbɔ. Bɔfo Paulo sɔlemɔ lɛ mli wiemɔi lɛ sa jogbaŋŋ: “Shi nɔhiɛkamɔ Nyɔŋmɔ lɛ kɛ miishɛɛ kɛ hejɔlɛ fɛɛ awo nyɛ obɔbɔɔbɔ yɛ hemɔkɛyeli mli, koni nyɛna hiɛnɔkamɔ ni ateke nɔ yɛ mumɔ krɔŋkrɔŋ hewalɛ mli.”—Romabii 15:13.
12 Akɛni mumɔ ni kanyaa miishɛɛ nɛɛ eyimɔ amɛ obɔbɔ hewɔ lɛ, Yehowa Odasefoi ni yɔɔ ŋmɛnɛ, ni “asafo babaoo” lɛ fata he lɛ baasumɔ, hɛɛ, enɛ baatsirɛ amɛ ni amɛwo amɛhe hewalɛ yɛ nibii agbɛjianɔtoo ni sumɔɔɔ mɔ nɛɛ mli. No hewɔ lɛ, bɔfo Paulo wie ‘hewalɛ ni aaawowoo he’ lɛ he.—Kpojiemɔ 7:9, 10; Romabii 1:12; 14:17.
Ayɛ Nɔ Ni Aaadamɔ nɔ Ana Hewalɛwoo
13. Mɛɛ yiŋtoi wɔyɔɔ ni aaaha wɔnu he akɛ awo wɔ hewalɛ ni esa akɛ wɔwo mɛi krokomɛi hewalɛ?
13 Akɛni amɛnaa amɛhe yɛ nibii agbɛjianɔtoo nɛɛ, ni mɔ ni teɔ shi woɔ nɔ fɛɛ nɔ ni ja lɛ ji enɔyelɔ kɛ nyɔŋmɔ po lɛ mli hewɔ lɛ, Kristofoi baasumɔ ni amɛwowoo amɛhe hewalɛ yɛ jeŋ fɛɛ Kristofoi asafo lɛ, ni Yehowa Nyɔŋmɔ mumɔ krɔŋkrɔŋ lɛ egbɛ eshwa mli fɛɛ lɛ mli. (Hebribii 10:24, 25; Bɔfoi lɛ Asaji 20:28) Wɔyɛ nɔ ni wɔɔdamɔ nɔ wɔna hewalɛwoo yɛ gbɛ fɛɛ gbɛ nɔ. Hɛɛ, kwɛ bɔ ni wɔdaa shi akɛ wɔyɔɔ Yehowa kɛ E-Bi lɛ kɛ enifeemɔ loo nitsumɔ hewalɛ, ni ji mumɔ krɔŋkrɔŋ lɛ ahe anɔkwa nilee! Kwɛ bɔ ni wɔhiɛ sɔɔ hiɛnɔkamɔ ni amɛkɛhaa lɛ waa ha! No hewɔ lɛ miishɛɛ eyi wɔjamɔ lɛ mli obɔ. Bɔfo Paulo kɛɛ Kristofoi ni eŋma ewolo lɛ eyaha lɛ akɛ amɛwowoo amɛhe hewalɛ ni amɛtswa amɛhe amɛmamɔ shi yɛ amɛhemɔkɛyeli ni yɔɔ krɔŋkrɔŋ waa lɛ mli. Ni esa akɛ amɛfee enɛ ‘babaoo ni amɛnaa akɛ gbi lɛ miibɛŋkɛ yɛ okadi gbɛ nɔ lɛ.’ Agbɛnɛ, kɛ maŋkwramɔŋ hewalɛi lɛ kpata apasa Kristojamɔ, kɛ apasa jamɔi krokomɛi fɛɛ hiɛ sɛɛ lɛ, shihilɛ lɛ baabi ni wɔwo wɔhe hewalɛ babaoo po fe nakai.
14. Namɛi esa akɛ amɛwo amɛhe hewalɛ lɛ, ni yɛ mɛɛ gbɛ nɔ?
14 Yɛ be mli ni onukpai lɛ nyiɛɔ hiɛ yɛ hewalɛ ni awoɔ asafoku lɛ mli yɛ amɛ asafoi sɔrɔtoi ni amɛyɔɔ mli lɛ amli lɛ, kɛlɛ ehe miihia ni Kristofoi fɛɛ awowoo amɛhe hewalɛ, taakɛ Hebribii 10:25 woɔ ŋaa lɛ. Yɛ anɔkwale mli lɛ, enɛ ji Kristofoi ataomɔ nii. Kɛ oji asafo ko mli nyo lɛ, ani okɛ hewalɛwoo nɛɛ haa? Shi ekolɛ obaasusu akɛ, ‘Mɛɛ gbɛ nɔ matsɔ mafee enɛ yɛ? Mɛni manyɛ mafee?’ Klɛŋklɛŋ lɛ, yɛ kpeei ni oyaa kɛ Kristofoi agbɛjianɔtoo lɛ sɛɛ ni ofiɔ hewɔ lɛ, ani enɛ po wooo nyɛmimɛi hii kɛ yei krokomɛi lɛ fɛɛ hewalɛ, taakɛ bɔ ni eeenyɛ eba akɛ bo hu ewoɔ bo hewalɛ kɛ ona bɔ ni mɛi krokomɛi kɛ anɔkwayeli baa asafoŋ kpeei lɛ? Otsuishiŋmɛɛ yɛ anɔkwayeli mli lɛ he nɔkwɛmɔ nɔ lɛ hu baanyɛ awo amɛ hewalɛ. Kɛ otee nɔ ohi Kristofoi agbɛ lɛ nɔ yɛ shihilɛ mli naagbai kɛ nibii ni mli wawai lɛ amli lɛ fɛɛ sɛɛ, ni oŋmɛɛɛ he lɛ, obaanyɛ oto okadi kpakpa ni kanyaa mɔ ofɔ shi.
Kũu Nijiaŋwujee ni Jɛ Abonsam Ŋɔɔ lɛ Naa
15. Mɛni hewɔ Abonsam “egri naakpa” lɛ, ni egri ewo namɛi?
15 Jeee wɔ pɛ ji mɛi ni le akɛ Yehowa gbi lɛ ebɛŋkɛ. Satan Abonsam hu le. Kpojiemɔ 12:12 kɛɔ wɔ akɛ kpoo yɛ bianɛ kɛha shikpɔŋ lɛ, “ejaakɛ Abonsam lɛ ekpeleke shi kɛba nyɛŋɔɔ, ni egri naakpa, ejaakɛ ele akɛ be fioo ko kɛkɛ eyɔɔ.” Taakɛ Kpojiemɔ 12:17 tsɔɔ lɛ, egri diɛŋtsɛ ewo mɛi “ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ.” Ŋwanejee ko bɛ enɛ he—Abonsam miisumɔ ni eje wɔnijiaŋ wui! Ni ele gbɛ ni eeetsɔ nɔ ebɔ enɛ feemɔ he mɔdɛŋ. Ele wɔgbɔjɔmɔi kɛ naagbai, ni etsuɔ enɛɛmɛi ahe nii.
16. Mɛni hewɔ Abonsam kɛ nijiaŋwujee tsuɔ nii akɛ etawuu nii lɛ?
16 Mɛni hewɔ Abonsam kɛ nijiaŋwujee tsuɔ nii akɛ edɛŋdade loo tawuu nii lɛ? Ejaakɛ yɛ be babaoo mli lɛ enɛ yeɔ omanye. Mɔ ko ni eŋmɛ etsui shi yɛ shitee-kɛ-woo kɛ yiwaa babaoo mli lɛ po baanyɛ aŋmɛɛ ehe eha nijiaŋwujee. Satan miisumɔ ni ebɔ Yehowa Nyɔŋmɔ ahora ni ebɔ mɔdɛŋ etsɔɔ akɛ ebaanyɛ egbala gbɔmɛi kɛjɛ ehe koni amɛkasɔmɔ Lɛ. (Abɛi 27:11; okɛto Hiob 2:4, 5; Kpojiemɔ 12:10 he.) Kɛ ebaanyɛ eje onijiaŋ wui lɛ, belɛ ebaaha oba osɔɔmɔ ni okɛhaa Nyɔŋmɔ lɛ shi aloo ofee shɔ̃ɔ yɛ mli; ebaanyɛ eha okpa po, ni ofee mɔ ni ekpa Nyɔŋmɔ Maŋtsɛyeli lɛ he sanekpakpa lɛ shiɛmɔ kwraa.—2 Korintobii 2:10, 11; Efesobii 6:11; 1 Petro 5:8.
17. Ayoo nɔ ni ehiii ni jɛ nijiaŋwujee mli ba lɛ yɛ Mose gbii lɛ amli yɛ mɛɛ gbɛ nɔ?
17 Abaanyɛ ayoo nibii ni jɛɔ nijiaŋwujee mli baa ni ehiii lɛ yɛ Israelbii lɛ asane lɛ mli yɛ blema Mizraim. Beni Mose wie etsɔɔ Farao lɛ sɛɛ lɛ, nakai yiwalɔ lɛ ha amɛhaomɔi loo yiwaa kɛ amɛnɔnyɛɛ lɛ bafa babaoo. Nyɔŋmɔ kɛɛ Mose koni eshɛje Israelbii lɛ amii akɛ E-baajie amɛ lɛlɛŋ, ni efee amɛ E-maŋbii, ebaaha amɛje mli shweshweeshwe, ni ekɛ amɛ baaba shiwoo shikpɔŋ lɛ nɔ. Mose wie enɛ he etsɔɔ Israelbii lɛ. Shi 2 Mose 6:9 bɔɔ amaniɛ akɛ: “Shi amɛbooo Mose toi yɛ amɛtsuiyeli [nijiaŋwujee] kɛ nyɔŋyeli ni naa wa lɛ hewɔ.” Bɔ ni amɛfee amɛnii amɛha nɛɛ po je Mose nijiaŋ wui akɛ esumɔɔɔ ni ewie etsɔɔ Farao dɔŋŋ taakɛ afa lɛ lɛ, kɛyashi Yehowa tsɔ Mose yiŋ ni ewo lɛ hewalɛ da.—2 Mose 6:10-13.
18. Mɛni hewɔ ehe hiaa babaoo akɛ Nyɔŋmɔ webii aaaku nijiaŋwujee ni Abonsam kɛbaa lɛ naa lɛ?
18 Satan Abonsam le bɔ ni nijiaŋwujee baanyɛ asa Nyɔŋmɔ tsulɔ he yɛ gbɛ ni ehiii nɔ lɛ jogbaŋŋ. Taakɛ Abɛi 24:10 kɛɔ lɛ: “Kɛ otɔ biti yɛ haomɔ [nijiaŋwujee] gbi nɔ lɛ, belɛ ohewalɛ faaa.” Akɛni wɔshɛ shɔŋŋ diɛŋtsɛ yɛ naagbee gbi lɛ mli hewɔ lɛ, ehe miihia ni wɔhe awa waa yɛ mumɔŋ. Mple ni wɔkɛ emuu ni wɔyeee, wɔgbɔjɔmɔi, kɛ tɔmɔi ni baanyɛ agbala wɔsɛɛ lɛ shiɔ lɛ ehiii kwraa moŋ; shi akɛni Satan miibɔ mɔdɛŋ ni ekɛ nɛkɛ tɔmɔi nɛɛ atsu nii hewɔ lɛ, yelikɛbuamɔ he miihia wɔ.
Okɛ Ohe Afɔ Kristo Afɔleshaa lɛ nɔ Shiŋŋ
19. Mɛni baaye abua wɔ ni wɔku nijiaŋwujee naa, ni mɛni hewɔ?
19 Yelikɛbuamɔ kpele yɛ enɛ gbɛfaŋ ji kpɔmɔ nɔ he gbɛjianɔ ni Yehowa tsɔ Yesu Kristo nɔ eto lɛ. Wɔbaanyɛ wɔtsɔmɔ kunimyelɔi kɛtsɔ kpɔmɔ nɔ lɛ ni wɔkɛ wɔhe aaafɔ nɔ shiŋŋ lɛ nɔ. Akɛ wɔɔba nɛkɛ gbɛjianɔtoo nɛɛ hehiamɔ lɛ shi lɛ ji oshara. Hɛɛ, wɔtɔ̃ɔ loo wɔfeɔ esha lolo, bei abɔ ni wɔyeee emuu nɛɛ. Shi esaaa akɛ wɔnijiaŋ jeɔ wui ni wɔŋmɛɔ he, ni wɔmiinu he akɛ hiɛnɔkamɔ ko bɛ, koni wɔgbee Satan tsɔne lɛ mli. Wɔle akɛ wɔyɛ esha he afɔleshaa ni yeɔ emuu. Kpɔmɔ nɔ lɛ nyɛɔ ejieɔ eshai. Kɛ wɔji “asafo babaoo” lɛ mlibii lɛ, belɛ esa akɛ wɔna hemɔkɛyeli kɛ hekɛnɔfɔɔ ni yeɔ emuu akɛ wɔbaanyɛ wɔfɔ wɔ atadei lɛ ahe ni wɔha eyɛ futaa yɛ Toobi lɛ la lɛ mli.—Kpojiemɔ 7:9, 14.
20. Yɛ mɛɛ gbɛ nɔ Kpojiemɔ 12:11 tsɔɔ yɛ akɛ, abaanyɛ aye nijiaŋwujelɔ kpeteŋkpele, Abonsam, nɔ kunim?
20 Atsɔɔ bɔ ni Satan ji yɛ Kpojiemɔ 12:10 akɛ “wɔnyɛmimɛi lɛ anaafolɔlɔ lɛ ni folɔɔ amɛnaa yɛ wɔ-Nyɔŋmɔ lɛ hiɛ nyɔɔŋ kɛ shwane.” Te wɔɔfee tɛŋŋ wɔye nɛkɛ naafolɔlɔ yiwalɔ kɛ nijiaŋwujelɔ ni he yɔɔ gbeyei nɛɛ nɔ kunim? Nakai yitso lɛ mli kuku 11 lɛ kɛ hetoo lɛ haa: “Toobi lɛ la lɛ kɛ amɛ diɛŋtsɛ amɛdaseyeli wiemɔ lɛ amɛkɛye enɔ kunim, ni amɛdɔɔɔ amɛ diɛŋtsɛ amɛwala he kɛyashi gbele mli tete.” No hewɔ lɛ ehe miihia ni Yehowa webii ana hekɛnɔfɔɔ kwraa yɛ kpɔmɔ afɔleshaa lɛ, Toobi lɛ la lɛ mli. Ha hewalɛwoo ni jɛɔ odaseyeli mli baa lɛ mli awa kpɛŋŋ, ni oshiɛ Nyɔŋmɔ Maŋtsɛyeli lɛ he sanekpakpa lɛ be fɛɛ be otsɔɔ mɔ fɛɛ mɔ ni ooonyɛ.
21. Te wɔɔfee tɛŋŋ ni wɔkɛ wɔhe awo Abonsam nitsumɔi ni ekɛjeɔ wɔnyɛmimɛi lɛ anijiaŋ wui lɛ mli ni ekolɛ jeee gbɛ wɔje wɔfee?
21 Yɛ bei komɛi amli lɛ, ekolɛ wɔbaanyɛ ni wɔkɛ wɔhe awo Abonsam nitsumɔ ni ekɛjeɔ wɔnyɛmimɛi lɛ anijiaŋ wui lɛ mli, ni ekolɛ jeee gbɛ wɔje wɔfee. Yɛ mɛɛ gbɛ nɔ? Kɛ wɔfee keketee tsɔ, wɔfee veveeve tsɔ, aloo wɔfee wɔhe jalɔi babaoo tsɔ. (Jajelɔ 7:16) Wɔ fɛɛ wɔyɛ wɔ fatɔɔi kɛ wɔgbɔjɔmɔi. Wɔkɛ enɛɛmɛi akashwɛ taakɛ Abonsam feɔ lɛ. Shi moŋ, nyɛhaa wɔkɛ hewalɛwoo awiea wɔnyɛmimɛi lɛ kɛ Yehowa webii akɛ kuu ni ato amɛ gbɛjianɔ lɛ ahe. Wɔmiisumɔ ni wɔya nɔ wɔha wɔhe tsui, no hewɔ lɛ nyɛtsia nyɛhe kɛjɛa mɛi krokomɛi atsuii ni nyɛaakumɔ lɛ he.
Wɔwowoo Wɔhe Hewalɛ Beni Gbi lɛ Bɛŋkɛɔ Lɛ
22, 23. (a) Mɛni hewɔ esaaa akɛ wɔshiɔ onukpai lɛ akɛ amɛ pɛ amɛfee hewalɛwoo jɛɛhei lɛ? (b) Mɛɛ gbɛ nɔ aaatsɔ awo nɔkwɛlɔi ni yɔɔ Kristofoi asafo lɛ mli lɛ hewalɛ yɛ?
22 Esa akɛ wɔkɛfee wɔfaishitswaa akɛ wɔɔwowoo wɔhe hewalɛ yɛ be fɛɛ mli yɛ be mli ni gbi lɛ bɛŋkɛɔ nɛɛ. Tsɔ onɔkwayeli he nɔkwɛmɔ nɔ kɛ miishɛjemɔ wiemɔi anɔ owo mɛi krokomɛi hewalɛ. Kasemɔ Yehowa kɛ Nuŋtsɔ Yesu Kristo yɛ enɛ gbɛfaŋ. Kaashi hewalɛwoo jɛɛhe lɛ oha asafo lɛ mli onukpai lɛ pɛ akɛ amɛ amɛfee. Ejaakɛ hewalɛwoo he miihia onukpai lɛ hu. Amɛyɛ amɛgbɔjɔmɔi kɛ fatɔɔi taakɛ asafoku lɛ fɛɛ hu ji lɛ, ni esa akɛ amɛkɛ naagbai ni kɔɔ amɛwekui ni amɛaaha amɛ nibii ni he hiaa amɛ yɛ jeŋ ni kpɔtɔɔ nɛɛ mli lɛ nɔŋŋ hu akpe. Kɛfata no he lɛ, amɛyɛ nɔ ni Paulo tsɔɔ mli akɛ yeyeeye ni amɛfeɔ yɛ asafoi lɛ ahe lɛ. (2 Korintobii 11:28, 29) Amɛnɔ̃ lɛ ji nitsumɔ ni wa —hewalɛwoo he miihia amɛ.
23 Obaanyɛ owo mɛi ni akɛ nɔkwɛmɔ gbɛhei ewo amɛdɛŋ yɛ Kristofoi asafo lɛ mli lɛ hewalɛ babaoo kɛtsɔ ekome ni okɛ amɛ aaafee lɛ nɔ. Kɛkɛ lɛ obaanyiɛ ŋaawoo ni yɔɔ Hebribii 13:17 lɛ sɛɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee ŋtsɔidɔɔmɔ; ejaakɛ no ehiii haaa nyɛ.”
24. Mɛni esa akɛ wɔfeɔ yɛ nijiaŋwujee gbii nɛɛ amli, ni mɛni hewɔ?
24 Nijiaŋwujee gbi mli wɔyɔɔ nɛɛ. Gbɔmɛi atsuii efa diɛŋtsɛ yɛ gbeyei kɛ nibii ni amɛkpaa gbɛ akɛ eeba shikpɔŋ lɛ nɔ taakɛ Yesu gba fɔ shi lɛ hewɔ. (Luka 21:25, 26) Akɛni naagbai ni nyɛɔ mɔ nɔ ni kumɔɔ mɔ tsui efa babaoo hewɔ lɛ, nyɛ “wowooa nyɛhe hewalɛ, ni titri lɛ akɛni nyɛnaa akɛ gbi lɛ miibɛŋkɛ nɛɛ.” [NW] Nyiɛmɔ bɔfo Paulo ŋaawoo kpakpa ni yɔɔ 1 Tesalonikabii 5:11 [NW] lɛ sɛɛ: “Nyɛyaa nɔ nyɛshɛjea nyɛhe mii ni nyɛtswaa nyɛhe nyɛmaa shi, taakɛ yɛ anɔkwale mli lɛ nyɛyaa nɔ nyɛfeɔ lɛ.”
Te Obaaha Hetoo Oha Tɛŋŋ?
◻ Mɛni hewɔ esa akɛ Kristofoi awowoo amɛhe hewalɛ, ni babaoo po fe tsutsu Iɛ?
◻ Gbɛi krɔŋkrɔŋ Iɛ he nilee ewo Yehowa webii hewalɛ yɛ mɛɛ gbɛ nɔ?
◻ Mɛɛ gbɛi anɔ nɛkɛ akɛ aŋkroaŋkroi Iɛ wɔɔnyɛ wɔwowoo wɔhe hewalɛ yɛ?
◻ Mɛni hewɔ ni esa akɛ wɔtsi wɔhe kɛjɛ wɔhe ni wɔkɛaawo Abonsam nitsumɔ ni ekɛjeɔ wɔnyɛmimɛi lɛ anijiaŋ wui lɛ mli Iɛ?
[Mfoniri ni yɔɔ baafa 17]
Onukpai Iɛ nyiɛɔ hiɛ ni amɛwoɔ tooku Iɛ hewalɛ yɛ amɛsafoi Iɛ amli