Yehowa Wiemɔ lɛ Miigbɛ Eeshwã Oyayaayai yɛ “Okropɔŋ Shikpɔŋ” lɛ Nɔ

“OKROPƆŊ shikpɔŋ.” Nakai ji bɔ ni Albaniabii lɛ tsɛ́ɔ amɛmaŋ lɛ yɛ amɛwiemɔ mli. Maŋ nɛɛ yɛ Balkan Ŋshɔkpɔ ni yɔɔ Adria Ŋshɔ lɛ mli lɛ nɔ, ni eyɛ Greece kɛ tsutsu Yugoslavia maŋ lɛ teŋ. Eyɛ mli akɛ mɛi hiɛ susumɔi srɔtoi yɛ hé pɔtɛɛ ni Albaniabii lɛ jɛ lɛ he moŋ, shi yinɔsaneŋmalɔi babaoo kpɛlɛɔ nɔ taakɛ wolo ni ji The Encyclopædia Britannica lɛ tsɔɔ lɛ, akɛ blema Illyriabii ní hi shi yɛ afi 2000 D.Ŋ.B. lɛ aseshibii ji Albaniabii lɛ.

Adebɔɔ nibii fɛfɛji ni yɔɔ Albania lɛ ekomɛi ji gɔji kɛ amɛyiteŋ piɔpiɔ ni yɔɔ maŋ lɛ kooyigbɛ shɔŋŋ lɛ, kɛ ŋshɔnaa shia yɛŋ babaoo ni yɔɔ Adria Ŋshɔ lɛ naa yɛ ewuoyigbɛ lɛ. Shi kɛlɛ, nɔ ni haa mɔ mii shɛɔ ehe jogbaŋŋ yɛ maŋ nɛɛ he ji su ni emlibii lɛ yɔɔ lɛ. Amɛdɔɔ mɔ he, amɛfeɔ gbɔ, amɛkɛ mɔ gbaa sane kɛ miishɛɛ, amɛjwɛŋmɔ mɔɔ nii oya waa, ni amɛjɛɔ henumɔ mli amɛkɛ amɛhiɛ su kɛ ninefɔ̃ɔ jieɔ amɛsusumɔi akpo yɛ saji ahe.

Maŋsɛɛ Sanekpakpa Shiɛlɔ ko ní Ale lɛ Waa Tee Jɛmɛ

Ŋwanejee ko bɛ he akɛ, sui kpakpai ní maŋbii lɛ yɔɔ kɛ bɔ ni maŋ lɛ mli yɔɔ fɛo ha lɛ mɔ nuu ko ni efã gbɛ saŋŋ ní hi shi afii ohai babaoo ni eho lɛ tsui. Aaafee afi 56 Ŋ.B. lɛ, bɔfo Paulo ni efãfãi gbɛ̀i babaoo lɛ ŋma akɛ: “Kɛyashi Ilirikum ni mishiɛ Kristo sanekpakpa lɛ migbe naa.” (Romabii 15:19) He ni ŋmɛnɛŋmɛnɛ beaŋ Albania maŋ-te-lɛŋ kɛ ekooyigbɛ yɔɔ lɛ ji he ni Ilirikum maŋ lɛ hi. No mli lɛ, Paulo ŋma wolo lɛ kɛjɛ Korinto ni yɔɔ Hela yɛ Ilirikum wuoyigbɛ lɛ. Bɔ ni etsɔɔ akɛ eshiɛ kɛtee shɔŋŋ “kɛyashi Ilirikum” lɛ tsɔɔ akɛ ekolɛ eshiɛ kɛtee maŋ nɛɛ husui anaa loo ákɛ eyashiɛ yɛ maŋ lɛ mli diɛŋtsɛ. Kɛ́ husui lɛ anaa eyashɛ loo etee maŋ lɛ mli diɛŋtsɛ jio lɛ, yɛ fɛɛ mli lɛ, eshiɛ yɛ maŋ ni yɔɔ he ni Albania wuoyigbɛ yɔɔ ŋmɛnɛ lɛ mli. No hewɔ lɛ, abaanyɛ akɛɛ akɛ Paulo ji mɔ tsutsu ni kɛ Maŋtsɛyeli shiɛmɔ nitsumɔ lɛ tee Albania.

Afii ohai abɔ baho. Nɔyelii babaoo tetee shi ni amɛgbegbee shi. Maŋsɛɛ bii ye Albania ni ji maŋ bibioo ni yɔɔ Europa nɛɛ nɔ kɛyashi ená heyeli yɛ afi 1912 lɛ mli. Aaafee afii nyɔŋma sɛɛ lɛ, aje Yehowa Maŋtsɛyeli lɛ he shiɛmɔ nitsumɔ lɛ shishi ekoŋŋ yɛ Albania.

Nitsumɔ lɛ Je Shishi yɛ Ŋmɛnɛŋmɛnɛ Beaŋ yɛ Gbɛ ni Yɔɔ Miishɛɛ Nɔ

Yɛ afi 1920 afii lɛ amli lɛ, Albaniabii fioo komɛi ní fã gbɛ kɛtee United States, ní amɛkɛ International Bible Students taakɛ atsɛ́ɔ Yehowa Odasefoi yɛ nakai beaŋ lɛ yabɔ lɛ ku amɛsɛɛ kɛba Albania koni amɛbatsɔɔ mɛi nɔ ni amɛyakase lɛ. Amɛteŋ mɔ kome ji Nasho Idrizi. Mɛi komɛi bo amɛ toi. Bɔni afee ni anyɛ atsu miishɛɛ ni mɛi babaoo jieɔ lɛ kpo yɛ sanekpakpa lɛ he lɛ he nii lɛ, yɛ afi 1924 lɛ, akɛ nitsumɔ wo Romania nitsumɔhe nine lɛ dɛŋ koni ekwɛ Albania shiɛmɔ nitsumɔ lɛ nɔ.

Mɛi ni kase Yehowa he nii yɛ Albania yɛ nakai beaŋ lɛ ateŋ mɔ kome ji Thanas Duli (Athan Doulis). Ewie akɛ: “Yɛ afi 1925 mli lɛ, no mli lɛ asafoi etɛ yɔɔ Albania, ni ayɛ Biblia Kaselɔi komekome kɛ mɛi ni yɔɔ wiemɔ lɛ he miishɛɛ hu yɛ maŋ lɛ mli hei krokomɛi. Ni kɛ́ akɛ suɔmɔ ni amɛjieɔ lɛ kpo yɛ amɛteaŋ lɛ to . . . gbɔmɛi ni yɔɔ amɛkpokpai lɛ anɔ lɛ anɔ̃ he lɛ, anaa akɛ suɔmɔ ni amɛyɔɔ kɛha amɛhe lɛ mli wa jogbaŋŋ!”a

Akɛni no mli lɛ, gbɛjegbɛi kpakpa tsɔ ko bɛ maŋ lɛ mli hewɔ lɛ, no ha gbɛfãa yawa waa. Fɛɛ sɛɛ lɛ, shiɛlɔi ni yɔɔ ekãa lɛ damɔ naagba nɛɛ naa. Ákɛ nɔkwɛmɔnɔ lɛ, abaptisi Areti Pina yɛ afi 1928 mli yɛ Vlorë ŋshɔ lɛ wuoyigbɛ, no mli lɛ eye afii 18. Etsɔmɔɔ gɔji kɛ amɛyiteŋ piɔpiɔ kɛ jɔɔi amli ní ehiɛ Biblia yɛ edɛŋ eeshiɛ. No mli lɛ, efata asafo ni hi shi yɛ Vlorë yɛ afi 1930 afii lɛ amli ní mlibii yɔɔ ekãa lɛ ahe.

Beni shɛɔ afi 1930 lɛ, no mli lɛ nitsumɔhe nine ni yɔɔ Athens yɛ Greece lɛ ajɛɔ akwɛɔ shiɛmɔ nitsumɔ lɛ nɔ yɛ Albania. Yɛ afi 1932 lɛ mli lɛ, Kpokpaa nɔkwɛlɔ ko ni jɛ Greece yasara nyɛmimɛi ni yɔɔ Albania lɛ, ni ewo amɛ hewalɛ. No mli lɛ, mɛi ni kaseɔ Biblia mli anɔkwalei lɛ yɛ nakai beaŋ lɛ ateŋ mɛi babaoo yɛ hiɛnɔkamɔ akɛ amɛbaaya ŋwɛi. Gbɛi kpakpa ni amɛná akɛ mɛi ni he tse, ní feɔ jalɛ nii lɛ ha abu amɛ yɛ he fɛɛ he. Nɛkɛ hii anɔkwafoi nɛɛ anitsumɔ lɛ wo yibii babaoo. Yɛ afi 1935 mli lɛ, aja Biblia kasemɔ woji ni naa shɛɔ 6,500 yɛ Albania, ni aja woji nɛɛ yibɔ ni shɛɔ nakai nɔŋŋ yɛ afi ni nyiɛ sɛɛ ni ji afi 1936 lɛ hu mli.

Gbi ko lɛ, Nasho Idrizi yatswa maŋshiɛmɔi ni J. F. Rutherford ha ní amɔmɔ awo gramafon plɛte nɔ lɛ ateŋ ekome yɛ Vlorë maŋ-te-lɛŋ. Mɛi ŋamɔ amɛnitsumɔhei ni amɛbabo Nyɛminuu Idrizi toi beni etsɔɔ wiemɔ lɛ shishi kɛyaa Albania wiemɔ mli lɛ. Aha nitsumɔ ni nakai mra be mli Biblia tsɔɔlɔi lɛ kɛ ekãa tsu lɛ wo yibii babaoo. Beni shɛɔ afi 1940 lɛ, no mli lɛ aná Odasefoi 50 yɛ Albania.

Maŋ ni Emlibii Heɔ Yeɔ akɛ Nyɔŋmɔ Bɛ

Yɛ afi 1939 lɛ, Italy Fascistbii baŋɔ maŋ lɛ. Ashɔ̃ mla naa hegbɛ ni Yehowa Odasefoi yɔɔ lɛ yɛ amɛdɛŋ, ni atsĩ amɛshiɛmɔ nitsumɔ lɛ naa. No sɛɛ etsɛɛɛ ni Germany asraafoi batutua maŋ lɛ. Beni Jeŋ Ta II lɛ ba naagbee lɛ, asraafonyo hiɛnyiɛlɔ ko ní náa mɛi anɔ hewalɛ bate shi, ni egbɛi ji Enver Hoxha. Komunist Maŋkwramɔŋ Kuu ni eyɔɔ mli lɛ ye oshiki ni afɔ̃ yɛ afi 1946 lɛ, ni ebatsɔ maŋsɔɔlɔ nukpa. Abale afii ni nyiɛ sɛɛ ba lɛ akɛ heyeli afii, shi ebafee yiwalɛ afii moŋ kɛha Yehowa webii lɛ.

Fiofio lɛ, miishɛɛ ni nɔyeli lɛ yɔɔ yɛ jamɔ he lɛ bɔi shi baa. Ákɛ Kristofoi ni kɛ amɛhe wooo maŋ saji amli lɛ, Yehowa Odasefoi ni yɔɔ Albania yɛ nakai beaŋ lɛ kpoo akɛ amɛaakɔlɔ tui ní amɛkɛ amɛhe awo maŋkwramɔŋ saji amli. (Yesaia 2:2-4; Yohane 15:17-19) Awo amɛteŋ mɛi babaoo tsuŋ, ni ahaaa amɛ niyenii loo shihilɛ mli hiamɔ nibii. Yɛ amɛteŋ mɛi pii agbɛfaŋ lɛ, nyɛmimɛi yei ni ji Odasefoi ni awoko amɛtsuŋ lɛ ji mɛi ni fɔ́ amɛtadei ahe, ni amɛhoo nii hu amɛha amɛ.

Amɛsheee Gbeyei yɛ Yiwaa lɛ Fɛɛ Sɛɛ

Yɛ afi 1940 afii lɛ shishijee mli lɛ, Frosina Xheka ní yɛ nakai beaŋ lɛ eji oblayoo fioo yɛ akrowa ni bɛŋkɛ Përmet lɛ baná ele nibii ni Odasefonyo ko ni atsɛ́ɔ lɛ Nasho Dori ní eji aspaaterefeelɔ lɛ kɛ lɛ Frosina diɛŋtsɛ nyɛmimɛi hii onukpai lɛ kaseɔ lɛ.b No mli lɛ, nɔyeli lɛ miifee keketee yɛ Yehowa Odasefoi lɛ anɔ, shi Frosina hemɔkɛyeli mli bawa, ni efɔlɔi náaa enɛ he miishɛɛ kwraa. Frosina tsɔɔ mli akɛ: “Amɛloɔ tokota ni miwoɔ lɛ kɛtoɔ, ni kɛ́ mitee Kristofoi akpeei miba lɛ, amɛyiɔ mi. Amɛto gbɛjianɔ koni mikɛ nuu ko ni heee yeee abote gbalashihilɛ mli. Akɛni mikpoo akɛ mafee nakai hewɔ lɛ, amɛshwie mi kɛjɛ shia lɛ mli. Nakai gbi lɛ, snoo miinɛ. Nasho Dori kɛɛ Nyɛminuu Gole Flloko ni yɔɔ Gjirokastër lɛ koni eye ebua mi. Amɛto gbɛjianɔ ni mikɛ eweku lɛ yahi shi. Awo minyɛmimɛi hii lɛ tsuŋ afii enyɔ yɛ amɛhe ni amɛkɛwooo maŋ saji amli lɛ hewɔ. Beni aŋmɛɛ amɛhe lɛ, miyahi amɛŋɔɔ yɛ Vlorë.

“Polisifoi nyɛ minɔ koni mikɛ mihe awo maŋkwramɔŋ nifeemɔi amli. Mikpoo akɛ mafee nakai. Amɛmɔ mi kɛyawo tsũ ko mli, ni amɛbɔle mihe kɛkpe. Amɛteŋ mɔ kome wo mihe gbeyei akɛ: ‘Ani ole nɔ ni wɔbaafee bo?’ Miha lɛ hetoo akɛ: ‘Nɔ ni Yehowa baaŋmɛ nyɛ gbɛ akɛ nyɛfee lɛ pɛ nyɛbaanyɛ nyɛfee.’ Ekɛ mlifu jie naa akɛ: ‘Efeɔ mi akɛ ooye sɛkɛ! Jee biɛ ni oya!’”

Nyɛmimɛi ni hi Albania yɛ nakai beaŋ lɛ hu ye anɔkwa ni tamɔ nakai nɔŋŋ. Beni shɛɔ afi 1957 lɛ, no mli lɛ aná Maŋtsɛyeli shiɛlɔi ayifalɛ ni fe fɛɛ ni ji mɛi 75. Yɛ afi 1960 afii lɛ shishijee lɛ, Yehowa Odasefoi anitsumɔhe yitso lɛ to gbɛjianɔ koni John Marks ni ji Albanianyo ni yɔɔ United States lɛ aya Tiranë ni eyaye ebua kɛto Kristofoi anitsumɔ lɛ he gbɛjianɔ yɛ jɛmɛ.c Shi no sɛɛ etsɛɛɛ ni ayawo Luçi Xheka, Mihal Sveci, Leonidha Pope, kɛ nyɛmimɛi hii krokomɛi ni hiɛ sɔɔmɔ hegbɛi lɛ atsuŋ yɛ tsuŋwoohei ní ahaa emli gboklɛfoi tsuɔ nii dɛŋdɛŋ lɛ.

Shihilɛ ni Naa Wa lɛ Sɛɛ Fo

Dani afi 1967 lɛ baashɛ lɛ, no mli lɛ abɛ jamɔi ahe miishɛɛ kwraa yɛ Albania. Sɛɛ mli lɛ, akpɛlɛɛɛ jamɔ ko kwraa nɔ. Katolik, Ɔrtodɔks, loo Muslim jamɔ lɛ mli osɔfo ko nyɛɛɛ eyasɔle yɛ maŋ nifeemɔi ashishi. Aŋamɔ sɔlemɔtsũi kɛ muslimbii lɛ ajamɔhei lɛ ekomɛi, ni nɔ ni shwɛ lɛ, akɛfee shwɛmɔhei, blema nibii atoohei, kɛ jarayelihei. Aŋmɛɛɛ mɔ ko mɔ ko gbɛ ni ehiɛ Biblia. Aŋmɛɛɛ mɔ ko gbɛ ní ejie hemɔkɛyeli ni eyɔɔ yɛ Nyɔŋmɔ mli lɛ kpo.

Shiɛmɔyaa kɛ kpeei ni afeɔ kutuu batsɔ ta. Eyɛ mli akɛ Odasefoi lɛ nyɛɛɛ afee nii kutuu moŋ, shi amɛteŋ mɔ fɛɛ mɔ kɛ enyɛmɔ fɛɛ sɔmɔ Yehowa. Kɛjɛ afi 1960 kɛyashi afi 1980 afii lɛ amli lɛ, Odasefoi ni yɔɔ maŋ lɛ mli lɛ ayifalɛ nɔ gbɔ kwraa. Fɛɛ sɛɛ lɛ, amɛfi shi shiŋŋ yɛ mumɔŋ.

Yɛ afi 1980 afii lɛ anaagbee gbɛ lɛ, nibii bɔi tsakemɔ fiofio yɛ Albania maŋkwramɔŋ saji amli. Niyenii kɛ hehaanii ahe basɛ̃. Enɛ haaa mɛi aná miishɛɛ. Tsakemɔi ni no mli lɛ eyaa nɔ yɛ Europa Bokagbɛ maji lɛ amli lɛ yashɛ Albania yɛ afi 1990 afii lɛ shishijee mli. Beni akɛ yiwaa eye maŋ lɛ nɔ afii 45 sɛɛ lɛ, nɔyeli hee ni ba lɛ ŋmɛ gbɛ ni mɔ fɛɛ mɔ kɛ ehe wo jamɔ ni esumɔɔ mli ekoŋŋ.

Yɛ Yehowa Odasefoi lɛ a-Nɔyeli Kuu lɛ gbɛtsɔɔmɔ naa lɛ, nitsumɔhe niji ni yɔɔ Austria kɛ Greece lɛ je shishi amɛkɛ nyɛmimɛi ni ji Albaniabii lɛ bɔi sharamɔ amrɔ nɔŋŋ. Nyɛmimɛi ni jɛ Greece ní wieɔ Albaniabii awiemɔ lɛ kɛ Biblia kasemɔ woji hee ni atsɔɔ shishi lɛ ekomɛi tee Tiranë kɛ Berat. Nyɛmimɛi ni kulɛ amɛgbɛ amɛshwã maŋ lɛ mli lɛ amii shɛ amɛhe babaoo beni amɛkɛ Odasefoi ni jɛ maŋsɛɛ lɛ kpe ekoŋŋ nɔ ni ji klɛŋklɛŋ kwraa lɛ, ejaakɛ afii babaoo ho ní amɛkpeee.

Gbɛgbalɔi ni Yɔɔ Ekãa ni Jɛ Maŋsɛɛ Nyiɛ Nitsumɔ lɛ Hiɛ

Yɛ afi 1992 lɛ shishijee mli lɛ, Nɔyeli Kuu lɛ to gbɛjianɔ kɛha Michael DiGregorio ni enyɛ jɛ Albania kɛ eŋa Linda DiGregorio ni amɛji maŋsɛɛ sanekpakpa jajelɔi lɛ ni amɛshĩ kɛtee Albania. Beni amɛyashɛ lɛ, amɛyatao anɔkwafoi ni edara yɛ afii amli lɛ, ni amɛye amɛbua amɛ ni amɛkɛ mumɔŋ weku ni gbɔmɛi ni jɛ maji srɔtoi amli yɔɔ mli bafee ekome ekoŋŋ. Yɛ November mli lɛ, Italy gbɛgbalɔi krɛdɛɛi loo be-fɛɛ sɔɔlɔi 16 ní tsuɔ nii waa tee jɛmɛ, ni daa gbɛgbalɔi ejwɛ hu ni jɛ Greece fata amɛhe kɛtee. Ato wiemɔ kasemɔ he gbɛjianɔ koni akɛye abua gbɛgbalɔi lɛ ni amɛkase Albania wiemɔ lɛ.

Gbɛgbalɔi ni jɛ maŋsɛɛ lɛ eyanáaa jɛmɛ shihilɛ ogbɔjɔ. Anyɛɛɛ amu afɔ̃ sarawa hewalɛ ni yɔɔ jɛmɛ lɛ nɔ. Yɛ fɛ̃i be mli lɛ, fɛ̃i yeɔ waa, ni kɔɔyɔɔ lɛ mli jɔɔ ŋanii. Mɛi toɔ srɛnɛɛ ŋmɛlɛtswai abɔ ni amɛyaahé niyenii kɛ shihilɛ mli hiamɔ nibii krokomɛi. Shi kɛlɛ, naagba wulu ni nyɛmimɛi lɛ kɛkpe ji bɔ ni amɛaafee amɛná tsũ ni da bɔ ni sa ní amɛkɛ mɛi babaoo ni jieɔ miishɛɛ kpo yɛ anɔkwale lɛ he lɛ baakpe yɛ mli!

Gbɛgbalɔi ni bɔɔ mɔdɛŋ koni amɛkase Albania wiemɔ lɛ yɔse akɛ, nɔ ko fioo kɛkɛ mɔ naa ní aaatse yɛ wiemɔ ko mli lɛ tsuɔ. Nuu ni kɛ afii babaoo etsɔɔ mɛi Biblia lɛ mli ni yɔɔ niiashikpamɔ babaoo lɛ kɛɛ amɛ akɛ: “Ehe ehiaaa ni wɔnaa atse yɛ wiemɔ lɛ mli dani wɔnyɛ wɔha wɔhiɛ afee ŋmɔlɔŋmɔlɔ kɛ miishɛɛ loo ni wɔfua wɔnyɛmimɛi lɛ atuu. Kɛ́ nyɛjɛ nyɛtsuiiaŋ nyɛjie suɔmɔ kpo nyɛtsɔɔ Albaniabii lɛ, no lɛ amɛbaabo nyɛ toi, shi jeee naatselɛ ní nyɛkɛaawie lɛ baaha amɛfee nakai. Nyɛkahaoa nyɛhe, amɛbaanu nyɛ shishi.”

Beni gbɛgbalɔi klɛŋklɛŋ ní atsɔɔ amɛ wiemɔ lɛ kasemɔ lɛ gbe amɛtsɔsemɔ lɛ naa lɛ, amɛyaje shiɛmɔ nitsumɔ lɛ shishi yɛ Berat, Durres, Gjirokastër, Shkodër, Tiranë, kɛ Vlorë. Etsɛɛɛ ni ato asafoi babaoo ashishi yɛ nakai maŋtiasei lɛ amli. No mli lɛ, Areti Pina, ní eye afii 80 ni ebɛ gbɔmɔtsoŋ hewalɛ lɛ kã he eyɛ Vlorë. Atsu gbɛgbalɔi krɛdɛɛi enyɔ kɛtee jɛmɛ koni amɛyafata Areti he kɛshiɛ. Beni maŋbii lɛ na akɛ maŋsɛɛ bii lɛ miiwie Albania wiemɔ lɛ, efee amɛ naakpɛɛ, ni amɛkɛɛ akɛ: “Kɛ́ jamɔi krokomɛi amlibii ni fãa gbɛ kɛyaa maŋsɛɛ koni amɛyagbɛ amɛjamɔŋ tsɔɔmɔi lɛ amɛshwã lɛ miitao amɛtsɔɔ wɔ nɔ ko lɛ, amɛhaa wɔkaseɔ Blɔfo loo Italy wiemɔ dani amɛtsɔɔ wɔ. Albania wiemɔ ni nyɛkase lɛ tsɔɔ akɛ nyɛsumɔɔ wɔ sane diɛŋtsɛ, ni ákɛ nyɛyɛ shɛɛ sane ko ni he hiaa waa kɛha wɔ!” Areti kɛ anɔkwayeli gbe eshikpɔŋ nɔ sɔɔmɔ lɛ naa yɛ January afi 1994 mli, ni ekɛ ekãa tee nɔ eshiɛ kɛyashi nyɔŋ nɔ ni egbo lɛ. Aha nitsumɔ ni gbɛgbalɔi lɛ kɛ ekãa tsu lɛ shwere babaoo. Yɛ afi 1995 mli lɛ, aku sɛɛ ato asafo shishi yɛ Vlorë. Ŋmɛnɛ, ayɛ asafoi etɛ ní miishwere yɛ maŋ ni lɛjiadaamɔhe yɔɔ nɛɛ mli, ni asafoi lɛ amlibii lɛ kɛ ekãa miishiɛ yɛ jɛmɛ.

He fɛɛ he ni obaatsɔ yɛ maŋ lɛ mli lɛ, obaana mɛi ni mumɔŋ hɔmɔ miiye amɛ, ní amɛhiɛɛɛ jwɛŋmɔ gbonyo tsɔ ko yɛ jamɔ he. Amɛŋɔɔ Biblia kasemɔ woji fɛɛ ní Odasefoi lɛ kɛhaa amɛ lɛ, ni amɛkaseɔ. Oblahii lɛ oblayei lɛ ateŋ mɛi babaoo kpɛlɛ ni akɛ amɛ je nikasemɔ shishi, ni amɛtee hiɛ oyayaayai.

Asafoi kɛ kui ni fe 90 ni yɔɔ maŋ lɛ mli fɛɛ lɛ miiya nɔ ‘amɛmiiná hewalɛ yɛ hemɔkɛyeli mli, ni amɛyi miifá daa nɛɛ.’ (Bɔfoi lɛ Asaji 16:5) Odasefoi 3,513 ni yɔɔ Albania lɛ yɛ nitsumɔ babaoo lolo ní amɛbaatsu. Yɛ March afi 2005 lɛ, mɛi 10,144 ba Kristo gbele lɛ Kaimɔ lɛ shishi. Nɔ ni ejɛ Albaniabii ni jieɔ gbɔfeemɔ su kpo ní ashiɛ atsɔɔ nɛɛ mli kɛba ji akɛ, akɛ mɛi ni fa fe 6,000 sɔŋŋ miikase Biblia lɛ. Ekã shi faŋŋ akɛ, amɛteŋ akpekpei abɔ miiná New World Translation ní atsɔɔ shishi yɛ Albania wiemɔ mli ni ajie lɛ kpo nyɛsɛɛ nɛɛ he sɛɛ. Yɛ anɔkwale mli lɛ, Yehowa wiemɔ lɛ miigbɛ eeshwã “Okropɔŋ Shikpɔŋ” lɛ nɔ kɛmiiwo Yehowa hiɛ nyam.

[Shishigbɛ niŋmai]

[Akrabatsa ni yɔɔ baafa 20]

WEKUI ATEŊ BÉI ASƐƐ EFO YƐ KOSOVO!

Yɛ afi 1990 afii lɛ anaagbee gbɛ beni shikpɔji ahe pelemɔ kɛ hetsɛ̃ ni naa wa ni no mli lɛ eyɔɔ wekui ateŋ lɛ ha ta fɛ́ yɛ Kosovo, ní maji krokomɛi kɛ amɛhe bawo mli lɛ, no ha maŋ nɛɛ gbɛi bakã mɛi alilɛi nɔ yɛ he fɛɛ he.

Beni ta lɛ yaa nɔ yɛ maji ni yɔɔ Balkan ŋshɔkpɔ lɛ nɔ lɛ ateŋ lɛ, ehe bahia ni Odasefoi babaoo ajo foi kɛya maji krokomɛi ni bɛŋkɛ lɛ amli. Beni ta lɛ naa ba shi lɛ, amɛteŋ mɛi fioo ku amɛsɛɛ kɛtee Kosovo koni amɛyatsu shiɛmɔ nitsumɔ lɛ. Gbɛgbalɔi krɛdɛɛi ní jɛ Albania kɛ Italy kɛ amɛhe ha akɛ amɛbaashi kɛya Kosovo ni amɛyaye amɛbua maŋbii ni yifalɛ shɛɔ 2,350,000 ni yɔɔ jɛmɛ lɛ. Amrɔ nɛɛ shiɛlɔi 130 ni yɔɔ asafoi ejwɛ kɛ kui ekpaa amli ní kɛ ekãa miitsu nii lɛ miisɔmɔ Yehowa yɛ shikpɔŋkuku nɛɛ mli.

Yɛ afi 2003 lɛ mli agbiɛnaa be mli lɛ, afee gbi kome kpee krɛdɛɛ yɛ Priština, ni mɛi 252 tee kpee nɛɛ. Aŋkroaŋkroi komɛi ni ji Albaniabii, Germanybii, Gypsybii, Italiabii, kɛ Serbiabii hu tee kpee nɛɛ eko. Beni mɔ ni haa baptisimɔ wiemɔ lɛ gbe ewiemɔ lɛ naa lɛ, ebi saji enyɔ. Mɛi etɛ te shi amɛdamɔ shi ni amɛha sanebimɔi lɛ ahetoo akɛ hɛɛ: nuu ni yɔɔ mli lɛ jɛ Albania, ni yei enyɔ ni eshwɛ lɛ ateŋ mɔ kome jɛ Gypsy, ni mɔ kroko lɛ hu jɛ Serbia.

Beni mɛi etɛ ní abaabaptisi amɛ lɛ kɛ gbeewalɛ ha sanebimɔi lɛ ahetoo yɛ be kometoo mli akɛ: “Va!,” “Da!,” kɛ “Po!” lɛ sɛɛ lɛ, toibolɔi lɛ tswa amɛdɛŋ waa, ni ejije kɛtee shɔŋŋ. Mɛi etɛ lɛ fuafua amɛhe. Amɛná béi ni mli wawai ní yɔɔ wekui lɛ ateŋ ní eye amɛmaŋ lɛ awui lɛ anaa tsabaa.

[Shikpɔŋ he mfoniri ni yɔɔ baafa 17]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Mediterranean Ŋshɔ

ITALY

ALBANIA

GREECE

[Mfoniri ni yɔɔ baafa 18]

Odasefoi oblahii kɛ oblayei lɛ kaseɔ ekãa ní mɛi ni edara lɛ jieɔ lɛ kpo lɛ

[Mfoniri ni yɔɔ baafa 18]

Areti Pina kɛ anɔkwayeli sɔmɔ kɛjɛ afi 1928 kɛyashi egbo yɛ afi 1994 mli

[Mfoniri ni yɔɔ baafa 19]

Gbɛgbalɔi ni jɛ maŋsɛɛ lɛ amli klɛŋklɛŋ bii ní miikase maŋ lɛ mli wiemɔ lɛ

[He ni Mfoniri ni yɔɔ baafa 16 lɛ Jɛ]

Okropɔŋ: © Brian K. Wheeler/VIREO