Paulo To Yelikɛbuamɔ Tooyeli He Gbɛjianɔ Kɛha Krɔŋkrɔŋbii Lɛ

MUMƆŊ sɛɛnamɔi ji nibii ni he hiaa anɔkwa Kristofoi titri. Shi kɛlɛ, mɛi krokomɛi aheloonaa hiamɔ nii ahe susumɔ hu he hiaa amɛ. Yɛ bei babaoo mli lɛ, amɛye amɛbua mɛi ni kɛ shihilɛ ni mli wa kpeɔ lɛ. Nyɛmimɛi asuɔmɔ kanyaa Kristofoi koni amɛye amɛbua hefatalɔi heyelilɔi ni ehia amɛ lɛ.—Yohane 13:34, 35.

Suɔmɔ ni bɔfo Paulo yɔɔ kɛha emumɔŋ nyɛmimɛi hii kɛ yei lɛ tsirɛ lɛ koni eto gbɛjianɔ ni atsu onia yɛ asafoi ni yɔɔ Akaia, Galatia, Makedonia, kɛ Asia kpokpaa lɛ nɔ lɛ amli. Mɛni ha enɛ he bahia? Mɛɛ gbɛ nɔ ato yelikɛbuamɔ gbɛjianɔtoo lɛ he gbɛjianɔ yɛ? Te akpɛlɛ nɔ aha tɛŋŋ? Ni mɛni hewɔ esa akɛ wɔná nɔ ni tee nɔ lɛ he miishɛɛ lɛ?

Shihilɛ Mli ni Yerusalem Asafo lɛ Yɔɔ

Yɛ Pentekoste afi 33 Ŋ.B. sɛɛ lɛ, Yudafoi kɛ mɛi ni etsake kɛba Yuda jamɔ mli ni jɛ hei krokomɛi ní amɛbatsɔmɔ kaselɔi yɛ Pentekoste lɛ hi shi yɛ Yerusalem be ko koni amɛkase nibii babaoo yɛ nɔ ni kɔɔ anɔkwa hemɔkɛyeli lɛ he. Kɛji ehe bahia lɛ, hefatalɔi jálɔi lɛ kɛ miishɛɛ yeɔ ebuaa kɛtsuɔ sɔ̃i ní jɛ amɛ shihilɛ yɛ jɛmɛ ni sɛɛ baagbala shi lɛ he nii. (Bɔfoi lɛ Asaji 2:7-11, 41-44; 4:32-37) Ekolɛ nɔ ni ejɛ maŋ basabasafeemɔ mli kɛba ji hiamɔ babaoo, yɛ be mli ni Yudafoi maŋhedɔlɔi étee atuatsemɔ kɛ basabasafeelɔi atutuamɔ shi lɛ. Shi kɛlɛ, bɔni afee ni hɔmɔ akaye Kristo sɛɛnyiɛlɔ ko lɛ, ayakwɛɔ okulafoi ni ehia amɛ lɛ. (Bɔfoi lɛ Asaji 6:1-6) Herode diɛŋtsɛ kɛ ehe wo asafo lɛ yiwaa mli waa, ni yɛ afi 40 Ŋ.B. lɛ teŋgbɛ lɛ, hɔmɔ ni naa wa ba Yudea. Yɛ Yesu sɛɛnyiɛlɔi lɛ agbɛfaŋ lɛ, ekolɛ enɛɛmɛi fɛɛ ba mli yɛ nɔ ni Paulo tsɛ lɛ ‘nɔnaai,’ “amanehului,” kɛ ‘amɛ nibii ni aaaha lɛ’ po mli lɛ.—Hebribii 10:32-34; Bɔfoi lɛ Asaji 11:27–12:1.

Yɛ aaafee afi 49 Ŋ.B. lɛ, shihilɛ lɛ kã he emli wa lolo. No hewɔ lɛ, be mli ni Petro, Yakobo, kɛ Yohane kpɛlɛ nɔ akɛ Paulo baaha ejwɛŋmɔ ahi Jeŋmajiaŋbii lɛ anɔ yɛ eshiɛmɔ nitsumɔ lɛ mli sɛɛ lɛ, amɛwo lɛ hewalɛ koni ‘ekai ohiafoi lɛ.’ No ji nɔ ni Paulo bɔ mɔdɛŋ akɛ ebaafee lɛ.—Galatabii 2:7-10.

Oniatsumɔ lɛ He Gbɛjianɔ ni Aaato

Paulo kwɛ shika ni abuaa naa kɛha Kristofoi ohiafoi ni yɔɔ Yudea lɛ nɔ. Yɛ aaafee afi 55 Ŋ.B. lɛ, ekɛɛ Korintobii lɛ akɛ: “Onia ni atsuɔ ayaha hetselɔi lɛ hewɔ lɛ, taakɛ bɔ ni mito miha Galatia asafoi lɛ, nyɛ hu nyɛfea nakai. Daa otsi mli klɛŋklɛŋ gbi lɛ nɔ lɛ, nyɛteŋ mɔ fɛɛ mɔ atĩa nɔ ko ato, yɛ bɔ ni enáa lɛ naa . . . [Kɛkɛ lɛ] matsu mɛi ni nyɛbuɔ akɛ amɛsa kɛ woji, ni amɛhiɛ nyɛnikeenii lɛ kɛya Yerusalem.” (1 Korintobii 16:1-3) Afi sɛɛ lɛ Paulo wie akɛ Makedonia kɛ Akaia hu kɛ amɛhe miiwo yelikɛbuamɔ nitsumɔ lɛ mli. Ni beni akɛ nibii lɛ tee Yerusalem lɛ, etamɔ nɔ ni Asia kpokpaa lɛ najiaŋdamɔlɔi ni naa ebakpe shi lɛ tsɔɔ akɛ asafoi ni yɔɔ nakai kpokpaa lɛ nɔ lɛ hu etsu too lɛ eko.—Bɔfoi lɛ Asaji 20:4; 2 Korintobii 8:1-4; 9:1, 2.

Ányɛɛɛ mɔ ko nɔ ni eha fe bɔ ni ebaanyɛ. Yɛ no najiaŋ lɛ, eji egbɔyeli sane, bɔni afee ni nɔtekemɔ fɛɛ nɔtekemɔ abaye fimɔ najiaŋ yɛ krɔkrɔŋbii lɛ ateŋ yɛ Yerusalem kɛ Yudea. (2 Korintobii 8:13-15) Paulo kɛɛ akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli: ejaakɛ tsuijurɔ naa halɔ Nyɔŋmɔ sumɔɔ.”—2 Korintobii 9:7.

Bɔfo lɛ ha Korintobii lɛ yiŋtoo kpakpa hewɔ ni esa akɛ amɛjie mlihilɛ kpo. Yesu ‘ebatsɔ ohiafo yɛ amɛhewɔ, bɔni afee ni amɛbatsɔmɔ niiatsɛmɛi’ yɛ mumɔŋ. (2 Korintobii 8:9) Eka shi faŋŋ akɛ amɛbaasumɔ ni amɛkase enihamɔ mumɔ lɛ. Kɛfata he lɛ, akɛni Nyɔŋmɔ miiwo amɛ hewalɛ ‘kɛha mlihilɛ fɛɛ mlihilɛ hewɔ lɛ,’ eji nɔ ni sa akɛ amɛye kɛbua koni akɛ krɔŋkrɔŋbii lɛ ahiamɔ nii lɛ aha amɛ.—2 Korintobii 9:10-12.

Mɛi ni Ná Gbɛfaŋnɔ yɛ Mli lɛ Asubaŋ

Wɔbaanyɛ wɔkase babaoo yɛ tsuijurɔ naa nihamɔ he kɛtsɔ mɛi ni ná gbɛfaŋnɔ yɛ klɛŋklɛŋ afii oha lɛ mli yelikɛbuamɔ gbɛjianɔtoo kɛha krɔŋkrɔŋbii lɛ asubaŋ lɛ ni wɔɔsusu he lɛ nɔ. Onia lɛ tsumɔ teke hefatalɔi Yehowa jálɔi ohiafoi lɛ ahe susumɔ kɛkɛ. Etsɔɔ akɛ nyɛmifeemɔ ni yɔɔ gbagbalii yɛ Yudafoi kɛ Jeŋmajiaŋbii Kristofoi lɛ ateŋ. Too ni ayeɔ kɛ enɔkpɛlɛmɔ lɛ tsɔɔ ekomefeemɔ kɛ naanyobɔɔ ni kã Jeŋmajiaŋbii kɛ Yudafoi nɛɛ ateŋ. Amɛnijaa lɛ ji heloo kɛ mumɔŋ naa nɔ̃.—Romabii 15:26, 27.

Ekolɛ yɛ shishijee mli lɛ Paulo efɔ̃ɔɔ nine etsɛɛɛ Makedonia Kristofoi lɛ koni amɛkɛ amɛhe awo mli—ejaakɛ amɛ hu amɛyɛ ohia shihilɛ ni mli wa mli. Shi kɛlɛ, ‘amɛtee nɔ amɛkpa fai ni aha amɛ nihamɔ lɛ mli hegbɛ.’ Shi, eyɛ mli akɛ amɛkɛ “amanehulu kaa babaoo” miikpe moŋ, shi amɛkɛ miishɛɛ ha “fe bɔ ni amɛaanyɛ tete yɛ amɛ diɛŋtsɛ amɛsuɔmɔ naa”! (2 Korintobii 8:1-4) Eka shi faŋŋ akɛ nɔ ni fata kaa wulu ni amɛkɛkpeɔ lɛ he ji naafolɔmɔi akɛ amɛkɛ amɛhe miiwo jamɔ ni Roma mla eŋmɛɛɛ gbɛ mli. No hewɔ lɛ eji nɔ ni shishinumɔ yɔɔ he akɛ amɛbaaaná mlitsɔlɛ amɛha amɛnyɛmimɛi ni yɔɔ Yudea lɛ, mɛi ni miina amanehulu yɛ shihilɛ ni mli wa ni tamɔ nakai nɔŋŋ mli lɛ.—Bɔfoi lɛ Asaji 16:20, 21; 17:5-9; 1 Tesalonikabii 2:14.

Eyɛ mli akɛ Paulo kɛ Korintobii lɛ ashishijee ekãa lɛ tsu nii kɛha tooyeli lɛ koni ekɛwo Makedoniabii lɛ hewalɛ moŋ, shi ekãa ni yɔɔ Korinto lɛ nɔ egbɔ. Agbɛnɛ bɔfo lɛ tsɛ Makedoniabii lɛ amlihilɛ lɛ yisɛɛ koni ekɛwaje Korintobii lɛ. Ena akɛ ehe miihia ni ekai amɛ akɛ be eshɛ ni esa akɛ amɛgbe nɔ ni amɛje shishi yɛ afi ni tsɔ hiɛ lɛ mli lɛ naa. Mɛni eba?—2 Korintobii 8:10, 11; 9:1-5.

Tito ji mɔ ni je tooyeli yɛ Korinto lɛ shishi, shi naagbai ba ni ekolɛ no fite emɔdɛŋbɔɔ lɛ. Beni Tito eyabi Paulo ŋaawoo yɛ Makedonia sɛɛ lɛ, ekɛ mɛi krokomɛi enyɔ ku sɛɛ kɛtee koni amɛyawo asafo ni yɔɔ Korinto lɛ hewalɛ ni amɛgbe tooyeli lɛ naa. Ekolɛ amɛteŋ mɛi komɛi wo yiŋ akɛ Paulo bɔ mɔdɛŋ koni eye Korintobii lɛ ahe nii. Ekolɛ enɛ hewɔ ni etsu hii etɛ koni amɛyagbe tooyeli nitsumɔ lɛ naa ni ejie amɛteŋ mɔ fɛɛ mɔ yi. Paulo kɛɛ akɛ: “Wɔmiitao enɛ naa wɔtsĩ, ni mɔ ko akawie wɔhe efɔŋ yɛ nɛkɛ nifalɛ ni wɔsɔmɔɔ yɛ he nɛɛ hewɔ; ejaakɛ wɔjwɛŋɔ nii ni yɔɔ fɛo lɛ anɔ wɔtoɔ, jeee yɛ Nuntsɔ lɛ hiɛ kɛkɛ, shi moŋ yɛ gbɔmɛi ahiɛ hu.”—2 Korintobii 8:6, 18-23; 12:18.

Tooyeli lɛ Kɛhamɔ

Beni shɛɔ afi 56 Ŋ.B. agbiɛnaa be mli lɛ, ábua shika ni akɛha lɛ naa ní akɛbaaya Yerusalem. Paulo kɛ najiaŋdamɔlɔi ni tooyelɔi lɛ ehala lɛ baaya. Bɔfoi lɛ Asaji 20:4 lɛ kɛɔ akɛ: “Ni Sopatre, Beroianyo lɛ, ni ji Pirho bi lɛ, kɛ Aristarko kɛ Sekundo, Tesalonikabii lɛ, kɛ Gaio, Derbenyo lɛ, kɛ Timoteo, kɛ Tihiko kɛ Trofimo, Asiabii lɛ, kɛ lɛ tee Asia.” Odaseyeli tsɔɔ faŋŋ akɛ, mɔ ni fata amɛhe hu ji Luka, mɔ ni ekolɛ edamɔ Kristofoi ni yɔɔ Filipi lɛ anajiaŋ lɛ. No hewɔ lɛ, kɛhoo kwraa lɛ hii nɛɛhu tsu nɛkɛ nitsumɔ nɛɛ.

Woloŋlelɔ Dieter Georgi wie akɛ: “Ekolɛ shika ni abua naa kɛha tooyeli lɛ fa saŋŋ, ejaakɛ kulɛ naagbee mɔdɛŋbɔi, ni Paulo kɛ najiaŋdamɔlɔi babaoo lɛ kɛtsu nii lɛ ebafeŋ nɔ ni sa naagba lɛ kɛ shika fitemɔ lɛ kwraa.” Jeee akɛ kuu lɛ tsu nii akɛ mɛi ni baakwɛ ni nɔ fɛɛ nɔ aya nɔ shweshweeshwe kɛkɛ, shi moŋ koni amɛbu Paulo he kɛjɛ naafolɔmɔ fɛɛ naafolɔmɔ ni kɔɔ anɔkwa ni eyeee lɛ he. Mɛi ni atsu lɛ yadamɔ Jeŋmajiaŋbii asafoi lɛ anajiaŋ yɛ krɔŋkrɔŋbii ni yɔɔ Yerusalem lɛ ahiɛ.

Kulɛ najiaŋdamɔlɔi akuu ni ta lɛlɛ mli kɛmiijɛ Korinto kɛya Siria lɛ baanyɛ ayashɛ Yerusalem yɛ Hehoo be lɛ mli. Shi kɛlɛ, amaniɛbɔɔ ni tsɔɔ ŋaa ni atsɔɔ koni agbe Paulo lɛ hã atsake gbɛjianɔtoi lɛ. (Bɔfoi lɛ Asaji 20:3) Ekolɛ ehenyɛlɔi lɛ ekpɛ amɛyiŋ akɛ amɛbaagbe lɛ yɛ ŋshɔ lɛ hiɛ.

Paulo yɛ nibii krokomɛi ni eesusu he. Dani ebaashi kɛya lɛ, eŋma Kristofoi ni yɔɔ Roma lɛ koni amɛsɔle koni ‘ajie lɛ yɛ toigbolɔi ni yɔɔ Yudea lɛ adɛŋ, koni esɔɔmɔ ni eyaasɔmɔ yɛ Yerusalem lɛ asa krɔŋkrɔŋbii lɛ ahiɛ jogbaŋŋ.’ (Romabii 15:30, 31) Eyɛ mli akɛ krɔŋkrɔŋbii lɛ kɛ shidaa babaoo baahe tooyeli lɛ ni ŋwanejee ko bɛ he moŋ, shi ekolɛ Paulo miisusu naagba ni ejɛmɛ shɛɛ lɛ baanyɛ ekɛba Yudafoi lɛ fɛɛ ateŋ lɛ he.

Eka shi faŋŋ akɛ bɔfo lɛ ha ohiafoi lɛ ahe susumɔ hi ejwɛŋmɔ mli. Yɛ be mli ni Ŋmalɛi lɛ ewieee be ni akɛ tooyeli lɛ hã he lɛ, ekɛhamɔ lɛ kɛ ekomefeemɔ ba ni ehã Jeŋmajiaŋbii Kristofoi lɛ jie shidaa kpo amɛtsɔɔ amɛhefatalɔi Yudafoi heyelilɔi lɛ yɛ mumɔŋ ninámɔ ni amɛnine shɛ nɔ kɛjɛ amɛdɛŋ lɛ he. Paulo puemɔ yɛ sɔlemɔtsu lɛ mli yɛ eshishɛɛ yɛ Yerusalem lɛ sɛɛ etsɛɛɛ lɛ tee basabasafeemɔ shi ni enɛ ha amɔ lɛ. Shi yɛ naagbee lɛ, enɛ ha ená hegbɛi koni ekɛye amraloi kɛ maŋtsɛmɛi odase.—Bɔfoi lɛ Asaji 9:15; 21:17-36; 23:11; 24:1–26:32.

Yelikɛbuamɔi ni Wɔkɛhaa Ŋmɛnɛ

Kɛjɛ klɛŋklɛŋ afii oha lɛ mli lɛ, nibii babaoo etsake—shi jeee shishitoo mlai ni hɔ sɛɛ lɛ. Abɔɔ Kristofoi amaniɛ ni sa ni kɔɔ shika gbɛfaŋ hiamɔ nii lɛ ahe. Esa akɛ yelikɛbuamɔ fɛɛ yelikɛbuamɔ ni amɛkɛbaaha kɛha mɛi ni ehia amɛ lɛ afee tsuijurɔnaa nɔ̃, nɔ ni suɔmɔ kɛha Nyɔŋmɔ kɛ nanemɛi adesai tsirɛɔ lɛ.—Marko 12:28-31.

Yelikɛbuamɔ he gbɛjianɔ ní ato yɛ klɛŋklɛŋ afii oha lɛ mli yɛ krɔŋkrɔŋbii lɛ ahewɔ lɛ tsɔɔ akɛ, esa akɛ ato tooyeli ni tamɔ nɛkɛ ni akɛhaa lɛ he gbɛjianɔ jogbaŋŋ koni atsu he nii kɛmɔ shi yɛ anɔkwayeli mli. Yɛ anɔkwale mli lɛ, Yehowa Nyɔŋmɔ le hiamɔ nii, ni etoɔ gbɛjianɔ kɛha etsuji bɔni afee ni amɛnyɛ amɛya nɔ amɛgba mɛi krokomɛi Maŋtsɛyeli lɛ he sanekpakpa lɛ yɛ shihilɛ ni mli wawai lɛ fɛɛ sɛɛ. (Mateo 6:25-34) Kɛlɛ, bɔ fɛɛ bɔ ni wɔshika gbɛfaŋ shihilɛ ji hã lɛ wɔbaanyɛ wɔtsu wɔgbɛfaŋnɔ. Yɛ nakai gbɛ nɔ lɛ, ‘mɔ ni bua pii naa lɛ, náŋ pii tsɔ, ni mɔ ni bua fioo naa hu lɛ, nɔ̃ etaŋ kwraa.’— 2 Korintobii 8:15.