Ye Nyɔŋmɔ “Ni Naa Teemɔ Mli Nii” Lɛ Anɔkwale
“Sɔlemɔ oha o-Tsɛ ni yɔɔ teemɔ mli lɛ; kɛkɛ lɛ o-Tsɛ ni naa teemɔ mli nii lɛ baawoo nyɔmɔ.”—MATEO 6:6.
1, 2. (a) Mɛɛ gbɛ nɔ wɔɔtsɔ wɔfee nɔkwɛmɔ nɔ akɛ nɔ ko ni tamɔ teemɔŋ saji lɛ baanyɛ aje kpo?(1 Samuel 21:7; 22:9)
1 AFII komɛi ni eho nɛ ni Yehowa Odasefoi lɛ ateŋ mɔ kome tswa enyɛminuu ni yɔɔ Long Island, New York lɛ tɛlifoŋ. Akɛni enyɛminuu lɛ yɛ jamɔ kroko mli hewɔ lɛ, nyɛmiyoo nɛɛ gba lɛ Nyɔŋmɔ shiwoo akɛ ebaajie yiwalɛ kɛjɛ shikpɔŋ nɔ ni ekɛ paradeiso shihilɛ aba ekoŋŋ lɛ he sane. Yɛ be mli ni sanegbaa lɛ baa naagbee ni enyɛminuu lɛ kɛ tɛlifoŋ lɛ fɔɔ shi lɛ, nyɛmiyoo nɛɛ naa kpɛ ehe yɛ gbee ko ni bi lɛ nɛkɛ sane nɛɛ he, “Mɛɛ fioo ko miisumɔ ni mabio sane ko.”
2 Tɛlifoŋ opiretɔ aloo nitsulɔ lɛ ni. Obalayoo nɛɛ miibo amɛsanegbaa lɛ toi, ni blema tɛlifoŋ tsɔne lɛ haa amɛnyɛɔ amɛfeɔ nakai eyɛ mli akɛ ejeee jeŋba kpakpa ni ekɛ nitsumɔ he mla kpaaa gbee. Shi Odasefonyo lɛ na miishɛɛ babaoo akɛ ewiemɔi lɛ etee miishɛɛ ni tamɔ nɛkɛ shi ni nyɛmiyoo nɛɛ to gbɛjianɔ koni edi miishɛɛ nɛɛ sɛɛ, ni kɛlɛ enaa kpɛ ehe hu akɛ esanegbaa lɛ eyafeee teemɔŋ nɔ̃. Hɛɛ, eshɛɔ be ni mɛi krokomɛi naa ni amɛnuɔ nɔ ni wɔsusuɔ yɛ teemɔŋ lɛ.—Jajelɔ 10:20.
3. Aakwɛ Kristofoi ashihilɛ yɛ kpo nɔ yɛ be fɛɛ mli yɛ mɛ gbɛ nɔ?
3 Esaaa akɛ enɛ feɔ naagba wulu ko kɛhaa anɔkwale Kristofoi ni miibɔ mɔdɛŋ ni amɛye Nyɔŋmɔ anɔkwale yɛ be fɛɛ mli lɛ. Bɔfo Paulo kɛɛ: “Akɛwɔ efee nikwɛmɔ nii aha je lɛ kɛ ŋwɛi bɔfoi kɛ gbɔmɛi.” (1 Korintobii 4:9) Ekɛ sane lɛ miito nikwɛmɔ he ko ni gbɔmɛi ni atsɔse amɛ ni amɛkɛ tawuunii awu ta kɛbote gbele mli lɛ kpeɔ yɛ jɛmɛ lɛ he. Dani naagbee nifeemɔ lɛ aaaba lɛ Romabii lɛ jieɔ mɛi ni baawu ni ekolɛ amɛaatsɔ mli amɛgboi lɛ kpo amɛtsɔɔ ni amɛnyiɛ yayai. Ŋmɛnɛ ájie Kristofoi kpo atsɔɔ yɛ wekumɛi, nanemɛi nitsulɔi, akutseiaŋbii kɛ nanemɛi skulbii ni heee yeee lɛ ahiɛ. Mɛi ni kwɛɔ wɔ lɛ baanyɛ ana wɔ Kristojamɔ lɛ he jwɛŋmɔ kpakpa aloo jwɛŋmɔ fɔŋ yɛ nɔ ni amɛnaa yɛ wɔ he lɛ hewɔ.—1 Petro 2:12.
4. Nilee ni mɔ ko yɔɔ akɛ mɛi krokomɛi miikwɛ lɛ lɛ baanya asa ehe yɛ mɛɛ gbɛ nɔ?
4 Kɛ wɔle akɛ mɛi krokomɛi miikwɛ wɔ lɛ, ehaa wɔnyɛɔ wɔdamɔɔ shihilɛ lɛ naa ni wɔshweɔ nɔ ni Paulo taoɔ nɛɛ eko: “Ni asaŋ wɔtooo mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ.” (2 Korintobii 6:3) Nilee ni wɔyɔɔ akɛ mɛi krokomɛi miikwɛ wɔ lɛ baawaje wɔfai shi ni wɔtswa akɛ wɔbaafee nɔ ni ja lɛ. Shi kɛji akɛ wɔkɛ Kristofoi ashishitoo mla he kaa ni mɔ ko mɔ ko enaaa enɛ hu miikpe lɛ?
Ekwɛɔ Kɛtekeɔ Bɔ Ni Mɔ Pueɔ Yɛ Kponɔgbɛ
5. Yudafoi ajamɔ mli hiɛnyiɛlɔi lɛ ajeŋba yɛ gbɔmɛi ahiɛ kɛ teemɔ mli lɛ kɛ mɛɛ sɔrɔtofeemɔ baa?
5 Yudafoi ajamɔ mli hiɛnyiɛlɔi pii ni hi shi yɛ klɛŋklɛŋ afii oha lɛ mli lɛ ji gbɔmɛi sɔrɔtoi yɛ kponɔgbɛ, kɛ gbɔmɛi sɔrɔtoi hu yɛ mligbɛ. Yesu bɔ kɔkɔ ekoŋŋ yɛ Egɔŋ nɔ Shiɛmɔ lɛ mli akɛ: “Nyɛkwɛa ni ahia ni nyɛkafea nyɛjalɛ lɛ yɛ gbɔmɛi ahiɛ, koni amɛnanyɛ.” (Mateo 6:1, 2) Jamɔ mli hiɛnyiɛlɔi lɛ tamɔ kpulu ni he tse shi ‘emligbɛ eyimɔ obɔbɔ kɛ ojotswaa kɛ adufudeyeli,’ tamɔ “gbohii asaŋi ni asha he ni amɛhe efee fɛo moŋ, shi amɛmligbɛ lɛ eyimɔ obɔbɔ kɛ gbohii awui kɛ muji sɔrɔtoi fɛɛ.”—Mateo 23:25-28; okɛto Lala 26:4 he.
6. Mɛni ji nɔ ni Yehowa nyɛɔ enaa yɛ wɔhe?
6 Esa akɛ nakai wiemɔi lɛ aye abua wɔ ni wɔyoo akɛ Yehowa sumɔɔ nɔ ni fe nɔ ni adesai komɛi kɛ amɛhiŋmɛi naa kɛkɛ. Yesu wo ŋaa akɛ: “Shi bo lɛ, kɛ oosɔle lɛ, botemɔ opia mli, ni oŋa oshinaa lɛ, ni osɔle oha otsɛ yɛ teemɔ mli, ni otsɛ ni naa teemɔ mli nii Iɛ aawoo nyɔmɔ yɛ faŋŋ.” (Mateo 6:6) Hɛɛ, Nyɔŋmɔ baanyɛ abo sɔlemɔi ni afeɔ yɛ be mli ni wɔtsi wɔhe kɛjɛ adesai ahe lɛ atoi. Nɔ ko nɔ ko bɛ ni etee ehe yɛ Nyɔŋmɔ hiɛ. Enyɛɔ enaa gbɔmɔ ko hɔŋɔɔ ni eje shishi lɛ, enyɛɔ enaa bɔ ni gbɔmɔ lɛ su kɛ baŋ baaji yɛ sɛɛ mli. (Lala 138:15, 16; 1 Mose 25:23) Ebaanyɛ ele teemɔŋ nibii ni wɔtsuii lɛ dɔɔ kɛyaa he lɛ. (1 Samuel 16:7; 1 Maŋtsɛmɛi 8:39; Yeremia 17: 10; Bɔfoi lɛ Asaji 1:24) Susumɔ bɔ ni nɛkɛ anɔkwa saji nɛɛ aaanyɛ asa wɔhe lɛ he okwɛ.
7. Mɛni mli nɛkɛ Kristofonyo baanyɛ aya ehiɛ yɛ?
7 Bɔni afee ni wɔnyɛ wɔtsɔmɔ anɔkwale Kristofoi lɛ, esa akɛ wɔtsu nii ni wɔkɛye tɔmɔi kɛ eshai ni hiɛdɔɔ yɔɔ mli lɛ anɔ kunim, taakɛ klɛŋklɛŋ Kristofoi lɛ fee lɛ. (1 Korintobii 6:9-11; Bɔfoi lɛ Asaji 26:20; 1 Petro 4:1-4) Shi tɔmɔi ni ekolɛ adesai krokomɛi leŋ lɛ hu? Kɛji akɛ mɛi pii leee nɛkɛ tɔmɔi nɛɛ ahe nɔ ko lɛ, no etsɔɔɔ akɛ amɛhe ehiaaa. Enɛ ji nɔ ni David wiemɔi nɛɛ tsɔɔ lɛ: “Mɔ ni nyiɛɔ enaanyo shishi (egbeɔ ehe guɔ) yɛ teemɔŋ lɛ, makpata ehiɛ; mɔ ni yɔɔ gegeege kɛ henɔwomɔ tsui lɛ, mikɛ lɛ yeee.” (Lala 101:5) Kɛji akɛ afee enɛ po yɛ teemɔŋ, ni mɔ kome pɛ po nu lɛ, mɛi ashishinyiɛmɔ loo amɛheguɔ gbee ejaaa. No hewɔ lɛ, David ekpɛlɛŋ nɛkɛ ‘teemɔŋ’ esha nɛɛ nɔ.
8. Te wɔfeɔ tɛŋŋ wɔleɔ akɛ teemɔŋ nɔfɔŋ feemɔ jeee nɔ ni Yehowa enaaa?
8 Ni asaŋ efɔŋfeelɔ lɛ akashishiu lɛ diɛŋtsɛ ehe ni esusu akɛ Nyɔŋmɔ “ni naa teemɔ mli nii lɛ” enaaa. Yɛ anɔkwale mli lɛ, Nyɔŋmɔ etsɔɔ akɛ enaa adesai ni aaaye anɔkwale yɛ be mli ni anaaa amɛteemɔŋ nifeemɔi lɛ po lɛ. Kaimɔ Akan sane lɛ. Esa akɛ Israelbii lɛ akpata Yeriko kɛ emlibii, Kananbii yiwalɔi lɛ ahiɛ. Nɔ ni esa akɛ ashi pɛ ji jwiɛtɛi, shika kɛ akɔɔble ejaakɛ enɛɛmɛi ji nibii ni akɛ fɛɛ baaya Yehowa kpeebuu lɛ nitoohe lɛ. (Yoshua 6:17-19) Kaa ko ye Akan nɔ ni eŋɔ atade ko ni jara wa, kɛ jwiɛtɛi kɛ shika ko. Ekɛ enɛ to ebuu lɛŋ, ekolɛ esusu akɛ mɔ ko mɔ ko enaŋ. Shi ani enyɛ eshishiu Mɔ “ni naa teemɔ mli nii lɛ”? Dabi. Nyɔŋmɔ ha Akan esha lɛ je kpo ni ekɛ gbele ba lɛ kɛ eshiabii lɛ anɔ.—Yoshua 7:1, 16-26.
9. Mɛni esa akɛ wɔfee koni wɔna ni wɔhiɛ Nyɔŋmɔ nɔkpɛlɛmɔ mli?
9 Elihu kɛ nilee tsɔɔ bɔ ni Yehowa ji lɛ mli: “Shi ehiŋmɛi jwere gbɔmɔ gbɛi anɔ, ni enaa enajifamɔi fɛɛ. Duŋ bɛ, ni asaŋ gbelehɔɔŋ ko bɛ, he ni mɛi ni tsuɔ nishaianii lɛ aaatee amɛhe yɛ.” (Hiob 34:21, 22) Kɛji akɛ wɔmiisumɔ ni wɔna Yehowa Nyɔŋmɔ nɔkpɛlɛmɔ ekoŋŋ aloo wɔhi mli lɛ, esa akɛ wɔtao akɛ wɔɔhi shi yɛ eshishitoo mlai anaa, yɛ be mli ni wɔle akɛ mɛi krokomɛi miikwɛ wɔ kɛ be mli ni etamɔ nɔ ni mɔ ko enaaa wɔsubaŋ lɛ. “Ehiŋmɛi jwere gbɔmɔ gbɛi anɔ” yɛ be fɛɛ mli.
10. (a) Mɛɛ nɔkwɛmɔ nɔ kpakpa Paulo kɛfɔ shi ehawɔ yɛ jeŋba ni aŋɔ-tee he? (b) Mɛɛ teemɔŋ tɔmɔi ni baanyɛ aba yɛ mɛni mli nɛkɛ esa akɛ wɔkwɛ nomɛi jogbaŋŋ lɛ?
10 Kristofonyo baanyɛ atsɔ kaa ko mli ni bɔ ni eji teemɔŋ sane ha hewɔ lɛ enanemɛi jalɔi enaŋ. Enɛ ba Paulo nɔ be mli ni awo lɛ tsuŋ lɛ. Yudafoi lɛ folɔ enaa akɛ “eji mɛi atoigbolɔ, ni etseɔ atua” ni ‘eebɔ mɔdɛŋ ni ebule sɔlemɔwe lɛ.’ (Bɔfoi lɛ Asaji 24:1-6) Paulo jie enaa akɛ eyeee fɔ yɛ Roma amralo Felike hiɛ, mɔ ni yinɔsaneŋmalalɔi tsɔɔ akɛ eyi wa ni ebɛ jeŋba lɛ. Felike wo Paulo tsuŋ ni “ehiɛ ka nɔ akɛ Paulo aaaha lɛ shika ni eŋmɛɛ ehe.” (Bɔfoi lɛ Asaji 24:10-21, 26) Yɛ be mli ni bɔfo lɛ le Biblia mli ŋaawoo akɛ akaha ni akahe nikeenii yɛ kojomɔ mli lɛ, ebaanyɛ esusu he akɛ nyɔɔŋnii ni eeeha lɛ baafee gbɛ ni hi ni baaha eye ehe. Ni akɛni nyɔɔŋnii lɛ baafee nɔ ko ni mɛi krokomɛi enaaa hewɔ lɛ, Paulo gbaŋ ehe naa akɛ enɛ aaatɔtɔ mɛi krokomɛi anane. (2 Mose 23:8; Lala 15:1, 5; Abɛi 17:23) Shi kɛlɛ, Paulo susuuu nibii ahe nakai. Yehowa tsuji babaoo ni yɔɔ ŋmɛnɛŋmɛnɛ lɛ kɛ kaai ni tamɔ nɛkɛ ekpe, tamɔ nɔ ni kɔɔ Nyɔŋmɔ mla ni kɔɔ lá he, mɔ diɛŋtsɛ hebulemɔ aloo fɔmɔnii ni akɛshwɛɔ kɛ daatɔɔ nɛkɛ. Nyɛhaa wɔsusua bɔ ni nɛkɛ kaai nɛɛ aaanyɛ aba bo kɛ osuɔlɔi anɔ lɛ ahe wɔkwɛ.
Aka Toiboo Yɛ La He Akwɛ
11. Kristofonyo shidaamɔ yɛ lá he lɛ damɔ mɛni nɔ?
11 Eka shi faŋŋ akɛ Nyɔŋmɔ mla ni kɔɔ lá he lɛ jeee nɔ ni yɔɔ ehee aloo ebɛ faŋŋ. Yehowa fa adesai fɛɛ kɛtsɔ wɔ fɛɛ wɔblematsɛ Noa nɔ akɛ: “Shi loo kɛ elá ni ji esusuma lɛ, nyɛkayea.” (1 Mose 9:4) Ama krɔŋkrɔŋ ni lá ji, ni edamɔ shi kɛha wala ni jɛ Nyɔŋmɔ ŋɔɔ lɛ nɔ mi yɛ Mose Mla lɛ mli. Akɛ lá tsuɔ nii yɛ afɔleshaa latɛ lɛ nɔ, kɛ́ akɛfeee nakai lɛ belɛ esa akɛ ‘atsi ashwie shikpɔŋ tamɔ nu.’ (3 Mose 17:11-14; 5 Mose 12:23-25) Ani lá ni agu eyeli lɛ tee nɔ yɛ be mli ni Mose Mla lɛ ba naagbee lɛ? Nakai pɛpɛɛpɛ. Yɛ kpee ko ni mɛi komɛi tsɛɔ lɛ klɛŋklɛŋ Kristofoi agwabɔɔ lɛ shishi lɛ, bɔfoi lɛ kɛ onukpai (ni feɔ nɔyeli kuu) lɛ mu sane naa akɛ esa akɛ Kristofoi ‘atsi amɛhe kɛjɛ wɔŋjamɔ, kɛjɛ ajwamaŋbɔɔ, kɛjɛ nii ni ashɔtɔ nɛkɛ [ni ela eka emli] kɛ agbɛnɛ kɛjɛ la he.’ La ni akɛaatsu nii yɛ gbɛ fɔŋ nɔ lɛ ji hiɛdɔɔ sane tamɔ bɔ ni jeŋba gbonyo tamɔ ajwamaŋbɔɔ yɔɔ lɛ nɔŋŋ.—Bɔfoi lɛ Asaji 15: 20, 21, 28, 29.
12. Mɛni ji shidaamɔ ni klɛŋklɛŋ Kristofoi lɛ kɔ yɛ he?
12 Klɛŋklɛŋ Kristofoi lɛ bɔɔ Nyɔŋmɔ mla ni kɔɔ lá he lɛ toi. Eyɛ mli akɛ mɛi komɛi nu mɛi ni atsɔse amɛ ni amɛkɛ tawuu nii nɔ yɛ nikwɛmɔ he lɛ alá akɛ nɔ ko ni “tsaa” gbiligbili moŋ, shi anɔkwale Kristofoi efeŋ nakai. Ni asaŋ amɛyeŋ niyenii ni lá yɔɔ mli, kɛ́ enɛ ni amɛyeee lɛ baatsɔɔ gbele aha amɛ kɛ amɛbii po lɛ. Kɛjɛ nakai be lɛ mli kɛbaa nɛɛ Nyɔŋmɔ jamɔ he nilelɔi kɛ mɛi krokomɛi ekpɛlɛ nɔ akɛ Kristofoi yɛ Nyɔŋmɔ mla ni teɔ shi ewoɔ lá ni aaaye lɛ shishi.
13. (a) Mɛni hewɔ yɛ beikomɛi amli lɛ, wɔkɛ lá he kaa baakpe lɛ? (b) Mɛɛ yiŋtoo titri hewɔ ni Kristofoi ekpɛlɛɛɛ lá nɔ esa akɛ wɔha ahi wɔjwɛŋmɔ mli lɛ?
13 Lá ni agbalaa awoɔ mɛi amli ebafee helatsamɔ mli nifeemɔ ko ni ehe gbɛi yɛ nyɛsɛɛ gbii nɛɛ amli. Kristofoi kɛ enɛ he kaa baakpe. Datrɛfoi, helatsɛmɛi akwɛlɔi, kɛ wekumɛi po baanyɛ mɔ nɔ waa koni ehe la. Mɛi ni yɔɔ enɛ he nilee lɛ le moŋ akɛ lá ni agbalaa awoɔ mɛi amli lɛ diɛŋtsɛ kɛ oshara kpele baa. Time wolo tɛtrɛɛ (November 5, 1984) lɛ kɛɛ akɛ “Amɛrikabii 100,000 naa mlɛbo mli hela aloo jɔndis daa afi yɛ lá ni agbalaa awoɔ amɛmli hewɔ,” ni titri lɛ enɛ jɛ “muawai komɛi ni yɔɔ naakpɛɛ ni lá mlikwɛmɔ jogbaŋŋ nɔ atsɔɔ ayooɔ amɛ lɛ.” Time lɛ hu bɔ amaniɛ akɛ mɛi fe 6,500 ni hela ko ni atsɛɔ lɛ AIDS ni gbeɔ mɔ waa ni ekomɛi jɛ “lá ni agbalaa awoɔ mɛi amli lɛ hewɔ.” Amaniɛbɔɔ Iɛ kɛɛ akɛ: “Mɛi ni na nɛkɛ hela nɛɛ ateŋ mɛi fa kpotoo egboi momo, eyɛ mli akɛ yɛ naagbee lɛ mɛi ni baagboi lɛ baanyɛ ashɛ oha fɛɛ oha mli 90 aloo nɔ ni fe nakai.” Shi Yehowa Odasefoi kɛ bɔ ni amɛkpoo la lɛ damɔɔɔ naataomɔ akɛ lá ji tsofa ko ni ehiii lɛ nɔ. Kɛji akɛ Datrɛfoi po aaama nɔ mi waa akɛ lá ni abaagbala awo mɔ ko mli lɛ baafee shweshweeshwe ni egbeŋ lɛ po lɛ, Nyɔŋmɔ Wiemɔ lɛ faa wɔ akɛ ‘wɔtsi wɔhe kɛjɛ lá he.’—Bɔfoi lɛ Asaji 21:25.
14. Mɛɛ “teemɔŋ” kaa ni kɔɔ lá he obaanyɛ okɛkpe?
14 Bo lɛ susumɔ he akɛ akɛɛ bo akɛ lá ni abaagbala awo omli lɛ he miihia bo waa. Nyɔŋmɔ mla ni kɔɔ lá he lɛ baaba ojwɛŋmɔ mli aloo jeee nakai? Ni oyiŋkpɛɛ akɛ obaabo Nyɔŋmɔ toi, ni nɔ ni baajɛ mli aba lɛ kɔɔɔ he eko lɛ baawaje bo ejaakɛ onanemɛi Kristofoi hu yɛ jɛmɛ. (Okɛto Daniel 3:13-18 he.) Shi kɛji akɛ Datrɛfonyo ko loo kojolɔ ko nyɛ onɔ yɛ teemɔŋ koni okpɛlɛ lá nɔ ni ekɛɛ bo akɛ ha nɛkɛ sane nɛɛ he sɔ abaka enɔ yɛ Nyɔŋmɔ hiɛ hu?
15. Mɛɛ jwɛŋmɔ ni ejaaa datrɛfoi kɛ onukpai komɛi yɔɔ yɛ shidaamɔ ni wɔkɔɔ yɛ lá he lɛ he?
15 Amaniɛbɔɔi ni jɛɔ shikpɔji sɔrɔtoi anɔ tsɔɔ akɛ yɛ bei komɛi amli lɛ Datrɛfoi, helatsamɔ he lɛ mli nitsulɔi kɛ kojolɔi susuɔ yɛ gbɛ ni ejaaa nɔ akɛ Yehowa Odasefoi kpooɔ la ni amɛaaha lɛ yɛ mɛi ahiɛ, shi yɛ teemɔ mli aloo yɛ mligbɛ lɛ amɛnuɔ he yɛ gbɛ sɔrɔto nɔ. Yɛ sane ko ni ba nakai mli Iɛ kojolɔ lɛ kome mu sane lɛ naa akɛ, “nɔ ni hɔ naagba lɛ mli diɛŋtsɛ lɛ jeee nɔ ni jɛ [helatsɛ lɛ] jamɔ mli hemɔkɛyelii ahewɔ, shi esumɔɔɔ kɛkɛ ni ekɛ enine awo wolo ni aŋma ni faa akɛ eŋmɛ gbɛ ni aha lɛ lá lɛ shishi. Yoo lɛ eteee shi ewooo tsamɔ ni abaatsɔ nɔ akɛtsa lɛ lɛ—shi efaŋ hu akɛ akɛ nakai tsamɔ lɛ atsu nii.” Nɔ ni kɛ enɛ kpaaa gbee lɛ, ni amɛaakpoo, ni tsɔɔ akɛ ‘amɛkɛ amɛnine wooo famɔ akɛ ahaamɛ lá lɛ shishi lɛ,’ ale Yehowa Odasefoi waa yɛ he fɛɛ he akɛ amɛsumɔɔ waa diɛŋtsɛ ni amɛkɛ amɛnine awo mla woji ashishi ni no aha Datrɛfoi kɛ mɛi ni tsuɔ amɛhe nii lɛ eye amɛhe yɛ nɔ fɛɛ nɔ ni aaajɛ la ni amɛkɛɛ amɛheee Iɛ mli aba Iɛ he.a
16. Kɛ mɔ ko miiwo bo hewalɛ yɛ teemɔŋ ni ohe lá lɛ mɛni ji nɔ ni esaaa akɛ ohiɛ kpaa nɔ?
16 Datrɛfoi kɛ kojolɔi baabɔ mɔdɛŋ ni amɛtsɔ oyiŋ ni okpɛlɛ la nɔ ejaakɛ amɛna ni mɛi komɛi ni jɛ jamɔi sɔrɔtoi komɛi amli ete shi ewo gbɛ ko ni atsɔɔ nɔ akɛtsaa amɛhelai shi amɛkpɛlɛɔ nɔ ‘yɛ teemɔŋ.’ Nitsulɔi nɛɛ ateŋ mɛi komɛi po ekɛɛ akɛ amɛle Odasefonyo ko ni ekpɛlɛ koni aha lɛ la yɛ teemɔŋ. Kɛ eba lɛ nakai lɛ, belɛ ekɔɔ mɔ ko ni kpaako ekɛ Yehowa Odasefoi bɔɔ lɛ he. Nyɔŋmɔ tsuji ni amɛtu amɛhe amɛha lɛ lɛ le jogbaŋŋ akɛ sane he ni aŋmɛɔ ni akɛsaa nɛkɛ lɛ jeee nɔ ni enaaa. Kaimɔ be mli ni David fee esha yɛ Batsheba kɛ Uria sane lɛ mli lɛ. Yehowa na fɛɛ ni etsu Natan kɛ sane nɛɛ: “Bo [David] lɛ ofee yɛ teemɔ mli; shi mi lɛ mibafee enɛ yɛ Israel fɛɛ hiɛ shwane fintiŋŋ!” Takɛ Nyɔŋmɔ jaje lɛ, David nu nɔ ni yɔɔ awerɛhoo ni jɛ ‘eteemɔŋ’ nɔsha lɛ mli ba lɛ he waa.—2 Samuel 11:27–12:12; 16:21.
17. (a) Yɛ mɛɛ gbɛ nɔ lá ni aaahe yɛ teemɔŋ lɛ baanyɛ afee naagba aha mɛi krokomɛi? (b) Tsɔɔmɔ bɔ ni nyɛmiyoo ko damɔ shi shiŋŋ yɛ lá he sane nɛɛ mli yɛ teemɔŋ, ni mɛni ji nɔ ni je enɛ mli ba?
17 Esa akɛ suɔmɔ kɛha onyɛmimɛi Kristofoi lɛ aye abuao ni ote shi owo nɔnyɛɛ ni aaaha okpɛlɛ nɔ akɛ oooku Nyɔŋmɔ mla ni kɔɔ lá he lɛ mli yɛ teemɔŋ lɛ nɔ lɛ. Yɛ mɛ gbɛ nɔ? Kɛji akɛ Datrɛfonyo loo kojolɔ ko bɔ mɔdɛŋ ni elaka bo koni okpɛlɛ lá nɔ lɛ, kɛ yɛ teemɔŋ po lɛ, esa akɛ osusu naagba ni baaba abafata Odasefoi ni baanyiɛ sɛɛ aba lɛ nɔ lɛ he lɛ he. Jwɛŋmɔ nɛkɛ niiashikpamɔ nɛɛ he:
Nyɛmiyoo Rodriguez he miiye ni aatsa ehela lɛ aha lɛ. Kɛkɛ ni ehe baye waa; edatrɛfonyo lɛ na akɛ la miiho lɛ emligbɛ ni ewo lɛ ŋaa akɛ ekɛya helatsamɔ he wulu ko. Nyɛmiyoo Rodriguez shɛ jɛmɛ ni ekɛɛ gbɔmɛi ni kwɛɔ mɛi ni tamɔ nakai lɛ akɛ: “Bɔ fɛɛ bɔ ni sane lɛ ji lɛ, minyɛŋ mahe lá.” Ekɛ ehe kpɛtɛ nɔ ni ejaje nɛɛ he yɛ sɛɛ mli be mli ni mɛi ni kwɛɔ helatsɛmɛi lɛ po ekɛɛ lɛ akɛ Odasefoi komɛi po ehe la pɛn dã lɛ he. La tee nɔ eho nyɛmiyoo nɛɛ gbii pii ni egbɔjɔ ni enyɛɛɛ nɔ ko efeee dɔŋŋ. Kɛkɛ ni yɛ naagbee lɛ akɛ lɛ tee he ni akwɛɔ helatsɛmɛi ni amɛhela mli wa yɛ lɛ. Kɛkɛ ni helatsamɔ he lɛ yatsɛ kojolɔ ko ni jɛ Saneyeli He Wulu lɛ kɛba.
Yɛ nyɔji komɛi asɛɛ yɛ helatsamɔ he lɛ nikwɛmɔ he lɛ, nɛkɛ kojolɔ nɛɛ wie etsɔɔ datrɛfoi fe 150 yɛ wiemɔ “Shi Yɛ Fɛɛ Sɛɛ Lɛ, Namɔ Wala Kwraa Ni?” lɛ he. Lɛ hu ekɛɛ akɛ, ekɛ gbɔmɛi ni klɛŋklɛŋ lɛ amɛkpoɔ lá ni kɛ atsɛ kojolɔ lɛ amɛkpɛlɛɔ nɔ kpeɔ. Shi nyɛmiyoo Rodriguez hu? Ekɛɛ akɛ ewie etsɔɔ lɛ yɛ teemɔŋ koni ebɔ mɔdɛŋ ni etsɔ eyiŋ akɛ eha ‘esɔ abaka enɔ’ yɛ lá ni eeeha aha lɛ yɛ saneyeli he lɛ famɔ naa lɛ hewɔ. Mɛni ji nɔ ni nyɛmiyoo nɛɛ fee? Kojolɔ lɛ kɛɛ datrɛfoi ni amɛkpe lɛ akɛ awula Rodriguez bua ehewalɛ ni ebaanyɛ ebua naa lɛ fɛɛ naa ni ekɛɛ lɛ akɛ ekpɛlɛŋ lá lɛ nɔ, no hewɔ lɛ, eshi lɛ ni eshi tsu lɛ mli etee. Yɛ naagbee lɛ, kojolɔ lɛ tsɔɔ mli akɛ, ebɛ nɔ ni ebaadamɔ nɔ ni efa yɛ mla naa ni aha lɛ lá yɛ be mli ni enɛ teɔ shi ewoɔ yoo nɛɛ suɔmɔnaa nii.
18. Mɛɛ faishitswaa esa akɛ wɔha afee faŋŋ yɛ la sane lɛ he, ni mɛni eka shi akɛ eeenyɛ ejɛ mli aba?
18 Enɛ maa bɔ ni ehe hiaa akɛ wɔɔha efee faŋŋ akɛ wɔshidaamɔ yɛ lá he Iɛ ji sane ni wɔŋmɛɛɛ he lɛ nɔ mi. Bɔfoi lɛ kɔ shidaamɔ ni yɔɔ shiŋŋ ni tamɔ nɛkɛ ni amɛjaje akɛ: “Esa akɛ aboɔ Nyɔŋmɔ moŋ toi fe gbɔmɛi.” (Bɔfoi lɛ Asaji 5:29) Nyɛmiyoo Rodriguez sane lɛ hu tsɔɔ bɔ ni Odasefonyo ni aaaŋmɛɛ sane he aha ni ekɛsaa lɛ nifeemɔ saa mɛi krokomɛi ahe lɛ mli. Yɛ be mli ni ohe yeɔ ni egbɔjɔ yɛ gbɔmɔtsoŋ lɛ, ehe bahia ni ekɛ nɔnyɛɛ kroko akpe ejaakɛ ekolɛ benɛ mɔ ko ku Nyɔŋmɔ mla mli yɛ teemɔŋ be ko hewɔ. Shi mla mlikuu ni tamɔ nɛkɛ lɛ ebafeŋ nɔ ni aŋɔtee “shikpɔŋ fɛɛ nɔ Kojolɔ lɛ.” (1 Mose 18: 25) Yɛ miishɛɛ mli lɛ, Nyɛmiyoo Rodriguez eŋmɛɛɛ sane he ni ekɛsaa yɛ teemɔ mli taakɛ efee yɛ mɛi ahiɛ lɛ. Ni yɛ sɛɛ mli, beni ehe walɛ Iɛ, egbala mli etsɔɔ nakai datrɛfoi agwabɔɔ lɛ nɔŋŋ akɛ etswa efai shi akɛ ebaaya nɔ eye Nyɔŋmɔ anɔkwale.
19. Esa akɛ wɔhiɛ ahi wɔhe nɔ yɛ be fɛɛ mli yɛ mɛɛ anɔkwa sane he?
19 Esa akɛ wɔ hu wɔye anɔkwale kɛji akɛ aana wɔnifeemɔi lɛ yɛ faŋŋ mli aloo anaaa. Yehowa nyaa anɔkwayeli ni tamɔ nɛkɛ he ni ebaawo nyɔmɔ yɛ he; ebaatsu mɛi ni yeee shihilɛ mli tɛi ni efolɔ eshwie shi lɛ anɔ—yɛ mɛi ahiɛ aloo yɛ teemɔŋ—lɛ ahe nii. (Lala 51:7; Hiob 34:24) Ejeɔ esuɔmɔ mli ekɛ ŋaawoo ni yeɔ emuu ni baaye abua wɔ ni wɔye teemɔŋ tɔmɔi anɔ kunim haa wɔ, taakɛ wɔbaasusu he yɛ nɔ ni nyiɛ sɛɛ nɛɛ mli lɛ.
[Shishigbɛ niŋmaa]
a Ajie kɛjɛ April 15, 1985 Watchtower lɛ mli.
Helatsamɔ hei pii kɛ wolo ni ji Form P-47 REFUSAL TO PERMIT BLOOD TRANSFUSION ni American Medical Association lɛ kala kɛha amɛtsofafeemɔ he woji kɛ mla he saji lɛ tsuɔ nii.
Te Obaaha Hetoo Oha Tɛŋŋ
◻ Mɛni nyɛmɔ Nyɔŋmɔ yɔɔ ni esa okɛ ena hewalɛ yɛ anifeemɔi anɔ?
◻ Esa akɛ Akan niiashikpamɔ lɛ aha wɔkase mɛni ni he hiaa?
◻ Mɛ awui baanyɛ aba kɛji akɛ Kristofonyo ko ku Nyɔŋmɔ mla ni kɔɔ lá he Iɛ mli yɛ teemɔŋ?
◻ Esa okɛ otswa ofai shi yɛ mɛni ni kɔɔ bɔ ni Yehowa kwɛɔ la ehaa lɛ he?
[Akrabatsa ni yɔɔ baafa 10]
Ayoo Nyɔŋmɔ Mla Yɛ La He Akɛ Anɔkwale
ALE JOSEPH PRIESTLEY (1733-1804) jogbaŋŋ akɛ jeŋnilelɔ ni yoo kɔɔyɔɔ kpakpa, shi eji Nyɔŋmɔ jamɔ he nilelɔ. Eŋma akɛ:
“La ni akɛɛ Noa akaye Iɛ tamɔ nɔ ni efimɔɔ eseshibii fɛɛ.” Yɛ nɔ ni akɛɔ akɛ la ni esaaa akɛ Kristofoi yeɔ lɛ ji no ko ni ka shi be fioo ko lɛ he lɛ, ekɛfata he akɛ: “Nɔko nɔ ko bɛ yɛ be ko bibioo ko po ni tsɔɔ akɛ eji nɔ ko ni hiɔ shi be fioo ko, ni atsiko ta yɛ he ko hu akɛ be baashɛ ni nɔ ni agu nɛɛ sɛɛ baafo . . . Kɛ wɔtsɔɔ nɔ ni bɔfoi lɛ kɛ nɔ ni blema Kristofoi ni anyɛŋ akɛɛ akɛ amɛnuuu sane nɛɛ shishi Iɛ fee Iɛ shishi Iɛ, wɔnyɛɔ wɔkɛɛ nɔ ko akɛ eja yɛ wɔgbɛfaŋ, ni eji mla ni baahi shi kɛya naanɔ.”
Aŋma wolo yɛ 1646 ni egbɛi ji Blood Forbidden (La ni agu eyeli) . Ekɛ sane lɛ ba naagbee yɛ baafa 8 ekɛ: “Nyɛhea wɔkɛ nɛkɛ kusum nifeemɔ ni tsɔɔ yiwalɛ ni ji kooloi awala ni ayeɔ yɛ Ŋleshi Abolotsiri fɛɛ, yɛ [la] ni afea lɛ boloŋ ni bɛ krɔŋkrɔŋ ni ayeɔ nɛɛ afɔ shi, ejaakɛ no wɔbaajie wɔhe kpo akɛ gbɔmɛi ni naa mɔbɔ, jeee mɛi ni enaaa mɔbɔ; koni akɛna wɔ akɛ mɛi ni booo Nyɔŋmɔ mla toi yɛ nibii nɛɛ amii, shi moŋ, mɛi ni boɔ esuɔmɔnaa nifeemɔ toi, mɛi ni feɔ nibii ni ja yɛ ehiɛ, akɛni wɔbaaná Nyɔŋmɔ hiɛ duromɔ hewɔ. . . . koni akafɔlɔ wɔ ashwie kɛmiijɛ wɔ webii ateŋ, koni Nyɔŋmɔ akatsɔ ehiɛ eto wɔ yɛ gbɛ foŋ nɔ kɛmiiya naanɔ.”
Gaspard Bartholin hu ji afii ohai 17 Iɛ mli gbɔmɔtso he nilelɔ yɛ Copenhagen Nikasemɔ he Wulu lɛ. Yɛ be mli ni eŋmaa yɛ ‘La Ni Akɛtsuɔ Nii Yɛ Gbɛ Fɔŋ Nɔ’ he lɛ, ekɛɛ akɛ: ‘Mɛi ni kɛ adesa Ia tsuɔ nii ni akɛtsaa helai lɛ kɛ miitsu nii yɛ gbɛ foŋ no ni amɛmiifee esha ni mli wa. Abuɔ mɛi ni yeɔ gbɔmɔ loo Iɛ fɔ. Mɛni hewɔ esaaa akɛ wɔnyaŋeɔ mɛi ni kɛ adesai ala ni amɛshɔ́ɔ kɛtsɔɔ amɛsɛŋ lɛ woɔ amɛhe muji lɛ? Nakai nɔŋŋ hu enɛ ji be mli ni wɔheɔ mɔ ko la wɔwoɔ wɔfaji amli, kɛtsɔɔ wɔdaaŋ loo kɛtsɔɔ dadei ni atsɔɔ nɔ agbalaa ewoɔ wɔ mli lɛ anɔ lɛ. Mɛi ni je nifeemɔ nɛɛ shishi Iɛ ji mɛi ni ŋwɛi mla ni egu Ia ni aaaye lɛ kɛɛmɔ baaye.’
Revelation Examined with Candour (1745) hu ji wolo ni wieɔ Nyɔŋmɔ mla ni kɔɔ lá he lɛ. Ebɔ amaniɛ akɛ: “Etamɔ ni Nyɔŋmɔ diɛŋtsɛ kɛha Noa, ni Mose ti mli, ni Yesu Kristo bɔfoi lɛ ma nɔ mi; ni akɛha yɛ nu afua Iɛ sɛɛ nɔ beni je lɛ taakɛ wɔle lɛ je shishi ehee lɛɛ kɛ ekome pɛ hu ni akɛha yɛ nakai gbi kpeteŋkpele lɛ nɔ; ati mli kɛ hiɛdɔɔ atsɔɔ nakai gbɔmɛi lɛ ni Nyɔŋmɔ jie amɛ kɛjɛ adesai ahe koni amɛfee maŋ krɔŋkrɔŋ amɛha lɛ Iɛ; ati mli ni atsɔɔ bɔ ni ŋwɛi mlifu diɛŋtsɛ baaba mɛi ni teɔ shi woɔ enɛ lɛ anɔ, Yudanyo kɛ gbɔ fɛɛ ni baaku nɛkɛ mla nɛɛ mli; ni gwabɔɔ krɔŋkrɔŋ ko ni kpe yɛ shikpɔŋ nɛɛ nɔ lɛ ma nɛkɛ sane nɛɛ nɔ mi; amɛtsu nii yɛ Nyɔŋmɔ Mumɔ lɛ hewalɛ shishi! Ni amɛtsɔ kpee krɔŋkrɔŋ nɛɛ nɔ amɛkɛ emli saji lɛ maje sɔlemɔi ni yɔɔ mɔji ni bɛŋkɛ amɛ lɛ fɛɛ mli, ni jeee gbɔmɛi foji komɛi anine nɔ atsɔ akɛmaje, shi moŋ osɔfonukpai enyɔ, kɛ bɔfoi enyɔ . . . Ani nuu ko baanyɔ awie nɛkɛ famɔ nɛɛ he efɔŋ yɛ he mli ni akɛha lɛ sɛɛ? Ani nuɔ ko ni yɔɔ jwɛŋmɔ baanya akɛɛ akɛ nɛkɛ mla ni akɛha ni ati mli ni Nyɔŋmɔ diɛŋtsɛ ema nɔ mi nɛɛ ji nɔ ko ni shishinumɔ hɛ he ni ehe ehiaaa?”
[Mfoniri ni yɔɔ baafa 14]
Odasefonyo kome jeŋba baaha efee mlɛo aha mɔ kroko lɛ yɛ anɔkwale ni eeeye Nyɔŋmɔ lɛ mli