Beni Gbalashihilɛ Mli Toiŋjɔlɛ Heɔ Afite Lɛ
Ŋa akatse ewu gbala; . . . ni wu hu akaŋmɛɛ eŋa he.—1 KORINTOBII 7:10,11
1. Mɛni ji Yehowa yiŋtoo yɛ gbalashihilɛ he?
YEHOWA NYƆŊMƆ fee klɛŋklɛŋ adesai enyɔ lɛ ekome yɛ gbalashihilɛ mli ni eto eyiŋ akɛ nɛkɛ heloo kome tsakpaa nɛɛ ahi shi daa. Ebaafee ekomefeemɔ ni jɔɔmɔ yɔɔ mli ni nɔ ni baajɛ mli aba ji amɛmiishɛɛnamɔ ni amɛfɔ bii ni ji jalɔi, ni amɛkɛwo Nyɔŋmɔ hiɛ nyam.—1 Mose 1:27, 28; 2:24.
2. Mɛni ji nɔ kome ni fiteɔ gbalashihilɛ tsakpaa lɛ?
2 Nakai gbalashihilɛ kpakpa he gbɛjianɔtoo lɛ fite kɛtsɔ heyeli susumɔ kɛ esha nɔ. (1 Mose 3:1-19; Romabii 5:12) Yɛ anɔkwale mli lɛ, heyeli mumɔ ji nibii ni tserɛɔ gbalashihilɛ tsakpaa lɛ mli ŋmɛnɛ lɛ ateŋ ekome. No hewɔ lɛ, yɛ U.S. Amerika lɛ, yɛ 1985 mli lɛ, kɛ aja mli lɛ, yɛ gbalashihilɛi 10.2 fɛɛ mli lɛ—5 fiteɔ—yɛ gbɔmɛi 1,000 fɛɛ mli. Yɛ 1986 lɛ, amaniɛbɔɔ ko ni jɛ Moscow tsɔɔ akɛ gbalashihilɛ ni aboteɔ mli yɛ Soviet Union, Russia lɛ ateŋ oha fɛɛ mli 37 fiteɔ yɛ afii etɛ mli ni ákɛ emli oha fɛɛ mli 70 baa naagbee yɛ afii nyɔŋma pɛ mli.
3. (a) Mɛni baanyɛ ni ekɛ gbalashihilɛ mli bei aba? (b) Yɛ gbalashihilɛ he lɛ, namɔ ji toiŋjɔlɛ fitelɔ titri?
3 Heyeli mumɔ baanyɛ ekɛ gbalashihilɛ mli bei aba. Etsiɔ mumɔŋ nɔyaa hu naa, ejaakɛ “jalɛ yibii lɛ, jalɛ mli aduɔ yɛ ahaa mɛi ni feɔ hejɔlɛ nii lɛ.” (Yakobo 3:18) Shi namɔ ji toiŋjɔlɛ fitelɔ titri lɛ? Satan. Ni kwɛ bɔ ni eji awerɛho sane ha akɛ Nyɔŋmɔ tsuji lɛ ateŋ mɛi komɛi ‘kɛ amɛhe aaafɔ shi aha Abonsam’ ni yɛ enɛ hewɔ lɛ amɛnaaa shiai ni toiŋjɔlɛ kɛ hejɔɔmɔ yɔɔ jɛmɛ mli ŋɔɔmɔ! —Efesobii 4:26, 27.
4. Kɛ gbalashihilɛ mli hefatalɔi ni ji Kristofoi yɛ gbalashihilɛ mli naagbai ni naa wa lɛ, mɛni esa akɛ amɛyoo ni mɛni esa akɛ amɛfee?
4 Kɛ hefatalɔi ni ji Kristofoi bu mligbalamɔ akɛ amɛgbalashihilɛ mli haomɔi lɛ anaa tsabaa kome pɛ lɛ, belɛ oshara eba akɛ amɛbaaŋmɛɛ amɛhe amɛha Satan ŋaatsɔɔi lɛ, belɛ nɔ ko yɛ ni ehiii kwraa yɛ mumɔŋ. (2 Korintobii 2:11) Amɛteŋ mɔ kome loo mɛi enyɔ lɛ fɛɛ kɛ Nyɔŋmɔ shishitoo mlai tsuuu nii kɛmɔɔɔ shi. (Abɛi 3:1-6) No hewɔ lɛ esa akɛ amɛtsɔ sɔlemɔ nɔ amɛbɔ mɔdɛŋ ni amɛsaa bei ni ka amɛteŋ lɛ. Kɛ amɛnyɛɛɛ amɛfee nakai lɛ, abaanyɛ abɔ asafoŋ onukpai lɛ amaniɛ. (Mateo 18:15-17) Eyɛ mli akɛ akɛ hegbɛ ko hako nɛkɛ hii nɛɛ akɛ amɛkɛɛ amɛnanemɛi heyelilɔi lɛ nɔ pɔtɛɛ ni esa akɛ amɛfee yɛ amɛgbalashihilɛ mli naagbai lɛ ahe moŋ, shi amɛbaanyɛ amɛkudɔ amɛjwɛŋmɔ kɛya nɔ ni Ŋmalɛi lɛ kɛɔ lɛ nɔ.—Galatabii 6:5.
5. Mɛni nɔ gbalamlitsemɔ ni eeenyɛ eba akɛ aaanyɛ aku sɛɛ akɛ mɔ kroko abote gbalashihilɛ mli ekoŋŋ ni akpɛlɛ nɔ yɛ Ŋmalɛ naa lɛ damɔ?
5 Kɛ shihilɛ ni yɔɔ gbalashihilɛ lɛ mli lɛ ehiii kwraa akɛ Kristofoi ni amɛbote gbalashihilɛ mli nɛɛ miisusu gbalamlitsemɔ he po lɛ, onukpai lɛ baanyɛ agbala amɛjwɛŋmɔ akɛ gbalamlitsemɔ kɛ gbalashihilɛ mli botemɔ ekoŋŋ lɛ ji nii ni Ŋmalɛi lɛ kpɛlɛɔ nɔ kɛji akɛ hefatalɔi lɛ ateŋ mɔ kome kɛ ehe ewo “ajwamaŋbɔɔ” mli. Enɛ kɔɔ gbalafitemɔ kɛ bɔlɛnamɔ mli jeŋba sharai krokomɛi hu he. (Mateo 19:9; Romabii 7:2, 3; kwɛmɔ The Watchtower March 15, 1983, baafa 31.) Ni kɛlɛ, kɛji akɛ “ajwamaŋbɔɔ” bɛ enɛ mli shi moŋ gbalashihilɛ toiŋjɔlɛ lɛ ji nɔ ni taoɔ afite diɛŋtsɛ lɛ hu? Mɛni ji nɔ ni Ŋmalɛi lɛ kɛɔ yɛ mla naa loo mligbalamɔ ni ajɛɔ suɔmɔ mli afeɔ kɛ ehi loo ehiii hu lɛ he?
Paulo Ŋaawoo Ni Jɛ Mumɔŋ Lɛ
6. (a) Mɛni ji Paulo ŋaawoo ni yɔɔ 1 Korintobii 7:10, 11 lɛ mli agugu lɛ? (b) Mɛɛ gbɛ nɔ esa akɛ Kristofoi ni ji gbalashihilɛ mli hefatalɔi lɛ atsɔ amɛsaa gbalashihilɛ mli bei ni ka amɛteŋ lɛ?
6 Bɔni afee ni abɔ mɔdɛŋ ni aye abua gbalashihilɛ mli hefatalɔi ni ji Kristofoi ni amɛgbalashihilɛ miihe afite lɛ, onukpai lɛ baagbala amɛjwɛŋmɔ kɛya bɔfo Paulo wiemɔi nɛɛ anɔ: “Shi mɛi ni ebote gbalashihilɛ mli lɛ, mi, ni jeee mi tete, shi Nuŋtsɔ lɛ moŋ woɔ amɛ kita akɛ, ŋa akatse ewu gbala; ni kɛji etse gbala lɛ tete lɛ, ehi shi nakai, ni ekagba, aloo ekɛ ewu lɛ ayakpata; ni wu hu akaŋmɛɛ eŋa he.” (1 Korintobii 7:10, 11) Esa akɛ Kristofoi ni ji hefatalɔi lɛ anyɛ asaa amɛnaagbai, amɛŋmɛɛ saji ahe yɛ emuu ni adesa yeee hewɔ. Esaaa akɛ naagba ko feɔ nɔ ni da aahu akɛ anyɛŋ atsɔ hiɛdɔɔ ni akɛaasɔle nɔ ana enaa tsabaa, akɛ Biblia mli shishitoo mlai atsu he nii, ni ajie suɔmɔ ni ji Nyɔŋmɔ mumɔ lɛ yibii lɛ kpo atsɔɔ.—Galatabii 5:22; 1 Korintobii 13:4-8.
7. (a) Kɛji akɛ gbalashihilɛ mli hefatalɔi ni ji Kristofoi gbala mli lɛ, mɛni bafeɔ amɛshidaamɔ yɛ Ŋmalɛ naa? (b) Kristofoi enyɔ ni gbalaa mli lɛ baanyɛ asa amɛsɔɔmɔ hegbɛi ahe yɛ mɛɛ gbɛ nɔ?
7 Shi kɛji akɛ hefatalɔi Kristofoi nɛɛ gbala mli hu? Esa akɛ “ekagba, aloo ekɛ ewu lɛ ayakpata.” Kɛ ejeee sane ni kɔɔ gbalamlitsemɔ ni damɔ “ajwamaŋbɔɔ” nɔ lɛ he lɛ, belɛ amɛteŋ mɔ ko yeee ehe yɛ Ŋmalɛ naa akɛ eku sɛɛ ebote gbalashihilɛ mli. Yɛ enɛ kɛ “ajwamaŋbɔi ahewɔ” lɛ, ebaahi kɛha amɛ akɛ “ayakpata” ekoŋŋ ni shishashaomɔ ko bɛ mli. (1 Korintobii 7:1, 2) Ejeee onukpai lɛ anitsumɔ akɛ amɛaabi ni nuu lɛ kɛ yoo lɛ kɛ amɛmligbalamɔ lɛ aba naagbee, shi ekolɛ sɔɔmɔ hegbɛi komɛi baŋ kɛhaŋ amɛ yɛ amɛ gbalashihilɛ mli naagbai lɛ ahewɔ. Akɛ nɔkwɛmɔ nɔ lɛ, kɛji akɛ nuu ko nyɛɛɛ aye “lɛ diɛŋtsɛ ewe nɔ jogbaŋŋ” lɛ, eka shi faŋŋ akɛ ebɛ nyɛmɔ ni ‘ekɛaakwɛ Nyɔŋmɔ asafo lɛ nɔ’ akɛ nɔkwɛlɔ.—1 Timoteo 3:1-5, 12.
8. Mɛni ji nɔ titri ni yɔɔ Paulo ŋaawoo ni yɔɔ 1 Korintobii 7:12-16 lɛ mli?
8 Amaa gbalashihilɛ yibaamɔ nɔ mi kɛji akɛ hefatalɔ kome pɛ ji heyelilɔ. Paulo ŋma akɛ: “Kɛji nyɛmi ko yɛ ŋa ko ni heee yeee, ni kɛlɛ ekpɛlɛ akɛ ekɛ lɛ aaahi shi lɛ, ekaŋmɛɛ ehe; ni kɛ yoo ko hu yɛ wu ko ni heee yeee, ni kɛlɛ ekpɛlɛ akɛ ekɛ lɛ aaahi shi lɛ, ekafɔɔ lɛ gbala. . . . Shi kɛ mɔ ni heee yeee lɛ miigbala ehe shi kɛmiiya lɛ, ha ni eya; ayeee nyɛminuu loo nyɛmiyoo nyɔŋ yɛ nɛkɛ saji nɛɛ amli. Shi hejɔlɛ mli Nyɔŋmɔ tsɛ nyɛ yɛ. Shi, yoo, bo obaahere owu lɛ yiwala jiŋ, ole? Aloo nuu, bo hu obaahere oŋa lɛ yiwala jiŋ, ole?” (1 Korintobii 7:12-16) Kɛ mɔ ni heee yeee lɛ hala akɛ ebaaya lɛ, Kristofonyo lɛ baaha eya. Shi akɛni heyelilɔ lɛ hiɛ ka nɔ akɛ ebaanyɛ eha mɔ ni heee yeee lɛ atsɔ Kristofonyo hewɔ lɛ, ejeŋ shishi akɛ eefite gbala lɛ. Eka shi faŋŋ akɛ Timoteo nyɛ, Eunike kɛ ewu ni heee yeee lɛ hi shi, shi yoo nɛɛ kɛ mumɔŋ tsɔsemɔ ha ebinuu lɛ.—2 Timoteo 1:5; 3:14, 15.
Nɔ Ni Adamɔɔ Nɔ Agbalaa Mli
9, 10. (a) Yɛ 1 Timoteo 5:8 hewɔ lɛ, mɛni ji nɔ kome ni gbalashihilɛ mli hefatalɔi damɔɔ nɔ amɛgbalaa mli? (b) Mɛni esa akɛ onukpai ni ahala amɛ lɛ afee kɛji akɛ afolɔ nuu ni ji Kristofonyo lɛ naa akɛ ekpoo akɛ eeekwɛ eŋa kɛ ebii lɛ?
9 Paulo wiemɔi ni yɔɔ 1 Korintobii 7:10-16 lɛ woɔ gbalashihilɛ mli hefatalɔi ahewalɛ ni amɛhi shi yɛ he kome. Ni kɛlɛ, yɛ be mli ni mɛi komɛi ebɔ mɔdɛŋ waa koni amɛbaa amɛgbalashihilɛ wekukpaa lɛ yi lɛ, yɛ naagbee lɛ amɛkpɛɔ amɛyiŋ akɛ amɛbɛ nɔ ni amɛbaahala akɛ ja amɛkɛ henilee kpakpa gbala mli. Mɛni baanyɛ afee nɔ ni aaadamɔ nɔ atsɔ gbɛ ni tamɔ nɛkɛ nɔ?
10 Gbɛ ni ajeɔ akɛ akwɛɛɛ weku ji nɔdaamɔ nɔ kome kɛha mligbalamɔ. Beni wu lɛ kpeeɔ yoo lɛ, eŋɔ gbɛnaa nii akɛ ebaakwɛ eŋa kɛ ebii ni ebaana lɛ ahiamɔ nii anɔ. Nuu ni kwɛɛɛ emɛi ni ji eshiabii lɛ “ekwa hemɔkɛyeli lɛ ni efaŋ mɔ ni heee yeee fe lɛ.” (1 Timoteo 5:8) No hewɔ lɛ abaanyɛ agbala mli kɛji akɛ aje gbɛ akɛ akwɛɛɛ weku lɛ. Shi, esa akɛ onukpai ni ahala amɛ lɛ akwɛ naafolɔmɔ akɛ Kristofonyo ko ekpoo akɛ eeekwɛ eŋa kɛ eweku lɛ mli jogbaŋŋ. Nɔ ni baajɛ henɔwomɔ ni mɔ ko kɛaakpoo akɛ eeekwɛ eweku lɛ mli aba ji shwiemɔ ni aaashwie lɛ kɛaajɛ asafo lɛ mli.
11. Mɛni ji nɔ kroko ni adamɔɔ nɔ agbalaa mli, shi mɛni baanyɛ aha shihilɛ lɛ afee nɔ ni abaanyɛ adamɔ naa fioo?
11 Yii ni naa wa kɛ pilamɔ hu ji nɔ kroko ni adamɔɔ nɔ agbalaa mli. Ŋɔɔ lɛ akɛ hefatalɔ ni heee yeee lɛ nuɔ daa yɛ be babaoo mli, emli woɔ la, ni eyiɔ heyelilɔ lɛ ni epilaa lɛ. (Abɛi 23:29-35) Heyelilɔ lɛ baanyɛ atsɔ sɔlemɔ kɛ Yehowa mumɔ lɛ yibii lɛ kpojiemɔ nɔ atsi bolɔmɔ kɛ mlifu ni tamɔ nɛkɛ naa ni enyɛ eŋmɛ etsui shi yɛ shihilɛ lɛ mli fioo. Shi kɛji akɛ enɛ yashɛ he ni hefatalɔ ni ayiɔ lɛ lɛ gbɔmɔtsoŋ hewalɛnamɔ kɛ wala diɛŋtsɛ eba oshara mli lɛ, Ŋmalɛ lɛ baanyɛ aŋmɛ mligbalamɔ gbɛ. Shikome ekoŋŋ lɛ, esa akɛ asafoŋ onukpai lɛ akwɛ naafolɔmɔ ni ji yii nɛɛ beni sane lɛ kɔɔ Kristofoi enyɔ ni yɔɔ gbalashihilɛ mli ni naagbai eba amɛteŋ lɛ he lɛ, ni ehe baahia ni atsu shwiemɔ he nii yɛ biɛ hu.—Okɛto Galatabii 5:19-21; Tito 1:7 he.)
12. (a) Heyelilɔ lɛ mumɔŋ shihilɛ baanyɛ asa mligbalamɔ he sane lɛ he yɛ mɛɛ gbɛ nɔ? (b) Mɛɛ ŋaa awoɔ kɛ mumɔŋ shihilɛ ko ni ehiii kwraa yɛ Kristofoi ashia ko mli?
12 Mumɔŋ shihilɛ ni akɛwoɔ oshara mli diɛŋtsɛ bafeɔ nɔ kroko ni adamɔɔ nɔ agbalaa mli. Heyelilɔ lɛ ni yɔɔ shia ni jamɔ egbala mli lɛ baabɔ mɔdɛŋ ni efee nɔ fɛɛ nɔ ni eeenyɛ ni ekɛ mumɔŋ nibii ni Nyɔŋmɔ kɛha lɛ atsu nii. Shi abaanyɛ aŋmɛ mligbalamɔ gbɛ kɛji akɛ hefatalɔ ni heee yeee lɛ shitee-kɛ-woo (ni ehewalɛ diɛŋtsɛ ni ekɛtsiɔ lɛ gbɛ fata he) haa efeɔ nɔ ni hefatalɔ kroko lɛ nyɛɛɛ atiu anɔkwale jamɔ sɛɛ ni ekɛ heyelilɔ lɛ mumɔŋ shihilɛ woɔ oshara mli lɛ. Ni kɛlɛ, mɛni kɛji akɛ mumɔŋ shihilɛ ni ehiii yɛ amɛteŋ yɛ, yɛ be mli ni hefatalɔi enyɔ lɛ fɛɛ ji heyelilɔi lɛ? Esa akɛ onukpai lɛ aye abua, shi esa akɛ wu ni abaptisi lɛ lɛ abɔ mɔdɛŋ waa ni esaa shihilɛ lɛ. Shi, kɛ gbalashihilɛ mli hefatalɔ ni abaptisi lɛ fee enii tamɔ hemɔkɛyeli kwalɔ ni ebɔ mɔdɛŋ ni etsi hefatalɔ lɛ gbɛ koni ekasɔmɔ Yehowa lɛ, esa akɛ onukpai lɛ atsu shihilɛ lɛ he nii yɛ Ŋmalɛ naa. Kɛji akɛ shwiemɔ ji nɔ ni baa yɛ oshara ni baa emumɔŋ shihilɛ he, gbɛ ni ajeɔ akɛ akwɛɛɛ weku aloo yii diɛŋtsɛ hewɔ lɛ, belɛ Kristofonyo anɔkwafo ni taoɔ mligbalamɔ yɛ mla naa lɛ efeŋ mɔ ni miite shi awo Paulo ŋaawoo ni kɔɔ heyelilɔ ni akɛ lɛ yaa saneyeli he lɛ.—1 Korintobii 6:1-8.
13. Mɛɛ shihilɛi amli gbalashihilɛ mli hefatalɔi amligbalamɔ baanya aba yɛ?
13 Kɛ shihilɛi lɛ amli wa waa lɛ, belɛ mligbalamɔ ji nɔ ni baanyɛ aba. Shi esaaa akɛ akɛ naajiemɔ ni bɛ mli tsuɔ nii koni akɛna mligbalamɔ. Esa akɛ Kristofoi ni gbalaa mli lɛ atere amɛ diɛŋtsɛ amɛ gbɛnaa nii yɛ amɛnifeemɔi lɛ ahe ni esa akɛ amɛyoo akɛ wɔ fɛɛ wɔbaabu wɔhe akɔntaa wɔha Yehowa.—Hebribii 4:13.
Ani Eji Nilee Gbɛ?
14. (a) Mɛɛ naagba eeenyɛ eba akɛ mligbalamɔ baanyɛ ekɛba? (b) Mligbalamɔ baanyɛ asa gbekɛbii lɛ ahe yɛ mɛɛ gbɛ nɔ?
14 Esa akɛ atsɔ sɔlemɔ nɔ asusu naagbai ni mligbalamɔ baanyɛ ekɛba lɛ he. Akɛ nɔkwɛmɔ nɔ lɛ, fɔlɔ kome ni lɛ pɛ ekwɛɔ ebii lɛ nyɛŋ atsu nɔ ni fɔlɔi enyɔ baanyɛ atsu yɛ pɛpɛɛpɛ ni aŋmɛɔ yɛ saji kɛ tsɔsemɔ he lɛ mli. Ni mligbalamɔ hu baanyɛ ana gbekɛbii lɛ anɔ hewalɛ tamɔ bɔ ni gbalamlitsemɔ baanyɛ afee lɛ nɔŋŋ, ni enɛ ji nɔ ni adafitswaa wolo India Today lɛ bɔ he amaniɛ lɛ: “Sheena, ni ehiŋmɛii dara aahu tamɔ nɔ ni jeŋ muu fɛɛ baanyɛ abote mli lɛ eye afii ekpaa. Efɔlɔi tse gbala mli afii enyɔ ni eho nɛ yɛ saneyeli mli bei ko ni ehiii kwraa lɛ sɛɛ. Etsɛɛɛ ni etsɛ kɛ yoo kroko bote gbalashihilɛ mli. Fɛ̃fɛ̃ tee nɔ egba enaa afi, ni eyeɔ ewao hu yɛ be fɛɛ mli. Ekɛ enyɛ yɔɔ South Delhi. Enyɛ kɛɛ: ‘Miwerɛho lɛ etee Sheena ŋɔɔ. . . . Eshweɔ ni ena etsɛ. . . . Eda fe gbekɛbii ni ji etipɛŋfoi lɛ. Shi efɔɔ yaafo, tamɔ nɔ ni eetao ejie nɔ ko kɛjɛ emli ni enɛ etsɔ nii ni anyɛɛɛ nɔ aye. Skul etsɔ naagba. Gbekɛbii baanyɛ afee yiwalɔi. Yɛ bei babaoo mli lɛ, egbalaa ehe shi kɛboteɔ jeŋ ko ni lɛ diɛŋtsɛ eka ehiɛ efee mli: etaa adesa ko ni tsɔɔ bɔ ni wɔ fɛɛ wɔmiije kpo ni wɔya enanemɛi lɛ aŋɔɔ lɛ he.’”
15. Mligbalamɔ baanyɛ asa Kristofonyo wu aloo ŋa he yɛ mɛɛ gbɛ nɔ?
15 Yɛ bei babaoo mli lɛ, mligbalamɔ yeee ebuaaa Kristofonyo wu kɛ ŋa lɛ fɛɛ. Etsɛɛɛ ni amɛbaleɔ akɛ kɛ hefatalɔ loo gbekɛbii lɛ bɛ lɛ amɛhe feɔ shoo ni ekɛ naagbai baa. Nɔnyɛɛ ni jɛɔ mligbalamɔ mli baa lɛ hu ji nii ni anyɛŋ aku hiɛ ashwie nɔ. Ani abaanyɛ atsu shika mli saji ahe nii aloo anyɛŋ afee nakai? Ni kɛji akɛ nɔ ni jɛ mligbalamɔ nɛɛ mli ba ji jeŋba shara mli ni ayagbee hu? Yesu kɛɛ: “Abu nilee bem kɛtsɔ enitsumɔi anɔ.” (Mateo 11:19, New World Translation) Titri lɛ kɛji hefatalɔi enyɔ lɛ fɛɛ ji Kristofoi lɛ, nɔ ni atsuɔ he nii kɛtsɔɔ mligbalamɔ nɔ lɛ bafeɔ nɔ ni yɛ bei komɛi amli lɛ nilee bɛ mli kwraa.
Tsu Nii Ni Okɛsaa Naagbai Lɛ
16. Mɛni esa akɛ gbalashihilɛ mli hefatalɔi ni ji Kristofoi ni naa akɛ naagba miiba amɛgbalashihilɛ mli toiŋjɔlɛ lɛ nɔ lɛ afee?
16 Esa akɛ Kristofoi ni ji hefatalɔi ni naa akɛ naagba eba toiŋjɔlɛ ni aaahi amɛgbalashihilɛ mli lɛ he waa lɛ atara shi ni amɛsusu bei ni ka amɛteŋ lɛ he yɛ gbɛ ni sa mɛi ni sɔmɔɔ Nyɔŋmɔ lɛ nɔ. Yɛ anɔkwale mli lɛ, esa akɛ amɛŋmɛ nibii komɛi agbɛ yɛ emuu ni ayeee hewɔ. (Filipibii 2:1-4) Shi mɛni hu abaanyɛ afee?
17. Yɛ mɛɛ gbɛ nɔ nilee ni aaajie lɛ kpo yɛ heloo gbɛfaŋ nibii ahe lɛ baanyɛ aye abua gbalashihilɛ mli toiŋjɔlɛ?
17 Nilee ni aaajie lɛ kpo yɛ heloo gbɛfaŋ nibii ahe lɛ baanyɛ aye abua gbalashihilɛ toiŋjɔlɛ. Akɛ nɔkwɛmɔ nɔ lɛ: Yɛ be mli ni nuu ko esusu jwɛŋmɔ ni ejaaa ni eŋa lɛ hiɛ lɛ he lɛ, ebaanyɛ ekpɛ eyiŋ akɛ, yɛ fɛɛ sɛɛ lɛ, nilee yɛ mli akɛ eweku lɛ aaashi kɛaaya he kroko. Enɛ baafee nilee gbɛ yɛ shika helɛtemɔ mli yiŋtoi komɛi ahewɔ, shi ebaanyɛ eye ebua weku lɛ ni amɛlɛɛ Maŋtsɛyeli lɛ he nibii lɛ amli kɛtsɔ he ni sɔɔmɔ lɛ he hiaa waa yɛ lɛ ni amɛaatsu nii yɛ lɛ nɔ. (Mateo 6:33) Eŋa Kristofonyo lɛ ebasumɔŋ fa ni aaafa kɛaaya nɛɛ ejaakɛ ebaashi efɔlɔi loo ekutsoŋbii ni ebɔle amɛweku lɛ yɛ esɛɛ. Shi yoo nɛɛ aaafee nilelɔ kɛ ekɛ ewu ni ji weku lɛ yitso lɛ ni gbɛnaa nii ka enɔ akɛ etsɔɔ he ni weku lɛ baahi lɛ fee ekome ni ekɛ lɛ kpa gbee. Agbɛnɛ, yoo nɛɛ heshibaa kɛ ekomefeemɔ ni suɔmɔ yɔɔ mli lɛ baaye abua shia toiŋjɔlɛ.—Efesobii 5:21-24.
18. Mɛɛ hegbɛi gbalashihilɛ mli hefatalɔi ni ji Kristofoi yɔɔ ni amɛkɛaafee nii yɛ ekomefeemɔ mli?
18 Weku toiŋjɔlɛ yaa hiɛ ni naagbai bafeɔ nɔ ni mli waaa tsɔ kɛji akɛ gbalashihilɛ mli hefatalɔi fee nii kutuu yɛ ekomefeemɔ mli. Akɛ nɔkwɛmɔ nɔ lɛ, Kristofoi hefatalɔi yɛ hegbɛi ni ekaaa akɛ amɛyi enyɔ lɛ amɛaatsu nii yɛ sɔɔmɔ nitsumɔ lɛ mli. Kɛ amɛfee nakai daa ni amɛkɛ amɛbii lɛ fata amɛhe lɛ, ehe baaba sɛɛnamɔ aha weku muu lɛ fɛɛ. Hegbɛi sɔrɔtoi hu baaba ni baawaje gbalashihilɛ ekomefeemɔ lɛ kɛtsɔ nitsumɔi kpakpai ni gbalashihilɛ mli hefatalɔ kome loo mɔ kroko lɛ nyaa he lɛ ni akɛ he aaawo mli lɛ nɔ.
19. Mɛɛ yitsoyeli nɛkɛ baanyɛ ni ekɛ weku mli toiŋjɔlɛ aba?
19 Weku yitso ni akɛtsuɔ nii yɛ gbɛ ni sa nɔ lɛ wajeɔ gbalashihilɛ tsakpaa lɛ. Eji anɔkwale akɛ Kristofonyo ni eda yɛ mumɔŋ lɛ efeŋ mɔ ni kɛ ewie ni awieee eko dɔŋŋ. Shi moŋ, ‘ebaaya nɔ esumɔ eŋa ni emli woŋ la waa ewoŋ lɛ.’ Yehowa miikpa lɛ gbɛ ni ekɛ eyitsoyeli lɛ atsu nii yɛ suɔmɔ mli. (Kolosebii 3:18, 19) Nɔ ni jɛɔ yitsoyeli ni tamɔ nɛkɛ mli baa ji weku mli toiŋjɔlɛ.
Yɛ Shiai Ni Mli Egbala Mli
20, 21. Saneshishinumɔ he baanyɛ aba sɛɛnamɔ beni toiŋjɔlɛ miihe afite yɛ shia ni jamɔ egbala mli lɛ mli yɛ mɛɛ gbɛ nɔ?
20 Kɛ mɔ ko nuɔ sane shishi lɛ eyeɔ ebuaa ni asaa gbalashihilɛ mli naagbai ni ka Kristofoi ateŋ. (Filipibii 4:5) Shi saneshishinumɔ hu he miihia kɛji akɛ aahe afite toiŋjɔlɛ ni yɔɔ shia ni jamɔ egbala mli lɛ mli lɛ. Kɛji akɛ wu ni heee yeee lɛ bɔ mɔdɛŋ akɛ eeetsi e-Kristofonyo ŋa lɛ gbɛ koni ekasɔmɔ Yehowa lɛ, yoo lɛ baabɔ mɔdɛŋ ni ekɛ lɛ asusu saji ahe, ni etsɔ ŋaa gbɛ nɔ etsɔɔ akɛ, akɛ yoo lɛ, ekpɛlɛɔ nɔ akɛ nuu lɛ yɛ jamɔ mli heyeli ni esa akɛ nuu lɛ kɛ lɛ aye yɛ nakai gbɛ nɔ nɔŋŋ. (Mateo 7:12) Eyɛ mli akɛ ebaaba ehe shi eha ewu ni heee yeee lɛ yɛ gbɛ ni akɛtoɔ nii ahe nɔ moŋ, shi esa akɛ afee Nyɔŋmɔ suɔmɔnaa nii yɛ hei ni bei efɛ yɛ lɛ. (1 Korintobii 11:3; Bɔfoi lɛ Asaji 5:29) Yɛ anɔkwale mli lɛ, Kristofoi akpeei ni aaaya shii etɛ yɛ otsi mli lɛ jeee nɔ ni fa tsɔ. Shi ŋa ni heɔ yeɔ lɛ baana akɛ nilee yɛ mli akɛ eeehi shia yɛ gbɛkɛi komɛi amli koni eto esɔɔmɔ nitsumɔ bei lɛ ahe gbɛjianɔ yɛ ŋmɛlɛtswai ni ewu lɛ miitsu nii ni gbekɛbii lɛ hu etee skul lɛ mli. Kɛ ekɛ saneshishinumɔ kɛ gbɛjianɔtoo kpakpa tsu nii lɛ, ‘enijiaŋ ejeŋ wui yɛ ekpakpafeemɔ mli.’—Galatabii 6:9.
21 Saneshishinumɔ mli kpaa kɛboteɔ nibii krokomɛi hu mli. Akɛ nɔkwɛmɔ nɔ lɛ, mɔ ko yɛ hegbɛ akɛ ekɛ ehe woɔ jamɔ nifeemɔi komɛi amli. Shi ebaafee nɔ ni shishinumɔ kɛ nilee yɔɔ mli kɛha Kristofonyo ŋa lɛ kɛ ekɛ e-Biblia kɛ Biblia kasemɔ woji eshwieee hei ni ewu ni teɔ shi woɔ lɛ waa lɛ baakpoo loo eeewie he lɛ. Abaanya akwa bei kɛji akɛ yoo lɛ ha woji ni tamɔ nɛkɛ hi ebaagi mli ni ekaseɔ amɛ yɛ teemɔŋ. Ni kɛlɛ, esaaa akɛ eŋmɛɛɛ jalɛ shishitoo mlai ahe ekɛsaa.—Mateo 10:16.
22. Mɛni abaanyɛ afee kɛji akɛ toiŋjɔlɛ ni fiteɔ yɛ shia lɛ damɔ jamɔ mli tsɔsemɔ ni akɛhaa gbekɛbii lɛ nɔ lɛ hewɔ?
22 Kɛji akɛ shia lɛ mli toiŋjɔlɛ ni fiteɔ lɛ damɔ jamɔ mli tsɔsemɔ ni akɛhaa gbekɛbii lɛ nɔ lɛ, ŋa ni heɔ yeɔ lɛ baanyɛ ni ekɛ ŋaa ato gbɛjianɔ ni ekɛ amɛ aya kpeei kɛ shiɛmɔ. Kɛji akɛ wu kɛ tsɛ ni heee yeee lɛ sumɔɔɔ enɛ lɛ, ebaanyɛ etsɔɔ gbekɛbii lɛ Biblia mli shishitoo mlai, ni kɛji akɛ amɛdara ni amɛshi shia lɛ, eka shi faŋŋ akɛ amɛbaatiu anɔkwale jamɔ sɛɛ. Kɛji akɛ wu lɛ ji mɔ ni heɔ yeɔ lɛ, akɛ weku lɛ yitso lɛ, Ŋmalɛ naa gbɛnaa nii ka enɔ akɛ etsɔse ebii lɛ akɛ Kristofoi. No hewɔ lɛ esa akɛ ekɛ amɛ akase Biblia lɛ, ekɛ amɛ aya kpeei, ni etsɔɔ, amɛ nii yɛ shiɛmɔ mli. (Efesobii 6:4) Taakɛ ebaakpa gbɛ lɛ, esa akɛ ejie mlihilɛ, suɔmɔ, kɛ saneshishinumɔ kpo yɛ be mli ni ekɛ eŋa ni heee yeee lɛ yeɔ lɛ.
Hiɛmɔ Toiŋjɔlɛ Mli Akɛ Weku Ni Efee Ekome
23. Kɛ sane ba gbalashihilɛ mli toiŋjɔlɛ he lɛ, mɛni baanyɛ aye abua?
23 Akɛni gbalashihilɛ mli hefatalɔi ji “heloo kome” hewɔ lɛ, esa akɛ amɛhi shi yɛ toiŋjɔlɛ mli yɛ Nyɔŋmɔ gbɛjianɔtoo kɛha gbɔmɛi ni amɛbote gbalashihilɛ mli lɛ naa, titri lɛ kɛji akɛ hefatalɔi enyɔ lɛ fɛɛ ji Kristofoi. (Mateo 19:5; 1 Korintobii 7:3-5) Shi kɛji akɛ gbalashihilɛ mli toiŋjɔlɛ miihe afite yɛ osane lɛ mli lɛ, tsɔ sɔlemɔ nɔ ni oku sɛɛ osusu Ŋmalɛ mli otii ni wɔtsɔ hiɛ wɔsusu he momo lɛ ahe ekoŋŋ. Ebaaye ebua hu kɛ oje shishi osusu tsutsu be mli ni nyɛbɔi nyiɛmɔ lɛ he lɛ. Kwɛ bɔ ni nyɛyi enyɔ lɛ fɛɛ nyɛbɔ mɔdɛŋ ni nyɛfee nɔ ni ja koni nyɛto shishi nyɛha ekomefeemɔ ni miishɛɛ yɔɔ mli lɛ! Ani obaabɔ mɔdɛŋ nakai nɔŋŋ bianɛ koni ohiɛ ogbalashihilɛ lɛ mli yɛ ekomefeemɔ mli?
24. Mɛɛ su esa akɛ Kristofoi ajie lɛ kpo yɛ amɛkpeemɔ loo gbalashihilɛ he?
24 Kristofoi ni amɛkpee amɛhe lɛ yɛ nikeenii ko ni yɔɔ naakpɛɛ ni jɛ Nyɔŋmɔ ŋɔɔ —amɛgbalashihilɛ lɛ! Kɛji akɛ ohi shi yɛ ogbalashihilɛ mli shiwoi lɛ anaa ni ohiɛ emuuyeli mli oha Yehowa lɛ, belɛ nɔ ni ka ohiɛ ji jalɛ jeŋ hee ni mligbalamɔ kɛ gbalamlitsemɔ ni kumɔɔ mɔ tsui lɛ gbaŋ adesai anaa dɔŋŋ yɛ mli lɛ. No hewɔ lɛ jiemɔ shidaa kpo oha gbalashihilɛ akɛ okadi “kpaa ni akɛbɔ he etɛ,” ni Yehowa ji efa titri ni he hiaa yɛ mli. (Jajelɔ 4:12) Ni eba akɛ wɔweku ni efee ekome lɛ mlibii fɛɛ aaana jɔɔmɔ ni jɛɔ weku ni miishɛɛ yɔɔ mli ni jɛɔ shia ni toiŋjɔlɛ kɛ hejɔɔmɔ yɔɔ mli lɛ mli baa lɛ mli ŋɔɔmɔ.
Mɛni Ji Ohetoi?
◻ Te obaamua Paulo ŋaawoo ni yɔɔ 1 Korintobii 7:10-16 Iɛ naa kuku oha tɛŋŋ?
◻ Mɛni ji yiŋtoi ni ja ni gbalashihilɛ mli hefatalɔi baanyɛ adamɔ nɔ agbala mli?
◻ Kɛ naagba ba gbalashihilɛ mli toiŋjɔlɛ he Iɛ, mɛɛ gbɛ nɔ Kristofoi baatsɔ ana tsabaa aha enɛ?
◻ Yɛ mɛɛ gbɛ nɔ saneshishinumɔ baanyɛ aye abua toiŋjɔlɛ yɛ shia ni jamɔ egbala mli lɛ mli?
[Mfoniri ni yɔɔ baafa 23]
Esa akɛ gbalashihilɛ mli hefatalɔi ni ji Kristofoi ni naagba miihe aba amɛgbalashihilɛ mli toiŋjɔlɛ nɔ lɛ asusu amɛ naagbai lɛ ahe yɛ gbɛ ni sa mɛi ni sumɔɔ Yehowa lɛ nɔ