Oshijayeli—Gbɛ ni kɛ Mɔ Yaa Nitsumɔ ni Wooo Mɔ Ahuntoo Mli
“Nyɛsɔmɔ Nuntsɔ lɛ, ni nɔ ko nɔ ko akawo nyɛ ahuntoo.”—1 KORINTOBII 7:35.
1. Mɛɛ amaniɛbɔɔ ni gbaa mɔ naa ni kɔɔ Korinto Kristofoi lɛ ahe Paulo nine shɛ nɔ?
BƆFO Paulo susuɔ enyɛmimɛi Kristofoi ni yɔɔ Korinto, yɛ Hela lɛ ahe. Aaafee afii enumɔ ni tsɔ hiɛ lɛ mli eto asafo yɛ nakai maŋ ni yɔɔ nii babaoo ni ejeŋba shara eha ehe gbɛi lɛ mli. Agbɛnɛ, aaafee afi 55 Ŋ.B., yɛ be mli ni eyɔɔ Efeso, yɛ Asia Bibioo lɛ, enu amaniɛbɔi ni gbaa mɔ naa he kɛjɛ Korinto, yɛ mligbalamɔi ni eba asafo lɛ mli kɛ jeŋba shara ni aŋmɛɔ gbɛ yɛ asafo lɛ mli lɛ hewɔ. Agbɛnɛ hu, Paulo nine eshɛ wolo nɔ kɛjɛ Korinto Kristofoi lɛ adɛŋ ni amɛmiibi gbɛtsɔɔmɔ yɛ bɔlɛnamɔ, oshijayeli, gbalashihilɛ, gbalamlitsemɔ, kɛ gbalashihilɛ mlibotemɔ ekoŋŋ he.
2. Eka shi faŋŋ akɛ, jeŋba shara ni yaa nɔ yɛ Korinto lɛ miisa Kristofoi ni yɔɔ nakai maŋ lɛ mli lɛ ahe yɛ mɛɛ gbɛ nɔ?
2 Etamɔ nɔ ni jeŋba shara ni ehiii kwraa ni yaa nɔ yɛ Korinto lɛ miisa asafo ni yɔɔ jɛmɛ lɛ he yɛ gbɛi enyɔ nɔ. Kristofoi komɛi miiŋmɛɛ amɛhe kɛmiiha gbɔjɔmɔ yɛ jeŋba mli, ni amɛmiikpɛlɛ ajwamaŋbɔɔ nɔ. (1 Korintobii 5:1; 6:15-17) Eyɛ faŋŋ akɛ, akɛni mɛi komɛi nyãaa ajwamaŋbɔɔ he miishɛɛ ni yaa nɔ yɛ maŋ lɛ mli lɛ he hewɔ lɛ, amɛtee shɔŋŋ tsɔ̃ kɛyajie yi akɛ, atsi he kɛjɛ bɔlɛnamɔ he kwraa, ni mɛi ni amɛbote gbalashihilɛ mli po fata he.—1 Korintobii 7:5.
3. Mɛɛ saji Paulo tsu he nii kɛjɛ shishijee yɛ eklɛŋklɛŋ wolo ni eŋma eyaha Korintobii lɛ mli?
3 Paulo tsu mligbalamɔ he naagba lɛ he nii klɛŋklɛŋ, yɛ ewolo kakadaŋŋ ni eŋma eyaha Korintobii lɛ mli. (1 Korintobii, yitsei 1-4) Ewo amɛ ŋaa ni amɛkpa gbɔmɛi asɛɛnyiɛmɔ, ni nɔ ni ekɛbaa nɔŋŋ ji mligbalamɔ ni yeɔ awui lɛ. Esa akɛ amɛfee ekome akɛ Nyɔŋmɔ “nanemɛi nitsulɔi.” Kɛkɛ ni ekɛ gbɛtsɔɔmɔi krɛdɛɛ ha yɛ bɔ ni amɛaaha asafo lɛ he atse yɛ jeŋba gbɛfaŋ lɛ he. (Yitsei 5, 6) Kɛkɛ ni bɔfo lɛ tsɔ ehe kɛtee wolo ni amɛŋma lɛ lɛ nɔ.
Ajie Oshijayeli Yi Aha
4. Mɛni Paulo tsɔɔ beni ekɛɛ akɛ “ehi ha nuu akɛ ekata yoo he” lɛ?
4 Eje shishi akɛ: “Agbɛnɛ, yɛ nii ni nyɛŋma nyɛbaha mi lɛ ahewɔ lɛ: Ehi ha nuu akɛ ekata yoo he.” (1 Korintobii 7:1) Wiemɔ “ekata yoo he” lɛ tsɔɔ yɛ biɛ akɛ, ekɛ ehe akata yoo he kɛha bɔlɛnamɔ mli ŋɔɔmɔyeli. Akɛni Paulo ewie eshi ajwamaŋbɔɔ momo hewɔ lɛ, eewie bɔlɛnamɔ yɛ gbalashihilɛ gbɛjianɔtoo lɛ mli lɛ he. No hewɔ lɛ, Paulo miijie oshijayeli shihilɛ yi. (1 Korintobii 6:9, 16, 18; okɛto 1 Mose 20:6; Abɛi 6:29 he.) No sɛɛ fioo lɛ eŋma akɛ: “Shi oshijafoi kɛ okulafoi lɛ, miikɛɛ amɛ akɛ: Ehi ha amɛ kɛji amɛhi shi taakɛ bɔ ni mi hu miyɔɔ nɛɛ lɛ.” (1 Korintobii 7:8) Paulo boteko gbalashihilɛ mli, ekolɛ eji okulafo.—1 Korintobii 9:5.
5, 6. (a) Mɛni hewɔ eka shi faŋŋ akɛ jeee mɔ kome-shihilɔi agbɛ Paulo jieɔ yi lɛ? (b) Mɛni hewɔ Paulo jie oshijayeli yi?
5 Eeenyɛ efee akɛ, Kristofoi ni yɔɔ Korinto lɛ ebale Hela jeŋ nilee, ni kui komɛi jieɔ henaatsii ni yɔɔ keketee, loo hekwamɔ yi waa yɛ mli lɛ he nɔ ko. Ani eeenyɛ efee akɛ no hewɔ ni Korintobii lɛ bi Paulo kɛ “ehi” ha Kristofoi akɛ amɛtsi amɛhe kɛjɛ bɔlɛnamɔ he kwraa lɛ? Paulo hetoo lɛ ejieee Hela jeŋ nilee kpo. (Kolosebii 2:8) Ákɛ mɔ ni tamɔɔɔ Katolik jamɔ he nikaselɔi lɛ, he ko he ko bɛ ni ejie oshijayeli yɛ shihilɛ ni awaa he yi yɛ mli, yɛ mɔ kome-shihilɔi ashihilɛ he loo osɔfoyei ashihilɛ hé ko yi, tamɔ nɔ ni oshijafoi yɛ krɔŋkrɔŋ diɛŋtsɛ, ni amɛ sɔlemɔ kɛ shihilɛ gbɛ baanyɛ aye abua amɛ diɛŋtsɛ amɛ yiwalaheremɔ.
6 Paulo jie oshijayeli yi yɛ “amrɔmrɔ hejaramɔ nɛɛ hewɔ.” (1 Korintobii 7:26) Ekolɛ, eetsɔɔ jaramɔ bei ni Kristofoi tsɔɔ mli yɛ nakai be lɛ mli, ni gbalashihilɛ baanyɛ afite lɛ kwraa lɛ. (1 Korintobii 7:28) Eŋaawoo kɛha Kristofoi ni boteko gbalashihilɛ mli ji: “Ehi ha amɛ kɛji amɛhi shi taakɛ bɔ ni mi hu miyɔɔ nɛɛ.” Ekɛɛ mɛi ni amɛ ŋamɛi egboi lɛ akɛ: “Afɛneo yɛ yoo he hu jiŋŋ, kaatao ŋa.” Eŋma yɛ Kristofonyo okulafo he akɛ: “Kɛji ehi shi bɔ ni eyɔɔ lɛ, mijwɛŋmɔ naa lɛ, eyɛ hejɔlɛ aahu; shi efeɔ mi akɛ mi hu miyɛ Nyɔŋmɔ Mumɔ lɛ.”—1 Korintobii 7:8, 27, 40.
Anyɛɛɛ Mɔ Nɔ ni Ahi Shi Oshija
7, 8. Mɛni tsɔɔ akɛ Paulo enyɛ̃ɛɛ Kristofonyo ko nɔ koni ehi shi akɛ oshijafonyo?
7 Ŋwanejee ko bɛ he akɛ, Yehowa mumɔ krɔŋkrɔŋ lɛ miikudɔ Paulo beni ekɛ ŋaawoo nɛɛ ha lɛ. Bɔ ni etsɔɔ oshijayeli kɛ gbalashihilɛ mli eha lɛ fɛɛ tsɔɔ pɛpɛɛpɛ ni aŋmɛɔ kɛ henumɔi anaatsii. Efeee lɛ sane ni kɔɔ anɔkwayeli loo anɔkwa ni ayeee he. Shi moŋ, eji sane ni tsɔɔ suɔmɔ mli ni ajɛɔ ahalaa nii, ni aajie oshijayeli yi aaha mɛi ni baanyɛ ahi shi yɛ hetsemɔ mli yɛ nakai shihilɛ lɛ mli.
8 Beni awie akɛ “ehi ha nuu akɛ ekata yoo he” lɛ sɛɛ nɔŋŋ lɛ, Paulo kɛfata he akɛ: “Shi ajwamaŋbɔɔi ahewɔ lɛ, ha nuu fɛɛ nuu awɛ lɛ diɛŋtsɛ eŋa, ni yoo fɛɛ yoo agbã lɛ diɛŋtsɛ ewu.” (1 Korintobii 7:1, 2) Beni ewo mɛi ni boteko gbalashihilɛ mli lɛ kɛ okulafoi lɛ ŋaa akɛ “amɛhi shi taakɛ bɔ ni mi hu miyɔɔ nɛɛ” sɛɛ lɛ, efee oya ni ekɛfata he akɛ: “Shi kɛ amɛnyɛɛɛ amɛhe nɔ amɛye lɛ, ha amɛbote gbalashihilɛ mli; ejaakɛ gbalashihilɛ hi fe nɔ ni akɔnɔ aaahao bo.” (1 Korintobii 7:8, 9) Shikome ekoŋŋ lɛ, eŋaawoo kɛha okulafoi ji: “Kaatao ŋa. Shi kɛji owɛ yoo hu jiŋŋ, ofeko esha.” (1 Korintobii 7:27, 28) Ŋaawoo ni ŋmɛɔ pɛpɛɛpɛ nɛɛ jieɔ nihalamɔ mli heyeli kpo.
9. Taakɛ Yesu kɛ Paulo tsɔɔ lɛ, gbalashihilɛ kɛ oshijayeli fɛɛ ji nikeenii ni jɛ Nyɔŋmɔ ŋɔɔ yɛ mɛɛ gbɛ nɔ?
9 Paulo tsɔɔ akɛ gbalashihilɛ kɛ oshijayeli fɛɛ ji nikeenii ni jɛ Nyɔŋmɔ ŋɔɔ. “Mihewɔŋ kulɛ, gbɔmɛi fɛɛ ahi shi taakɛ bɔ ni miyɔɔ nɛɛ; shi mɔ fɛɛ mɔ yɛ lɛ diɛŋtsɛ eduromɔ keenii kɛjɛ Nyɔŋmɔ dɛŋ, mɔ ko nɔ̃ nɛkɛ, ni mɔ ko hu ekroko.” (1 Korintobii 7:7) Ŋwanejee ko bɛ he akɛ, nɔ ni Yesu wie lɛ yɛ ejwɛŋmɔ mli. Beni etsɔɔ akɛ gbalashihilɛ jɛ Nyɔŋmɔ ŋɔɔ lɛ sɛɛ lɛ, Yesu tsɔɔ akɛ, suɔmɔ mli ni ajɛɔ ahiɔ shi oshija koni asɔmɔ Maŋtsɛyeli lɛ he nibii lɛ ji nikeenii krɛdɛɛ: “Jeee mɛi fɛɛ aaanyɛ wiemɔ nɛɛ mli amɔ, ja mɛi ni aŋɔha lɛ kɛkɛ. Ejaakɛ osaii komɛi yɛ ni afɔ amɛ nakai kɛjɛ amɛnyɛmɛi amusu mli; ni osaii lɛ ekomɛi yɛ ni gbɔmɛi sa amɛ; ni osaii lɛ ekrokomɛi hu yɛ ni ŋwɛi maŋtsɛyeli lɛ hewɔ amɛ diɛŋtsɛ amɛsa amɛhe. Mɔ ni aaanyɛ mli amɔ lɛ, ha emɔ mli.”—Mateo 19:4-6, 11, 12.
Oshijayeli Nikeenii lɛ ni Wɔɔmɔ Mli
10. Te mɔ ko aaafee tɛŋŋ ‘emɔ’ oshijayeli nikeenii lɛ “mli”?
10 Yɛ be mli ni Yesu kɛ Paulo fɛɛ wie oshijayeli he akɛ eji “nikeenii” lɛ, amɛteŋ mɔ ko ewieee akɛ eji naakpɛɛ nikeenii ni mɛi komɛi pɛ yɔɔ. Yesu kɛɛ akɛ, “jeee mɛi fɛɛ aaanyɛ” nakai nikeenii lɛ “mli amɔ,” ni ewo mɛi ni baanyɛ afee nakai lɛ ŋaa ni ‘amɛmɔ mli,’ ni Yesu kɛ Paulo fee nakai. Eji anɔkwale akɛ Paulo ŋma akɛ: ‘Gbalashihilɛ hi fe nɔ ni akɔnɔ aaahao bo,’ shi eewie mɛi ni “nyɛɛɛ amɛhe nɔ amɛye lɛ” ahe. (1 Korintobii 7:9) Paulo etsɔ eklɛŋklɛŋ niŋmaai lɛ anɔ etsɔɔ akɛ, Kristofoi baanyɛ akwa akɔnɔ ni amɛaaha ehao amɛ. (Galatabii 5:16, 22-24) Ni aaanyiɛ yɛ mumɔ naa lɛ tsɔɔ akɛ, ni aaaha Yehowa mumɔ lɛ akudɔ wɔ nifeemɔi fɛɛ. Ani obalahii kɛ obalayei Kristofoi baanyɛ afee nakai? Hɛɛ, kɛ amɛnyiɛ Yehowa Wiemɔ lɛ sɛɛ kpaakpa. Lalatsɛ lɛ ŋma akɛ: “Te obalanyo [loo yoo] aaafee tɛŋŋ ni eeeha egbɛ lɛ he atse hu? No ji akɛ ekwɛ ehe nɔ jogbaŋŋ yɛ owiemɔ lɛ naa.”—Lala 119:9.
11. Ni ‘aaanyiɛ yɛ mumɔ naa’ lɛ tsɔɔ mɛni?
11 Enɛ kɔɔ wɔhe ni wɔɔtsi kɛjɛ jwɛŋmɔi ni ŋmɛɔ nɔ fɛɛ nɔ feemɔ gbɛ ni atsɔɔ TV nɔ nifeemɔi, sinii, woji tɛtrɛbii amli saji, woji wuji, kɛ lalai amli wiemɔi babaoo nɔ agbɛɔ ashwaa lɛ ahe. Heloonaa susumɔi ji enɛɛmɛi. Esaaa akɛ Kristofonyo obalanyo loo obalayoo ni miisumɔ ni emɔ oshijayeli mli lɛ ‘nyiɛɔ yɛ heloonaa shi moŋ yɛ mumɔ naa. Ejaakɛ mɛi ni hiɔ shi yɛ heloo naa lɛ, heloo nii ahe amɛjwɛŋɔ; shi mɛi ni hiɔ shi yɛ mumɔ naa lɛ jwɛŋɔ mumɔ nii ahe.’ (Romabii 8:4, 5) Mumɔ naa nibii ja, amɛhe tse, asumɔɔ, amɛyɛ jeŋba kpakpa. Kristofoi gbekɛbii kɛ onukpai fɛɛ baafee jogbaŋŋ akɛ ‘amɛaaya nɔ amɛjwɛŋ enɛɛmɛi anɔ.’—Filipibii 4:8, 9.
12. Mɛni titri yɔɔ oshijayeli nikeenii lɛ ni aaato gbɛjianɔ ni anyɛ amɔ mli lɛ mli?
12 Oshijayeli nikeenii lɛ mli ni aaamɔ lɛ damɔ mɔ lɛ tsui ni ekɛaama nakai oti lɛ nɔ, ni esɔle eha Yehowa kɛha eyelikɛbuamɔ ni ekɛtiu enɛ lɛ nɔ. (Filipibii 4:6, 7) Paulo ŋma akɛ: “Mɔ ni damɔ shi shiŋŋ yɛ etsui mli, ni nɔ ko nɔ ko fiii lɛ, shi eyɛ hewalɛ yɛ lɛ diɛŋtsɛ esuɔmɔ nɔ, ni ekpɛ mli nɛkɛ yɛ lɛ diɛŋtsɛ etsui mli akɛ eeebaa ebalayoo fro lɛ yi lɛ, efee jogbaŋŋ. No hewɔ lɛ, mɔ ni ŋɔɔ lɛ haa gbala lɛ, efee jogbaŋŋ; shi mɔ ni kɛ lɛ haaa gbala lɛ, efee jogbaŋŋ fe no.”—1 Korintobii 7:37, 38.
Oshijayeli ni Hiɛ Yiŋtoo
13, 14. (a) Te bɔfo Paulo kɛ Kristofoi ni boteko gbalashihilɛ mli lɛ to mɛi ni ebote mli lɛ ahe eha tɛŋŋ? (b) Mɛɛ gbɛ pɛ nɔ Kristofonyo oshijafonyo lɛ aaatsɔ ‘afee jogbaŋŋ fe’ mɛi ni ebote gbalashihilɛ mli lɛ?
13 Oshijayeli diɛŋtsɛ jeee nɔ ni sa woo. Belɛ, mɛɛ shishinumɔ naa ebaanyɛ ‘efee jogbaŋŋ fe’ no lɛ? Fɛɛ damɔ bɔ ni mɔ lɛ kɛ heyeli ni ekɛbaa lɛ tsuɔ nii ehaa lɛ nɔ. Paulo ŋma akɛ: “Shi miisumɔ akɛ nyɛkaná haomɔ. Mɔ ni ewɛɛɛ yoo lɛ, ehaoɔ ehe yɛ Nuntsɔ lɛ nii ahe, bɔ ni eeefee ni esane asa Nuntsɔ lɛ hiɛ; shi mɔ ni ewɛ yoo lɛ, ehaoɔ ehe yɛ je nɛŋ nii ahewɔ, bɔ ni eeefee ni esane asa eŋa hiɛ. . . . Mɔ ni egbako lɛ haoɔ ehe yɛ Nuntsɔ lɛ nii ahewɔ, koni efee krɔŋkrɔŋ yɛ gbɔmɔtso kɛ mumɔ fɛɛ gbɛfaŋ; shi mɔ ni egba lɛ haoɔ ehe yɛ je nɛŋ nii ahewɔ, bɔ ni eeefee ni esane asa ewu hiɛ. Shi enɛ lɛ, nyɛ ekpakpa hewɔ mikɛɔ, jeee nyɛkuɛ kpãa miwoɔ, shi moŋ bɔni afee ni afee fɛo, koni nyɛsɔmɔ Nuntsɔ lɛ, ni nɔ ko nɔ ko akawo nyɛ ahuntoo.”—1 Korintobii 7:32-35.
14 Kristofonyo oshijafo ni kɛ be ni eboteko gbalashihilɛ mli lɛ tsuɔ nii ekɛdiɔ pɛsɛmkunya otii asɛɛ lɛ efeee “jogbaŋŋ fe” Kristofoi ni amɛbote gbalashihilɛ mli. Eehi shi akɛ oshijafonyo, jeee yɛ “ŋwɛi maŋtsɛyeli lɛ hewɔ,” shi moŋ yɛ lɛ diɛŋtsɛ eyiŋtoi ahewɔ. (Mateo 19:12) Esa akɛ nuu loo yoo ni boteko gbalashihilɛ mli lɛ ‘ahao ehe yɛ Nuntsɔ lɛ nii ahewɔ,” ehao koni ‘esane asa Nuntsɔ lɛ hiɛ,’ ni ‘esɔmɔ Nuntsɔ lɛ ni nɔ ko nɔ ko wooo lɛ ahuntoo.’ Enɛ tsɔɔ he ni atuɔ kwraa ahaa Yehowa kɛ Kristo Yesu sɔɔmɔ. Nakai feemɔ pɛ nɔ Kristofoi hii kɛ yei ni boteko gbalashihilɛ mli lɛ baatsɔ afee “jogbaŋŋ fe” Kristofoi ni ebote gbalashihilɛ mli.
Nitsumɔ ni Wooo Ahuntoo
15. Mɛni ji Paulo naataomɔ ni yɔɔ 1 Korintobii yitso 7 lɛ mli sane titri?
15 Paulo naataomɔ muu lɛ fɛɛ ni yɔɔ yitso nɛɛ mli lɛ ji enɛ: Yɛ be mli ni gbalashihilɛ sa, ni yɛ shihilɛi komɛi amli lɛ, ajieɔ yi ahãa mɛi komɛi lɛ, ŋwanejee ko bɛ he akɛ oshijayeli he yɛ sɛɛnamɔ kɛha Kristofonyo nuu loo yoo ni miisumɔ ni esɔmɔ Yehowa ni nɔ ko nɔ ko wooo lɛ ahuntoo lɛ. Yɛ be mli ni mɔ ni ebote gbalashihilɛ mli lɛ ‘mli eja enyɔ’ lɛ, Kristofonyo ni boteko gbalashihilɛ mli lɛ yɛ heyeli ni ekɛaajwɛŋ “Nuntsɔ lɛ nii ahe.”
16, 17. Te Kristofonyo oshijafonyo aaafee tɛŋŋ ajwɛŋ “Nuntsɔ lɛ nibii” anɔ jogbaŋŋ?
16 Mɛni ji Nuntsɔ lɛ nibii ni Kristofonyo ni boteko gbalashihilɛ mli lɛ baanyɛ ekɛ heyeli ajwɛŋ he babaoo fe mɛi ni ebote gbalashihilɛ mli lɛ? Yesu wie “Nyɔŋmɔ nii”—nibii ni Kristofonyo nyɛŋ ekɛha Kaisare he yɛ wiemɔ kroko mli. (Mateo 22:21) Nɛkɛ nibii nɛɛ kɔɔ Kristofonyo shihilɛ, ejamɔ, kɛ esɔɔmɔ lɛ ahe titri.—Mateo 4:10; Romabii 14:8; 2 Korintobii 2:17; 3:5, 6; 4:1.
17 Oshijafoi yɛ heyeli bɔ ni no aaaha amɛtu be amɛwo Yehowa sɔɔmɔ, ni he baaba sɛɛnamɔ aha amɛ yɛ mumɔŋ kɛ he ni amɛtsuɔ amɛ sɔɔmɔ lɛ he nii kɛyashɛɔ lɛ mli. Amɛbaanyɛ amɛkɛ be babaoo awo teemɔŋ nikasemɔ kɛ enɔjwɛŋmɔ mli. Yɛ bei pii amli lɛ, Kristofoi oshijafoi nyɛɔ amɛtoɔ amɛ Biblia kanemɔ he gbɛjianɔ amɛwoɔ amɛbe mli yɛ gbɛ ni waaa nɔ fe bɔ ni mɛi ni ebote gbalashihilɛ mli lɛ baanyɛ afee. Amɛbaanyɛ amɛsaa amɛhe jogbaŋŋ kɛha kpeei kɛ sɔɔmɔ nitsumɔ lɛ. Enɛɛmɛi fɛɛ yɛ kɛha ‘amɛ sɛɛnamɔ.’—1 Korintobii 7:35.
18. Mɛɛ gbɛ nyɛmimɛi hii oshijafoi pii aaanyɛ atsɔ nɔ atsɔɔ akɛ, amɛmiisumɔ ni amɛsɔmɔ Yehowa ‘ni nɔ ko wooo amɛ ahuntoo’?
18 Nyɛmimɛi hii oshijafoi babaoo ni miisɔmɔ momo akɛ asafoŋ sɔɔlɔi lɛ yɛ hegbɛ ni amɛkɛɔ Yehowa akɛ: “Naa mi, tsu mi!” (Yesaia 6:8) Amɛbaanyɛ amɛbi ni amɛya Sɔɔlɔi Atsɔsemɔ Skul, ni ato aha asafoŋ sɔɔlɔi kɛ onukpai oshijafoi ni yɔɔ hegbɛ akɛ amɛaasɔmɔ yɛ he ni hiamɔ lɛ da yɛ lɛ. Nyɛmimɛi hii, ni nyɛŋ amɛshi amɛ asafoi lɛ po baanyɛ amɛkɛ amɛhe aha ni amɛsɔmɔ amɛ nyɛmimɛi lɛ akɛ asafoŋ sɔɔlɔi loo onukpai.—Filipibii 2:20-23.
19. Ajɔɔ nyɛmimɛi yei oshijafoi pii yɛ mɛɛ gbɛ nɔ, ni mɛni ji gbɛ kome ni amɛaanyɛ amɛtsɔ nɔ amɛtsɔ jɔɔmɔ amɛha asafoi lɛ?
19 Nyɛmimɛi yei oshijafoi ni bɛ wumɛi ni amɛkɛ amɛ aaagba sane kɛ teemɔŋ saji lɛ baafee mɛi ni sa jogbaŋŋ akɛ ‘amɛaashɛ amɛ jatsũi lɛ amɛfɔ Yehowa nɔ.’ (Lala 55:23; 1 Korintobii 11:3) Enɛ ji hiamɔ sane titri kɛha nyɛmimɛi yei ni yɛ suɔmɔ ni amɛyɔɔ kɛha Yehowa hewɔ lɛ amɛji oshijafoi lɛ. Kɛ yɛ be ni sa mli lɛ amɛbote gbalashihilɛ mli lɛ, amɛbaafee “yɛ Nuntsɔ lɛ mli,” ni ji akɛ, kɛ mɔ ni ejɔɔ ehe nɔ eha Yehowa pɛ. (1 Korintobii 7:39) Onukpai lɛ daa shi akɛ amɛyɛ nyɛmimɛi yei ni boteko gbalashihilɛ mli yɛ amɛ asafoi amli; bei pii lɛ amɛyasaraa ni amɛyeɔ amɛbuaa mɛi ni he yeɔ kɛ mɛi ni edara yɛ afii amli lɛ. Enɛ haa mɛi ni ekɔɔ amɛhe lɛ fɛɛ naa miishɛɛ.—Bɔfoi lɛ Asaji 20:35.
20. Mɛɛ gbɛ nɔ Kristofoi pii tsɔɔ yɛ akɛ ‘amɛsɔmɔɔ Nuntsɔ lɛ ni nɔ ko nɔ ko wooo amɛ ahuntoo’?
20 Obalahii kɛ obalayei Kristofoi babaoo eto gbɛjianɔ yɛ amɛ shihilɛ mli ‘koni amɛsɔmɔ Nuntsɔ lɛ ni nɔ ko nɔ ko akawo amɛ ahuntoo.’ (1 Korintobii 7:35) Amɛmiisɔmɔ Yehowa akɛ be-fɛɛ sɔɔlɔi gbɛgbalɔi, maŋsɛɛ sanekpakpa shiɛlɔi, loo yɛ Buu Mɔɔ Asafo lɛ nitsumɔ he niji lɛ ekome mli. Ni mɛɛ kuu ni yɔɔ miishɛɛ amɛji nɛkɛ! Kwɛmɔ bɔ ni amɛnamɔ haa mɔ naa miishɛɛ ha! Ejaakɛ, yɛ Yehowa kɛ Yesu hiɛ lɛ, ‘amɛtamɔ bɔ́.’—Lala 110:3.
Naanɔ Oshijayeli He Kitã ko Bɛ
21. (a) Mɛni hewɔ eyɔɔ faŋŋ akɛ Paulo wooo hewalɛ ni akã oshijayeli he kitã lɛ? (b) Mɛni etsɔɔ kɛkɛ beni ewie ‘gbãla ni asale’ he lɛ?
21 Nɔ titri ni yɔɔ Paulo ŋaawoo lɛ mli ji akɛ, Kristofoi baafee “jogbaŋŋ” kɛ amɛto gbɛjianɔ yɛ amɛ shihilɛ mli amɛha oshijayeli. (1 Korintobii 7:1, 8, 26, 37) Shi efɔɔɔ nine etsɛɛɛ amɛ ni amɛbakã oshijayeli he kitã yɛ gbɛ ko nɔ. Nɔ ni tamɔɔɔ nakai lɛ, eŋma akɛ: “Kɛji mɔ ko susuɔ akɛ, kɛ ebi obalayoo fro sale gbãla lɛ, ebɛ fɛo shi ja egbã lɛ, efee bɔ ni esumɔɔ, efeee esha; ha amɛgbã.” (1 Korintobii 7:36) Hela wiemɔ kome (hy·peʹra·kmos) ni atsɔɔ shishi akɛ “sale gbãla” lɛ shishi diɛŋtsɛ ji “he ni kwɔ fe fɛɛ lɛ sɛɛ,” ni ekɔɔ be mli ni atekeɔ bɔlɛnamɔ akɔnɔ mli kanyamɔ ni fe fɛɛ lɛ. No hewɔ lɛ, mɛi ni kɛ afii pii ehi oshijayeli mli, ni yɛ naagbee lɛ amɛnuɔ he akɛ, esa akɛ amɛbote gbalashihilɛ mli lɛ yɛ hegbɛ kwraa akɛ amɛkɛ naanyo heyelilɔ aaabote gbalashihilɛ mli.—2 Korintobii 6:14.
22. Mɛni hewɔ sɛɛnamɔ yɔɔ he yɛ gbɛ fɛɛ gbɛ nɔ akɛ Kristofonyo akabote gbalashihilɛ mli beni edako tsɔ̃ lɛ?
22 Afii ni obalanyo loo obalayoo Kristofonyo yeɔ ekɛsɔmɔɔ Yehowa ni nɔ ko nɔ ko wooo lɛ ahuntoo lɛ ji be ni atsu he nii yɛ nilee mli. Amɛhaa enaa nilee, niiashikpamɔ, kɛ sane shishinumɔ ni anyɛɔ akɛtsuɔ nii. (Abɛi 1:3, 4) Mɔ ni ehi shi akɛ oshijafonyo yɛ Maŋtsɛyeli lɛ hewɔ lɛ, bajeɔ gbɛhe ni hi kwraa mli, kɛ́ yɛ sɛɛ mli lɛ ekpɛ eyiŋ akɛ ebaabote gbalashihilɛ mli, ekolɛ koni efɔ bii lɛ.
23. Mɛni ekolɛ eyɔɔ mɛi ni susuɔ gbalashihilɛ he lɛ ajwɛŋmɔ mli, shi mɛɛ sanebimɔ abaasusu he yɛ nikasemɔi ni nyiɛ sɛɛ lɛ amli?
23 Kristofoi komɛi ni kɛ afii pii etsu nii amɛkɛsɔmɔ Yehowa be-fɛɛ yɛ oshijayeli mli lɛ kwɛɔ jogbaŋŋ yɛ amɛ wɔsɛɛ be mli hefatalɔ lɛ halamɔ mli, kɛ yiŋtoo akɛ amɛaatsa be-fɛɛ sɔɔmɔ lɛ nɔ yɛ gbɛ ko nɔ. Enɛ sa yijiemɔ waa. Mɛi komɛi po baanyɛ asusu gbalashihilɛ mli ni amɛaabote ni amɛŋmɛŋ gbɛ ni amɛ gbalashihilɛ lɛ atsi amɛ sɔɔmɔ naa yɛ gbɛ ko nɔ lɛ he. Shi ani esa akɛ Kristofonyo ni ebote gbalashihilɛ mli lɛ anu he akɛ, beni eji oshijafonyo pɛ esa akɛ ejwɛŋɔ esɔɔmɔ ni ekɛaaha Yehowa lɛ nɔ? Abaasusu sanebimɔ nɛɛ he yɛ nikasemɔi ni nyiɛ sɛɛ lɛ amli.
Kɛ Aaati Mli Lɛ
◻ Mɛni hewɔ bɔfo Paulo nu he akɛ ehe miihia ni eŋma wolo kɛyaha asafo ni yɔɔ Korinto lɛ?
◻ Mɛni hewɔ wɔle akɛ jeee osɔfoi mɔ kome-shihilɔi agbɛ Paulo jieɔ yi lɛ?
◻ Te mɔ ko aaafee tɛŋŋ enyɛ “emɔ” oshijayeli shihilɛ “mli”?
◻ Nyɛmimɛi yei oshijafoi baanyɛ ana amɛ oshijayeli shihilɛ lɛ he sɛɛ yɛ mɛɛ gbɛ nɔ?
◻ Mɛɛ gbɛi nyɛmimɛi hii oshijafoi baanyɛ atsɔ nɔ ni amɛkɛ amɛ heyeli lɛ atsu nii ni amɛkɛsɔmɔ Yehowa ‘ni nɔ ko nɔ ko wooo amɛ ahuntoo’?