Wu kɛ Onukpa—Gbɛnaa Nii lɛ ni Aaaha Eŋmɛ Pɛpɛɛpɛ
‘Esa akɛ nɔkwɛlɔ lɛ afee wu ni yɔɔ ŋa kome.’—1 TIMOTEO 3:2.
1, 2. Mɛni hewɔ osɔfoyeli mli oshijayeli ejaaa yɛ ŋmalɛ naa lɛ?
BENI bɔfo Paulo kɛɛ akɛ Kristofonyo ni hiɔ shi akɛ oshijafonyo lɛ ‘aaafee jogbaŋŋ fe no’ lɛ, ani eetsɔɔ akɛ gbɔmɔ ni tamɔ nɛkɛ baafee mɔ ni sa jogbaŋŋ akɛ esɔmɔɔ akɛ nɔkwɛlɔ yɛ Kristofoi asafo lɛ mli? Yɛ anɔkwale mli lɛ, ani eefee oshijayeli akɛ taomɔ nii kɛha onukpayeli ŋmɛnɛ? (1 Korintobii 7:38) Abiɔ ni Katolik osɔfoi akabote gbalashihilɛ mli yɛ jamɔ hewɔ. Shi ani osɔfoi ni boteee gbalashihilɛ mli lɛ ji Ŋmalɛ naa taomɔ nii? Bokagbɛ Orthodɔks Sɔlemɔi lɛ haa amɛ osɔfoi feɔ hii ni ebote gbalashihilɛ mli, ni kɛlɛ, amɛ osɔfonukpai lɛ efeee nakai. Ani enɛ kɛ Biblia lɛ kpãa gbee?
2 Kristo bɔfoi 12 lɛ, ni ji Kristofoi asafo lɛ shishitoo bii lɛ ji hii ni amɛbote gbalashihilɛ mli. (Mateo 8:14, 15; Efesobii 2:20) Paulo ŋma akɛ: “Ani wɔbɛ hegbɛ akɛ wɔhiɛɔ nyɛmi yoo ni ji wɔŋa kɛnyiɛɔ, tamɔ bɔfoi krokomɛi lɛ hu kɛ Nuntsɔ lɛ nyɛmimɛi lɛ kɛ Kefa [Petro]?” (1 Korintobii 9:5) New Catholic Encyclopedia lɛ kpɛlɛɔ nɔ akɛ, “oshijayeli he mla lɛ jɛ osɔfoi lɛ aŋɔɔ” ni ákɛ, “gbɛnaa nii kãaa K[paŋmɔ] H[ee] lɛ mli sɔɔlɔi anɔ akɛ amɛhi oshijayeli mli.” Yehowa Odasefoi nyiɛɔ Ŋmalɛ naa nɔkwɛmɔ nɔ lɛ sɛɛ moŋ fe osɔfoi amla.—1 Timoteo 4:1-3.
Onukpayeli kɛ Gbalashihilɛ Kɛ Ehe Kpaa Gbee
3. Mɛɛ Ŋmalɛ mli anɔkwa saji tsɔɔ akɛ Kristofoi nɔkwɛlɔi baanyɛ afee hii ni ebote gbalashihilɛ mli?
3 Yɛ nɔ najiaŋ ni Paulo aaabi ni hii ni ahala amɛ akɛ nɔkwɛlɔi lɛ afee mɛi ni boteko gbalashihilɛ mli lɛ, eŋma Tito akɛ: “Enɛ hewɔ mishio yɛ Kreta, koni oto nii ni eshwɛ lɛ gbɛjianɔ pɛpɛɛpɛ, ni owowoo onukpai [Hela, pre·sbyʹte·ros] yɛ maŋ fɛɛ maŋ mli, taakɛ bɔ ni mikɛɛo momo lɛ; kɛ mɔ ko yɛ ni kpa ko bɛ ehe, ni eji mɔ ni yɔɔ ŋa kome, ni yɔɔ bii ni heɔ yeɔ ni awieee amɛhe akɛ nyenyeŋtswibɔlɔi loo toigbolɔi ji amɛ lɛ. Ejaakɛ esa akɛ nɔkwɛlɔ [Hela, e·piʹsko·pos, he ni ana wiemɔ “osɔfonukpa” kɛjɛ] lɛ kpa ko akahi ehe, akɛni Nyɔŋmɔ we nɔ tsulɔnukpa ji lɛ hewɔ lɛ.”—Tito 1:5-7.
4. (a) Te wɔfeɔ tɛŋŋ wɔleɔ akɛ gbalashihilɛ jeee taomɔ nii kɛha nɔkwɛlɔi Kristofoi? (b) Mɛɛ hegbɛ nyɛmi nuu oshijafonyo ni ji onukpa yɔɔ?
4 Yɛ gbɛ kroko nɔ lɛ, gbalashihilɛ jeee Ŋmalɛ naa taomɔ nii kɛha onukpayeli. Yesu hi shi akɛ oshijafonyo. (Efesobii 1:22) No mli lɛ, Paulo, ni ji nɔkwɛlɔ ni ekaaa ni yɔɔ klɛŋklɛŋ afii oha lɛ mli Kristofoi asafo lɛ mli lɛ bɛ ŋa. (1 Korintobii 7:7-9) Ŋmɛnɛ, Kristofoi oshijafoi babaoo yɛ ni sɔmɔɔ akɛ onukpai. Ekolɛ amɛ oshijayeli shihilɛ lɛ haa amɛnaa be babaoo kɛtsuɔ amɛ nitsumɔi akɛ nɔkwɛlɔi lɛ ahe nii.
‘Nuu ni Ebote Gbalashihilɛ Mli lɛ Mli Eja Enyɔ’
5. Mɛɛ Ŋmalɛ naa anɔkwa sane ko esa akɛ nyɛmimɛi hii ni ebote gbalashihilɛ mli lɛ akpɛlɛ nɔ?
5 Kɛ Kristofonyo nuu bote gbalashihilɛ mli lɛ, esa akɛ eyoo akɛ eeŋɔ gbɛnaa nii heei ni baabi ebe kɛ ejwɛŋmɔ. Biblia lɛ kɛɛ: “Mɔ ni ewɛɛɛ yoo lɛ, ehaoɔ ehe yɛ Nuntsɔ lɛ nii ahewɔ, bɔ ni eeefee ni esane asa Nuntsɔ lɛ hiɛ. Shi mɔ ni ewɛ yoo lɛ, ehaoɔ ehe yɛ je nɛŋ nii ahewɔ, bɔni afee ni esane asa eŋa hiɛ, ni emli eja enyɔ.” (1 Korintobii 7:32-34, NW) Emli eja enyɔ yɛ mɛɛ shishinumɔ naa?
6, 7. (a) Mɛni ji gbɛ kome ni nuu ni ebote gbalashihilɛ mli lɛ ‘mli eja enyɔ’ yɛ? (b) Mɛɛ ŋaa Paulo woɔ Kristofoi ni amɛbote gbalashihilɛ mli? (d) Enɛ aaanyɛ asa nuu yiŋkpɛɛ akɛ eeekpɛlɛ nitsumɔ ko nɔ lɛ he yɛ mɛɛ gbɛ nɔ?
6 Nɔ kome ji akɛ, mɔ ni ebote gbalashihilɛ mli lɛ ŋmɛɛɔ hewalɛ ni eyɔɔ yɛ lɛ diɛŋtsɛ egbɔmɔtso nɔ lɛ he. Paulo fee enɛ faŋŋ: “Ŋã lɛ bɛ hewalɛ yɛ lɛ diɛŋtsɛ egbɔmɔtso nɔ, shi moŋ ewu lɛ yɔɔ; nakai nɔŋŋ kɛ̃ wu lɛ bɛ hewalɛ yɛ lɛ diɛŋtsɛ egbɔmɔtso nɔ, shi eŋã lɛ yɔɔ.” (1 Korintobii 7:4) Mɛi ni susuɔ gbalashihilɛ mlibotemɔ he lɛ ateŋ mɛi komɛi baanyɛ anu he akɛ enɛ he ehiaaa tsɔ, ejaakɛ bɔlɛnamɔ efeŋ nɔ ni he hiaa yɛ amɛ gbalashihilɛ mli. Shi kɛlɛ, akɛni hetsemɔ ji Ŋmalɛ naa taomɔ nii beni aboteko gbalashihilɛ mli hewɔ lɛ, Kristofoi leee amɛ hefatalɔ lɛ bɔlɛnamɔ mli hiamɔ nii diɛŋtsɛ dani amɛboteɔ gbalashihilɛ mli.
7 Paulo tsɔɔ akɛ hefatalɔi ni ‘kɛ amɛjwɛŋmɔ ema mumɔŋ nibii anɔ’ lɛ po asusu amɛteŋ mɔ fɛɛ mɔ bɔlɛnamɔ mli hiamɔ nii ahe. Ewo Kristofoi ni yɔɔ Korinto lɛ ŋaa akɛ: “Ha wu lɛ afee eŋa gbɛnaa nii eha lɛ, ni ŋa lɛ afee nakai nɔŋŋ aha ewu. Nyɛkɛ nyɛhe akakamaa nyɛhe, akɛ ja nyɛyi enyɔ lɛ fɛɛ nyɛkpɛlɛ akɛ nyɛaafee nakai, kɛyashi be ko, koni nyɛna be kɛha sɔlemɔ, ni nyɛfee ekome ekoŋŋ, koni Satan akaka nyɛ yɛ nyɛhe nɔ ni nyɛnyɛɛɛ nyɛye hewɔ.” (Romabii 8:5; 1 Korintobii 7:3, 5) Nɔ ni yɔɔ awerɛho ji akɛ, ayaa nɔ afiteɔ gbala, kɛ adiii nɛkɛ ŋaawoo sɛɛ. Akɛni nakai eji hewɔ lɛ, esa akɛ Kristofonyo ni ebote gbalashihilɛ mli lɛ aŋmɛ saji akwɛ jogbaŋŋ dani ekpɛlɛ nitsumɔ ni baagbála lɛ kɛ eŋa teŋ yɛ be kpalaŋŋ mli lɛ nɔ. Ebɛ nifeemɔ mli heyeli ni eyɔɔ beni eji oshijafonyo lɛ dɔŋŋ.
8, 9. (a) Mɛni Paulo tsɔɔ beni ewie akɛ Kristofoi ni amɛbote gbalashihilɛ mli lɛ ‘haoɔ amɛhe yɛ je nɛŋ nii ahewɔ’ lɛ? (b) Mɛni esa akɛ Kristofoi ni amɛbote gbalashihilɛ mli lɛ aye amɛtsui akɛ amɛaafee?
8 Mɛɛ shishinumɔ mli abaanyɛ awie yɛ akɛ, Kristofoi hii ni amɛbote gbalashihilɛ mli, ni onukpai fata he lɛ, ‘haoɔ amɛhe yɛ je [koʹsmos] nɛŋ nii ahewɔ’? (1 Korintobii 7:33) Eyɛ faŋŋ akɛ jeee je nɛŋ nibii gbohii, ni esa akɛ anɔkwa Kristofoi fɛɛ atsi amɛhe kɛjɛ he lɛ ahe Paulo wieɔ lɛ. (2 Petro 1:4; 2:18-20; 1 Yohane 2:15-17) Nyɔŋmɔ Wiemɔ lɛ fãa wɔ “koni wɔkwa nɔ̃ sha feemɔ kɛ je [ko·smi·kosʹ] nɛŋ akɔnɔi lɛ, ni wɔkɛ jwɛŋmɔ kpakpa kɛ jalɛ, kɛ Nyɔŋmɔ gbeyeishemɔ ahi shi yɛ je nɛŋ.”—Tito 2:12.
9 No hewɔ lɛ, Kristofonyo ni ebote gbalashihilɛ mli lɛ “haoɔ ehe yɛ je nɛŋ nii ahewɔ” kɛ shishinumɔ akɛ, esusuɔ je lɛŋ nibii ni ja ni fata gbalashihilɛ ni yaa nɔ daa lɛ ahe lɛ he. Nɔ ni fata enɛ he ji shia ni aaahi mli, niyenii, hehaa nii, hiɛtserɛjiemɔ—kɛfata nibii krokomɛi babaoo he, kɛ́ gbekɛbii yɛ. Shi kɛ hefatalɔi lɛ bɛ bi po lɛ, kɛ gbalashihilɛ lɛ aaaye omanye lɛ, esa akɛ wu kɛ ŋa lɛ fɛɛ ahao amɛhe yɛ gbalashihilɛ mli hefatalɔ lɛ ‘hiɛsaa’ he. Kristofoi onukpai yɛ enɛ he miishɛɛ titri, beni amɛhaa amɛ gbɛnaa nii lɛ ŋmɛɔ pɛpɛɛpɛ lɛ.
Wumɛi Kpakpai kɛ Agbɛnɛ hu Onukpai Kpakpai
10. Kɛ Kristofonyo he aaasa akɛ onukpa lɛ, mɛni esa akɛ enyɛmimɛi kɛ gbɔmɛi ni yɔɔ sɛɛ lɛ anyɛ ana yɛ ehe?
10 Yɛ be mli ni gbalashihilɛ jeee taomɔ nii kɛha onukpayeli lɛ, kɛ Kristofonyo nuu ebote gbalashihilɛ mli lɛ, dani aaajie eyi akɛ ahala lɛ akɛ onukpa lɛ, esa akɛ eye odase akɛ eebɔ mɔdɛŋ ni efee wu kpakpa ni yɔɔ suɔmɔ, yɛ be mli ni etsuɔ yitsoyeli ni sa he nii lɛ. (Efesobii 5:23-25, 28-31) Paulo ŋma akɛ: “Kɛ mɔ ko miitao nɔkwɛmɔ nitsumɔ lɛ, eetao nitsumɔ kpakpa. Shi esa akɛ nɔkwɛlɔ lɛ ahi shi bɔ ni anaŋ ehe sane ko atã, mɔ ni yɔɔ ŋa kome.” (1 Timoteo 3:1, 2) Esa akɛ efee faŋŋ akɛ onukpa lɛ miifee nɔ ni hi fe fɛɛ koni etsɔ wu kpakpa, kɛ eŋa ji naanyo Kristofonyo loo eheee eyeee. Yɛ anɔkwale mli lɛ, esa akɛ mɛi ni yɔɔ asafo lɛ sɛɛ po anyɛ ana akɛ ekwɛɔ eŋa kɛ egbɛnaa nii krokomɛi lɛ anɔ jogbaŋŋ. Paulo kɛfata he akɛ: “Shi esa akɛ mɛi ni yɔɔ sɛɛ lɛ hu aye ehe odase kpakpa, koni ekagbee jɛmɔ kɛ Abonsam tsɔne mli.”—1 Timoteo 3:7.
11. Mɛni wiemɔ kuku “mɔ ni yɔɔ ŋa kome” lɛ tsɔɔ, no hewɔ lɛ mɛɛ henɔkwɛmɔ esa akɛ onukpai lɛ kɛtsu nii?
11 Wiemɔ kuku, “mɔ ni yɔɔ ŋa kome” lɛ jieɔ yei pii kɛ shihilɛ kɛjɛɔ mli kwraa, shi etsɔɔ gbalashihilɛ mli anɔkwayeli hu. (Hebribii 13:4) Esa akɛ onukpai lɛ titri akwɛ jogbaŋŋ yɛ be mli ni amɛyeɔ amɛbuaa nyɛmimɛi yei ni yɔɔ asafo lɛ mli lɛ. Amɛkwa nyɛmi yoo ni amɛsaraa lɛ ni ŋaawoo kɛ miishɛjemɔ he hiaa lɛ lɛ ni amɛkɛ lɛ pɛ aaahi he kome. Amɛbaafee jogbaŋŋ akɛ onukpa kroko loo asafoŋ sɔɔlɔ, loo amɛŋa aaafata he kɛ eji hewalɛwoo saramɔ ko kɛkɛ.—1 Timoteo 5:1, 2.
12. Mɛni ni atsɔɔ mli esa akɛ onukpai kɛ asafoŋ sɔɔlɔi aŋamɛi abɔ mɔdɛŋ ni ana yɛ amɛhe?
12 Beni Paulo toɔ taomɔ nii kɛha onukpai kɛ asafoŋ sɔɔlɔi lɛ anaa lɛ, ekɛ ŋaawoo kɛha mɛi ni asusuɔ amɛhe kɛhaa hegbɛi nɛɛ aŋamɛi fata he trukaa. Eŋma akɛ: “Yei lɛ hu nakai nɔŋŋ, amɛfee mɛi ni hiɛ tsii, jeee mɛi ahe wielɔi, shi amɛhiɛ aka shi, amɛye anɔkwa yɛ nii fɛɛ mli.” (1 Timoteo 3:11) Kristofonyo wu baanyɛ afee babaoo ni ekɛye ebua eŋa ni etamɔ bɔ ni atsɔɔ saji amli aha lɛ.
Ŋmalɛ Naa Nitsumɔi Kɛha Ŋa
13, 14. Kɛji akɛ onukpa ko ŋa jeee naanyo Odasefonyo po lɛ, mɛni hewɔ esa akɛ ekɛ lɛ ahi shi ni efee wu kpakpa?
13 Shi, ŋaawoo ni akɛha onukpai kɛ asafoŋ sɔɔlɔi aŋamɛi nɛɛ haa anuɔ shishi akɛ, ŋamɛi ni tamɔ nɛkɛ lɛ diɛŋtsɛ ji Kristofoi ni amɛjɔɔ amɛhe nɔ. Nakai ebaa lɛ, ejaakɛ abiɔ ni Kristofoi abote gbalashihilɛ mli “yɛ Nuntsɔ lɛ mli” pɛ. (1 Korintobii 7:39) Shi nyɛmi nuu ni ekɛ mɔ ni heee yeee ebote gbalashihilɛ mli momo dani ejɔɔ ewala nɔ eha Yehowa, aloo mɔ ni eŋa shiɔ anɔkwale lɛ, ni jeee nuu lɛ tɔmɔ ni lɛ hu?
14 Enɛ diɛŋtsɛ etsiŋ enaa koni ekatsɔ onukpa. Ni asaŋ, enyɛŋ etsi ehe kɛjɛ eŋa he ni ekɛbu ehe bem akɛ, eŋa heee yeee. Paulo wo ŋaa akɛ: “Kɛ afio akpɛtɛ yoo he jiŋŋ, kaatao fɛnemɔ.” (1 Korintobii 7:27) Etee nɔ ewie akɛ: “Kɛji nyɛmi ko yɛ ŋa ko ni heee yeee, ni kɛlɛ ekpɛlɛ akɛ ekɛ lɛ aaahi shi lɛ, ekaŋmɛɛ ehe. Shi kɛ mɔ ni heee yeee lɛ miigbala ehe shi kɛmiiya lɛ, ha ni eya; ayeee nyɛmi nuu loo nyɛmi yoo nyɔ̃ŋ yɛ nɛkɛ saji nɛɛ amli. Shi hejɔlɛ mli Nyɔŋmɔ tsɛ wɔ yɛ. Shi yoo, bo obaahere owu lɛ yiwala jiŋŋ, ole? Aloo wu, bo obaahere oŋa lɛ yiwala jiŋŋ, ole?” (1 Korintobii 7:12, 15, 16) Kɛji akɛ onukpa ko ŋa jeee Odasefonyo po lɛ, esa akɛ efee wu kpakpa.
15. Mɛɛ ŋaawoo bɔfo Petro kɛhaa wumɛi Kristofoi, ni kɛ́ onukpa ko fee wu ni kuɔ ehiɛ eshwieɔ nii anɔ lɛ, mɛni baajɛ mli aba?
15 Kɛji akɛ eŋa lɛ ji naanyo heyelilɔ loo jeee nakai lɛ, esa akɛ Kristofonyo onukpa lɛ ayɔse akɛ esuɔmɔ kwɛmɔ he hiaa eŋa lɛ. Bɔfo Petro ŋma akɛ: “Nakai nɔŋŋ kɛ̃ nyɛ wumɛi, nyɛkɛ amɛ [nyɛ ŋamɛi] ahia shi yɛ nilee naa, ni nyɛkɛ woo awoa yoo akɛ nɔ̃ ni he waaa tuutu ko, akɛni amɛkɛ nyɛ fɛɛ ji wala duromɔ lɛ wɔfasei lɛ, koni akatsimɔ nyɛ sɔlemɔi lɛ agbɛ.” (1 Petro 3:7) Wu ni jeɔ gbɛ ekuɔ ehiɛ eshwieɔ eŋa hiamɔ nii anɔ lɛ kɛ wekukpaa ni kã ekɛ Yehowa teŋ lɛ woɔ oshara mli; ebaanyɛ etsĩ Yehowa ni eeebɛŋkɛ lɛ lɛ gbɛ tamɔ ‘atatu koni faikpamɔ akatsɔ mli kɛmiiho.’ (Yaafo 3:44) Enɛ baaha efee mɔ ni esaaa akɛ esɔmɔɔ akɛ Kristofonyo nɔkwɛlɔ.
16. Mɛɛ sane titri Paulo kɛmaa shi lɛ, ni te esa akɛ onukpai komɛi anu enɛ he amɛha tɛŋŋ?
16 Taakɛ akadi lɛ, nɔ titri ni yɔɔ Paulo naataomɔ lɛ mli ji akɛ, kɛ nuu bote gbalashihilɛ mli lɛ, eŋmɛɛɔ heyeli ni eyɔɔ beni eji oshijafonyo, ni ŋmɛɔ lɛ gbɛ koni ‘esɔmɔ Nuntsɔ lɛ ni nɔ ko nɔ ko akawo lɛ ahuntoo’ lɛ eko he. (1 Korintobii 7:35) Amaniɛbɔi tsɔɔ akɛ, jeee be fɛɛ be onukpai komɛi ni amɛbote gbalashihilɛ mli lɛ ŋmɛɔ pɛpɛɛpɛ yɛ Paulo wiemɔi ni jɛ mumɔŋ lɛ he susumɔ mli. Yɛ bɔ ni amɛshweɔ ni amɛtsu nɔ ni amɛnuɔ he akɛ esa akɛ onukpai kpakpai atsu hewɔ lɛ, ekolɛ amɛbaaku amɛhiɛ amɛshwie amɛ nitsumɔi ákɛ wumɛi lɛ anɔ. Amɛteŋ mɛi komɛi baana akɛ ewa kɛha amɛ akɛ amɛaakpoo asafoŋ gbɛnaa nii ko, kɛji akɛ eyɛ faŋŋ akɛ enɛ baaye amɛ ŋamɛi awui yɛ mumɔŋ po. Amɛnyaa hegbɛi ni fataa gbalashihilɛ he lɛ ahe, shi ani amɛmiisumɔ ni amɛtsu gbɛnaa nii ni fataa he lɛ ahe nii?
17. Mɛni eba ŋamɛi komɛi anɔ, kulɛ abaanyɛ atsi enɛ gbɛ yɛ mɛɛ gbɛ nɔ?
17 Eji anɔkwale akɛ, ekãa ni akɛaatsu nii akɛ onukpa lɛ sa yijiemɔ. Ni kɛlɛ, ani Kristofonyo ŋmɛɔ pɛpɛɛpɛ, kɛ́ yɛ be mli ni etsuɔ enitsumɔi ni yɔɔ asafo lɛ mli lɛ he nii lɛ, eku ehiɛ eshwie e-Ŋmalɛ naa gbɛnaa nii ni kɔɔ eŋa he lɛ nɔ? Yɛ be mli ni esumɔɔ ni eye ebua mɛi ni yɔɔ asafo lɛ mli lɛ, onukpa ni ŋmɛɔ pɛpɛɛpɛ lɛ baasusu eŋa lɛ mumɔŋ shihilɛ hu he. Onukpai komɛi aŋamɛi egbɔjɔ yɛ mumɔŋ, ni amɛteŋ mɛi komɛi efee mɛi ni ‘amɛyasha shi’ yɛ mumɔŋ. (1 Timoteo 1:19) Yɛ be mli ni gbɛnaa nii kã ŋã lɛ nɔ akɛ etsu lɛ diɛŋtsɛ eyiwalaheremɔ he nii lɛ, yɛ shihilɛi komɛi amli lɛ kulɛ abaanyɛ akwa mumɔŋ naagba nɛɛ, eji onukpa lɛ ‘lɛ̀ ni ehiɛ’ eŋã lɛ “dɔdɔɔdɔ taakɛ bɔ ni Nuntsɔ lɛ hiɛɔ asafo lɛ.” (Efesobii 5:28, 29) Yɛ anɔkwale mli lɛ, esa akɛ onukpai lɛ ‘ale amɛhe nɔkwɛmɔ kɛ tooikuu lɛ fɛɛ.’ (Bɔfoi lɛ Asaji 20:28) Ni amɛ ŋamɛi fata he kɛji akɛ amɛbote gbalashihilɛ mli.
“Heloo Gbɛfaŋ Amanehulu”
18. Mɛni ji “amanehulu” ni Kristofoi ni amɛbote gbalashihilɛ mli lɛ kɛkpeɔ lɛ ekomɛi, ni enɛ baanyɛ asa onukpa lɛ nitsumɔi ahe yɛ mɛɛ gbɛ nɔ?
18 Bɔfo Paulo ŋma hu akɛ: “Kɛji obalayoo hu gba jiŋŋ, efeko esha; shi heloo gbɛfaŋ amanehulu mɛnɛɛmɛi baana; shi mi lɛ, nyɛhe mifóɔ.” (1 Korintobii 7:28) Paulo miisumɔ ni ejie mɛi ni baanyɛ anyiɛ oshijayeli he nɔkwɛmɔ nɔ ni efee lɛ sɛɛ lɛ kɛjɛ yeyeeye feemɔ ni jɛɔ gbalashihilɛ mli baa lɛ mli. Yɛ hefatalɔi ni bɛ bi lɛ agbɛfaŋ po lɛ, nɔ ni fata nɛkɛ yeyeeye feemɔi nɛɛ ahe ji hewalɛnamɔ mli naagbai loo ohia, kɛ agbɛnɛ Ŋmalɛ naa gbɛnaa nii ni kɔɔ hefatalɔ lɛ fɔlɔi ni amɛdara yɛ afii amli lɛ ahe. (1 Timoteo 5:4, 8) Esa akɛ onukpa lɛ afee nɔkwɛmɔ nɔ kpakpa yɛ nɛkɛ gbɛnaa nii nɛɛ anɔkpɛlɛmɔ mli, ni ekolɛ enɛ baatsi enitsumɔi akɛ Kristofonyo nɔkwɛlɔ lɛ naa yɛ bei komɛi amli. Nɔ ni yɔɔ miishɛɛ ji akɛ, onukpai pii miifee jogbaŋŋ yɛ amɛ weku kɛ asafoŋ gbɛnaa nii lɛ fɛɛ he nitsumɔ mli.
19. Mɛni Paulo tsɔɔ beni ekɛɛ akɛ: “Mɛi ni yɔɔ ŋamɛi tete afee tamɔ mɛi ni bɛ eko” lɛ?
19 Paulo kɛfata he akɛ: “Be lɛ faaa dɔŋŋ; nɔ ni eshwɛ ji akɛ, mɛi ni yɔɔ ŋamɛi tete afee tamɔ mɛi ni bɛ eko.” (1 Korintobii 7:29) Shi, yɛ nɔ ni eŋma momo yɛ yitso nɛɛ mli eyaha Korintobii lɛ hewɔ lɛ, eyɛ faŋŋ akɛ etsɔɔɔ akɛ esa akɛ Kristofoi ni amɛbote gbalashihilɛ mli lɛ aku amɛhiɛ amɛshwie amɛ ŋamɛi anɔ yɛ gbɛ ko nɔ. (1 Korintobii 7:2, 3, 33) Etsɔɔ nɔ ni etaoɔ ni ale lɛ, beni eŋma akɛ: “[Ha] mɛi ni tsuɔ je lɛ he nii lɛ [afee] tamɔ mɛi ni tsuuu he nii kɛmɔɔɔ shi; ejaakɛ je nɛɛ su miitsake.” (1 Korintobii 7:31, NW) Anaa babaoo po ŋmɛnɛ fe Paulo gbii lɛ amli loo yɛ bɔfo Yohane gbii lɛ amli akɛ “je lɛ miiho aya.” (1 Yohane 2:15-17) No hewɔ lɛ, Kristofoi ni ebote gbalashihilɛ mli ni nuɔ he akɛ ehe miihia ni amɛsha afɔlei komɛi yɛ Kristo sɛɛnyiɛmɔ mli lɛ, nyɛŋ afee mɛi ni kɛ amɛhe ewo gbalashihilɛ mli miishɛɛnamɔi kɛ hegbɛi pɛ mli.—1 Korintobii 7:5.
Ŋamɛi ni Kɛ Amɛhe Shãa Afɔle
20, 21. (a) Mɛɛ afɔlei ŋamɛi Kristofoi pii sumɔɔ akɛ amɛaashã? (b) Mɛni ŋa baanyɛ akpa gbɛ kɛjɛ ewu dɛŋ yɛ mla naa, kɛ eji onukpa po?
20 Taakɛ bɔ ni onukpai kɛ nibii komɛi shãa afɔle bɔni afee ni amɛhe aba sɛɛnamɔ amɛha mɛi krokomɛi lɛ, onukpai pii aŋamɛi ebɔ mɔdɛŋ akɛ amɛaaha amɛ gbɛnaa nii yɛ gbalashihilɛ mli lɛ kɛ Maŋtsɛyeli lɛ he nibii ni he hiaa lɛ aŋmɛ pɛpɛɛpɛ. Kristofoi yei akpei abɔ yɛ miishɛɛ akɛ amɛaakpɛlɛ ni amɛ wumɛi anyɛ atsu amɛ nitsumɔi akɛ nɔkwɛlɔi lɛ ahe nii. Yehowa sumɔɔ amɛ yɛ enɛ hewɔ, ni ejɔɔ mumɔ kpakpa ni amɛjieɔ lɛ kpo lɛ nɔ. (Filemon 25) Fɛɛ sɛɛ lɛ, Paulo ŋaawoo ni ŋmɛɔ pɛpɛɛpɛ lɛ tsɔɔ akɛ, nɔkwɛlɔi aŋamɛi baanyɛ akpa be kɛ amɛ nɔjwɛŋmɔ falɛ ko ni sa ni mla ŋmɛɔ gbɛ lɛ gbɛ kɛjɛ amɛ wumɛi adɛŋ. Eji onukpai ni amɛbote gbalashihilɛ mli lɛ a-Ŋmalɛ naa gbɛnaa akɛ amɛaatu be ni sa amɛha amɛ ŋamɛi, koni amɛha amɛ gbɛnaa nii akɛ wu kɛ nɔkwɛlɔ lɛ aŋmɛ pɛpɛɛpɛ.
21 Shi kɛji akɛ kɛfata wu ni eji he lɛ, Kristofonyo onukpa lɛ ji tsɛ hu? Enɛ kɛ nɔ ko bafataa egbɛnaa nii lɛ ahe, ni egbeleɔ nɔkwɛmɔ nitsumɔi enyɔ ni ka shi faŋŋ naa yɛ ehiɛ, taakɛ wɔbaana yɛ nikasemɔ ni nyiɛ sɛɛ nɛɛ mli lɛ.
Kɛ Aaati Mli Lɛ
◻ Mɛɛ Ŋmalɛ mli anɔkwa saji tsɔɔ akɛ nɔkwɛlɔ Kristofonyo baanyɛ afee nuu ni ebote gbalashihilɛ mli?
◻ Kɛ onukpa ni ji oshijafonyo bote gbalashihilɛ mli lɛ, esa akɛ ehiɛ ahi mɛni nɔ?
◻ Mɛɛ gbɛi anɔ Kristofonyo ni ebote gbalashihilɛ mli lɛ “haoɔ ehe yɛ je nɛŋ nibii ahewɔ”?
◻ Nɔkwɛlɔi aŋamɛi pii jieɔ he-kɛ-afɔleshaa mumɔ kpakpa kpo yɛ mɛɛ gbɛ nɔ?
[Mfoniri ni yɔɔ baafa 17]
Eyɛ mli akɛ onukpa miitsu teokrase nitsumɔi ahe nii moŋ, shi esa akɛ ekɛ suɔmɔ agbala ejwɛŋmɔ kɛya eŋa nɔ