Kaaku Ohiɛ Ofɔ Ohefatalɔ Lɛ Nɔ!

WU KƐ ŊA ko miishi Maŋtsɛyeli Asa lɛ nɔ. Wu lɛ kɛ ŋa lɛ hiɛ ŋmlɔŋmlɔ lɛ tsɔɔ miishɛɛ ni amɛnaa mli ŋɔɔmɔ akɛ “heloo kome,” ni amɛfee ekome yɛ amɛ-Nyɔŋmɔ ni ji Yehowa jamɔ mli. (Mateo 19:⁠6) Shi kɛlɛ, jeee be fɛɛ be amɛna nakai ekomefeemɔ loo amɛna hemɔkɛyeli kometoo lɛ nɔŋŋ. Bei yɛ ni ŋa lɛ, Atsuko, kome yaa kpeei. Kɛkɛ lɛ ebaaku esɛɛ eya shia ni eyanina wu ni mli efu ni baabolɔ awo lɛ. Be ko lɛ, ewu, Kazutaka mli fu aahu akɛ ewo okpɔlɔ ni gbɛkɛ niyenii lɛ mamɔ nɔ lɛ ni ekɛtswa shi.

Taakɛ Yesu gba fɔ shi lɛ, anɔkwa Kristojamɔ kɛ mligbalamɔi eba shiai komɛi amli. (Mateo 10:​34, 35) Ni kɛlɛ, taakɛ Kazutaka kɛ Atsuko ji lɛ, mɛi komɛi miina jamɔ mli ekomefeemɔ kɛ miishɛɛ mli ŋɔɔmɔ yɛ amɛshiai amli bianɛ. Ekomefeemɔ ni tamɔ nɛkɛ baaa kɛkɛ. Mɛni heyelilɔi lɛ feɔ koni amɛye shitee-kɛ-woo ni tamɔ nɛkɛ nɔ kunim ni amɛkɛ gbeekpamɔ aba weku lɛ mli? Dani wɔɔbote enɛ mli lɛ, nyɛhaa wɔkwɛa nɔ hewɔ ni hefatalɔi lɛ ekomɛi teɔ shi woɔ lɛ.

Mɛni Hewɔ Amɛte Shi Amɛwo Lɛ?

Atsuko kɛɛ, “kɛ miku misɛɛ mikwɛ sɛɛ yɛ be ni eho lɛ, miyɔseɔ akɛ mitee kpeei ni mitsɔɔɔ saji amli mihaaa miwu lɛ.” Akɛni ashi ekome ni eleee nɔ hewɔ lɛ hewɔ lɛ, Kazutaka mli wo la.

Shitee-kɛ-woo hu baanyɛ aba yɛ awuŋayeli hewɔ. Obalanyo ko ni ji wu, Shigeo, na eŋa lɛ nanemɛi heei lɛ ahe jwɛŋmɔ fɔŋ. Ekɛɛ, “beni miŋa lɛ saa ehe ni etee kpee lɛ, misusu akɛ ena nuu kroko.” Masako ni ji eŋa lɛ kɛɛ, “wɔyi enyɔ lɛ naaa hegbɛ ni wɔkɛaawie wɔteŋ saji ahe. Mishweee yɛ mitsuiŋ akɛ lɛ hu eeekase Kristofoi anɔkwale lɛ.”

Toshiko ni ji yoogbayoo lɛ hu nu he tamɔ Shigeo nɔŋŋ. “Beni miwu je shishi akɛ ekɛ Yehowa Odasefoi aaakase nii lɛ, mite shi wo, ejaakɛ bei ni efiteɔ yɛ asafo lɛ he lɛ bɔi famɔ fiofio. Mibɔi dãa numɔ bɔni afee ni mikɛjo mihenumɔi lɛ anaa foi yɛ be mli ni etee lɛ.

Toshiko wiemɔ lɛ gbala jwɛŋmɔ kɛtee yiŋtoo kroko nɔ​—shoofeemɔ. Nakai ji bɔ ni mɛi ni teɔ shi woɔ yɛ tsutsu lɛ nu he, beni amɛhefatalɔi lɛ shiɔ amɛ daa ni amɛyaa kpeei lɛ. Wu ko kaiɔ akɛ, “beni eshwɛ mikometoo yɛ shia lɛ, minu he akɛ ajo foi ashi mi.” Mɔ kroko hu kɛɛ, “minu he tamɔ nɔ ni miŋa kɛ mibii lɛ fɛɛ eshi mi.” Akɛni ewa kɛha hii pii akɛ amɛaakɛɛ akɛ, “eshwɛ mikometoo, ofainɛ hii shia” hewɔ lɛ, amɛteŋ mɛi komɛi jeɔ shishi akɛ amɛaate shi amɛwo amɛhefatalɔ lɛ jamɔ lɛ.

Nɔnyɛɛ ni jɛ nanemɛi kɛ wekumɛi aŋɔɔ baanyɛ ekɛ shitee-kɛ-woo aba hefatalɔ ni nuɔ sane shishi lɛ nɔ. Afɔɔ kɛɛmɔ akɛ yɛ Bokagbɛ lɛ, “aŋɔɔ ŋa lɛ awoɔ weku lɛ mli, moŋ fe ni ekɛ ewu aaafee ekome.” Nɔnyɛɛ ni jɛ wekumɛi aŋɔɔ baanyɛ afite amɛteŋ. Takashi ŋa ni ji Kristofonyo lɛ kpoo akɛ ekɛ ehe aaawo weku jamɔ mli yɛ weku lɛ Budha afɔleshaalatɛ lɛ nɔ. Takashi tsɔɔ mli akɛ, “nɔ ni fite nibii kwraa ji akɛ, he ni wɔyɔɔ lɛ bɛŋkɛ mifɔlɔi. Minyɛ nyɛ minɔ, no hewɔ lɛ miwo miŋa lɛ he gbeyei, ni mibɔi lɛ yii.”

Shishinumɔ ni baaa ni jɛ sane ni agbaaa, awuŋayeli, shoofeemɔ loo nɔnyɛɛ ni jɛ wekumɛi aŋɔɔ lɛ baanyɛ afɛ ni etsɔ gidigidifeemɔ. Nuu ko ni tsutsu lɛ eyiɔ eŋa lɛ kpɛlɛ nɔ akɛ: “Misumɔɔɔ ni miweku lɛ aje midɛŋ yɛ jamɔ hewɔ.” Mɔ kroko kɛɛ: “Nɔ ni mitaooo ji ni maba shia ni mɔ ko bɛ mli.” Ekolɛ amɛsusuɔ akɛ, ‘Kɛ wiemɔi nyɛɛɛ atsi jamɔ henumɔi nɛɛ anaa lɛ, atswɛrɛ loo yii fioo baanyɛ afee nakai.’

Miishɛɛ sane ji akɛ, gbalashihilɛ mli hefatalɔi ni atsi amɛ ta yɛ yiteŋgbɛ nɛɛ fɛɛ bafee ekome yɛ jamɔ mli yɛ sɛɛ mli. Amɛ niiashikpamɔi ni ji mlifu lɛ eho kwraa. Shi akɛni amɛtsɔ mli hewɔ lɛ, amɛyɛ gbɛhe kpakpa ko mli ni amɛbaanyɛ amɛkɛ ŋaawoo ni anyɛɔ atsuɔ he nii ni baanyɛ aye abua ni eba mlifu shi aha, ni ekolɛ ekɛ ekomefeemɔ yɛ jamɔ mli aba wekui ni amɛmli egbala lolo lɛ amli yɛ enɛ gbɛfaŋ.

Okɛ Ohe Akpɛtɛ Anɔkwale lɛ He

Kɛ okpa onine mli akɛ oogbala mɔ ko ni faa ko miisha lɛ kɛmiijɛ nu lɛ mli lɛ, esa akɛ bo diɛŋtsɛ lɛ odamɔ shi jogbaŋŋ. Kɛ ofeee nakai lɛ, bo hu obaabote nu lɛ mli. Nakai nɔŋŋ hu nɔ titri ni haa oyeɔ obuaa ohefatalɔ lɛ ji oshidaamɔ ni yɔɔ shiŋŋ yɛ anɔkwale ni hereɔ mɔ yiwala lɛ mli. Mɔ ko ni tsutsu lɛ eteɔ shi ewoɔ lɛ kɛɛ, “kɛ miite shi miiwo lɛ waa lɛ, miŋa yaa nɔ emɔmɔɔ gbekɛbii lɛ anine shi kɛyaa kpeei. Eji eŋmɛɛ he kulɛ, misusuŋ akɛ ehemɔkɛyeli lɛ ji anɔkwale hemɔkɛyeli.”

Kazutaka, ni wo okpɔlɔ kɛ enɔ niyenii fɛɛ etswa shi lɛ jie nɔ ni ha etsake esubaŋ lɛ kpo yɛ be mli ni egbaa esane yɛ nɛkɛ gbɛ nɔ lɛ: “Yɛ naagbee lɛ mikpoo akɛ mihaaa Atsuko shika ni ekɛfo tsɔne. Yɛ fɛɛ sɛɛ lɛ, etee kpeei lɛ fɛɛ, ni ekɛ gbekɛbii lɛ yaa. Bɔni afee ni enyɛ efee nakai lɛ, ehɔɔ lɛ diɛŋtsɛ enibii fiofio. Ni minu he akɛ miifee buulu, ni minyɛɛɛ mate shi mawo lɛ dɔŋŋ. Shi moŋ, mije shishi akɛ makane woji tɛtrɛbii lɛ ni eshiɔ koni makwɛ mli lɛ.”

Okɛ Ohefatalɔ lɛ Agba Sane

Kazutaka ŋa Atsuko kɛɛ, “kulɛ esa akɛ mafɔ miwu lɛ nine koni ebafata mihe ni maha ele akɛ miisumɔ ni mikɛ lɛ fɛɛ akase Biblia lɛ. Ehaoɔ ehe ehaa mi kɛ weku lɛ. Kulɛ sanegbaa kpakpa baanyɛ afee babaoo ni ejie ehaomɔ lɛ.” Hɛɛ, sanegbaa kpakpa ji oti ni haa anuɔ nibii ashishi. Biblia lɛ woɔ wɔ ŋaa akɛ: “Kɛ ajinatoo bɛ lɛ, yiŋtoi feɔ yaka.” (Abɛi 15:22) Yɛ sane nɛɛ mli lɛ, esa akɛ “ajinatoo” kɛ ohefatalɔ lɛ yɛ jamɔ nifeemɔi amli lɛ afee nɔ ni asusu he jogbaŋŋ ni akɛ he woɔ mli hu yɛ ŋaa gbɛ nɔ. Biblia lɛ kɛɔ akɛ: “Nilelɔ tsui tsɔɔ edaa nii, ni ehaa enaabu nitsɔɔmɔ lɛ faa.” (Abɛi 16:23) Ehe miihia hu akɛ wɔfee nilelɔi yɛ be ni sa ni wɔkɛaahala ni wɔkɛwie lɛ hu mli.​—Jajelɔ 3:⁠7.

Ekolɛ gbɛ ni otsɔɔ nɔ owieɔ lɛ hu he miihia taakɛ nɔ ni owieɔ he lɛ hu ji lɛ. Bɔfo Paulo wo ŋaa akɛ: “Nyɛhaa nyɛwiemɔ he abaa nyam daa, ni ŋoo ahi mli, ni nyɛle bɔ ni sa akɛ nyɛhaa mɔ fɛɛ mɔ hetoo.” (Kolosebii 4:⁠6) Kɛ okɛ wiemɔ kpakpa tsu nii, yɛ gbɛ ni ŋɔɔ nɔ lɛ, ebaŋ akɛ ohefatalɔ lɛ baatsimɔ etoii yɛ nɔ ni oyɔɔ kɛɛmɔ lɛ he.

Ewa kɛha wumɛi pii akɛ amɛŋamɛi aaatsɔɔ amɛ nii. No hewɔ lɛ ehe miihia ni ŋamɛi lɛ afee mɔdɛŋbɔlɔi. Kikuyo kɛ Buu Mɔɔ Asafo lɛ woji lɛ tsu nii jogbaŋŋ. Ekɛɔ akɛ: “Kɛ minine shɛ Awake! lɛ nɔ pɛ lɛ, mikwɛɔ mli ni mitaoɔ saji ni baaŋɔɔ miwu lɛ naa. Kɛkɛ lɛ misɔleɔ ni mana hegbɛ ni mikɛlɛ agba enɛ he sane.” Eshiɔ wolo tɛtrɛɛ lɛ yɛ hejuuhe lɛ, ni ekwɛɔ ebaafai lɛ amli jogbaŋŋ daa gbi akɛ eeena akɛ eekane lo. Kɛ etamɔ nɔ ni akaneee lɛ, etsakeɔ wolo tɛtrɛɛ lɛ. Kikuyo wu lɛ ebatsɔ asafoŋ sɔɔlɔ kɛ gbɛgbalɔ bianɛ.

Hewalɛ ni Jeŋba Kpakpa Yɔɔ

Shi kɛji akɛ ohefatalɔ lɛ sumɔɔɔ ni ekɛbo gbaa jamɔ he sane hu? Kɛ ekɛ mɛi krokomɛi ni ji Kristofoi kpe lɛ, ekolɛ enɛ aaanyɛ aba eshitee-kɛ-woo ni naa wa lɛ shi, koni etsirɛ ohefatalɔ lɛ koni ekase Biblia lɛ. Masao, ni amrɔ nɛɛ eji onukpa lɛ ji mɔ ko ni be ko lɛ egu Yehowa Odasefoi akɛ amɛkaba eshia kwraa. Ekaiɔ akɛ: “Yɛ naagbee lɛ mikpɛlɛ nɔ akɛ mikɛ Odasefoi lɛ baakase Biblia lɛ, yɛ be mli ni miŋa kpa mi fai akɛ miye mibua ni ama Maŋtsɛyeli Asa lɛ. Bɔ ni mina ni mɔ fɛɛ mɔ miitsu nii yɛ ekomefeemɔ mli​—ni nyɔmɔwoo ko bɛ mli lɛ na minɔ hewalɛ waa.”

Mɛni obaanyɛ ofee kɛji akɛ ohefatalɔ lɛ kpoo akɛ ekɛ mɔ ko kwraa egbaaa jamɔ he sane? Bɔfo Petro wo ŋaa akɛ “kɛ mɛikomɛi booo wiemɔ lɛ toi tete lɛ, ashi wiemɔ lɛ sɛɛ, ni atsɔ yei lɛ ajeŋba nɔ ni nine ashɛ amɛ [wumɛi] anɔ.” Akɛ nɔkwɛmɔ nɔ lɛ, mɛɛ Kristofonyo ŋa lɛ jeŋba nɛkɛ baanyɛ agbala ewu lɛ? “Jeŋba ni hetsemɔ kɛ gbeyeishemɔ yɔɔ mli,” ni jieɔ “tsuiiaŋ gbɔmɔ ni aŋɔtee lɛ, yɛ mumɔ ni hejɔ ni yɔɔ kpoo mli” taakɛ Petro kɛɔ lɛ.​—1 Petro 3:​1-4.

Ŋa ko ni ji Kristofonyo kɛ nɛkɛ shishitoo mla nɛɛ tsu nii beni ewu ni teɔ shi woɔ lɛ lɛ kɛ ehe wo hiɛgbejianifeemɔ ko mli lɛ. Eyɛ mli akɛ ehiɛ shwie shi yɛ mɛi ahiɛ ni efite enitsumɔ moŋ, shi ehaaa ewu lɛ anu wiemɔ-kɛ-shimɔ ko ni jɛ lɛ loo ebii lɛ anaa. Ewu lɛ kpɛlɛ nɔ akɛ, “mile akɛ amɛjeŋba ni ekaaa lɛ jɛ Biblia lɛ ni amɛkaseɔ lɛ.” Yɛ be mli ni ete shi ewo amɛ afi babaoo sɛɛ lɛ, eje shishi akɛ eeekane Biblia lɛ. Wumɛi krokomɛi ni sɛɛ mli lɛ amɛbatsɔmɔɔ Odasefoi lɛ kɛɔ akɛ: “Kulɛ miji wu ni eŋa ebuuu lɛ, shi trukaa pɛ kɛkɛ ni miŋa je shishi ekɛ bulɛ bɔi mi hamɔ akɛ shia lɛ yitso.” “Kɛ minitsumɔ mli hefatalɔi lɛ ba wɔshia lɛ, miŋa kɛ miishɛɛ hereɔ amɛ atuu. Misumɔɔ enɛ jogbaŋŋ diɛŋtsɛ.”

Gbekɛbii ajeŋba kpakpa hu baanyɛ aba shitee-kɛ-wolɔi lɛ atsui shi. Beni abi tsɛ ko ni tsutsu lɛ eteɔ shi ewoɔ eŋa lɛ akɛ mɛni ha etsake esubaŋ lɛ, ekɛɛ: “Beni mibinuu ni eye afii enyɔ kɛ fa lɛ nu he akɛ mimli miihe afu lɛ, ekɛ gbee ni wa foɔ, ni etiɔ wiemɔ nɛɛ mli: ‘Suɔmɔ toɔ etsui shi, ni emli hi.’” (1 Korintobii 13:​4-7) Gbekɛnuu ni atsɔɔ lɛ nii jogbaŋŋ nɛɛ tsirɛ etsɛ lɛ ni ebote Biblia lɛ mli. Tsɛmɛi pii ekpɛ amɛyiŋ akɛ amɛbaapɛi Biblia lɛ mli amɛkwɛ yɛ amɛbii ni kpa amɛ fai ni amɛkase nii lɛ hewɔ.

Yɛ naagbee lɛ, miishɛɛ kɛ shwɛmɔ baanyɛ atsu naakpɛɛ nii yɛ ohefatalɔ lɛ subaŋ nɔ. Wu ko kɛɛ eŋa ni heɔ yeɔ lɛ akɛ ekɔ nɔ fɛɛ nɔ ni esumɔɔ yɛ shia lɛ mli koni eje kpo ni ekaba dɔŋŋ. Eŋa lɛ ha hetoo akɛ, “misumɔɔɔ mibi lɛ, misumɔɔɔ shika hu, ni misumɔɔɔ heloo gbɛfaŋ nibii hu.” Kɛkɛ ni yoo lɛ kɛ furoshiki (mama agbo ko ni Japanbii kɛ fimɔɔ jatsũi) lɛ lɛɛ shikpɔŋ, ni ekɛɛ ewu lɛ akɛ: “Nɔ ko nɔ ko bɛ ni jara wa kɛha mi, fe bo. No hewɔ lɛ botemɔ furoshiki lɛ mli! Miisumɔ ni mikɛ bo aya.” Wu lɛ kpa shitee-kɛ-woo lɛ, ni eje Biblia lɛ kasemɔ shishi, ni amrɔ nɛɛ eesɔmɔ akɛ onukpa.

Kɛ okɛ ohe kpɛtɛ anɔkwale lɛ he, ni okɛ ohefatalɔ lɛ na sanegbaa kpakpa, ojie naanyobɔɔ su kpo otsɔɔ lɛ, ni oba ojeŋ yɛ gbɛ kpakpa nɔ lɛ, obaanyɛ otsɔ ohefatalɔ lɛ yiŋ ni ebatsɔ heyelilɔ. Mɔ ko ni tsutsu lɛ eteɔ shi ewoɔ lɛ kɛɛ, “kɛji akɛ etamɔ nɔ ni ohefatalɔ lɛ tsɔɔɔ heyelilɔ po lɛ, ekolɛ eetsake etsui.” No hewɔ lɛ kaaŋmɛɛ he. Okɛ bɔfo Paulo ŋaawoo ni ekɛha gbalashihilɛ mli hefatalɔi fɛɛ ni amɛhefatalɔi heee yeee lɛ ato otsui mli: “Shi, yoo, bo obaahere owu lɛ yiwala jiŋŋ, ole? Aloo nuu, bo hu obaahere oŋa lɛ yiwala jiŋŋ, ole?”​—1 Korintobii 7:⁠16.