Ja Ashiɛ Sanekpakpa Nɛɛ Atsɔɔ Dã

“Ja ashiɛ sanekpakpa lɛ atsɔɔ jeŋmaji fɛɛ dã.”—MARKO 13:10.

 1, 2. Mɛni ji Odasefoi lɛ kadimɔ nii, ni mɛni hewɔ?

MƐNI hewɔ Yehowa Odasefoi kãa he amɛshiɛɔ nɛkɛ? Eka shi faŋŋ akɛ ale wɔ yɛ jeŋ fɛɛ yɛ wɔ maŋ shiɛmɔ nitsumɔ lɛ hewɔ, kɛ eji yɛ shia kɛ shia, yɛ gbɛjegbɛi anɔ, loo yɛ trukaa odaseyeli mli. Wɔjieɔ wɔhe kpo wɔtsɔɔ akɛ Odasefoi yɛ shihilɛi ni hi fe fɛɛ mli ni wɔgbaa sanekpakpa lɛ ni wɔbuɔ lɛ akɛ jwetri kpele kɛha wɔ lɛ he sane wɔtsɔɔ mɛi yɛ ŋaa mli. Yɛ anɔkwale mli lɛ, wɔbaanyɛ wɔkɛɛ akɛ nɛkɛ sɔɔmɔ nɛɛ ji wɔ nitsumɔ lɛ kadimɔ nii!—Kolosebii 4:6.

² Bo lɛ susumɔ he okwɛ—kɛji akɛ gbɔmɛi na hii, yei, kɛ gbekɛbii akuu ko ni amɛsaa amɛhe fɛfɛo ni hiɛ baagii yɛ amɛ akutso lɛ mli lɛ, mɛni he amɛsusuɔ klɛŋklɛŋ kwraa? Ani no ji, ‘Oh, naa, Katolikbii (loo Orthodɔksbii) lɛ baa ekoŋŋ lɛ! loo, ‘Pentekostbii lɛ (loo Baptistbii) lɛ baa ekoŋŋ lɛ! Dabi. Gbɔmɛi le akɛ jamɔi ni tamɔ nɛkɛ bɛ wekui ni amɛ fɛɛ amɛkɛ amɛhe ewo shia-kɛ-shia sɔɔmɔ lɛ mli. Ekolɛ jamɔ kui komɛi tsuɔ mɛi ni akɛɛ atsɛɔ amɛ “maŋsɛɛ sanekpakpa shiɛlɔi” ni amɛyayeɔ afii enyɔ yɛ hei komɛi, shi amɛ mlibii lɛ eko kwraa kɛ amɛhe wooo sɔɔmɔ nitsumɔ ni tamɔ nɛkɛ mli. Yehowa Odasefoi pɛ ji mɛi ni ayɔse amɛ yɛ jeŋ fɛɛ yɛ ekãa ni amɛfeɔ yɛ amɛ shɛɛ sane ni amɛjajeɔ amɛtsɔɔ mɛi krokomɛi be fɛɛ be lɛ hewɔ. Ni ale amɛ yɛ amɛ woji tɛtrɛbii ni ji Buu-Mɔɔ lɛ kɛ Awake! lɛ hewɔ.—Yesaia 43:10-12; Bɔfoi lɛ Asaji 1:8.

Esoro Amɛ yɛ Kristendom Osɔfoi lɛ Ahe

 3, 4. Mɛɛ gbɛ nɔ afeɔ Kristendom osɔfoi lɛ ahe mfoniri yɛ adafitswaa woji kɛ saji amli bei pii yɛ?

³ Nɔ ni yɔɔ sɔrɔto kwraa ji akɛ, adafitswaa woji amli saji ejie lɛ kpo shii abɔ akɛ yɛ maji komɛi anɔ lɛ, osɔfoi lɛ ateŋ mɛi pii mɔmɔɔ gbekɛbii amɛkɛ amɛ wɔɔ, amɛji shishiulɔi ni bɛ jeŋba kɛ ojotswalɔi. Amɛ heloo lɛ nitsumɔi kɛ shihilɛ mli ŋɔɔmɔyeli lɛ jeɔ kpo ni mɔ fɛɛ mɔ naa. Lalafolɔ ko ni ehe gbɛi wie he jogbaŋŋ yɛ elala ni egbɛi ji, “Ani Yesu Baafi Rolex [shika watsi ni jara wa waa] yɛ E-Tɛlivishin nɔ Nifeemɔ Mli?” lɛ mli. Ebi sane lɛ akɛ: “Ani Yesu baafee ehe maŋkwralɔ kɛ E-ku esɛɛ eba shikpɔŋ lɛ nɔ? Ani E-shia ni ji enyɔ lɛ baahi Palm Springs [ni ji niiatsɛmɛi ashihilɛ he ni yɔɔ California lɛ] ni ebɔ mɔdɛŋ ni ekɛ nii babaoo ni E-na lɛ atee?” Kwɛ bɔ ni Yakobo wiemɔi lɛ sa jogbaŋŋ ha: “Nyɛye nyɛnaa nii yɛ shikpɔŋ lɛ nɔ ni nyɛbɔ ahoshwi; nyɛlɛ nyɛtsuii aahu kɛyashi gbee gbi lɛ nɔ.”—Yakobo 5:5; Galatabii 5:19-21.

⁴ Osɔfoi lɛ ni kɛ maŋkwralɔi bɔɔ naanyo ni amɛkɛ amɛhe haa koni ahala amɛ akɛ maŋkwralɔi lɛ jieɔ amɛhe kpo akɛ ŋmɛnɛŋmɛnɛ beaŋ woloŋmalɔi kɛ Farisifoi. Yɛ nakai beaŋ nɔŋŋ lɛ, aahe shika babaoo kɛmiijɛ jamɔ gbɛjianɔtoi lɛ adɛŋ yɛ maji tamɔ United States kɛ Canada yɛ maŋsɔtsɔɔ kɛ fɔbuu kojomɔi ni saneyeli hei buɔ osɔfoi, yɛ amɛ lahoo shihilɛ ni kɔɔ gbekɛbii kɛ onukpai ahe lɛ hewɔ.—Mateo 23:1-3.

 5. Mɛni hewɔ Kristendom osɔfoi lɛ jeee “tsulɔ anɔkwafo kɛ nilelɔ” lɛ?

⁵ Yesu baanyɛ akɛɛ egbii lɛ amli osɔfoi lɛ yɛ gbɛ ni ja nɔ akɛ: “Kpoo ha nyɛ, woloŋmalɔi kɛ Farisifoi, osatofoi! Akɛni nyɛtamɔ gbohii asaŋi ni asha he ni amɛhewɔ efee fɛo moŋ, shi amɛmli gbɛ lɛ eyimɔ obɔbɔ kɛ gbohii awui kɛ mujii sɔrɔtoi fɛɛ. Nakai nɔŋŋ anaa nyɛ hu yɛ gbɔmɛi ahiɛ tamɔ jalɔi, shi osato kɛ mlatɔmɔ eyi nyɛmli obɔ.” No hewɔ lɛ, Nyɔŋmɔ kɛ sanekpakpa lɛ he shiɛmɔ nitsumɔ lɛ wooo Kristendom osɔfoi lɛ adɛŋ, kɛ amɛji Katolik, Protestant, Ortodɔks, loo mɛi ni bɛ jamɔ gbɛjianɔtoo ko mli. Anaaa amɛ akɛ amɛ amɛji “tsulɔ anɔkwafo kɛ nilelɔ lɛ.”—Mateo 23:27, 28; 24:45-47.

Mɛni Hewɔ Ja Ashiɛ Sanekpakpa lɛ Dã?

 6. Mɛɛ nibii etsɛŋ kwraa ni amɛbaaba?

⁶ Yɛ Yesu famɔ akɛ ashiɛ sanekpakpa lɛ yɛ jeŋmaji fɛɛ mli ni etsɔɔ shishi yɛ gbɛ ni mli ka shi faŋŋ nɔ lɛ, Marko pɛ ji mɔ ni kɛ wiemɔ “fɛɛ dã” tsu nii. (Marko 13:10; okɛto Mateo 24:14 he.) J. B. Phillips shishitsɔɔmɔ lɛ kaneɔ nɛkɛ: “Shi dani naagbee lɛ aaaba lɛ esa akɛ ashiɛ sanekpakpa lɛ atsɔɔ jeŋmaji fɛɛ.” Feemɔ-wiemɔ mligbalalɔ, “fɛɛ dã,” ni akɛtsu nii lɛ tsɔɔ akɛ nibii krokomɛi baanyiɛ jeŋ muu fɛɛ sanekpakpa shiɛmɔ nitsumɔ lɛ sɛɛ aba. Nɔ ni baafata nɛkɛ nibii nɛɛ ahe ji amanehulu kpeteŋkpele ni awo shi akɛ ebaaba lɛ kɛ Kristo jalɛ nɔyeli ni baaye jeŋ hee lɛ nɔ lɛ.—Mateo 24:21-31; Kpojiemɔ 16:14-16; 21:1-4.

 7. Mɛni hewɔ Nyɔŋmɔ sumɔɔ ni ashiɛ sanekpakpa lɛ klɛŋklɛŋ da lɛ?

⁷ No hewɔ lɛ, mɛni hewɔ Nyɔŋmɔ sumɔɔ ni ashiɛ sanekpakpa lɛ atsɔɔ dã lɛ? Yiŋtoo lɛ ekome ji akɛ, eji Nyɔŋmɔ ni yɔɔ suɔmɔ, ni yeɔ jalɛ sane, ni yɔɔ nilee, kɛ hewalɛ. Wɔbaanyɛ wɔna bɔ ni Yehowa sui nɛɛ jeɔ kpo waa ehaa, yɛ Yesu wiemɔi ni aŋmala yɛ Mateo 24:14 kɛ Marko 13:10 lɛ mlibaa mli. Nyɛhaa wɔsusua nɛkɛ sui kpakpai komekomei nɛɛ ahe kuku ni wɔkwɛ bɔ ni amɛkɔɔ sanekpakpa lɛ shiɛmɔ he amɛhaa.

Sanekpakpa lɛ kɛ Yehowa Suɔmɔ

 8. Sanekpakpa lɛ shiɛmɔ ji Nyɔŋmɔ suɔmɔ lɛ kpojiemɔ yɛ mɛɛ gbɛ nɔ? (1 Yohane 4:7-16)

⁸ Sanekpakpa lɛ shiɛmɔ jieɔ Nyɔŋmɔ suɔmɔ lɛ kpo yɛ mɛɛ gbɛ nɔ? Klɛŋklɛŋ kwraa lɛ, ejeee shɛɛ sane ni ato akɛ akɛha maŋ kome loo kuu ko. Eji sanekpakpa kɛha “jeŋmaji fɛɛ.” Nyɔŋmɔ sumɔɔ adesa weku lɛ, aahu akɛ etsu e-Bi koome lɛ kɛba shikpɔŋ nɔ koni ebatsɔ kpɔmɔ afɔle kɛha adesai fɛɛ he eshai, shi jeee weku kome pɛ nɔ̃. Bɔfo Yohane ŋma akɛ: “Nɛkɛ Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala. Ejaakɛ Nyɔŋmɔ tsuuu e-Bi lɛ kɛbaaa je lɛ mli koni ebakojo je lɛ, shi moŋ koni atsɔ enɔ ahere je lɛ yiwala.” (Yohane 3:16, 17) Yɛ anɔkwale mli lɛ sanekpakpa lɛ, ni ji shɛɛ sane ni kɛ jeŋ hee ni toiŋjɔlɛ, gbeekpamɔ, kɛ jalɛ saneyeli yɔɔ mli he shiwoo haa lɛ yeɔ Nyɔŋmɔ suɔmɔ lɛ he odase.—2 Petro 3:13.

Sanekpakpa lɛ kɛ Yehowa Hewalɛ

 9. Mɛni hewɔ Yehowa kɛ Kristendom sɔlemɔi ni yɔɔ hewalɛ waa lɛ tsuuu nii koni amɛshiɛ sanekpakpa lɛ?

⁹ Ajieɔ Yehowa hewalɛ kpo kɛtsɔɔ sanekpakpa lɛ shiɛmɔ nɔ yɛ mɛɛ gbɛ nɔ? Susumɔ nɔ ni nyiɛ sɛɛ nɛɛ he okwɛ, akɛ, namɛi ekɛ amɛ etsu nii koni amɛtsu nitsumɔ nɛɛ he nii? Ani eji Kristendom jamɔ gbɛjianɔtoi ni yɔɔ hewalɛ waa, tamɔ Roma Katolik Sɔlemɔ lɛ loo Protestant jamɔ gbɛjianɔtoi ni amɛhe gbɛi lɛ? Dabi, maŋkwramɔŋ ni amɛkɛ amɛhe woɔ lɛ haaa amɛfee mɛi ni sa kɛha nitsumɔ nɛɛ. (Yohane 15:19; 17:14; Yakobo 4:4) Amɛ ninámɔ kɛ naanyo ni amɛbɔɔ kɛ hewalɛ ni amɛna yɛ nɔyelɔi akui lɛ ateŋ lɛ jeee nɔ ni saa Yehowa Nyɔŋmɔ hiɛ, ni asaŋ amɛ jamɔ ni amɛkɛfutu blema saji lɛ hu efeko nakai. Ehe ehiaaa gbɔmɔ hewalɛ dani anyɛ atsu Nyɔŋmɔ suɔmɔnaa nii.—Zakaria 4:6.

10. Namɛi Nyɔŋmɔ ehala koni amɛshiɛ sanekpakpa lɛ?

¹⁰ Etamɔ bɔ ni bɔfo Paulo wie yɛ wolo ni eŋma eyaha Korinto asafo lɛ mli lɛ: “Anyɛmimɛi, nyɛkwɛa akɛ nyɛtsɛmɔ lɛ, jeee heloo gbɛfaŋ nilelɔi pii, jeee hewalɔi pii, jeee abladei pii, shi moŋ je nɛŋ kwashiaianii lɛ Nyɔŋmɔ hala, koni ekɛwo nilelɔi lɛ ahiɛgbele; ni je nɛŋ gbɔjɔmɔ nii lɛ hu Nyɔŋmɔ hala, koni ekɛwo nii ni he wa lɛ ahiɛgbele; ni je nɛŋ nii ni abuuu kɛ nii ni agbe he guɔ lɛ Nyɔŋmɔ hala, kɛ nibii ni jeee nɔ ko nɔ ko lɛ tete, koni eha nibii ni ji nɔ ko lɛ afee yaka; bɔni afee ni heloo ko heloo ko akashwã yɛ ehiɛ.”—1 Korintobii 1:26-29.

11. Mɛɛ anɔkwa saji komɛi ni kɔɔ Odasefoi lɛ ahe eha amɛfee gbɔmɛi ni yɔɔ sɔrɔto lɛ?

¹¹ Niiatsɛmɛi fioo ko pɛ yɔɔ Yehowa Odasefoi agbɛjianɔtoo lɛ mli, ni eka shi faŋŋ akɛ mɛi ni yɔɔ hewalɛ yɛ maŋkwramɔŋ bɛ mli. Bɔ ni amɛkɛ amɛhe wooo maŋkwramɔŋ saji amli kwraa lɛ tsɔɔ akɛ amɛnaaa mɔ ko nɔ hewalɛ yɛ maŋkwramɔŋ. Nɔ ni tamɔɔɔ nakai lɛ, amɛfee mɛi ni jamɔŋ kɛ maŋkwramɔŋ hiɛnyiɛlɔi haa awaa amɛyi waa yɛ bei pii amli yɛ afii ohai 20 nɛɛ mli. Ni kɛlɛ, yɛ shitee-kɛ-woo ni naa wa ni Nazi nɔyeli, Fasist nɔyeli, Komunist nɔyeli, maŋhedɔɔ, kɛ apasa jamɔ kɛbaa amɛnɔ lɛ fɛɛ sɛɛ lɛ, jeee akɛ Odasefoi lɛ miishiɛ sanekpakpa lɛ yɛ jeŋ fɛɛ kɛkɛ, shi amɛyi efa hu yɛ naakpɛɛ gbɛ nɔ yɛ yibɔ naa.—Yesaia 60:22.

12. Mɛni hewɔ Odasefoi lɛ eye omanye lɛ?

¹² Mɛni Odasefoi lɛ kɛɔ akɛ no kɛ omanye ni amɛyeɔ nɛɛ baa? Yesu wo ekaselɔi lɛ shi akɛ: “Kɛ mumɔ krɔŋkrɔŋ lɛ na ba nyɛnɔ lɛ, nyɛaana hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.” No hewɔ lɛ, amɛ omanyeyeli lɛ baajɛ mɛni diɛŋtsɛ mli? Yesu kɛɛ: “Kɛ mumɔ krɔŋkrɔŋ lɛ na ba nyɛnɔ lɛ, nyɛaana hewalɛ.” Nakai nɔŋŋ hu ŋmɛnɛ, hewalɛ ni jɛ Nyɔŋmɔ ŋɔɔ, shi jeee gbɔmɔ nyɛmɔ, ji nɔ titri ni eha Odasefoi lɛ eye omanye yɛ amɛ jeŋ muu fɛɛ sɔɔmɔ nitsumɔ lɛ mli lɛ. Eka shi faŋŋ akɛ Nyɔŋmɔ kɛ gbɔmɛi ni tamɔ mɛi ni he waaa kwraa lɛ miitsu nii kɛmiitsu tsɔsemɔ nitsumɔ ni da fe fɛɛ yɛ yinɔsane mli lɛ he nii.—Bɔfoi lɛ Asaji 1:8; Yesaia 54:13.

Sanekpakpa lɛ kɛ Yehowa Nilee

13. (a) Mɛni hewɔ Odasefoi lɛ jɛɔ amɛsuɔmɔ mli amɛsɔmɔɔ ni nyɔmɔwoo ko bɛ mli lɛ? (b) Yehowa eha Satan mpoatswaa lɛ hetoo yɛ mɛɛ gbɛ nɔ?

¹³ Mɛi ni jɛɔ amɛsuɔmɔ mli amɛkɛ amɛhe haa ji mɛi ni shiɛɔ sanekpakpa lɛ. Yesu kɛɛ: “Yaka nyɛna, nyɛka nyɛŋɔ-haa.” (Mateo 10:8) No hewɔ lɛ, awooo Yehowa Odasefoi lɛ ateŋ mɔ ko nyɔmɔ yɛ Nyɔŋmɔ ni amɛsɔmɔɔ lɛ lɛ hewɔ, ni asaŋ amɛtaooo nyɔmɔwoo ko hu. Yɛ anɔkwale mli lɛ, amɛkɛ plɛtei tsɔɔɔ mɛi ahiɛ ni amɛkɛmiibi shika yɛ amɛkpeei ashishi. Amɛyɛ miishɛɛ, akɛ amɛaatsɔ amɛsɔɔmɔ ni pɛsɛmkunya bɛ mli ni amɛkɛhaa lɛ nɔ koni Nyɔŋmɔ ana hetoo kɛha Satan Abonsam, ni ji enaafolɔlɔ lɛ. Nɛkɛ mumɔ ni teɔ shi eshiɔ Nyɔŋmɔ nɛɛ ekɛɛ akɛ adesai sɔmɔŋ Nyɔŋmɔ ni pɛsɛmkunya yiŋtoo ko bɛ mli kɔkɔɔkɔ. Yehowa ejɛ enilee mli ekɛ hetooi pii ni anyɛŋ aje he ŋwane eha Satan mpoatswaa lɛ—Kristofoi Odasefoi anɔkwafoi akpekpei abɔ ni shiɛɔ sanekpakpa lɛ yɛ shia kɛ shia, yɛ gbɛjegbɛi anɔ, kɛ agbɛnɛ yɛ trukaa gbɛ nɔ.—Hiob 1:8-11; 2:3-5; Abɛi 27:11.

14. Mɛni ji “nilee ni aŋɔtee” ni Paulo wieɔ he lɛ?

¹⁴ Odaseyeli kroko ni tsɔɔ Nyɔŋmɔ nilee ni haa ashiɛɔ sanekpakpa lɛ ji akɛ, Maŋtsɛyeli shiwoo lɛ diɛŋtsɛ ji Nyɔŋmɔ nilee lɛ kpojiemɔ. Bɔfo Paulo ŋma akɛ: “Shi kɛlɛ wɔwieɔ nilee wiemɔ yɛ mɛi ni eye emuu lɛ ateŋ, shi jeee je nɛŋ nilee, aloo je nɛŋ onukpai ni hoɔ yaa lɛ anɔ̃ ni; shi moŋ Nyɔŋmɔ nilee ni aŋɔtee yɛ teemɔŋ sane mli lɛ wɔwieɔ, nɔ ni Nyɔŋmɔ saa eto ha wɔnunyam dani aje jeŋ shishi.” Nakai “nilee ni aŋɔtee” lɛ kɔɔ gbɛ ni nilee yɔɔ mli ni Nyɔŋmɔ baatsɔ nɔ aha atuatsemɔ ni aje shishi yɛ Eden lɛ aba naagbee lɛ he. Ajie nakai teemɔŋ sane lɛ mli nilee lɛ yɛ Yesu Kristo, mɔ ni he hiaa titri yɛ Nyɔŋmɔ Maŋtsɛyeli lɛ he sanekpakpa lɛ mli lɛ mli.a—1 Korintobii 2:6, 7; Kolosebii 1:26-28.

Sanekpakpa lɛ kɛ Nyɔŋmɔ Jalɛ Saneyeli

15. Te wɔfeɔ tɛŋŋ wɔleɔ akɛ Yehowa ji jalɛ saneyeli Nyɔŋmɔ? (5 Mose 32:4; Lala 33:5)

¹⁵ Jalɛ saneyeli titri hewɔ wɔnaa bɔ ni wiemɔ “dã” ni yɔɔ Marko 13:10 lɛ he hiaa waa ha lɛ. Yehowa ji jalɛ saneyeli ni akɛ duromɔ ekpɛtɛ he lɛ Nyɔŋmɔ. Ekɛɔ kɛtsɔɔ egbalɔ Yeremia nɔ akɛ: “ ‘Mɔ ni shwaa lɛ, enɛ moŋ nɔ eshwa efɔ, akɛ eyoo ni asaŋ ele mi, akɛ miji Yehowa, mɔ ni yeɔ mlihilɛ kɛ kojomɔ kɛ jalɛ sane yɛ shikpɔŋ lɛ nɔ lɛ; ejaakɛ enɛ sa mihiɛ,’ Yehowa kɛɛ.”—Yeremia 9:24.

16. Mɛɛ gbɛ nɔ abaanyɛ afee bɔ ni jalɛ saneyeli biɔ ni abɔ kɔkɔ klɛŋklɛŋ da lɛ he mfoniri yɛ?

¹⁶ Te ajie Yehowa jalɛ saneyeli kpo yɛ sanekpakpa lɛ shiɛmɔ he aha tɛŋŋ? Nyɛhaa wɔkɛ biianyɛ ko ni efee abloŋo ni ŋɔɔ ni abaaye, kɛ́ gbɔi komɛi ni baa lɛ ba yɛ sɛɛ mli yɛ gbi lɛ mli lɛ afea enɛ he nɔkwɛmɔ nɔ. Kɛ eshi yɛ kpatashi okpɔlɔ lɛ nɔ ni ekɛɛɛ ebii lɛ nɔ ko kwraa yɛ be ni akɛbaaye niyenii nɛɛ he lɛ, mɛni baafee gbekɛbii lɛ asu yɛ shihilɛ ni tamɔ nɛkɛ mli? Wɔ fɛɛ wɔfee gbekɛbii pɛŋ yɛ be ko mli! Gbekɛbii lɛ baasumɔ ni amɛkɛ amɛwao atsɔtse he ni amɛkɛsa amɛnaa amɛkwɛ bɔ ni abloŋo lɛ ŋɔɔ ha! Agbɛnɛ kɛ nyɛ lɛ kɛ kɔkɔbɔɔ ko haaa lɛ, enyɛŋ ni eha etoigbalamɔ lɛ mli awa. Shi yɛ gbɛ kroko nɔ lɛ, kɛ etsɔɔ mli faŋŋ akɛ abaaye abloŋo lɛ yɛ sɛɛ mli yɛ be mli ni gbɔi lɛ eba sɛɛ, ni no hewɔ lɛ esaaa akɛ ataa he lɛ, no lɛ ekɛ kɔkɔbɔɔ ni mli ka shi faŋŋ eha. Kɛ afeee toiboo lɛ, eyɛ hegbɛ akɛ ekɛ shiŋŋ-feemɔ tsuɔ he nii yɛ gbɛ ni ja nɔ.—Abɛi 29:15.

17. Yɛ mɛɛ gbɛ nɔ Yehowa ejie jalɛ saneyeli kpo yɛ gbɛ krɛdɛɛ nɔ kɛjɛ 1919?

¹⁷ Akɛni Yehowa yeɔ jalɛ sane hewɔ lɛ, ekɛ kojomɔ baŋ nibii agbɛjianɔtoo fɔŋ nɛɛ nɔ ni klɛŋklɛŋ lɛ ekɛ kɔkɔbɔɔ ni he hiaa lɛ hako. No hewɔ lɛ, titri lɛ kɛjɛ 1919, beni klɛŋklɛŋ jeŋ ta lɛ kɛ “kɔɔmɔi lɛ abɔimɔ” lɛ eba lɛ sɛɛ kɛbaa nɛɛ, Yehowa eha e-Dasefoi lɛ etee shikpɔŋ lɛ nɔ fɛɛ koni amɛkɛ ekaa ayajaje sanekpakpa lɛ. (Mateo 24:7, 8, 14) Jeŋmaji lɛ nyɛŋ akɛɛ akɛ amɛleee kɔkɔbɔɔ ni ekaaa nɛɛ he nɔ ko.

Te Sanekpakpa lɛ Shiɛmɔ Ekpele Jeŋ Fɛɛ Eha Tɛŋŋ?

18. (a) Mɛɛ odaseyeli yɔɔ ni kɔɔ Odasefoi lɛ anitsumɔ he yɛ hei ni yɔɔ banee? (b) Mɛɛ nɔkwɛmɔ nii krokomɛi ji nɔ ni ole?

¹⁸ Abaanyɛ ana bɔ ni jeŋ muu fɛɛ tsɔsemɔ nitsumɔ nɛɛ emɔ shi jogbaŋŋ eha lɛ kɛjɛ wolo, Last Places—A Journey in the North lɛ mli. Mɔ ni ŋma lɛ gba akɛ beni ekwɛ ŋshɔ hiɛ woji kɛ gbɛtsɔɔmɔ nibii lɛ amli koni ena he ni ŋshɔkpɔ Foula, ni ji Shetland Ŋshɔkpɔi ni yɔɔ Scotland kooyigbɛ lɛ ekome yɔɔ lɛ, egbɛtsɔɔmɔ nibii lɛ tsɔɔ akɛ “nɔ ni ebɔle ŋshɔkpɔ lɛ he kɛkpe ji lɛlɛ koi ni esha shi, tɛsaai, ŋshɔ shishi tɛi, kɛ gbɛtsii nibii.” Nɛkɛ nibii nɛɛ “bɔɔ amlaku lɛ kɔkɔ koni etsi ehe kɛya sɛɛ. Ŋshɔ ni ebɔle Foula he lɛ tamɔ hei ni akɛ okpɛlɛmii bibii babaoo ewo, ni ehaa ŋshɔkpɔ lɛ feɔ he ni lɛlɛtsɛmɛi, mɛi ni kɛ lɛlɛ shɛraa shi, kɛ Ŋleshi Ablotsiri Maŋnyɛ lɛ nitsulɔi ni tsuɔ nitsumɔi krɛdɛɛ lɛ po nyɛɛɛ aya jɛmɛ, shi—miná mile yɛ gbii fioo sɛɛ akɛ—nɛkɛ gbɛtsii nii nɛɛ ejeee Yehowa Odasefoi anijiaŋ wui.” Etee nɔ akɛ: “Bɔ ni amɛkpaa maŋtiasei wuji kɛ ohiafoi ashihilɛ hei kɛ Maji ni Nako Nɔyaa Tsɔ lɛ amli fitsofitso amɛtaoɔ mɛi koni amɛtsake amɛ lɛ, nakai nɔŋŋ amɛna mɛi amɛtsake amɛ kɛba amɛhemɔkɛyeli lɛ mli yɛ Foula ni etse ehe banee lɛ.” Ekpɛlɛ nɔ akɛ, nuu ko ni yɔɔ ŋshɔkpɔ nɛɛ nɔ, Andrew, na Buu-Mɔɔ lɛ ekome beni ashi yɛ eshinaa shi yɛ nyɔji komɛi ni tsɔ hiɛ lɛ amli. Kɛkɛ ni ekɛfata he akɛ: “Yɛ otsi kome sɛɛ lɛ, mina [Awake! lɛ ekome yɛ Denmark wiemɔ mli] yɛ Faeroes [Kooyigbɛ ŋshɔ lɛ mli ŋshɔkpɔi] lɛ anɔ, ni nyɔji enyɔ sɛɛ lɛ mina [Buu-Mɔɔ lɛ eko hu yɛ Denmark wiemɔ mli] yɛ Nuuq, yɛ Greenland.” Mɛɛ odase ni mli ka shi faŋŋ enɛ yeɔ yɛ Yehowa Odasefoi anitsumɔ kɛ ekaa nɛɛ he, yɛ kooyigbɛ maji lɛ anɔ nɛkɛ!

Mɛni Kanyaa Odasefoi lɛ ni Amɛyaa nɔ Amɛshiɛɔ Lɛ?

19, 20. (a) Mɛni kanyaa Yehowa Odasefoi lɛ ni amɛyaa nɔ amɛshiɛɔ lɛ? (b) Mɛɛ sanebimɔi abaaha hetoo yɛ enɛ sɛɛ?

¹⁹ Shiɛmɔ ni ashiɛɔ ahaa gbɔi yɛ shia kɛ shia lɛ bɛ mlɛo, ni afii abɔ ni mɔ ko kɛfee Odasefonyo lɛ kɔɔɔ he eko. Belɛ mɛni kanyaa Kristofoi nɛɛ ni amɛyaa nɔ amɛshiɛɔ lɛ? No ji amɛ Kristofoi ahenɔjɔɔmɔ kɛ bɔ ni amɛnuɔ gbɛnaa nii ni ka amɛnɔ lɛ shishi amɛhaa lɛ. Paulo ŋma akɛ: “Ejaakɛ kɛji miijaje sanekpakpa lɛ po jiŋŋ, efeee mi shwãa; ejaakɛ aŋɔfi minɔ akɛ mijaje, ejaakɛ kɛji mijajeee sanekpakpa lɛ, kpoo ha mi!” Anɔkwa Kristofoi yɛ shɛɛ sane ni tsɔɔ wala, no hewɔ lɛ te amɛaafee tɛŋŋ amɛtsi naa amɛha amɛ pɛ amɛhe? La yi sɔyeli he shishitoo mla ni kɔɔ kɔkɔ ni abɔɔɔ beni oshara baa lɛ he diɛŋtsɛ ji yiŋtoo titri ni haa ashiɛɔ sanekpakpa lɛ.—1 Korintobii 9:16; Ezekiel 3:17-21.

²⁰ Belɛ, mɛɛ gbɛ nɔ atsɔɔ ashiɛɔ sanekpakpa lɛ mɔ? Mɛni ji nɔ titri ni haa Odasefoi lɛ yeɔ omanye lɛ? Mɛni anaa yɛ amɛ sɔɔmɔ nitsumɔ lɛ kɛ amɛ gbɛjianɔtoo lɛ he ni yeɔ buaa ni ayɔseɔ amɛ akɛ anɔkwa jamɔ lɛ? Nikasemɔ ni nyiɛ sɛɛ nɛɛ baaha nakai sanebimɔi lɛ ahetoo.

[Shishigbɛ niŋmai]

Ani Okaiɔ?

◻ Mɛni haa esoroɔ Yehowa Odasefoi yɛ osɔfoi lɛ ahe lɛ?

◻ Shiɛmɔ lɛ jieɔ Nyɔŋmɔ suɔmɔ, hewalɛ, kɛ nilee kpo yɛ mɛɛ gbɛ nɔ?

◻ Sanekpakpa lɛ shiɛmɔ jieɔ Nyɔŋmɔ jalɛ saneyeli kpo yɛ mɛɛ gbɛ nɔ?

◻ Mɛni kanyaa Yehowa Odasefoi ni amɛyaa nɔ yɛ amɛsɔɔmɔ nitsumɔ lɛ mli lɛ?

[Mfoniri ni yɔɔ baafa 15]

Bɔ fɛɛ bɔ ni gbɔmɛi yɔɔ he ko ni etse ehe banee lɛ fɛɛ sɛɛ lɛ, Yehowa Odasefoi miisumɔ ni amɛnine ashɛ amɛnɔ