Oshijayeli yɛ Shika-Helɛtemɔ Bei ni Mli Wa Mli

CHUKS ni yɔɔ Afrika Anaigbɛ lɛ kɛɛ: “Mina suɔmɔ akɛ mabote gbalashihilɛ mli beni miye afii 25 lɛ. Miyɛ obalayoo ko yɛ mijwɛŋmɔ mli, eyɛ mihe miishɛɛ. Naagba lɛ ji shika. Mi-tsɛ kɛ minyɛmi nukpa tsuuu nii, ni minyɛmimɛi hii kɛ yei miiya skul. Mɔ fɛɛ mɔ miikpa mi gbɛ akɛ maye mabua weku lɛ. Kɛkɛ lɛ, nɔ ni fite sane lɛ kwraa lɛ, mifɔlɔi ahe baye, ni tsɔɔ akɛ esa akɛ matao shika kroko ni mikɛwo tsofafeemɔ he nyɔji lɛ.”

Chuks, Yehowa Odasefonyo lɛ sumɔɔɔ ni eboteɔ gbalashihilɛ mli ni enyɛŋ ekwɛ ŋa ko. Ekaiɔ Paulo wiemɔi ni anaa yɛ 1 Timoteo 5:8 lɛ: “Shi kɛ mɔ ko kwɛɛɛ lɛ diɛŋtsɛ emɛi, titri lɛ, lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.”

Chuks tee nɔ akɛ: “Mitsu nii waa, shi shika lɛ faaa. Nɔ ni jɛ mli ba ji akɛ, wɔ gbalashihilɛ gbɛjianɔtoo lɛ mli folɔ yɛ be kɛ bei amli. Yɛ naagbee lɛ, minine shɛ wolo nɔ kɛjɛ obalayoo lɛ ŋɔɔ ni miitsɔɔ akɛ mɔ kroko ebana etsɛ koni ekɛ lɛ abote gbalashihilɛ mli. Tsɛ lɛ kpɛlɛ nɔ. Beni ewolo lɛ ba lɛ sɛɛ gbii fioo lɛ, weku lɛ ŋmɛ okpɔlɔ kɛha gbalashihilɛ mli botemɔ lɛ.”

Taakɛ Chuks ji lɛ, Kristofoi hii babaoo ena bɔ ni amɛ gbalashihilɛ gbɛjianɔtoo lɛ fiteɔ loo esɛɛ tsɛɔ ehaa yɛ shika-helɛtemɔ mli shihilɛi gbohii lɛ hewɔ. Nibii ajara waa fe nine yɛ maji pii anɔ. Akɛ nɔkwɛmɔ nɔ lɛ, yɛ Afrika teŋgbɛ maŋ ko mli lɛ, nibii ajara bawa kɛtee hiɛ kɛyashɛ oha mlijaa 8,319 yɛ afi pɛ mli! Nitsumɔ námɔ wa yɛ maji komɛi amli. Ni yɛ bei pii amli lɛ, nyɔmɔwoo lɛ faaa kwraa, ni ewa akɛ nuu kɛaakwɛ ehe, mbasoroo ni ŋa kɛ gbekɛbii fata he. Obalanyo ko ni yɔɔ Nigeria ye awerɛho akɛ nitsumɔ ni akɛha lɛ yɛ guɔyeli nitsumɔ he ko lɛ woɔ lɛ [dɔlai] $17 pɛ akɛ edaa nyɔŋgbele nyɔmɔwoo—eshɛɛɛ bɔs nyɔmɔwoo kɛmiijɛ eshia kɛmiiya enitsumɔ he lɛ kɛ esɛɛkuu daa nyɔŋ nɔ!

Kristofoi yei oshijafoi komɛi hu miina akɛ shika-helɛtemɔ mli naagbai miifite amɛ gbalashihilɛ gbɛjianɔtoi. Bei pii lɛ esa akɛ amɛtsu nii ni amɛkɛye amɛbua weku lɛ mli bii. Hii oshijafoi komɛi ni naa enɛ lɛ gbalaa amɛhe shi kɛjɛɔ he, amɛyɔseɔ akɛ, esa akɛ nuu ni boteɔ gbalashihilɛ mli yɛ shihilɛi ni tamɔ nɛkɛ shishi lɛ ana shika ni fa ni ekɛaakwɛ eweku lɛ shi jeee eŋa lɛ pɛ. Ayo, ni egbe univɛsiti nikasemɔ naa lɛ bɔɔ mɔdɛŋ ni eye ebua ehe, enyɛ, kɛ enyɛmimɛi hii kɛ yei bibii lɛ. Eye ŋkɔmɔ akɛ: “Miisumɔ ni mabote gbalashihilɛ mli, shi kɛ mɛi krokomɛi ba ni amɛna mɛi babaoo ni nyiɛ misɛɛ [shika gbɛfaŋ gbɛnaa nii] lɛ, amɛjoɔ foi.”

Yɛ shika gbɛfaŋ naagbai lɛ fɛɛ sɛɛ lɛ, Kristofoi pii ni boteko gbalashihilɛ mli lɛ naa akɛ, amɛ wekumɛi kɛ mɛi krokomɛi nyɛ̃ɔ amɛnɔ koni amɛbote gbalashihilɛ mli ni amɛfɔ bii. Yɛ bei komɛi amli lɛ nɛkɛ nɔnyɛ̃ɛ nɛɛ batsɔɔ tamɔ hefɛoyeli. Akɛ nɔkwɛmɔ nɔ lɛ, Afrika hei komɛi yɛ ni amɛ kusum ji ni kɛ aaŋa onukpa lɛ ni abi bɔ ni ewu loo eŋa kɛ gbekɛbii lɛ yɔɔ. Yɛ bei komɛi amli lɛ akɛ ŋamɔ ni tamɔ nɛkɛ yeɔ mɛi ni boteko gbalashihilɛ mli lɛ ahe fɛo. John, ni eshwɛ fioo ebaana afii 50 lɛ kɛɔ akɛ: “Kɛ mɛi ye mihe fɛo ni amɛkɛɛ, ‘Te oŋa yɔɔ tɛŋŋ?’ lɛ, mihaa hetoo akɛ, ‘Enyiɛ gbɛ.’ Anɔkwale lɛ ji akɛ, te mafee tɛŋŋ mana ŋa, kɛ minyɛŋ makwɛ lɛ?”

Yɛ John kɛ mɛi babaoo ni anyɛŋ akane ni tamɔ lɛ lɛ gbɛfaŋ lɛ, Yoruba abɛbua ko muaa shihilɛ lɛ naa akɛ: “Gbalashihilɛ mli botemɔ oya jeee nɔ ni ashwãa yɛ he; niyenii ajara ji naagba lɛ.”

Feemɔ Nɔ ni Hi Fe Fɛɛ yɛ Oshihilɛ lɛ Mli

Kwɛ bɔ ni ewaaa kwraa akɛ wɔɔhao beni wɔshweɔ nɔ ko ni baaa lɛ. Abɛi 13:12 kɛɔ akɛ: “Hiɛnɔkamɔ ni baaa mli mra lɛ, ewoɔ mɔ tsui hela.” Ekolɛ nɛkɛ ji bɔ ni onuɔ he kɛ ooshwe ni obote gbalashihilɛ mli, shi yɛ shika hewɔ lɛ onyɛɛɛ ofee nakai lɛ. Enɛ baanyɛ afee anɔkwale, titri lɛ kɛ ofata mɛi ni bɔfo Paulo tsɔɔ mli akɛ ‘akɔnɔ miihao amɛ’ lɛ ahe.—1 Korintobii 7:9.

Ni ooodamɔ naa lɛ efeŋ mlɛo, shi nibii yɛ ni obaanyɛ ofee ni onyɛ oŋmɛ otsui shi yɛ mli ni ona miishɛɛ po yɛ oshihilɛ lɛ mli. Yesu Kristo, nuu ni boteee gbalashihilɛ mli lɛ, kɛ Biblia shishitoo mla ni baanyɛ aye abua bo ni oye nijiaŋwujee ni jɛɔ gbɛkpamɔi ni atsiɔ atoɔ mli baa lɛ nɔ kunim. Ekɛɛ: “Nɔ̃ hamɔ mli yɛ miishɛɛ fe hemɔ.”—Bɔfoi lɛ Asaji 20:35, NW.

Obaanyɛ ni okɛ enɛ atsu nii kɛtsɔ nibii kpakpai ni ooofee oha oweku lɛ kɛ mɛi krokomɛi ni yɔɔ asafo lɛ mli lɛ nɔ. Ekolɛ obaanyɛ oha ohe ni okɛwoɔ Kristofoi asɔɔmɔ lɛ mli lɛ hu afa. Kɛ okɛ ohe wo nihamɔ ni pɛsɛmkunya bɛ mli lɛ mli kɛmɔ shi lɛ, obaanyɛ ona akɛ ‘odamɔ shi shiŋŋ yɛ otsui mli, ni oyɛ hewalɛ yɛ bo diɛŋtsɛ osuɔmɔ nɔ.’—1 Korintobii 7:37.

Nuu kroko ni boteko gbalashihilɛ mli, bɔfo Paulo, ŋma ŋaawoo ni yeɔ ebuaa nɛɛ: “No hewɔ lɛ, nyɛkwɛa bɔ ni nyɛaafee ni nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛ deka he nii, ejaakɛ gbii nɛɛ gbii fɔji ni.” (Efesobii 5:15, 16) Kristofoi babaoo ni boteko gbalashihilɛ mli ena ‘hejɔɔmɔ kɛha amɛ susumai’ kɛtsɔ amɛbe ni amɛkɛtsu nii ni amɛkɛbɛŋkɛ Yehowa kɛtsɔ sɔlemɔ, Nyɔŋmɔ Wiemɔ lɛ kasemɔ, kɛ Kristofoi akpeei ni akɛ he woɔ mli nɔ lɛ hewɔ. (Mateo 11:28-30) Kɛ ofee enɛ lɛ, obaanyɛ okpee shika-helɛtemɔ mli naagbai lɛ anaa yɛ omanyeyeli mli. Ebaaye ebua bo hu ni ojie mumɔŋ nibii akpo babaoo, ni ebaaha ofee wu loo ŋa kpakpa kɛ yɛ naagbee lɛ obote gbalashihilɛ mli.

Kaaha ohiɛ miikpa nɔ akɛ, Yehowa kwɛɔ mɛi fɛɛ ni sɔmɔɔ lɛ lɛ anɔ. Ele naagbai kɛ haomɔi ni piŋɔ bo lɛ. Wɔ ŋwɛi Tsɛ ni yɔɔ suɔmɔ lɛ hu le nɔ ni hi fe fɛɛ kɛha bo, ni kɛ bo baaya shɔŋŋ, yɛ mumɔŋ kɛ henumɔŋ fɛɛ. Kɛ okɛ e-Wiemɔ lɛ mli shishitoo mlai lɛ tsu nii yɛ tsuishitoo mli yɛ oshihilɛ mli daa gbi lɛ, obaanyɛ ona nɔmimaa akɛ ebaaha ohe ajɔo yɛ ebe ni sa mli, ni ebaaha otsui anyɔ omli kɛ nii ni he hiaa bo ni oshweɔ lɛ, yɛ gbɛ ni baahi aha bo kɛya naanɔ lɛ nɔ. Biblia lɛ maa nɔ mi akɛ: “Mɛi ni nyiɛɔ emuuyeli mli lɛ, ekamaaa amɛ nɔ kpakpa ko nɔ kpakpa ko.”—Lala 84:12.

Ohiɛ Ahi Nibii Kpakpai Anɔ

Ha ahi ojwɛŋmɔ mli hu akɛ, sɛɛnamɔi diɛŋtsɛ yɛ oshija ni mɔ ko ji lɛ mli. Bɔfo Paulo ŋma akɛ: “Mɔ ni ŋɔɔ ebalayoo fro haa gbala lɛ efee jogbaŋŋ, shi mɔ ni kɛ lɛ haaa gbala lɛ, efee jogbaŋŋ fe no.”—1 Korintobii 7:38.

Mɛni hewɔ oshijayeli “fe” gbalashihilɛ lɛ? Paulo tsɔɔ mli: “Mɔ ni ewɛɛɛ yoo lɛ, ehaoɔ ehe yɛ Nuntsɔ lɛ nii ahewɔ, bɔni afee ni esane asa Nuntsɔ lɛ hiɛ; shi mɔ ni ewɛ yoo lɛ, ehaoɔ ehe yɛ je nɛŋ nii ahewɔ, bɔni afee ni esane asa eŋa hiɛ. . . . Mɔ ni egbako lɛ haoɔ ehe yɛ Nuntsɔ lɛ nii ahewɔ, koni efee krɔŋkrɔŋ yɛ gbɔmɔtso kɛ mumɔ fɛɛ gbɛfaŋ; shi mɔ ni egba lɛ haoɔ ehe yɛ je nɛŋ nii ahewɔ, bɔni afee ni esane asa ewu hiɛ.”—1 Korintobii 7:32-34.

Yɛ gbɛ kroko nɔ lɛ, Kristofoi ni ebote gbalashihilɛ mli lɛ susuɔ amɛ hefatalɔi lɛ ahiamɔ nii, suɔmɔnaa nii, kɛ nii ni amɛsumɔɔɔ he. Shi Kristofoi oshijafoi baanyɛ ni amɛkɛ amɛhiɛ ama Yehowa sɔɔmɔ nɔ kɛ nɔjwɛŋmɔ babaoo. Kɛ akɛto mɛi ni ebote gbalashihilɛ mli lɛ ahe lɛ, Kristofoi oshijafoi yɛ hegbɛ ni hi ni aaaha “[amɛ]sɔmɔ Nuntsɔ lɛ, ni nɔ ko nɔ ko akawo [amɛ] ahuntoo” mli.—1 Korintobii 7:35.

Paulo ekɛɛɛ akɛ Kristofonyo oshija lɛ bɛ nibii ni woɔ lɛ ahuntoo loo egbalaa ejwɛŋmɔ. Kɛ shika-helɛtemɔ mli naagbai etsɔ tamɔ jatsu ni ka onɔ lɛ, obaanu he akɛ nibii pii yɛ ni miitao agbala ojwɛŋmɔ kɛjɛ osɔɔmɔ lɛ nɔ. Kɛlɛ, heyeli ni mɔ yɔɔ akɛ eeesɔmɔ Nyɔŋmɔ lɛ da kɛha nuu loo yoo ni boteko gbalashihilɛ mli lɛ, fe bɔ ni eji kɛha mɛi ni ebote gbalashihilɛ mli lɛ.

Yɛ be mli ni ajieɔ oshijayeli yi akɛ gbɛ ni hi jogbaŋŋ lɛ, bɔfo Paulo ekɛɛɛ akɛ ehiii akɛ aaabote gbalashihilɛ mli. Eŋma akɛ: “Shi kɛji owɛ yoo hu jiŋŋ, ofeko esha.” Shi ebɔ kɔkɔ akɛ: “Shi heloo gbɛfaŋ amanehulu mɛnɛɛmɛi [mɛi ni boteɔ gbalashihilɛ mli lɛ] baana.”—1 Korintobii 7:28.

Mɛni ekɛ enɛ tsɔɔ? Gbalashihilɛ kɛ yeyeeye-feemɔi komɛi baa. Yɛ shika-helɛtemɔ bei ni mli wa mli lɛ, nɔ ni baanyɛ afata amanehului nɛɛ ahe ji bɔ ni tsɛ lɛ susuɔ nii ni eeena eha eŋa kɛ ebii lɛ he. Hela hu baanyɛ ekɛ shika kɛ henumɔŋ naagbai aba weku lɛ nɔ.

No hewɔ lɛ, yɛ be mli ni ekolɛ shihilɛ mli ni oyɔɔ lɛ efeŋ nɔ ni osumɔɔ lɛ, obaanyɛ ohi shihilɛ kpakpa mli fe bɔ ni oooji, kɛ obote gbalashihilɛ mli ni gbɛnaa nii ka onɔ akɛ okwɛ bii. Naagbai ni okɛkpeɔ bianɛ lɛ asɛɛ etsɛŋ; abaajie kɛya yɛ Nyɔŋmɔ gbɛjianɔtoo hee lɛ mli—ni ekolɛ ekomɛi asɛɛ etsɛŋ kwraa po.—Okɛto Lala 145:16 he.

Ani Obaanyɛ Olɛɛ Osɔɔmɔ lɛ Mli?

Yɛ be mli ni jeee mɔ fɛɛ mɔ baanyɛ afee nakai lɛ, mɛi komɛi enyɛ amɛbote be-fɛɛ sɔɔmɔ lɛ mli yɛ shika he naagbai lɛ fɛɛ sɛɛ. Chuks ni atsi eta kɛjɛ shishijee lɛ, heɔ woji ni ehɔ̃ɔ koni ekɛkwɛ eweku lɛ. Aaafee be mli ni egbalashihilɛ gbɛjianɔtoo lɛ fite lɛ nɔŋŋ mli ni enine shɛ wolo ni miifɔ lɛ nine ni ebafee tsumaa he nitsulɔ yɛ be kukuoo mli yɛ Buu Mɔɔ Asafo lɛ nitsumɔ he nine lɛ nɔ. Akɛni enyɛmi nukpa lɛ susuɔ shika he hewɔ lɛ, eje enijiaŋ wui akɛ ekaya. Shi, Chuks susu akɛ, Yehowa eye ebua lɛ ni ekɛto ewoji ahɔ̃ɔmɔ nitsumɔ lɛ he gbɛjianɔ, no hewɔ lɛ esa akɛ ekɛ Maŋtsɛyeli lɛ he nibii aye klɛŋklɛŋ gbɛhe ni ekɛ ehiɛ afɔ nyɛmɔ ni Nyɔŋmɔ yɔɔ akɛ eeeha lɛ nɔ ni he hiaa lɛ lɛ nɔ. (Mateo 6:25-34) Agbɛnɛ hu esusu akɛ, ebaahe nyɔji etɛ pɛ.

Chuks kpɛlɛ ninefɔɔ lɛ nɔ, ni ekɛ nitsumɔ lɛ wo enyɛmi nuu lɛ dɛŋ. Afii ekpaa sɛɛ lɛ, Chuks yɛ be-fɛɛ sɔɔmɔ lɛ mli, eji onukpa yɛ Kristofoi asafo lɛ mli, ni éhi eha lɛ yɛ shika gbɛfaŋ akɛ eeebote gbalashihilɛ mli. Ani bɔ ni nibii ba ha yɛ eshihilɛ mli lɛ eha eshwa ehe? Chuks kɛɔ akɛ: “Edɔ mi waa akɛ minyɛɛɛ mabote gbalashihilɛ mli beni mitaoɔ mafee nakai lɛ, shi shihilɛ batsɔ ekpakpa moŋ. Mina miishɛɛ kɛ sɔɔmɔ hegbɛi babaoo ni ekolɛ eji mibote gbalashihilɛ mli ni mina weku kulɛ minaŋ.”

Shweshweeshwe Feemɔ Kɛha Wɔsɛɛ Be

Mɛi pii taoɔ gbalashihilɛ mli shweshweeshwe feemɔ akɛ hebuu nɔ, kɛmiijɛ wɔsɛɛ be mli shika mli naagbai amli yɛ jaramɔ bei amli. Shi fioo ko pɛ maji komɛi ni nyɔmɔ ni amɛhiɛ lɛ etsɔ jatsu kɛha amɛ lɛ kɛhaa mɛi ni edara yɛ afii amli lɛ, loo amɛhaaa amɛ nɔ ko kwraa. No hewɔ lɛ, fɔlɔi kɛ amɛhiɛ fɔɔ amɛ wekui anɔ bei pii, titri lɛ amɛbii, koni amɛye amɛbua amɛ yɛ gbɔlɛ be mli. No hewɔ lɛ anyɛ̃ɔ hii kɛ yei oshijafoi anɔ koni amɛbote gbalashihilɛ mli ni amɛfɔ bii, yɛ be mli ni amɛbɛ jogbaŋŋ yɛ shika gbɛfaŋ.

Shi gbalashihilɛ kɛ bifɔmɔ emaaa shweshweeshwe feemɔ nɔ mi. Je lɛŋ gbekɛbii komɛi sumɔɔɔ ni amɛkwɛɔ amɛ fɔlɔi ni edara yɛ afii amli lɛ, mɛi krokomɛi hu nyɛɛɛ afee nakai, ni mɛi krokomɛi lolo hu gboiɔ shiɔ amɛ fɔlɔi. Kristofoi taoɔ shweshweeshwe feemɔ kɛjɛɔ he kroko titri, amɛhiɛ hiɔ Nyɔŋmɔ shiwoo lɛ nɔ: “Mishiŋo, ni misaa mikwaŋo gbi ko gbi ko.”—Hebribii 13:5.

Akwako mɛi ni egbala gbalashihilɛ sɛɛ koni amɛsɔmɔ Yehowa be-fɛɛ lɛ. Oshijafonyo ji Christiana ni eye afii 32. Esɔmɔ akɛ daa gbɛgbalɔ yɛ Nigeria afii nɛɛhu nɛ. Ekɛɔ akɛ: “Mikɛ mihiɛ fɔɔ Yehowa, ni maa nɔ mi kɛhaa wɔ akɛ eshiŋ etsuji kɔkɔɔkɔ lɛ nɔ. Eshiwoo lɛ ji mihekɛnɔfɔɔ. Yehowa kwɛɔ minɔ yɛ mumɔŋ kɛ heloonaa fɛɛ. Efee Tsɛ ni duroɔ mi nii. Akɛ nɔkwɛmɔ nɔ lɛ, mishi kɛyatsu nii yɛ he ni Odasefoi ahe hiaa waa yɛ. Eyɛ mli akɛ nibii ni he hiaa bɛ jɛmɛ tsɔ moŋ, shi minyɛ mihi shi yɛ mli. Beni asra atridii ha miyakã helatsamɔ he lɛ, nyɛmimɛi ni jɛ mitsutsu asafo lɛ mli lɛ ye amɛbua mi.

“Mimii eshɛ be-fɛɛ sɔɔmɔ lɛ he waa. Mibuɔ lɛ akɛ hegbɛ kpeteŋkpele ni mina akɛ mikɛ jeŋ muu fɛɛ Bɔlɔ lɛ kɛ nyɛmimɛi hii kɛ yei babaoo ni ebɔle jeŋ fɛɛ lɛ aaatsu nii. Minaa obalahii kɛ obalayei bibii pii ni nijiaŋ eje wui ni bɛ hiɛnɔkamɔ yɛ nibii ni yaa nɔ kɛbɔleɔ amɛ lɛ hewɔ. Shi mi lɛ, shishinumɔ yɛ mishihilɛ mli; mikɛ hekɛnɔfɔɔ kwɛɔ wɔsɛɛ be. Mile akɛ Yehowa ni mabɛŋkɛ lɛ kpaakpa lɛ ji naagbai ni wɔkɛkpeɔ ŋmɛnɛ lɛ anaa tsabaa ni hi fe fɛɛ.”

Kɛ ooshwe ni obote gbalashihilɛ mli, shi onyɛɛɛ ofee nakai yɛ shika-helɛtemɔ mli naagbai ahewɔ lɛ, na tsui! Jeee okome pɛ oyɔɔ mli. Mɛi pii yɛ ni miiŋmɛ amɛtsui shi kɛ Yehowa yelikɛbuamɔ yɛ kaai ni tamɔ nakai nɔŋŋ mli. Ha oshihilɛ lɛ afee nɔ ni hi fe fɛɛ kɛtsɔ ohe ni okɛaawo nibii kpakpai ni ooofee oha mɛi krokomɛi lɛ mli, kɛ agbɛnɛ kɛtsɔ omumɔŋ shihilɛ lɛ ni oooha eya hiɛ lɛ nɔ. Tsi obɛŋkɛ Nyɔŋmɔ; ebaaye ebua bo ejaakɛ ejwɛŋɔ ohe diɛŋtsɛ.—1 Petro 5:⁠7.