Mɛni Ji Nɔ ni He Hiaa Kɛha Gbalashihilɛ Ni Yeɔ Omanye?

Ani obaasumɔ ni omu mle owo faa ko mli yɛ be mli ni otsɔko hiɛ okaseko bɔ ni asereɔ ahaa dã? Kwashiafeemɔ ni tamɔ nɛkɛ baanyɛ aye awui—gbele baanyɛ ajɛ mli aba po. Shi bo lɛ, susumɔ mɛi abɔ ni yeɔ amɛhe oyai kɛboteɔ gbalashihilɛ mli yɛ be mli ni bɔ ni amɛaafee amɛtsu gbɛnaa nii ni yɔɔ mli lɛ he nii lɛ he nilee fioo pɛ amɛyɔɔ lɛ he okwɛ.

YESU kɛɛ akɛ: “Nyɛteŋ namɔ ni kɛji eetao mɔɔ ema lɛ ni etaŋ shi, ní ebu naa ekwɛ dã akɛ eyɛ nii bɔ ni aaashɛ naagbee lo?” (Luka 14:28) Nɔ ni ji anɔkwale yɛ mɔɔ ko maa he lɛ nɔŋŋ hu ji anɔkwale yɛ gbalashihilɛ ko tswaa he. Esa akɛ mɛi ni sumɔɔ ni amɛbote gbalashihilɛ mli lɛ abu gbalashihilɛ naa amɛkwɛ jogbaŋŋ koni amɛná nɔmimaa akɛ amɛbaanyɛ amɛtsu hiamɔ nii lɛ ahe nii.

Gbalashihilɛ Mli Pɛimɔ

Hefatalɔ ni aaaná ni akɛ lɛ aná shihilɛ mli miishɛɛ ni akɛ lɛ aye awerɛho lɛ ji jɔɔmɔ lɛɛlɛŋ. Gbalashihilɛ baanyɛ atsĩmɔ gbɛ ni shoofeemɔ loo nijiaŋwujee kɛbaa lɛ. Ebaanyɛ etsu mligbɛ henumɔ ni wɔyɔɔ kɛha suɔmɔ, naanyobɔɔ, kɛ ekomefeemɔ ni yɔɔ gbagbalii lɛ he nii. Yiŋtoo kpakpa hewɔ ni beni Nyɔŋmɔ bɔ Adam lɛ, ekɛɛ akɛ: “Ehiii akɛ gbɔmɔ lɛ kome hiɔ shi; mafee hefatalɔ ko ni sa lɛ maha lɛ.”—1 Mose 2:18; 24:67; 1 Korintobii 7:9.

Hɛɛ, gbalashihilɛ mlibotemɔ baanyɛ atsu naagbai komɛi ahe nii. Shi ejieɔ eheei komɛi hu akpo. Mɛni hewɔ? Ejaakɛ, gbalashihilɛ ji gbɔmɛi enyɔ ni esoro amɛ kwraa ni ekolɛ amɛtamɔ amɛhe shi amɛ́jeee amɛhe kwraa lɛ ni tsáa kɛfeɔ ekome. No hewɔ lɛ, gbalashihilɛ mli bii ni tamɔ amɛhe waa diɛŋtsɛ po lɛ baafee mɛi ni kɛ amɛhe kpãaa gbee yɛ bei komɛi amli. Kristofonyo bɔfo Paulo ŋma akɛ, mɛi ni boteɔ gbalashihilɛ mli lɛ baaná “heloo gbɛfaŋ amanehulu”—aloo taakɛ The New English Bible lɛ tsɔɔ shishi lɛ, “piŋmɔ kɛ awerɛho yɛ nɛkɛ helooŋ gbɔmɔtso nɛɛ mli.”—1 Korintobii 7:28.

Ani Paulo miikpá nɔ fɔŋ gbɛ? Dabi kwraa! No mli lɛ, eewo mɛi ni susuɔ gbalashihilɛ he lɛ hewalɛ kɛkɛ koni amɛfee mɛi ni le bɔ ni shihilɛ lɛ ji ha lɛ jogbaŋŋ. Mlifilimɔ henumɔ ni naa wa waa ni tsɔɔ mɔ ni anyɛɔ abɛŋkɛɔ lɛ waa lɛ jeee susumɔ kpãa ni ja ni tsɔɔ bɔ ni gbalashihilɛ baatamɔ aha yɛ nyɔji kɛ afii ni baanyiɛ yookpeemɔ lɛ sɛɛ lɛ mli. Gbalashihilɛ fɛɛ gbalashihilɛ yɛ lɛ diɛŋtsɛ ekaai kɛ naagbai ni esoro amɛ kwraa. Sane lɛ jeee kɛji amɛbaate shi, shi moŋ bɔ ni aaafee atsu he nii kɛ́ amɛba.

Naagbai haa wu kɛ ŋa hegbɛ ni amɛkɛtsɔɔ bɔ ni suɔmɔ ni amɛyɔɔ kɛhaa amɛteŋ mɔ fɛɛ mɔ lɛ ji anɔkwa ha. Ákɛ nɔkwɛmɔnɔ lɛ: Ekolɛ gbɛfãa lɛlɛ ko baafee nɔ ni yɔɔ nyam be mli ni ema shi efolo, ni afĩ akpɛtɛ nɔ ko yɛ lɛjiadaamɔhe ko lɛ. Shi anyɛɔ aleɔ kɛji ebaanyɛ enyiɛ ŋshɔ hiɛ lɛɛlɛŋ lɛ jogbaŋŋ be mli ni eyaa yɛ ŋshɔ hiɛ—ekolɛ yɛ ŋshɔkei ni ahum tswaa kɛshiɔ lɛ lɛ fɛɛ sɛɛ. Nakai nɔŋŋ bɔ ni gbalashihilɛ mli wekukpaa mli wa ha lɛ efeŋ faŋŋ jogbaŋŋ beni suɔmɔ nifeemɔ ni naagba bɛ mli lɛ yaa nɔ yɛ toiŋjɔlɛ mli lɛ. Bei komɛi lɛ, anaa enɛ yɛ shihilɛi ni kaa mɔ lɛ ashishi beni gbalashihilɛ mli hefatalɔi yeɔ naagbai tamɔ ahum srɔtoi anɔ kunim lɛ.

Kɛ mɛi enyɔ ni ebote gbalashihilɛ mli lɛ baafee nakai lɛ, belɛ hetuu-kɛhamɔ he miihia amɛ, ejaakɛ Nyɔŋmɔ to eyiŋ akɛ nuu ‘aaakpɛtɛ eŋa he’ ni ákɛ mɛi enyɔ lɛ ‘aaatsɔ heloo kome.’ (1 Mose 2:24) Susumɔ ni tsɔɔ hetuu-kɛhamɔ lɛ woɔ mɛi babaoo ahe gbeyei ŋmɛnɛ. Ni kɛlɛ, nilee yɛ mli akɛ mɛi enyɔ ni sumɔɔ amɛhe lɛɛlɛŋ lɛ baasumɔ ni amɛkɛ shiwoo ni hiɛdɔɔ yɔɔ he aha akɛ amɛaafee ekome kɛhi shi. Hetuu-kɛhamɔ haa gbalashihilɛ lɛ feɔ nɔ ni woo yɔɔ he. Ehaa anáa nɔ ni abaadamɔ nɔ aná hekɛnɔfɔɔ akɛ, nɔ fɛɛ nɔ ni baaba lɛ, wu kɛ ŋa baafi amɛteŋ mɔ fɛɛ mɔ sɛɛ.a Kɛ ofeko klalo kɛhako hetuu-kɛhamɔ ni tamɔ nɛkɛ lɛ, belɛ ofeko klalo lɛɛlɛŋ kɛha gbalashihilɛ. (Okɛto Jajelɔ 5:4, 5 he.) Ekolɛ ehe baahia ni mɛi ni ebote gbalashihilɛ mli momo po lɛ aha hiɛsɔɔ ni amɛyɔɔ kɛha bɔ ni hetuu-kɛhamɔ yɔɔ ha kɛha gbalashihilɛ ni yeɔ omanye lɛ aya hiɛ.

Pɛimɔ Omli Okwɛ

Ŋwanejee ko bɛ he akɛ obaanyɛ oŋmala sui ni osumɔɔ ni ona yɛ hefatalɔ ko he oshwie shi. Shi ewa babaoo akɛ ooopɛi omli okwɛ koni ole bɔ ni ooofee oha gbalashihilɛ aye omanye. Ehe miihia ni mɔ diɛŋtsɛ apɛi emli ekwɛ, dani eeekã gbalashihilɛ he kitakamɔi lɛ kɛ beni ekã egbe naa fɛɛ lɛ hu. Ákɛ nɔkwɛmɔnɔ lɛ, bi ohe saji ni nyiɛ sɛɛ nɛɛ.

• Ani miisumɔ ni matuu mihe maha mihefatalɔ lɛ miwala gbii abɔ fɛɛ?—Mateo 19:6.

Yɛ Biblia gbalɔ Maleaki gbii amli lɛ, wumɛi babaoo shi amɛhefatalɔi, ekolɛ koni amɛkɛ oblayei abote gbalashihilɛ mli. Yehowa kɛɛ akɛ, ŋamɛi ni ashwie amɛ lɛ ayaafonui eyi efɔleshãa latɛ lɛ nɔ obɔ, ni no hewɔ lɛ ebu hii ni ‘yeɔ’ amɛhefatalɔi lɛ “kutumpɔo” lɛ fɔ́.—Maleaki 2:13-16.

• Kɛ miisusu gbalashihilɛ mlibotemɔ he lɛ, ani mifoŋ yɛ oblahii kɛ oblayei bibii abeaŋ afii ni ji be mli ni bɔlɛnamɔ mli henumɔi lɛ naa waa waa ni baanyɛ afite yiŋkpɛɛ kpakpa lɛ?—1 Korintobii 7:36.

Nikki, ní bote gbalashihilɛ mli beni eye afii 22 lɛ kɛɛ akɛ: “Eyɛ oshara waa akɛ aaabote gbalashihilɛ mli beni adako kwraa.” Ewo ŋaa akɛ: “Ohenumɔi, otii, kɛ nibii ni osumɔɔ lɛ baaya nɔ atsake kɛjɛ be mli ni eshwɛ afii fioo ni obaaye afii 20 aahu kɛyashi beni oye fe afii 20 kɛmiiya hiɛ fioo lɛ.” Shi, anyɛŋ akɛ afii ni aye lɛ kɛkɛ atsɔɔ klalo ni afee kɛha gbalashihilɛ mlibotemɔ. Fɛɛ sɛɛ lɛ, gbalashihilɛ mli ni aboteɔ beni mɔ lɛ efoko oblahii kɛ oblayei bibii abeaŋ yɛ be mli ni bɔlɛnamɔ mli henumɔi lɛ baa kpaako ni titri lɛ emli bawaa lɛ baanyɛ aye mɔ lɛ susumɔ nɔ, ni ekaha mɔ lɛ yɔse naagbai ni baanyɛ aba lɛ.

• Mɛɛ sui miyɔɔ ni baaye abua koni maná gbalashihilɛ ni yeɔ omanye?—Galatabii 5:22, 23.

Bɔfo Paulo ŋma kɛyaha Kolosebii lɛ akɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.” (Kolosebii 3:12) Nɛkɛ ŋaawoo nɛɛ hi kɛha mɛi ni susuɔ gbalashihilɛ he kɛ mɛi ni ebote gbalashihilɛ mli momo lɛ hu.

• Ani manyɛ majie sɛɛfimɔ kpakpa ni he hiaa hefatalɔ kpo matsɔɔ yɛ shihilɛi ni mli wa mli?—Galatabii 6:2.

Datrɛfonyo ko kɛɛ akɛ: “Kɛ naagbai ba lɛ, henumɔ ni anáa ji koni ashwa hefatalɔ lɛ. Jeee mɔ ni esa akɛ ashwa lɛ ji nɔ ni he hiaa fe fɛɛ. Shi moŋ, no ji bɔ ni wu kɛ ŋa lɛ baanyɛ amɛkɛ ekomefeemɔ aha gbalashihilɛ mli wekukpaa lɛ aya hiɛ.” Nilelɔ Maŋtsɛ Salomo wiemɔi lɛ kɔɔ gbalashihilɛ mli hefatalɔi ahe. Eŋma akɛ: “Mɛi enyɔ hi fe mɔ kome; . . . Ejaakɛ kɛ́ shi amɛgbee lɛ, mɔ kome aaawo enaanyo nɔ; shi mɔ kome too lɛ, kɛ́ egbee shi lɛ, kpoo ha lɛ, ejaakɛ mɔ ni tĩa enyɔ ni aaawo enɔ bɛ!”—Jajelɔ 4:9, 10.

• Ani bei pii lɛ, miyɛ miishɛɛ kɛ hekɛnɔfɔɔ, aloo yɛ bei babaoo mli lɛ mibɛ miishɛɛ ni mihiɛɛɛ jwɛŋmɔ kpakpa?—Abɛi 15:15.

Gbɔmɔ ni ehiɛɛɛ jwɛŋmɔ kpakpa lɛ buɔ gbi fɛɛ gbi akɛ gbi fɔŋ. Gbalashihilɛ tsakeee subaŋ ni tamɔ nɛkɛ yɛ naakpɛɛ gbɛ nɔ! Oshijafo—nuu loo yoo—ni wieɔ shiɔ nii nyanyaanya loo ekpáa nɔ fɔŋ gbɛ lɛ baafee gbalashihilɛ mli hefatalɔ ni wieɔ nii ahe nyanyaanya loo ekpáa nɔ fɔŋ gbɛ kɛkɛ nakai nɔŋŋ. Susumɔ ni ejaaa ni tamɔ nɛkɛ baanyɛ ekɛ nɔnyɛɛ ni naa wa waa aba gbalashihilɛ nɔ.—Okɛto Abɛi 21:9 he.

• Ani mifeɔ kpoo yɛ nɔnyɛɛ shishi, aloo ani miŋmɛɛɔ mihe mihaa mlilawoo nifeemɔi ni anyɛɛɛ aye nɔ?—Galatabii 5:19, 20.

Akɛ famɔ ha Kristofoi koni ‘amɛhumi shi kɛ mlifu.’ (Yakobo 1:19) Dani nuu loo yoo baabote gbalashihilɛ mli kɛ beni ebote gbalashihilɛ mli lɛ sɛɛ lɛ, esa akɛ etsɔɔ akɛ ebaanyɛ ehi shi yɛ ŋaawoo nɛɛ naa: “Nyɛmli afua, shi nyɛkafea esha; hulu akanyɔ shi yɛ nyɛmlila lɛ nɔ.”—Efesobii 4:26.

Mɔ ni Baafee Ohefatalɔ lɛ Mli ni Ooopɛi Okwɛ

Biblia mli abɛbua ko kɛɛ: “Hiɛtɛ̃lɔ leɔ enanenaa kwɛmɔ.” (Abɛi 14:15) Enɛ ji anɔkwale lɛɛlɛŋ be mli ni ahalaa gbalashihilɛ mli hefatalɔ. Gbalashihilɛ mli hefatalɔ halamɔ ji yiŋkpɛi ni he hiaa fe fɛɛ ni nuu loo yoo baafee yɛ eshihilɛ mli lɛ ateŋ ekome. Ni kɛlɛ, nɔ ni ayɔse ji akɛ, gbɔmɛi babaoo kɛ be babaoo kpɛɔ amɛyiŋ yɛ kar ni amɛbaahe loo skul ni amɛbaaya he fe be ni amɛkɛtaoɔ mɔ ni amɛkɛ lɛ baabote gbalashihilɛ mli.

Yɛ Kristofoi asafo lɛ mli lɛ, ‘akaa’ mɛi ni akɛ gbɛnaa nii woɔ amɛdɛŋ lɛ ‘akwɛɔ dã akɛ amɛsa lo.’ (1 Timoteo 3:10) Kɛ oosusu gbalashihilɛ mlibotemɔ he lɛ, obaasumɔ ni okwɛ koni ‘oka sa’ ni mɔ kroko lɛ ‘sa lɛ okwɛ.’ Ákɛ nɔkwɛmɔnɔ lɛ, susumɔ sanebimɔi ni nyiɛ sɛɛ nɛɛ ahe okwɛ. Eyɛ mli akɛ abi saji lɛ yɛ bɔ ni yoo kwɛɔ nii ehaa lɛ naa moŋ, shi shishitoo mlai lɛ babaoo kɔɔ nuu hu he. Ni mɛi ni ebote gbalashihilɛ mli lɛ po baanyɛ asusu saji otii nɛɛ ahe koni ehe aba sɛɛnamɔ kɛha amɛ.

• Mɛɛ gbɛi efee eha ehe?—Filipibii 2:19-22.

Abɛi 31:23 tsɔɔ wu ni ‘ayooɔ lɛ yɛ maŋ lɛ agbói lɛ anaa, kɛ́ ekɛ shikpɔŋ lɛ nɔ onukpai lɛ tara shi lɛ.’ Maŋ lɛŋ hii onukpai lɛ tara maŋ lɛ agbói lɛ anaa koni amɛkojo. No hewɔ lɛ, eka shi faŋŋ akɛ, eyɛ gbɛhe ko ni haa maŋbii lɛ náa hekɛnɔfɔɔ yɛ emli. Bɔ ni mɛi krokomɛi buɔ nuu ko amɛhaa lɛ tsɔɔ nɔ ko yɛ gbɛi ni efee eha ehe lɛ he. Kɛ ehe miihia lɛ, susumɔ bɔ ni mɛi ni yɔɔ ekudɔmɔ shishi lɛ buɔ lɛ amɛhaa hu he okwɛ. Enɛ baanyɛ atsɔɔ bɔ ni bo, ákɛ ehefatalɔ lɛ baabu lɛ oha yɛ be ni baaba lɛ mli.—Okɛto 1 Samuel 25:3, 23-25 he.

• Mɛɛ jeŋbai nɛkɛ eyɔɔ?

Nyɔŋmɔjamɔ he nilee lɛ, “tsutsu lɛ ehe tse.” (Yakobo 3:17) Ani mɔ ni baafee ohefatalɔ lɛ yɛ lɛ diɛŋtsɛ ebɔlɛnamɔ he akɔnɔ ni eeegbe lɛ he miishɛɛ babaoo diɛŋtsɛ fe miishɛɛ ni eyɔɔ yɛ eshidaamɔ kɛ oshidaamɔ yɛ Nyɔŋmɔ hiɛ? Kɛ ebɔɔɔ mɔdɛŋ bianɛ akɛ eeehi shi yɛ Nyɔŋmɔ jeŋba he tɛi ni efolɔ eshwie shi lɛ naa bianɛ lɛ, mɛɛ nɔdaamɔnɔ yɔɔ ni tsɔɔ akɛ abaahe aye akɛ ebaafee nakai beni nyɛbote gbalashihilɛ mli lɛ?—1 Mose 39:7-12.

• Te ekɛ mi yeɔ ehaa tɛŋŋ?—Efesobii 5:28, 29.

Biblia mli wolo ni ji Abɛi lɛ gbaa wu ni ‘etsui kãa’ eŋa ‘nɔ’ lɛ he sane. Kɛfata he lɛ, ‘ekafoɔ lɛ.’ (Abɛi 31:11, 28) Ejeee mɔ ni yeɔ awuŋa babaoo tsɔ bɔ ni esaaa, aloo ni eeefee shɛii yɛ nibii ni etaoɔ koni ená lɛ amli. Yakobo ŋma akɛ nilee ni jɛ ŋwɛi lɛ ‘he jɔ, ehiɛ kã shi, eyi obɔ kɛ mɔbɔnalɛ kɛ yibii kpakpai.’—Yakobo 3:17.

• Te ekɛ lɛ diɛŋtsɛ eweku lɛ mli bii yeɔ ehaa tɛŋŋ?—2 Mose 20:12.

Bulɛ ni anáa ahaa fɔlɔi lɛ jeee nɔ ni ataoɔ yɛ gbekɛbii adɛŋ kɛkɛ. Biblia lɛ kɛɔ akɛ: “Bo otsɛ ni fɔo lɛ toi, ni kaagbe onyɛ he guɔ, kɛ́ egbɔ lɛ.” (Abɛi 23:22) Nɔ ni yɔɔ miishɛɛ ji akɛ, Datrɛfonyo W. Hugh Missildine ŋma akɛ: “Abaanyɛ atsĩ gbalashihilɛ mli naagbai kɛ gbeekpamɔ ni bɛ lɛ babaoo naa—loo kɛ́ hoo lɛ, koni atsɔ hiɛ ayɔse—kɛ́ mɛi ni baatsɔ ayemforo kɛ ayemforowu lɛ ateŋ mɔ kome yasara amɛteŋ mɔ ko trukaa yɛ shia ni ena wekukpaa ni kã ‘mɔ ni ekɛ lɛ baahi shi’ lɛ kɛ efɔlɔi ateŋ lɛ. Bɔ ni ebuɔ efɔlɔi ehaa lɛ baaná hewalɛ yɛ bɔ ni ebuɔ ehefatalɔ lɛ ehaa lɛ nɔ. Esa akɛ mɔ abi akɛ: ‘Ani miisumɔ ni akɛ mi aye taakɛ bɔ ni ekɛ efɔlɔi yeɔ ehaa lɛ?’ Ni bɔ ni efɔlɔi kɛ lɛ yeɔ ehaa lɛ baafee nɔ ko kpakpa ni tsɔɔ bɔ ni ebaafee ehe eha kɛ bɔ ni ebaakpa gbɛ akɛ okɛ lɛ baaye oha—yɛ yookpeemɔ sɛɛ hejɔɔmɔ lɛ sɛɛ.”

• Ani ekɛ mlifu loo jɛmɔ wiemɔ tsuɔ nii?

Biblia lɛ woɔ ŋaa akɛ: “Nyɛhaa mlijoomɔ kɛ mlila kɛ mlifu kɛ bolɔmɔ kɛ musubɔɔ fɛɛ sɛɛ afoa yɛ nyɛteŋ.” (Efesobii 4:31) Paulo bɔ Timoteo kɔkɔ yɛ Kristofoi komɛi ni baafee mɛi ni ‘amɛhe miiye kɛ ŋwanejeei kɛ naataamɔi,’ ní baaŋmɛɛ amɛhe amɛha ‘hiɛkɔ̃ɔ, béi, musubɔɔ wiemɔi, mɛi ahe susumɔi fɔji ni jɛɔ mli lɛ, ni ji yakayaka bolɔmɔi lɛ’ ahe.—1 Timoteo 6:4, 5.

Kɛfata he lɛ, Paulo ŋma akɛ, mɔ ni he saa kɛha hegbɛi krɛdɛɛi yɛ asafo lɛ mli lɛ, ‘esaaa akɛ efeɔ ninekpokpookpotsɛ’—taakɛ shishijee Hela wiemɔ lɛ tsɔɔ lɛ, “ekafee mɔ ni maa mɔ atswɛrɛi.” (1 Timoteo 3:3, NW shishigbɛ niŋmaa) Enyɛŋ efee mɔ ni yiɔ mɛi loo ejɛɔ amɛ. Mɔ ni kɛ yiwalɛ feɔ enii beni mlifu nifeemɔ ko miiya nɔ lɛ jeee gbalashihilɛ mli hefatalɔ ni sa.

• Mɛni ji otii ni ekɛma ehiɛ?

Mɛi komɛi tiuɔ ninámɔi asɛɛ ni amɛkpáa naagbai ni anyɛŋ he nɔ ko afee lɛ kɛjɛɔ mli. (1 Timoteo 6:9, 10) Mɛi krokomɛi kpalaŋɔ yɛ wala shihilɛ mli ni amɛhiɛɛɛ yiŋtoo ko kwraa, ni amɛbɛ otii ni amɛnine aaashɛ nɔ. (Abɛi 6:6-11) Shi gbɔmɔ ni sheɔ Nyɔŋmɔ gbeyei lɛ baajie faishitswaa ni Yoshua jie kpo etsɔɔ lɛ eko nɔŋŋ kpo, mɔ ni kɛɛ: “Mikɛ miwe lɛ, wɔɔsɔmɔ Yehowa!”—Yoshua 24:15.

Nyɔmɔwoi kɛ Gbɛnaa Nii

Gbalashihilɛ ji nɔ ko ni ajɛ ŋwɛi ato shishi. Yehowa Nyɔŋmɔ ji mɔ ni kɛ famɔ ha koni akɛtsu nii, ni lɛ eto shishi. (1 Mose 2:22-24) Lɛ eto gbalashihilɛ he gbɛjianɔ bɔni afee ni eha wekukpaa ni hiɔ shi daa aya nɔ yɛ nuu kɛ yoo teŋ koni amɛnyɛ amɛkɛ ekomefeemɔ aye abua amɛhe. Kɛ wu kɛ ŋa kɛ Biblia mli shishitoo mlai tsu nii lɛ, amɛbaanyɛ amɛkpa gbɛ akɛ nɔ ni amɛtaoɔ yɛ shihilɛ mli lɛ baafee nɔ ni miishɛɛ yɔɔ mli.—Jajelɔ 9:7-9.

Shi esa akɛ ayɔse akɛ, “jaramɔ bei” amli wɔyɔɔ lɛ. Biblia lɛ gba efɔ̃ shi akɛ, yɛ nɛkɛ be nɛɛ mli lɛ, gbɔmɛi baafee “hesuɔlɔi, shikasuɔlɔi, shwãlɔi, hewolɔi, . . . mɛi ni he tseee, mɛi ni edɔɔɔ mɔ he, kpaŋmɔ mlikulɔi, . . . sɛɛgbɛtsɔɔlɔi, yiwalɔi, henɔwólɔi.” (2 Timoteo 3:1-4) Nɛkɛ sui nɛɛ baanyɛ aná hewalɛ ni naa wa waa yɛ mɔ ko gbalashihilɛ nɔ. No hewɔ lɛ, esa akɛ mɛi ni miisusu gbalashihilɛ mlibotemɔ he lɛ asusu he jogbaŋŋ dã. Ni mɛi ni ebote gbalashihilɛ mli amrɔ nɛɛ aya nɔ atsu nii koni amɛkɛha amɛgbalashihilɛ mli ekomefeemɔ lɛ aya hiɛ kɛtsɔ ŋwɛi gbɛtsɔɔmɔ ni yɔɔ Biblia lɛ mli lɛ kasemɔ kɛ ekɛ nitsumɔ nɔ.

Hɛɛ, mɛi ni miisusu gbalashihilɛ he lɛ baafee jogbaŋŋ akɛ amɛaakwɛ nii kɛteke yookpeemɔ gbi lɛ. Ni jeee akɛ, esa akɛ mɔ fɛɛ mɔ asusu nifeemɔ ni tsɔɔ gbalashihilɛ mlibotemɔ lɛ pɛ he kɛkɛ, shi esa akɛ amɛsusu shihilɛ ní tsɔɔ gbalashihilɛ mli ni abote lɛ hu he. Kwɛmɔ Yehowa gbɛ kɛha gbɛtsɔɔmɔ koni osusu shihilɛ ni yɔɔ diɛŋtsɛ lɛ he moŋ fe suɔmɔ nifeemɔi lɛ ahe kɛkɛ ni ooosusu. Kɛ ofee nakai lɛ, ebaanyɛ eba akɛ oooná gbalashihilɛ ni yeɔ omanye mli ŋɔɔmɔ.

[Shishigbɛ niŋmaa]

[Akrabatsa ni yɔɔ baafa 5]

“Suɔmɔ Mlitsɔɔmɔ ni Hi Fe fɛɛ ni Mikane Pɛŋ”

Datrɛfonyo Kevin Leman ŋma akɛ: “Te obaafee tɛŋŋ ole kɛji oná suɔmɔ óha mɔ ko lɛɛlɛŋ? Blema wolo ko yɛ ni suɔmɔ mlitsɔɔmɔ yɔɔ mli. Wolo lɛ eye aaafee afii akpei enyɔ, shi ekã he eji suɔmɔ mlitsɔɔmɔ ni hi fe fɛɛ ni mikane pɛŋ.”

No mli lɛ Datrɛfonyo Leman miiwie Kristfonyo bɔfo Paulo wiemɔi ni yɔɔ Biblia lɛ mli yɛ 1 Korintobii 13:4-8 lɛ he:

“Suɔmɔ toɔ etsui shi, emli hi; suɔmɔ he tsɛɛɛ mɔ; suɔmɔ eshwãaa, efeee pupuupu, efeee nii ni esaaa, epeleee lɛ diɛŋtsɛ enɔ̃, emli wooo la, eniŋŋ efɔŋ he, enyaaa nɔsha he, shi enyaa anɔkwale he; emĩɔ ŋɔɔ yɛ nii fɛɛ mli, eheɔ nii fɛɛ eyeɔ, ehiɛ kãa nii fɛɛ nɔ, etoɔ etsui shi yɛ nii fɛɛ mli. Suɔmɔ sɛɛ efooo gbi ko gbi ko.”

[Akrabatsa ni yɔɔ baafa 8]

Henumɔi Baanyɛ Alaka Mɔ

Eka shi faŋŋ akɛ Shulamit oblayoo ni yɔɔ Biblia bei amli lɛ le bɔ ni suɔmɔ henumɔi ni lakaa mɔ lɛ naa wa waa ha lɛ jogbaŋŋ. Beni Maŋtsɛ Salomo ni he wa lɛ biɔ lɛ suɔmɔ lɛ, ekɛɛ enanemɛi yei lɛ akɛ “nyɛkahosoa ni nyɛkatsĩɛa misuɔmɔ lɛ hiɛ, kɛyashi be ni lɛ diɛŋtsɛ esumɔɔ!” (Salomo Lalai 2:7) Nɛkɛ oblayoo ni le nii nɛɛ sumɔɔɔ ni enanemɛi lɛ nyɛɔ enɔ ni ehenumɔi aye enɔ. Mɛi ni susuɔ gbalashihilɛ he ŋmɛnɛ lɛ hu baanyɛ amɛkɛ enɛ atsu nii. Ye ohenumɔi anɔ waa diɛŋtsɛ. Kɛ ooobote gbalashihilɛ mli lɛ, esa akɛ eba akɛ oná suɔmɔ oha mɔ ko, shi jeee gbalashihilɛ mlibotemɔ he yiŋtoo hewɔ kɛkɛ.

[Mfoniri ni yɔɔ baafa 6]

Mɛi ni etsɛ yɛ gbalashihilɛ mli po baanyɛ aha amɛ gbalashihilɛ mli ekomefeemɔi lɛ amli awa

[Mfoniri ni yɔɔ baafa 7]

Te ekɛ efɔlɔi yeɔ ehaa tɛŋŋ?