Ohenilee Ni Nyɔŋmɔ Kɛha Bo Iɛ He Sɛɛ Ni Oooná

“E-Nyɔŋmɔ Iɛ mla lɛ yɛ etsui mli; enajifamɔi lɛ eko eko shaneŋ.”​—Lala 37:⁠31.

 1, 2. Mɛni hewɔ esa akɛ wɔsusu gbɛtsɔɔmɔ ni wɔhenilee kɛhaa lɛ he jogbaŋŋ lɛ? (Abɛi 12:​15; 14:⁠12)

¹ EYƐ MLI akɛ Nyɔŋmɔ kɛ mlai babaoo ni aŋmala ashwie shi hako Kristofoi moŋ, shi ekɛ mlai komɛi eha wɔ, aloo kitai diɛŋtsɛ, kɛ shishitoo mlai babaoo ni wɔkɛbaatsu nii ni ekɛ wɔhemɔkɛyeli kɛ wɔhenilee akpa gbee. Shi ákɛ mɔ ko yɛ henilee lɛ ji nɔ kome, ni eji nɔ kroko hu akɛ mɔ ko aaana he sɛɛ babaoo. Mɛi pii nuɔ he akɛ ‘kɛji akɛ nɔ ko gbaaa mihenilee naa lɛ, belɛ eja.’ Ani nakai susumɔ lɛ ja?

² TBiblia lɛ tsɔɔ akɛ yɛ wɔheloo ni esha yɔɔ mli lɛ hewɔ lɛ, wɔhenilee baanyɛ alaka wɔ; ebaanyɛ efee nɔ ni egbɔjɔ, nɔ ni alaka lɛ loo awo he muji. Ni wɔbaanyɛ wɔyoo oshara ni yɔɔ jwɛŋmɔ ni ahiɛ akɛ “ha ohenilee afee ogbɛtsɔɔlɔ” lɛ mli lɛ jogbaŋŋ kɛtsɔ mɛi ni hi Kreta yɛ klɛŋklɛŋ afii oha lɛ mli lɛ ni ale amɛ akɛ mɛi ni “maleɔ daa; kooloi fɔ̃ji ni, musutsɛmɛi hejɔlɔi ni” lɛ ahesusumɔ nɔ.​—Tito 1:​10-12.

 3. Mɛɛ hewalɛ henilee na yɛ Kretabii anɔ?

³ Taakɛ eji yɛ gbɔmɛi fɛɛ he lɛ, Kretabii yɛ henileei ni akɛfɔ amɛ. Shi amɛnaaa enɛɛmɛi ahe sɛɛ. Yɛ be mli ni eŋmaa wolo eyaha Tito yɛ Kreta lɛ, bɔfo Paulo kɛɛ: “Mɛi ni he tse lɛ, nii fɛɛ he tse ha amɛ; shi mɛi ni he tseee kɛ mɛi ni heee yeee lɛ, nɔ ko nɔ ko bɛ ni he tse ha amɛ, shi moŋ amɛyitsoŋ kɛ amɛhenilee fɛɛ mli ewo muji.” (Tito 1:​15; Romabii 2:​14, 15) Kretabii pii yɛ henilee ni nuuu nii ahe ni yeee ebuaaa amɛ koni amɛfee nɔ ni sa aloo nɔ ni he tse yɛ jeŋba mli. (1 Timoteo 4:⁠2) ‘Nɔ ko nɔ ko bɛ ni he tse’ ha Kretabii pii. Mɛni hewɔ eyɔɔ nakai? Akɛni amɛhenileei lɛ amli ewo muji hewɔ lɛ, amɛŋɔɔ shihilɛ fɛɛ shihilɛ akɛ hegbɛ ni amɛna koni amɛkɛfee nɔ ni ji efɔŋ. Ekolɛ amɛwie akɛ, ‘Egbaaa mihenilee naa.’ Shi kulɛ esa akɛ egba amɛnaa! Shi kɛlɛ, Kretabii komɛi ni amɛtsɔmɔ amɛhe Yudafoi aloo atsake amɛ ba Yerusalem kɛha Pentekoste yɛ afi 33 Ŋ.B. lɛ yeli. Nilee ni amɛyɔɔ yɛ mumɔŋ lɛ baaye abua amɛ ni amɛkwa amalelɔi, gbɔmɛi fɔji loo musutsɛmɛi ni amɛaaji. Ni mɛi ni kpɛlɛ Yesu nɔ lɛ, aye abua amɛ lolo kɛtsɔ etsɔɔmɔ lɛ nɔ koni amɛná henilee kpakpa ni tsuɔ nii.​—Bɔfoi lɛ Asaji 2:​5, 11; Tito 1:5; 2:​2-5; 3:​3-7.

 4, 5. Mɛni wɔbaanyɛ wɔkase kɛjɛ Paulo sane Iɛ mli ni kɔɔ henilee he?

⁴ Henilee po baanyɛ alaka mɔ ni le Nyɔŋmɔ Wiemɔ lɛ ni sumɔɔ ni efee nɔ ni ja lɛ. Saul loo Paulo le Ŋmalɛi lɛ jogbaŋŋ, ni ekɛ ekãa ja Nyɔŋmɔ taakɛ Mla lɛ tsɔɔ. Shi enyɛɛɛ edi Nyɔŋmɔ suɔmɔnaa nifeemɔ ni yaa nɔ eshwereɔ fiofio lɛ sɛɛ. Beni Mesia lɛ eba, ebashiɛ ni egbo ni gbalɛ aba mli lɛ, Paulo tee nɔ edi Farisifoi anitsɔɔmɔ ni ji Yuda jamɔ lɛ sɛɛ. Ehenilee etsiii lɛ gbɛ kɛjɛɛɛ “asafo lɛ yiwalɔ” kɛ “hegbeyeiwoo kɛ gbee mumɔ [ni emu] eshwie Nuŋtsɔ lɛ kaselɔi lɛ anɔ” lɛ he.​—Filipibii 3:​4-6; Bɔfoi lɛ Asaji 9:​1, 2.

⁵ Nɔkwɛmɔ nii nɛɛ tsɔɔ akɛ wɔhenilee baanyɛ alaka wɔ. Akɛni yiŋtooi babaoo ni Biblia mli mlai pɔtɛɛ komɛi ewieee he tsɔ, shi moŋ eji saji ni kɔɔ henilee he jwere wɔhiɛ hewɔ lɛ, ehe miihia ni wɔle gbɛ ni wɔɔtsɔ nɔ wɔtsɔse wɔhenilee ni wɔna he sɛɛ babaoo. Hei sɔrɔtoi etɛ yɔɔ ni wɔbaasusu nomɛi ahe agbɛnɛ

Mɛni Nyɔŋmɔ Wiemɔ Lɛ Tsɔɔ?

 6, 7. Mɛni ji gbɛ kome ni Nyɔŋmɔ Wiemɔ Iɛ baanyɛ aye abua wɔ yɛ henilee he saji amli?

⁶ Nibii babaoo yɛ Nyɔŋmɔ Wiemɔ ni yeɔ emuu lɛ mli ni baanyɛ aha wɔna Nyɔŋmɔ jwɛŋmɔ loo shishitoo mlai ahe shishinumɔ, ni etsɔse wɔhenilee. Taakɛ wɔle momo lɛ, Yosef bɛ Nyɔŋmɔ mla ko ni aŋma afɔ shi ni teɔ shi woɔ gbalafitemɔ. Shi atsɔse Yosef henilee yɛ gbɛ ni ja nɔ. Ŋwanejee ko bɛ he akɛ esusu anɔkwale ni eji akɛ Nyɔŋmɔ to yiŋ ni wu kɛ ŋa (“mɛi enyɔ lɛ” afee heloo kome, ni mɔ ni ji etɛ ko ni baafite gbala lɛ kɛ ehe woŋ mli lɛ he. Ni eka shi faŋŋ akɛ Yosef le Nyɔŋmɔ shieŋtsɛ, Abraham niiashikpamɔ lɛ ni tsɔɔ nɔ ni ji Nyɔŋmɔ shidaamɔ yɛ gbalafitemɔ he lɛ.​—Mateo 19:5; 1 Mose 2:​24; 20:​1-18.

⁷ Wɔ hu wɔbaanyɛ wɔna he sɛɛ nakai nɔŋŋ. Akɛ nɔkwɛmɔ nɔ lɛ, wɔkɛ yiŋtoo ko baakpe ni kɔɔ kpɛlɛmɔ ni wɔɔkpɛlɛ ninefɔɔ ko nɔ akɛ wɔkɛ mɔ ko ni jɛ maŋ kroko nɔ, weku loo shihilɛ kroko mli abaye nii aloo wɔkɛ lɛ abatsu nii. Enɛ ji yiŋ ni mɔ diɛŋtsɛ baato aha ehe. Kɛji akɛ wɔle nɔ ni ji Nyɔŋmɔ su ni kɔɔ mɛi ahiɛaŋkwɛmɔ ni ebɛ kɛ jalɛsane ni eyeɔ lɛ kɛjɛ Biblia lɛ mli lɛ, no lɛ wɔhenilee ni atsɔse lɛ Iɛ baate shi awo mɛi ahe jwɛŋmɔ fɔŋ ni ebɔle wɔhe kɛkpe yɛ be mli ni wɔdaraa lɛ. Wɔbaatsu he nii bɔ ni sa. (Bɔfoi lɛ Asaji 10:​34, 35; Yakobo 2:​1-4) No hewɔ lɛ Biblia mli shishitoo mlai baanyɛ aye abua wɔ.

 8. Mɛni esa akɛ wɔfee beni yiŋtoo ko ni kɔɔ henilee he ka wɔhiɛ lɛ?

⁸ Kɛji akɛ ehe miihia ni wɔto wɔyiŋ yɛ sane ko he bɔni afee ni “wɔna henilee kpakpa” lɛ, esa akɛ wɔtao nɔ ni Yehowa kɛɔ ni kɔɔ sane lɛ he, ejaakɛ no baanyɛ ana wɔhenilee kɛ wɔyiŋtoo nɔ hewalɛ, ni esa akɛ ebalɛ nakai. (1 Petro 3:16) Kɛfata mlai diɛŋtsɛ ni wɔɔtao lɛ he lɛ, esa akɛ wɔsumɔ akɛ wɔɔle kɛji akɛ Biblia mli shishitoo mlai komɛi yɛ ni kɔɔ he lo. Ani Yesu fee loo ekɛɛ nɔ ko ni tsɔɔ ejwɛŋmɔ yɛ yiŋtoo nɛɛ he? Wɔbaanyɛ wɔtao woji ni akɛkaseɔ Biblia lɛ ni wieɔ nɛkɛ sane nɛɛ he lɛ mli. Ni wɔbaanyɛ wɔkɛ wɔnanemɛi Kristofoi ni baanyɛ aye abua wɔ ni wɔna Biblia mli shishitoo mlai ni kɔɔ enɛ he lɛ agba sane. Shi esaaa akɛ afeɔ enɛ kɛ yiŋtoo akɛ amɛmiihe wɔgbɛnaa nii lɛ amɛtere, ni asaŋ esaaa akɛ wɔbiɔ akɛ, ‘Kɛji bo ni lɛ, kulɛ mɛni obaafee?’​—Galatabii 6:⁠5.

 9. Mɛni ji oti ni ma wɔhiɛ yɛ be mli ni wɔtoɔ wɔyiŋ yɛ henilee he saji ahe lɛ?

⁹ Kɛ eba shihilɛi ni mɔ diɛŋtsɛ baato eyiŋ eha ehe lɛ he lɛ, esa akɛ anɔkwale Kristofoi anyiɛ gbɛ ni aaaha amɛfee mɛi ni yɔɔ henilee ni mli tse ni naagba ko bɛ mli yɛ Nyɔŋmɔ hiɛ lɛ nɔ. Esa akɛ amɛshwe ni amɛnyɛ amɛkɛɛ akɛ: “Wɔhenilee yeɔ odase . . . akɛ Nyɔŋmɔ krɔŋŋfeemɔ kɛ hetsemɔ mli wɔba wɔjeŋ yɛ je nɛŋ, titri lɛ yɛ nyɛteŋ.” (2 Korintobii 1:​12, NW) Bɔ ni Kristofonyo lɛ sumɔɔ Yehowa kɛ eshishitoo mlai lɛ babaoo ehaa lɛ baanyɛ aje kpo yɛ bɔ ni etoɔ eyiŋ ehaa yɛ sanebimɔi ni kɔɔ henilee he lɛ mli.

Te Ebaasa Mɛi Krokomɛi Ahe Eha Tɛŋŋ?

10, 11. Sane ko ni kɔɔ niyenii he ni ba yɛ blema Korinto lɛ feɔ mɛɛ saji krokomɛi ni kɔɔ henilee he ekoŋŋ lɛ he mfoniri?

¹⁰ Akɛni Kristofoi miisumɔ ni amɛhenilee lɛ akanya amɛ ni amɛkase Nyɔŋmɔ hewɔ lɛ, esa akɛ mɛi krokomɛi ahe susumɔ yɛ suɔmɔ mli ana hewalɛ waa yɛ amɛyiŋ ni amɛtoɔ ni kɔɔ henilee he lɛ mli. Sane nɛɛ je kpo yɛ be mli ni Paulo ŋma yɛ saji babaoo ni kɔɔ niyenii ahe lɛ he.

¹¹ Sane ko te shi yɛ Korinto asafo lɛ mli ni kɔɔ loo ni akɛsha afɔle aha amagai ahe. Ebaafee wɔŋjamɔ nifeemɔ aha Kristofonyo akɛ eeeye loo ni akɛshaa afɔle yɛ wɔji agbijurɔyeli be mli. Shi Paulo tsɔɔ mli akɛ ejeee esha akɛ aaaye loo ni eshwɛ ni ahɔ̃ɔ yɛ niyelihei komɛi aloo yɛ loo jaanɔ ni kɛ wɔji asɔlemɔtsui komɛi yeɔ jara lɛ. (1 Korintobii 8:​10; 10:​25; Bɔfoi lɛ Asaji 15:29) Shi kɛ̃lɛ, Kristofoi komɛi ni amɛja wɔji loo amagai yɛ tsutsu lɛ nuɔ nii ahe waa (amɛyɛ henilee ni he waaa) yɛ loo ni tamɔ nɛkɛ ni aaaye yɛ be mli ni ahɔ̃ɔ yɛ jaanɔ ni ekɔɔɔ wɔŋjamɔ nifeemɔi ahe po lɛ. Yɛ be mli ni emaaa henilee ni he waaa nɔ mi lɛ, Paulo wo mɛi krokomɛi ahewalɛ ni amɛsusu nɛkɛ nyɛmimɛi nɛɛ ahe. Ebaafee nɔ ni suɔmɔ bɛ mli akɛ aaafee nii ni baatɔtɔ mɛnɛɛmɛi anane aloo nɔ ni baaha amɛnu he akɛ amɛyɛ hegbɛ ni amɛkɛ amɛhe woɔ wɔŋjamɔ mli ekoŋŋ lɛ.

12, 13. Mɛni hewɔ esa akɛ asusu mɛi krokomɛi ajwɛŋmɔ kɛ amɛhenileei ahe lɛ? Feemɔ he nɔkwɛmɔ nɔ.

¹² Paulo jie su ni he hiaa wɔ fɛɛ lɛ kpo: “Kɛji ŋmaa [aloo nɔ kroko] aaaha minyɛmi nane atɔtɔ lɛ, no lɛ miyeŋ loo gbi ko gbi ko dɔŋŋ.” Kɛ eba sane ni kɔɔ wɔhenilee he, ni yɛ enɛ hewɔ lɛ wɔyɛ heyeli yɛ nifeemɔ mli, ni wɔku wɔhiɛ wɔshwie mɛi krokomɛi ahenilee nɔ, ni wɔkɛ nakai feemɔ ‘kpata wɔnyɛmimɛi ni Kristo gbo ha amɛ lɛ ahiɛ lɛ,’ belɛ wɔbaanyɛ wɔlaaje shidaamɔ kpakpa ni wɔyɔɔ yɛ Nyɔŋmɔ hiɛ lɛ. Paulo bi akɛ: “Mɛni hewɔ mɔ kroko henilee aaakojo miheyeli lɛ?” (1 Korintobii 8:​3, 11-13; 10:​29, NW) Kɛ mɔ ko nuɔ he akɛ eji ‘mɔ diɛŋtsɛ sane ni kɔɔ mɔ lɛ henilee he,’ ni yɛ enɛ hewɔ lɛ ekɛye mɛi krokomɛi awui lɛ, Yehowa dɛŋ fɔbuu kojomɔ baanyɛ aba enɔ. Enɛ tsɔɔ bɔ ni susumɔ ni aaana akɛ ‘kɛ eji nɔ ni kɔɔ mihenilee he lɛ no lɛ eja lɛ’ ji nɔ ni lakaa mɔ lɛ.

¹³ Susumɔ wu kɛ ŋa ko ni miikase Biblia lɛ, amɛmiiba kpeei ni amɛmiibɛŋkɛ baptisimɔ lɛ niiashikpamɔ lɛ he. Onukpa ko ni yɔɔ asafo lɛ mli kɛɛ nuu lɛ akɛ enya sini ko ni ajie lɛ he waa. Nuu lɛ to he eha lɛ akɛ, ‘Ei! Ani oyaa oyakwɛɔ sinii ni akɛ “R” ekadi amɛ lɛ?’a Onukpa lɛ bɔ mɔdɛŋ ni ejie enaa kɛ sane naatsɔɔmɔ akɛ nɛkɛ mfonirii nɛɛ ekomɛi (ni jeŋ bii po buɔ lɛ akɛ esaaa lɛ) he yɛ sɛɛnamɔ kɛ aku hiɛ ashwie nibii ni esaaa ni yɔɔ mli lɛ anɔ lɛ. Shi etamɔ nɔ ni enɛ eye nuu lɛ awui. Kɛjɛ no sɛɛ lɛ, enɔyaa yɛ anɔkwale lɛ mli lɛ ba shi fe eŋa lɛ. Eji onukpa lɛ susu ŋmalɛi tamɔ Kolosebii 3:​2-8, Efesobii 5:​3-5 kɛ Mateo 7:12 he kulɛ, ŋmalɛi nɛɛ baana ehenilee kɛ ejeŋba nɔ hewalɛ.​—1 Korintobii 9:​22, 25-27.

14, 15. Onukpai akuu lɛ ahenilee baanyɛ ana mɛi ateemɔŋ saji anɔ hewalɛ yɛ mɛɛ gbɛ nɔ?

¹⁴ Mɛi krokomɛi ahe susumɔ lɛ hu kɔɔ bi ni obiŋ amɛ ni amɛkpɛlɛ nɔ ko ni teɔ shi woɔ amɛhenilee nɔ. Akɛ nɔkwɛmɔ nɔ lɛ, asafoŋ onukpai lɛ ji mɛi ni ŋmɛɔ gbɛ ni akpeeɔ yei yɛ Maŋtsɛyeli Asa Iɛ nɔ, bɔ ni esa akɛ afee enɛɛmɛi aha, bɔ ni abaasaa Asa lɛ nɔ aha kɛ ekrokomɛi.b Onukpai lɛ ŋma kɛjɛ asafo ko mli akɛ: “Yɛ yookpeemɔ nɛɛ ekome shishi lɛ, obalayei bibii ni nyiɛ ayemforo lɛ sɛɛ lɛ to sɛrɛnɛɛ kɛnyiɛ ablanaa lɛ nɔ ni amɛteŋ mɔ fɛɛ mɔ kɛ papa miihuu ehe. Ehe bahia ni yookpeemɔ ni nyiɛ sɛɛ ba lɛ afee nɔ ko ni fe klɛŋklɛŋ nɔ nɛɛ, no hewɔ lɛ obalayei bibii ni nyiɛ ayemforo lɛ sɛɛ lɛ nyiɛ ablanaa lɛ nɔ ni amɛmiitsɔmɔ akataŋwiai. Esa akɛ nɔ ni nyiɛ sɛɛ ba lɛ hu afee agbo ni hi fe enyɔ ni tsɔ hiɛ lɛ; amɛmiitao obalayei bibii nyɔŋmai enyɔ kɛ obalahii bibii nyɔŋmai enyɔ ni baanyiɛ ayem foro lɛ sɛɛ. Akɛ Asa lɛ miije shishi afee shwɛmɔ he ko agbɛnɛ.”

¹⁵ Ani ‘henilee he sane’ ni esa akɛ mɔ ko ato eyiŋ aha lɛ diɛŋtsɛ ehe yɛ he nɛ? Dabi. Kɛji akɛ nuu kɛ yoo ni amɛwo shi akɛ amɛbaabote gbalashihilɛ mli lɛ ahenilee baaŋmɛ amɛ gbɛ ni amɛfee nɔ ko ni tekeɔ nɔ nɛkɛ aloo nɔ ko ni woɔ mɔ mlila nɛkɛ po lɛ, anyɛŋ aku hiɛ ashwie onukpai akuu muu lɛ fɛɛ ahenilee nɔ. Yɛ be mli ni amɛsumɔŋ akɛ amɛtsɔɔ nɔ ni amɛ diɛŋtsɛ amɛsumɔɔ lɛ, kɛ̃lɛ, amɛsusuɔ asafo muu lɛ fɛɛ toiŋjɔlɛ, gbeekpamɔ kɛ mumɔŋ shihilɛ he. Ni esa akɛ amɛkɛ amɛhenilee aye abua gbɔmɛi ni amɛle ‘bɔ ni esa akɛ amɛbaa amɛjeŋ yɛ Nyɔŋmɔ we, ni ji anɔkwale lɛ akulashiŋ lɛ.”​—1 Timoteo 3:​15; 1 Korintobii 10:⁠31.

16. Kɛ oto oyiŋ akɛ sane ko yɛ ni kɔɔ bo diɛŋtsɛ pɛ ohenilee he lɛ, mɛni esa akɛ osusu he?

¹⁶ No hewɔ lɛ kɛ eba akɛ esa akɛ wɔto wɔyiŋ yɛ ‘sane ni kɔɔ henilee he’ lɛ, ehe baahia ni wɔsusu, (1) nɔ ni Nyɔŋmɔ Wiemɔ lɛ kɛɔ yɛ sane lɛ he lɛ he, kɛ (2) bɔ ni wɔyiŋtoo lɛ baana mɛi krokomɛi anɔ hewalɛ aha aloo bɔ ni ekɔɔ amɛhe ehaa lɛ he. Shi efã ni ji etɛ ni he hiaa yɛ.

Te Eeesa Wɔ Diɛŋtsɛ Wɔhe Eha Tɛŋŋ?

17. Henilee na nyɛminuu ko nɔ hewalɛ yɛ New York Maŋtiase lɛ mli yɛ mɛɛ gbɛ nɔ?

¹⁷ Aŋma sane ko ni kɔɔ New York Maŋtiase lɛ mli nitsulɔi ni taraa baesekre nɔ amɛkɛ woji kɛ majemɔ nibii ni he hiaa yaa nitsumɔ hei kɛbɔleɔ maŋtiase lɛ mli lɛ ahe sane yɛ wolo tɛtrɛɛ ni atsɛɔ lɛ Natural History ni aŋma yɛ August 1981 lɛ mli.’Wɔkaneɔ hii ni kɛ amɛhe ewo ‘nɛkɛ nitsumɔ nɛɛ mli lɛ ateŋ mɔ kome he sane akɛ: “Donald ji tsulɔ ni eye afii 41, ni enyɛɔ ekɛ shika ni enaa lɛ kwɛɔ eŋa kɛ ebinuu ni eye afii 15. Tsutsu lɛ, kulɛ Donald tsuɔ mfonirii ni ashaa akɛjieɔ sini he nii, shi ekpa enitsumɔ nɛɛ ejaakɛ ákɛ Yehowa Odasefoi Iɛ ateŋ mɔ kome lɛ, enyɛŋ ekpɛlɛ nii ni etsuɔ akɛ mɔ ni feɔ ajwamaŋbɔɔ he mfoniri Iɛ nɔ. Ákɛ tsulɔ agbɛnɛ lɛ, jeee akɛ enuɔ he akɛ ehenilee mli tse keŋkeŋ kɛkɛ, shi moŋ ebaanyɛ eshi enitsumɔ lɛ bɔ ni esumɔɔ ni etuu be pii ewo sanekpakpa jajemɔ nitsumɔ lɛ mli.”

18. (a) Te fee tɛŋŋ ni nyɛminuu nɛɛ nyɛ eto eyiŋ yɛ nɛkɛ gbɛ nɔ? (b) Mɛni wɔbaanyɛ wɔkase kɛjɛ enɛ mli?

¹⁸ Nibii pii yɛ ni kɔɔ yiŋ ni atoɔ yɛ nitsumɔ he lɛ he (kwɛmɔ nɔ ni afo he akrabatsa yɛ baafa 18 Iɛ) . Taakɛ Donald sane Iɛ ji lɛ, Kristofonyo ko baanyɛ atsu nii yɛ he ko ni nɔ ni amɛtsuɔ ji mfonirii afeemɔ​—amɛshaa aŋkroaŋkroi, nɔ ni akɛfeɔ sini ni ajieɔ yɛ shiai, nɔ ni akɛtswaa nitsumɔi loo nibii sɔrɔtoi ahe adafi, sinii sɔrɔtoi ni akɛyeɔ jara. Fiofio lɛ, ejeɔ shishi efeɔ ajwamaŋbɔɔ he mfonirii. Be ko baashɛ ni Kristofonyo lɛ henilee baaje shishi agba enaa. Ebaana akɛ aanyɛ enɔ ni ekɛ ehe awo ajwamaŋbɔɔ he mfonirii aloo nitsumɔi komɛi ni mla eŋmɛɛɛ gbɛ lɛ amli. Ekolɛ akɛni etsuɔ nii ehaa nitsumɔ ko ni feɔ ajwamaŋbɔɔ he mfonirii aloo yɛ nɔ ni abiɔ ni etsu hewɔ lɛ, ebaanu he akɛ esa akɛ eshi nitsumɔ lɛ bɔni afee ni efee “mɔ ni anaŋ ehe sane ko ata,” akɛni enɛ ji nii krɛdɛɛ ni mɛi ni yɔɔ gbɛnaa nii ko aloo amɛtaoɔ nɔ ko amɛtsu yɛ asafo lɛ mli lɛ susuɔ he titri hewɔ. Yɛ be mli ni etaoɔ nitsumɔ kroko lɛ, ebaanyɛ ekɛ ehiɛ afɔ Yehowa jɔɔmɔ nɔ yɛ hekɛnɔfɔɔ mli. (1 Timoteo 3:​2, 8-10; Romabii 13:⁠5) Ŋwanejee ko bɛ he akɛ Kristofoi pii yɛ ni amɛshi nitsumɔi ni tamɔ nɛkɛ moŋ fe ni amɛaafee mɛi ni he tseee yɛ nitsumɔi nɛɛ ahewɔ. (Okɛto Mateo 5:28 he.) No hewɔ lɛ, kɛji akɛ wɔkɛ yiŋtoo ko ni kɔɔ henilee he kpe lɛ, esa akɛ wɔbi akɛ: ‘Kɛji akɛ mifee enɛ aloo mikpoo enɛ feemɔ lɛ, te ebaasa mihe eha tɛŋŋ?’ Esaaa akɛ wɔkuɔ wɔhiɛ wɔshwieɔ wɔhenilee nɔ yɛ gbɛ ko gbɛ ko kwraa nɔ, ni wɔshãa he koni efee nɔ ni nuuu nii ahe, ni no aha efee mlɛo aha lɛ akɛ eeefee nɔ ni ehiii yɛ wɔsɛɛ be mli.​—1 Timoteo 4:2; Yuda 10; Efesobii 4:​18, 19.

19, 20. (a) Mɛɛ gbɛ nɔ henilee kɛ hemɔkɛyeli fɛɛ baanyɛ ana hewalɛ yɛ wɔsɔɔmɔ nitsumɔ Iɛ nɔ? (b) Kɛ wɔji niiatsɛmɛi jio, jeee nakai wɔji jio, mɛni esa akɛ efee nɔ ni wɔshweɔ?

¹⁹ Kɛ wɔsusu henilee mli ni Donald jɛ ekɛto eyiŋ lɛ he lɛ, esa akɛ wɔkadi akɛ, kɛfata shidaamɔ kpakpa ni etaoɔ yɛ Yehowa hiɛ lɛ he lɛ eesumɔ ni ejaje ehemɔkɛyeli lɛ etsɔɔ babaoo. Enɛ kɛ bɔ ni Paulo kɛ henilee kɛ hemɔkɛyeli tsa ha lɛ kpaa gbee: “Shi kita lɛ naagbee ji suɔmɔ ni jɛ tsui ni mli tse kɛ henilee kpakpa kɛ hemɔkɛyeli ni apasa ko bɛ mli lɛ mli.”​—1 Timoteo 1:⁠5.

²⁰ Kɛ mɔ ko hemɔkɛyeli kɛ suɔmɔ ni eyɔɔ akɛ ena henilee kpakpa lɛ tsirɛ lɛ ni efee tsakemɔ yɛ eshihilɛ mli bɔni afee ni “enajifamɔi lɛ eko eko akashane” koni enyɛ etuu be babaoo ewo “Nyɔŋmɔ yiŋtoo muu lɛ fɛɛ” gbɛɛ kɛ shwãmɔ mli lɛ, enɛ sa yijiemɔ. (Bɔfoi lɛ Asaji 20:​26, 27) Shi kɛ̃lɛ, te esa akɛ wɔsusu mɛi krokomɛi ni amɛshihilɛ tamɔ nɔ ni amɛbaanyɛ amɛkɛ be pii awo shiɛmɔ nitsumɔ lɛ mli shi amɛfeee nakai lɛ ahe wɔha tɛŋŋ? Ekolɛ amɛnaa shika pii kɛjɛɔ amɛnitsumɔi amli, ni etamɔ nɔ ni amɛyɛ shika ni fa ni no baaha amɛnyɛ amɛhi shi yɛ hejɔlɛ mli yɛ gbɛjianɔtoo nɛɛ mli. Shi kɛ̃lɛ, ni amɛaanya yɛ kaselɔi afeemɔ nitsumɔ ni ji be fɛɛ sɔɔmɔ akɛ gbɛgbalɔi lɛ mli lɛ, amɛyaa nɔ amɛtsuɔ nii ni amɛlɛɛɔ amɛnitsumɔi, shiai kɛ miishɛɛc ni amɛnaa lɛ amli. (Okɛto Marko 10:​17-22; Luka 12:​16-21 he.) Jeee wɔ wɔyɔɔ hegbɛ akɛ wɔkojoɔ mɛi krokomɛi yɛ enɛ mli, ejaakɛ “mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ.” Shi moŋ, nyɛhaa wɔhemɔkɛyeli lɛ atsirɛa wɔ ni wɔsɔmɔ Nyɔŋmɔ kɛgbe naa kwraa ni osatofeemɔ bɛ mli bɔni afee ni wɔna henilee ni mli tse mli ŋɔɔmɔ.​—Romabii 14:​1-4; 10:⁠12.

Henilee Kpakpa Tsɔɔ Lɛ Gbɛ

21. Wɔhenilee lɛ baanyɛ ana wɔnɔ hewalɛ yɛ gbɛ kpakpa nɔ yɛ mɛɛ gbɛ nɔ?

²¹ Kristofoi ahenilee ni atsɔse lɛ jogbaŋŋ ni nuɔ nii ahe baakudɔ wɔ ni wɔfee nɔ ni hi. Efee nakai yɛ Paulo gbɛfaŋ. Bɔ ni esumɔɔ ‘enyɛmimɛi,’ enanemɛi Yudafoi lɛ jogbaŋŋ ha hewɔ lɛ, eŋma akɛ: “Mihenilee hu yeɔ mi odase yɛ mumɔ krɔŋkrɔŋ lɛ mli, akɛ miiye ŋkɔmɔ babaoo ni mitsui yeɔ daa.” (Romabii 9:​1-3) Hɛɛ, efee bɔ fɛɛ bɔ ni eeenyɛ koni ekɛ Kristojamɔ he sanekpakpa lɛ aha amɛ.

22. Mɛni hewɔ henilee baanyɛ akanya wɔ kɛteke he ni kitai baanyɛ afee kɛyashɛ po?

²² Nakai esa akɛ eba yɛ wɔgbɛfaŋ. Kɛ wɔhiɛ sɔɔ bɔ ni henilee ni Nyɔŋmɔ kɛha wɔ lɛ jara wa ha lɛ, ebaŋlɛ akɛ wɔbaasusu kitai ahe pɛ. Kitai kɛ taomɔ nii bibii loo otii komɛi baamamɔ shi. Shi henilee ni suɔmɔ kɛ hemɔkɛyeli kanyaa lɛ lɛ baabi nibii babaoo kɛjɛ wɔdɛŋ, ni ebaatsirɛ wɔ ni wɔsha afɔlei wuji yɛ gbɛ ni pɛsɛmkunya bɛ mli nɔ. Wɔhenilee lɛ he baaba sɛɛnamɔ aha wɔ yɛ nɛkɛ gbɛ nɔ. Ebaagbala wɔ kɛjɛ nibii ni haŋ wɔna Nyɔŋmɔ hiɛ duromɔ lɛ he, ni ebaaye ebua wɔ ni wɔfee nibii ni ekpɛlɛɔ nɔ. Titri lɛ nakai eji akɛni wɔhenilee lɛ baakudɔ wɔ ni wɔna sanekpakpa lɛ jajemɔ mli gbɛfaŋnɔ babaoo hewɔ. Mɛɛ sɛɛnamɔ babaoo yɔɔ ni fe nɔ ni Paulo tsi ta etsɔɔ Timoteo lɛ? Ekɛɛ akɛ: “Ohiɛ ahi ohe nɔ kɛ tsɔɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.”​—1 Timoteo 4:​16.

[Shishigbɛ niŋmai]

Gbɛgbalɔi pii ahe baaba sɛɛnamɔ aha asafo lɛ. Shi mɛi pii ni yɔɔ wiemɔ lɛ he miishɛɛ ni mumɔŋ hɔmɔ miiye amɛ lɛ yɛ hei ni mɛi fioo ko pɛ baanyɛ aya jɛmɔ akɛni nitsumɔ bɛ jɛmɛ lɛ hewɔ. Shi mɛɛ jɔɔmɔ ji enɛ, kɛ Kristofoi ni amɛyɔɔ jogbaŋŋ yɛ shika gbɛfaŋ lɛ aaanyɛ ahere nɛkɛ tsɛmɔ nɛɛ nɔ ni amɛyaye amɛbua lɛ!​—Bɔfoi lɛ Asaji 16:​9, 10.

Ani Obaanyɛ Okai?

□ Mɛni hewɔ oshara yɔɔ henumɔ ni anaa akɛ ‘kɛ nɔ ko gbaaa mihenilee naa lɛ belɛ ehi’ lɛ mli lɛ?

□ Kɛ okɛ sanebimɔ ko ni kɔɔ ohenilee he kpe lɛ, mɛɛ nibii sɔrɔtoi etɛ esa akɛ okɛ hiɛdɔɔ asusu he?

□ Esa akɛ ohenilee ana Nyɔŋmɔ ni ooojie eyi yɛ faŋŋ mli Iɛ nɔ hewalɛ yɛ mɛɛ gbɛ nɔ?

[Akrabatsa ni yɔɔ baafa 18]

Nibii Ni Esa Akɛ Asusu He Yɛ Nitsumɔ Mli

Kɛ Kristofonyo baato eyiŋ yɛ nitsumɔ ko he lɛ, esa akɛ klɛŋklɛŋ lɛ esusu nɔ ni ebaatsu diɛŋtsɛ lɛ he. Ebaanyɛ esusu saji otii enyɔ nɛɛ ahe:

Ani Biblia lɛ wieɔ eshiɔ nakai nitsumɔ lɛ? Biblia lɛ wieɔ eshiɔ nibii tamɔ juu, wɔŋjamɔ kɛ lá ni akɛtsuɔ nii yɛ gbɛ ni ejaaa nɔ, no hewɔ lɛ Kristofonyo nyɛŋ ekɛ ehe awo nitsumɔ ni tsuɔ enɛɛmɛi ahe nii lɛ mli.

Ani nɔ ni ebaatsu lɛ baaha ekɛ ehe abɔ nifeemɔ ko ni abu no fɔ ni baaha efee mɔ ni fata he kɛfeɔ nakai nii lɛ?

Agbonaakwɛlɔ loo gbɔiaherelɔ ni tsuɔ nii yɛ he ni abuaa lá naa yɛ aloo nitsumɔ he ko ni feɔ tawuu nii lɛ fata nitsumɔ ni teɔ shi woɔ Nyɔŋmɔ Wiemɔ lɛ he lɛ he diɛŋtsɛ.​—3 Mose 17:​13, 14; Yesaia 2:​2-4.

Yɛ nɔ ni mɔ lɛ tsuɔ diɛŋtsɛ sɛɛ lɛ, nibii krokomɛi yɛ ni baanyɛ asa nɔ ni asusuɔ he lɛ fɛɛ he:

Ani nitsumɔ lɛ ji nii ni atsuɔ akɛyeɔ abuaa adesa ni ejeee nɔ ni ejaaa yɛ Biblia lɛ gbɛfaŋ?

Ekolɛ nɔ ni mɔ ni jaa majemɔ woji lɛ tsuɔ ji ni eja enɛɛmɛi yɛ shiai kɛ nitsumɔ hei. Ani abaabu Kristofonyo lɛ fɔ kɛji akɛ hei ni ekɛ majemɔ woji nɛɛ yaa lɛ ji julɔi ashiai aloo nitsumɔ hei ni feɔ amagai?​—Mateo 5:⁠45.

Mɛɛ hewalɛ mɔ ko yɔɔ yɛ nɔ ni atsuɔ lɛ nɔ?

Kristofonyo ni yɔɔ shwapo ko ni eji lɛ diɛŋtsɛ enɔ kɛ amagai loo bloŋ ni lã yɔɔ mli etoŋ koni ehɔɔ. Ebɛ shihilɛ ni nitsulɔ ko ni miitsu nii yɛ shwapo agbo ko ni hɔɔ sigaret loo ashaŋku ni akɛ lá ewo mli kɛ nibii akpei sɔrɔtoi babaoo lɛ yɔɔ mli lɛ mli.

Enɛ kɔɔ mɔ lɛ he kɛyashɛɔ nɛgbɛ?

Nitsulɔ ko ni tsuɔ nii akɛ shikatolɔ ni etsɛɔ aahu dani etsuɔ sigaret he nii lɛ baanyɛ amu sane naa akɛ shihilɛ mli ni eyɔɔ lɛ tamɔɔɔ nitsulɔ kroko ni kɛ enɛɛmɛi shwieɔ agba nɔ daa gbi ni ehɔɔ lɛ nɔ̃.

Nɛgbɛ shika ni akɛwoɔ mɔ lɛ nyɔmɔ lɛ jɛɔ aloo he ni afeɔ yɛ lɛ?

Shikpɔji komɛi yɛ ni nɔyeli lɛ kɛ hiɛtserɛjiemɔ he gbɛjianɔtoo fɛɛ woɔ sɔlemɔ lɛ dɛŋ ni ekwɛ nɔ, ni mɔ ko baanyɛ afee mɔ ni jamɔ gbɛjianɔtoo ko woɔ lɛ nyɔmɔ. Shi ekolɛ hiɛtserɛjiemɔ hei loo abɔɔi ni ekwɛɔ nɔ lɛ jeee sɔlemɔ lɛ nɔ̃. No hewɔ lɛ enɛ jeee jamɔ he nitsumɔ aloo nɔ ni abaanyɛ abu no akɛ eeha apasa jamɔ ashwere.

Mɛɛ hewalɛ nii ni mɔ ko tsuɔ lɛ naa yɛ mɔ nɔ?

Ani nii ni atsuɔ lɛ tɔ̃tɔ̃ɔ mɛi pii anane, ni ehaa mɔ lɛ bafeɔ ‘mɔ ni anaa ehe sane ataa’? (1 Timoteo 3:​2, 10) Enɛ baasa nitsulɔ lɛ henilee he yɛ mɛɛ gbɛ nɔ?

[Mfoniri ni yɔɔ baafa 15]

Naanyo Kristofonyo ko baanyɛ aye abua bo ni ole nɔ ni Nyɔŋmɔ Wiemɔ lɛ kɛɔ yɛ henilee he sane lɛ he

[Mfoniri ni yɔɔ baafa 17]

Susumɔ bɔ ni oyiŋtooi loo nifeemɔi baanyɛ ana mɛi krokomɛi anɔ hewalɛ lɛ he