“Nyɛfea Nɔ Fɛɛ Nɔ Ni Nyɛkɛwoa Nyɔŋmɔ Hiɛ Nyam”
Klɛŋklɛŋ Korintobii Amli Saji Otii
YEHOWA NYƆŊMƆ anunyam lɛ he hiaa mɛi fɛɛ ni jaa lɛ “yɛ mumɔ kɛ anɔkwale mli” lɛ waa. (Yohane 4:23, 24) No hewɔ lɛ, bɔfo Paulo kɛɛ enanemɛi Kristofoi ni yɔɔ blema Korinto lɛ akɛ: “Nii nyɛyeɔ jio, aloo nii nyɛnuɔ jio, aloo nɔ fɛɛ nɔ ni nyɛfeɔ lɛ, nyɛfea fɛɛ ni nyɛkɛwoa Nyɔŋmɔ hiɛ nyam.”(1 Korintobii 10:31, NW) Enɛ feemɔ biɔ ni wɔkpɛlɛ gbɛ ni Yehowa tsɔɔ nɔ enaa wɔnaagbai anaa tsabaa yɛ jeŋ ni diɔ heloo naa nibii asɛɛ ni ekpɔtɔ ni ekɛ ehe ewo apasa jamɔ mli vii nɛɛ mli lɛ nɔ.
Ŋwɛi yelikɛbuamɔ he miihia Korinto Kristofoi lɛ koni amɛkɛna amɛnaagbai anaa tsabaa, ejaakɛ maŋ ni ena nii, ni bɛ jeŋba,ni apasa jamɔ eyi mli obɔ mli amɛyɔɔ. Akɛni eyɛ ŋshɔnaa, ni eka Hela shikpɔŋ wulu lɛ kɛ Peloponnisos teŋ hewɔ lɛ, Korinto ji Roma nɔyeli he ni ji Akaia lɛ maŋtiase, ni gbɔmɛi ni yɔɔ mli lɛ ayifalɛ aaafee 400,000. Paulo to asafo ni yɔɔ jɛmɛ lɛ shishi aaafee afi 50 Ŋ.B.—Bɔfoi lɛ Asaji 18:1-11.
Korintobii lɛ eŋma Paulo ni amɛmiibi gbalashihilɛ kɛ loo ni akaha afɔle aha amagai ni amɛaaye lɛ ahe sane. (7:1) Ehao ejaakɛ mligbalamɔi kɛ ajwamaŋbɔɔ ko ni ehiii kwraa yɛ amɛteŋ. Ŋaawoo yɛ gbɛ kpakpa ni esa akɛ amɛtsɔ nɔ amɛye Nuŋtsɔ lɛ Gbɛkɛnaashi Niyenii lɛ he lɛ he miihia amɛ. Hemɔkɛyeli kwamɔ hu miiwo amɛhe gbeyei, ni ŋaawoo ni kɔɔ suɔmɔ he hu he miihia asafo lɛ. Yɛ yiŋtoi nɛɛ ahewɔ lɛ, Paulo ŋma eklɛŋklɛŋ wolo ni jɛ mumɔŋ lɛ eyaha Korintobii lɛ kɛjɛ Efeso aaafee afi 55 Ŋ.B. Shi ehe baaba sɛɛnamɔ aha wɔ hu.
Ekomefeemɔ kɛ Hetsemɔ yɛ Jeŋba Mli He Miihia
Kɛ ‘wɔfee nibii fɛɛ wɔkɛwo Nyɔŋmɔ hiɛ nyam’ lɛ, wɔnyiɛŋ mɔ ko ni miisumɔ ni mligblamɔ aba asafo lɛ mli lɛ sɛɛ—naagbai ni Korintobii lɛ kɛkpeɔ lɛ ekome nɛ. (1:1–4:21) Paulo wo amɛ ŋaa ni ‘amɛwiemɔ afee ekome ni amɛjwɛŋmɔ kɛ amɛsusumɔ hu afee ekome.’ Ekomefeemɔ baaba kɛji akɛ wɔnyiɛ ŋaawoo nɛɛ sɛɛ ni wɔtao mumɔŋ sui kpakpai lɛ. Ni wɔɔshwã wɔfɔ adesa ko ni ji eshafeelɔ nɔ lɛ, esa akɛ wɔkai akɛ eyɛ mli akɛ ‘wɔtɛo ni wɔshwie nɔ nu moŋ, shi Nyɔŋmɔ ji mɔ ni haa edaa’ yɛ mumɔŋ. Mɛi ni shwãa yɛ Korinto lɛ bɛ nɔ ko ni jeee ha akɛ ha amɛ; no hewɔ lɛ nyɛkahaa wɔsusua wɔhe akɛ wɔhi fe wɔnanemɛi heyelilɔi krokomɛi lɛ. Nɛkɛ heshibaa mumɔ loo su nɛɛ baaye abua wɔ ni wɔha ekome feemɔ aya hiɛ.
Kɛ ekomefeemɔ baahi shi lɛ, esa akɛ onukpai ni ahala amɛ lɛ atsu nii ni amɛha asafo lɛ he atse yɛ mumɔŋ. (5:1–6:20) Akɛni “mã sha bibioo shaa mã sui lɛ fɛɛ” hewɔ lɛ, ajwamaŋbɔlɔi, hiɛjoolɔi, wɔŋjalɔi, mɛi ajɛlɔi, daatɔlɔi loo amimyelɔi ni tsakeee amɛtsui lɛ, esa akɛ ashwie amɛ kɛjɛ asafo lɛ mli. Esaaa akɛ aŋmɛɔ jeŋba ni he tseee ni buleɔ Nyɔŋmɔ sɔlemɔtsu lɛ gbɛ yɛ Yehowa webii ateŋ. Shi moŋ, esa akɛ amɛfee nii ni woɔ Nyɔŋmɔ hiɛ nyam.
Nyɛsusua Mɛi Krokomɛi Ahe
Kɛ ‘wɔɔfee nibii fɛɛ ni wɔkɛwo Nyɔŋmɔ hiɛ nyam’ lɛ, belɛ esa akɛ wɔkɛ Paulo ŋaawoo ni kɔɔ gbalashihilɛ kɛ oshijayeli he lɛ atsu nii. (7:1-40) Esa akɛ mɛi ni amɛbote gbalashihilɛ mli lɛ kɛ emli bɔlɛnamɔ mli gbɛnaa nii lɛ aha bɔ ni sa. Esaaa akɛ Kristofonyo ni ebote gbalashihilɛ mli lɛ gbalaa ehe shi kɛjɛɔ ehefatalɔ ni heee yeee lɛ he, ejaakɛ he kome ni amɛaahi lɛ baaye abua mɔ kroko lɛ koni ena yiwalaheremɔ. Yɛ be mli ni gbalashihilɛ kɛ yeyeeyefeemɔ baa lɛ, oshijayeli he baanyɛ aba sɛɛnamɔ aha mɔ ni sumɔɔ ni eye ebua mɛi krokomɛi yɛ mumɔŋ kɛtsɔ Nuŋtsɔ lɛ ni eeesɔmɔ lɛ ni nɔ ko gbaaa enaa lɛ nɔ.
Mɛi krokomɛi amumɔŋ hilɛkɛhamɔ ni aaasusu he lɛ ji Kristofoi fɛɛ anitsumɔ, kɛ amɛji oshijafoi loo amɛbote gbalashihilɛ mli. (8:1–10:33) No hewɔ lɛ, awo Korintobii lɛ ŋaa ni amɛkatɔtɔ mɛi krokomɛi anane kɛtsɔ niyenii ni akɛsha afɔle aha wɔji loo amagai ni amɛaaye lɛ nɔ. Bɔni afee ni ekatsi mɔ ko gbɛ yɛ sanekpakpa lɛ nɔkpɛlɛmɔ mli lɛ, Paulo kɛ hegbɛ ni eyɔɔ akɛ enine aaashɛ heloo naa yelikɛbuamɔ nɔ lɛ po tsuuu nii. Agbɛnɛ, ‘eyi egbɔmɔtso lɛ mai koni yɛ be mli ni eshiɛ etsɔɔ mɛi krokomɛi lɛ, lɛ lɛ akashɛ lɛ afɔ.’ Kɛ wɔsusu ŋa lɛ nɔ niiashikpamɔi ni Israel eshafeelɔi lɛ to mli lɛ he lɛ, ebaaye ebua wɔ ni wɔkwa wɔŋjamɔ kɛ nɔ fɔŋ feemɔ. Ni kɛfata he lɛ,’nii fɛɛ ni wɔɔfee ni wɔkɛwo Nyɔŋmɔ hiɛ nyam lɛ’ baaye abua wɔ ni wɔkwa mɛi krokomɛi anaji ni wɔɔtɔtɔ.
Jiemɔ Bulɛ Kpo Otsɔɔ ni Ohiɛ Gbɛjianɔtoo Kpakpa Mli
‘Ni wɔɔfee nii fɛɛ ni wɔkɛwo Nyɔŋmɔ hiɛ nyam’ lɛ biɔ ni wɔjie bulɛ ni sa kpo. (11:1-34) Klɛŋklɛŋ afii oha lɛ mli Kristofonyo yoo lɛ jieɔ bulɛ kpo etsɔ yitsoyeli kɛtsɔɔ duku ni ekɛhaa eyitso nɔ yɛ be mli ni esɔleɔ loo egbaa yɛ asafo lɛ mli lɛ nɔ. Yei ni sheɔ Nyɔŋmɔ gbeyei ŋmɛnɛ lɛ hu kɛ bulɛ kɛha yitsoyeli ni tamɔ nakai nɔŋŋ haa. Kɛfata he lɛ, bɔni afee ni wɔkatamɔ Korintobii lɛ ni jajemɔ he miihia amɛ lɛ, esa akɛ wɔ fɛɛ wɔjie bulɛ kpo wɔtsɔɔ Nuŋtsɔ lɛ Gbɛkɛnaashi Niyenii lɛ.
Kɛ ‘wɔɔfee nii fɛɛ ni wɔkɛwo Nyɔŋmɔ hiɛ nyam’ lɛ, belɛ esa akɛ wɔkudɔ wɔkpeei yɛ gbɛjianɔtoo kpakpa naa. (12:1–14:40) Kɛ mra be mli Kristofoi lɛ kpe lɛ, amɛkɛ mumɔ lɛ nikee nii tamɔ wiemɔi sɔrɔtoi awiemɔ lɛ tsuɔ nii yɛ bulɛ kɛ hiɛsɔɔ mli yɛ amɛjɛɛ he kɛ yiŋtoo lɛ hewɔ. Eyɛ mli akɛ wɔbɛ nɛkɛ nikee nii nɛɛ ŋmɛnɛ moŋ, shi wɔwoɔ Nyɔŋmɔ hiɛ nyam kɛtaoɔ suɔmɔ ni tekeɔ fɛɛ nɔ ni wɔjieɔ lɛ kpo lɛ nɔ. Wɔwoɔ Yehowa hiɛ nyam hu ejaakɛ ato wɔkpeei lɛ ahe gbɛjianɔ jogbaŋŋ, ni wɔkɛ Paulo ŋaawoo nɛɛ tsuɔ nii kɛ bulɛ: “Afee nii fɛɛ bɔ ni yɔɔ fɛo, kɛ gbɛnaa gbɛnaa.”
‘Ni wɔɔfee nii fɛɛ ni wɔkɛwo Nyɔŋmɔ hiɛ nyam’ lɛ biɔ ni wɔjie bulɛ kpo wɔtsɔɔ Biblia mli tsɔɔmɔ ni wɔdamɔ shi shiŋŋ yɛ mumɔŋ. (15:1–16:24) Ekolɛ akɛni Hela jeŋnilee ena amɛnɔ hewalɛ hewɔ lɛ, mɛi komɛi ni yɔɔ Korinto asafo lɛ mli lɛ kɛɛ: “Gbohii lɛ ashitee bɛ.” (Okɛto Bɔfoi lɛ Asaji 17:18, 32 he.) Amɛbaanyɛ amɛna hemɔkɛyeli kwamɔ jwɛŋmɔ ni tsɔɔ akɛ wɔsɛɛ be gbohiiashitee ko bɛ shi moŋ Kristofoi ni yɔɔ wala mli lɛ ena mumɔŋ nɔ ni ji okadi nɔ momo. (2 Timoteo 2:16-18) Paulo fi anɔkwa hiɛnɔkamɔ lɛ sɛɛ kɛtsɔ Yesu shitee lɛ ni etsɛ jwɛŋmɔ yisɛɛ kɛtee nɔ ni etsɔɔ hu akɛ esa akɛ Kristofoi ni afɔ amɛ mu lɛ agboi bɔni afee ni atee amɛ shi yɛ shihilɛ ni gbele bɛ mli lɛ mli kɛya ŋwɛi wala mli lɛ nɔ. Ewiemɔi lɛ yeɔ ebuaa wɔ yɛ gbɛi krokomɛi anɔ hu ni wɔtsi wɔhe kɛjɛ hemɔkɛyeli kwamɔ he koni “wɔdamɔ shi shiŋŋ yɛ hemɔkɛyeli lɛ mli.”
Nyɛfea Nii Fɛɛ Ni Nyɛkɛwoa Nyɔŋmɔ Hiɛ Nyam yɛ Be Fɛɛ Mli
Paulo ŋaawoo ni yɔɔ klɛŋklɛŋ Korinto lɛ he hiaa wɔ ŋmɛnɛ taakɛ bɔ ni eji yɛ klɛŋklɛŋ afii oha Ŋ.B. lɛ mli lɛ. Etsirɛɔ ŋmɛnɛŋmɛnɛ beaŋ Yehowa Odasefoi lɛ ni amɛsɔmɔ Nyɔŋmɔ yɛ ekomefeemɔ mli akɛ gbɔmɛi ni he tse. Esa akɛ bɔfo lɛ wiemɔi lɛ akanya wɔ ni wɔsusu mɛi krokomɛi ahe ni wɔjie bulɛ ni sa kpo wɔtɔɔɔ amɛ. Nɔ ni Paulo wie lɛ hu baanyɛ awo wɔ hewalɛ ni wɔte shi wɔwo hemɔkɛyeli kwamɔ ni wɔdamɔ shi shiŋŋ wɔha anɔkwa hemɔkɛyeli lɛ.
Yɛ anɔkwale mli lɛ, eji nɔ ni Yehowa anɔkwa tsulɔ fɛɛ tsulɔ shweɔ yɛ etsui mli akɛ ejɔɔ lɛ, etswa e-Maŋtsɛyeli lɛ he adafi, ni ewo egbɛi krɔŋkrɔŋ lɛ hiɛ nyam. (Lala 145:1, 2, 10-13) Yɛ anɔkwale mli lɛ, Paulo klɛŋklɛŋ wolo ni eŋma eyaha Korintobii lɛ yeɔ ebuaa wɔ “ni wɔfee nii fɛɛ ni wɔkɛwo Nyɔŋmɔ hiɛ nyam.”
[Akrabatsa/Mfoniri ni yɔɔ baafa 24, 25]
NƆMIMAA YƐ GBELE HE: Paulo gbala jwɛŋmɔ kɛtee gbele yɛ nikwɛmɔ he nɔ fe shikome yɛ ewoji ni eŋmala eyaha Korintobii lɛ mli. Akɛ nɔkwɛmɔ nɔ lɛ, eŋma akɛ: “Ejaakɛ efeɔ mi akɛ Nyɔŋmɔ eŋɔ wɔ mɛi ni ji bɔfoi lɛ moŋ efee sɛɛkpelɔi, tamɔ mɛi ni ajɔɔ amɛnɔ aha gbele; ejaakɛ akɛwɔ efee nikwɛmɔ nii aha je lɛ kɛ ŋwɛibɔfoi kɛ gbɔmɛi.” (1 Korintobii 4:9) Ekolɛ Paulo miiwie nikwɛmɔi ni kɔɔ bestiarii he (gbɔmɛi ni kɛ kooloi wuɔ ta) kɛ tabilɔi (gbɔmɛi ni kɛ gbɔmɛi wuɔ ta) he. Mɛi komɛi wuɔ ta nɛɛ kɛhaa nyɔmɔwoo, shi anyɛɔ efɔŋ feelɔi anɔ koni amɛwuu ta nɛɛ. Klɛŋklɛŋ lɛ kulɛ ahaa amɛkɛ tawuu nii wuɔ, shi yɛ sɛɛ mli lɛ akɛ nɛkɛ gboklɛfoi nɛɛ baa ni amɛhe ka efolo ni amɛbɛ hefamɔ nɔ ko, ni bɔ fɛɛ bɔ ni eji lɛ amɛbaagboi.
Bɔfoi lɛ tamɔ mɛi ni baagboi yɛ naagbee lashishwiemɔ nikwɛmɔ he nɛɛ kɛ “ŋwɛibɔfoi” kɛ “gbɔmɛi” (jeee adesai “aje” lɛ kɛkɛ) akɛ nikwɛlɔi. Paulo kɛɛ ekɛ “kooloi awuiyelɔi wuu yɛ . . . Efeso,” shi mɛi komɛi heee yeee akɛ aaanyɛ Roma maŋnyo nɔ koni etsɔ nifeemɔ ni tamɔ nɛkɛ mli, ni yɛ enɛ hewɔ lɛ amɛkɛɔ akɛ eetsɔɔ gbɔmɛi ni teɔ shi woɔ lɛ tamɔ kooloi. (1 Korintobii 15:32) Ni kɛlɛ, Paulo wiemɔ akɛ Nyɔŋmɔ jie lɛ “kɛjɛ gbele ni tamɔ nɛkɛ mli” yɛ Asia niiaŋ (he ni Efeso yɔɔ) lɛ tsɔɔ akɛ eniiashikpamɔ lɛ ji kooloi awuiyelɔi diɛŋtsɛ yɛ nikwɛmɔ he moŋ fe adesai ni teɔ shi woo lɛ.—2 Korintobii 1:8-10; 11:23; Bɔfoi lɛ Asaji 19:23-41.
[Akrabatsa/Mfoniri ni yɔɔ baafa 25]
HA JWEREMƆ NƆ LƐ AHI OHIƐ: Paulo kɛ nibii ni yaa nɔ yɛ blema Helabii ashwɛmɔ hei fee nɔkwɛmɔ nii ni ekɛtsɔɔ esaji amli. (1 Korintobii 9:24-27) Yɛ akaŋshii ni tamɔ nɛkɛ ni yaa nɔ yɛ Isthmia Shwɛmɔi lɛ ashishi lɛ, afeɔ enɛ daa afii enyɔ yɛ Korinto masɛi, ni atoɔ gbɛjianɔ ahaa foidalɔi, atswɛrɛnɔlɔi, kɛ nibii krokomɛi. Kɛ mɛi ni kɛ amɛhe woɔ mli lɛ miisaa amɛhe amɛha enɛɛmɛi lɛ, foidalɔi lɛ kɛ atswɛrɛnɔlɔi lɛ bɔɔ mɔdɛŋ ni amɛye amɛhe nɔ, amɛye niyenii kpakpai ni hi ni faaa, ni amɛnuuu wein nyɔji nyɔŋma sɔŋŋ. Shi kɛkɛ, yɛ nɔ najiaŋ ni akɛ nyanyara ni fiteɔ lɛ aaawo kunimyelɔi lɛ akuɛ tamɔ afeɔ yɛ Isthmia Shwɛmɔi lɛ ashishi lɛ, Kristofonyo ni afɔ lɛ mu lɛ bɔɔ mɔdɛŋ koni enine ashɛ wala ni gbele bɛ mli akekre lɛ nɔ. Bɔni afee ni enine ashɛ nakai jweremɔ nɔ lɛ nɔ lɛ, esa akɛ eha ehiŋmɛi ahi nɔ ni ekɛ henɔyeli atsu nii. Nakai shishitoo mla lɛ nɔŋŋ kɔɔ Yehowa Odasefoi ni kwɛɔ naanɔ wala yɛ shikpɔŋ nɔ lɛ gbɛ lɛ hu he.