“Nyɛdaa Foi lɛ Nakai”

ŊƆƆ lɛ akɛ oyɛ kpɔiaŋgbɔlemɔ stediɔm ko ni mli eyi obɔ kɛ gbɔmɛi ni mii eshɛ amɛhe. Akaŋshilɔi lɛ nyiɛ kɛba akaŋshiihe lɛ. Gbɔmɛi asafo lɛ bɔi bolɔmɔ be mli ni amɛ kakalɔi lɛ je kpo lɛ. Kojolɔi eba koni amɛha atsu mlai lɛ ahe nii. Beni nifeemɔi lɛ yaa nɔ lɛ, kunimyeli bolɔmɔi kɛ nijiaŋwujee yaafonui hu futu mli. Akɛ dɛtswaa ni gbɛɔ here kunimyelɔi lɛ!

Jeee ŋmɛnɛŋmɛnɛ beaŋ kpɔiaŋgbɔlemɔ nifeemɔ ko shishi oyaa lɛ, shi moŋ nɔ ni afee afii 2,000 ko ni eho yɛ Isthmus ni yɔɔ Korinto lɛ. Biɛ ji he ni afeɔ Isthmusbii a-Shwɛmɔi lɛ yɛ daa afii enyɔ kɛjɛ afii ohai ekpaa D.Ŋ.B kɛyashi afii ohai ejwɛ Ŋ.B. lɛ mli. Nifeemɔ lɛ haa Greece fɛɛ náa miishɛɛ gbii babaoo. Shwɛmɔi lɛ fe foidamɔ he akaŋshii ni yɔɔ mlɛo. Foidamɔi lɛ ji klalo ni asraafoi efee lɛ he okadii. Kunimyelɔi—ni afeɔ amɛ nyɔŋmɔi—lɛ anine shɛɔ akekerei ni akɛ baai lo lɛ nɔ. Akɛ nikeenii haa amɛ, ni maŋ lɛ haa amɛ nitsumɔ mli hejɔɔmɔ amɛ wala gbii abɔ fɛɛ.

Bɔfo Paulo le Isthmusbii a-Shwɛmɔi ni amɛshwɛɔ ni bɛŋkɛ Korinto lɛ jogbaŋŋ ni ekɛ Kristofoi ashihilɛ gbɛ lɛ to kpɔiaŋgbɔlemɔ akaŋshii ko he. Kɛtsɔ foidalɔi, abɔtrifɔlɔi, kɛ atswɛrɛnɔ̃lɔi ayisɛɛ ni etsɛ lɛ nɔ lɛ, efee nɔ ni jɛɔ tsɔsemɔ kpakpa, mɔdɛŋbɔi ni akudɔ lɛ jogbaŋŋ, kɛ tsuishitoo mli baa lɛ he nɔkwɛmɔnɔ yɛ gbɛ ni ja nɔ. Yɛ anɔkwale mli lɛ, Kristofoi ni eŋma kɛyaha lɛ hu le shwɛmɔi nɛɛ jogbaŋŋ. Ŋwanejee ko bɛ he akɛ amɛteŋ mɛi komɛi efata asafo babaoo ni bolɔɔ yɛ stediɔm lɛ mli lɛ ahe pɛŋ. No hewɔ lɛ amɛhiɛ baasɔ Paulo nɔkwɛmɔnii lɛ amrɔ nɔŋŋ. Te ekɔɔ wɔ hu wɔhe ehaa tɛŋŋ ŋmɛnɛ? Wɔhu wɔyɛ foidamɔ ko mli—kɛha naanɔ wala. Te wɔbaafee tɛŋŋ wɔná nakai akaŋshii ni Paulo tsɛ yisɛɛ lɛ ahe sɛɛ?

‘Ní Aaashi Mple yɛ Mlai lɛ Anaa’

Taomɔ nii kɛha blema shwɛmɔi lɛ amli botemɔ lɛ yɛ shiŋŋ diɛŋtsɛ. Kojomɔhe onukpa ko kɛ akaŋshilɔ fɛɛ akaŋshilɔ baatsɔɔ nikwɛlɔi lɛ ni ebaabolɔ akɛ: ‘Ani mɔ ko yɛ ni baanyɛ awie ashi nuu nɛɛ yɛ efɔŋ ko he? Ani eji julɔ loo mɔ fɔŋ ni bɛ jeŋba yɛ eshihilɛ kɛ subaŋ mli?’ Taakɛ Archaeologia Graeca lɛ tsɔɔ lɛ, “aŋmɛɛɛ mɔ ko ni lɛ diɛŋtsɛ eji efɔŋfeelɔ ko ni ale lɛ waa, loo nɔ ko ni kɛlɛ yɛ [tsakpaa] ni bɛŋkɛ kpaakpa lɛ gbɛ ni eshi mple lɛ.” Ni shwɛmɔi lɛ amli mlai ni abaaku mli lɛ kɛ toigbalamɔ ni naa wa baa kɛtsɔ mɛi ni eku mla lɛ mli lɛ ni ajieɔ amɛ kɛjɛɔ akaŋshii lɛ amli lɛ nɔ.

Anɔkwale nɛɛ yeɔ buaa wɔ ni wɔnuɔ Paulo wiemɔ lɛ shishi, akɛ: “Kɛji mɔ ko miishi mple hu lɛ, afiŋ lɛ kunimyeli akekere, akɛ ja eshi lɛ mla naa.” (2 Timoteo 2:5) Nakai nɔŋŋ kɛji wɔbaada wala he foidamɔ lɛ, ebiɔ ni wɔshɛ Yehowa taomɔ nii lɛ ahe, ni wɔhi shi yɛ ejeŋba he tɛi ni nɔ kwɔlɔ lɛ anaa taakɛ atsɔɔ yɛ Biblia lɛ mli lɛ. Shi kɛlɛ, Biblia lɛ bɔɔ wɔ kɔkɔ akɛ: “Gbɔmɔ tsuiŋ jwɛŋmɔ lɛ efɔŋ ji kɛjɛ egbekɛbiiashi.” (1 Mose 8:21) No hewɔ lɛ, yɛ be mli ni wɔbote foidamɔ lɛ mli sɛɛ po lɛ, esa akɛ wɔkwɛ jogbaŋŋ koni wɔya nɔ wɔshi mple lɛ yɛ mlai lɛ anaa bɔni afee ni wɔya nɔ wɔna Yehowa nɔkpɛlɛmɔ koni wɔná naanɔ wala.

Yelikɛbuamɔ nɔ ni fe fɛɛ koni anyɛ afee nii yɛ nɛkɛ gbɛ nɔ ji suɔmɔ kɛha Nyɔŋmɔ. (Marko 12:29-31) Suɔmɔ ni tamɔ nɛkɛ baaha wɔsumɔ akɛ wɔɔsa Yehowa hiɛ koni wɔfee nii yɛ esuɔmɔ naa.—1 Yohane 5:3.

‘Nyɛkɛ Jatsu Fɛɛ Jatsu Aŋmɛa Shi’

Yɛ blema shwɛmɔi lɛ amli lɛ, atadei loo hewulamɔ nibii haaa foidalɔi lɛ ahe atsii amɛ. Wolo ni ji The Life of the Greeks and Romans lɛ kɛɛ akɛ “Yɛ nane kɛ foidamɔi amli lɛ, . . . bei pii lɛ foidalɔi lɛ fɔɔ kpojee kɛ amɛhe foji.” Atadei ni awooo lɛ haa foidalɔi lɛ feɔ klɛklɛ, amɛhe tsiimɔ feɔ mlɛo, ni amɛhe feɔ oya. Afiteee hewalɛ ko ní nɔ ni baajɛ mli aba ji jatsu ni he ehiaaa. Eka shi faŋŋ akɛ, enɛ yɛ Paulo jwɛŋmɔ mli beni eŋma kɛyaha Hebribii Kristofoi lɛ akɛ: “Nyɛhaa wɔkɛ jatsu fɛɛ jatsu aŋmɛa shi . . . . ní wɔkɛ tsuishitoo ada foi ni kã wɔhiɛ lɛ.”—Hebribii 12:1.

Mɛɛ jatsu nɛkɛ baanyɛ atsĩ wɔnaa yɛ wala he foidamɔ lɛ mli? Ekome baanyɛ afee sumɔ ni asumɔɔ akɛ abua heloonaa nibii ni he ehiaaa naa loo ni ahiɛ shihilɛ gbɛ ko ni jara wa mli. Ekolɛ mɛi komɛi kɛ amɛhiɛ baafɔ̃ ninamɔ nɔ kɛha shweshweeshwefeemɔ, loo amɛbaana lɛ akɛ eji miishɛɛnamɔ jɛɛhe. Ekolɛ “jatsu” ni tekeɔ nɔ tamɔ enɛ baaha foidalɔ ko foi naa aba shi kɛyashi he ko akɛ, naagbee mli lɛ, Nyɔŋmɔ ebafeŋ mɔ ko ni he hiaa lɛ tsɔ. (Luka 12:16-21) Ekolɛ naanɔ wala baafee tamɔ hiɛnɔkamɔ ko ni yɔɔ shɔŋŋ. Ekolɛ mɔ ko baasusu akɛ, ‘jeŋ hee lɛ baaba gbi ko, shi amrɔ nɛɛ wɔbaanyɛ wɔŋɔ hegbɛ lɛ hu koni wɔkɛná nɔ ni je nɛɛ kɛhaa lɛ he sɛɛ.’ (1 Timoteo 6:17-19) Heloonaa ninamɔ shihilɛ ni tamɔ nɛkɛ baanyɛ ajie mɔ jwɛŋmɔ kɛjɛ wala he foidamɔ lɛ nɔ yɛ gbɛ ni yɔɔ mlɛo nɔ, loo ebaatsĩ mɔ ko naa ni ekaje shishi po.

Yesu kɛɛ yɛ Gɔŋ nɔ Shiɛmɔ lɛ mli akɛ: “Mɔ ko nyɛŋ nuntsɔmɛi enyɔ asɔmɔ; ejaakɛ ekolɛ eeenyɛ mɔ kome ni eeesumɔ mɔ kroko lɛ; aloo eeekpɛtɛ mɔ kome he, ni eeegbe mɔ kroko lɛ he guɔ. Nyɛnyɛŋ Nyɔŋmɔ kɛ mamona [nifalɛ] nyɛsɔmɔ.” Kɛkɛ lɛ, beni ewie bɔ ni Yehowa susuɔ kooloi kɛ tsei ahe ehaa lɛ sɛɛ ni ekɛɛ akɛ adesai ajara wa kwraa fe nomɛi lɛ, ekɛ ŋaawoo ha akɛ: “No hewɔ lɛ nyɛkahaoa nyɛhe nyɛkɛɛa akɛ: Mɛni wɔɔye, aloo mɛni wɔɔnu, mɛni hu wɔɔŋɔha wɔhe? Ejaakɛ nii nɛɛ fɛɛ sɛɛ jeŋmajiaŋbii lɛ diɔ. Shi nyɛtsɛ lɛ ni yɔɔ ŋwɛi lɛ le akɛ nii nɛɛ fɛɛ he miihia nyɛ. Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”—Mateo 6:24-33.

‘Nyɛkɛ Tsuishitoo Adaa Foi Lɛ’

Jeee blema foi ni akɛ naji daa lɛ fɛɛ ji gbɛ kuku. Foidamɔ lɛ ekome ni atsɛɔ lɛ doʹli·khos lɛ, yaa kɛshɛɔ nɔ ni miihe ashɛ kilomitai 4 sɛɛ jɛkɛmɔ. Eji hewalɛ kɛ tsuishitoo he kaa ko ni wa waa. Taakɛ kusum nifeemɔ ko tsɔɔ lɛ, yɛ afi 328 D.Ŋ.B., beni akaŋshilɔ ko ni atsɛɔ lɛ Ageas eye kunim yɛ foidamɔ lɛ mli sɛɛ lɛ, eyiŋ kɛ foi aahu kɛyashɛ emaŋtiase shia ni ji Agros lɛ mli, koni eyatswa ekunimyeli lɛ he adafi. Ekɛ aaafee kilomitai 110 sɔŋŋ jo foi nakai gbi lɛ!

Kristofoi afoidamɔ lɛ hu ji gbɛ kakadaŋŋ foijee ni kaa wɔ tsuishitoo ekwɛɔ. Tsui shi ni abaato yɛ foidamɔ nɛɛ mli kɛyashi naagbee lɛ he miihia koni aná Yehowa nɔkpɛlɛmɔ kɛ jweremɔnɔ ni ji naanɔ wala lɛ. Paulo da foi lɛ yɛ nakai gbɛ nɔ. Be mli ni ewala shihilɛ baa naagbee lɛ, enyɛ ekɛɛ akɛ: “Ta kpakpa lɛ, miwuu; foidamɔ lɛ, mida migbe naa; hemɔkɛyeli lɛ, mihiɛ mli tswɛ; nɔ ni eshwɛ ni kã shi ha mi ji jalɛ akekere lɛ.” (2 Timoteo 4:7, 8) Taakɛ Paulo ji lɛ, esa akɛ wɔda foi lɛ ‘kɛgbe naa.’ Kɛji akɛ wɔ tsuishitoo lɛ ba shi akɛni etamɔ nɔ ni foidamɔ lɛ kɛ kakadaŋŋ fe bɔ ni wɔkpa gbɛ kɛjɛ shishijee lɛ hewɔ lɛ, no lɛ wɔnine shɛŋ wɔ nyɔmɔwoo lɛ nɔ. (Hebribii 11:6) Mɛɛ oshara enɛ baaji nɛkɛ, beni wɔnaa akɛ wɔbɛŋkɛ kpãa tsemɔhe lɛ kpaakpa lɛ!

Nyɔmɔwoo Lɛ

Ahaa kunimyelɔi yɛ blema Hela foidamɔ akaŋshii lɛ mli lɛ baai akekere ni bei pii lɛ afeɔ kɛjɛɔ baai ní akɛ fɔfɔii ewula lɛ amli. Yɛ Pythian Shwɛmɔi lɛ amli lɛ, kunimyelɔi lɛ anine shɛɔ akekere ni afee kɛjɛ fɔfɔii amli nɔ. Yɛ Olimpia Shwɛmɔi lɛ ashishi lɛ amɛnine shɛɔ akekerei ni ji ŋanɔ mutso bai anɔ, yɛ be mli ni yɛ Isthmian Shwɛmɔi lɛ amli lɛ, ahaa amɛ akekerei ni afee kɛjɛ baa ŋmɔŋ mli. Biblia he woloŋlelɔ ko wie akɛ: “Bɔni afee ni akaŋshilɔi lɛ amii ashɛ amɛhe yɛ amɛ ekãa lɛ hewɔ lɛ, akɛ akekerei lɛ, kunimyeli jweremɔnii lɛ, kɛ tɛŋ bɛlɛoi, jwereɔ shi yɛ akaŋshii be lɛ mli, ní akaŋshilɔi lɛ miina, yɛ okpɔlɔ ni hiɛ naji etɛ ko nɔ, loo okpɔlɔ ni akɛma stediɔm lɛ mli lɛ nɔ.” Kɛha kunimyelɔ lɛ, akekere ní abaawo lɛ ji kadimɔ nɔ ni tsɔɔ woo kpeteŋkpele. Yɛ esɛɛkuu kɛ shia yaa mli lɛ, ekɛ kunimyeli taa shwiili mli kɛboteɔ maŋ lɛ mli.

Akɛni enɛ yɔɔ Paulo jwɛŋmɔ mli hewɔ lɛ, ebi e-nikanelɔi Korintobii lɛ akɛ: “Ani nyɛleee akɛ mɛi ni daa foi lɛ, amɛfɛɛ amɛdaa moŋ, shi mɔ kome kɛkɛ náa emli duromɔ nɔ lɛ? Nyɛdaa foi lɛ nakai, koni nyɛnine ashɛ nɔ. . . . Agbɛnɛ amɛ lɛ amɛfeɔ nakai, koni amɛná akekere ni fiteɔ, shi wɔ lɛ, koni wɔná nɔ ni fiteee.” (1 Korintobii 9:24, 25; 1 Petro 1:3, 4) Kwɛ bɔ ni esoro enɛ kwraa ha! Ákɛ nɔ ni tamɔɔɔ blema shwɛmɔi akekerei ni ŋalaa lɛ, jweremɔnɔ ni mɛɔ mɛi ni daa wala he foidamɔ lɛ kɛyagbeɔ naa lɛ hiɛ kpataŋ gbi ko gbi ko.

Yɛ nɔ ni kɔɔ nɛkɛ akekere kpakpa nɛɛ he lɛ, Petro ŋma akɛ: “Beni tookwɛlɔ nukpa lɛ aaajie ehe kpo lɛ, nyɛnine aaashɛ anunyam akekere ni ŋalaaa lɛ nɔ.” (1 Petro 5:4) Ani abaanyɛ akɛ jweremɔnɔ ni je nɛɛ kɛhaa lɛ eko ato gbo ni agbooo, ni ji jweremɔnɔ kɛha shihilɛ ni fiteee ní akɛ Kristo baaná yɛ ŋwɛi lɛ he lɛ najiaŋ?

Ŋmɛnɛ, Kristofoi ateŋ mɛi babaoo ni daa foi lɛ jeee mɛi ni Nyɔŋmɔ efɔ amɛ mu koni amɛfee emumɔŋ bii, ni amɛbɛ ŋwɛi hiɛnɔkamɔ ko. Amɛdaaa foi lɛ kɛha jweremɔnɔ ni ji gbo ni agbooo. Shi kɛlɛ, Nyɔŋmɔ kɛ jweremɔnɔ ko hu ni anyɛŋ akɛ nɔ ko ato he efɔ̃ amɛhiɛ. No ji naanɔ wala yɛ emuuyeli mli yɛ paradeiso shikpɔŋ nɔ yɛ ŋwɛi Maŋtsɛyeli lɛ shishi. Jweremɔnii lɛ ateŋ eko fɛɛ eko ni Kristofonyo foidalɔ lɛ bɔɔ mɔdɛŋ ni enine ashɛ nɔ lɛ, esa akɛ ekɛ faishitwsaa kpele kɛ hewalɛ ada foi lɛ fe foidalɔ fɛɛ foidalɔ yɛ foidamɔ akaŋshii ko mli. Mɛni hewɔ? Akɛni jweremɔnɔ lɛ ŋalaaa kɔkɔɔkɔ hewɔ lɛ: “Enɛ ji shi ni ewo wɔ lɛ, naanɔ wala lɛ.”—1 Yohane 2:25.

Yɛ jweremɔnɔ ni anyɛŋ akɛ nɔ ko ato he ni kã Kristofonyo foidalɔ lɛ hiɛ lɛ hewɔ lɛ, mɛni esa akɛ efee esusumɔ yɛ je nɛŋ lakamɔi lɛ ahe? Esa akɛ efee tamɔ Paulo nɔ lɛ, mɔ ni kɛɛ akɛ: “Lɛɛlɛŋ akɛ mibuɔ fɛɛ laajemɔ nii yɛ Kristo Yesu, mi-Nuntsɔ lɛ, he nilee ni fe fɛɛ lɛ hewɔ, lɛ ehewɔ ni nii fɛɛ ebɔ mi, ni mibuɔ amɛ akɛ tumo nɔ nii.” Yɛ enɛ kɛ gbeekpamɔ naa lɛ, kwɛ bɔ ni Paulo da foi lɛ waa eha! “Anyɛmimɛi, mibuuu mihe akɛ minine eshɛ nɔ, shi nɔ kome kɛkɛ: nii ni yɔɔ sɛɛgbɛ lɛ miijie mihiɛ yɛ nɔ, shi nii ni yɔɔ hiɛgbɛ lɛ ahe moŋ mipeleɔ, ni miitiu oti lɛ kɛyashɛ . . . juromɔnɔ lɛ he.” (Filipibii 3:8, 13, 14) Paulo da foi lɛ kɛ ehiɛ ni ma jweremɔnɔ lɛ nɔ shiŋŋ. Nakai esa akɛ wɔ hu wɔfee.

Wɔ Nɔkwɛmɔnɔ Kpakpa ni Fe Fɛɛ

Yɛ blema shwɛmɔi lɛ amli lɛ, kunimyelɔ lɛ náa kafomɔ babaoo mli ŋɔɔmɔ. Lalafolɔi ŋmalaa amɛhe saji, ni mɛi ni kɛ tsei gbɔɔ nii lɛ feɔ amɛhe amagai. Yinɔsaneŋmalɔ Věra Olivová kɛɛ akɛ “amɛjuɔ amɛhe yɛ anunyam mli ni amɛnáa le ni aleɔ amɛ lɛ mli miishɛɛ babaoo diɛŋtsɛ.” Amɛbafeɔ nɔkwɛmɔnɔ kɛhaa kunimyelɔi ayinɔbii bibii lɛ.

Namɔ ji “kunimyelɔ” ni feɔ nɔkwɛmɔnɔ fɛfɛo kɛhaa Kristofoi lɛ? Paulo ha hetoo akɛ: “Nyɛhaa wɔkɛ tsuishitoo ada foi ni kã wɔhiɛ lɛ, ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ, mɔ ni nyamɔ ni kã ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ.” (Hebribii 12:1, 2) Hɛɛ, kɛji akɛ wɔbaaye omanye yɛ foi ni wɔdaa kɛha naanɔ wala lɛ mli lɛ, no lɛ ebiɔ ni wɔkwɛ wɔ Nɔkwɛmɔnɔ lɛ, Yesu Kristo. Wɔbaanyɛ wɔfee enɛ kɛtsɔ Sanekpakpai lɛ amli saji lɛ ni wɔbaakane daa ni wɔjwɛŋ gbɛ̀i anɔ ni wɔbaanyɛ wɔkase lɛ yɛ lɛ nɔ. Nikasemɔ ni tamɔ nɛkɛ baaye abua wɔ koni wɔle akɛ Yesu Kristo fee toiboo eha Nyɔŋmɔ ni ejie hemɔkɛyeli ni eyɔɔ lɛ kpo kɛtsɔ etsuishitoo lɛ nɔ. Nɔ ni jɛ etsuishitoo lɛ mli kɛba ji akɛ, ená Yehowa Nyɔŋmɔ nɔkpɛlɛmɔ ní hegbɛi ni yɔɔ naakpɛɛ babaoo fata he.—Filipibii 2:9-11.

Yɛ anɔkwale mli lɛ, Yesu su ni sa kadimɔ waa lɛ ji suɔmɔ ni eyɔɔ. “Mɔ ko bɛ suɔmɔ ni da fe enɛ, akɛ mɔ aaaŋɔ ewala eŋmɛ shi eha eshieŋtsɛmɛi.” (Yohane 15:13) Ekɛ shishinumɔ ni mli kwɔ ha wiemɔ ni ji “suɔmɔ” lɛ kɛtsɔ kɛɛmɔ ni ekɛɛ wɔ koni wɔsumɔ wɔhenyɛlɔi tete lɛ nɔ. (Mateo 5:43-48) Akɛni Yesu sumɔɔ eŋwɛi Tsɛ lɛ hewɔ lɛ, ená miishɛɛ yɛ e-Tsɛ lɛ suɔmɔnaa nifeemɔ mli. (Lala 40:9, 10; Abɛi 27:11) Yesu ni wɔɔkwɛ lɛ akɛ wɔ Nɔkwɛmɔnɔ kɛ mɔ ni fee nɔkwɛmɔnɔ kɛha wɔ yɛ wala he foidamɔ ni mli wa lɛ mli lɛ baatsirɛ wɔ koni wɔsumɔ Nyɔŋmɔ kɛ wɔ nanemɛi koni wɔná anɔkwa miishɛɛ yɛ wɔ sɔɔmɔ krɔŋkrɔŋ lɛ mli. (Mateo 22:37-39; Yohane 13:34; 1 Petro 2:21) Ha ehi ojwɛŋmɔ mli akɛ Yesu biii nɔ ko ni nine nyɛŋ ashɛ nɔ. Emaa nɔ mi ehaa wɔ akɛ: “Mihe jɔ, ni mibaa mihe shi kɛjɛ mitsui mli; ni nyɛaaná hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsu lɛ etsiii.”—Mateo 11:28-30.

Taakɛ Yesu ji lɛ, ebiɔ ni wɔkɛ wɔhiɛ afɔ̃ nyɔmɔwoo ni akɛto aha mɛi fɛɛ ni baahiɛ mli kɛyawula shi lɛ nɔ. (Mateo 24:13) Kɛji akɛ wɔshi mple lɛ yɛ mlai lɛ anaa, kɛji wɔkɛ jatsu fɛɛ jatsu ŋmɛ shi, ni kɛ wɔkɛ tsuishitoo da foi lɛ, wɔbaanyɛ wɔná nɔmimaa akɛ wɔbaaye kunim. Oti ni kã wɔhiɛ lɛ haa wɔkãa he wɔyaa nɔ! Ehaa wɔ hewalɛ hee yɛ miishɛɛ ni ekɛwoɔ wɔ mli lɛ hewɔ, miishɛɛ ni haa gbɛ ni kã wɔhiɛ lɛ nɔ nyiɛmɔ feɔ mlɛo.

[Mfoniri ni yɔɔ baafa 29]

Kristofoi afoidamɔ lɛ ji gbɛ kakadaŋŋ foijee—ebiɔ tsuishitoo

[Mfoniri ni yɔɔ baafa 30]

Ákɛ mɛi ni tamɔɔɔ foidalɔi ni afiɔ amɛ akekere lɛ, Kristofoi baanyɛ akwɛ gbɛ kɛha nyɔmɔwoo ko ni fiteee

[Mfoniri ni yɔɔ baafa 31]

Nyɔmɔwoo lɛ yɛ kɛha mɛi fɛɛ ni toɔ amɛtsui shi kɛyashi naagbee lɛ

[He ni Mfoniri ni yɔɔ baafa 28 lɛ Jɛ]

Copyright British Museum