Ni Wɔɔhi Shi yɛ Wɔ Henɔjɔɔmɔ lɛ Naa “Daa Nɛɛ”
“Kɛji mɔ ko miisumɔ akɛ enyiɛ misɛɛ lɛ, ha ni ekwa ehe, ni ewo esɛŋmɔtso lɛ etere daa nɛɛ kɛnyiɛ misɛɛ.”—LUKA 9:23.
1. Mɛni ji gbɛ kome ni wɔɔtsɔ nɔ wɔka wɔ omanyeyeli akɛ Kristofoi lɛ wɔkwɛ?
“ANI wɔji gbɔmɛi ni ejɔɔ amɛhe nɔ lɛlɛŋ?” Taakɛ John F. Kennedy, United States Maŋ Nɔyelɔ ni ji 35 lɛ tsɔɔ lɛ, sanebimɔ nɛɛ hetoo ji oti ko ni adamɔɔ nɔ atsɔɔ bɔ ni mɛi ni sɔmɔɔ yɛ nɔyeli hegbɛi amli lɛ yeɔ omanye amɛhaa. Sanebimɔ nɛɛ baanyɛ afee nɔ ni he hiaa waa akɛ nɔ ni akɛkaa bɔ ni wɔyeɔ omanye akɛ sɔɔlɔi Kristofoi lɛ akwɛɔ.
2. Te wiemɔi komekomei ashishitsɔɔmɔ wolo ko tsɔɔ “henɔjɔɔmɔ” shishi eha tɛŋŋ?
2 Shi, mɛni ji henɔjɔɔmɔ? Webster’s Ninth New Collegiate Dictionary lɛ tsɔɔ shishi akɛ “nifeemɔ loo kusum ni akɛjɔɔ he nɔ ahaa nyɔŋmɔ ko loo nifeemɔ ko ni yɔɔ krɔŋkrɔŋ,” “hetuu-kɛhamɔ loo he ni atuɔ ahaa yiŋtoo pɔtɛɛ ko,” “he-kɛ-afɔleshaa hetuu-kɛhamɔ.” Etamɔ nɔ ni John F. Kennedy kɛ wiemɔ nɛɛ miitsu nii kɛmiitsɔɔ “he-kɛ-afɔleshaa hetuu-kɛhamɔ.” Yɛ Kristofonyo gbɛfaŋ lɛ, henɔjɔɔmɔ tsɔɔ babaoo fe nakai.
3. Mɛni ji Kristofoi ahenɔjɔɔmɔ?
3 Yesu Kristo kɛɛ ekaselɔi lɛ akɛ: “Kɛji mɔ ko miisumɔ akɛ enyiɛɔ misɛɛ lɛ, ha ni ekwa ehe ni ewo esɛŋmɔtso lɛ ni enyiɛ misɛɛ.” (Mateo 16:24) Ni wɔɔtuu wɔhe wɔha Nyɔŋmɔ ni ekɛ wɔ atsu nii lɛ etsɔɔɔ akɛ wɔkɛ wɔhe baawo jamɔ nifeemɔ ko mli Hɔgbaa, aloo wɔɔya jamɔ hé ko kɛkɛ. Nɔ ni ebiɔ ji mɔ shihilɛ gbɛ fɛɛ. Ni mɔ ko aaafee Kristofonyo lɛ tsɔɔ akɛ mɔ lɛ ekwa ehe, loo ekpoo ehe kwraa beni esɔmɔɔ Yehowa Nyɔŋmɔ, mɔ ni Yesu Kristo sɔmɔ lɛ lɛ. Kɛfata he lɛ, Kristofonyo lɛ woɔ “esɛŋmɔtso” lɛ kɛtsɔ ehiɛ ni emiaa kɛdamɔɔ amanehulu fɛɛ amanehulu ni baa enɔ lɛ naa, yɛ Kristo sɛɛnyiɛlɔ ni eji hewɔ lɛ nɔ.
Nɔkwɛmɔ Nɔ ni Eye Emuu
4. Yesu baptisimɔ lɛ feɔ mɛni he okadi?
4 Beni Yesu yɔɔ shikpɔŋ nɛɛ nɔ lɛ, efee nɔ ni henɔjɔɔmɔ kɛha Yehowa ji lɛ he nɔkwɛmɔ nɔ. Henumɔi ni ena ji akɛ: “Afɔle kɛ nikeenii lɛ osumɔɔɔ, shi gbɔmɔtso osaa oha mi.” Kɛkɛ ni ekɛfata he akɛ: “Naa, miba (aŋma mihe sane yɛ wolokpo lɛ mli), ni mibafee bo, Nyɔŋmɔ, osuɔmɔnaa nii.” (Hebribii 10:5-7) Akɛ maŋ ni ejɔɔ ehe nɔ lɛ mli nyo lɛ, ejɔɔ ehe nɔ eha Yehowa yɛ efɔmɔ mli. Ni kɛlɛ, beni ejeɔ eshikpɔŋ nɔ sɔɔmɔ nitsumɔ lɛ shishi lɛ, ekɛ ehe ha kɛha baptisimɔ akɛ ehe ni ekɛha akɛ ebaafee Yehowa suɔmɔnaa nii, ni kɛha lɛ lɛ, nɔ ni fata he ji ewala ni ekɛaaha akɛ kpɔmɔ afɔleshaa nɔ̃ lɛ he okadi. Ekɛ enɛ fee nɔkwɛmɔ nɔ eha Kristofoi akɛ amɛfee nɔ fɛɛ nɔ ni ji Yehowa suɔmɔnaa nii.
5. Yesu fee heloonaa nii ahe jwɛŋmɔ kpakpa namɔ he nɔkwɛmɔ nɔ yɛ mɛɛ gbɛ nɔ?
5 Yɛ ebaptisimɔ lɛ sɛɛ lɛ, Yesu kɔ shihilɛ gbɛ ko ni yagbe naa yɛ afɔleshaa gbele mli. Ekɛ ejwɛŋmɔ emaaa shika loo ninamɔ nɔ, aloo ni eeehi ogbɔjɔ shihilɛ mli. Shi moŋ, esɔɔmɔ nitsumɔ lɛ fee nɔ ni he hiaa fe fɛɛ yɛ eshihilɛ mli. Ewo ekaselɔi lɛ ŋaa ni ‘amɛya nɔ amɛtao maŋtsɛyeli lɛ kɛ ejalɛ lɛ tsutsu,’ ni lɛ diɛŋtsɛ hu ehi shi yɛ nakai wiemɔi lɛ anaa. (Mateo 6:33) Hɛɛ, ewie be ko po akɛ: “Osɔi yɛ bui, ni ŋwɛi loofɔji yɛ tsũi; shi gbɔmɔ Bi lɛ bɛ he ni ekɛ eyitso tsɔleɔ.” (Mateo 8:20) Kulɛ ebaanyɛ etsake etsɔɔmɔi lɛ amli bɔni afee ni ekɛna shika kɛjɛ esɛɛnyiɛlɔi lɛ ahe. Akɛni kapintɛfonyo ji lɛ hewɔ lɛ, kulɛ ebaanyɛ eŋɔ esɔɔmɔ nitsumɔ be lɛ eko ni ekɛkpɛ tsu mli-saamɔ nii fɛfɛo ko, koni ehɔ̃ɔ ni ena jwiɛtɛi kukuji fioo ko ewo ekotoku mli. Shi ekɛ eŋaalee lɛ tsuuu nii kɛhaaa heloonaa ninamɔ. Akɛ Nyɔŋmɔ tsuji ni ejɔɔ amɛhe nɔ lɛ, ani wɔmiikase Yesu yɛ heloonaa nibii ahe jwɛŋmɔ kpakpa ni wɔɔna lɛ mli?—Mateo 6:24-34.
6. Mɛɛ gbɛ nɔ wɔɔtsɔ wɔkase Yesu yɛ Nyɔŋmɔ tsuji ni ejɔɔ amɛhe nɔ, ni kɛ amɛhe shaa afɔle, ni wɔɔji lɛ gbɛfaŋ?
6 Beni ekɛ sɔɔmɔ ni ekɛhaa Nyɔŋmɔ lɛ yeɔ klɛŋklɛŋ gbɛhe lɛ, Yesu taooo nibii ni he baaba sɛɛnamɔ kɛha lɛ diɛŋtsɛ. Eshihilɛ yɛ afii etɛ kɛ fã ni ekɛtsu emaŋ sɔɔmɔ nitsumɔ lɛ mli lɛ fee he-kɛ-afɔleshaa nɔ. Be ko, beni etɔ lɛ waa yɛ gbi lɛ mli, ni enaaa be ni ekɛaaye nii po lɛ, kɛlɛ, Yesu miisumɔ ni etsɔɔ gbɔmɛi ni “etɔ amɛ ni amɛfee yuuyaa tamɔ tooi ni bɛ kwɛlɔ lɛ” nii lolo. (Mateo 9:36; Marko 6:31-34) Eyɛ mli akɛ “gbɛ nyiɛmɔ lɛ etɔ [lɛ]” moŋ, shi eŋɔ hegbɛ lɛ ni ekɛ Samariayoo ni ba Yakob nu bu lɛ he yɛ Sikar lɛ wie. (Yohane 4:6, 7, 13-15) Ekɛ mɛi krokomɛi ahilɛ-kɛhamɔ yeɔ lɛ diɛŋtsɛ enɔ hiɛ be fɛɛ be. (Yohane 11:5-15) Wɔbaanyɛ wɔkase Yesu kɛtsɔ wɔsuɔmɔ mli ni wɔɔjɛ ni wɔkɛ wɔ diɛŋtsɛ wɔ nibii asha afɔle ni wɔkɛsɔmɔ Nyɔŋmɔ kɛ mɛi krokomɛi lɛ nɔ. (Yohane 6:38) Kɛ wɔsusu bɔ ni wɔɔfee wɔsa Nyɔŋmɔ hiɛ diɛŋtsɛ lɛ he moŋ fe ni wɔɔfee bibioo fe fɛɛ ni he hiaa lɛ, no lɛ wɔmiihi shi yɛ wɔ henɔjɔɔmɔ lɛ naa.
7. Yɛ mɛɛ gbɛ nɔ wɔɔkase Yesu, yɛ woo ni wɔkɛaaha Yehowa be fɛɛ be lɛ gbɛfaŋ?
7 Yesu ekaaa yɛ gbɛ ko kwraa nɔ akɛ eeegbala jwɛŋmɔ kɛba enɔ kɛtsɔ mɛi ni eyeɔ ebuaa lɛ nɔ. Ejɔɔ ehe nɔ eha Nyɔŋmɔ akɛ ebaafee E-suɔmɔnaa nii. No hewɔ lɛ, ekwɛɔ koni be fɛɛ be lɛ, akɛ nɔ fɛɛ nɔ ni enyɛɔ etsuɔ lɛ he yijiemɔ aha Yehowa, mɔ ni ji e-Tsɛ lɛ. Beni nɔyelɔ ko tsɛ lɛ akɛ “Tsɔɔlɔ Kpakpa,” ni ekɛ wiemɔ ‘ekpakpa’ tsu nii akɛ sabala lɛ, Yesu jaje lɛ ni ekɛɛ lɛ akɛ: “Mɔ kpakpa ko bɛ akɛ ja mɔ kome, lɛ ji Nyɔŋmɔ.” (Luka 18:18, 19; Yohane 5:19, 30) Ani wɔtamɔ Yesu, ni wɔjieɔ woo kɛjɛɔ wɔnɔ wɔkɛhaa Yehowa?
8. (a) Akɛ nuu ni ejɔɔ ehe nɔ lɛ, Yesu tsi ehe kwraa kɛjɛ je lɛ he yɛ mɛɛ gbɛ nɔ? (b) Mɛɛ gbɛ nɔ esa akɛ wɔkase lɛ yɛ?
8 Ehenɔjɔɔmɔ shihilɛ yɛ shikpɔŋ nɔ lɛ fɛɛ mli lɛ, Yesu jie lɛ kpo faŋŋ akɛ etuu ehe kwraa eha Nyɔŋmɔ sɔɔmɔ. Etee nɔ ehiɛ ehe yɛ hetsemɔ mli bɔni afee ni enyɛ ekɛ ehe aha akɛ “toobi ni he bɛ kpa loo ŋmamɔ nɔ ko,” koni efee kpɔmɔ afɔleshaa nɔ lɛ. (1 Petro 1:19; Hebribii 7:26) Eye Mose Mla lɛ mli taomɔ nii fɛɛ nɔ, ni ekɛwo nakai Mla lɛ obɔ. (Mateo 5:17; 2 Korintobii 1:20) Ehi shi yɛ lɛ diɛŋtsɛ etsɔɔmɔ ni kɔɔ jeŋba he lɛ naa. (Mateo 5:27, 28) Mɔ ko nyɛŋ afolɔ enaa yɛ gbɛ ni ja nɔ akɛ eyɛ susumɔi fɔji. Lɛlɛŋ, “[e]nyɛɔ efɔŋfeemɔ.” (Hebribii 1:9) Akɛ Nyɔŋmɔ tsuji lɛ, nyɛhaa wɔkasea Yesu, ni wɔha wɔshihilɛ kɛ wɔsusumɔi ahe atse daa yɛ Yehowa hiɛ.
Kɔkɔbɔɔ Nɔkwɛmɔ Nii
9. Mɛɛ kɔkɔbɔɔ nɔkwɛmɔ nɔ ko Paulo wie he, ni mɛni hewɔ esa akɛ wɔsusu nɔkwɛmɔ nɔ nɛɛ he?
9 Akɛ nɔ ni tamɔɔɔ Yesu nɔkwɛmɔ nɔ lɛ, wɔyɛ Israelbii lɛ akɔkɔbɔɔ nɔkwɛmɔ nɔ lɛ. Beni amɛjaje akɛ amɛbaafee nibii fɛɛ ni Yehowa efa amɛ akɛ amɛfee lɛ sɛɛ po lɛ, amɛfeee esuɔmɔnaa nii lolo. (Daniel 9:11) Bɔfo Paulo wo Kristofoi hewalɛ ni amɛkase nii kɛjɛ nɔ ni ba Israelbii lɛ anɔ lɛ mli. Nyɛhaa wɔsusua nibii komɛi ni ba ni Paulo wie he yɛ eklɛŋklɛŋ wolo ni eŋma eyaha Korintobii lɛ mli lɛ he, ni wɔkwɛ tɛmɔtɛi ni esa akɛ Nyɔŋmɔ tsuji ni ejɔɔ amɛhe nɔ amɛha lɛ yɛ wɔbe nɛɛ mli lɛ atsi amɛhe kɛjɛ he.—1 Korintobii 10:1-6, 11.
10. (a) ‘Nibii fɔji fee Israelbii lɛ akɔnɔ’ yɛ mɛɛ gbɛ nɔ? (b) Mɛni hewɔ ni Israelbii lɛ bu amɛnifeemɔi ahe akɔntaa beni amɛwie niyenii ahe huhuuhu nɔ ni ji shii enyɔ nɔ lɛ, ni mɛni wɔbaanyɛ wɔkase kɛjɛ kɔkɔbɔɔ nɔkwɛmɔ nɔ nɛɛ mli?
10 Klɛŋklɛŋ lɛ, Paulo bɔ wɔ kɔkɔ akɛ “wɔkaha nibii fɔji miifee wɔ akɔnɔ.” (1 Korintobii 10:6) Ekolɛ no baaha okai be mli ni Israelbii lɛ ye ŋkɔmɔ akɛ mana pɛ amɛnaa amɛyeɔ lɛ. Yehowa tsu trakɔkɔi kɛbaha amɛ. Nɔ ko ni tamɔ nakai eba mli momo aaafee afi ni tsɔ hiɛ lɛ mli yɛ Sin ŋa lɛ nɔ, ni no sɛɛ nɔŋŋ kɛkɛ ni Israelbii lɛ jaje amɛ henɔjɔɔmɔ kɛha Yehowa lɛ amɛtsɔɔ lɛ. (2 Mose 16:1-3, 12, 13) Shi shihilɛ nɛɛ tamɔɔɔ no pɛpɛɛpɛ. Beni Yehowa ha amɛ trakɔkɔi lɛ klɛŋklɛŋ kwraa lɛ, egbalaaa Israelbii lɛ atoi yɛ amɛ huhuuhu wiemɔ lɛ hewɔ. Shi, nɔ ni ba yɛ be nɛɛ mli lɛ yɛ sɔrɔto. “Loo lɛ yɛ amɛdaaŋ lolo, ni amɛnako amɛtá, kɛkɛ ni Yehowa mli wo maŋ lɛ la, ni Yehowa tswia maŋ lɛ nii naakpa diɛŋtsɛ.” (4 Mose 11:4-6, 31-34) Mɛni etsake? Akɛ maŋ ni ejɔɔ ehe nɔ lɛ, agbɛnɛ aha amɛbu amɛnifeemɔi lɛ ahe akɔntaa. Hiɛsɔɔ ni amɛnaaa kɛha nibii ni Yehowa haa amɛ lɛ ha amɛwie amɛshi Yehowa, yɛ shiwoo ni amɛkɛha akɛ amɛbaafee nɔ fɛɛ nɔ ni Yehowa ewie lɛ fɛɛ sɛɛ! Wiemɔ ni wɔɔwie wɔshi Yehowa okpɔlɔ lɛ ŋmɛnɛ lɛ tamɔ nakai nɔŋŋ. Mɛi komɛi ejieee hiɛsɔɔ kpo yɛ mumɔŋ nibii ni Yehowa kɛhaa kɛtsɔɔ “tsulɔ anɔkwafo kɛ nilelɔ” lɛ nɔ lɛ he. (Mateo 24:45-47) Shi, kaimɔ akɛ wɔ henɔjɔɔmɔ lɛ biɔ ni wɔkɛ shidaa kɛ hiɛsɔɔ akai nibii ni Yehowa efee eha wɔ lɛ, ni wɔkpɛlɛ mumɔŋ niyenii ni Yehowa haa wɔ lɛ nɔ.
11. (a) Israelbii lɛ kɛ wɔŋjamɔ wo jamɔ ni amɛkɛhaa Yehowa lɛ he muji yɛ mɛɛ gbɛ nɔ? (b) Wɔŋjamɔ ko ni tamɔ nakai baanyɛ asa wɔhe yɛ mɛɛ gbɛ nɔ?
11 No sɛɛ lɛ, Paulo bɔ kɔkɔ akɛ: “Asaŋ nyɛkatsɔmɔa amaga jalɔi, tamɔ amɛteŋ mɛi komɛi fee lɛ.” (1 Korintobii 10:7) Eka shi faŋŋ akɛ bɔfo lɛ miigbala jwɛŋmɔ kɛmiiya tsinabi jamɔ ni tee nɔ yɛ be mli ni Israelbii lɛ kɛ Yehowa efee kpaŋmɔ yɛ Sinai Gɔŋ lɛ masɛi lɛ sɛɛ nɔŋŋ lɛ nɔ, yɛ biɛ. Shi ekolɛ oookɛɛ akɛ, ‘Akɛ Yehowa tsulɔ ni ejɔɔ ehe nɔ eha lɛ lɛ, mikɛ mihe woŋ amaga jamɔ mli kɔkɔɔkɔ.’ Shi, kadimɔ akɛ, yɛ Israelbii lɛ asusumɔ naa lɛ, amɛkpako Yehowa jamɔ; shi kɛlɛ, amɛkɛ nifeemɔ ko ni ji tsinabi jamɔ bafata he—nɔ ko ni yɔɔ nyaŋemɔ kwraa yɛ Nyɔŋmɔ hiɛ. Mɛni fata nɛkɛ jamɔ nɛɛ he? Gbɔmɛi lɛ sha afɔlei yɛ tsinabi lɛ hiɛ, kɛkɛ ni maŋ lɛ “ho tara shi ni amɛye nii ni amɛnu nii, ni amɛte shi ni amɛshwɛ.” (2 Mose 32:4-6) Ŋmɛnɛ, ekolɛ mɛi komɛi baawie akɛ amɛjaa Yehowa. Shi ekolɛ amɛ shihilɛ damɔɔɔ Yehowa jamɔ nɔ, shi moŋ je nɛŋ nibii ni amɛaana mli ŋɔɔmɔ nɔ, ni amɛbɔɔ mɔdɛŋ ni amɛtao gbɛi yɛ enɛɛmɛi ahe ni amɛkɛ sɔɔmɔ ni amɛkɛhaa Yehowa lɛ awo jɛmɛ. Eji anɔkwale akɛ, enɛ shɛɛɛ shɔŋŋ tamɔ bɔ ni shikulamɔ yɛ shika tsinabi hiɛ lɛ ji lɛ moŋ, shi esorooo lɛ tsɔ̃, yɛ shishitoo mla ni yɔɔ mli lɛ gbɛfaŋ. Ní mɔ ko kɛ lɛ diɛŋtsɛ esuɔmɔnaa nii aaafee enyɔŋmɔ lɛ tsɔɔ akɛ ehiii shi yɛ ehenɔjɔɔmɔ kɛha Yehowa lɛ naa.—Filipibii 3:19.
12. Mɛni wɔkaseɔ kɛjɛɔ niiashikpamɔ ni Israelbii lɛ na yɛ Baal-Peor jamɔ mli lɛ mli, yɛ wɔhe ni wɔɔkwa lɛ gbɛfaŋ?
12 Hiɛtserɛjiemɔ kroko hu he baa sane lɛ mli, yɛ kɔkɔbɔɔ nɔkwɛmɔ nɔ ni Paulo tsĩ ta kɛtsa nɔ lɛ mli. “Ni wɔsaa wɔkabɔ ajwamaŋ, tamɔ bɔ ni amɛteŋ mɛi komɛi bɔ, ni gbi kome nɔ lɛ, mɛi akpei nyɔŋmai enyɔ kɛ etɛ nyɔnyɔi lɛ.” (1 Korintobii 10:8) Akɛni Israelbii lɛ ha jeŋba shara mli miishɛɛ ni Moab biyei lɛ ha amɛna lɛ laka amɛ hewɔ lɛ, enɛ kɛ amɛ yawo Baal-Peor jamɔ mli yɛ Shitim. (4 Mose 25:1-3, 9) Wɔhe ni wɔɔkwa kwraa akɛ wɔɔfee Yehowa suɔmɔnaa nii lɛ hu biɔ ni wɔkpɛlɛ tɛi ni efolɔ yɛ jeŋba ni he tse he lɛ nɔ. (Mateo 5:27-30) Akaiɔ wɔ yɛ nɛkɛ yinɔ ni jeŋba kpakpa yaa nɔ ebaa shi nɛɛ mli akɛ ehe miihia ni wɔhiɛ wɔhe yɛ hetsemɔ mli, kɛjɛ jeŋba shara fɛɛ he, ni wɔba wɔhe shi wɔha hegbɛ ni Yehowa yɔɔ akɛ etsɔɔ nɔ ni hi kɛ nɔ ni ehiii lɛ.—1 Korintobii 6:9-11.
13. Pinehas nɔkwɛmɔ nɔ lɛ yeɔ ebuaa wɔ ni wɔnuɔ nɔ ni fata henɔjɔɔmɔ kɛha Yehowa he lɛ shishi yɛ mɛɛ gbɛ nɔ?
13 Eyɛ mli akɛ mɛi babaoo gbee ajwamaŋbɔɔ tsɔne lɛ mli yɛ Shitim moŋ, shi mɛi komɛi hi shi yɛ amɛ maŋ henɔjɔɔmɔ kɛha Yehowa lɛ naa. Amɛteŋ mɔ ko ni sa kadimɔ waa yɛ ekaa kpojiemɔ mli ji Pinehas. Beni ena Israel onukpai lɛ eko ni ekɛ Midian yoo ko miiho kɛmiiya ebuu mli lɛ, Pinehas kɔ akpɔlɔ ehiɛ edɛŋ amrɔ nɔŋŋ, ni ekɛyatsu mɛi enyɔ lɛ fɛɛ mli. Yehowa kɛɛ Mose akɛ: “Pinehas eku mimli ni ewo Israelbii lɛ ala lɛ naa, ejaakɛ eye awuŋa eha mi yɛ amɛteŋ, ni ehaaa maplenee Israelbii lɛ yɛ miwuŋayeli lɛ mli.” (4 Mose 25:11) Eye awuŋa jogbaŋŋ eha Yehowa—no ji nɔ ni henɔjɔɔmɔ tsɔɔ. Wɔnyɛŋ wɔŋmɛ gbɛ ni nɔ ko abahe gbɛhe ni sa akɛ henɔjɔɔmɔ kɛha Yehowa ahi mli yɛ wɔtsuii amli lɛ. Ekãa ni wɔyɔɔ kɛha Yehowa lɛ hu tsirɛɔ wɔ ni wɔha asafo lɛ he atse kɛtsɔ jeŋba shara nifeemɔ ni wɔɔha onukpai lɛ ale, ni wɔkatsimɔ nɔ lɛ nɔ.
14. (a) Israelbii lɛ ka Yehowa yɛ mɛɛ gbɛ nɔ? (b) Wɔhe nɔ ni wɔɔjɔɔ kwraa wɔha Yehowa lɛ yeɔ ebuaa wɔ ni ‘wɔnijiaŋ akaje wui’ yɛ mɛɛ gbɛ nɔ?
14 Paulo tsĩ kɔkɔbɔɔ nɔkwɛmɔ nɔ kroko hu tã: “Ni asaŋ wɔkaka Nuntsɔ [Yehowa], tamɔ bɔ ni amɛteŋ mɛi komɛi ka lɛ ni onufui bakpata amɛhiɛ lɛ.” (1 Korintobii 10:9) Paulo miiwie be mli ni Israelbii lɛ wie amɛshi Nyɔŋmɔ amɛtsɔɔ Mose, beni “eje maŋ lɛ tsine yɛ gbɛ lɛ nɔ” lɛ he yɛ biɛ. (4 Mose 21:4) Ani bei komɛi lɛ otɔ̃ɔ nakai tɔmɔ lɛ? Beni ojɔɔ ohe nɔ oha Yehowa lɛ, ani osusu akɛ Harmagedon ebɛŋkɛ kpaakpa? Ani Yehowa tsuishitoo lɛ sɛɛ etsɛ tsɔ fe bɔ ni okpaa gbɛ? Kaimɔ akɛ, wɔjɔɔɔ wɔhe nɔ wɔhaaa Yehowa yɛ be sɛɛjekɛmɔ pɔtɛɛ ko pɛ hewɔ, aloo kɛyashi Harmagedon baaba kɛkɛ. Wɔ henɔjɔɔmɔ lɛ tsaa nɔ aahu kɛyaa naanɔ. No hewɔ lɛ, belɛ “nyɛkahaa ekpakpa feemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.”—Galatabii 6:9.
15. (a) Namɔ Israelbii lɛ wie huhuuhu amɛshi? (b) Wɔ henɔjɔɔmɔ kɛha Yehowa tsirɛɔ wɔ ni wɔjie bulɛ kpo wɔha teokrase hegbɛ yɛ mɛɛ gbɛ nɔ?
15 Yɛ naagbee lɛ, Paulo bɔ wɔ kɔkɔ ni ‘wɔkawie huhuuhu’ wɔshi Yehowa sɔɔlɔi ni ehala amɛ lɛ. (1 Korintobii 10:10) Israelbii lɛ wie huhuuhu waa amɛshi Mose kɛ Aaron beni saralɔi 12 ni atsu amɛ ni amɛyakwɛ Kanaan shikpɔŋ lɛ ateŋ mɛi 10 ku amɛsɛɛ kɛ amaniɛbɔɔ fɔŋ lɛ. Amɛwie po akɛ esa akɛ atsake Mose ni ahala hiɛnyiɛlɔ kroko, ni amɛku amɛsɛɛ kɛya Mizraim. (4 Mose 14:1-4) Ŋmɛnɛ, ani wɔkpɛlɛɔ hiɛnyiɛmɔ ni akɛhaa wɔ kɛtsɔɔ Yehowa mumɔ krɔŋkrɔŋ lɛ nitsumɔ nɔ lɛ nɔ? Kɛ wɔkwɛ mumɔŋ niyenii babaoo ni tsulɔ anɔkwafo kɛ nilelɔ kuu lɛ kɛŋmɛɔ wɔ okpɔlɔ lɛ, wɔnaa mɔ ni Yesu kɛ lɛ tsuɔ nii ni ekɛhaa wɔ “ŋmaa yɛ be ni sa nɔ” lɛ faŋŋ diɛŋtsɛ. (Mateo 24:45) Wɔ susuma muu fɛɛ mli ni wɔɔjɛ wɔjɔɔ wɔhe nɔ wɔha Yehowa lɛ biɔ ni wɔjie bulɛ kpo wɔtsɔɔ etsuji ni ehala amɛ lɛ. Ekaba akɛ wɔɔtamɔ ŋmɛnɛŋmɛnɛ beaŋ huhuuhu wielɔi komɛi, ni kɛji wɔɔkɛɛ lɛ, amɛgbala amɛjwɛŋmɔ kɛtee hiɛnyiɛlɔ hee nɔ, koni enyiɛ amɛhiɛ kɛya je lɛŋ ekoŋŋ lɛ kɔkɔɔkɔ.
Ani Mihewalɛ Fɛɛ Nɛ?
16. Mɛɛ sanebimɔi Nyɔŋmɔ tsuji ni ejɔɔ amɛhe nɔ amɛha lɛ lɛ baasumɔ ni amɛbi amɛhe?
16 Eji Israelbii lɛ kai akɛ amɛhenɔjɔɔmɔ kɛha Yehowa lɛ yeɔ emuu kɛmɔɔ shi kulɛ, amɛyagbeŋ tɔmɔi ni yɔɔ hiɛdɔɔ mli tamɔ bɔ ni amɛfee lɛ. Akɛ mɔ ni tamɔɔɔ nakai Israelbii ni bɛ hemɔkɛyeli lɛ, Yesu Kristo hi shi yɛ ehenɔjɔɔmɔ lɛ naa aahu kɛyashi naagbee. Akɛ Kristo sɛɛnyiɛlɔi lɛ, wɔkaseɔ ehetuu-kɛhamɔ ni jɛ esusuma muu fɛɛ mli lɛ, koni “[wɔ]kahi shi yɛ gbɔmɛi akɔnɔi anaa, shi moŋ yɛ Nyɔŋmɔ suɔmɔnaa nii anaa.” (1 Petro 4:2; okɛto 2 Korintobii 5:15 he.) Yehowa suɔmɔnaa nii ŋmɛnɛ ji akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Yɛ yiŋtoo nɛɛ hewɔ lɛ, esa akɛ wɔshiɛ “maŋtsɛyeli lɛ he sanekpakpa nɛɛ” dani naagbee lɛ aba. (Mateo 24:14) Mɔdɛŋbɔɔ enyiɛ wɔkɛwoɔ nɛkɛ sɔɔmɔ nɛɛ mli? Ekolɛ wɔbaasumɔ ni wɔbi wɔhe akɛ, ‘Ani mihewalɛ fɛɛ nɛ?’ (2 Timoteo 2:15) Shihilɛi yɛ sɔrɔtoi. Yehowa naa he miishɛɛ akɛ aaasɔmɔ lɛ kɛ “bɔ ni mɔ yɔɔ, jeee bɔ ni ebɛ.” (2 Korintobii 8:12; Luka 21:1-4) Esaaa ni mɔ ko kojoɔ bɔ ni mɔ kroko henɔjɔɔmɔ lɛ mlikwɔlɛ loo enɔkwayeli ji. Esa akɛ mɔ fɛɛ mɔ asusu he ni lɛ diɛŋtsɛ ehetuu-kɛhamɔ kɛha Yehowa lɛ yashɛɔ. (Galatabii 6:4) Esa akɛ suɔmɔ ni wɔyɔɔ wɔha Yehowa lɛ atsirɛ wɔ ni wɔbi akɛ, ‘Te mafee tɛŋŋ maha Yehowa ana miishɛɛ?’
17. Mɛɛ wekukpaa ka henɔjɔɔmɔ kɛ hiɛsɔɔ teŋ? Ha ehe nɔkwɛmɔ nɔ.
17 Wɔ hetuu-kɛhamɔ kɛha Yehowa lɛ mli kwɔɔ beni hiɛsɔɔ ni wɔyɔɔ wɔha lɛ lɛ yaa nɔ edaa lɛ. Gbekɛ nuu ko ni jɛ Japan, ni eye afii 14, jɔɔ ehe nɔ eha Yehowa ni ekɛ nu mli baptisimɔ fee henɔjɔɔmɔ nɛɛ he okadi. Sɛɛ mli lɛ, eyasumɔ akɛ etsa eskul nikasemɔ nɔ kɛya hiɛ saŋŋ, koni ebatsɔ jeŋ nilelɔ. Esusuuu be-fɛɛ sɔɔmɔ nitsumɔ lɛ he, shi ákɛ sɔɔlɔ ni ejɔɔ ehe nɔ lɛ, esumɔɔɔ hu ni eshi Yehowa kɛ egbɛjianɔtoo ni anaa lɛ. Etee univɛsiti koni enyɛ eshɛ oti ni ma ehiɛ nɛɛ he. Jɛmɛ ji he ni ena mɛi ni egbe univɛsiti nikasemɔ naa lɛ yɛ akɛ aanyɛ amɛnɔ ni amɛjɔɔ amɛwala fɛɛ nɔ amɛha amɛ nitsumɔi, aloo kɛha amɛ nikasemɔ. Ni esusu eyiŋ akɛ, ‘Mɛni mifeɔ yɛ biɛ? Ani manyɛ madi amɛshihilɛ gbɛ nɛɛ sɛɛ, ni majɔɔ mihe nɔ maha heloonaa nitsumɔ? Ani mijɔɔko mihe nɔ mihako Yehowa momo?’ Enɛ ha ebana hiɛsɔɔ hee kwraa, ni ebatsɔ daa gbɛgbalɔ. Shishinumɔ ni eyɔɔ yɛ ehenɔjɔɔmɔ lɛ he lɛ mli bakwɔ ni etsirɛ lɛ ni ekpɛ eyiŋ yɛ etsuiŋ akɛ ebaaya he fɛɛ he ni ehe hiaa yɛ. Etee Sɔɔmɔ Tsɔsemɔ Skul lɛ eko ni aha lɛ nitsumɔ akɛ eyasɔmɔ yɛ maŋsɛɛ akɛ maŋsɛɛ sanekpakpa shiɛlɔ.
18. (a) Mɛɛ nibii nɛkɛ he baa wɔ henɔjɔɔmɔ kɛha Yehowa lɛ mli? (b) Mɛɛ nyɔmɔwoo wɔbaanyɛ wɔna kɛjɛ wɔ henɔjɔɔmɔ kɛha Yehowa lɛ mli?
18 Henɔjɔɔmɔ kɔɔ wɔshihilɛ fɛɛ he. Esa akɛ wɔkwa wɔ diɛŋtsɛ wɔhe ni wɔnyiɛ Yesu nɔkwɛmɔ nɔ fɛfɛo lɛ sɛɛ “daa nɛɛ.” (Luka 9:23) Akɛni wɔkwa wɔhe hewɔ lɛ, wɔbiii Yehowa ni eha wɔba nitsumɔ mli hejɔɔmɔ. Wɔ shihilɛ kɛ shishitoo mlai ni Yehowa kɛmamɔ shi eha etsuji lɛ kpaa gbee. Yɛ nibii ni wɔyɔɔ hegbɛ akɛ wɔhalaa emli nɔ ni wɔsumɔɔ lɛ po gbɛfaŋ lɛ, wɔɔfee jogbaŋŋ akɛ wɔɔkwɛ akɛ ani wɔmiifee bɔ fɛɛ bɔ ni wɔɔnyɛ ni wɔhi shi akɛ mɛi ni ejɔɔ amɛhe nɔ amɛha Yehowa lo. Beni wɔyaa nɔ wɔsɔmɔɔ lɛ daa gbi, ni wɔfeɔ bɔ fɛɛ bɔ ni wɔɔnyɛ ni wɔkɛsa ehiɛ lɛ, wɔbaaye omanye akɛ Kristofoi, ni abaajɔɔ wɔ kɛ nɔkpɛlɛmɔ ŋmɔlɔ ni jɛ Yehowa, Mɔ ni sa hetuu-kɛhamɔ ni jɛ wɔsusuma muu fɛɛ mli lɛ ŋɔɔ.
Ani Obaanyɛ Otsɔɔ Mli?
◻ Mɛni henɔjɔɔmɔ tsɔɔ kɛha Yesu Kristo?
◻ Mɛni hewɔ esa akɛ wɔtsi wɔhe kɛjɛ huhuuhu ni wɔɔwie wɔshi Yehowa lɛ he lɛ?
◻ Mɛɛ gbɛ nɔ wɔɔtsɔ ni wɔkaha wɔŋjamɔ miitsɔ gbɛ ni yɔɔ nigii nɔ eebote wɔshihilɛ mli?
◻ Mɛni kɛ wɔkai lɛ ebaaye ebua wɔ ni ‘wɔnijiaŋ akaje wui’ yɛ Nyɔŋmɔ suɔmɔnaa nifeemɔ mli?
[Mfoniri ni yɔɔ baafa 17]
Kristofoi ni ejɔɔ amɛhe nɔ lɛ ‘haaa ekpakpa feemɔ atɔ amɛ’