Nyɛsaa Yehowa Hiɛ Kɛtsɔ Mlihilɛ Ni Nyɛaajie Kpo Nyɛtsɔɔ Nɔ
“Mɛni Yehowa biɔ yɛ odɛŋ fe akɛ ofee nɔ ni ja gbɛ, ni osumɔ mlihilɛ, ni okɛ o-Nyɔŋmɔ lɛ anyiɛ yɛ heshibaa mli?”—MIKA 6:8, New World Translation
1. Mɛni hewɔ esaaa akɛ efeɔ wɔ naakpɛɛ akɛ Yehowa kpaa ewebii agbɛ akɛ amɛaajie mlihilɛ kpo lɛ?
YEHOWA kpaa ewebii agbɛ akɛ amɛbaajie mlihilɛ kpo amɛtsɔɔ. Esaaa akɛ enɛ feɔ wɔ naakpɛɛ. Nyɔŋmɔ diɛŋtsɛ mli hi ha mɛi fɛɛ, yɛ gbɔmɛi trumui ni yi wa lɛ po nɔ. Yesu Kristo kɛɛ ekaselɔi lɛ yɛ enɛ mli akɛ: “Nyɛsumɔa nyɛhenyɛlɔi ni nyɛfea ejurɔ, ni nyɛfaa ni nyɛhiɛ kaaa nɔ ko nɔ dɔŋŋ, ni nyɛnyɔmɔwoo aaafa, ni nyɛaatsɔmɔ Ŋwɛinyo lɛ bii, shi lɛ lɛ, emli hi yɛ trumui kɛ mɛi fɔji anɔ. No hewɔ lɛ nyɛnaa mɔbɔ, tamɔ bɔ ni nyɛ-Tsɛ lɛ naa mɔbɔ lɛ.”—Luka 6:35, 36.
2. Mɛɛ sanebimɔi ni kɔɔ mlihilɛ he esa akɛ wɔsusu he?
2 Taakɛ Mika 6:8 jajeɔ lɛ, esa akɛ mɛi ni kɛ Nyɔŋmɔ nyiɛɔ lɛ “asumɔ mlihilɛ” diɛŋtsɛ. Eka shi faŋŋ akɛ esaa Yehowa hiɛ kɛ etsuji jieɔ mlihilɛ kpo ni amɛjɛɔ amɛtsui mli amɛfeɔ enɛ. Shi mɛni ji mlihilɛ? Mɛɛ sɛɛnamɔ jɛɔ ekɛ nitsumɔ mli baa? Ni mɛɛ gbɛ nɔ aaatsɔ ajie nɛkɛ su nɛɛ kpo yɛ?
Nɔ Ni Mlihilɛ Ji
3. Te obaatsɔɔ mlihilɛ mli oha tɛŋŋ?
3 Mlihilɛ ji su ni haa asusuɔ mɛi krokomɛi ahe waa. Ajieɔ enɛ kpo kɛtsɔɔ nifeemɔi ni akɛyeɔ abuaa mɔ kɛ mlijɔlɛ wiemɔi anɔ. Ni mɔ ko mli aaahi lɛ tsɔɔ akɛ efeɔ ejurɔ moŋ fe ni eeefee nii ni yeɔ awui. Mɔ ni mli hi lɛ sumɔɔ mɔ, ehe jɔ, enuɔ he ehaa mɔ, ni eji durolɔ. Ekpaa enine mli ehaa mɛi krokomɛi ni esusuɔ amɛhe. Ni mlihilɛ ji anɔkwa Kristofonyo fɛɛ Kristofonyo okadi atade lɛ mli kpãa ni akɛlo lɛ fa, ejaakɛ Paulo wo hewalɛ akɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo.”—Kolosebii 3:12.
4. Yehowa nyiɛɔ hiɛ yɛ mlihilɛ ni ajieɔ lɛ kpo atsɔɔ adesai lɛ mli yɛ mɛɛ gbɛ nɔ?
4 Yehowa nyiɛɔ hiɛ yɛ mlihilɛ kpojiemɔ nɛɛ mli. Taakɛ bɔfo Paulo kɛɛ lɛ, “beni Nyɔŋmɔ ni ji wɔ-Yiwalaherelɔ lɛ mlihilɛ kɛ egbɔmɛi ahedɔɔ lɛ pue lɛ,” no mli etsɔ “lɛ diɛŋtsɛ emɔbɔnalɛ naa etsɔ eheefɔmɔ kɛ hejuu kɛ mumɔ krɔŋkrɔŋ eheefeemɔ lɛ nɔ ehere wɔyiwala.” (Tito 3:4, 5) Nyɔŋmɔ tsuuɔ, loo ‘ejuɔ’ Kristofoi ni afɔ amɛ mu lɛ ahe yɛ Yesu la lɛ mli, ni ekɛ Kristo kpɔmɔ afɔleshaa lɛ jara lɛ tsuɔ amɛhe nii. Afeɔ amɛ ehee hu kɛtsɔɔ mumɔ krɔŋkrɔŋ lɛ nɔ, amɛbatsɔmɔɔ “bɔɔ nɔ hee” akɛ Nyɔŋmɔ bii ni ekɛ mumɔ efɔ amɛ. (2 Korintobii 5:17) Shi Nyɔŋmɔ mlihilɛ kɛ esuɔmɔ kɛha gbɔmɔ lɛ hu mli kpaa kɛyaa majimaji ateŋ “asafo babaoo” ko ni “amɛfɔ amɛ atadei lɛ ahe ni amɛha eyɛ futaa yɛ Toobi lɛ la lɛ mli” lɛ anɔ. (Kpojiemɔ 7:9, 14; 1 Yohane 2:1, 2) Agbɛnɛ mɛi ni afɔ amɛ mu lɛ kɛ asafo babaoo ni yɔɔ shikpɔŋ nɔ shihilɛ he hiɛnɔkamɔ lɛ fɛɛ yɛ Yesu pã ni eteremɔ ‘waaa’ lɛ shishi.—Mateo 11:30.
5. Mɛni hewɔ esa akɛ wɔkpa gbɛ akɛ mɛi ni Nyɔŋmɔ mumɔ lɛ nyiɛɔ amɛhiɛ lɛ baajie mlihilɛ kpo amɛtsɔɔ mɛi krokomɛi lɛ?
5 Mlihilɛ hu ji Nyɔŋmɔ mumɔ krɔŋkrɔŋ loo enifeemɔ hewalɛ lɛ yibii lɛ fa. Paulo kɛɛ: “Mumɔ lɛ yibii ji suɔmɔ, miishɛɛ, toiŋjɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, henɔyeli. Enɛɛmɛi lɛ mla ko eguuu.” (Galatabii 5:22, 23) No hewɔ lɛ, mɛni esa akɛ wɔkpa gbɛ yɛ mɛi ni Nyɔŋmɔ mumɔ lɛ nyiɛɔ amɛhiɛ lɛ adɛŋ? Eyɛ faŋŋ akɛ amɛbaajie mlihilɛ kpo amɛtsɔɔ mɛi krokomɛi.
6. Esa akɛ mlihilɛ aha onukpai kɛ Kristofoi krokomɛi lɛ afee amɛnii yɛ mɛɛ gbɛ nɔ?
6 Abaanyɛ ajie mlihilɛ kpo yɛ gbɛi babaoo nɔ. Wɔtsɔɔ mlihilɛ kɛ wɔnaa mɔbɔ. Akɛ nɔkwɛmɔ nɔ lɛ, onukpai ni ji Kristofoi lɛ amli hi kɛ amɛjie mɔbɔnalɛ kpo amɛtsɔɔ efɔŋfeelɔ ni etsake etsui ni amɛtao akɛ amɛaaye amɛbua lɛ yɛ mumɔŋ. Su ni ji mlihilɛ ni Nyɔŋmɔ kɛba lɛ haa nɔkwɛlɔi toɔ amɛtsui shi, amɛsusuɔ mɛi ahe, amɛnaa mɔbɔ, ni amɛmli jɔ. Etsirɛɔ amɛ koni ‘amɛkɛ tooiku lɛ aye yɛ mlijɔlɛ naa.’ (Bɔfoi lɛ Asaji 20:28, 29) Yɛ anɔkwale mli lɛ esa akɛ mumɔ lɛ yibii ni ji mlihilɛ lɛ aha Kristofoi fɛɛ afee mɛi ni naa mɔbɔ, mɛi ni toɔ amɛtsui shi, mɛi ni susuɔ mɛi krokomɛi ahe, mɛi ni yɔɔ musuŋtsɔlɛ, mɛi ni jieɔ naanyobɔɔ su kpo, kɛ mɛi ni sumɔɔ gbɔfeemɔ.
Kwa Mlihilɛ ni Egba Afa Lɛ
7. Mɛni hewɔ obaanyɛ okɛɛ akɛ mlihilɛ ni egba afa lɛ ji gbɔjɔmɔ lɛ?
7 Mɛi komɛi susuɔ mlihilɛ he akɛ eji gbɔjɔmɔ. Amɛnuɔ he akɛ esa akɛ mɔ ko afee keketee, mɔ ni ebuuu mɔ po yɛ bei komɛi amli koni hewalɛ ni eyɔɔ lɛ asa mɛi krokomɛi ahiɛ. Shi awie jogbaŋŋ akɛ, “mɔ ni egbɔjɔ lɛ tsɔɔ bu ni ebuuu mɔ lɛ nɔ ekɛkaseɔ hewalɛ-namɔ.” Yɛ anɔkwale mli lɛ, ebiɔ hewalɛ diɛŋtsɛ koni mɔ ko mli ahi ni ekwa mlihilɛ ni egba afa lɛ fɛɛ. Mlihilɛ ni ji Nyɔŋmɔ mumɔ lɛ yibii lɛ jeee su ni egbɔjɔ ni ji su ni ŋmɛɔ jeŋba fɔŋ gbɛ. Shi moŋ, mlihilɛ ni egba afa lɛ ji gbɔjɔmɔ ni haa mɔ kpɛlɛɔ efɔŋfeemɔ nɔ.
8. (a) Mɛɛ gbɛ nɔ Eli fee mɔ ni egbɔjɔ kwraa yɛ ebii lɛ ahe yɛ? (b) Mɛni hewɔ esa akɛ onukpai lɛ akwɛ jogbaŋŋ yɛ amɛhe ni amɛaaŋmɛɛ amɛha mlihilɛ ni egba afa lɛ he lɛ?
8 Israel osɔfonukpa Eli gbɔjɔ yɛ ebihii Hofni kɛ Pinehas ni sɔmɔɔ akɛ osɔfoi yɛ kpeebuu lɛ mli lɛ atsɔsemɔ loo kamɔ mli. Akɛni amɛhiɛ esɔɔɔ afɔleshaa lɛ fa ni Nyɔŋmɔ Mla lɛ kɛhaa amɛ lɛ hewɔ lɛ, amɛhaa amɛtsulɔ heɔ loo ŋmɔŋ kɛjɛɔ mɛi ni bashaa afɔle lɛ adɛŋ dani akɛ kooloo ni akɛba afɔleshaa lɛ fɔ lɛ po yashaa afɔle yɛ afɔleshaa latɛ lɛ nɔ. Eli bihii lɛ hu kɛ yei ni sɔmɔɔ yɛ kpeebuu lɛ shinaa lɛ naa lɛ bɔɔ ajwamaŋ. Shi kɛlɛ, yɛ nɔ najiaŋ ni eeeshwie Hofni kɛ Pinehas kɛjɛ amɛsɔɔmɔ nitsumɔ lɛ mli lɛ, Eli kã amɛhiɛ fioo kɛkɛ, ekɛ woo haa ebihii lɛ moŋ fe Nyɔŋmɔ. (1 Samuel 2:12-29) Ŋwanejee ko kwraa bɛ he akɛ no hewɔ ni “nakai gbii lɛ amli lɛ Yehowa daaŋ wiemɔ he jaraa” lɛ! (1 Samuel 3:1, NW) No hewɔ lɛ esaaa akɛ onukpai ni ji Kristofoi lɛ kɛ amɛhe haa apasa susumɔi loo amɛjieɔ mlihilɛ ni egba afa ni baanyɛ ekɛ asafo lɛ mumɔŋ shihilɛ awo oshara mli lɛ kpo. Anɔkwa mlihilɛ lɛ ŋamɔɔɔ ehiŋmɛi yɛ wiemɔi kɛ nifeemɔi gbohii ni kuɔ tɛi ni Nyɔŋmɔ efolɔ eshwie shi lɛ amli lɛ hiɛ.
9. (a) Mɛɛ su baaye abua wɔ ni wɔkwa wɔhe ni wɔɔŋmɛɛ wɔha mlihilɛ ni egba afa? (b) Yesu jie hewalɛ kpo yɛ Nyɔŋmɔ jalɔi ni amɛkwa hemɔkɛyeli lɛ ahe nii ni etsu lɛ mli yɛ mɛɛ gbɛ nɔ?
9 Kɛ wɔɔkwa mlihilɛ ni egba afa ni wɔɔjie kpo wɔtsɔɔ lɛ, belɛ esa kɛ wɔsɔle wɔbi Nyɔŋmɔ yelikɛbuamɔ koni wɔna hewalɛ ni jeɔ kpo yɛ lalatsɛ lɛ wiemɔi nɛɛ amli lɛ: “Nyɛjea minɔ nyɛyaa, nyɛ efɔŋfeelɔi, koni maye minyɔŋmɔ lɛ kitai lɛ anɔ.” (Lala 119:115) Ehe miihia hu ni wɔnyiɛ Yesu Kristo, ni tɔɔɔ yɛ mlihilɛ ni egba afa ni ajieɔ lɛ kpo atsɔɔ lɛ mli lɛ nɔkwɛmɔ nɔ lɛ sɛɛ. Yɛ anɔkwale mli lɛ Yesu ji anɔkwa mlihilɛ ni ejie ehe kpo yɛ gbɔmɔtso su mli diɛŋtsɛ. Akɛ nɔkwɛmɔ nɔ lɛ, ‘emusuŋ tsɔ lɛ yɛ gbɔmɛi lɛ ahe ejaakɛ amɛtamɔ mɛi ni ashɔ amɛ nɔ fɛɛ nɔ ni nyiɛ yuuyaa tamɔ tooi ni bɛ kwɛlɔ.’ No hewɔ lɛ gbɔmɛi ni yɔɔ tsuijurɔ lɛ nu he akɛ amɛbaanyɛ amɛbɛŋkɛ Yesu, ni amɛkɛ amɛbii bibii po aba eŋɔɔ. Ni bo lɛ susumɔ mlihilɛ kɛ mɔbɔnalɛ ni ejie kpo etsɔɔ beni “eloo amɛ atuu, ni eŋɔ eniji eshwie amɛnɔ ni ejɔɔ amɛ” lɛ he okwɛ! (Mateo 9:36; Marko 10:13-16) Eyɛ mli akɛ Yesu mli hi moŋ, shi kɛlɛ eyɛ shiŋŋ yɛ nɔ ni ja yɛ eŋwɛi Tsɛ lɛ hiɛ lɛ he. Yesu ekpɛlɛɛɛ efɔŋfeemɔ nɔ kɔkɔɔkɔ; eyɛ hewalɛ ni Nyɔŋmɔ kɛha lɛ ni ekɛaawie eshi jamɔ mli hiɛnyiɛlɔi osatofoi lɛ. Eti sane nɛɛ mli shii abɔ yɛ Mateo 23:13-26: “Kpoo ha nyɛ, woloŋmalɔi kɛ Farisifoi osatofoi!” Yesu tsɔɔ nɔ hewɔ ni ŋwɛi kojomɔ fɔbuu sa amɛ lɛ yɛ eko fɛɛ eko mli.
Mlihilɛ Tsa Suɔmɔ Nɔ
10. Yesu kaselɔi lɛ jie mlihilɛ kɛ suɔmɔ kpo amɛtsɔɔ amɛnanemɛi heyelilɔi lɛ yɛ mɛɛ gbɛ nɔ?
10 Yesu wie yɛ esɛɛnyiɛlɔi lɛ ahe akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Ni mɛni ji gbɛi sɔrɔtoi ni akɛnaa suɔmɔ ni kadiɔ Yesu anɔkwa kaselɔi lɛ ateŋ ekome? Paulo kɛɛ: “Suɔmɔ toɔ etsui shi, emli hi.” (1 Korintobii 13:4) Ni wɔɔto wɔtsui shi ni wɔmli ahi lɛ tsɔɔ akɛ wɔnyɛɔ wɔdamɔɔ emuu ni mɛi krokomɛi yeee lɛ kɛ amɛtɔmɔi anaa, tamɔ bɔ ni Yehowa kɛ mlihilɛ feɔ lɛ. (Lala 103:10-14; Romabii 2:4; 2 Petro 3:9, 16) Kristofoi asuɔmɔ kɛ mlihilɛ hu jieɔ amɛhe kpo kɛ nibii amli bawa kɛha nanemɛi heyelilɔi yɛ shikpɔŋ lɛ nɔ he ko. Kristofoi ni yɔɔ hei krokomɛi lɛ kɛ nyɛmimɛi asuɔmɔ jieɔ nɔ ni fe ‘adesa mlihilɛ’ kpo amɛtsɔɔ kɛtsɔɔ heloo naa nibii ni amɛkɛkeɔ koni akɛye abua Yehowa jalɔi ni tamɔ nɛkɛ lɛ nɔ.—Bɔfoi lɛ Asaji 28:2.
11. Kɛ aawie yɛ Ŋmalɛ naa lɛ, mɛni ji suɔmɔ-mlihilɛ lɛ?
11 Akɛ mlihilɛ tsaa suɔmɔ nɔ yɛ wiemɔ “suɔmɔ kɛ mlihilɛ” ni afɔɔ kɛ nitsumɔ yɛ Ŋmalɛi lɛ amli lɛ mli. Enɛ tsɔɔ mlihilɛ ni jɛ anɔkwa suɔmɔ mli. Hebri wiemɔ ni atsɔɔ shishi akɛ “suɔmɔ-mlihilɛ” (cheʹsedh) lɛ kɔɔ nibii babaoo he fe mlijɔlɛ kwɛmɔ. Eji mlihilɛ ni tsɔɔ suɔmɔ nɔ ekɛ ehe kpɛtɛɔ nɔ ko he kɛyashiɔ be mli ni yiŋtoo hewɔ ni ekɛfee nakai lɛ baa mli. Ajieɔ Yehowa suɔmɔ-mlihilɛ, loo anɔkwa suɔmɔ lɛ kpo yɛ gbɛi sɔrɔtoi anɔ. Akɛ nɔkwɛmɔ nɔ lɛ, ajieɔ lɛ kpo yɛ eyiwalaheremɔ kɛ ehebuu nifeemɔi lɛ amli.—Lala 6:4; 40:11; 143:12, NW.
12. Kɛ Yehowa tsuji sɔle kɛha yelikɛbuamɔ loo jiemɔ lɛ, amɛbaanyɛ amɛna nɔmimaa yɛ mɛni he?
12 Belɛ ebɛ naakpɛɛ akɛ Yehowa suɔmɔ kɛ emlihilɛ lɛ gbalaa gbɔmɛi kɛbɛŋkɛɔ lɛ! (Yeremia 31:3) Kɛ yiwalaheremɔ loo yelikɛbuamɔ he miihia Nyɔŋmɔ anɔkwa tsuji lɛ, amɛle akɛ esuɔmɔ kɛ mlihilɛ lɛ ji anɔkwa suɔmɔ lɛlɛŋ, ni ehaŋ amɛnine anyɛ shi. No hewɔ lɛ amɛbaanyɛ amɛsɔle yɛ hemɔkɛyeli mli, taakɛ lalatsɛ ni wie nɛkɛ lɛ fee lɛ: “Shi mi lɛ, osuɔmɔ kɛ mlihilɛ lɛ nɔ mikɛ mihe fɔɔ; ha mitsui anya yɛ oyiwalaheremɔ lɛ mli.” (Lala 13:5, NW) Akɛni Nyɔŋmɔ suɔmɔ lɛ ji anɔkwa hewɔ lɛ, etsuji kɛ amɛhiɛ efɔɔɔ esuɔmɔ kɛ mlihilɛ lɛ nɔ yaka. Kɛ amɛsɔle kɛha yelikɛbuamɔ loo jiemɔ lɛ, amɛyɛ nɛkɛ nɔmimaa nɛɛ: “Ejaakɛ Yehowa shɛŋ emaŋ lɛ efɔŋ, ni ekwaŋ egbɛfaŋnɔ lɛ.”—Lala 94:14.
Mlihilɛ Mli Sɛɛnamɔi
13, 14. Mɛni hewɔ mɔ ni mli hi lɛ naa nanemɛi anɔkwafoi lɛ?
13 Yehowa tsuji jieɔ “mɔbɔnalɛ kɛ musuŋtsɔlɛ kpo” amɛtsɔɔ amɛnyɛmimɛi amɛkɛ-kaseɔ lɛ. (Zakaria 7:9; Efesobii 5:1) “Nii ni asumɔɔ yɛ gbɔmɔ mli ji esuɔmɔ kɛ mlihilɛ,” ni mɔ ni jieɔ nɛkɛ su nɛɛ kpo lɛ nine shɛɔ nyɔmɔwoo babaoo nɔ. (Abɛi 19:22, NW) Mɛni ji enɛɛmɛi ateŋ ekomɛi?
14 Mlihilɛ haa wɔkɛ ŋaalee tsuɔ nii ni eyeɔ ebuaa wɔ koni wekukpaa kpakpa abaka wɔkɛ mɛi krokomɛi ateŋ. Mɔ ni le ŋaa lɛ wieɔ ni efeɔ nii loo etsuɔ shihilɛi ni mli wawai ahe nii yɛ gbɛi ni tsɔɔ mɔ he susumɔ ni wooo mɔ ko mlifu nɔ. Yɛ be mli ni atsiɔ he kɛjɛɔ “mɔ ni yi wa” lɛ he lɛ, “mɔ ni naa mɔbɔ lɛ, lɛ diɛŋtsɛ esusuma ejurɔ efeɔ.” (Abɛi 11:17) Gbɔmɛi tsiɔ amɛhe kɛjɛɔ yiwalɔ he, shi mɔ ni jieɔ suɔmɔ kɛ mlihilɛ kpo etsɔɔ amɛ lɛ ji mɔ ni amɛbɛŋkɛɔ. No hewɔ lɛ, mɔ ni mli hi lɛ yɛ nanemɛi anɔkwafoi.—Abɛi 18:24.
15. Mɛɛ hewalɛ mlihilɛ baanyɛ ana yɛ shia ni jamɔ egbala mli lɛ mli?
15 Ŋa Kristofonyo ni yɔɔ wu ni heee yeee lɛ baanyɛ agbala lɛ kɛba Nyɔŋmɔ anɔkwale lɛ he kɛtsɔ su ni tamɔ mlihilɛ nɔ. Dani yoo lɛ aaakase anɔkwale lɛ ni eeewo “gbɔmɔ hee ni abɔɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ,” no mli lɛ ekolɛ ejeee mɔ ni mli hi, ekolɛ eji mɔ ni beɔ po. (Efesobii 4:24) Eji ewu lɛ le abɛi lɛ ekomɛi po kulɛ, ekolɛ ebaakpɛlɛ nɔ akɛ “yoo bei tamɔ tsu yiteŋ nu ni tserɛɔ shwieɔ shi” ni “faŋ nɔ ni oyahi ŋa mli fe ni okɛ yoo beilɔ kɛ mlilatsɛ aaahi shi.” (Abɛi 19:13; 21:19) Shi agbɛnɛ ŋa Kristofonyo lɛ jeŋba ni he tse kɛ bulɛ ni mli kwɔ, kɛ sui ni tamɔ mlihilɛ lɛ baaye abua lɛ ni enine ashɛ ehefatalɔ lɛ nɔ kɛba anɔkwa hemɔkɛyeli lɛ mli. (1 Petro 3:1, 2) Hɛɛ, enɛ baanyɛ afee emlihilɛ lɛ he nyɔmɔwoo lɛ ekome.
16. Mlihilɛ ni ajieɔ lɛ kpo atsɔɔ wɔ lɛ he baaba sɛɛnamɔ aha wɔ yɛ mɛɛ gbɛ nɔ?
16 Mlihilɛ ni ajieɔ lɛ kpo atsɔɔ wɔ lɛ he baaba sɛɛnamɔ ejaakɛ ebaanyɛ eha wɔna mɔbɔ ni wɔkɛ sane ake. Akɛ nɔkwɛmɔ nɔ lɛ, kɛ mumɔŋ yelikɛbuamɔ ko he miihia wɔ ni akɛ wɔ ye yɛ mlihilɛ kɛ mlijɔlɛ naa lɛ, ani enɛ haŋ wɔfee mɛi ni baasumɔ ni amɛkɛ mɛi krokomɛi aye yɛ nakai gbɛ nɔ nɔŋŋ? Ojogbaŋŋ, abaanyɛ akpa mlihilɛ kɛ mlijɔlɛ nifeemɔ gbɛ kɛjɛ mɛi ni he esa yɛ mumɔŋ lɛ adɛŋ, ejaakɛ Paulo ŋma akɛ: “Anyɛmimɛi, kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ, nyɛsaa nakai mɔ lɛ ekoŋŋ yɛ mlijɔlɛ mumɔ mli; ni ole ohe nɔkwɛmɔ, koni bo hu akakao.” (Galatabii 6:1) Onukpai ni ahala amɛ lɛ kɛ mlijɔlɛ kɛ mlihilɛ wieɔ kɛ amɛmiitao ni amɛye amɛbua nanemɛi heyelilɔi ni tɔ̃ɔ lɛ. Kɛji akɛ wɔ diɛŋtsɛ lɛ wɔnine eshɛ yelikɛbuamɔ ni mlihilɛ yɔɔ mli ni tamɔ nɛkɛ nɔ loo wɔnine shɛko nɔ po lɛ, kɛlɛ, mɛni Nyɔŋmɔ kpaa gbɛ kɛjɛɔ mɛi fɛɛ ni sɔmɔɔ lɛ lɛ adɛŋ? Esa akɛ Kristofoi fɛɛ ajie mlihilɛ kpo amɛtsɔɔ mɛi krokomɛi ni amɛbo Paulo ŋaawoo nɛɛ toi: “Nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe, nyɛŋɔ-fafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.” (Efesobii 4:32) Shi kɛ mɔ ko kɛ sane ko eke wɔ loo aye abua wɔ kɛjɛ mumɔŋ shihilɛ ko ni mli wa mli yɛ mlihilɛ gbɛ nɔ lɛ, esa akɛ enɛ aha nyɛmɔ ni wɔ diɛŋtsɛ wɔyɔɔ akɛ wɔkɛ sane aaake, wɔna musuŋtsɔlɛ, ni wɔmli ahi lɛ afa.
Ha Ohiɛ Asɔ Nyɔŋmɔ Duromɔ loo Mlihilɔ ni Esaaa Wɔ Lɛ
17. Akɛni wɔji eshafeelɔi kɛjɛ fɔmɔ mli hewɔ lɛ, mɛɛ mlihilɛ nɛkɛ esa akɛ wɔkɛ shidaa krɛdɛɛ ko aha yɛ he lɛ?
17 Akɛni afɔ wɔ fɛɛ akɛ eshafeelɔi ni abu wɔ gbele fɔ hewɔ lɛ, mlihilɛ ko yɛ ni esa akɛ wɔhiɛ asɔ no jogbaŋŋ. No ji Yehowa Nyɔŋmɔ duromɔ loo emlihilɛ ni esaaa wɔ lɛ. Ni aaakpɔ eshafeelɔi kɛaajɛ gbele fɔbuu shishi ni abu amɛ jalɔi lɛ ji mlihilɛ ni esaaa amɛ kwraa. Paulo, ni tsi Nyɔŋmɔ duromɔ loo emlihilɛ ni esaaa wɔ lɛ ta shii 90 yɛ ewoji 14 ni jɛ mumɔŋ lɛ mli lɛ kɛɛ Kristofoi ni hi blema Roma lɛ akɛ: “Mɛi fɛɛ efee esha, ni Nyɔŋmɔ anunyam lɛ ebɔ amɛ, ni akɛ eduromɔ [mlihilɛ ni esaaa] lɛ buɔ amɛ bem yaka kɛtsɔɔ kpɔmɔ ni yɔɔ Kristo Yesu mli lɛ nɔ.” (Romabii 3:23, 24) Kwɛ bɔ ni esa akɛ wɔhiɛ asɔ duromɔ loo mlihilɛ ni esaaa wɔ ni Yehowa Nyɔŋmɔ jie lɛ kpo lɛ!
18, 19. Te wɔɔfee tɛŋŋ wɔkwa Nyɔŋmɔ duromɔ loo emlihilɛ ni esaaa wɔ lɛ ni wɔɔhe lɛ yakatswaa lɛ?
18 Kɛ wɔfee mɛi ni hiɛ esɔɔɔ nii lɛ, no lɛ wɔbaalaaje yiŋtoo ni yɔɔ Nyɔŋmɔ duromɔ loo emlihilɛ ni esaaa wɔ lɛ sɛɛ lɛ. Yɛ enɛ hewɔ lɛ, Paulo kɛɛ: “No hewɔ lɛ wɔji bɔfoi yɛ Kristo najiaŋ, tamɔ akɛ Nyɔŋmɔ etsɔ wɔnɔ ekɛ mɛi miiwie. Wɔdamɔɔ Kristo najiaŋ wɔkpaa nyɛ fai akɛ: ‘Nyɛhaa akpataa nyɛ kɛ Nyɔŋmɔ teŋ!’ Ejaakɛ mɔ ni leee esha lɛ, wɔ hewɔ lɛ, eha etsɔ esha, koni wɔ lɛ wɔtsɔmɔ Nyɔŋmɔ jalɛ yɛ emli. Shi akɛ nɔ ni hefatalɔi nitsulɔi ji wɔ hewɔ lɛ, wɔwieɔ wɔtsɔɔ nyɛ hu, ni nyɛkahe Nyɔŋmɔ duromɔ [emlihilɛ ni esaaa] lɛ yakatswaa; ejaakɛ ekɛɛ [yɛ Yesaia 49:8, Septuagint] akɛ: ‘Be ni sa mli mibo bo toi yɛ, ni walaheremɔ gbi lɛ nɔ hu miye mibuao yɛ.’ Naa, be ni sa jogbaŋŋ nɛ; naa, walaheremɔ gbi nɛ. Ni asaŋ wɔtooo mɔ ko mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ; shi moŋ nɔ fɛɛ nɔ mli lɛ, wɔkɛ wɔhe tsɔɔ akɛ Nyɔŋmɔ sɔɔlɔi.” (2 Korintobii 5:20–6:4) Mɛni yɔɔ Paulo jwɛŋmɔ mli loo etaoɔ etsɔɔ?
19 Kristofoi ni afɔ amɛ mu lɛ ji bɔfoi ni damɔɔ Kristo najiaŋ, ni asafo babaoo lɛ ji etsuji. Amɛ fɛɛ amɛfeɔ ekome amɛkɛwoɔ gbɔmɛi ahewalɛ ni akpata amɛkɛ Nyɔŋmɔ teŋ koni amɛnine ashɛ yiwalaheremɔ nɔ. Paulo sumɔɔɔ ni mɔ ko nine ashɛ Yehowa Nyɔŋmɔ duromɔ loo emlihilɛ ni esaaa kɛtsɔ Yesu Kristo nɔ lɛ nɔ yakatswaa. Enɛ baanyɛ aba wɔ nɔ kɛji wɔtsuuu nitsumɔ ni nakai duromɔ loo mlihilɛ ni esaaa wɔ lɛ saa wɔ kɛha etsumɔ lɛ. Akɛni wekukpaa kpakpa ebaka wɔkɛ Nyɔŋmɔ teŋ, akɛ mɛi ni akpata amɛkɛ lɛ teŋ hewɔ lɛ, wɔheŋ eduromɔ lɛ yakatswaa kɛji wɔtsu “kpatamɔ sɔɔmɔ lɛ [ni] no ji akɛ Nyɔŋmɔ tsɔ Kristo nɔ ekpata lɛ diɛŋtsɛ ekɛ je lɛ teŋ” lɛ he nii lɛ. (2 Korintobii 5:18, 19) Wɔ hu wɔbaafee mɛi krokomɛi ejurɔ babaoo kɛtsɔ yelikɛbuamɔ ni wɔkɛaaha amɛ koni akpata amɛkɛ Nyɔŋmɔ teŋ lɛ nɔ.
20. Mɛni wɔbaapɛi mli yɛ enɛ sɛɛ?
20 Yehowa tsuji kɛ amɛbe kɛ amɛshika tsuɔ mlihilɛ nitsumɔi yɛ be mli ni amɛtaoɔ ni amɛye amɛbua gbɔmɛi yɛ mumɔŋ kɛtsɔ Kristofoi asɔɔmɔ nitsumɔ lɛ nɔ lɛ. Shi mɛni wɔbaanyɛ wɔkase kɛjɛ Ŋmalɛ mli nɔkwɛmɔ nii ni kɔɔ mlihilɛ ni akɛtsuɔ nii lɛ mli? Agbɛnɛ nyɛhaa wɔpɛia enɛɛmɛi ekomɛi amli ni wɔsusua gbɛi krokomɛi ni wɔɔtsɔ nɔ wɔsa Yehowa hiɛ kɛtsɔ mlihilɛ ni wɔɔjie kpo wɔtsɔɔ lɛ nɔ lɛ ahe.
Te Obaaha Hetoo Oha Tɛŋŋ?
◻ Mɛni ji mlihilɛ?
◻ Mɛɛ gbɛ nɔ wɔɔtsɔ wɔkwa wɔhe ni wɔɔŋmɛɛ wɔha mlihilɛ ni egba afa Iɛ yɛ?
◻ Mɛni hewɔ Yehowa webii baanyɛ amɛkɛ amɛhe afɔ esuɔmɔ kɛ emlihilɛ nɔ lɛ?
◻ Mɛni ji mlihilɛ mli nyɔmɔwoo Iɛ ekomɛi?
◻ Mɛni kɛ wɔfee ni ehaŋ wɔhe Nyɔŋmɔ duromɔ loo emlihilɛ ni esaaa wɔ lɛ yakatswaa Iɛ?
[Mfoniri ni yɔɔ baafa 13]
Mlihilɛ haa Kristofoi onukpai naa tsuishitoo, mɛi ahe susumɔ, kɛ musuŋtsɔlɛ
[Mfoniri ni yɔɔ baafa 15]
Ŋa Kristofonyo Iɛ mlihilɛ baanyɛ aye abua lɛ ni enine ashɛ ewu Iɛ nɔ kɛba anɔkwa hemɔkɛyeli Iɛ he
[Mfoniri ni yɔɔ baafa 17]
Wɔbaanyɛ wɔjie mlihilɛ ni fe fɛɛ kpo wɔtsɔɔ mɛi krokomɛi kɛtsɔ yelikɛbuamɔ ni wɔkɛaaha amɛ koni amɛtsɔmɔ mɛi ni akpata amɛkɛ Nyɔŋmɔ teŋ Iɛ nɔ