Suɔmɔ (Agape)—Nɔ Ni Ejeee Kɛ Nɔ Ni Eji
“Nyɛkɛ suɔmɔ afataa’ [nyɛ] nyɛmimɛi ahedɔɔ lɛ he.”—2 PETRO 1:5, 7, New World Translation.
1. (a) Mɛɛ su nɛkɛ Biblia lɛ maa nɔ mi fe fɛɛ? (b) Mɛɛ Hela wiemɔi ejwɛ afɔɔ eshishitsɔɔmɔ akɛ “suɔmɔ” lɛ, ni te nɔ ni awieɔ he yɛ 1 Yohane 4:8 lɛ.
KƐ SU loo jeŋba kpakpa ko yɛ ni Nyɔŋmɔ Wiemɔ, ni ji Biblia lɛ buɔ akɛ eta fɛɛ nɔ lɛ, no ji suɔmɔ. Ayɛ wiemɔi ejwɛ yɛ Hela, ni ji wiemɔ ni aŋma Kristofoi a-Ŋmalɛi lɛ yɛ mli klɛŋklɛŋ lɛ mli ni afɔɔ shishi tsɔɔmɔ akɛ “suɔmɔ.” Shi, suɔmɔ ni wɔsusuɔ he bianɛ lɛ jeee e’ros (wiemɔ ni anaaa yɛ Kristofoi a-Hela Ŋmalɛi lɛ amli), ni damɔ bɔlɛnamɔ akɔnɔ nɔ lɛ; ni asaŋ ejeee stor·geʹ, henumɔ ni damɔ la wekukpaa nɔ lɛ; ni ejeee phi·liʹa, ni ji naanyobɔɔ suɔmɔ ni miishɛɛ yɔɔ mli, ni damɔ bɔ ni abuɔ he ahaa, ni asusu he yɛ nikasemɔ ni tsɔ hiɛ mli lɛ. Shi moŋ, no ji a·gaʹpe—suɔmɔ ni damɔ shishitoo mla nɔ, ni abaanyɛ akɛɛ akɛ etamɔ pɛsɛmkunya ni afeee, suɔmɔ ni bɔfo Yohane wie he beni ekɛɛ: “Nyɔŋmɔ lɛ, suɔmɔ ji lɛ” lɛ.—1 Yohane 4:8.
2. Mɛni awie jogbaŋŋ yɛ suɔmɔ (a·gaʹpe) he?
2 Suɔmɔ ni ji (a·gaʹpe) nɛɛ he Nilelɔ William Barclay wie yɛ ewolo, New Testament Words lɛ mli akɛ: “Agapē kɔɔ jwɛŋmɔ lɛ he: ejeee henumɔ ko kɛkɛ ni teɔ shi yɛ wɔtsuii amli ni abiii [taakɛ eji yɛ phi·liʹa he lɛ]; eji shishitoo mla ni wɔdamɔɔ nɔ wɔhiɔ shi diɛŋtsɛ. Agapē kɔɔ suɔmɔnaa nifeemɔ he babaoo. Eji kunimyeli, kɛ nɔ ni ányɛ atsu. Yɛ adebɔɔ su naa lɛ, mɔ ko mɔ ko sumɔɔɔ ehenyɛlɔi. Ni mɔ ko aaasumɔ ehenyɛlɔi lɛ ji wɔ adebɔɔ naa suɔmɔnaa nii kɛ henumɔi fɛɛ anɔ kunimyeli. Yɛ anɔkwale mli lɛ, nɛkɛ agapē nɛɛ . . . ji hewalɛ ni akɛsumɔɔ mɛi ni anyɛɛɛ asumɔ amɛ lɛ, ni wɔsumɔ gbɔmɛi ni wɔsumɔɔɔ amɛsane.”
3. Mɛɛ nɔmimaa Yesu Kristo kɛ Paulo fɛɛ kɛha suɔmɔ?
3 Hɛɛ, nibii ni haa Yehowa Nyɔŋmɔ jamɔ krɔŋŋ lɛ feɔ sɔrɔto yɛ jamɔi krokomɛi fɛɛ he ji bɔ ni emaa suɔmɔ ni tamɔ nɛkɛ nɔ mi lɛ. Bɔ ni Yesu Kristo jaje kitai wuji enyɔ lɛ eha lɛ ja naakpa: “Klɛŋklɛŋ nɔ ji enɛ, . . . ’Suɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ, kɛ osusuma fɛɛ, kɛ ojwɛŋmɔ fɛɛ, kɛ onyɛmɔ fɛɛ.’ Nɔ ni ji enyɔ lɛ tamɔ no, ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ Kita ko bɛ ni fe enɛɛmɛi.” (Marko 12:29-31) Bɔfo Paulo ma suɔmɔ nɛɛ nɔŋŋ nɔ mi yɛ 1 Korintobii, yitso 13. Yɛ be mli ni ema nɔ mi akɛ suɔmɔ ji su titri ni anyɛɛɛ ajie yɛ mli lɛ, emu sane naa akɛ: “Shi agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ ji amɛteŋ nɔ ni fe fɛɛ.” (1 Korintobii 13:13) Yesu wie yɛ gbɛ ni ja nɔ akɛ suɔmɔ baafee kadimɔ nii ni haa ayɔseɔ esɛɛnyiɛlɔi lɛ.—Yohane 13:35.
Nii ni Suɔmɔ Jeee
4. Suɔmɔ sui kpakpai enyiɛ kɛ esui ni ehiii lɛ enyiɛ Paulo tsi ta yɛ 1 Korintobii 13:4-8?
4 Ama nɔ ko nɔ mi akɛ eyɛ mlɛo akɛ aaakɛɛ nɔ ni suɔmɔ jeee fe ni aaakɛɛ nɔ ni eji. Anɔkwale ko yɛ enɛ mli, ejaakɛ bɔfo Paulo tsiɔ nibii nɛɛhu ni suɔmɔ jeee ta kɛ nibii kpawo ni eji ta yɛ yitso ni kɔɔ suɔmɔ he lɛ mli, yɛ 1 Korintobii 13, 1Kor 13 kukuji 4 kɛyashi 8 lɛ.
5. Te atsɔɔ “awuŋayeli” mli aha tɛŋŋ, ni akɛtsuɔ nii yɛ gbɛ kpakpa nɔ yɛ Ŋmalɛi lɛ amli yɛ mɛɛ gbɛ nɔ?
5 Klɛŋklɛŋ nii ni Paulo kɛɛ suɔmɔ jeee ji akɛ “[e]yeee awuŋa,” (NW). Ebiii ni atsɔɔ enɛ mli pii ejaakɛ awuŋayeli kpakpa kɛ efɔŋ yɛ. Wiemɔi komekomei ashishitsɔɔmɔ wolo ko tsɔɔ “awuŋayeli” mli akɛ “nɔ ni ekpɛlɛɛɛ bienyɛyeli nɔ” ni akɛ “ebiɔ he ni atuɔ ahaa ekome too.” No hewɔ lɛ Mose jaje yɛ 2 Mose 34:14 akɛ: “Ni okaja nyɔŋmɔ kroko. Ejaakɛ Yehowa lɛ, awuŋayelɔ ji egbɛi; Mawu awuŋayelɔ ni.” Ni Yehowa kɛɔ yɛ 2 Mose 20:5 akɛ: “Ejaakɛ mi, Yehowa, o-Nyɔŋmɔ lɛ, miji Nyɔŋmɔ awuŋayelɔ.” Ni nakai nɔŋŋ hu bɔfo Paulo ŋma akɛ: “Ejaakɛ miiye nyɛhe awuŋa miiha Nyɔŋmɔ.”—2 Korintobii 11:2.
6. Mɛɛ Ŋmalɛ mli nɔkwɛmɔ nii tsɔɔ nɔ hewɔ ni suɔmɔ yeee awuŋa lɛ?
6 Shi, yɛ fɛɛ sɛɛ lɛ, “awuŋayeli” ehiɛɛɛ gbɛi kpakpai, ni yɛ enɛ hewɔ lɛ, akɛfata heloo lɛ nitsumɔi ni jeɔ kpo yɛ Galatabii 5:20 lɛ ahe. Hɛɛ, awuŋayeli ni tamɔ nɛkɛ lɛ ji pɛsɛmkunya nɔ ni ekanyaa hetsɛ̃, ni hetsɛ̃ ji su ni teɔ shi eshiɔ suɔmɔ. Awuŋayeli ha Kain he tsɛ̃ Habel kɛyashɛ he ni egbe lɛ, ni no nɔŋŋ ha Yosef tsɛ bii nyɔŋma lɛ he tsɛ̃ lɛ kɛyashɛ he ni amɛmiisumɔ ni amɛgbe lɛ kwraa po. Suɔmɔ yeee mɛi krokomɛi anii ni amɛna loo hegbɛi ahe awuŋa, taakɛ Maŋtsɛ Ahab kɛ hiɛkɔ̃ɔ ye Nabot weintrom lɛ he awuŋa lɛ.—1 Maŋtsɛmɛi 21:1-19.
7. (a) Mɛni ni ba ni tsɔɔ akɛ Yehowa nyaaa shwa ni ashwaa lɛ he? (b) Mɛni hewɔ suɔmɔ eshwaaa yɛ gbɛ ni jwɛŋmɔ bɛ mli nɔ lɛ?
7 Paulo kɛɔ wɔ yɛ no sɛɛ akɛ suɔmɔ “eshwãaa.” Shwãa tsɔɔ suɔmɔ ni bɛ, ejaakɛ ehaa mɔ ko kɛ ehe woɔ gbɛhe ko ni haa enɔ kwɔɔ fe mɛi krokomɛi lɛ mli. Yehowa sumɔɔɔ mɛi ni shwãa, taakɛ wɔnaa kɛjɛɔ bɔ ni eba Maŋtsɛ Nebukadnezar shi eha beni eshwãa lɛ. (Daniel 4:30-35) Ashwãa yɛ bei pii amli yɛ gbɛ ni jwɛŋmɔ bɛ mli nɔ akɛni mɔ mii eshɛ nɔ ni enyɛ etsu loo eheloo gbɛfaŋ nibii ahe fe nine lɛ hewɔ. Mɛi komɛi baasumɔ ni amɛfee fuu yɛ omanye ni amɛye yɛ Kristofoi asɔɔmɔ nitsumɔ lɛ mli lɛ hewɔ. Mɛi krokomɛi hu tamɔ onukpa ko ni fee fuu ni ehe bahia ni etswa enanemɛi tɛlifon yɛ kar hee ni ejara ji Amerika shika dɔlai 50,000 ni ehe lɛ hewɔ lɛ. Suɔmɔ bɛ enɛɛmɛi fɛɛ mli ejaakɛ ehaa mɔ ni shwãa lɛ feɔ ehe mɔ ni nɔ kwɔ fe mɛi ni boɔ lɛ toi lɛ.
8. (a) Mɛni ji Yehowa su yɛ mɛi ni pupuɔ amɛhe lɛ ahe? (b) Mɛni hewɔ suɔmɔ efeee enii nakai lɛ?
8 Kɛkɛ ni akɛɛ wɔ akɛ suɔmɔ “efeee pupuupu.” Mɔ ni feɔ pupuupu loo ewooɔ ehe lɛ woɔ ehe nɔ kɛtekeɔ mɛi krokomɛi yɛ gbɛ ni suɔmɔ bɛ mli nɔ. Nilee bɛ su ni tamɔ nɛkɛ mli ejaakɛ “Nyɔŋmɔ lɛ, ekuɔ hewolɔi anaa, shi heshibalɔi eduroɔ.” (Yakobo 4:6) Suɔmɔ efeee nii yɛ gbɛ ni tamɔ nɛkɛ nɔ; ebuɔ mɛi krokomɛi akɛ amɛnɔ kwɔlɔ fe lɛ. Paulo ŋma yɛ Filipibii 2: 2, 3 akɛ: “Nyɛhaa mimiishɛɛ lɛ ayia obɔ, akɛ nyɛmiijwɛŋ nɔ kome, nyɛhiɛ suɔmɔ kome, susuma kome, jwɛŋmɔ kome, ni nyɛkaŋmɛa mligbalamɔi loo yaka anunyam taomɔ gbɛ, shi moŋ nyɛkɛ heshibaa jwɛŋmɔ abubua nyɛnanemɛi fe nyɛ diɛŋtsɛ nyɛhe.” Jwɛŋmɔ ni tamɔ nɛkɛ haa mɛi krokomɛi ahe jɔɔ amɛ, yɛ be mli ni mɔ ni wooo ehe lɛ haaa mɛi krokomɛi ahe ajɔ amɛ yɛ beitsɛ ni eji hewɔ.
9. Mɛni hewɔ suɔmɔ efeee nii ni esaaa lɛ?
9 Paulo kɛɛ ekoŋŋ akɛ suɔmɔ “efeee nii ni esaaa.” Wiemɔi komekomei ashishitsɔɔmɔ wolo tsɔɔ “nii ni esaaa” shishi akɛ “jeŋba ni esaaa kwraa loo ebɛ hiŋmɛi nɔ.” Mɔ ni feɔ nii ni esaaa (ni suɔmɔ bɛ mli) lɛ ebuuu mɛi krokomɛi ahenumɔi. Biblia shishitsɔɔmɔi pii tsɔɔ Hela wiemɔ kɛha enɛ lɛ shishi akɛ “mɔ ni hiŋmɛi gbeleko.” Gbɔmɔ ni tamɔ nɛkɛ ebuuu nɔ ni abuɔ akɛ esa ni yɔɔ fɛo lɛ. Eka shi faŋŋ akɛ, mɛi krokomɛi ahesusumɔ yɛ suɔmɔ mli lɛ baaha mɔ ko akpoo nibii fɛɛ ni tsɔɔ hiŋmɛigbelemɔ ni mɔ ko bɛ loo nii ni mɛi aaabu akɛ esaaa kwraa, nibii ni mɛi sumɔɔɔ loo ehaa amɛhe jɔ̃ɔ amɛ lɛ feemɔ.
Nibii Krokomɛi ni Suɔmɔ Jeee
10. Suɔmɔ epeleee lɛ diɛŋtsɛ enɔ̃ yɛ mɛɛ gbɛ nɔ?
10 Nɔ ni nyiɛ sɛɛ lɛ, akɛɛ wɔ akɛ suɔmɔ “epeleee lɛ diɛŋtsɛ enɔ̃,” ni ji akɛ, beni sane eba nibii ni wɔ diɛŋtsɛ wɔsumɔɔ kɛ mɛi krokomɛi anɔ he lɛ. Bɔfo lɛ tsɔɔ mli yɛ he kroko akɛ: “Mɔ ko enyɛko lɛ diɛŋtsɛ eheloo da, shi moŋ elɛɔ lɛ ni ehiɛɔ lɛ dɔdɔɔdɔ.” (Efesobii 5:29) Shi kɛ mpleshii ba nibii ni wɔsumɔɔ kɛ mɔ kroko nɔ teŋ, ni ekɔɔɔ Biblia mli shishitoo mlai ahe lɛ, esa akɛ wɔfee tamɔ bɔ ni Abraham fee Lot lɛ, jɛɛ suɔmɔ mli oha mɔ kroko lɛ ahala nɔ ni esumɔɔ.—1 Mose 13:8-11.
11. Suɔmɔ mli ni wooo la lɛ tsɔɔ mɛni?
11 Suɔmɔ mli fuuu mra hu. No hewɔ lɛ Paulo kɛɔ wɔ akɛ suɔmɔ “mli wooo la.” Ejeee mɔ ni nuɔ nii ahe mra. Ekɛ henɔyeli tsuɔ nii. Mɛi ni amɛbote gbalashihilɛ mli lɛ titri ji mɛi ni esa akɛ amɛkɛ hiɛdɔɔ asusu sane nɛɛ he, ni amɛkawó amɛgbee nɔ ni amɛbolɔ amɛwo amɛhe kɛ mlifu. Shihilɛi komɛi baa ni haa mɔ mli fuɔ mramra, ni nɔ hewɔ ni Paulo na akɛ ehe miihia ni ewo Timoteo ŋaa yɛ he lɛ: “Shi Nuŋtsɔ lɛ tsulɔ lɛ esaaa akɛ ebeɔ, shi moŋ emli ajɔ aha mɛi fɛɛ, mɔ ni le nitsɔɔmɔ, mɔ ni toɔ etsui shi ehaa efɔŋ,”—hɛɛ, emli wooo la—“mɔ ni kɛ mlijɔlɛ wieɔ tsɔɔ mɛi ni kuɔ enaa.”—2 Timoteo 2:24, 25.
12. (a) Mɛɛ gbɛ nɔ suɔmɔ niŋŋ efɔŋ he yɛ? (b) Mɛni hewɔ nilee bɛ mli akɛ wɔkɛ efɔŋ ni afee wɔ lɛ aaato lɛ?
12 Yɛ be mli ni eyaaa nɔ etsɔɔ nibii ni jeee nomɛi suɔmɔ ji lɛ, Paulo wo ŋaa akɛ: “[Suɔmɔ] eniŋŋ efɔŋ he.” No etsɔɔɔ akɛ suɔmɔ kadiii efɔŋ. Yesu tsɔɔ gbɛ ni esa akɛ wɔtsɔ nɔ wɔtsu saji ahe nii kɛ áfee wɔ efɔŋ diɛŋtsɛ. (Mateo 18:15-17) Shi suɔmɔ eŋmɛɛɛ wɔ gbɛ ni wɔhiɛ mlifu mli, wɔbɛ mɛi wɔwo wɔmli. Efɔŋ ni aniŋŋ he lɛ tsɔɔ akɛ wɔkɛ baake ni wɔhiɛ akpa nɔ kɛ atsu sane lɛ he nii yɛ Ŋmalɛ naa agbe naa pɛ. Hɛɛ, kaapiŋ ohe loo ohao ohe babaoo kɛtsɔ efɔŋ nɛɛ he ni ooosusu daa nɔ, ni oojwɛŋ efɔŋ lɛ he!
13. Akɛ akanya nɔ sha he lɛ tsɔɔ mɛni, ni mɛni hewɔ suɔmɔ efeee nakai lɛ?
13 Agbɛnɛ akɛɔ wɔ akɛ, suɔmɔ “nyaaa nɔ sha he.” Je lɛ nyaa nɔsha he, taakɛ anaa yɛ bɔ ni woji ni wieɔ awuiyeli kɛ ajwamaŋbɔɔ, sinii, kɛ TV nɔ nibii ahe lɛ ehe gbɛi waa lɛ. Nɛkɛ nyamɔ nɛɛ fɛɛ ji pɛsɛmkunya nɔ, amɛbuuu Nyɔŋmɔ jalɛ shishitoo mlai loo nɔ ni aaahi aha mɛi krokomɛi. Nɛkɛ pɛsɛmkunya nyamɔ nɛɛ fɛɛ miidu nii yɛ heloo naa, ni yɛ be ni sa mli lɛ amɛbaakpa fitemɔ kɛjɛ amɛheloo lɛ mli.—Galatabii 6:8.
14. Mɛni hewɔ abaanyɛ awie kɛ hekɛnɔfɔɔ akɛ suɔmɔ sɛɛ efooo gbi ko gbi ko lɛ?
14 Agbɛnɛ naagbee nii ni suɔmɔ efeee: “Suɔmɔ sɛɛ efooo gbi ko gbi ko.” Nɔ kome ji akɛ, suɔmɔ sɛɛ efooo loo ebaaa naagbee ejaakɛ Nyɔŋmɔ lɛ suɔmɔ ni, ni lɛ ji “naanɔi a-Maŋtsɛ.” (1 Timoteo 1:17) Amaa nɔ mi kɛhaa wɔ yɛ Romabii 8:38, 39 akɛ suɔmɔ ni Yehowa yɔɔ kɛha wɔ lɛ sɛɛ efoŋ gbi ko gbi ko: “Ejaakɛ miyɛ hewalɛ yɛ nɔ, akɛ gbele jio, wala jio, ŋwɛibɔfoi jio nɔyelɔi jio, hewalɛi jio, nii ni yɔɔ nɛɛ jio, nii ni baaba lɛ jio, ŋwɛi jio, shishi jio, aloo nii ni abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ni yɔɔ Kristo Yesu, wɔ-Nuŋtsɔ lɛ mli lɛ mli.” Agbɛnɛ suɔmɔ sɛɛ efooo kɛ shishinumɔ akɛ etɔɔɔ fa. Suɔmɔ nyɛɔ edamɔɔ shihilɛ fɛɛ shihilɛ naa, edamɔɔ kaa fɛɛ kaa naa.
Nii ni Suɔmɔ Ji
15. Mɛni hewɔ Paulo kɛ tsuishitoo ye klɛŋklɛŋ gbɛhe yɛ suɔmɔ he nibii kpakpai lɛ amli lɛ?
15 Yɛ be mli ni wɔbaa efa ni hi, nibii ni suɔmɔ ji lɛ anɔ lɛ, Paulo jeɔ shishi akɛ: “Suɔmɔ toɔ etsui shi.” Awie akɛ nɔ ko ni ji Kristofoi anaanyobɔɔ ko ehiŋ shi kɛ tsuishitoo bɛ, ni akɛ, kɛ wɔsumɔɔɔ ni wɔŋmɛɔ wɔtsui shi wɔhaa wɔhe. Nakai eji, ejaakɛ wɔ fɛɛ wɔyeee emuu, ni emuu ni wɔyeee lɛ kɛ wɔfatɔɔi lɛ kaa mɛi krokomɛi. Ŋwanejee ko bɛ he akɛ no hewɔ ni Paulo kɛ enɛ ye klɛŋklɛŋ gbɛhe beni etsɔɔ nɔ ni suɔmɔ ji mli lɛ!
16. Mɛɛ gbɛi anɔ nɛkɛ weku mli bii baatsɔ ajie suɔmɔ kpo amɛtsɔɔ amɛhe yɛ?
16 Paulo tsɔɔ mli hu akɛ suɔmɔ “mli hi.” Ni ji akɛ, suɔmɔ yeɔ ebuaa mɔ, esusuɔ mɔ he, ejwɛŋɔ mɔ he. Mlihilɛ jieɔ ehe kpo yɛ nibii wuji kɛ nibii bibii amli. Eka shi faŋŋ akɛ Samarianyo ni na mɔbɔ lɛ miijie mlihilɛ kpo kɛmiitsɔɔ nuu ni yagbee ojotswalɔi ateŋ lɛ. (Luka 10:30-37 ) Suɔmɔ nyaa “ofainɛ” kɛɛmɔ he. Ni aaakɛɛ akɛ, “Okɛ bodobodo lɛ aha mi” lɛ ji famɔ. Kɛ okɛ “ofainɛ” je shishi lɛ, etsɔɔ nibaa. Kɛ wumɛi bo ŋaawoo ni yɔɔ 1 Petro 3:7 lɛ toi lɛ, belɛ amɛmli hi kɛha amɛŋamɛi: “Nakai nɔŋŋ kɛ̃, nyɛ wumɛi, nyɛkɛ amɛ ahia shi yɛ nilee naa, ni nyɛkɛ woo awoa yoo akɛ nɔ ni he waaa tuutu ko, akɛni amɛkɛ nyɛ fɛɛ ji wala duromɔ lɛ wɔfaasei lɛ, koni akatsimɔ nyɛsɔlemɔi lɛ agbɛ.” Ŋamɛi amli hi ha amɛwumɛi kɛ amɛkɛ “bulɛ ni mli kwɔ” ha amɛ. (Efesobii 5:33, NW) Tsɛmɛi amli hi ha amɛbii kɛ amɛdi ŋaawoo ni yɔɔ Efesobii 6:4 lɛ sɛɛ: “Ni nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa] tsɔsemɔ kɛ ŋaawoo lɛ mli.”
17. Suɔmɔ nyaa anɔkwale he yɛ mɛɛ gbɛi enyɔ nɔ?
17 Suɔmɔ nyaaa nɔsha he shi “enyaa anɔkwale he.” Suɔmɔ kɛ anɔkwale nyiɛɔ pɛpɛɛpɛ —Nyɔŋmɔ lɛ, suɔmɔ ni, ni yɛ nakai beaŋ nɔŋŋ lɛ, eji “Nyɔŋmɔ anɔkwafo” hu. (Lala 81:6) Suɔmɔ mli filiɔ lɛ kɛ ena ni anɔkwale miiye kunim ni eekpa apasa he mama; enɛ fata he ni eha Yehowa jalɔi ayi efa babaoo ŋmɛnɛ nakai lɛ. Shi, akɛni anɔkwale teɔ shi eshiɔ nɔsha hewɔ lɛ, abaanyɛ ana jwɛŋmɔ hu akɛ suɔmɔ nyaa anɔkwale he. Suɔmɔ nyãa kɛ anɔkwale ye kunim, taakɛ afaa Yehowa webii ni amɛfee yɛ Babilon Kpeteŋkpele lɛ shigbeemɔ mli lɛ.—Kpojiemɔ 18:20.
18. Suɔmɔ miɔ ŋɔɔ yɛ nii fɛɛ mli yɛ mɛɛ shishinumɔ naa?
18 Paulo kɛɔ wɔ hu akɛ suɔmɔ “miɔ ŋɔɔ yɛ nii fɛɛ mli.” Taakɛ Kingdom Interlinear lɛ tsɔɔ lɛ, susumɔ lɛ ji akɛ suɔmɔ haa nibii fɛɛ nɔ. Egbeee enyɛ bi “he guɔ,” taakɛ efɔŋ feelɔ feɔ lɛ. (Lala 50:20; Abɛi 10:12; 17:9) Hɛɛ, jwɛŋmɔ ni yɔɔ enɛ mli lɛ tamɔ nɔ ni yɔɔ 1 Petro 4:8 lɛ pɛpɛɛpɛ: “Suɔmɔ haa eshai babaoo nɔ.” Shi anɔkwayeli haŋ aha eshai ni hiɛdɔɔ yɔɔ mli ni afee ashi Yehowa kɛ Kristofoi asafo lɛ nɔ.
19. Suɔmɔ heɔ nii fɛɛ eyeɔ yɛ mɛɛ gbɛ nɔ?
19 Suɔmɔ “heɔ nii fɛɛ eyeɔ.” Suɔmɔ hiɛ jwɛŋmɔ kpakpa, jeee jwɛŋmɔ fɔŋ. Enɛ etsɔɔɔ akɛ suɔmɔ heɔ nɔ fɛɛ nɔ eyeɔ ni ebiii loo ekpaaa mli. Ekɛ oyaiyeli heee wiemɔi ni kanyaa mɛi lɛ eyeee. Shi kɛ mɔ ko baana hemɔkɛyeli yɛ Nyɔŋmɔ mli lɛ, belɛ esa akɛ ena nyɛmɔ ni ekɛaahe eye. Suɔmɔ yiŋ efeee lɛ kɔshikɔshi, ewieee eshiii nii kɛkɛ bɔ ni esaaa. Eteee shi ewooo nii ni eeehe eye taakɛ mɛi ni heee Nyɔŋmɔ nɔ amɛyeee, ni heɔ yeɔ kɛkɛ ni jwɛŋmɔ bɛ mli akɛ Nyɔŋmɔ ko bɛ lɛ feɔ lɛ, ni etamɔɔɔ mɛi ni kɛɔ akɛ kɛ Nyɔŋmɔ yɛ jio ebɛ jio amɛleee, ni kɛɔ yɛ gbɛ ni jwɛŋmɔ bɛ mli nɔ akɛ anyɛŋ ale he ni wɔba kɛjɛ, nɔ hewɔ ni wɔyɔɔ biɛ, kɛ bɔ ni wɔsɛɛ be baatamɔ lɛ kɛɔ ni shishinumɔ bɛ mli lɛ. Nyɔŋmɔ Wiemɔ lɛ kɛ nɔmimaa haa wɔ yɛ nɛkɛ saji nɛɛ fɛɛ mli. Suɔmɔ efee klalo hu akɛ ebaahe eye ejaakɛ ekɛ ehiɛ fɔɔ nii anɔ, eyiŋ efeee lɛ kɔshikɔshi yakatswaa.
20. Suɔmɔ kɛ hiɛnɔkamɔ yɛ tsakpaa yɛ mɛɛ gbɛ nɔ?
20 Bɔfo Paulo maa nɔ mi kɛhaa wɔ lolo akɛ suɔmɔ “hiɛ kaa nii fɛɛ nɔ.” Akɛni suɔmɔ jwɛŋɔ ekpakpa he shi jeee efɔŋ hewɔ lɛ, eyɛ hiɛnɔkamɔ ni mli wa yɛ nibii fɛɛ ni awo shi yɛ he yɛ Nyɔŋmɔ Wiemɔ lɛ mli lɛ mli. Akɛɔ wɔ akɛ: “Esa akɛ mɔ ni huɔ lɛ, ekɛ hiɛnɔkamɔ ahu, ni mɔ ni kpalaa abele hu hiɛ aka nɔ akɛ ebaaye eko.” (1 Korintobii 9:10) Bɔ ni anyɛɔ akɛ he fɔɔ suɔmɔ nɔ lɛ, ehiɛ kaa nii anɔ hu, ehiɛ kaa nɔ ni hi fe fɛɛ nɔ be fɛɛ be.
21. Mɛɛ Ŋmalɛ naa nɔmimaa yɔɔ akɛ suɔmɔ toɔ etsui shi yɛ nii fɛɛ mli?
21 Yɛ naagbee lɛ, amaa nɔ mi kɛhaa wɔ akɛ, suɔmɔ “toɔ etsui shi yɛ nii fɛɛ mli.” Enyɛɔ efeɔ nakai yɛ nɔ ni bɔfo Paulo kɛɔ wɔ yɛ 1 Korintobii 10:13 lɛ hewɔ: “Kaa ko bako nyɛnɔ ni jeee gbɔmɔ he nɔ; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ni nyɛje mli hu, koni nyɛnyɛ mli nyɛmɔ.” Suɔmɔ baaha wɔkwɛ nɔkwɛmɔ nii babaoo ni yɔɔ Ŋmalɛi lɛ amli ni kɔɔ Nyɔŋmɔ tsuji ni to amɛtsui shi, ni amɛteŋ mɔ ni fe fɛɛ ji Yesu Kristo lɛ ahe lɛ, taakɛ akaiɔ wɔ yɛ Hebribii 12:2, 3 lɛ.
22. Akɛ Nyɔŋmɔ bii lɛ, mɛɛ su ni he hiaa fe fɛɛ esa akɛ wɔsusu he ni wɔjie no kpo wɔtsɔɔ be fɛɛ be?
22 Yɛ anɔkwale mli lɛ, suɔmɔ (a·gaʹpe) ji su ni fe fɛɛ ni wɔ, akɛ Kristofoi, Yehowa Odasefoi lɛ, ehe hiaa ni wɔna, yɛ nɔ ni ejeee kɛ nɔ ni eji fɛɛ mli. Akɛ Nyɔŋmɔ bii lɛ, eba akɛ wɔɔsusu Nyɔŋmɔ mumɔ lɛ yibii nɛɛ ni wɔɔjie lɛ kpo be fɛɛ be lɛ he. Nakai feemɔ tsɔɔ akɛ wɔtamɔ Nyɔŋmɔ, ejaakɛ, kaimɔ akɛ, “Nyɔŋmɔ lɛ, suɔmɔ ji lɛ.”
Ani Okaiɔ?
◻ Mɛɛ gbɛ nɔ Yesu Kristo kɛ Paulo tsɔɔ bɔ ni suɔmɔ fe fɛɛ yɛ?
◻ Suɔmɔ yeee awuŋa yɛ mɛɛ shishinumɔ naa?
◻ Suɔmɔ ‘miɔ ŋɔɔ’ yɛ nii fɛɛ mii yɛ mɛɛ gbɛ nɔ?
◻ Mɛni hewɔ abaanyɛ akɛɛ akɛ suɔmɔ sɛɛ efooo gbi ko gbi ko lɛ?
◻ Mɛɛ gbɛi enyɔ nɔ suɔmɔ kɛ anɔkwale nyaa yɛ?
[Akrabatsa ni yɔɔ baafa 21]
SUƆMƆ (AGAPE)
Nɔ ni Ejeee Nɔ ni Eji
1. Eyee awuŋa 1. Toɔ etsui shi
2. Eshwaaã 2. Emli hi
3. Efeee pupuupu 3. Enyaa anɔkwale he
4. Efeee nii ni esaaa 4. Emiɔ ŋɔɔ yɛ nii fɛɛ mli
5. Epeleee lɛ diɛŋtsɛ enɔ 5. Eheɔ nii fɛɛ eyeɔ
6. Emli wooo la 6. Ehiɛ kaa nii fɛɛ nɔ
7. Eniŋŋ efɔŋ he 7. Etoɔ etsui shi yɛ nii fɛɛ mli
8. Enyaaa nɔsha he
9. Esɛɛɛ efooo gbi ko gbi ko
[Mfoniri ni yɔɔ baafa 18]
Yehowa ba Nebukadnezar shi yɛ bɔ ni eshwãa lɛ hewɔ