Nyiɛmɔ Suɔmɔ Gbɛ Ni Fe Fɛɛ Lɛ Sɛɛ
YEHOWA NYƆŊMƆ lɛ, suɔmɔ ni. (1 Yohane 4:8) E-Bi, Yesu Kristo kɛɛ akɛ wɔsumɔ Nyɔŋmɔ kɛ wɔnaanyo. (Mateo 22:37-40) Ejaakɛ Nyɔŋmɔ damɔɔ nɛkɛ su nɛɛ nɔ ekudɔɔ jeŋ muu fɛɛ! No hewɔ lɛ, kɛ wɔɔna naanɔ wala yɛ he ko lɛ, esa akɛ wɔnyiɛ suɔmɔ gbɛ lɛ sɛɛ.
Nyɔŋmɔ jie suɔmɔ kpo etsɔɔ Israel maŋ lɛ, shi yɛ sɛɛ mli lɛ ekpoo nakai asafo loo gbɛjianɔtoo lɛ yɛ anɔkwa ni eyeee hewɔ. Kɛkɛ ni eyɔse Yesu kaselɔi lɛ asafo lɛ akɛ E-gbɛjianɔtoo hee. Yɛ mɛɛ gbɛ nɔ? Kɛtsɔ mumɔ krɔŋkrɔŋ kpojiemɔi krɛdɛɛi komɛi ni ha amɛna hewalɛ koni amɛwie kɛ lilɛii sɔrɔtoi ni amɛgba gbalɛi lɛ nɔ. No hewɔ lɛ, yɛ Pentekoste afi 33 Ŋ.B. lɛ, Yudafoi kɛ mɛi ni amɛtsake amɛhe amɛtsɔmɔ Yudafoi 3,000 batsɔmɔ heyelilɔi ni amɛshi gbɛjianɔtoo momo lɛ koni amɛba ehee lɛ mli. (Bɔfoi lɛ Asaji 2:1-41) Akɛni kɛjɛ no sɛɛ lɛ akɛ mumɔ lɛ nikeenii lɛ haa kɛtsɔɔ Yesu bɔfoi lɛ anɔ hewɔ lɛ, nɛkɛ naakpɛɛ nibii nɛɛ asɛɛ fo yɛ amɛgbele sɛɛ. (Bɔfoi lɛ Asaji 8:5-18; 19:1-6) Shi no mli lɛ nikeenii lɛ eye odase akɛ Nyɔŋmɔ duromɔ yɛ mumɔŋ Israel nɔ.—Galatabii 6:16.
Naakpɛɛ nii ni jɛɔ mumɔ lɛ nikeenii amli baa lɛ he yɛ sɛɛnamɔ. Shi, suɔmɔ ni aaajie kpo loo mɛi ahe susumɔ ni pɛsɛmkunya bɛ mli lɛ he hiaa fe mumɔ lɛ nikeenii lɛ ni ayɔɔ. Bɔfo Paulo tsɔɔ enɛ yɛ eklɛŋklɛŋ wolo ni eŋma eyaha Korintobii lɛ mli (aaafee 55 Ŋ.B.). Ewie suɔmɔ he yɛ mli akɛ “gbɛ ni hi fe fɛɛ.” (1 Korintobii 12:31) Atsɔɔ nakai gbɛlɛ mli yɛ 1 Korintobii yitso 13.
Kɛ Suɔmɔ Bɛ lɛ, Wɔjeee Nɔ Ko
Paulo wie akɛ: “Kɛji mikɛ gbɔmɛi kɛ ŋwɛibɔfoi alilɛii wieɔ, shi mibɛ suɔmɔ lɛ, kulɛ mitsɔ ayawa ni jijeɔ kɛ ŋmɛlɛ ni gbɛɛɔ.” (1 Korintobii 13:1) Kɛ suɔmɔ bɛ lɛ, belɛ shishinumɔ bɛ adesa wiemɔ ni mumɔ lɛ kɛba loo ŋwɛibɔfoi awiemɔ ni wɔɔwie lɛ mli. Paulo miisumɔ ni ewie wiemɔi enumɔ ni tswaa mɔ emaa shi moŋ fe akpei nyɔŋma yɛ lilɛi ni gbɔmɛi nuuu shishi lɛ mli. (1 Korintobii 14:19) Gbɔmɔ ni bɛ suɔmɔ lɛ baatamɔ “ayawa ni jijeɔ”—gbɛɛmɔ ni yɔɔ hoo ni gbaa mɔ toi naa—loo “ŋmɛlɛ ni gbɛɛɔ” ni eŋɔɔɔ yɛ toiŋ. Lilɛii sɔrɔtoi awiemɔ ni suɔmɔ bɛ mli lɛ jeee nɔ ni jɔɔ mɔ piŋmɔi ahe, kɛ mumɔŋ gbɛ ni tswaa mɔ emaa shi ni atsɔɔ nɔ awoɔ Nyɔŋmɔ hiɛ nyam ni akɛyeɔ abuaa ewebii lɛ. Ŋmɛnɛ, wɔjieɔ suɔmɔ kpo kɛtsɔɔ wiemɔ ni anuɔ shishi ni akɛtsuɔ nii yɛ Kristofoi asafo lɛ mli lɛ nɔ.
Bɔfo lɛ kɛɛ kɛnyiɛ sɛɛ akɛ: “Ni kɛji miyɛ gbalɛ ni minaa teemɔ nii fɛɛ naa, ni mile nii fɛɛ, ni kɛji miyɛ hemɔkɛyeli fɛɛ hu, bɔ ni manyɛ gɔji matsirɛ, shi mibɛ suɔmɔ lɛ, jikulɛ mijeee nɔ ko.” (1 Korintobii 13:2) Naakpɛɛ gbalɛi, teemɔŋ saji krɔŋkrɔŋi ashishinumɔ krɛdɛɛi kɛ nilee ni mumɔ lɛ kɛhaa lɛ he baanyɛ aba sɛɛnamɔ aha mɛi krokomɛi, shi jeee mɛi ni yɔɔ nɛkɛ nikeenii nɛɛ, kɛji mɛi ni yɔɔ nɛkɛ nikeenii nɛɛ bɛ suɔmɔ. Paulo kɛ teemɔŋ saji krɔŋkrɔŋi ahe shishinumɔ krɛdɛɛ tsu nii ni ekɛye ebua mɛi krokomɛi, ni nilee he nikeenii ye ebua lɛ ni enyɛ egba akɛ mɛi ni kɛ lɛlɛ baasha shi lɛ ayi baana wala. (Bɔfoi lɛ Asaji 27:20-44; 1 Korintobii 4:1, 2) Ni kɛlɛ, kɛji eyɛ ‘nilee fɛɛ kɛ hemɔkɛyeli fɛɛ’ shi ebɛ suɔmɔ lɛ, ejeee mɔ ko yɛ Yehowa hiɛ.
Ŋmɛnɛ, Yehowa mumɔ lɛ yeɔ ebuaa e-Dasefoi lɛ koni amɛnu Biblia gbalɛi kɛ teemɔŋ saji krɔŋkrɔŋi ashishi, ni ekudɔɔ amɛ koni amɛkɛ nilee ni tamɔ nɛkɛ aha mɛi krokomɛi. (Yoel 3:1, 2) Mumɔ lɛ hu kɛ hemɔkɛyeli ni he hiaa ni baaha wɔye gbɛtsii nii ni tamɔ gɔji anɔ kunim haa. (Mateo 17:20) Akɛni mumɔ lɛ tsuɔ nibii nɛɛ hewɔ lɛ, ejaaa akɛ aaatao anunyam ko kɛjɛ enɛɛmɛi mli. Wɔjeee fɛi ja wɔfee nii ni woɔ Nyɔŋmɔ hiɛ nyam ni wɔna suɔmɔ wɔha lɛ kɛ wɔnanemɛi gbɔmɛi.—Galatabii 5:6.
Anaaa Afɔleshaa ni Suɔmɔ Bɛ Mli lɛ He Sɛɛ
Paulo kɛɛ: “Ni kɛji miŋɔ minii fɛɛ mikuma mɛi, ni kɛji miŋɔ migbɔmɔtso miha koni asha mi, shi mibɛ suɔmɔ lɛ, jikulɛ minaaa sɛɛ ko.” (1 Korintobii 13:3) Kɛ suɔmɔ bɛ, ni Paulo kɛ nɔ fɛɛ nɔ ni eyɔɔ ha koni ekɛlɛ mɛi lɛ enaŋ sɛɛ ko. Nyɔŋmɔ woɔ wɔ nyɔmɔ yɛ suɔmɔ ni yɔɔ wɔ nikeenii lɛ sɛɛ lɛ hewɔ, jeee bɔ ni amɛjara wa ha yɛ heloo naa, aloo wɔmiitao anunyam akɛ mɛi ni keɔ nii, tamɔ amalelɔ Anania kɛ Safira fee lɛ. (Bɔfoi lɛ Asaji 5:1-11) Paulo to okadi kpakpa efɔ shi kɛtsɔ ehe ni ekɛha yɛ suɔmɔ mli yɛ nii ni etsu yɛ mɛi ni ehia amɛ yɛ Yudea lɛ anihamɔ he lɛ hewɔ.—1 Korintobii 16:1-4; 2 Korintobii 8:1-24; 9:7.
La odasefonyo gbele ni suɔmɔ bɛ mli akɛ nɔ ni akɛyeɔ anɔkwale lɛ he odase jeee nɔ ko yɛ Nyɔŋmɔ hiɛ. (Abɛi 25:27) Yesu wie efɔleshaa lɛ he, shi ekɛshwaãa. Ni eeeshwã moŋ lɛ, ekɛ ehe ha yɛ suɔmɔ mli. (Marko 10:45; Efesobii 5:2; Hebribii 10:5-10) Emumɔŋ nyɛmimɛi lɛ kɛ ‘amɛgbɔmɔtsei haa akɛ afɔle ni hiɛ ka’ yɛ Nyɔŋmɔ sɔɔmɔ mli jeee yɛ la odasefonyo gbele ni mɔ kɛwoɔ lɛ diɛŋtsɛ ehiɛ nyam mli, shi yɛ gbɛi ni woɔ Yehowa hiɛ nyam ni tsɔɔ suɔmɔ ni amɛyɔɔ kɛha lɛ ni bɛ naakpɛɛ mli.—Romabii 12:1, 2.
Gbɛi Komɛi Ní Suɔmɔ Baaha Wɔfee Nii Yɛ Nɔ Lɛ
Paulo ŋma akɛ: “Suɔmɔ toɔ etsui shi, emli hi.” (1 Korintobii 13:4a) Kɛha mɛi pii lɛ, Nyɔŋmɔ tsuishitoo kɛjɛ be mli ni Adam fee esha lɛ efee tsuitsakemɔ ni kɛ mɔ yaa yiwalaheremɔ mli. (2 Petro 3:9, 15) Kɛ wɔyɛ suɔmɔ lɛ, wɔkɛ tsuishitoo baatsɔɔ mɛi krokomɛi anɔkwale lɛ. Wɔbaatsi wɔhe kɛjɛ mlifu kɛ bolɔmɔ he ni wɔbaasusu mɛi ahe ni wɔkɛ sane ake amɛ. (Mateo 18:21, 22) Suɔmɔ mli hi hu, ni Nyɔŋmɔ mlihilɛ lɛ gbalaa wɔ kɛbɛŋkɛɔ lɛ. Emumɔ lɛ yibii ni ji mlihilɛ lɛ haaa wɔfee keketee yɛ mɛi anɔ taakɛ efeee wɔ nakai lɛ. (Efesobii 4:32) Suɔmɔ haa wɔmli hiɔ haa trumui po.—Luka 6:35.
Paulo kɛfata he akɛ: “Suɔmɔ he tsɛɛɛ mɔ, eshwaãa, efeee pupuupu.” (1 Korintobii 13:4b) Hetsɛ loo awuŋayeli ji heloo lɛ nitsumɔ, ni ehaŋ mɔ ko nine ashɛ Nyɔŋmɔ Maŋtsɛyeli lɛ nɔ. (Galatabii 5:19-21) Suɔmɔ haaa wɔhiɛ akɔ̃ mɔ ko nibii loo shihilɛ kpakpa mli ni eyɔɔ lɛ nɔ. Kɛ enine shɛ sɔɔmɔ hegbɛ ko ni wɔshweɔ lɛ nɔ lɛ, suɔmɔ baaha ni wɔkɛ lɛ anya, wɔfi esɛɛ, ni wɔda Nyɔŋmɔ shi akɛ abaanyɛ akɛ lɛ atsu nii ni ehe aba sɛɛnamɔ aha asafo lɛ.
Akɛni suɔmɔ “eshwaaa” hewɔ lɛ, etsirɛɛɛ wɔ ni wɔfee hoo yɛ nɔ ni Nyɔŋmɔ haa wɔtsuɔ yɛ esɔɔmɔ mli lɛ he. Korintobii komɛi shwã tamɔ nɔ ni amɛ amɛkɛ mumɔ lɛ nikeenii lɛ ba, shi Nyɔŋmɔ moŋ enɛɛmɛi jɛ, taakɛ hegbɛi ni yɔɔ eŋmɛnɛŋmɛnɛ beaŋ gbɛjianɔtoo lɛ mli lɛ ji lɛ. Ni wɔɔshwã moŋ yɛ gbɛhe ni wɔyɔɔ mli yɛ Nyɔŋmɔ gbɛjianɔtoo lɛ mli lɛ he lɛ, esa akɛ wɔkwɛ jogbaŋŋ koni wɔkagbee shi. (1 Korintobii 1:31; 4:7; 10:12) Suɔmɔ “efeee pupuupu,” shi mɔ ni bɛ suɔmɔ lɛ baanu he yɛ ejwɛŋmɔ mli akɛ ehe miihia. Mɛi ni yɔɔ suɔmɔ lɛ nuuu he akɛ amɛnɔ kwɔlɔ fe mɛi krokomɛi.—1 Korintobii 4:18, 19; Galatabii 6:3.
Efeee Nii ni Esaaa, Epeleee Enɔ̃. Emli Wooo La
Suɔmɔ “efeee nii ni esaaa, epeleee lɛ diɛŋtsɛ enɔ, emli wooo la.” (1 Korintobii 13:5a) Ehaa sui kpakpai, jeŋba ni Nyɔŋmɔ gbeyeishemɔ yɔɔ mli, bulɛ kɛha nɔyeli hegbɛ, kɛ subaŋ kpakpa yɛ Kristofoi akpeei ashishi shwereɔ. (Efesobii 5:3-5; 1 Korintobii 11:17-34; 14:40; okɛto Yuda 4, 8-10 he.) Akɛni suɔmɔ haa mɔ fɛɛ mɔ nuɔ he akɛ ehe hiaa, taakɛ gbɔmɔtso lɛ henii fɛɛ ji hewɔ lɛ, asafo ni suɔmɔ yɔɔ mli lɛ ji toiŋjɔlɛ kɛ abobaa he. (1 Korintobii 12:22-25) Ní ekɛ pɛsɛmkunya ‘aaapele lɛ diɛŋtsɛ enii ahe’ lɛ, suɔmɔ haa wɔkɛ wɔ hegbɛi shaa afɔle yɛ bei komɛi amli ni wɔjieɔ miishɛɛ kpo yɛ mɛi krokomɛi kɛ amɛhilɛ-kɛhamɔ he. (Filipibii 2:1-4) Suɔmɔ haa ‘wɔfeɔ wɔhe nɔ fɛɛ nɔ wɔhaa gbɔmɛi sɔrɔtoi fɛɛ, koni wɔkɛhere mɛi komɛi ayiwala’ kɛtsɔ wɔsɔɔmɔ lɛ nɔ.—1 Korintobii 9:22, 23.
Suɔmɔ “mli wooo la.” Mlifu ni teɔ shi lɛ ji esha heloo lɛ nitsumɔi, shi suɔmɔ haa ‘wɔhumiɔ shi kɛ mlifu.’ (Yakobo 1:19; Galatabii 5:19, 20) Kɛ wɔ mlifu lɛ ja po lɛ, suɔmɔ haaa wɔya nɔ wɔhi wɔ mlifu lɛ mli daa, koni eha Abonsam ana hegbɛ. ( Efesobii 4:26, 27) Onukpai lɛ titri akwɛ ni amɛmli akafu kɛ eba akɛ nanemɛi heyelilɔi lɛ tsuuu ŋaawoo ko he nii lɛ.
Paulo wie yɛ suɔmɔ he hu akɛ: “Eniŋŋ efɔŋ he.” (1 Korintobii 13:5b) Suɔmɔ etooo efɔŋ ni afee lɛ naa, tamɔ aŋmaa nii awoɔ wolo mli atoɔ lɛ. Enaa nɔ kpakpa ni yɔɔ nanemɛi heyelilɔi amli lɛ, ni etooo efɔŋ diɛŋtsɛ ni afee lɛ loo nɔ ni esusuɔ kɛkɛ lɛ najiaŋ. (Abɛi 20:22; 24:29; 25:21, 22) Suɔmɔ yeɔ ebuaa wɔ ni wɔtiuɔ hejɔlɛ nibii asɛɛ.’ (Romabii 14:19) Béi ba Paulo kɛ Barnaba teŋ ni amɛgbala mli kɛtee hei krokomɛi yɛ Nyɔŋmɔ sɔɔmɔ mli, shi suɔmɔ tsa mligbalamɔ lɛ ni ehaaa mɔ ko abɛ enyɛmi awo emli.—3 Mose 19:17, 18; Bɔfoi lɛ Asaji 15:36-41.
Esumɔɔ Jalɔ kɛ Anɔkwale
Paulo tee nɔ ewie yɛ suɔmɔ he akɛ: “Enyaaa nɔ sha he, shi enyaa anɔkwale he.” (1 Korintobii 13:6) Mɛi komɛi nyaa nɔ sha he aahu akɛ “amɛwɔɔɔ akɛ ja amɛfee efɔŋ ko da.” (Abɛi 4:16) Shi wɔkɛ wɔhe eshiii akaŋ yɛ Nyɔŋmɔ gbɛjianɔtoo lɛ mli aloo ni wɔmli aaafili wɔ kɛ mɔ ko yagbee esha mli. (Abɛi 17:5; 24:17, 18) Eji suɔmɔ ni fa kɛha Nyɔŋmɔ kɛ jalɛnifeemɔ yɛ Korinto asafo lɛ mli kulɛ, amɛkpɛlɛŋ jeŋba shara nɔ yɛ jɛmɛ. (1 Korintobii 5:1-13) Nɔ ni fata he lɛ, suɔmɔ kɛha jalɛnifeemɔ haaa wɔnya televishin, sini, kɛ hiɛtserɛjiemɔ ni jieɔ nibii ni ejaaa gbɛ lɛ ahe.
Suɔmɔ “nyaa anɔkwale he.” Akɛ nɔkwale miito bɔ ni esoro no yɛ nii ni ejaaa gbɛ he lɛ he. Eka shi faŋŋ akɛ enɛ tsɔɔ akɛ suɔmɔ haa wɔnyaa bɔ ni anɔkwale lɛ haa gbɔmɛi feɔ jalɛ nii lɛ he. Wɔnyaa nibii ni tswaa mɔ maa shi ni haa anɔkwale kɛ jalɛnifeemɔ yaa hiɛ lɛ he. Suɔmɔ haaa wɔmale, ehaa wɔnyaa kɛ wɔna akɛ mɛi ni ja lɛ eye amɛhe, ni ehaa wɔmli filiɔ wɔ yɛ kunim ni Nyɔŋmɔ anɔkwale lɛ yeɔ lɛ he.—Lala 45:5.
Bɔ ni Suɔmɔ Tsuɔ Nibii Fɛɛ He Nii Ehaa
Yɛ be mli ni eyaa nɔ etsɔɔ suɔmɔ mli lɛ, Paulo ŋma akɛ: “Emiɔ ŋɔɔ yɛ nii fɛɛ mli, eheɔ nii fɛɛ eyeɔ, ehiɛ kaa nii fɛɛ nɔ, etoɔ etsui shi yɛ nii fɛɛ mli.” (1 Korintobii 13:7) ‘Akɛni emiɔ ŋɔɔ yɛ nii fɛɛ mli’ hewɔ lɛ, suɔmɔ tsiɔ mlifu naa tamɔ bɔ ni tsũ yiteŋ tsɛŋsi kpakpa tsiɔ nugbɔ ni nɛɔ shwieɔ shi naa lɛ. Kɛ mɔ ko fee wɔ efɔŋ ko shi ebi eshaifaa lɛ, suɔmɔ haa wɔmiɔ ŋɔɔ yɛ efɔŋ lɛ he, ni wɔkɛkeɔ mɔ ni etɔ wɔnɔ lɛ fe ni wɔɔwie he. Wɔtsɔɔ suɔmɔ nɔ wɔbɔɔ mɔdɛŋ ni ‘wɔnine ashɛ wɔnyɛmi lɛ nɔ.’—Mateo 18:15-17; Kolosebii 3:13.
Suɔmɔ “heɔ nii fɛɛ” ni yɔɔ Nyɔŋmɔ Wiemɔ lɛ mli lɛ “eyeɔ,” ni ehaa wɔdaa shi yɛ mumɔŋ niyenii ni atsɔɔ “tsulɔ anɔkwafo kɛ nilelɔ” lɛ nɔ akɛhaa lɛ hewɔ. (Mateo 24:45-47) Eyɛ mli akɛ wɔjeee mɛi ni alakaa wɔ oya moŋ, shi suɔmɔ haaa wɔna tsui ni heee yeee ni ehaaa wɔna wɔnanemɛi heyelilɔi ahe jwɛŋmɔ fɔŋ. (Jajelɔ 7:21, 22) Suɔmɔ “hiɛ kaa nii fɛɛ” ni aŋmala yɛ Ŋmalɛi lɛ amli lɛ hu “nɔ,” tamɔ anɔkwalei ni kɔɔ Nyɔŋmɔ Maŋtsɛyeli lɛ he lɛ. Akɛni suɔmɔ tsirɛɔ wɔ hewɔ lɛ, wɔsɔleɔ ni wɔhiɛ kaa nibii kpakpai ni baajɛ shihilɛi ni mli wawai amli aba lɛ nɔ. Suɔmɔ tsirɛɔ wɔ hu koni wɔgba mɛi krokomɛi yiŋtoo ni yɔɔ wɔhiɛnɔkamɔ lɛ sɛɛ. (1 Petro 3:15) Kɛfata he lɛ, suɔmɔ “toɔ etsui shi yɛ nii fɛɛ mli,” ni esha ni afee wɔ lɛ hu fata he. (Abɛi 10:12) Suɔmɔ kɛha Nyɔŋmɔ hu yeɔ ebuaa wɔ koni wɔŋmɛ wɔtsui shi yɛ yiwaai kɛ kaai krokomɛi ashishi.
Paulo kɛfata he akɛ: “Suɔmɔ sɛɛ efooo gbi ko gbi ko.” (1 Korintobii 13:8a) Suɔmɔ baaa naagbee ni enine enyɛɛɛ shi taakɛ Yehowa ji lɛ. Akɛni wɔ naanɔ Nyɔŋmɔ lɛ ji suɔmɔ naamuu hewɔ lɛ, nɛkɛ su nɛɛ sɛɛ efoŋ gbiko gbi ko. (1 Timoteo 1:17; 1 Yohane 4:16) Suɔmɔ ji nɔ ni baaye jeŋ muu fɛɛ nɔ yɛ be fɛɛ mli. No hewɔ lɛ nyɛhaa wɔsɔlea koni Nyɔŋmɔ aye abua wɔ ni wɔye pɛsɛmkunya sui anɔ kunim, ni wɔjie nɛkɛ emumɔ lɛ yibii ni sɛɛ efooo nɛɛ kpo.—Luka 11:13.
Nibii ni Baaho Aya
Yɛ be mli ni etsɔɔ nibii ni baaba yɛ wɔsɛɛ lɛ, Paulo ŋma akɛ: “Shi kɛji gbalɛi ni lɛ, amɛsɛɛ baafo; kɛji wiemɔi ni lɛ, abaafɔɔ; kɛji nilee ni lɛ, esɛɛ baafo.” (1 Korintobii 13:8b) ‘Nikeenii ni ji gbalɛ’ ha mɛi ni yɔɔ enɛ lɛ gba gbalɛi heei. Eyɛ mli akɛ nɛkɛ nikeenii nɛɛ sɛɛ fo beni ato Kristofoi asafo lɛ ama shi akɛ Nyɔŋmɔ gbɛjianɔtoo lɛ moŋ, shi egbalɛ hewalɛ lɛ sɛɛ efooo gbi ko gbi ko, ni gbalɛi ni he hiaa wɔ bianɛ lɛ fɛɛ yɛ e-Wiemɔ lɛ mli. Nyɛmɔ ni akɛwieɔ lilɛii sɔrɔtoi ni mumɔ lɛ kɛha lɛ hu sɛɛ fo, ni nilee krɛdɛɛ lɛ hu “sɛɛ fo” taakɛ agba afɔ shi lɛ. Shi Yehowa Wiemɔ ni eye emuu lɛ kɛ nɔ ni he hiaa wɔ ni wɔle kɛha yiwalaheremɔ lɛ haa wɔ. (Romabii 10:8-10) Agbɛnɛ Nyɔŋmɔ mumɔ lɛ yɛ ewebii lɛ amli ni amɛwoɔ eyibii lɛ.
Paulo tee nɔ akɛ: “Ejaakɛ wɔnii ni wɔle lɛ fa-kɛ-fa ni, ni wɔgbalɛ hu fa-kɛ-fa ni. Shi kɛ nɔ ni eye emuu lɛ ba lɛ, no lɛ nɔ ni ji fa-kɛ-fa lɛ sɛɛ aaafo.” (1 Korintobii 13:9, 10) Nikeenii ni ji nilee kɛ gbalɛ lɛ yeee emuu. Eka shi faŋŋ akɛ gbalɛ ni tamɔ nɛkɛ etsɔɔɔ nibii amli fitsofitso, ni gbalɔi lɛ ateŋ mɔ ko yeee emuu yɛ wɔsɛɛ be mli nibii ni aaaba he, ejaakɛ ebɛ nilee ni yeɔ emuu yɛ nɔ ni egba lɛ he. Shi, agbɛnɛ, gbalɛ shishinumɔ miifee nɔ ni yeɔ emuu fiofio. Akɛ nɔkwɛmɔ nɔ lɛ, anɔkwalei ni haa Biblia gbalɛ baa mli lɛ maa nɔ mi akɛ Yesu nine shɛ maŋtsɛyeli hewalɛ nɔ yɛ adesai anɔ yɛ 1914. Kɛjɛ no nɔ kɛbaa nɛɛ, “naagbee be” lɛ mli wɔyɔɔ nɛɛ, ni wɔmiina mumɔŋ nilee kɛ Biblia gbalɛ shishinumɔ mli ŋɔɔmɔ yɛ be fɛɛ mli. (Daniel 12:4) No hewɔ lɛ, wɔmiibɛŋkɛ nilee ni yeɔ emuu lɛ he, ni “nɔ ni eye emuu lɛ” ebɛŋkɛ kpaakpa.
Su ni Da Fe Fɛɛ lɛ Hiɔ Shi
Yɛ be mli ni ekɛ sane toɔ asafo lɛ nɔyaa loo shweremɔ he lɛ, Paulo ŋma akɛ: “Beni miji abifao lɛ, miwieɔ tamɔ abifao, mijwɛŋɔ nii ahe tamɔ abifao, misusuɔ tamɔ abifao; shi beni mitsɔ nuu nukpa lɛ, mishɛrɛ abifabiianii lɛ fɛɛ mishwie sɛɛ.” (1 Korintobii 13:11) Akɛni abifao kɛ nilee bibioo kɛ he ni edalɛ shɛɔ feɔ enii hewɔ lɛ, abaanyɛ atsɔ eyiŋ kɛya-kɛba tamɔ aawɔle lɛ. Shi mɔ ni eda lɛ eda yɛ gbɔmɔtsoŋ, ni eyɛ nilee babaoo, ni anyɛɛɛ atsɔ eyiŋ oya nakai. Eŋmɛɛ gbekɛbiiashi susumɔi, subaŋi, kɛ nifeemɔi ahe. Nakai nɔŋŋ hu beni Nyɔŋmɔ shikpɔŋ nɔ gbɛjianɔtoo lɛ da ni etsɔ onukpa lɛ, E-susu akɛ, mumɔ lɛ yibii ni ji gbalɛ, lilɛii sɔrɔtoi awiemɔ kɛ nilee lɛ he ehiaaa lɛ dɔŋŋ. Eyɛ mli akɛ ŋmɛnɛŋmɛnɛ beaŋ asafo ni eda lɛ mli bii lɛ hu nuɔ he akɛ nikeenii ni tamɔ nɛkɛ he ehiaaa moŋ, shi amɛyɛ miishɛɛ akɛ amɛaasɔmɔ Nyɔŋmɔ yɛ emumɔ lɛ kudɔmɔ shishi.
Paulo kɛfata he akɛ: “Ejaakɛ ŋmɛnɛŋmɛnɛ lɛ ashwishwɛ mli wɔtsɔɔ wɔnaa nii tuutuu, shi no mli lɛ, hiɛ kɛ hiɛ; ŋmɛnɛŋmɛnɛ lɛ, mile nii fa-kɛ-fa, shi no mli lɛ, male nii kɛyi shi tamɔ bɔ ni ale mi kɛyi shi lɛ.” (1 Korintobii 13:12) Asafo lɛ gbekɛbiiashi jeee be ni Nyɔŋmɔ kɛaajie nibii komɛi akpo. No hewɔ lɛ amɛna lɛ tuutuu, tamɔ nɔ ni Kristofoi lɛ miikwɛ ashwishwɛ ko ni hiɛ eha ni anaaa hiɛ jogbaŋŋ lɛ mli. (Bɔfoi lɛ Asaji 1:6, 7) Shi wɔteke nii ni wɔnaa lɛ tuutuu lɛ. Gbalɛ kɛ nɔ ni agba yɛ he lɛ eba mli ni aana faŋŋ, ejaakɛ be ni Nyɔŋmɔ kɛaajie nibii akpo lɛ nɛ. (Lala 97:11; Daniel 2:28) Eyɛ mli akɛ Paulo diɛŋtsɛ le Nyɔŋmɔ moŋ, shi Yehowa he nilee ni fe fɛɛ kɛ ekɛ Lɛ teŋ wekukpaa ni bɛŋkɛ fe fɛɛ lɛ baaba yɛ be mli ni aaatee bɔfo lɛ shi kɛaaya ŋwɛi wala mli, ni enine aaashɛ e-Kristofoi agbɛ lɛ he nyɔmɔwoo fɛɛ nɔ lɛ.
Yɛ be mli ni egbeɔ esuɔmɔ naamuu he wiemɔ lɛ naa lɛ, Paulo ŋma akɛ: “Shi agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ ji amɛteŋ nɔ ni fe fɛɛ.” (1 Korintobii 13:13) Yɛ mumɔ lɛ naakpɛɛ nikeenii ni bɛ lɛ fɛɛ sɛɛ lɛ, asafo lɛ yɛ nilee ni yeɔ emuu babaoo bianɛ, kɛ yiŋtoo kɛha hemɔkɛyeli, hiɛnɔkamɔ, kɛ suɔmɔ ni fa. Eyɛ hemɔkɛyeli akɛ nɔ fɛɛ nɔ ni Nyɔŋmɔ ewo shi yɛ he lɛ tamɔ nɔ ni eba mli momo po. (Hebribii 11:1) Hemɔkɛyeli lɛ he nibii baaba naagbee beni nibii ni agba afɔ shi yɛ Nyɔŋmɔ Wiemɔ lɛ mli baa mli lɛ. Hiɛnɔkamɔ lɛ he nibii lɛ hu sɛɛ baafo yɛ be mli ni wɔnaa nii ni kulɛ wɔhiɛ ka nɔ lɛ. Shi suɔmɔ baahi shi kɛya naanɔ. No hewɔ lɛ, nyɛhaa Yehowa Odasefoi fɛɛ ayaa nɔ anyiɛa suɔmɔ gbɛ ni fe fɛɛ lɛ nɔ.