“Suɔmɔ Ji Amɛteŋ Nɔ Ni Fe Fɛɛ”
“Shi agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ ji amɛteŋ nɔ ni fe fɛɛ.”—1 KORINTOBI 13:13.
1. Mɛni ji nɔ ni gbɔmɔ bɔɔ-su he nikaselɔ ko ewie yɛ suɔmɔ he?
GBƆMƆ bɔɔ su he nikaselɔi ni ehe gbɛi fe fɛɛ yɛ je lɛŋ lɛ ateŋ mɔ kome kɛɛ yɛ be ko mli akɛ: “Enɛ ji klɛŋklɛŋ be mli ni wɔnuɔ shishi yɛ wɔ bɔɔ-su lɛ yinɔsane mli akɛ adesai ahiamɔ nii ni fe fɛɛ yɛ jwɛŋmɔ naa ji bɔ ni suɔmɔ he hiaa ha. Edamɔ adesai ahiamɔ nii lɛ ateŋ tuuŋtu, tamɔ bɔ ni wɔ hulu lɛ yɔɔ wɔ hulu gbɛjianɔtoo lɛ kɛ shibɔlemɔ ŋulamii ni bɔleɔ no he lɛ teŋ lɛ. . . . Gbekɛ ni asumɔko esane da lɛ yɛ sɔrɔto yɛ mɔ ni asumɔ esane lɛ he yɛ adebɔɔ mli sui, bɔ ni nɛkɛ sui nɛɛ tsuɔ nii haa, kɛ jwɛŋmɔ loo nilee naa. Mɔ ni asumɔko esane da lɛ daa yɛ gbɛ ni yɔɔ sɔrɔto nɔ yɛ mɔ ni asumɔ esane lɛ he. Nɔ ni wɔle ji akɛ afɔ adesa koni ehi wala mli, tamɔ nɔ ni wala mli ni aaahi lɛ kɛ suɔmɔ ji nɔ kome. Enɛ jeee nɔ hee moŋ. Enɛ ji Gɔŋ nɔ Shiɛmɔ lɛ mli hewalɛwoo.”
2. (a) Mɛɛ gbɛ nɔ bɔfo Paulo tsɔɔ bɔ ni suɔmɔ he hiaa ha yɛ? (b) Mɛɛ sanebimɔi esa akɛ wɔsusu he?
2 Hɛɛ, taakɛ gbɔmɔ ni yɔɔ jeŋ nilee nɛɛ kpɛlɛ nɔ lɛ, anɔkwale ni kɔɔ bɔ ni suɔmɔ he hiaa kɛha adesa hilɛ-kɛhamɔ he nɛɛ jeee nɔ ko hee. Ekolɛ kpaako gbɔmɛi ni le nii yɛ je lɛ mli lɛ ahiɛ ebasɔ enɛ, shi eje kpo yɛ Nyɔŋmɔ Wiemɔ lɛ mli nɔ ni fe afii ohai 19 ni eho nɛ. No hewɔ ni bɔfo Paulo baanyɛ aŋma akɛ: “Shi agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi, shi suɔmɔ ji amɛteŋ nɔ ni fe fɛɛ” lɛ. (1 Korintobii 13:13) Ani ole nɔ hewɔ ni suɔmɔ da fe hemɔkɛyeli kɛ hiɛnɔkamɔ lɛ? Mɛni hewɔ ni abaanyɛ akɛɛ akɛ suɔmɔ ji Nyɔŋmɔ sui lɛ kɛ mumɔ lɛ yibii lɛ ateŋ nɔ ni da fe fɛɛ lɛ?
Suɔmɔ Sɔrɔtoi Ejwɛ
3. Mɛɛ Ŋmalɛ mli nɔkwɛmɔ nii yɔɔ ni kɔɔ nuu kɛ yoo teŋ suɔmɔ he?
3 Nyɛmɔ ni adesa yɔɔ ni ekɛ jieɔ suɔmɔ kpo etsɔɔ lɛ ji Nyɔŋmɔ nilee lɛ kɛ bɔ “ni ekɛ suɔmɔ susuɔ adesai ahe lɛ kpojiemɔ. Miishɛɛ sane ji akɛ, blema Helabii yɛ wiemɔi ejwɛ kɛha “suɔmɔ.” Ekome ji e’ros, ni tsɔɔ nuu kɛ yoo ‘teŋ’ suɔmɔ ni kɔɔ bɔlɛnamɔ he lɛ. Mɛi ni ŋmala Kristofoi a-Hela Ŋmalɛi lɛ naaa hegbɛ ni amɛkɛ e’ros aaatsu nii, eyɛ mli akɛ Septuagint lɛ kɛ ehe nii komɛi ni tamɔ nakai tsu nii yɛ Abɛi 7:18 kɛ 30:16, ni awieɔ nuu kɛ yoo teŋ suɔmɔ lɛ ekomɛi ahe yɛ Hebri Ŋmalɛi lɛ amli. Akɛ nɔkwɛmɔ nɔ lɛ, wɔkaneɔ akɛ ni Isak “esumɔ lɛ [Rebeka].” (1 Mose 24:67) Anaa suɔmɔ ni tamɔ nɛkɛ he nɔkwɛmɔ nɔ diɛŋtsɛ ni sa kadimɔ yɛ Yakob, ni eka shi faŋŋ akɛ ena Rahel ni he yɔɔ fɛo lɛ he suɔmɔ beni ena lɛ klɛŋklɛŋ kwraa lɛ sane lɛ mli. Yɛ anɔkwale mli lɛ, “Yakob sɔmɔ afii kpawo yɛ Rahel hewɔ, ni suɔmɔ ni esumɔɔ lɛ lɛ hewɔ lɛ, efee lɛ tamɔ gbii komekome kɛkɛ.” (1 Mose 29:9-11, 17, 20) Salomo Lalai lɛ hu wieɔ nuu kɛ yoo teŋ suɔmɔ ni ka tookwɛlɔ ko kɛ obalayoo fro ko teŋ lɛ he. Shi enyɛŋ efee nɔ ni ama nɔ mi tsɔ akɛ, esa akɛ ajie suɔmɔ ni tamɔ nɛkɛ, ni baaha mɔ tsui anyɔ emli ni ena miishɛɛ babaoo lɛ kpo yɛ Nyɔŋmɔ jalɛ taomɔ nii lɛ kɛ gbeekpamɔ naa pɛ. Biblia lɛ kɛɔ wɔ akɛ esa akɛ nuu ni ekpee eŋa yɛ mla naa lɛ aha eŋa lɛ he suɔmɔ pɛ ‘akone eyitsoŋ daa.’—Abɛi 5:15-20.
4. Ama weku suɔmɔ nɔ mi yɛ Ŋmalɛi lɛ amli yɛ mɛɛ gbɛ nɔ?
4 Agbɛnɛ weku suɔmɔ ni mli wa, loo adebɔɔ naa hedɔɔ ni damɔ la wekukpaa nɔ, ni Helabii lɛ yɔɔ wiemɔ stor·geʹ kɛha lɛ lɛ hu yɛ. No ji nɔ ni ha wiemɔ, “La tsii fe nu” lɛ ba. Wɔyɛ enɛ he nɔkwɛmɔ nɔ fɛfɛo yɛ suɔmɔ ni nyɛmimɛi yei ni ji Maria kɛ Marta yɔɔ kɛha amɛ nyɛminuu Lazaro lɛ mli. Akɛ eji mɔ ni amɛsumɔɔ esane babaoo lɛ, anaa enɛ yɛ bɔ ni amɛfo etrukaa gbele lɛ babaoo ha lɛ mli. Ni kwɛ bɔ ni amɛmii shɛ amɛhe ha beni Yesu kɛ Lazaro ni amɛsumɔɔ lɛ lɛ ba wala mli ekoŋŋ lɛ! ( Yohane 11:1-44) Suɔmɔ ni nyɛ yɔɔ kɛha ebi hu ji suɔmɔ ni tamɔ nɛkɛ he nɔkwɛmɔ nɔ kroko. (Okɛto 1 Tesalonikabii 2:7 he.) No hewɔ lɛ bɔni afee ni ema suɔmɔ ni da ni eyɔɔ kɛha Zion lɛ nɔ mi lɛ, Yehowa jaje akɛ eda po fe nɔ ni nyɛ yɔɔ kɛha ebi.—Yesaia 49:15.
5. Gbɔmɔ hedɔɔ ni bɛ lɛ jeɔ kpo ŋmɛnɛ yɛ mɛɛ gbɛ nɔ?
5 Nɔ kome ni tsɔɔ akɛ “naagbee gbii” lɛ kɛ amɛ “jaramɔ bei” lɛ amli wɔyɔɔ lɛ ji “mɛi ni edɔɔɔ mɔ he” ni wɔnaa amɛ babaoo lɛ. (2 Timoteo 3:1, 3) Akɛni weku suɔmɔ bɛ hewɔ lɛ, obalaŋtai komɛi joɔ foi kɛjɛɔ shia, ni bii ni amɛdara kuɔ amɛhiɛ amɛshwieɔ amɛ fɔlɔi ni edara yɛ afii amli lɛ anɔ. (Okɛto Abɛi 23:22 he.) Anaa hedɔɔ ni bɛ lɛ hu yɛ gbekɛbii ni afeɔ amɛ niseniianii lɛ mli—fɔlɔi komɛi yiɔ amɛbii waa aahu akɛ ehaa akɛ bii nɛɛ yafɔɔ helatsamɔ hei. Fɔlɔi asuɔmɔ ni bɛ hu jeɔ kpo yɛ bɔ ni fɔlɔi pii nyɛɛɛ atsɔse amɛbii lɛ mli. Ni aaaŋmɛ gbekɛbii lɛ agbɛ ni amɛkɔ amɛ diɛŋtsɛ amɛgbɛ lɛ jeee suɔmɔ he okadi shi moŋ etsɔɔ gbɛ ni waaa kwraa nɔ ni amɛtsɔɔ. Tsɛ ni yɔɔ suɔmɔ diɛŋtsɛ kɛha ebii lɛ baatsɔse loo ekɛ kamɔ baaha amɛ kɛ ehe miihia.—Abɛi 13:24; Hebribii 12:5-11.
6. Okɛ Ŋmalɛ naa nɔkwɛmɔ nii ni kɔɔ nanemɛi ateŋ hedɔɔ he aha.
6 Agbɛnɛ Hela wiemɔ phi·liʹa, ni tsɔɔ hedɔɔ (ni nuu kɛ yoo teŋ sane bɛ mli) ni ka nanemɛi ateŋ, tamɔ nɔ ni ka hii enyɔ loo yei enyɔ ni amɛdara teŋ lɛ hu yɛ. Wɔyɛ enɛ he nɔkwɛmɔ nɔ fɛfɛo yɛ suɔmɔ ni David kɛ Yonatan yɔɔ kɛha amɛhe lɛ mli. Beni agbe Yonatan yɛ tawuu mli lɛ, David fo lɛ, akɛ: “Osane miidɔ mi, minyɛmi Yonatan! Osane eŋɔɔ minaa kɛho; osuɔmɔ ni okɛsumɔɔ mi lɛ yɛ naakpɛɛ, efe yei asuɔmɔ po.” (2 Samuel 1:26) Wɔkaseɔ hu akɛ Kristo yɛ suɔmɔ krɛdɛɛ ko kɛha bɔfo Yohane, ni ale lɛ akɛ “kaselɔ kome lɛ ni Yesu sumɔɔ lɛ lɛ.”—Yohane 20:2.
7. Mɛni ji a·gaʹpe su, ni ajie nɛkɛ suɔmɔ nɛɛ kpo yɛ mɛɛ gbɛ nɔ?
7 Mɛɛ Hela wiemɔ Paulo kɛtsu nii yɛ 1 Korintobii 13:13, he ni etsi hemɔkɛyeli, hiɛnɔkamɔ, kɛ suɔmɔ ta yɛ, ni ekɛɛ akɛ “suɔmɔ ji amɛteŋ nɔ ni fe fɛɛ” lɛ? Yɛ enɛ mli lɛ wiemɔ lɛ ji a·gaʹpe, wiemɔ kome lɛ nɔŋŋ ni bɔfo Yohane kɛtsu nii beni ekɛɛ: “Nyɔŋmɔ lɛ, suɔmɔ ji lɛ” lɛ. (1 Yohane 4:8, 16) Enɛ ji suɔmɔ ni shishitoo mla kudɔɔ lɛ loo eyeɔ nɔ. Hedɔɔ baanyɛ ahi mli loo ehiŋ mli, shi eji henumɔ ni pɛsɛmkunya bɛ mli ni nɔ ni esusuɔ he ji ejurɔ ni eeefee eha mɛi krokomɛi, ni bɔ ni shihilɛ mli ni mɔ ni nine shɛɔ nɔ lɛ yɔɔ loo nɔ sɛɛnamɔi ni baa nihalɔ lɛ ŋɔɔ lɛ kɔɔɔ he eko. Suɔmɔ ni tamɔ nɛkɛ ha Nyɔŋmɔ kɛ etsuiŋ jwetri ni fe fɛɛ, esuɔmɔ Bi koome, Yesu Kristo, ha, “koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) Taakɛ Paulo kaiɔ wɔ jogbaŋŋ lɛ: “Ejaakɛ ekpakpa aaafee dani mɔ ko aaagbo aha jalɔ ko, shi nɔ kpakpa ko hewɔ lɛ, ekolɛ mɔ ko aaashi etsitsi akɛ eeegbo. Shi Nyɔŋmɔ jieɔ lɛ diɛŋtsɛ esuɔmɔ ni ekɛsumɔɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.” (Romabii 5:7, 8) Hɛɛ, a·gaʹpe feɔ mɛi krokomɛi ejurɔ ni amɛ gbɛhe yɛ shihilɛ mli loo nɔ ni mɔ ni kɛ suɔmɔ ni tamɔ nɛkɛ haa lɛ aaalaaje lɛ kɔɔɔ he eko.
Mɛni Hewɔ Eda Fe Hemɔkɛyeli kɛ Hiɛnɔkamɔ Lɛ?
8. Mɛni hewɔ a·gaʹpe da fe hemɔkɛyeli lɛ?
8 Shi mɛni hewɔ Paulo kɛɛ akɛ suɔmɔ ni tamɔ nɛkɛ (a·gaʹpe) da fe hemɔkɛyeli lɛ? Eŋma yɛ 1 Korintobii 13:2 akɛ: “Kɛji miyɛ gbalɛ, ni minaa teemɔŋ nii fɛɛ naa, ni mile nii fɛɛ, ni kɛji miyɛ hemɔkɛyeli fɛɛ hu, bɔ ni manyɛ gɔji matsirɛ, shi mibɛ suɔmɔ lɛ, jikulɛ mijeee nɔ ko.” (Okɛto Mateo 17:20 he.) Hɛɛ, kɛji akɛ mɔdɛŋ ni wɔbɔɔ koni wɔna nilee ni wɔdara yɛ hemɔkɛyeli mli lɛ ji nɔ ni wɔkɛbaatsu pɛsɛmkunya yiŋtoi ahe nii lɛ, enɛ kɛ sɛɛnamɔ ko ni jɛ Nyɔŋmɔ ŋɔɔ bahaŋ wɔ. Nakai nɔŋŋ hu Yesu tsɔɔ akɛ mɛi komɛi ‘baagba yɛ egbɛi amli, ni amɛfamɔ daimonioi yɛ gbɛi amli, ni amɛfee hewalɛ nitsumɔi pii yɛ egbɛi amli,’ shi amɛnaŋ enɔkpɛlɛmɔ.—Mateo 7:22, 23.
9. Mɛni hewɔ suɔmɔ da fe hiɛnɔkamɔ lɛ?
9 Mɛni hewɔ a·gaʹpe suɔmɔ lɛ hu da fe hiɛnɔkamɔ lɛ? Ejaakɛ hiɛnɔkamɔ baanyɛ afee pɛsɛmkunya nɔ, ni mɔ lɛ susuɔ nibii ni he baaba sɛɛnamɔ aha lɛ pɛ lɛ he, yɛ be mli ni suɔmɔ “epeleee lɛ diɛŋtsɛ enɔ.” (1 Korintobii 13:4, 5) Agbɛnɛ hu, hiɛnɔkamɔ—tamɔ shihilɛ mli ni aaahi kɛtsɔ “amanehulu kpeteŋkpele” lɛ mli kɛyabote jeŋ hee lɛ mli lɛ—baa naagbee beni nɔ ni hiɛ ka nɔ lɛ eba mli lɛ. (Mateo 24:21) Taakɛ Paulo kɛɔ lɛ: “Ejaakɛ nɔhiɛkamɔ naa ahere wɔyiwala yɛ. Shi nɔhiɛkamɔ ni anaa lɛ, ejeee nɔhiɛkamɔ, shi namɔ hiɛ kaa nɔ ni enaa lɛ nɔ? Shi kɛ nɔ ni wɔnaaa lɛ nɔ wɔhiɛ ka lɛ, belɛ wɔkɛ tsuishiŋmɛɛ kwɛɔ lɛ gbɛ.” (Romabii 8:24, 25) Suɔmɔ ŋmɛɔ etsui shi yɛ nibii fɛɛ mli, ni esɛɛ efooo. (1 Korintobii 13:7, 8) No hewɔ lɛ, suɔmɔ ni pɛsɛmkunya bɛ mli, (a·gaʹpe) da fe hemɔkɛyeli loo hiɛnɔkamɔ.
Eda Fe Nilee, Jalɛsaneyeli, kɛ Hewalɛ?
10. Mɛni hewɔ abaanyɛ akɛɛ akɛ suɔmɔ ji Nyɔŋmɔ sui titrii ejwɛ lɛ ateŋ nɔ ni da fe fɛɛ lɛ?
10 Agbɛnɛ nyɛhaa wɔsusua Yehowa Nyɔŋmɔ sui titrii ejwɛ lɛ ahe: nilee, jalɛsaneyeli, hewalɛ kɛ suɔmɔ. Ani abaanyɛ akɛɛ hu akɛ suɔmɔ ji enɛɛmɛi ateŋ nɔ ni fe fɛɛ? Abaanyɛ akɛɛ nakai diɛŋtsɛ. Mɛni hewɔ? Ejaakɛ suɔmɔ ji hewalɛ ni kanyaa mɔ ni hɔ nɔ ni Nyɔŋmɔ feɔ lɛ sɛɛ. No hewɔ ni bɔfo Yohane ŋma akɛ: “Nyɔŋmɔ lɛ, suɔmɔ ji lɛ.” Hɛɛ, Yehowa ji suɔmɔ ni ejie ehe kpo yɛ gbɔmɔtso mli. (1 Yohane 4:8, 16) He ko he ko bɛ Ŋmalɛi lɛ amli ni wɔkaneɔ yɛ akɛ Nyɔŋmɔ ji nilee, jalɛsaneyeli, loo hewalɛ. Shi moŋ akɛɔ wɔ akɛ Yehowa yɛ nɛkɛ sui nɛɛ. (Hiob 12:13; Lala 147:5; Daniel 4:37) Nɛkɛ sui ejwɛ nɛɛ ŋmɛɔ pɛpɛɛpɛ yɛ emuuyeli mli yɛ emli. Akɛni suɔmɔ kanyaa lɛ hewɔ lɛ, Yehowa tsuɔ eyiŋtoi ahe nii kɛtsɔ sui krokomɛi etɛ lɛ ni ekɛtsuɔ nii loo ni esusuɔ amɛhe lɛ nɔ.
11. Mɛni kanya Yehowa koni ebɔ jeŋ muu fɛɛ nɛɛ kɛ bɔɔnii ni ji mumɔi kɛ adesai?
11 No hewɔ lɛ, mɛni kanya loo etsirɛ Yehowa koni ebɔ jeŋ muu fɛɛ nɛɛ kɛ mumɔ kɛ adesa bɔɔ nii ni yɔɔ nilee lɛ? Ani nilee loo hewalɛ? Dabi, ejaakɛ Nyɔŋmɔ kɛ enilee kɛ ehewalɛ lɛ tsu nii yɛ nibɔɔ mli kɛkɛ. Akɛ nɔkwɛmɔ nɔ lɛ, wɔkaneɔ akɛ: “Ŋaa [nilee] Yehowa kɛto shikpɔŋ lɛ shishi.” (Abɛi 3:19) Agbɛnɛ hu, esu ni ji jalɛsaneyeli lɛ biii ni ebɔ gbɔmɛi ni yeɔ amɛhe. Nyɔŋmɔ suɔmɔ lɛ ji nɔ ni tsirɛ lɛ koni eha mɛikrokomɛi ana eshihilɛ ni nilee yɔɔ mli lɛ mli miishɛɛ lɛ mli gbɛfaŋnɔ. Suɔmɔ ji nɔ ni na gbɛ ni aaatsɔ nɔ ajie fɔbuu ni jalɛsaneyeli kɛfɔ adesai anɔ yɛ Adam tɔmɔ lɛ hewɔ lɛ kɛya. (Yohane 3:16) Hɛɛ, ni suɔmɔ ji nɔ ni tsirɛ Yehowa koni eto eyiŋ akɛ esa akɛ adesai toibolɔi ahi shi yɛ shikpɔŋ nɔ Paradeiso ni baa lɛ mli.—Luka 23:43.
12. Te esa akɛ wɔfee wɔnii yɛ Nyɔŋmɔ hewalɛ, jalɛsaneyeli kɛ suɔmɔ he wɔha tɛŋŋ?
12 Yɛ Nyɔŋmɔ hewalɛ ni fe fɛɛ lɛ hewɔ lɛ, wɔnyɛŋ wɔkanya lɛ ni eye awuŋa. Paulo bi akɛ: “Aloo Nuntsɔ lɛ [Yehowa] mlila wɔwoɔ? Ani wɔhe wa fe lɛ?” (1 Korintobii 10:22) Shi kɛlɛ Yehowa ji “Nyɔŋmɔ awuŋayelɔ,” jeee kɛ shishinumɔ gbonyo, shi yɛ “he ni atuɔ ahaa ekometoo” lɛ mli. (2 Mose 20:5) Akɛ Kristofoi lɛ, wɔnaa kpɛɔ wɔhe yɛ Nyɔŋmɔ nilee ni bɛ naagbee ni ejieɔ lɛ kpo babaoo lɛ hewɔ. (Romabii 11:33-35) Esa akɛ bulɛ kpele ni wɔyɔɔ kɛha ejalɛsaneyeli lɛ aha wɔtsi wɔhe kɛjɛ esha ni wɔɔjɛ wɔsuɔmɔ mli wɔfee lɛ he kɛya sɛɛ flɛŋŋ. (Hebribii 10:26-31) Shi suɔmɔ ji Nyɔŋmɔ sui titrii ejwɛ lɛ ateŋ nɔ ni da fe fɛɛ, ni sanebimɔ ko bɛ enɛ he. Ni Yehowa suɔmɔ ni pɛsɛmkunya bɛ mli lɛ ji nɔ ni gbalaa wɔ kɛbɛŋkɛɔ lɛ ni ehaa wɔsumɔɔ akɛ wɔɔsa ehiɛ, ni wɔja lɛ, ni wɔkɛ wɔhe awo egbɛi krɔŋkrɔŋ lɛ he tsɛmɔ mli.—Abɛi 27:11.
Mumɔ lɛ Yibii lɛ Ateŋ Nɔ Ni Da Fe Fɛɛ
13. Mɛɛ gbɛhe suɔmɔ yeɔ yɛ Nyɔŋmɔ mumɔ lɛ yibii lɛ ateŋ?
13 Mɛɛ gbɛhe mli suɔmɔ baa, yɛ Nyɔŋmɔ mumɔ lɛ yibii nɛɛhu ni atsi ta yɛ Galatabii 5:22, 23 (NW) lɛ mli? Enɛɛmɛi ji “suɔmɔ, miishɛɛ, toiŋjɔlɛ, tsuishiŋmɛɛ, mlihilɛ, ejurɔfeemɔ, hemɔkɛyeli, mlijɔlɛ, henɔyeli.” Paulo kɛ suɔmɔ ye klɛŋklɛŋ gbɛhe kɛ yiŋtoo kpakpa. Ani suɔmɔ da fe miishɛɛ ni ji su ni etsi ta kɛnyiɛ sɛɛ lɛ? Hɛɛ, nakai ni, ejaakɛ anyɛŋ ana miishɛɛ ni hiɔ shi daa kɛ suɔmɔ bɛ. Yɛ anɔkwale mli lɛ, miishɛɛ ko kwraa bɛ je lɛ mli yɛ pɛsɛmkunya, ni ji suɔmɔ ni bɛ lɛ hewɔ. Shi Yehowa Odasefoi yɛ suɔmɔ yɛ amɛteŋ, ni amɛyɛ suɔmɔ kɛha amɛ ŋwɛi Tsɛ lɛ. No hewɔ lɛ esa akɛ wɔkpa gbɛ akɛ amɛbaana miishɛɛ, ni agba afɔ shi akɛ amɛ “aaala kɛ tsuijurɔ.”—Yesaia 65:14.
14. Mɛni hewɔ abaanyɛ akɛɛ akɛ suɔmɔ da fe mumɔ lɛ yibii ni ji toiŋjɔlɛ lɛ?
14 Suɔmɔ da hu fe mumɔ lɛ yibii ni ji toiŋjɔlɛ. Akɛni suɔmɔ bɛ hewɔ lɛ, bei kɛ nɔmɔ eyi je lɛ mli obɔ. Shi Yehowa webii kɛ amɛhe hiɔ shi yɛ toiŋjɔlɛ mli yɛ shikpɔŋ muu lɛ fɛɛ nɔ. Nɔ ni eba mli anɔkwale yɛ amɛgbɛfaŋ ji lalatsɛ lɛ wiemɔi nɛɛ: “Yehowa aaajɔɔ emaŋ lɛ kɛ hejɔlɛ [toiŋjɔlɛ].” (Lala 29:11) Amɛyɛ toiŋjɔlɛ ni tamɔ nɛkɛ ejaakɛ amɛyɛ anɔkwa Kristofoi akadimɔ nii, ni ji suɔmɔ lɛ. (Yohane 13:35) Suɔmɔ pɛ ji nɔ ni baanyɛ aye nibii ni kɛ mligbalamɔi baa lɛ fɛɛ nɔ, kɛji nomɛi ji wekui, maji loo hiŋmɛigbelemɔ mli nɔ po lɛ. Eji “ekomefeemɔ kpaa ni yeɔ emuu.”—Kolosebii 3:14, NW.
15. Anaa nii ni suɔmɔ tsuɔ ni fe fɛɛ lɛ kɛ akɛto mumɔ lɛ yibii ni ji tsuishiŋmɛɛ he lɛ yɛ mɛɛ gbɛ nɔ?
15 Anaa nɔ ni suɔmɔ tsuɔ ni fe fɛɛ lɛ hu kɛ akɛto tsuishiŋmɛɛ, tsui shi ni atoɔ yɛ efɔŋ loo mlifu naa lɛ he lɛ. Kɛ mɔ ko ŋmɛɔ etsui shi lɛ, no tsɔɔ akɛ etoɔ etsui shi ni emli fuuu mra hu. Mɛni haaa gbɔmɛi ana tsuishitoo ni haa amɛmli fuɔ mramra lɛ? Ani jeee suɔmɔ ni amɛbɛ feɔ nakai? Shi wɔ ŋwɛi Tsɛ lɛ toɔ etsui shi ni “emli fuuu mra.” (2 Mose 34:6; Luka 18:7) Mɛni hewɔ? Ejaakɛ esumɔɔ wɔ ni “esumɔɔɔ akɛ mɛi komɛi alaaje.”—2 Petro 3:9.
16. Kɛ akɛ suɔmɔ to mlihilɛ, ejurɔfeemɔ, mlijɔlɛ, kɛ henɔyeli he lɛ te anaa tɛŋŋ?
16 Wɔtsɔ hiɛ wɔna nɔ hewɔ ni suɔmɔ da fe hemɔkɛyeli lɛ momo, ni yiŋtoi ni akɛha lɛ kɔɔ mumɔ lɛ yibii krokomɛi ni eshwɛ, ni ji, mlihilɛ, ejurɔfeemɔ, mlijɔlɛ kɛ henɔyeli he. Enɛɛmɛi fɛɛ ji sui ni he hiaa, shi amɛhe baŋ sɛɛnamɔ kɛhaŋ wɔ kɛji akɛ suɔmɔ bɛ mli, taakɛ Paulo wie yɛ 1 Korintobii 13:3, he ni eŋma yɛ akɛ: “Ni kɛji miŋɔ minii fɛɛ mikuma mɛi, ni kɛji miŋɔ migbɔmɔtso miha ni asha mi, shi mibɛ suɔmɔ lɛ, jikulɛ minaaa sɛɛ ko.” Shi yɛ gbɛ kroko nɔ lɛ, suɔmɔ ji nɔ ni kɛ nɛkɛ sui, ni ji, mlihilɛ, ejurɔfeemɔ, hemɔkɛyeli, mlijɔlɛ, kɛ henɔyeli baa. No hewɔ lɛ, Paulo tee nɔ ekɛɛ akɛ suɔmɔ mli hi ni akɛ “emiɔ ŋɔɔ yɛ nii fɛɛ mli, eheɔ nii fɛɛ eyeɔ, ehiɛ kaa nii fɛɛ nɔ, etoɔ etsui shi yɛ nii fɛɛ mli.” Hɛɛ, ni “suɔmɔ sɛɛ efooo gbi ko gbi ko.” (1 Korintobii 13:4, 7, 8) Belɛ ayoo jogbaŋŋ akɛ mumɔ lɛ yibii krokomɛi lɛ ji suɔmɔ, ni atsi ta klɛŋklɛŋ lɛ kpojiemɔ loo ehewɔ nibii krokomɛi. Belɛ eji anɔkwale akɛ, yɛ mumɔ lɛ yibii nɛɛhu lɛ fɛɛ ateŋ lɛ, suɔmɔ ji nɔ ni da fe fɛɛ lɛlɛŋ.
17. Mɛɛ Ŋmalɛ mli wiemɔi fiɔ sane naamuu akɛ suɔmɔ ji mumɔ lɛ yibii lɛ ateŋ nɔ ni da fe fɛɛ lɛ sɛɛ?
17 Nɔ ni fiɔ sane naamuu lɛ sɛɛ akɛ suɔmɔ ji Nyɔŋmɔ mumɔ lɛ yibii lɛ ateŋ nɔ ni da fe fɛɛ lɛ ji Paulo wiemɔi nɛɛ: “Nyɛkahiɛa mɔ ko mɔ ko nyɔmɔ akɛ ja suɔmɔ ni nyɛkɛaasumɔ nyɛhe lɛ; ejaakɛ mɔ ni sumɔɔ enaanyo lɛ, eye mla lɛ nɔ pɛ. Ejaakɛ . . . fɛɛ hɔ nɛkɛ wiemɔ nɛɛ ni ji: ‘Suɔmɔ onaanyo taakɛ bɔ ni osumɔɔ bo diɛŋtsɛ ohe’ lɛ mli. Suɔmɔ efeee enaanyo efɔŋ ko, hewɔ lɛ suɔmɔ pɛ ji mla lɛ nɔ yeli.” (Romabii 18:3-10) Belɛ eja jogbaŋŋ akɛ kaselɔ Yakobo aaawie nɛkɛ mla ni kɔɔ mɔ ko naanyo ni eeesumɔ lɛ tamɔ lɛ diɛŋtsɛ ehe nɛɛ he akɛ “mla lɛ mli otu.”—Yakobo 2:8.
18. Mɛɛ odaseyeli lolo yɔɔ ni tsɔɔ akɛ suɔmɔ ji su ni da fe fɛɛ?
18 Ani odaseyelii babaoo yɛ lolo akɛ suɔmɔ ji su ni fe fɛɛ lɛ? Hɛɛ, eko yɛ. Susumɔ ni nɔ ba beni woloŋmalɔ ko bi Yesu nɛkɛ sane nɛɛ lɛ he: “Te nɔ ni ji kitai lɛ ateŋ klɛŋklɛŋ nɔ lɛ?” Ekolɛ ebaakpa gbɛ jogbaŋŋ akɛ Yesu baatse Kitai Nyɔŋma lɛ ateŋ ekome. Shi Yesu tsɛ wiemɔ kɛjɛ 5 Mose 6:4, 5 ni ekɛɛ: “Klɛŋklɛŋ nɔ ji enɛ, ‘Bo toi, Israel! Yehowa wɔ-Nyɔŋmɔ lɛ, Yehowa kome ni, ni suɔmɔ Yehowa o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ ohewalɛ fɛɛ.’” Kɛkɛ ni Yesu kɛfata he akɛ: “Nɔ ni ji enyɔ ji enɛ, ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ Kita ko bɛ ni fe enɛɛmɛi.”—Marko 12:28-31, NW.
19. Mɛni ji a·gaʹpe yibii ni ekaaa lɛ ateŋ ekomɛi?
19 Eji anɔkwale akɛ Paulo wooo sane he tsɔ, beni etsi hemɔkɛyeli, hiɛnɔkamɔ, kɛ suɔmɔ ta ni ekɛɛ: “Suɔmɔ ji amɛteŋ nɔ ni fe fɛɛ” lɛ. Nɔ ni jɛɔ suɔmɔ ni ajieɔ lɛ kpo lɛ mli baa ji wekukpaa kpakpa ni bakaa wɔkɛ wɔ-ŋwɛi Tsɛ lɛ kɛ mɛi krokomɛi ateŋ, ni asafo lɛ mlibii kɛ wɔ wekui amlibii fata he. Suɔmɔ naa hewalɛ ko yɛ wɔnɔ ni tswaa wɔ emaa shi. Ni nikasemɔ ni nyiɛ sɛɛ lɛ baatsɔɔ bɔ ni nyɔmɔwoo babaoo yɔɔ anɔkwa suɔmɔ mli ha.
Te Obaaha Hetoo Oha Tɛŋŋ?
◻ Suɔmɔ da fa hemɔkɛyeli kɛ hiɛnɔkamɔ yɛ mɛɛ gbɛ nɔ?
◻ Mɛni ji a·gaʹpe, ni ajieɔ suɔmɔ ni tamɔ nɛkɛ kpo yɛ mɛɛ gbɛ nɔ?
◻ Mɛni hewɔ suɔmɔ ji Nyɔŋmɔ sui titrii ejwɛ Iɛ ateŋ nɔ ni fe fɛɛ Iɛ?
◻ Suɔmɔ da fe mumɔ Iɛ yibii krokomɛi Iɛ yɛ mɛɛ gbɛi anɔ?
[Mfoniri ni yɔɔ baafa 13]
Suɔmɔ tsirɛ Nyɔŋmɔ koni ebɔ adesai ni amɛbana wala yɛ shikpɔŋ nɔ paradeiso lɛ mli. Ani oyɛ hiɛnɔkamɔ akɛ obaahi jɛmɛ?