Nibii Titrii Enyɔ Ni Kɛ Gbalashihilɛ Ni Sɛɛ tsɛɔ Baa

 1, 2. (a) Mɛɛ be sɛɛkɛlɛ ato ni gbalashihilɛ ahi shi kɛyashi? (b) Te aaafee tɛŋŋ ni enɛ aaanyɛ aba lɛ nakai?

BENI Nyɔŋmɔ fee klɛŋklɛŋ nuu kɛ yoo lɛ ekome yɛ gbalashihilɛ mli lɛ, no mli lɛ nɔ ko kwraa etsɔɔɔ akɛ ekomefeemɔ lɛ baahi shi be kukuoo kɛkɛ. Esa akɛ Adam kɛ Hawa afee ekome kɛhi shi amɛwala be fɛɛ. (1 Mose 2:24) Taomɔ nii ni Nyɔŋmɔ kɛha gbalashihilɛ ni woo yɔɔ mli ji nuu kome kɛ yoo kome ni baafee ekome kɛhi shi. Bɔlɛnamɔ mli jeŋba shara ni yɔɔ hiɛdɔɔ, ni amɛteŋ mɔ kome loo mɛi enyɔ lɛ fɛɛ kɛ amɛhe baawo mli pɛ haa anaa Ŋmalɛ naa nɔdaamɔ nɔ kɛha gbalamlitsemɔ, kɛ hegbɛ akɛ aaabote gbalashihilɛ mli ekoŋŋ.—Mateo 5:32.

² Ani gbɔmɛi aŋkroaŋkroi enyɔ baanyɛ afee ekome kɛhi shi yɛ miishɛɛ mli yɛ be kakadaŋŋ mli? Hɛɛ, ni Biblia lɛ tsɔɔ nibii titrii enyɔ ni he hiaa waa, ni yeɔ buaa ni haa enɛ nyɛɔ ebaa mli nakai. Kɛ wu lɛ kɛ ŋa lɛ fɛɛ kɛ enɛɛmɛi tsu nii lɛ, ebaaha amɛnine ashɛ miishɛɛnamɔ kɛ jɔɔmɔi babaoo nɔ. Mɛni ji nibii titrii nɛɛ?

 3. Mɛɛ suɔmɔ sɔrɔtoi etɛ esa akɛ gbalashihilɛ mli hefatalɔi aná?

³ Nɔ titri ni he hiaa klɛŋklɛŋ ji suɔmɔ. Nɔ ni yɔɔ miishɛɛ ji akɛ, awieɔ suɔmɔ sɔrɔtoi ahe yɛ Biblia lɛ mli. Ekome ji miishɛɛ kɛ hedɔɔ ni anaa ahaa mɔ ko, ni ji suɔmɔ ni hiɔ nanemɛi ni bɛŋkɛ amɛhe kpaakpa lɛ ateŋ lɛ. (Yohane 11:3) Ekroko hu ji suɔmɔ ni daa yɛ weku mli bii ateŋ lɛ. (Romabii 12:10) Nɔ ni ji etɛ hu ji nuu kɛ yoo teŋ suɔmɔ ni mɔ ko baanyɛ ana aha mɔ kroko ni esoro ebɔɔ su lɛ. (Abɛi 5:15-20) Yɛ anɔkwale mli lɛ, esa akɛ wu lɛ kɛ ŋa lɛ fɛɛ ana nɛkɛ suɔmɔi sɔrɔtoi nɛɛ fɛɛ eko. Shi suɔmɔ kroko ni ji ejwɛ hu yɛ, ni he hiaa waa fe ekrokomɛi lɛ.

 4. Mɛni ji suɔmɔ ni ji ejwɛ lɛ?

⁴ Wiemɔ ni akɛtsu nii kɛha suɔmɔ ni ji ejwɛ nɛɛ yɛ shishijee Kristofoi a-Hela Ŋmalɛi lɛ amli ji a·gaʹpe. Akɛ nakai wiemɔ lɛ tsu nii yɛ 1 Yohane 4:8, ni akɛɔ wɔ yɛ jɛmɛ akɛ: “Nyɔŋmɔ lɛ, suɔmɔ ji lɛ.” Lɛlɛŋ, “wɔsumɔɔ lɛ, ejaakɛ lɛ [Nyɔŋmɔ] tsutsu esumɔ wɔ.” (1 Yohane 4:19) Kristofonyo naa suɔmɔ ni tamɔ nɛkɛ, klɛŋklɛŋ lɛ kɛha Yehowa Nyɔŋmɔ, kɛ no sɛɛ lɛ kɛha enanemɛi adesai. (Marko 12:29-31) Akɛ wiemɔ a·gaʹpe lɛ hu tsu nii yɛ Efesobii 5:2, he ni kɛɔ akɛ: ‘Nyɛnyiɛa yɛ suɔmɔ mli, taakɛ bɔ ni Kristo hu sumɔ wɔ ni eŋɔ lɛ diɛŋtsɛ ehe eha yɛ wɔ hewɔ lɛ.’ Yesu wie akɛ nɛkɛ suɔmɔ nɛɛ baakadi enɔkwa sɛɛnyiɛlɔi, ni ekɛɛ: “Kɛji nyɛsumɔɔ nyɛhe [kɛ a·gaʹpe] lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Kadimɔ bɔ ni akɛ a·gaʹpe tsu nii yɛ 1 Korintobii 13:13 hu, akɛ: “Shi agbɛnɛ hemɔkɛyeli, hiɛnɔkamɔ, suɔmɔ, nɛkɛ nii etɛ nɛɛ hiɔ shi; shi suɔmɔ [a·gaʹpe] ji amɛteŋ nɔ ni fe fɛɛ.”

 5, 6. (a) Mɛni hewɔ suɔmɔ nɔ kwɔ fe hemɔkɛyeli kɛ hiɛnɔkamɔ lɛ? (b) Mɛɛ yiŋtoi komɛi ahewɔ ni suɔmɔ baaye abua ni eha gbalashihilɛ sɛɛ atsɛ lɛ?

⁵ Mɛni haa nɛkɛ a·gaʹpe suɔmɔ nɛɛ feɔ nɔ ni da fe hemɔkɛyeli kɛ hiɛnɔkamɔ lɛ? Shishitoo mlai ji nɔ ni kudɔɔ lɛ—shishitoo mlai ni ja—ni anaa yɛ Nyɔŋmɔ Wiemɔ lɛ mli lɛ. (Lala 119:105) Eji mɔ hesusumɔ ni pɛsɛmkunya bɛ mli, ni akɛfeɔ nɔ ni ja ni hi yɛ Nyɔŋmɔ hiɛ ahaa mɛi krokomɛi, ekɔɔɔ he eko akɛ mɔ ni afeɔ ahaa lɛ sa nakai nifeemɔ lɛ loo esaaa. Suɔmɔ ni tamɔ nɛkɛ yeɔ ebuaa gbalashihilɛ mli hefatalɔi ni amɛnyiɛɔ Biblia ŋaawoo nɛɛ sɛɛ, akɛ: “Kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni [Yehowa, NW] hu ŋɔfa nyɛ lɛ, nakai nyɛ hu nyɛfea.” (Kolosebii 3:13) Gbalashihilɛ mli hefatalɔi ni sumɔɔ amɛhe lɛ yɛ suɔmɔ, ni amɛhaa “suɔmɔ [a·gaʹpe] ni [amɛkɛsumɔɔ amɛhe] lɛ mli [waa], ejaakɛ suɔmɔ haa eshai babaoo nɔ.” (1 Petro 4:8) Kadimɔ akɛ suɔmɔ haa tɔmɔi anɔ. Ejieee kɛjɛɛɛ jɛmɛ kɛyaaa, ejaakɛ adesa ni yeee emuu ko bɛ ni baanyɛ aye ehe kɛjɛ tɔmɔ mli.—Lala 130:3, 4; Yakobo 3:2.

⁶ Kɛ gbalashihilɛ mli hefatalɔi ná suɔmɔ ni tamɔ nɛkɛ kɛha Nyɔŋmɔ kɛ suɔmɔ kɛha amɛhe lɛ, amɛgbalashihilɛ lɛ sɛɛ baatsɛ ni ebaafee miishɛɛ, ejaakɛ “suɔmɔ sɛɛ efooo gbi ko gbi ko.” (1 Korintobii 13:8) Suɔmɔ ji “emuuyeli kpaa.” (Kolosebii 3:14) Kɛji obote gbalashihilɛ mli lɛ, te okɛ ohefatalɔ lɛ aaafee tɛŋŋ ni nyɛna nɛkɛ suɔmɔ nɛɛ eko? Esa akɛ nyɛkane Nyɔŋmɔ Wiemɔ lɛ kutuu, ni nyɛgba he sane. Nyɛkasea Yesu suɔmɔ he nɔkwɛmɔ nɔ lɛ ni nyɛbɔa mɔdɛŋ akɛ nyɛaanyiɛ sɛɛ, ni nyɛsusu nii ahe ni nyɛfee nyɛnii tamɔ lɛ. Kɛfata he lɛ, nyɛyaa Kristofoi akpeei, he ni atsɔɔ Nyɔŋmɔ Wiemɔ lɛ yɛ lɛ. Ni nyɛsɔlea nyɛbia Nyɔŋmɔ yelikɛbuamɔ koni nyɛna nɛkɛ suɔmɔ ni nɔ kwɔ, ni ji Nyɔŋmɔ mumɔ krɔŋkrɔŋ lɛ yibii nɛɛ eko.—Abɛi 3:5, 6; Yohane 17:3; Galatabii 5:22; Hebribii 10:24, 25.

 7. Mɛni ji bulɛ, ni namɔ esa akɛ ejie bulɛ kpo yɛ gbalashihilɛ mli?

⁷ Kɛ mɛi enyɔ ni ebote gbalashihilɛ mli lɛ sumɔɔ amɛhe lɛlɛŋ lɛ, no lɛ amɛbaana bulɛ hu amɛha amɛhe, ni bulɛ ji nɔ titri ni ji enyɔ ni he hiaa yɛ gbalashihilɛ ni yɔɔ miishɛɛ mli. Atsɔɔ bulɛ shishi akɛ “mɛi krokomɛi ahesusumɔ, woo ni akɛhaa amɛ.” Nyɔŋmɔ Wiemɔ lɛ woɔ Kristofoi fɛɛ, ni wumɛi kɛ ŋamɛi fata he lɛ ŋaa akɛ: “Mɔ fɛɛ mɔ kɛ woo aha enaanyo tsutsu.” (Romabii 12:10) Bɔfo Petro ŋma akɛ: “Nakai nɔŋŋ kɛ̃ nyɛ wumɛi, nyɛkɛ [nyɛ ŋamɛi] ahia shi yɛ nilee naa, ni nyɛkɛ woo awoa yoo akɛ nɔ ni he waaa tuutu ko.” (1 Petro 3:7) Awoɔ ŋa lɛ ŋaa akɛ ‘ejie bulɛ ni mli kwɔ kpo etsɔɔ ewu.’ (Efesobii 5:33) Kɛ ootao okɛ woo aha mɔ ko lɛ, ojieɔ mlihilɛ kpo otsɔɔ nakai mɔ lɛ, ni onaa bulɛ ohaa mɔ lɛ agbojee kɛ esusumɔi ni ejieɔ lɛ kpo, ni ofeɔ klalo akɛ obaatsu nɔ fɛɛ nɔ ni nilee yɔɔ mli ni etaoɔ yɛ odɛŋ lɛ he nii.

 8-10. Mɛni ji gbɛi komɛi anɔ ni bulɛ baanyɛ aye abua ni eha gbalashihilɛ tsakpaa lɛ mli awa ni miishɛɛ ahi mli?

⁸ Mɛi ni taoɔ ni amɛna miishɛɛ yɛ gbalashihilɛ mli lɛ jieɔ bulɛ kpo amɛtsɔɔ amɛhefatalɔi lɛ kɛtsɔɔ ‘amɛ diɛŋtsɛ amɛnɔ mli ni amɛfóoo, shi moŋ amɛfóɔ amɛ hefatalɔi lɛ moŋ anɔ mli’ lɛ nɔ. (Filipibii 2:4) Amɛsusuuu nɔ ni baahi kɛha amɛ pɛ he—ni baaha amɛfee pɛsɛmkunya. Shi moŋ, amɛsusuɔ nɔ ni baahi kɛha amɛ hefatalɔi lɛ hu he. Yɛ anɔkwale mli lɛ, amɛhaa amɛ hefatalɔi lɛ anɔ yeɔ klɛŋklɛŋ gbɛhe.

⁹ Bulɛ baaye abua gbalashihilɛ mli hefatalɔi ni amɛkpɛlɛ susumɔi ni kpaaa gbee nɔ. Nilee bɛ mli akɛ aaakpa mɛi enyɔ gbɛ akɛ amɛaahiɛ susumɔ koome yɛ nɔ fɛɛ nɔ he. Ekolɛ nɔ ni he hiaa wu lɛ he ehiaŋ ŋa lɛ nakai, ni ekolɛ jeee nɔ ni ŋa lɛ sumɔɔ lɛ nɔŋŋ wu lɛ hu sumɔɔ. Shi esa akɛ amɛteŋ mɔ fɛɛ mɔ ajie bulɛ kpo yɛ mɔ kroko lɛ susumɔi kɛ nibii ni esumɔɔ lɛ ahe, bei abɔ ni enɛɛmɛi yɔɔ husui ni Yehowa mlai kɛ shishitoo mlai efolɔ eshwie shi lɛ amli lɛ. (1 Petro 2:16; okɛto Filemon 14 he.) Kɛfata he lɛ, esa akɛ amɛteŋ mɔ fɛɛ mɔ ana bulɛ kɛha mɔ kroko lɛ hiɛnyam kɛtsɔ wiemɔi kɛ fɛoyelii ni baa mɔ shi ni ewieŋ yɛ ehe, yɛ maŋ kɛ amɛ teemɔŋ shihilɛ fɛɛ mli lɛ nɔ.

¹⁰ Hɛɛ, suɔmɔ ni amɛaana amɛha Nyɔŋmɔ kɛ amɛhe, kɛ bulɛ ni amɛaajie lɛ kpo amɛtsɔɔ amɛhe hu ji nibii titrii enyɔ ni he hiaa waa yɛ gbalashihilɛ ni yeɔ omanye mli. Mɛɛ gbɛ nɔ abaatsɔ akɛtsu nii yɛ gbalashihilɛ mli hei ni he hiaa waa lɛ ekomɛi amli?

11. Yɛ ŋmalɛ naa lɛ, namɔ ji yitso yɛ gbalashihilɛ mli?

¹¹ Biblia lɛ kɛɔ wɔ akɛ abɔ nuu lɛ kɛ sui ni baaha efee weku yitso ni yeɔ omanye. Yɛ no hewɔ lɛ, sɔ̃ bakãa nuu lɛ nɔ yɛ Yehowa hiɛ, yɛ eŋa kɛ ebii amumɔŋ kɛ heloonaa hilɛ-kɛhamɔ gbɛfaŋ. Ehe baahia ni efee yiŋkpɛi ni ŋmɛɔ pɛpɛɛpɛ ni jieɔ Yehowa suɔmɔnaa nii kpo, ni efee nɔkwɛmɔ nɔ kpakpa yɛ jeŋba ni Nyɔŋmɔ gbeyeishemɔ yɔɔ mli lɛ kpojiemɔ mli. ‘Nyɛ yeigbayei lɛ, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, tamɔ bɔ ni nyɛfeɔ nyɛhaa Nuntsɔ lɛ, ejaakɛ wu lɛ ji ŋa lɛ yitso, taakɛ bɔ ni Kristo hu ji asafo lɛ yitso lɛ.’ (Efesobii 5:22, 23) Shi kɛlɛ, Biblia lɛ kɛɔ akɛ wu lɛ hu yɛ yitso, ni ji Mɔ ko ni yɔɔ hewalɛ yɛ enɔ. Bɔfo Paulo ŋma akɛ: “Shi miisumɔ akɛ nyɛle akɛ nuu fɛɛ nuu yitso ji Kristo, ni yoo fɛɛ yoo hu yitso ji nuu, ni Kristo yitso ji Nyɔŋmɔ.” (1 Korintobii 11:3) Wu ni yɔɔ nilee lɛ kaseɔ bɔ ni atsuɔ yitsoyeli he nii ahaa kɛtsɔɔ lɛ diɛŋtsɛ eyitso, ni ji Kristo Yesu kasemɔ nɔ.

12. Mɛɛ nɔkwɛmɔ nɔ fɛfɛo Yesu fee efɔ̃ shi yɛ heshibaa kpojiemɔ kɛ yitsoyeli he nitsumɔ hu mli?

¹² Yesu hu yɛ yitso, ni ji Yehowa, ni ebaa ehe shi ehaa Lɛ yɛ gbɛ kpakpa nɔ. Yesu kɛɛ: “Mitaooo nɔ ni mi diɛŋtsɛ misumɔɔ, shi moŋ nɔ ni tsɛ lɛ ni tsu mi lɛ sumɔɔ.” (Yohane 5:30) Mɛɛ nɔkwɛmɔ nɔ ni hi jogbaŋŋ kɛmɔ shi nɛ! Yesu ji “bɔɔnii fɛɛ ateŋ kromɔ bi.” (Kolosebii 1:15) Ebatsɔ Mesia lɛ. Lɛ nɔŋŋ hu ebafee Kristofoi ni afɔ amɛ mu lɛ asafo lɛ Yitso kɛ mɔ ni ahala akɛ Nyɔŋmɔ Maŋtsɛyeli lɛ nɔ Maŋtsɛ, ni nɔ kwɔ fe ŋwɛibɔfoi lɛ fɛɛ. (Filipibii 2:9-11; Hebribii 1:4) Yɛ gbɛhe ni nɔ kwɔ kɛ gbɛkpamɔi ni awo nɔ gojoo nɛɛ fɛɛ sɛɛ lɛ, Yesu jeee gbɔmɔ ni yitsoŋ wa, ni eyɔɔ keketee, aloo efeɔ shɛii. Ejeee mɔ ni kɛ hewalɛ tsuɔ nii yɛ gbɛ fɔŋ nɔ, ní eekai ekaselɔi lɛ be fɛɛ be akɛ esa akɛ amɛbo lɛ toi. Yesu yɛ suɔmɔ kɛ musuŋtsɔlɛ, titri lɛ kɛha mɛi ni anaanaa amɛnɔ lɛ. Ewie akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipã lɛ teremɔ waaa, ni mijatsu lɛ etsiii.” (Mateo 11:28-30) Eyɛ miishɛɛ waa akɛ aaafata ehe kɛhi shi be fɛɛ be.

13, 14. Wu ni yɔɔ suɔmɔ baatsu eyitsoyeli lɛ he nii, yɛ Yesu kasemɔ mli yɛ mɛɛ gbɛ nɔ?

¹³ Wu ni taoɔ weku shihilɛ ni miishɛɛ yɔɔ mli lɛ baafee jogbaŋŋ akɛ eeekase Yesu sui kpakpai nɛɛ. Wu kpakpa yitsoŋ waaa ni ejeee mɔ ni kɛ ewie ni awieee eko, ní ekɛ eyitsoyeli lɛ baatsu nii akɛ tso ní ekɛaayi eŋa lɛ hiɛ mã. Shi moŋ, esumɔɔ yoo lɛ ni ekɛ woo haa lɛ. Kɛ Yesu ‘baa ehe shi kɛjɛɔ etsui mli’ lɛ, no lɛ wu lɛ yɛ yiŋtoi babaoo ni eeedamɔ nɔ efee nakai, ejaakɛ tɔmɔ yɛ ehe, akɛni etamɔɔɔ Yesu hewɔ. Kɛ etɔ̃ lɛ, esumɔɔ ni eŋa lɛ anu lɛ shishi. No hewɔ lɛ, wu ni baa ehe shi lɛ kpɛlɛɔ etɔmɔi anɔ, eyɛ mli akɛ ekolɛ wiemɔi tamɔ, “Edɔ mi waa; bɔ ni okɛɛ lɛ ja,” kɛɛmɔ baawa kɛha lɛ. Ebaafee mlɛo kɛha ŋa lɛ akɛ eeejie bulɛ kpo etsɔɔ wu ni tsuɔ yitsoyeli he nii yɛ hiɛshikamɔ kɛ heshibaa mli, fe bɔ ni eeefee yɛ nuu henɔwolɔ kɛ kuɛŋtilɔ gbɛfaŋ. Ni yɛ lɛ hu egbɛfaŋ lɛ, ŋa ni yɔɔ bulɛ lɛ kpaa fai kɛji etɔ̃.

¹⁴ Nyɔŋmɔ bɔ yoo lɛ kɛ sui kpakpai ni ebaanyɛ ekɛtsu nii ni ekɛye ebua kɛha gbalashihilɛ ni miishɛɛ yɔɔ mli. Wu ni yɔɔ nilee baayoo enɛ, no hewɔ lɛ etsiŋ yoo lɛ naa. Etamɔ nɔ ni yei pii yɛ musuŋtsɔlɛ kɛ henumɔ babaoo, ni ji sui ni he hiaa kɛha weku kwɛmɔ kɛ adesai ateŋ wekukpaai ayibaamɔ. Bei pii lɛ, yoo lɛ feɔ mɔ ni he esa waa yɛ shia ni aaaha efee he ni yɔɔ miishɛɛ kɛha shihilɛ lɛ gbɛfaŋ. “Yoo kpakpa” ni awie ehe yɛ Abɛi yitso 31 lɛ yɛ sui kpakpai babaoo kɛ ŋaai kɛ hesaai hu ni nɔ bɛ, ni eweku lɛ naa enɛɛmɛi ahe sɛɛ kɛmɔɔ shi. Mɛni hewɔ? Ejaakɛ ewu tsui “kãa” enɔ.—Abɛi 31:10, 11.

15. Wu baanyɛ ajie suɔmɔ kɛ bulɛ ni tamɔ Kristo nɔ lɛ eko kpo etsɔɔ eŋa yɛ mɛɛ gbɛ nɔ?

¹⁵ Yɛ hiŋmɛigbelemɔ mli nifeemɔi komɛi amli lɛ, amaa hegbɛ ni wu lɛ yɔɔ lɛ nɔ mi fe nine, aahu akɛ, abuɔ sane folo kɛkɛ ni aaabi lɛ lɛ po akɛ nɔ ni etsɔɔɔ bulɛ. Ekolɛ ekɛ eŋa yeɔ tamɔ nyɔŋ. Nɛkɛ yitsoyeli yɛ gbɛ ni ejaaa nɔ nɛɛ kɛ wekukpaa ni fiteɔ baa, jeee yɛ ekɛ eŋa teŋ pɛ kɛkɛ, shi yɛ ekɛ Nyɔŋmɔ teŋ hu. (Okɛto 1 Yohane 4:20, 21 he.) Nɔ ni tamɔɔɔ enɛ hu ji akɛ, wumɛi komɛi kpooɔ akɛ amɛaanyiɛ hiɛ, ni amɛhaa amɛŋamɛi yeɔ weku lɛ nɔ. Wu ni baa ehe shi ehaa Kristo jogbaŋŋ lɛ eshishiuuu eŋa, ni eheee yoo lɛ hiɛnyam hu yɛ edɛŋ. Shi moŋ, ekaseɔ Yesu he-kɛ-afɔleshaa suɔmɔ lɛ, ni efeɔ taakɛ Paulo wo ŋaa lɛ, akɛ: ‘Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ lɛ.’ (Efesobii 5:25) Kristo Yesu sumɔ esɛɛnyiɛlɔi lɛ aahu akɛ egbo eha amɛ. Wu kpakpa baabɔ mɔdɛŋ ni ekase nakai su ni pɛsɛmkunya bɛ mli lɛ, ni etao nɔ ni hi kɛha eŋa, moŋ fe ni eeefee shɛii yɛ yoo lɛ nɔ. Kɛ wu lɛ baa ehe shi ehaa Kristo ni ejieɔ suɔmɔ kɛ bulɛ ni tamɔ Kristo nɔ lɛ kpo lɛ, no baakanya ŋa lɛ ni eba ehe shi eha lɛ.—Efesobii 5:28, 29, 33.

16. Mɛɛ sui esa akɛ ŋa ajie lɛ kpo yɛ ekɛ ewu teŋ wekukpaa mli?

¹⁶ Beni abɔ Adam lɛ sɛɛ be ko mli lɛ, “Yehowa Nyɔŋmɔ kɛɛ: ‘Ehiii akɛ gbɔmɔ lɛ kome hiɔ shi; mafee hefatalɔ ko ni sa lɛ maha lɛ.’ ” (1 Mose 2:18) Nyɔŋmɔ bɔ Hawa akɛ “hefatalɔ,” shi jeee akɛ mpleshilɔ. Atooo gbalashihilɛ akɛ efee tamɔ lɛlɛ ni yɔɔ kudɔlɔi enyɔ ni kɛ amɛhe shiɔ mple. Esa akɛ wu lɛ ajie yitsoyeli ni suɔmɔ yɔɔ mli kpo, ni ŋa lɛ hu aná suɔmɔ, bulɛ, kɛ heshibaa ni jɛ esuɔmɔ mli.

17, 18. Mɛni ji gbɛi komɛi ni ŋa lɛ baanyɛ atsɔ nɔ afee yelikɛbualɔ diɛŋtsɛ kɛha ewu?

¹⁷ Shi kɛlɛ, ŋa kpakpa feɔ babaoo fe ehe shi ni ebaa kɛkɛ. Ebɔɔ mɔdɛŋ akɛ eeefee yelikɛbualɔ diɛŋtsɛ, ni efiɔ ewu lɛ sɛɛ yɛ yiŋkpɛi ni nuu lɛ feɔ lɛ amli. Yɛ anɔkwale mli lɛ, efeɔ mlɛo kɛhaa yoo lɛ kɛji ekɛ nuu lɛ yiŋkpɛi kpaa gbee. Shi kɛji yoo lɛ kɛ lɛ kpaaa gbee po lɛ, ekãa ni yoo lɛ kɛfiɔ nuu lɛ sɛɛ lɛ baanyɛ aye abua nuu lɛ yiŋkpɛɛ ni omanyeyeli babaoo ajɛ mli kɛba.

¹⁸ Ŋa lɛ baanyɛ aye abua ewu ni efee yitso kpakpa yɛ gbɛi krokomɛi anɔ. Ebaanyɛ ejie hiɛsɔɔ kpo yɛ mɔdɛŋ ni ebɔɔ yɛ hiɛnyiɛmɔ mli lɛ gbɛfaŋ, moŋ fe ni eeewie eshi lɛ loo ni eeeha enu he akɛ enyɛŋ eha emii ashɛ ehe kɔkɔɔkɔ. Beni ekɛ ewu lɛ yeɔ yɛ gbɛ kpakpa nɔ lɛ, esa akɛ yoo lɛ akai akɛ “mumɔ ni he jɔ ni yɔɔ kpoo lɛ . . . ji nɔ ni jara wa yɛ Nyɔŋmɔ hiɛ,” shi jeee yɛ ewu lɛ hiɛ kɛkɛ. (1 Petro 3:3, 4; Kolosebii 3:12) Shi kɛji wu lɛ jeee heyelilɔ hu? Kɛ eji heyelilɔ jio, ejeee heyelilɔ jio, Ŋmalɛi lɛ woɔ ŋamɛi ahewalɛ “ni amɛsumɔ amɛwumɛi, amɛsumɔ amɛbii, amɛhiɛ akã shi, amɛhe atse, amɛbaa amɛwe yi jogbaŋŋ, amɛmli ahi, amɛba amɛhe shi amɛha amɛwumɛi, koni akawie Nyɔŋmɔ wiemɔ lɛ he musubɔɔ wiemɔ.” (Tito 2:4, 5) Kɛ henilee he saji te shi lɛ, eeenyɛ eba akɛ wu ni heee yeee lɛ baajie bulɛ kpo etsɔɔ eŋa lɛ shidaamɔ, kɛji etsɔɔ eshidaamɔ nɛɛ yɛ “mlijɔlɛ kɛ gbeyeishemɔ” mli. Nine enyɛ eshɛ wumɛi ni heee yeee lɛ ekomɛi anɔ, ejaakɛ ‘ashi wiemɔ lɛ sɛɛ ni atsɔ yei lɛ ajeŋba nɔ ni nine shɛ amɛnɔ, ejaakɛ amɛnaa [amɛ] jeŋba ni hetsemɔ kɛ gbeyeishemɔ yɔɔ mli lɛ.’—1 Petro 3:1, 2, 15; 1 Korintobii 7:13-16.

19. Shi, kɛji wu lɛ miibi ni eŋa aku Nyɔŋmɔ mla mli hu?

¹⁹ Shi kɛ wu lɛ bi ni eŋa afee nɔ ko ni Nyɔŋmɔ egu efeemɔ hu? Kɛ eba lɛ nakai lɛ, esa akɛ ekai akɛ Nyɔŋmɔ ji Nɔyelɔ ni fe fɛɛ. Esa akɛ eha nɔ ni bɔfoi lɛ fee beni nɔyelɔi lɛ bi ni amɛku Nyɔŋmɔ mla mli lɛ afee nɔkwɛmɔ nɔ kɛha lɛ. Bɔfoi lɛ Asaji 5:29 gbaa wɔ akɛ: “Petro kɛ bɔfoi lɛ here nɔ ni amɛkɛɛ: ‘Esa akɛ aboɔ Nyɔŋmɔ moŋ toi [akɛ nɔyelɔ, NW] fe gbɔmɛi.’ ”

20. Mɛɛ shihilɛ ni he hiaa mli suɔmɔ kɛ bulɛ he hiaa waa yɛ titri?

²⁰ Suɔmɔ kɛ bulɛ he miihia waa yɛ gbalashihilɛ lɛ mli he kroko hu—sanegbaa mli. Wu ni yɔɔ suɔmɔ lɛ kɛ eŋa baagba enitsumɔi, enaagbai, kɛ esusumɔi yɛ saji sɔrɔtoi ahe lɛ he sane. Enɛ he hiaa yoo lɛ. Wu ni naa be ekɛ eŋa gbaa sane ni eboɔ nɔ ni yoo lɛ kɛɔ lɛ toi jogbaŋŋ hu lɛ kɛ nakai feemɔ tsɔɔ suɔmɔ kɛ bulɛ ni eyɔɔ kɛha yoo lɛ. (Yakobo 1:19) Ŋamɛi komɛi wieɔ akɛ be bibioo pɛ amɛwumɛi naa kɛhaa amɛ ni amɛkɛ amɛ gbaa sane. Enɛ yɛ dɔlɛ waa. Eji anɔkwale, yɛ bei ni deka bɛ mli nɛɛ hewɔ lɛ, ekolɛ wumɛi shiɔ shia kɛyatsuɔ nii ŋmɛlɛtswai babaoo, ni ekolɛ shika gbɛfaŋ shihilɛi baaha ŋamɛi komɛi atao blɔfo nitsumɔ amɛtsu. Shi esa akɛ mɛi enyɔ ni ebote gbalashihilɛ mli lɛ ato be amɛha amɛhe. Kɛ jeee nakai lɛ, amɛbaahi shi akɛ mɛi ni amɛteŋ mɔ fɛɛ mɔ baafee nɔ ni esumɔɔ. Ni kɛ amɛnuɔ he akɛ esa akɛ amɛtao naanyobɔɔ ni baana mli aha amɛ yɛ gbalashihilɛ gbɛjianɔtoo lɛ sɛɛ lɛ, ebaanyɛ ekɛ naagbai ni hiɛdɔɔ yɔɔ mli aba.

21. Wiemɔi kpakpai yeɔ ebuaa ni ehaa gbalashihilɛ feɔ miishɛɛ yɛ mɛɛ gbɛ nɔ?

²¹ Bɔ ni ŋamɛi kɛ wumɛi kɛ amɛhe gbaa sane lɛ he miihia. “Naajɔlɛ wiemɔ . . . ŋɔɔ susuma naa, ni amɛhaa wui naa hewalɛ.” (Abɛi 16:24) Kɛji hefatalɔ lɛ heɔ eyeɔ jio, eheee eyeee jio, Biblia ŋaawoo lɛ sa pɛpɛɛpɛ, akɛ: “Nyɛhaa nyɛ wiemɔ he abaa nyam daa, ni ŋoo ahi mli,” ni tsɔɔ akɛ, esa akɛ efee wiemɔ ni sa. (Kolosebii 4:6) Kɛ etɔ mɔ waa yɛ gbi lɛ mli lɛ, mlihilɛ, kɛ henumɔ wiemɔi fioo ni mɔ lɛ hefatalɔ aaawie lɛ baanyɛ atsu nɔ kpakpa waa. “Wiemɔ ni awie yɛ be ni sa mli lɛ, etamɔ shika akutui yɛ jwiɛtɛi kpanyai amli.” (Abɛi 25:11) Gbee ni akɛaawie kɛ wiemɔi diɛŋtsɛ ni aaawie lɛ he miihia waa. Akɛ nɔkwɛmɔ nɔ lɛ, ekolɛ mɔ kome kɛ mlifu, kɛ yisɛɛ tsirɛmɔ gbee baakɛɛ mɔ kroko lɛ akɛ: “Ŋa nakai shinaa lɛ!” Shi kwɛ bɔ ni “ŋoo” yɔɔ wiemɔ ni aaawie kɛ gbee ni tsuishitoo, kɛ shishinumɔ yɔɔ mli lɛ “mli” akɛ, “Ofainɛ ni oŋa shinaa lɛ oha mi.”

22. Mɛɛ sui he hiaa gbalashihilɛ mli hefatalɔi bɔni afee ni amɛteŋ sanegbaa kpakpa ahi shi daa?

²² Sanegbaa kpakpa yaa hiɛ kɛji awieɔ wiemɔi ni mlijɔlɛ yɔɔ mli, ni mɔ kwɛmɔ kɛ ninefɔ̃ɔ ni yɔɔ nyam, kɛ mlihilɛ, shishinumɔ, kɛ suɔmɔ hu yɛ mli. Kɛ abɔ mɔdɛŋ waa ni aha sanegbaa kpakpa tee nɔ daa lɛ, ebaaha wu lɛ kɛ ŋa lɛ fɛɛ anyɛ ajie amɛ hiamɔ nii akpo amɛtsɔɔ amɛhe, ni amɛbaanyɛ amɛfee miishɛjemɔ kɛ yelikɛbuamɔ jɛɛhe amɛha amɛhe yɛ nijiaŋwujee loo haomɔ bei amli. Nyɔŋmɔ Wiemɔ lɛ woɔ hewalɛ akɛ: “Nyɛshɛjea mɛi ni tsui fãa lɛ amii.” (1 Tesalonikabii 5:14) Bei shɛɔ ni wu lɛ naaa miishɛɛ, ni bei shɛɔ ni ebaa lɛ nakai yɛ ŋa lɛ hu gbɛfaŋ. ‘Amɛbaanyɛ amɛshɛjeshɛjee amɛmii,’ ni amɛtswa amɛhe amɛma shi.—Romabii 15:2.

23, 24. Suɔmɔ kɛ bulɛ baaye ebua yɛ be mli ni gbeekpamɔ baaa, yɛ mɛɛ gbɛ nɔ? Okɛ nɔkwɛmɔ nɔ aha.

²³ Gbalashihilɛ mli hefatalɔi ni jieɔ suɔmɔ kɛ bulɛ kpo amɛtsɔɔ amɛhe lɛ enaŋ saji ni amɛkpaaa gbee yɛ he lɛ eko fɛɛ eko akɛ naagba wulu. Amɛbaabɔ mɔdɛŋ waa ni ‘amɛmli akajoo’ yɛ amɛnɔ. (Kolosebii 3:19) Esa akɛ mɛi enyɔ lɛ fɛɛ akai akɛ “naajɔlɛ hetoo kuɔ mlila naa.” (Abɛi 15:1) Esa akɛ okwɛ jogbaŋŋ ni okaba ohefatalɔ ni jieɔ etsui mli henumɔi akpo lɛ shi, aloo obu lɛ fɔ po. Shi moŋ, buu nibii ni ejieɔ lɛ kpo nɛɛ akɛ hegbɛ ni ona ni okɛbaayoo mɔ kroko lɛ susumɔi. Nyɛbɔa mɔdɛŋ nyɛfea ekome kɛtsua naataamɔi ahe nii koni nyɛmu saji anaa yɛ gbeekpamɔ mli.

²⁴ Kaimɔ be ko beni Sara kɛ ŋaawoo ko ha ewu, Abraham, ákɛ naagba ko naa tsabaa, ni ŋaawoo lɛ kɛ nuu lɛ henumɔi kpaaa gbee lɛ. Kɛlɛ, Nyɔŋmɔ kɛɛ Abraham akɛ: “Bo egbee toi yɛ mli.” (1 Mose 21:9-12) Abraham fee nakai, ni ajɔɔ lɛ. Nakai nɔŋŋ, kɛji ŋa lɛ wo ŋaa ko ni esoro no yɛ nɔ ni yɔɔ ewu jwɛŋmɔ mli lɛ he lɛ, esa akɛ kɛ hoo lɛ, nuu lɛ abo lɛ toi. Yɛ nakai beaŋ nɔŋŋ lɛ, esaaa ni yoo lɛ nyiɛɔ hiɛ yɛ sane hesusumɔ lɛ mli, shi moŋ esa akɛ ebo nɔ ni ewu lɛ yɔɔ kɛɛmɔ lɛ toi. (Abɛi 25:24) Wu loo ŋa ni aaafee keketee yɛ nɔ ni etaoɔ ni afee lɛ he be fɛɛ be lɛ etsɔɔɔ suɔmɔ kɛ bulɛ.

25. Sanegbaa kpakpa yeɔ ebuaa kɛhaa miishɛɛnamɔ yɛ gbalashihilɛ mli nifeemɔi ni haa abɛŋkɛɔ he kpaakpa lɛ amli yɛ mɛɛ gbɛ nɔ?

²⁵ Sanegbaa kpakpa he miihia yɛ hefatalɔi abɔlɛnamɔ hu mli. Pɛsɛmkunya kɛ henɔyeli ni akɛtsuuu nii baanyɛ afite nɛkɛ gbalashihilɛ mli tsakpaa ni haa amɛbɛŋkɛɔ amɛhe gbagbalii fe fɛɛ nɛɛ. Sanegbaa yɛ faŋŋ mli, kɛ tsuishitoo, he miihia waa. Kɛ mɔ kome taoɔ mɔ kroko lɛ hilɛ-kɛhamɔ ni pɛsɛmkunya bɛ mli lɛ, efɔɔɔ kaa akɛ bɔlɛnamɔ kɛ naagbai ni yɔɔ hiɛdɔɔ baa. Taakɛ eji yɛ saji krokomɛi amli lɛ, yɛ enɛ hu mli lɛ, “mɔ ko mɔ ko akapele miiha ehe, shi moŋ mɔ fɛɛ mɔ apele aha enaanyo.”—1 Korintobii 7:3-5; 10:24.

26. Eyɛ mli akɛ gbalashihilɛ fɛɛ gbalashihilɛ baaná eŋɔɔmɔ bei kɛ ejoomɔ bei moŋ, shi Nyɔŋmɔ Wiemɔ lɛ toiboo baaye abua gbalashihilɛ mli hefatalɔi ni amɛna miishɛɛ yɛ mɛɛ gbɛ nɔ?

²⁶ Kwɛ ŋaawoo kpakpa ni Nyɔŋmɔ Wiemɔ lɛ kɛhaa! Lɛlɛŋ, gbalashihilɛ fɛɛ gbalashihilɛ baana eŋɔɔmɔ bei kɛ ejoomɔ bei. Shi kɛ hefatalɔi lɛ ba amɛhe shi amɛha Yehowa susumɔi, taakɛ ajie lɛ kpo yɛ Biblia lɛ mli lɛ, ni amɛha amɛteŋ wekukpaa lɛ damɔ mla naa suɔmɔ kɛ bulɛ nɔ lɛ, no lɛ amɛbaanyɛ amɛna hekɛnɔfɔɔ akɛ amɛ gbalashihilɛ lɛ sɛɛ baatsɛ ni ebaafee nɔ ni miishɛɛ yɔɔ mli. Ni kɛtsɔ no nɔ lɛ, jeee amɛ pɛ amɛhiɛ nyam amɛbaawo, shi moŋ amɛbaawo gbalashihilɛ Shishitolɔ, Yehowa Nyɔŋmɔ hu hiɛ nyam.