‘Abaatee Gbohii Ashi’
“Ejaakɛ abaakpã tɛtrɛmantrɛ, ni aaatee gbohii ashi ni amɛfiteŋ dɔŋŋ, ni wɔ lɛ, abaatsake wɔ.”—1 KORINTOBII 15:52.
1, 2. (a) Mɛɛ shiwoo ni shɛjeɔ mɔ mii akɛha kɛtsɔ gbalɔ Hoshea nɔ? (b) Te wɔfeɔ tɛŋŋ wɔleɔ akɛ Nyɔŋmɔ miisumɔ ni ekɛ gbohii lɛ aba wala mli ekoŋŋ?
ANI olaaje mɔ ko ni bɛŋkɛ bo kpaakpa yɛ gbele mli dã? No lɛ ole dɔlɛ babaoo ni gbele nyɛɔ ekɛbaa. Shi kɛlɛ, Kristofoi náa miishɛjemɔ kɛjɛɔ shiwoo ni Nyɔŋmɔ kɛha kɛtsɔ gbalɔ Hoshea nɔ lɛ mli, akɛ: “Makpɔ̃ amɛ kɛaajɛ gbohiiaje dɛŋ, majie amɛ kɛaajɛ gbele mli! Gbele, nɛgbɛ otsɛŋemɔ hela lɛ yɔɔ? Gbohiiaje, nɛgbɛ ogbele hela lɛ yɔɔ?”—Hoshea 13:14.
2 Susumɔ ni ayɔɔ akɛ gbohii lɛ baaba wala mli ekoŋŋ lɛ tamɔ nɔ ni nilee bɛ mli kɛha ŋwanejelɔi ni wieɔ shiɔ lɛ. Shi eka shi faŋŋ akɛ Nyɔŋmɔ Ofe lɛ yɛ hewalɛ ni ekɛaafee naakpɛɛ nii ni tamɔ nɛkɛ! Sane lɛ diɛŋtsɛ ji akɛ, ani Yehowa miisumɔ ni ekɛ gbohii lɛ aku sɛɛ kɛba wala mli ekoŋŋ lo. Jalɔ Hiob bi akɛ: “Kɛji gbɔmɔ gbo lɛ, ani ehiɛ aaakã ekoŋŋ?” Kɛkɛ ni ekɛ hetoo ni nɔmimaa yɔɔ he nɛɛ hã akɛ: “Kulɛ oootsɛ́, ni mahereo nɔ; ni oootao oninenaa nitsumɔ lɛ sɛɛgbɛ.” (Hiob 14:14, 15) Wiemɔ ‘oootao sɛɛgbɛ’ lɛ tsɔɔ ekãa ni akɛshweɔ loo akɛdiɔ nɔ ko sɛɛ. (Okɛto Lala 84:3 he.) Hɛɛ, Yehowa kɛ hiɛdɔɔ miikpa gbohiiashitee lɛ gbɛ akɛ ebaaba—eeshwe ni ena anɔkwafoi ni egboi, ni amɛhiɛ kamɔ yɛ ekaimɔ mli lɛ ekoŋŋ yɛ wala mli.—Mateo 22:31, 32.
Yesu Tsɔɔ Gbohiiashitee lɛ Mli Jogbaŋŋ
3, 4. (a) Te Yesu tsɔɔ gbohiiashitee hiɛnɔkamɔ lɛ mli jogbaŋŋ eha tɛŋŋ? (b) Mɛni hewɔ atee Yesu shi yɛ mumɔŋ, shi jeee yɛ heloo mli lɛ?
3 Blema hii ni yɔɔ hemɔkɛyeli tamɔ Hiob lɛ ná gbohiiashitee lɛ he shishinumɔ bibioo ko kɛkɛ. Yesu Kristo ji mɔ ni batsɔɔ hiɛnɔkamɔ ni yɔɔ naakpɛɛ nɛɛ mli jogbaŋŋ kɛmɔ shi. Etsɔɔ gbɛfaŋnɔ titri ni lɛ diɛŋtsɛ eyɔɔ yɛ mli lɛ beni ekɛɛ akɛ: “Mɔ ni heɔ bi lɛ nɔ yeɔ lɛ, eyɛ naanɔ wala.” (Yohane 3:36) Nɛgbɛ abaaná nakai wala lɛ mli ŋɔɔmɔ yɛ? Yɛ mɛi ni jieɔ hemɔkɛyeli kpo lɛ ateŋ mɛi babaoo agbɛfaŋ lɛ, ebaafee shikpɔŋ nɔ. (Lala 37:11) Shi kɛlɛ, Yesu kɛɛ ekaselɔi lɛ akɛ: “Kaashe gbeyei, asafoku bibioo; ejaakɛ nyɛtsɛ lɛ yɛ he tsuijurɔ akɛ eeeŋɔ maŋtsɛyeli lɛ eha nyɛ.” (Luka 12:32) Nyɔŋmɔ Maŋtsɛyeli lɛ yɛ ŋwɛi. Enɛ hewɔ lɛ, shiwoo nɛɛ tsɔɔ akɛ ebaabi ní “asafoku bibioo” ko kɛ Yesu ahi ŋwɛi akɛ mumɔŋ bɔɔnii. (Yohane 14:2, 3; 1 Petro 1:3, 4) Mɛɛ gbɛkpamɔ ni yɔɔ nyam nɛ! Yesu tee nɔ ejie lɛ kpo etsɔɔ bɔfo Yohane akɛ nɛkɛ “asafoku bibioo” nɛɛ ayifalɛ baafee mɛi 144,000 pɛ.—Kpojiemɔ 14:1.
4 Shi, mɛɛ gbɛ nɔ mɛi 144,000 lɛ baatsɔ abote ŋwɛi anunyam lɛ mli? Yesu “[jie] wala kɛ naanɔ shihilɛ kpo etsɔɔ wɔ yɛ sanekpakpa lɛŋ.” Etsɔ lɛ diɛŋtsɛ elá lɛ nɔ eje “gbɛ hee ni hiɛ kã” shishi yɛ ŋwɛi. (2 Timoteo 1:10; Hebribii 10:19, 20) Klɛŋklɛŋ lɛ, egbo, taakɛ Biblia lɛ egba efɔ̃ shi akɛ ebaagbo lɛ. (Yesaia 53:12) No sɛɛ lɛ, taakɛ bɔfo Petro jaje etsɔɔ yɛ sɛɛ mli lɛ, “nɛkɛ Yesu nɛɛ Nyɔŋmɔ tee lɛ shi.” (Bɔfoi lɛ Asaji 2:32) Shi ateee Yesu shi akɛ adesa. Ewie momo akɛ: “Aboloo ni mikɛbaaha lɛ, ji miheloo ni mikɛbaaha yɛ je lɛ wala hewɔ lɛ.” (Yohane 6:51) Kɛ́ eku sɛɛ eŋɔ eheloo lɛ ekoŋŋ lɛ, ebaaha nakai afɔleshaa lɛ afee efolo. No hewɔ lɛ, Yesu lɛ, “agbe lɛ yɛ heloo gbɛfaŋ moŋ, shi ahã lɛ wala yɛ mumɔ gbɛfaŋ.” (1 Petro 3:18) Yesu tsɔ nɛkɛ gbɛ nɔ “ekɛná naanɔ kpɔmɔ [eha wɔ],” ni ji “asafoku bibioo” lɛ. (Hebribii 9:12) Ekɛ ewala akɛ adesa ni eye emuu lɛ jarawalɛ lɛ yaha Nyɔŋmɔ akɛ kpɔmɔ nɔ kɛha adesai eshafeelɔi, ni mɛi 144,000 lɛ ji mɛi ni ná enɛ he sɛɛ klɛŋklɛŋ.
5. Mɛɛ hiɛnɔkamɔ akɛha Yesu klɛŋklɛŋ afii oha lɛ mli sɛɛnyiɛlɔi lɛ?
5 Yesu efeŋ mɔ pɛ ni abaatee lɛ shi kɛya ŋwɛi wala mli. Paulo kɛɛ enanemɛi Kristofoi ni yɔɔ Roma lɛ akɛ akɛ mumɔ krɔŋkrɔŋ lɛ efɔ amɛ mu koni amɛtsɔmɔ Nyɔŋmɔ bii kɛ Kristo nanemɛi niyelɔi, kɛji akɛ amɛŋmɛ amɛtsui shi kɛyashi naagbee ni amɛkɛma amɛ mufɔɔ lɛ nɔ mi. (Romabii 8:16, 17) Paulo tsɔɔ mli hu akɛ: “Kɛji wɔkɛ lɛ efee ekome yɛ egbele lɛ henɔ lɛ mli lɛ, no lɛ wɔkɛ lɛ aaafee ekome yɛ eshitee lɛ nɔ̃ lɛ mli hu.”—Romabii 6:5.
Yɛ Gbohiiashitee Hiɛnɔkamɔ lɛ Hefamɔ Mli
6. Mɛni hewɔ gbohiiashitee lɛ mli hemɔkɛyeli baje tutuamɔ shishi yɛ Korinto lɛ, ni te bɔfo Paulo tsu he nii eha tɛŋŋ?
6 Gbohiiashitee lɛ fata Kristojamɔ ‘shishijee tsɔɔmɔi’ lɛ ahe. (Hebribii 6:1, 2) Shi kɛlɛ, tsɔɔmɔ lɛ yaje tutuamɔ shishi yɛ Korinto. Asafo lɛ mli bii lɛ ateŋ mɛi komɛi, ní eka shi faŋŋ akɛ Hela jeŋ nilee ená amɛnɔ hewalɛ lɛ miikɛɛ akɛ: “Gbohiiashitee ko bɛ.” (1 Korintobii 15:12) Beni enɛ he amaniɛbɔɔ yashɛ bɔfo Paulo ŋɔɔ lɛ, efã gbohiiashitee hiɛnɔkamɔ lɛ he, titri lɛ Kristofoi ni afɔ amɛ mu lɛ ahiɛnɔkamɔ lɛ. Nyɛhaa wɔpɛia Paulo wiemɔi lɛ amli, taakɛ aŋma yɛ 1 Korintobii yitso 15 lɛ mli wɔkwɛa. Ebaaye ebua bo jogbaŋŋ kɛji akɛ ókane yitso muu lɛ fɛɛ momo, taakɛ ajie yi yɛ nikasemɔ ni tsɔ enɛ hiɛ lɛ mli lɛ.
7. (a) Mɛɛ sane titri Paulo gbala jwɛŋmɔ kɛtee nɔ? (b) Namɛi na Yesu ni atee lɛ shi lɛ?
7 Paulo tsɔɔ saneyitso ni esanegbaa lɛ kɔɔ he, yɛ 1 Korintobii yitso 15, klɛŋklɛŋ kukuji enyɔ lɛ mli akɛ: “Anyɛmimɛi, miiha nyɛle akɛ sanekpakpa lɛ ni mijaje mitsɔɔ nyɛ, ní nyɛmɔ mli hu, ní nyɛhiɛ mli hu lɛ, no nɔŋŋ akɛaahere nyɛyiwala, . . . kɛ́ jeee nakai lɛ nyɛhe nyɛye yakatswaa.” Kɛ́ Korintobii lɛ damɔɔɔ shi shiŋŋ yɛ sanekpakpa lɛ mli lɛ, no lɛ amɛkpɛlɛ anɔkwale lɛ nɔ yakatswaa. Paulo tee nɔ akɛ: “Klɛŋklɛŋ saji ni mikɛha nyɛ lɛ ateŋ eko ji nɔ ni mi hu akɛha mi, ákɛ Kristo gbo yɛ wɔhe eshai lɛ ahewɔ yɛ ŋmalɛi lɛ anaa, ni ákɛ afũ lɛ, ni ákɛ atee lɛ shi ekoŋŋ yɛ gbi ni ji gbi etɛ lɛ nɔ yɛ ŋmalɛi lɛ anaa; ni ákɛ ejie ehe kpo etsɔɔ Kefa, no sɛɛ lɛ mɛi nyɔŋma kɛ enyɔ lɛ. No sɛɛ lɛ ejie ehe kpo etsɔɔ aaafee nyɛmimɛi ohai enumɔ loo nɔ̃ shikome, mɛi ni amɛteŋ mɛi pii yɔɔ kɛbashi ŋmɛnɛ, shi mɛi komɛi hu ewɔ. No sɛɛ lɛ ejie ehe kpo etsɔɔ Yakobo, no sɛɛ lɛ bɔfoi lɛ fɛɛ. Shi amɛ fɛɛ amɛsɛɛ lɛ ejie ehe kpo etsɔɔ mi hu ni mitamɔ mɔ ko ni akpatu afɔ lɛ lɛ.”—1 Korintobii 15:3-8.
8, 9. (a) Te gbohiiashitee lɛ mli hemɔkɛyeli lɛ he hiaa ha tɛŋŋ? (b) Mɛɛ be eeenyɛ efee akɛ Yesu jie ehe kpo etsɔɔ “aaafee nyɛmimɛi ohai enumɔ loo nɔ̃” lɛ?
8 Kɛha mɛi ni ekpɛlɛ sanekpakpa lɛ nɔ lɛ, Yesu shitee lɛ mli hemɔkɛyeli lɛ jeee nɔ ni amɛ diɛŋtsɛ amɛaahala yɛ amɛsuɔmɔ naa. Mɛi ni kɛ amɛhiŋmɛi ye he odase lɛ ateŋ mɛi pii yɛ ni maa nɔ mi akɛ “Kristo gbo yɛ wɔhe eshai lɛ ahewɔ,” ni ákɛ atee lɛ shi. Amɛteŋ mɔ kome ji Kefa, loo Petro, taakɛ ale lɛ jogbaŋŋ lɛ. Beni Petro kwa Yesu yɛ gbi gbɛkɛ ni atsɔɔ Yesu sɛɛgbɛ ni amɔ lɛ lɛ sɛɛ lɛ, eka shi faŋŋ akɛ Yesu he kpo ni ejie etsɔɔ lɛ lɛ shɛje emii waa diɛŋtsɛ. Yesu ni átee lɛ shi lɛ hu tee “mɛi nyɔŋma kɛ enyɔ lɛ,” ni ji bɔfoi lɛ ákɛ kuu lɛ aŋɔɔ—niiashikpamɔ ko ni ŋwanejee ko bɛ he akɛ eye ebua amɛ ni amɛye amɛ gbeyeishemɔ lɛ nɔ ni amɛtsɔmɔ Yesu shitee lɛ he odasefoi ni yɔɔ ekãa.—Yohane 20:19-23; Bɔfoi lɛ Asaji 2:32.
9 Kristo jie ehe kpo etsɔɔ kuu wulu ko hu, “aaafee nyɛmimɛi ohai enumɔ loo nɔ̃.” Akɛni Galilea pɛ ji he ni eyɔɔ sɛɛnyiɛlɔi babaoo tamɔ nakai yɛ hewɔ lɛ, ekolɛ enɛ ba mli yɛ be ni awie he yɛ Mateo 28:16-20 lɛ mli, beni Yesu kɛ famɔ ha akɛ amɛyafee mɛi kaselɔi lɛ. Kwɛ odase ni mli wa ni aŋkroaŋkroi nɛɛ baanyɛ aye! Amɛteŋ mɛi komɛi yɛ wala mli lolo yɛ afi 55 Ŋ.B. beni Paulo ŋma klɛŋklɛŋ wolo nɛɛ eyaha Korintobii lɛ. Shi, kadimɔ akɛ awie mɛi ni egboi momo lɛ ahe akɛ ‘amɛwɔ yɛ gbele mli.’ No mli lɛ ateeko amɛ shi ní amɛnine baashɛ amɛ ŋwɛi nyɔmɔwoo lɛ nɔ.
10. (a) Mɛɛ hewalɛ Yesu naagbee kpee ní ekɛ ekaselɔi lɛ fee lɛ ná yɛ amɛnɔ? (b) Yesu jie ehe kpo etsɔɔ Paulo “[tamɔ] mɔ ko ni akpatu afɔ lɛ” yɛ mɛɛ gbɛ nɔ?
10 Yesu shitee lɛ he odasefonyo kroko hu ni sa kadimɔ waa ji Yakobo, Yosef kɛ Yesu nyɛ Maria binuu lɛ. Dani eshitee be lɛ aaashɛ lɛ, no mli lɛ eka shi faŋŋ akɛ Yakobo ebatsɔko heyelilɔ. (Yohane 7:5) Shi beni Yesu jie ehe kpo etsɔɔ lɛ sɛɛ lɛ, Yakobo batsɔ heyelilɔ, ni ekolɛ ená gbɛfaŋnɔ yɛ enyɛmimɛi hii krokomɛi lɛ atsakemɔ mli. (Bɔfoi lɛ Asaji 1:13, 14) Beni ekɛ ekaselɔi lɛ kpe nɔ ni ji naagbee nɔ, yɛ be mli ni ekwɔ kɛtee ŋwɛi lɛ, Yesu kɛ nitsumɔ wo amɛdɛŋ ní “[amɛtsɔmɔ odasefoi] . . . kɛyashi shikpɔŋ lɛ naagbee hei lɛ.” (Bɔfoi lɛ Asaji 1:6-11) Sɛɛ mli lɛ, ejie ehe kpo etsɔɔ Saul ni jɛ Tarso, ni waa Kristofoi lɛ ayi lɛ. (Bɔfoi lɛ Asaji 22:6-8) Yesu jie ehe kpo etsɔɔ Saul “[tamɔ] mɔ ko ni akpatu afɔ lɛ.” Efee tamɔ nɔ ni atee Saul shi kɛtee mumɔŋ wala mli momo ni enyɛ ena Nuntsɔ ni awo ehiɛ nyam lɛ afii ohai abɔ dani mɛi ni afɔ amɛ mu lɛ agbohiiashitee lɛ baashɛ. Niiashikpamɔ nɛɛ tsĩ Saul gbɛ amrɔ nɔŋŋ yɛ egbɔmɔgbee gbɛ ni ekɛteɔ shi ewoɔ Kristofoi asafo lɛ mli, ni eha tsakemɔ ko ni sa kadimɔ waa ba yɛ egbɛfaŋ. (Bɔfoi lɛ Asaji 9:3-9, 17-19) Saul batsɔ bɔfo Paulo, ni ji mɛi ni fã Kristofoi ahemɔkɛyeli lɛ he waa diɛŋtsɛ lɛ ateŋ mɔ kome.—1 Korintobii 15:9, 10.
Gbohiiashitee lɛ Mli Hemɔkɛyeli He Miihia
11. Paulo kpá tɔ̃mɔ ni yɔɔ wiemɔ ni awieɔ akɛ, “Gbohiiashitee ko bɛ” lɛ mli lɛ he mama yɛ mɛɛ gbɛ nɔ?
11 No hewɔ lɛ Yesu shitee lɛ ji anɔkwa sane ko ni aye he odase jogbaŋŋ. “Shi kɛ́ aashiɛ yɛ Kristo he akɛ atee lɛ shi kɛjɛ gbohii ateŋ lɛ,” taakɛ Paulo taa naa lɛ, “te tɛŋŋ ni nyɛteŋ mɛi komɛi kɛɔ akɛ gbohiiashitee ko bɛ lɛ?” (1 Korintobii 15:12) Jeee akɛ gbɔmɛi nɛɛ yɛ amɛ diɛŋtsɛ amɛ yiŋkɔshikɔshifeemɔi loo sanebimɔi yɛ gbohiiashitee lɛ he kɛkɛ, shi moŋ amɛmiiwie bɔ ni amɛheee amɛyeee lɛ he faŋŋ. No hewɔ lɛ Paulo kpá tɔ̃mɔ ni yɔɔ amɛsusumɔ lɛ mli lɛ he mama. Ewie akɛ kɛji akɛ ateee Kristo shi lɛ, no lɛ Kristofoi ashɛɛ sane lɛ ji amale, ni mɛi ni ye Kristo shitee lɛ he odase lɛ ji “Nyɔŋmɔ he amale odaseyelɔi.” Kɛji ateee Kristo shi lɛ, no lɛ awoko kpɔmɔ nɔ ko ahako Nyɔŋmɔ; Kristofoi ‘kamɔ amɛhe eshai lɛ amli lolo.’ (1 Korintobii 15:13-19; Romabii 3:23, 24; Hebribii 9:11-14) Ni Kristofoi ni ‘ewɔ yɛ gbele mli’ ákɛ lá odasefoi yɛ shihilɛi komɛi amli lɛ, ahiɛ ekpata kwraa ni amɛbɛ anɔkwa hiɛnɔkamɔ ko. Kwɛ shihilɛ ni yɔɔ mɔbɔ ní kulɛ Kristofoi baahi mli kɛji shihilɛ nɛɛ ji nɔ̃ pɛ ni amɛbaanyɛ amɛkpa gbɛ! Amanehului ni amɛna lɛ fɛɛ baafee yakatswaa.
12. (a) Mɛni tsɛmɔ ni atsɛ Kristo akɛ “klɛŋklɛŋ mɔ yɛ mɛi ni ewɔ lɛ ateŋ” lɛ tsɔɔ? (b) Kristo ha gbohiiashitee lɛ fee nɔ ni baanyɛ aba mli yɛ mɛɛ gbɛ nɔ?
12 Shi, jeee nakai ji sane lɛ. Paulo tee nɔ akɛ: “Atee Kristo shi kɛjɛ gbohii ateŋ.” Kɛfata he lɛ, lɛ ji “klɛŋklɛŋ mɔ yɛ mɛi ni ewɔ lɛ ateŋ.” (1 Korintobii 15:20) Beni Israelbii lɛ bo Yehowa toi ni amɛkɛ amɛnikpamɔ nii lɛ amli klɛŋklɛŋ yibii lɛ ba lɛ, Yehowa jɔɔ amɛ kɛ nikpamɔ nii babaoo. (2 Mose 22:29, 30; 23:19; Abɛi 3:9, 10) Paulo kɛ tsɛmɔ ni etsɛ Kristo akɛ “klɛŋklɛŋ mɔ” lɛ miitsɔɔ akɛ abaatee aŋkroaŋkroi krokomɛi ni abua amɛ hu amɛnaa lɛ ashi kɛjɛ gbele mli kɛya ŋwɛi wala mli. “Bɔ ni gbele tsɔ gbɔmɔ nɔ kɛba lɛ,” taakɛ Paulo kɛɛ lɛ, “nakai nɔŋŋ shitee hu tsɔ gbɔmɔ nɔ kɛba. Ejaakɛ taakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaana wala yɛ.” (1 Korintobii 15:21, 22) Yesu ha gbohiiashitee lɛ fee nɔ ni baanyɛ aba mli kɛtsɔ ewala ni eye emuu akɛ adesa ni ekɛha akɛ kpɔmɔ nɔ lɛ nɔ, ni ekɛgbele gbɛ kɛha adesai koni akpɔ̃ amɛ kɛjɛ esha kɛ gbele nyɔŋyeli mli.—Galatabii 1:4; 1 Petro 1:18, 19.a
13. (a) Mɛɛ be gbohiiashitee kɛyaa ŋwɛi lɛ baa mli? (b) Te ebaa lɛ tɛŋŋ ni mɛi ni afɔ amɛ mu lɛ ateŋ mɛi komɛi ‘wɔɔɔ yɛ gbele mli’?
13 Paulo tee nɔ akɛ: “Shi mɔ fɛɛ mɔ yɛ lɛ diɛŋtsɛ egbɛjianɔ: klɛŋklɛŋ mɔ ji Kristo, no sɛɛ lɛ mɛi ni ji Kristo nii lɛ, yɛ ebaa lɛ mli.” (1 Korintobii 15:23) Atee Kristo shi yɛ afi 33 Ŋ.B. Shi, ehe baahia ní esɛɛnyiɛlɔi ni afɔ amɛ mu—“mɛi ni ji Kristo nii lɛ”—amɛ kɛyashi ba ni Yesu eba akɛ odehe lɛ shishijee be, ní Biblia gbalɛ tsɔɔ akɛ eba mli yɛ afi 1914 mli lɛ sɛɛ nɔŋŋ. (1 Tesalonikabii 4:14-16; Kpojiemɔ 11:18) Shi mɛi ni baahi wala mli yɛ nakai be ni eba lɛ mli lɛ hu? Paulo kɛɛ: “Naa, teemɔŋ sane miŋɔkɛɔ nyɛ nɛɛ: Jeee wɔ fɛɛ wɔbaawɔ lɛ, shi abaatsake wɔ fɛɛ, trukaa, hiŋmɛitswaa mli, beni aaakpã naagbee tɛtrɛmantrɛ lɛ; ejaakɛ abaakpã tɛtrɛmantrɛ, ni aaatee gbohii ashi ni amɛfiteŋ dɔŋŋ, ni wɔ lɛ, abaatsake wɔ.” (1 Korintobii 15:51, 52) Eyɛ faŋŋ akɛ, jeee mɛi ni afɔ amɛ mu lɛ fɛɛ wɔɔ yɛ gbonyobu lɛ mli ni amɛmiimɛ gbohiiashitee lɛ. Atsakeɔ mɛi ni gboiɔ yɛ be ni Kristo eba lɛ mli lɛ yɛ hiŋmɛitswaa mli.—Kpojiemɔ 14:13.
14. “Abaptisiɔ” mɛi ni afɔ amɛ mu lɛ “yɛ gbohii anajiaŋ” yɛ mɛɛ gbɛ nɔ?
14 “Ejaakɛ,” taakɛ Paulo bi lɛ, “mɛi ni haa abaptisiɔ amɛ yɛ gbohii anajiaŋ lɛ, te amɛbaafee tɛŋŋ? Kɛ́ gbohii eteŋ shi kwraa lɛ, mɛɛba mɔ ni amɛhaa abaptisiɔ amɛ yɛ gbohii anajiaŋ lɛ? Mɛɛba wɔ hu wɔnaa amane ŋmɛlɛtswaa fɛɛ ŋmɛlɛtswaa lɛ?” (1 Korintobii 15:29, 30) Paulo etsɔɔɔ akɛ abaptisiɔ aŋkroaŋkroi ni hiɛ kamɔ lɛ yɛ gbohii anajiaŋ, tamɔ bɔ ni Biblia shishitsɔɔmɔi komɛi haa anuɔ shishi lɛ. Ejaakɛ, baptisimɔ kɔɔ Kristofonyo kaselɔ-feemɔ he, ni anyɛŋ afee susumai ni egboi lɛ kaselɔi. (Yohane 4:1) Shi moŋ, Paulo miiwie Kristofoi ni hiɛ kamɔ, ní amɛteŋ mɛi pii “[naa] amane ŋmɛlɛtswaa fɛɛ ŋmɛlɛtswaa,” taakɛ Paulo diɛŋtsɛ na lɛ ahe. ‘Abaptisiɔ’ Kristofoi ni afɔ amɛ mu lɛ ‘awoɔ Kristo gbele lɛ mli.’ (Romabii 6:3) Kɛjɛ be mli ni afɔ amɛ mu lɛ kɛbaa nɛɛ, kɛ́ wɔɔkɛɛ lɛ, ‘aabaptisi’ amɛ kɛmiiya gbɛ ko ni kɛ amɛ baaya gbele ni tamɔ Kristo nɔ̃ lɛ mli lɛ nɔ. (Marko 10:35-40) Amɛbaagboi kɛ hiɛnɔkamɔ akɛ amɛbaaná ŋwɛi shitee ni yɔɔ nyam.—1 Korintobii 6:14; Filipibii 3:10, 11.
15. Mɛɛ amanehului ekolɛ Paulo kɛkpe, ni gbohiiashitee lɛ mli hemɔkɛyeli ná gbɛfaŋnɔ yɛ etsui shi ni eŋmɛ yɛ mli lɛ mli yɛ mɛɛ gbɛ nɔ?
15 Agbɛnɛ Paulo tsɔɔ mli akɛ lɛ diɛŋtsɛ ena amanehulu babaoo aahu akɛ ebaanyɛ ewie akɛ: “Migboɔ daa nɛɛ.” Bɔni afee ni ekaba akɛ mɛi komɛi aaafolɔ enaa akɛ eewo saji ahe lɛ, Paulo kɛfata he akɛ: “Mina nyɛhe shwãa ni miyɔɔ yɛ wɔ-Nuntsɔ Kristo Yesu mli lɛ.” The Jerusalem Bible lɛ tsɔɔ kuku nɛɛ shishi akɛ: “Mikɛ gbele kpeɔ daa gbi, anyɛmimɛi, ni manyɛ makã kita yɛ shwã ni mikɛ nyɛ shwãa yɛ Kristo Yesu wɔ-Nuntsɔ lɛ mli lɛ mli.” Ákɛ osharai ni ekɛkpe lɛ he nɔkwɛmɔnɔ lɛ, Paulo wie ‘kooloi awuiyelɔi ni ekɛwu yɛ Efeso’ lɛ ahe yɛ kuku 32 lɛ. Bei pii lɛ, Romabii lɛ fɔ̃ɔ efɔŋfeelɔi amɛhãa kooloi awuiyelɔi yɛ maŋ shwɛmɔhei lɛ ni amɛgbeɔ amɛ. Kɛji Paulo kɛ kooloi awuiyelɔi diɛŋtsɛ wu ni enyɛ ekpee naa lɛ, no lɛ Yehowa yelikɛbuamɔ pɛ nɔ etsɔ eje mli. Eji ebɛ gbohiiashitee hiɛnɔkamɔ lɛ kulɛ, eeefee buulu ekãafeemɔ diɛŋtsɛ yɛ egbɛfaŋ akɛ eeehala shihilɛ gbɛ ni kɛ lɛ baawo oshara ni tamɔ nɛkɛ mli. Eji ebɛ wɔsɛɛ shihilɛ he hiɛnɔkamɔ ko kulɛ, shishinumɔ ko baŋ etsui shi ni eŋmɛ yɛ jaramɔ shihilɛi amli kɛ afɔleshai ni fata Nyɔŋmɔ sɔɔmɔ he lɛ ahe. “Kɛ́ gbohii eteee shi lɛ,” taakɛ Paulo kɛɛ lɛ, “ ‘nyɛhaa wɔyea nii ni wɔnua dãai, ejaakɛ wɔ́ lɛ, wɔbaagboi!’ ”—1 Korintobii 15:31, 32; kwɛmɔ 2 Korintobii 1:8, 9; 11:23-27.
16. (a) Nɛgbɛ ekolɛ wiemɔ ni awieɔ akɛ “nyɛhaa wɔyea nii ni wɔnua dãai, ejaakɛ wɔ́ lɛ, wɔbaagboi” lɛ je shishi yɛ? (b) Mɛɛ osharai yɔɔ nɛkɛ susumɔ nɛɛ nɔkpɛlɛmɔ mli?
16 Ekolɛ Paulo tsɛ wiemɔi asɛɛ kɛjɛ Yesaia 22:13, ní wieɔ Yerusalem maŋ lɛ mli bii toigbolɔi lɛ asubaŋ ni kɛ gbele baa lɛ he lɛ. Aloo benɛ ekolɛ nɔ ni yɔɔ ejwɛŋmɔ mli ji Epikuromɛi, ni amɛgbeɔ gbele sɛɛ shihilɛ he hiɛnɔkamɔ ni ayɔɔ lɛ he guɔ kwraa, ní amɛheɔ amɛyeɔ akɛ heloonaa miishɛɛnamɔ ji nɔ kpakpa fe fɛɛ yɛ shihilɛ mli lɛ ahemɔkɛyeli lɛ. Bɔ fɛɛ bɔ ni eji lɛ, nakai ‘aye nii ni anu dãa’ jwɛŋmɔ lɛ etsɔɔɔ Nyɔŋmɔ gbeyeishemɔ. No hewɔ lɛ, Paulo bɔ kɔkɔ akɛ: “Nyɛkahaa ashishiua nyɛ. Naanyobɔɔ fɔŋ fiteɔ jeŋba kpakpa.” (1 Korintobii 15:33) Mɛi ni ekpɛlɛɛɛ gbohiiashitee lɛ nɔ ni akɛ amɛ bɔɔ lɛ baanyɛ afee tamɔ ebɔɔ. Ekolɛ naanyobɔɔ ni tamɔ nɛkɛ ná gbɛfaŋnɔ yɛ naagbai ni ehe bahia ni Paulo atsu he nii yɛ Korinto asafo lɛ mli lɛ mli, tamɔ bɔlɛnamɔ mli jeŋba shara, mligbalamɔi, mɛi asãmamɔ yɛ saneyelihei, kɛ bulɛ ni abɛ kɛha Nuntsɔ lɛ Gbɛkɛnaashi Niyenii lɛ.—1 Korintobii 1:11; 5:1; 6:1; 11:20-22.
17. (a) Mɛɛ ŋaawoo Paulo kɛha Korintobii lɛ? (b) Mɛɛ sanebimɔi eshwɛ ni abaaha hetoo?
17 Enɛ hewɔ lɛ Paulo kɛ ŋaawoo ni nɔmimaa yɔɔ mli nɛɛ ha Korintobii lɛ akɛ: “Nyɛhaa nyɛhiɛ atsɛrɛa nyɛ jogbaŋŋ, ni nyɛkafea esha; ejaakɛ nyɛteŋ mɛi komɛi leee nɔ ko nɔ ko yɛ Nyɔŋmɔ hewɔ. Miikɛɛ enɛ mikɛwo nyɛ hiɛgbele.” (1 Korintobii 15:34) Gbohiiashitee lɛ he jwɛŋmɔ fɔŋ ni aná lɛ kɛ mɛi komɛi wo mumɔŋ viifeemɔ mli, tamɔ mɛi ni etɔrɔ dãa. Ehe bahia ni amɛhiɛ atsɛ̃, ni amɛhiɛ atsɛrɛ amɛ. Ehe miihia ni Kristofoi ni afɔ amɛ mu ni yɔɔ ŋmɛnɛ lɛ hu ahiɛ atsɛ̃ yɛ mumɔŋ nakai nɔŋŋ, koni je lɛŋ ŋwanejee susumɔi lɛ akaná amɛnɔ hewalɛ. Esa akɛ amɛmɔ amɛhiɛnɔkamɔ ni ji gbohiiashitee kɛmiiya ŋwɛi lɛ mli kpɛŋŋ. Shi sanebimɔi komɛi yɛ lolo—kɛha Korintobii ni hi shi yɛ nakai beaŋ lɛ, kɛ agbɛnɛ kɛha wɔ hu ŋmɛnɛ. Ákɛ nɔkwɛmɔnɔ lɛ, ateeɔ mɛi 144,000 lɛ ashi kɛyaa ŋwɛi yɛ mɛɛ su mli? Ni mɛi krokomɛi akpekpei abɔ ni yɔɔ gbonyobu lɛ mli lolo, ni amɛbɛ ŋwɛi hiɛnɔkamɔ lɛ hu? Mɛni gbohiiashitee lɛ baatsɔɔ kɛha nɛkɛ gbɔmɛi nɛɛ? Wɔbaasusu Paulo sanegbaa ni kɔɔ gbohiiashitee lɛ he lɛ fã ni eshwɛ lɛ he yɛ wɔ nikasemɔ ni nyiɛ sɛɛ lɛ mli.
[Shishigbɛ niŋmai]
a Kwɛmɔ February 15, 1991, Buu-Mɔɔ lɛ mli kɛha kpɔmɔ nɔ lɛ hesusumɔ.
Ani Okaiɔ?
◻ Te Yesu tsɔɔ gbohiiashitee lɛ mli jogbaŋŋ eha tɛŋŋ?
◻ Namɛi ji Kristo shitee lɛ he odasefoi lɛ ateŋ mɛi komɛi?
◻ Mɛni hewɔ ate shi awo gbohiiashitee tsɔɔmɔ lɛ, ni te Paulo ha hetoo eha tɛŋŋ?
◻ Mɛni hewɔ gbohiiashitee lɛ mli hemɔkɛyeli he hiaa kɛha Kristofoi ni afɔ amɛ mu lɛ?
[Mfoniri ni yɔɔ baafa 15]
Yairo biyoo lɛ batsɔ gbohiiashitee lɛ he odaseyeli
[Mfoniri ni yɔɔ baafa 16-17]
Eji gbohiiashitee hiɛnɔkamɔ ko bɛ kulɛ, Kristofoi anɔkwafoi lɛ agbele akɛ lá odasefoi lɛ baafee yakatswaa