Biblia Mli Wolo ni Ji 59—Yakobo

Mɔ ni Ŋma: Yakobo

Heni Aŋma Yɛ: Yerusalem

Be ni Enɛ Tee Nɔ: Dani afi 62 Ŋ.B.

“EYIŊ miikã lɛ.” Nakai ji bɔ ni Yesu wekumɛi lɛ susu yɛ ehe. Beni eyɔɔ shikpɔŋ nɔ ní etsuɔ shiɛmɔ nitsumɔ lɛ, “enyɛmimɛi lɛ tete heee enɔ yeee,” ni kɛfata he lɛ, abuuu Yakobo, Yosef, Simon kɛ Yuda afataaa mra be mli kaselɔi ní Yesu ná lɛ ahe. (Mar. 3:21; Yoh. 7:5; Mat. 13:55) Kɛ́ nɛkɛ ji sane lɛ, belɛ mɛni nɔ adamɔɔ akɛɔ akɛ Yesu nyɛ bi ni ji Yakobo lɛ ni ŋma Biblia mli wolo ní egbɛi kã nɔ lɛ mɔ?

² Sane ni aŋma lɛ tsɔɔ akɛ beni Yesu te shi kɛjɛ gbohii ateŋ lɛ ejie ehe shi etsɔɔ Yakobo, ni ŋwanejee ko bɛ he akɛ no kɔne eyiŋ akɛ Yesu ji Mesia lɛ. (1 Kor. 15:7) Bɔfoi lɛ Asaji 1:12-14 lɛ kɛɔ akɛ dani Pentekoste gbi lɛ aaashɛ lɛ, no mli lɛ Maria kɛ Yesu nyɛmimɛi lɛ kpeɔ yɛ ŋwɛitsu asa ko nɔ yɛ Yerusalem ni amɛkɛ bɔfoi lɛ sɔleɔ. Shi, ani jeee bɔfoi lɛ ateŋ mɔ kome ni atsɛɔ lɛ Yakobo lɛ ni ŋma wolo lɛ? Dabida, ejaakɛ mɔ ni ŋma wolo lɛ wie lɛ diɛŋtsɛ ehe kɛjɛ ewolo lɛ shishijee mli tɔɔ akɛ ‘Nuŋtsɔ Yesu Kristo tsulɔ’ shi jeee bɔfoi lɛ ateŋ mɔ kome. Kɛfata he lɛ, Yuda hiɛkpamɔ wiemɔi lɛ je Yakobo nɔ̃ lɛ ni tsĩ “Yuda, ni ji Yesu Kristo tsulɔ kɛ Yakobo nyɛmi lɛ” tã lɛ. (Yak. 1:1; Yuda 1) Enɛ hewɔ lɛ, wɔbaanyɛ wɔmu sane naa yɛ gbɛ ni ja nɔ akɛ, Yakobo kɛ Yuda ni ji Yesu nyɛ bii lɛ ni ŋma Biblia mli wolo ni amɛgbɛi kã nɔ lɛ.

³ Yakobo ji mɔ ko ni sa waa akɛ eeeŋma wolo kɛha Kristofoi asafo lɛ kɛwo amɛ ŋaa. Eji nɔkwɛlɔ ko ni abuɔ lɛ waa yɛ Yerusalem asafo lɛ mli. Paulo wie “Yakobo, Nuŋtsɔ lɛ nyɛmi lɛ” he akɛ ekɛ Kefa kɛ Yohane ji “akulashiŋi” ni yɔɔ asafo lɛ mli lɛ. (Gal. 1:19; 2:9) Petro wolo ni eŋma emaje “Yakobo kɛ nyɛmimɛi” lɛ beni ajie lɛ kɛjɛ tsuŋwoo lɛ mli sɛɛ lɛ haa anaa akɛ no mli lɛ Yakobo ji mɔ ko ni ale lɛ jogbaŋŋ. Ani jeee Yakobo ji mɔ ni wie akɛ naawielɔ kɛha “bɔfoi lɛ kɛ onukpai lɛ” beni Paulo kɛ Barnaba fã gbɛ kɛba Yerusalem kɛbabi bɔ ni abaatsu ketiafoo sane lɛ he nii aha lɛ? Heniianaa lɛ, yɛ nakai yiŋ ní akpɛ lɛ kɛ wolo ni Yakobo ŋma lɛ fɛɛ mli lɛ akɛ wiemɔ kometoo tsu nii yɛ wolo lɛ mli, ni no ji ‘Miibi Nyɛ’—nifeemɔ kroko ni tsɔɔ akɛ mɔ kometoo ni ŋma wolo lɛ.—Bɔf. 12:17; 15:13, 22, 23; Yak. 1:1.

⁴ Yinɔsaneŋmalɔ Josephus kɛɔ wɔ akɛ Osɔfonukpa Ananus (Anania) ni ji Sadukifonyo lɛ ni kwɛ ni atswia Yakobo tɛi ni egbo. Enɛ tee nɔ yɛ aaafee afi 62 Ŋ.B. dani Albinus baŋɔ Roma nɔyelɔ Festo gbɛhe yɛ egbele lɛ sɛɛ lɛ.a Shi, mɛɛ be Yakobo ŋma ewolo lɛ? Yakobo ŋma ewolo lɛ beni eyɔɔ Yerusalem lɛ, ni eŋma kɛyaha “akutsei nyɔŋma kɛ enyɔ ni egbɛ eshwã” lɛ diɛŋtsɛ. (Yak. 1:1) Ebaahe be dani Kristojamɔ lɛ baagbɛ eshwã he fɛɛ he yɛ mumɔ krɔŋkrɔŋ ni afɔse yɛ afi 33 Ŋ.B. lɛ sɛɛ, ni nakai nɔŋŋ hu ebaahe be dani nibii ni atsĩ tã ni yɔɔ oshara ní ba mli taakɛ awie he yɛ wolo ni aŋma lɛ mli lɛ baahé shi. Kɛfata he lɛ, wolo ni aŋma lɛ tsɔɔ akɛ, Kristofoi lɛ jeee kui bibii dɔŋŋ shi moŋ ato amɛhe gbɛjianɔ akɛ asafoi ni yɔɔ “onukpai” ni edara ni baanyɛ asɔle ní amɛye amɛbua mɛi ni efee kpɔkee lɛ. Nɔ ni fata enɛ he hu ji akɛ, be saŋŋ ni shwie mli lɛ ha anu he akɛ amɛbafee mɛi ni jeee amɛhe sane ko ji nɔ ko, ni amɛfeɔ amɛnii kɛkɛ yɛ asafo lɛ mli. (2:1-4; 4:1-3; 5:14; 1:26, 27) Eeenyɛ efee akɛ Yakobo ŋma ewolo lɛ yɛ sɛɛ mli, ekolɛ dani afi 62 Ŋ.B. lɛ shɛ, kɛji akɛ Josephus amaniɛ ní ebɔ ni kɔɔ nibii ní ba yɛ Festo gbele lɛ he lɛ kɛ amaniɛbɔi ni tsɔɔ akɛ Festo gbo yɛ aaafee afi 62 Ŋ.B. lɛ ja pɛpɛɛpɛ.

⁵ Anaa yɛ Vatican No. 1209, Sinaitic lɛ kɛ Alexandrine woji ní akɛ niji ŋmala lɛ amli akɛ Yakobo wolo lɛ ja. Kɛ hooo kwraa lɛ efata blema woji nyɔŋma ni ale dani ato Council of Carthage yɛ afi 397 Ŋ.B. lɛ shishi lɛ ahe. Biblia he woji aŋmalalɔi ni hi shi yɛ blema lɛ fɔɔ yisɛɛ tsɛmɔ. Anaa bɔ ni Yakobo woji ní eŋmala lɛ kɛ Ŋmalɛi krokomɛi ni ajɛ mumɔŋ aŋma lɛ kpãa gbee haa lɛ faŋŋ.

⁶ Mɛni hewɔ Yakobo ŋma wolo nɛɛ? Wolo lɛ mli saji lɛ ní aaapɛi mli jogbaŋŋ haa anaa akɛ nibii ni yaa nɔ yɛ maŋ lɛ mli lɛ miitsɔ naagba diɛŋtsɛ yɛ nyɛmimɛi lɛ ateŋ. Hɛɛ, aaba Kristofoi ajeŋba he mlai ashi aloo akɛtsuuu nii po, ni no eha mɛi komɛi etsɔmɔ amɛhe mumɔŋ gbalafitelɔi yɛ je lɛ ni amɛkɛbɔɔ naanyo lɛ hewɔ. Akɛni mɛi komɛi miitao ni amɛkɛ mligbalamɔ aba hewɔ lɛ, amɛwie akɛ Yakobo wolo lɛ ní eŋma ní ekɛwo mɛi ahewalɛ ní amɛkɛ nitsumɔi afata amɛhemɔkɛyeli lɛ he lɛ yeɔ nɔ ni Paulo ŋma ni tsɔɔ akɛ yiwalaheremɔ yɛ kɛha mɛi ni yɔɔ hemɔkɛyeli shi jeee nitsumɔi anɔ lɛ najiaŋ. Shi kɛlɛ, nɔ ni aŋma lɛ tsɔɔ moŋ akɛ Yakobo miiwie hemɔkɛyeli ni nitsumɔi fata he lɛ ahe, shi jeee nɔ ni akɛ naabu pɛ jajeɔ lɛ ahe, yɛ be mli ní Paulo miitsɔɔ Mla lɛ kɛ nitsumɔ. Yɛ anɔkwale mli lɛ, Yakobo tsa Paulo wiemɔi lɛ anɔ, ni etee nɔ etsɔɔ nifeemɔi ni tsɔɔ akɛ ayɛ hemɔkɛyeli. Anyɛɔ akɛ Yakobo ŋaawoo lɛ tsuɔ nii jogbaŋŋ, ejaakɛ ewieɔ daa gbi naagbai ni Kristofoi kɛkpeɔ lɛ ahe.

⁷ Nɔkwɛmɔnii ni jɛ daa gbi shihilɛ mli, ni ekomɛi ji kooloi, lɛji, wolɛi, kɛ ŋa nɔ lɛ ní Yakobo kɛtsu nii lɛ fi ewiemɔi ni kɔɔ hemɔkɛyeli, tsuishitoo, kɛ tsuishiŋmɛɛ he lɛ sɛɛ jogbaŋŋ. Yesu nitsɔɔmɔ gbɛ ni yeɔ omanye nɛɛ ni ekɛtsu nii lɛ ha eŋaawoo lɛ bafee nɔ ni náa mɔ nɔ hewalɛ waa. Wolo nɛɛ haa mɔ hiɛ sɔɔ bɔ ni Yakobo yɔse nɔ ni haa mɛi feɔ amɛnii yɛ gbɛ̀i komɛi anɔ lɛ.

NƆ HEWƆ NI EHE YƆƆ SƐƐNAMƆ

¹⁵ Eyɛ mli akɛ Yakobo tsĩ Yesu gbɛi tã shii enyɔ pɛ moŋ (1:1; 2:1), shi etsɔɔ bɔ ni aaafee akɛ Nuŋtsɔ lɛ tsɔɔmɔi lɛ atsu nii lɛ mli babaoo, ni enɛ feɔ faŋŋ kɛ́ akɛ Yakobo wolo lɛ to Gɔŋ nɔ Shiɛmɔ lɛ he lɛ. Nakai beaŋ nɔŋŋ lɛ, Yehowa gbɛi lɛ je kpo yɛ mli shii 13 (New World Translation), ni ema Yehowa shiwoi lɛ anɔ mi akɛ no ji nɔ ni akɛbaajwere Kristofoi ni yeɔ anɔkwa kɛyawulaa shi lɛ. (4:10; 5:11) Yakobo jie nɔkwɛmɔnii kɛjɛ Hebri Ŋmalɛi lɛ amli shii abɔ, ni etsɛ wiemɔi ayisɛɛ hu yɛ mli ni ekɛwo ŋaa ni anyɛɔ akɛtsuɔ nii. Etsɔɔ heni etsɛ ewiemɔi lɛ ayisɛɛ kɛjɛ kɛ wiemɔi nɛɛ: “yɛ ŋmalɛ lɛ naa lɛ,” “ŋmalɛ lɛ ni kɛɔ akɛ . . . lɛ ba mli” kɛ “ŋmalɛ lɛ kɛɔ akɛ”; ni etee nɔ ekɛ enɛ to Kristofoi ashihilɛ he. (2:8, 23; 4:5) Yakobo tsĩ Abraham hemɔkɛyeli nitsumɔi lɛ, nitsumɔi ni Rahab kɛtsɔɔ ehemɔkɛyeli lɛ, anɔkwayeli ni Hiob kɛŋmɛ etsui shi lɛ, kɛ bɔ ni Elia kɛ ehe fɔ̃ sɔlemɔ nɔ lɛ tã, ni ekɛha otii ni yɔɔ eŋaawoo lɛ mli lɛ fee faŋŋ, ni ehaa anáa hemɔkɛyeli akɛ Nyɔŋmɔ Wiemɔ lɛ kɛ ehe kpãa gbee.—Yak. 2:21-25; 5:11, 17, 18; 1 Mose 22:9-12; Yosh. 2:1-21; Hiob 1:20-22; 42:10; 1 Maŋ. 17:1; 18:41-45.

¹⁶ Ŋaawoo ní nɔ bɛ ni Yakobo kɛha ji ni afee wiemɔ lɛ nɔyelɔi fe enulɔi moŋ kɛkɛ, ni mɔ atsɔɔ ehemɔkɛyeli ni eyɔɔ lɛ kɛtsɔ nitsumɔi anɔ, ni aná miishɛɛ yɛ kaai srɔtoi anaa ní aaadamɔ lɛ mli, ni mɔ aya nɔ ebi ni Nyɔŋmɔ aha ená nilee, ni atsi abɛŋkɛ lɛ kɛtsɔ sɔlemɔ nɔ, kɛ agbɛnɛ hu ni akɛ kita ni ji mla lɛ mli oti ni kɛɔ akɛ “Suɔmɔ onaanyo taakɛ bɔ ni osumɔɔ bo diɛŋtsɛ ohe lɛ” atsu nii. (Yak. 1:22; 2:24; 1:2, 5; 4:8; 5:13-18; 2:8) Ebɔ kɔkɔ waa eshi tsɔɔmɔi gbohii, lilɛi ni akɛwieɔ nibii fɔji, nii amli ni ajieɔ yɛ asafo lɛ mli, bɔlɛnamɔŋ henumɔi ahe nyamɔ, kɛ he ni akɛfɔɔ ninámɔ ni bɛ shweshweeshwe lɛ nɔ. (3:1, 8; 2:4; 4:3; 5:1, 5) Yakobo tsɔɔ mli faŋŋ akɛ je lɛ kɛ naanyobɔɔ ji gbalafitemɔ yɛ mumɔŋ shishinumɔ naa, ni ehaa mɔ tsɔɔ Nyɔŋmɔ henyɛlɔ, ni egbála nifeemɔ ni haa jamɔ feɔ nɔ ni he tse yɛ Nyɔŋmɔ hiɛ lɛ mli akɛ: “mɔ asara awusãi kɛ okulafoi yɛ amɛmanehulu lɛ mli, ni eto ehe kɛjɛ je nɛŋ koni ekawo ehe muji.” (4:4; 1:27) Ŋaawoi nɛɛ ni anyɛɔ akɛtsuɔ nii, ni eshishinumɔ waaa lɛ fɛɛ jɛ mra be mli Kristofoi asafo lɛ mli ‘akulashiŋ’ nɛɛ ŋɔɔ. (Gal. 2:9) Eŋaa ni ejɛ mlihilɛ mli ekɛha nɛɛ kã he eji la kɛha Kristofoi yɛ jaramɔ bei nɛɛ amli, ejaakɛ eji “nilee ni jɛ ŋwɛi” ni woɔ “jalɛ yibii.”—3:17, 18.

¹⁷ Yakobo yɛ he miishɛɛ akɛ eeeye ebua enyɛmimɛi lɛ koni amɛshɛ oti ni amɛkɛma amɛhiɛ, ni ji shihilɛ yɛ Nyɔŋmɔ Maŋtsɛyeli lɛ mli lɛ he. No hewɔ lɛ, ewo amɛ hewalɛ akɛ: “Belɛ nyɛ hu nyɛŋmɛa nyɛtsui shi; nyɛwoa nyɛtsuii ekãa, ejaakɛ Nuŋtsɔ lɛ baa be lɛ eshɛ etã.” Kɛ́ amɛtee nɔ amɛŋmɛ amɛtsui shi yɛ kaai amli lɛ, amɛbaaná miishɛɛ, ejaakɛ amɛnɔ ni Nyɔŋmɔ aaakpɛlɛ lɛ tsɔɔ akɛ amɛbaaná “wala akekere, ni Nuŋtsɔ lɛ ewo shi eha mɛi ni sumɔɔ lɛ lɛ.” (5:8; 1:12) No hewɔ lɛ, ema nɔ mi akɛ Nyɔŋmɔ shiwoo ni ji wala akekre—kɛ́ eji wala ni gbele bɛ mli yɛ ŋwɛi loo naanɔ wala yɛ shikpɔŋ lɛ nɔ—lɛ ji yiŋtoo ni mli wa hewɔ ni aŋmɛɔ tsui shi yɛ nitsumɔi kpakpai amli. Ekã shi faŋŋ akɛ wolo ni hi jogbaŋŋ nɛɛ baawo mɛi fɛɛ hewalɛ koni amɛshɛ oti ni ji naanɔ wala yɛ ŋwɛi loo yɛ Yehowa jeŋ hee ni Maŋtsɛyeli Seshi, ni ji wɔ-Nuŋtsɔ Yesu Kristo yeɔ nɔ lɛ he.—2:5.

[Shishigbɛ niŋmaa]