Yesu Shitee lɛ​—Ani Eba Mli Lɛɛlɛŋ?

HERODOTUS, ni eji Hela yinɔsaneŋmalɔ ni hi shi afii 2,500 ni eho lɛ, gba sane ko ni kɔɔ Mizraimbii ni hi shi yɛ ebeaŋ lɛ ahe. Eŋma akɛ: “Yɛ shikatsɛmɛi okpɔlɔŋmɛi ashishi lɛ, beni aye nii agbe naa lɛ, nuu ko hiɛɔ tso ni agbɔ lɛ tamɔ gbɔmɔ ni egbo pɛpɛɛpɛ. Ekɛlɛ aaafee mita kome loo nɔ ni shɛɛɛ nakai, ni apɛnte he akɛwo gbonyo adeka mli, ni ekɛkpaa nifeemɔ lɛ shishi. Ekɛ enɛ tsɔɔ mɔ fɛɛ mɔ ni eba okpɔlɔŋmɛɛ lɛ shishi lɛ, ni ekɛɔ akɛ, ‘Nyɛnua dãa ni nyɛnáa miishɛɛ, shi kwɛmɔ nɔ ni mihiɛ nɛɛ; kɛ́ ogbo lɛ nɛkɛ obaafee.’”

Jeee Mizraimbii lɛ pɛ ná nakai susumɔ yɛ wala kɛ gbele he. Ŋmɛnɛ lɛ, wiemɔ “Aye, anu ni aná miishɛɛ” lɛ ebatsɔ mɛi adaŋ kotsa. Kɛ́ wala lɛ fɛɛ nɛ lɛ, mɛni hewɔ oshwɛɛɛ ohiɛ jogbaŋŋ bɔ ni obaanyɛ? Mɛni hewɔ kwraa esa akɛ ogba ohe naa akɛ obaafee nɔ ni ja? Kɛ́ gbele ji wala naagbee kwraa lɛ, no lɛ jwɛŋmɔ yɛ mli diɛŋtsɛ akɛ wɔbaahi shi kɛha amrɔ nɛɛ pɛ. Bɔfo Paulo wie lɛɛlɛŋ. Etsɔɔ susumɔ ni mɛi ni heee gbohiiashitee lɛ amɛyeee lɛ hiɛ lɛ kɛ wiemɔi nɛɛ: “Kɛ́ gbohii eteee shi lɛ: ‘Nyɛhaa wɔyea nii ni wɔnua dãai, ejaakɛ wɔ́ lɛ, wɔbaagboi!’”—1 Korintobii 15:32.

Anɔkwa, Paulo diɛŋtsɛ heee eyeee akɛ hiɛ baakpa gbohii lɛ anɔ kɛya naanɔ. Ená nɔmimaa akɛ gbohii lɛ baaba wala mli ekoŋŋ, kɛ gbɛkpamɔ akɛ amɛgboiŋ kwraa dɔŋŋ. Enɔmimaa lɛ damɔ shihilɛ ko ni ba ni he hiaa waa ni ji anɔkwa sane ko ni nɔ ko kwraa nyɛŋ atsake lɛ lɛ nɔ—Kristo Yesu shiteea lɛ. Anɔkwa, nakai shitee lɛ bafee nifeemɔ wulu kome ko ni waje mra beaŋ kaselɔi lɛ ahemɔkɛyeli.

Shi te Yesu shitee lɛ he hiaa ha tɛŋŋ, ni mɛɛ sɛɛnamɔ yɔɔ he kɛha wɔ? Te wɔfeɔ tɛŋŋ wɔleɔ po akɛ eba mli lɛɛlɛŋ lɛ? Ha wɔkwɛ bɔ ni Paulo kɛ niiahesusumɔ tsɔɔ sane nɛɛ mli eha beni eŋma wolo eyaha Kristofoi ni hi Korinto lɛ.

Kristofoi komɛi ni hi blema Korinto lɛ ayiŋ futu amɛ fioo yɛ sane nɛɛ he, ni mɛi komɛi hu heee amɛyeee kwraa akɛ abaatee gbohii ashi diɛŋtsɛ. Beni bɔfo lɛ ŋmaa eklɛŋklɛŋ wolo lɛ ehaa Kristofoi ni yɔɔ jɛmɛ lɛ, etsĩ nibii komɛi ni eji gbohiiashitee bɛ kulɛ ebaaba lɛ atã. Eŋma akɛ: “Shi kɛ́ gbohiiashitee ko bɛ lɛ, belɛ Kristo hu ateee lɛ shi. Shi kɛ́ ateee Kristo shi lɛ, belɛ wɔshiɛmɔ lɛ efee yaka, ni nyɛhemɔkɛyeli lɛ hu efee yaka; ni asaŋ akpa wɔ shi akɛ Nyɔŋmɔ he amale odaseyelɔi ji wɔ . . . Nyɛhemɔkɛyeli lɛ efee yaka, ni nyɛkamɔ nyɛhe eshai lɛ amli lolo. . . . Mɛi ni ewɔ yɛ Kristo mli lɛ hu elaaje.”—1 Korintobii 15:13-18.

“Ejie ehe kpo etsɔɔ aaafee nyɛmimɛi ohai enumɔ loo nɔ̃ shikome . . . No sɛɛ lɛ ejie ehe kpo etsɔɔ Yakobo, no sɛɛ lɛ bɔfoi lɛ fɛɛ. Shi amɛ fɛɛ amɛ sɛɛ lɛ ejie ehe kpo etsɔɔ mi hu.”—1 Korintobii 15:6-8

Paulo kɛ sane ko ni ewa waa akɛ abaaje he ŋwane kpa ewiemɔ lɛ hiɛ: Kɛ́ ateŋ gbohii ashi lɛ, belɛ ateee Kristo hu ni gbo lɛ shi kɛbaaa wala mli. Eji ateee Kristo shi kulɛ, mɛni baaba? Belɛ sanekpakpa lɛ ni ashiɛɔ lɛ baafee yaka, ebaafee amale diɛŋtsɛ. Ejaakɛ Kristo shitee lɛ ji Kristofoi ahemɔkɛyeli lɛ amli otii lɛ ekome, ni ekɛ Biblia mli shishijee tsɔɔmɔi kwraa ni kɔɔ Nyɔŋmɔ nɔyeli, egbɛ́i, e-Maŋtsɛyeli lɛ, kɛ wɔyiwalaheremɔ he lɛ yɛ tsakpãa. Eji ateee Kristo shi kulɛ, sane ni Paulo kɛ bɔfoi krokomɛi lɛ shiɛ lɛ baafee saji foji komɛi kɛkɛ ni sɛɛnamɔ ko kwraa bɛ he.

Naagbai krokomɛi hu baanyiɛ sɛɛ. Eji ateee Kristo shi kulɛ, Kristofoi lɛ ahemɔkɛyeli lɛ baafee yaka, ebaafee shwɛm, ni ebaafee nɔ ni damɔ amale nɔ. Kɛfata he lɛ, belɛ saji ni Paulo kɛ mɛi krokomɛi lɛ wie yɛ Yesu shitee lɛ he, kɛ mɔ ni tee lɛ shi, ni ji Yehowa Nyɔŋmɔ lɛ he lɛ fɛɛ ji amale. Agbɛnɛ hu, susumɔ ni wɔhiɛ akɛ “Kristo gbo yɛ wɔhe eshai lɛ ahewɔ lɛ” hu baafee amale—ejaakɛ kɛ́ anyɛɛɛ akpɔ̃ Yiwalaherelɔ lɛ diɛŋtsɛ kɛjɛ gbele dɛŋ lɛ, enyɛŋ ekpɔ̃ mɛi krokomɛi. (1 Korintobii 15:3) Belɛ, no baatsɔɔ akɛ Kristofoi komɛi ni egboi, ni yɛ shihilɛi komɛi amli lɛ amɛgboi akɛ la odasefoi, kɛ hiɛnɔkamɔ akɛ abaatee amɛ shi lɛ, ahiɛnɔkamɔ lɛ baafee efolo.

Paulo mu sane lɛ naa akɛ: “Kɛ́ wala nɛɛ mli kɛkɛ wɔhiɛ kã Kristo nɔ yɛ lɛ, wɔnii yɛ mɔbɔ fe gbɔmɛi fɛɛ.” (1 Korintobii 15:19) Taakɛ eji yɛ Kristofoi krokomɛi agbɛfaŋ lɛ, awa Paulo yi, agbo yɛ enɔ, ekɛ shihilɛi ni wawai kpe, ni aka lɛ gbee akɛni eheɔ gbohiiashitee lɛ kɛ ehe saji krokomɛi lɛ eyeɔ lɛ hewɔ. Kɛ́ ateŋ gbohii ashi lɛ, kwɛ bɔ ni edeŋmegbomɔ lɛ baafee yaka aha!

Paulo susuuu kɔkɔɔkɔ akɛ Kristofoi ahemɔkɛyeli lɛ damɔ amale nɔ. Ele akɛ atee Yesu shi kɛjɛ gbohii ateŋ, ni efo sane lɛ, ni ji odaseyelii lɛ kuku eha Korintobii lɛ ekɛɛ: “Akɛ Kristo gbo yɛ wɔhe eshai lɛ ahewɔ yɛ ŋmalɛi lɛ anaa, ni akɛ afũ lɛ, ni akɛ atee lɛ shi ekoŋŋ yɛ gbi ni ji gbi etɛ lɛ nɔ yɛ ŋmalɛi lɛ anaa; ni akɛ ejie ehe kpo etsɔɔ Kefa, no sɛɛ lɛ mɛi nyɔŋma kɛ enyɔ lɛ.”b Paulo kɛfata he akɛ: “No sɛɛ lɛ ejie ehe kpo etsɔɔ aaafee nyɛmimɛi ohai enumɔ loo nɔ̃ shikome, mɛi ni amɛteŋ mɛi pii yɔɔ kɛbashi ŋmɛnɛ, shi mɛi komɛi hu éwɔ [yɛ gbele mli lɛ]. No sɛɛ lɛ ejie ehe kpo etsɔɔ Yakobo, no sɛɛ lɛ bɔfoi lɛ fɛɛ. Shi amɛ fɛɛ amɛ sɛɛ lɛ ejie ehe kpo etsɔɔ mi hu.”—1 Korintobii 15:3-8.

Paulo je ewiemɔ lɛ shishi kɛ sane ni eyɔɔ hekɛnɔfɔ̃ɔ diɛŋtsɛ yɛ nɔ nɛɛ akɛ, Kristo gbo yɛ wɔhe eshai ahewɔ, afũ lɛ, ni atee lɛ shi. Mɛni hewɔ ni ená nɔmimaa waa nakai? Yiŋtoo kome hewɔ ji akɛ mɛi babaoo kɛ amɛhiŋmɛi na lɛ. Beni atee Yesu shi lɛ, ejie ehe kpo etsɔɔ aŋkroaŋkroi komɛi (ni Paulo diɛŋtsɛ fata he), kui bibii, kɛ mɛi 500 po, ni ekã shi faŋŋ akɛ amɛteaŋ mɛi komɛi po beni amɛnu akɛ atee Yesu shi lɛ, amɛyiŋ fee amɛ enyɔɔnyɔ lɛ! (Luka 24:1-11) Mɛi ni na Yesu beni atee lɛ shi lɛ ateŋ mɛi komɛi yɛ beni Paulo wieɔ lɛ, ni kulɛ abaanyɛ abi amɛ ni amɛtsɔɔ kɛji sane lɛ yɛ mli loo ebɛ mli. (1 Korintobii 15:6) Kɛ́ mɔ kome loo mɛi enyɔ ko kɛkɛ ji mɛi ni na Yesu lɛ, ewaaa akɛ abaanyɛ atswa afɔ̃, shi enɛ lɛ mɛi 500 loo nɔ̃ ji mɛi ni na lɛ.

Kadimɔ hu akɛ Paulo tsĩ tã shii enyɔ sɔŋŋ akɛ Yesu gbele lɛ, efũu lɛ, kɛ eshitee lɛ, fɛɛ ba “yɛ ŋmalɛi lɛ anaa.” Nakai nibii lɛ fɛɛ maa nɔ mi akɛ Mesia lɛ he gbalɛi ni yɔɔ Hebri Ŋmalɛi amli lɛ ná amɛmli baa, ni no tsɔɔ akɛ Yesu ji Mesia ni awo he shi lɛ lɛɛlɛŋ.

Yɛ Paulo beaŋ lɛ, saji ni mɛi ni kɛ amɛhiŋmɛi na akɛ atee Yesu shi lɛ wie, kɛ nɔ ni ŋmalɛi lɛ hu kɛɔ lɛ fɛɛ sɛɛ lɛ, mɛi komɛi heee amɛyeee akɛ atee Yesu shi, ni nakai eji ŋmɛnɛ hu. Mɛi komɛi kɛɔ akɛ Yesu kaselɔi lɛ tee amɛyaju egbonyo lɛ, ni amɛkwa amɛkɛɛ atee lɛ shi. Kɛlɛ, no mli lɛ Yesu kaselɔi lɛ bɛ hewalɛ loo nyɛmɔ ko ni amɛkɛaaye Roma asraafoi ni akɛ amɛ to Yesu gbonyobu lɛ naa akɛ amɛbu he lɛ anɔ. Mɛi krokomɛi hu kɛɔ akɛ Yesu shitee lɛ ji ninaa ko loo nɔ ko henɔ ko kɛkɛ ni afo atã. Susumɔ nɛɛ jeee anɔkwale ejaakɛ ejie ehe kpo etsɔɔ mɛi srɔtoi yɛ bei srɔtoi amli. Kɛfata he lɛ, ani jwɛŋmɔ yɛ mli akɛ ninaa loo nɔ ko kɛkɛ baahoo loo koni eŋɔha mɛi ni amɛye taakɛ Yesu ni atee lɛ shi lɛ fee yɛ Galilea lɛ? (Yohane 21:9-14) Ani ninaa ko kɛkɛ baakɛɛ mɛi akɛ amɛbatara ehe?—Luka 24:36-39.

Mɛi krokomɛi hu kɛɔ akɛ Yesu shitee lɛ ji amale ni ekaselɔi lɛ fo amɛtã. Shi mɛɛ sɛɛ po amɛbaaná kɛji amɛfee nakai? Gbohiiashitee lɛ he odase ni kaselɔi lɛ ye lɛ baaha aye amɛhe fɛo, awa amɛ yi, ni agbe amɛ. Mɛni hewɔ amɛkɛ amɛwala baawo oshara mli kɛfĩ amale ko kɛkɛ sɛɛ? Kɛfata he lɛ, amɛwie Yesu shitee lɛ he amɛtsɔɔ klɛŋklɛŋ kwraa yɛ Yerusalem, yɛ amɛshiteekɛwolɔi ni miitao nɔ ko nɔ amɛdamɔ amɛbu amɛ fɔ lɛ ahiɛ.

Gbohiiashitee lɛ nɔŋŋ ji nɔ ni waje kaselɔi lɛ ni amɛná ekãa kɛwie amɛ-Nuŋtsɔ lɛ shitee lɛ he amɛtsɔɔ yɛ yiwalɛ ni fe fɛɛ lɛ po sɛɛ. Gbohiiashitee lɛ he anɔkwa sane nɛɛ bafee Kristofoi ahemɔkɛyeli lɛ fã titri. Mra beaŋ Kristofoi lɛ kɛ amɛwala wooo oshara mli kɛkɛ koni amɛkɛye tsɔɔlɔ ko ni le nii waa ni agbe lɛ lɛ he odase. Amɛkɛ amɛwala wo oshara mli kɛjaje Yesu shitee lɛ amɛtsɔɔ, ejaakɛ eshitee lɛ ma nɔ mi akɛ lɛ ji Kristo, ni ji Nyɔŋmɔ Bi hewalɔ, ni hiɛ kã, ni fĩ amɛsɛɛ, ni bu amɛhe hu lɛ. Eshitee lɛ hu tsɔɔ akɛ kɛ́ amɛhu amɛgboi lɛ, abaatee amɛshi. Lɛɛlɛŋ, eji ateee Kristo shi kulɛ, anaŋ Kristojamɔ. Eji ateee Yesu shi kulɛ, wɔnuŋ ehe nɔ ko kwraa.

Shi, te Kristo shitee lɛ he hiaa ha tɛŋŋ, ni mɛɛ sɛɛnamɔ yɔɔ he kɛha wɔ ŋmɛnɛ?