NIKASEMƆ 30
Mɛi Ni Osumɔɔ Amɛsane Ni Egboi Lɛ Baanyɛ Aba Wala Mli Ekoŋŋ!
Gbele yɛ dɔlɛ waa, ni ehãa mɛi yeɔ awerɛho. No hewɔ ni Biblia lɛ tsɛɔ gbele akɛ henyɛlɔ lɛ. (1 Korintobii 15:26) Nikasemɔ 27 lɛ hã ona akɛ, Yehowa baaye nakai henyɛlɔ lɛ nɔ kunim. Shi mɛi ni egboi momo lɛ hu? Mɛni abaafee ahã amɛ? Yehowa ewo shi kroko hu ni nɔ bɛ akɛ, ebaahã mɛi babaoo ni anyɛŋ atsɔɔ amɛyibɔ lɛ aba wala mli ekoŋŋ, ní amɛhi shi kɛya naanɔ. Obaakase shiwoo nɛɛ he nibii pii yɛ nikasemɔ nɛɛ mli. Ani enɛ baanyɛ aba mli lɛɛlɛŋ? Kɛ́ atee amɛ shi lɛ, ani amɛbaahi ŋwɛi aloo shikpɔŋ lɛ nɔ?
1. Mɛni Yehowa sumɔɔ ni efee ehã mɛi ni wɔsumɔɔ amɛsane ni egboi lɛ?
Yehowa miishwe waa ni ehã mɛi ni egboi lɛ aba wala mli ekoŋŋ. Nuu ko hi shi yɛ blema ni atsɛɔ lɛ Hiob, ni ehe eye waa akɛ, kɛ́ egbo lɛ Nyɔŋmɔ hiɛ kpaŋ enɔ. Ekɛɛ Nyɔŋmɔ akɛ: “Obaatsɛ, ni mahere bo nɔ [kɛjɛ Gbonyobu lɛ mli].”—Kanemɔ Hiob 14:13-15.
2. Te wɔfeɔ tɛŋŋ wɔleɔ akɛ abaanyɛ atee mɛi ni egboi lɛ shi lɛ?
Be ni Yesu yɔɔ shikpɔŋ lɛ nɔ lɛ, Nyɔŋmɔ hã lɛ hewalɛ ni ekɛtee gbohii ashi. Yesu hã gbekɛ yoo ko ni eye afii 12 kɛ yoo okulafo ko binuu ba wala mli ekoŋŋ. (Marko 5:41, 42; Luka 7:12-15) Sɛɛ mli lɛ, Yesu naanyo ko ni atsɛɔ lɛ Lazaro lɛ hu gbo. Be ni afũ Lazaro sɛɛ gbii ejwɛ sɔŋŋ lɛ, Yesu hã eba wala mli ekoŋŋ. Yesu sɔle ehã Nyɔŋmɔ, kɛkɛ ni ebo ekɛɛ: “Lazaro ee, jee kpo!” Ni “nuu ni no mli lɛ egbo lɛ je kpo”—eba wala mli ekoŋŋ! (Yohane 11:43, 44) Kwɛ bɔ ni Lazaro wekumɛi kɛ enanemɛi lɛ amii baashɛ amɛhe ahã!
3. Ani mɛi ni osumɔɔ amɛsane ni egboi lɛ baaba wala mli ekoŋŋ?
Biblia lɛ ewo shi akɛ: ‘Abaatee mɛi shi.’ (Bɔfoi 24:15) No mli lɛ, mɛi ni Yesu tee amɛ shi be ni eyɔɔ shikpɔŋ lɛ nɔ lɛ bɛ ŋwɛi be ni etee amɛ shi lɛ. (Yohane 3:13) Ehã amɛba wala mli ekoŋŋ yɛ shikpɔŋ nɛɛ nɔ, ni amɛmii shɛ amɛhe. Etsɛŋ, Yesu baatee mɛi akpekpe toi akpei abɔ hu shi, ni amɛbaahi paradeiso mli yɛ shikpɔŋ lɛ nɔ kɛya naanɔ. Ekɛɛ abaatee “mɛi fɛɛ ni yɔɔ gbohii akaimɔ bui lɛ amli lɛ” shi, ni mɛi ni etamɔ nɔ ni adesai ahiɛ ekpa amɛnɔ, shi Nyɔŋmɔ kaiɔ amɛ lɛ fata he.—Yohane 5:28, 29; shishigbɛ niŋmaa.
KASEMƆ PII OFATA HE
Obaana yɛ Biblia lɛ mli akɛ, Yesu baanyɛ atee gbohii ashi, ni ebaafee hu. Obaana akɛ, gbohiiashitee lɛ baanyɛ ashɛje omii ni ehã oná hiɛnɔkamɔ hu.
4. Yesu hã ana akɛ ebaanyɛ etee gbohii lɛ shi
Obaana nɔ ni Yesu fee ehã enaanyo Lazaro lɛ he saji krokomɛi. Nyɛkanea Yohane 11:14, 38-44 lɛ, ni nyɛsusua sanebimɔi nɛɛ ahe:
Te wɔfeɔ tɛŋŋ wɔleɔ akɛ no mli lɛ, Lazaro egbo lɛɛlɛŋ lɛ?—Kwɛmɔ kuku 39 lɛ.
Kɛ́ okwɛ lɛ, eji no mli lɛ Lazaro etee ŋwɛi kulɛ, ani Yesu baahã eba wala mli ekoŋŋ yɛ shikpɔŋ lɛ nɔ?
5. Abaatee mɛi babaoo shi!
Nyɛkanea Lala 37:29 lɛ, ni nyɛsusua sanebimɔ nɛɛ he:
Nɛgbɛ mɛi akpekpe toi akpei abɔ ni abaatee amɛ shi lɛ baahi?
Jeee mɛi ni já Yehowa lɛ pɛ Yesu baatee amɛ shi, ebaatee mɛi krokomɛi babaoo hu shi. Nyɛkanea Bɔfoi 24:15 lɛ, ni nyɛsusua sanebimɔ nɛɛ he:
Namɔ obaasumɔ ni eba wala mli ekoŋŋ?
Susumɔ enɛ he okwɛ: Bɔ ni ewaaa kɛhãaa tsɛ ko akɛ ebaatsĩɛ ebi kɛjɛ wɔ mli lɛ, nakai nɔŋŋ ewaaa kɛhãaa Yesu akɛ ebaatee mɔ ko shi
6. Gbohiiashitee lɛ baanyɛ ashɛje omii ni ehã oná hiɛnɔkamɔ hu
Yairo biyoo lɛ he sane ni yɔɔ Biblia lɛ mli lɛ eshɛje mɛi ni yeɔ awerɛho lɛ ateŋ mɛi pii amii, ni ewo amɛ hewalɛ hu. Nyɛkanea nakai sane ni ba mli lɛɛlɛŋ lɛ yɛ Luka 8:40-42, 49-56 lɛ.
Dani Yesu baatee Yairo biyoo lɛ shi lɛ, ekɛɛ Yairo akɛ: “Kaashe gbeyei, ná hemɔkɛyeli kɛkɛ.” (Kwɛmɔ kuku 50 lɛ.) Mɛɛ gbɛ nɔ gbohiiashitee he hiɛnɔkamɔ lɛ baanyɛ awa bo be ni . . .
mɔ ko ni osumɔɔ esane egbo?
okɛ shihilɛ ko ni baanyɛ ahã ogbo lɛ ekpe?
Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
Mɛɛ gbɛ nɔ gbohiiashitee he hiɛnɔkamɔ lɛ eshɛje Phelicity fɔlɔi lɛ amii, ni ewo amɛ hewalɛ hu?
MƐI KOMƐI KƐƆ AKƐ: “Miheee miyeee akɛ abaatee gbohii ashi kɛba shikpɔŋ nɛɛ nɔ.”
Bo hu te osusuɔ tɛŋŋ?
Mɛɛ ŋmalɛ obaanyɛ okane koni amɛna akɛ, abaatee mɛi babaoo shi kɛba shikpɔŋ nɛɛ nɔ?
EMLI OTI
Biblia lɛ ewo shi akɛ, abaatee mɛi akpekpe toi akpei abɔ shi. Yehowa miisumɔ ni amɛba wala mli ekoŋŋ, ni ehã Yesu hewalɛ koni ekɛtee amɛ shi.
Mɛni Okase?
Te wɔfeɔ tɛŋŋ wɔleɔ akɛ, Yehowa kɛ Yesu miishwe waa ni amɛtee gbohii lɛ shi lɛ?
Nɛgbɛ mɛi akpekpe toi akpei abɔ ni abaatee amɛ shi lɛ baahi—ŋwɛi aloo shikpɔŋ lɛ nɔ? Mɛni hewɔ okɛɔ nakai?
Mɛni hewɔ oheɔ oyeɔ waa akɛ mɛi ni osumɔɔ amɛsane ni egboi lɛ baanyɛ aba wala mli ekoŋŋ lɛ?
EHE SAJI KROKOMƐI
Obaana ŋaawoi kpakpai ni baanyɛ awa bo ni onyɛ odamɔ awerɛhoyeli naa.
“Nibii Ni Baanyɛ Awa Mɛi Ni Agbo Yɛ Amɛnɔ” (Awake! No. 3 2018)
Ani Biblia mli ŋaawoi baanyɛ aye abua mɔ ko ni miiye awerɛho?
Kɛ́ mɔ ko ni gbekɛ ko sumɔɔ esane gbo lɛ, te ebaafee tɛŋŋ edamɔ naa?
Ani abaatee mɛi komɛi ashi kɛya ŋwɛi? Namɛi ateŋ amɛ shi?