“Gbohii Ni Yɔɔ Kristo Mli Lɛ Tsutsu Baate Shi”
1. Mɛni hewɔ ebiɔ ni atee adesai ni egboi lɛ ashi kɛji amɛ aaahi wala mli ekoŋŋ yɛ heko lɛ: ni mɛɛ gbɛ nɔ Nyɔŋmɔ to gbɛjianɔ yɛ kɛha gbohiiashitee ni he hiaa nɛɛ?
1 KƐ́ JEEE gbohiiashitee ni awo shi yɛ he lɛ kulɛ, mɛɛ hiɛnɔkamɔ yɔɔ kɛha adesai? Gbohiiashitee lɛ he hiaa bɔfɛɛbɔ ni fee, ejaakɛ adesa susuma lɛ gboɔ. Nohewɔ lɛ kɛji gbɔmɔtso lɛ gbo lɛ, enyɛŋ ebote wala shihilɛ ni yeɔ emuu fe nɔni kulɛ eyɔɔ mli lɛ mli, yɛ heko ni nɔ kwɔ yɛ je ko ni hiŋmɛi enaaa jɛi lɛ mli. (Ezek. 18:4, 20; Yes. 53:12) Dani adesai ni egboi Iɛ aaanyɛ aba wala mli ekoŋŋ yɛ heko lɛ, ebiɔ gbohiiashitee. Nohewɔ ni Nyɔŋmɔ to gbɛjianɔ beni afee ni nɛkɛ naakpɛɛnii nɛɛ aba yɛ be ni lɛdiɛŋtsɛ eto mli lɛ. Beni eteé e-Bi ni kɛ ehe shã afɔle lɛ shi kɛjɛ gbohii ateŋ yɛ egbele sɛɛ gbi ni ji etɛ lɛ nɔ lɛ, egbele gbɛ eha nɛkɛ Bi ni sa nɛɛ akɛ ekwɔ kɛya heni ejɛ kɛba ni ji ŋwɛi lɛ. Bi lɛ ŋɔ adesai afɔle ni yeɔ emuu ni ebashã lɛ kpɔmɔ jara lɛ fɛɛ kɛtee. Yesu Kristo gbɔŋ dɔŋŋ. Eshã adesai afɔle kome eha yɛ gbɔmɛi ahe eshai ahewɔ kɛmiiya naanɔ. Nohewɔ lɛ kɛji eba nɔni ji enyɔ lɛ, jeee ni eeba ebagbo ekoŋŋ.—Heb. 9:28; Rom. 6:9.
2. Mɛɛ gbɛ nɔ 1 Korintobii Awolo 15:22,23 tsɔɔ yɛ akɛ Nyɔŋmɔ eto ni anaa yɛ gbohiiashitee lɛ gbɛfaŋ?
2 Yehowa Nyɔŋmɔ kɛ gbɛjianɔtoo krɛdɛɛ ko tsuɔ nii yɛ gbohii lɛ ashi ni aaatee Iɛ mli. Bɔfo Paulo, ni lɛdiɛŋtsɛ lɛ ena Yesu ni ateelɛ shi lɛ anunyam ni ekɛlɛ ná sanegbaa lɛ, gbala wɔjwɛŋmɔ kɛba enɛ nɔ. Beni Paulo na anunyam nɛɛ sɛɛ afii 18 lɛ, eŋma Kristofoi asafo ni yɔɔ Korinto yɛ Hela lɛ, ni ebi sane nɛɛ akɛ: “Kɛ́ aashiɛ yɛ Kristo he akɛ ateelɛ shi kɛjɛ gbohii ateŋ lɛ, te tɛɛŋ ni nyɛteŋ mɛikomɛi kɛɔ akɛ gbohiiashitee ko bɛ lɛ?” (1 Kor. 15:12) Sanebimɔ nɛɛ sɛɛ lɛ, Paulo tee nɔ eha hetoo ni jɛ Nyɔŋmɔ mumɔŋ. Ewie kɛtsa nɔ ni ekɛɛ: “Taakɛ bɔni Adam mli ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaana wala yɛ. Shi mɔfɛɛmɔ yɛ Iɛdiɛŋtsɛ egbɛjianɔ: Klɛŋklɛŋmɔ ji Kristo, no sɛɛ lɛ mɛi ni ji Kristo nii lɛ, yɛ ebaa [Hela wiemɔ: parousia] lɛ mli.” (1 Kor. 15: 22, 23) Nyɔŋmɔ pɛ ji mɔni teé Yesu shi.
3. Te fee tɛŋŋ Yesu batsɔ “klɛŋklɛŋmɔ” yɛ gbohiiashitee gbɛfaŋ?
3 Atee Yesu Kristo shi Nisan 16, afi 33 Ŋ.B. mli, gbi nɔ ni Yuda osɔfonukpa lɛ kɛ akoko kpamɔ lɛ klɛŋklɛŋyibii haa lɛ. Enɛ kɛ adesai ni egboi lɛ ashitee mli “klɛŋklɛŋmɔ” ni Yesu ji lɛ kpaa gbee jogbaŋŋ. (1 Kor. 15:20) Enɛ ha Yesu Kristo baje klɛŋklɛŋ gbɛhe. Tamɔ bɔni yɛ Yudafoi akoko kpamɔ mli lɛ, akpaa yibii krokomɛi yɛ klɛŋklɛŋyibii lɛ asɛɛ lɛ, nakai nɔŋŋ sa akɛ anaa yibii krokomɛi hu yɛ gbohii lɛ eshitee mli. Shi akɛni Yesu Kristo ji klɛŋklɛŋmɔ hewɔ lɛ, Paulo tsɛlɛ “gbohii ateŋ kromɔbi lɛ, koni lɛ efee klɛŋklɛŋmɔ yɛ nii fiaa mli.”—Kol. 1:18.
4. Ebi ni adesai ni egboi lɛ ateŋ klɛŋklɛŋbii ni aaatee amɛ shi lɛ amɛ kɛyashi mɛni aaje shishi; ni mɛɛbe enɛ je shishi?
4 Kɛtsɔ Yesu Kristo afɔleshaa gbele lɛ nɔ lɛ, esaa ehé aloo ekpɔ̃ adesai aweku ni gboiɔ ‘yɛ Adam mli’ lɛ fɛɛ. Nohewɔ lɛ amɛ fɛɛ amɛbatsɔmɔ “Kristo nii.” Shi esa akɛ adesai ni egboi lɛ ateŋ klɛŋklɛŋbii ni aaatee amɛ shi lɛ amɛ kɛyashi Yesu Kristo “ba ni eba” aloo parousia lɛ aaaje shishi. Nɛkɛ ba ni eeeba nɛɛ baaje shishi kɛaajɛ ebaa ni ji enyɔ lɛ nɔ. Taakɛ “okadi” ni Yesu gba eto kɛ agbɛnɛ bɔni Biblia mli be-bui komɛi tsɔɔ lɛ, nɛkɛ “eba ni eba” aloo parousia ni akɛ hiŋmɛi enaaa nɛɛ je shishi yɛ afi 1914 Ŋ.B. gbo-be mli.—Mat. 24:3*
5, 6. Mɛɛ gbɛ nɔ 1 Tesalonikabii Awolo 4:13-17 tsɔɔ yɛ akɛ Nyɔŋmɔ baato nii anaa yɛ gbɛhe naa yɛ mɛi ni gboiɔ yɛ “Adam mli” lɛ anaabuamɔ mli?
5 Yehowa Nyɔŋmɔ kɛ gbɛjianɔtoo kɛ ‘gbɛhe’ baatsu nii yɛ mɛi ni gboiɔ ‘yɛ Adam mli’ ni akpaa amɛ akɛ gbohiiashitee lɛ mli yibii krokomɛi, lɛ agbɛfaŋ yɛ amɛshitee mli. Titri kɛha klɛŋklɛŋ afii oha lɛ mli Kristofoi ni yeɔ awerɛhoo yɛ ‘mɛi ni ewɔ yɛ gbele mli kɛtsɔ Kristo nɔ’ lɛ ahe lɛ amiishɛjemɔ hewɔ lɛ, bɔfo Paulo ŋma akɛ:
6 “Wɔmiikɛɛ nyɛ enɛ yɛ . . . [Yehowa] wiemɔ ko naa, akɛ wɔ mɛi [ni wɔ ji Kristofoi ni afɔ wɔ yɛ mumɔ mli] ni wɔhiɛ kãmɔ ni baashwɛ yɛ Nuntsɔ lɛ baabe lɛ mli lɛ, wɔtsɔŋ mɛi [ni ji Kristofoi ni afɔ amɛ yɛ mumɔ mli] ni ewɔ lɛ ahiɛ; ejaakɛ lɛ Nuntsɔ lɛ diɛŋtsɛ kɛ oshebɔɔ [kɛ fãmɔ ni jijeɔ, NIV]* kɛ ŋwɛi bɔfonukpa gbee kɛ Nyɔŋmɔ tɛtrɛmaŋtrɛ aaajɛ ŋwɛi akpeleke shi, ni gbohii ni yɔɔ Kristo mli lɛ tsutsu baate shi, no sɛɛ lɛ wɔ mɛi ni wɔhiɛ kãmɔ ni eshwɛ lɛ, aaasha wɔkɛ amɛ fɛɛ yɛ atatui amli kɛaatee Nuntsɔ lɛ kpeemɔ yɛ kɔɔyɔɔ mli, ni nakai wɔkɛ Nuntsɔ lɛ aaayahi shi daa.”—1 Tes. 4:13-17.
7. Mɛɛ gbohii krɛdɛɛ ahe Paulo Wieɔ lɛ; ni mɛɛ gbɛ nɔ Kpojiemɔ 14:12 kɛ 13 tsɔɔ be krɛdɛɛ ko nɔ̃ mli ni abaatee amɛ shi lɛ yɛ?
7 Biɛnɛɛ jeee adesai fɛɛ ni egboi lɛ ahe bɔfo Paulo wieɔ lɛ, shi moŋ eewie mɛi ni ‘ewɔ yɛ gbele mli yɛ Kristo mli,’ ni ji “gbohii ni yɔɔ Kristo mli” lɛ. Yɛ Biblia lɛ naagbee wolo lɛ mli lɛ, bɔfo Yohane wie nɔko yɛ be mli ni abaatsĩɛ nɛkɛ Kristofoi ni egboi nɛɛ ahiɛ kɛjɛ amɛwɔ mli, lɛ he. Yohane ŋma yɛ Kpojiemɔ 14:12 kɛ 13 akɛ: “Biɛ krɔŋkrɔŋbii lɛ ni yeɔ Nyɔŋmɔ kitai lɛ kɛ Yesu nɔ hemɔkɛyeli lɛ nɔ lɛ atsuishiŋmɛɛ [yɛ jeŋ gbɛjianɔtoo kɛha majimaji ateŋ toiŋjɔlɛ kɛ shweshweeshwe shihilɛ gbɛfaŋ] lɛ yɔɔ. Ni minu gbee jɛ ŋwɛi miikɛɛ mi akɛ: Ŋmaa: Ajɔɔ gbohii lɛ ni gboiɔ yɛ Nuntsɔ lɛ mli lɛ kɛjɛ ŋmɛnɛ nɔ kɛyaa nɛɛ. Hɛɛ, mumɔ lɛ kɛɛ, koni amɛjɔɔ amɛhe kɛjɛ amɛhaomɔi lɛ amli; shi amɛnitsumɔi lɛ nyiɛɔ amɛsɛɛ.” Nohewɔ lɛ mɛɛbe nakai be ni awie he akɛ “kɛjɛ ŋmɛnɛ nɔ kɛyaa nɛɛ” jeɔ shishi?
8. Mɛni hewɔ wiemɔ ni ji “kɛjɛ ŋmɛnɛ nɔ kɛyaa nɛɛ” baatsɔɔ be mli ni Nuntsɔ lɛ eba yɛ mumɔ mli lɛ; ni ani amɛgbele lɛ foɔ amɛnitsumɔi lɛ asɛɛ?
8 Yɛ nɔni bɔfo Paulo ŋma yɛ 1 Tesalonikabii Awolo 4:16 kɛ 17 naa lɛ, esa akɛ enɛ aba yɛ Yesu Kristo “ba ni eba” aloo parousia lɛ mli; jeee yɛ eshishijee, shi moŋ yɛ eshishijee lɛ sɛɛ. Beni eeeba yɛ mumɔŋ ni akɛ hiŋmɛi enaaalɛ lɛ po, Kristofoi komɛi ni afɔ amɛ yɛ mumɔ mli ni amɛyɔɔ shikpɔŋ nɛɛ nɔ lɛ aaagboi yɛ Nuntsɔ lɛ mli.’ “Ajɔɔ” mɛnɛɛmɛi akɛ amɛgboiɔ yɛ ‘ba ni Yesu eha lɛ mli.’ Gbele ni amɛgboiɔ yɛ heloo lɛ mli lɛ haaa “amɛnitsumɔi lɛ esɛɛ afo be ko kwraa. Mɛni hewɔ? Ejaakɛ ‘nibii ni amɛfee lɛ kɛ amɛ yaa,’ aloo, taakɛ Hela ŋmalɛ lɛ tsɔɔ ŋmiiŋmi lɛ, amɛnitsumɔi lɛ “nyiɛɔ amɛsɛɛ.”
9. Mɛni ewɔ mɔ ni “ajɔɔ” “krɔŋkrɔŋbii” ni gboiɔ yɛ nakai be mli lɛ, taakɛ Kpojiemɔ 14:13 tsɔɔ lɛ?
9 Enɛ biɔ nitsumɔ tsakemɔ, kɛmiijɛ nitsumɔ yɛ heloo lɛ mli yɛ shikpɔŋ nɔ kɛmiiya nitsumɔ yɛ mumɔ mli yɛ ŋwɛi. Bɔfo Paulo kɛɛ yɛ ‘mɛi ni gboiɔ yɛ Nuntsɔ lɛ mli’ lɛ ahe akɛ: “Nakai nɔŋŋ ji gbohiiashitee lɛ hu. Aduɔlɛ yɛ fitemɔ mli, ateɔlɛ shi yɛ nɔni fiteee mli; aduɔlɛ yɛ nɔni bɛ nyam mli, ateɔlɛ shi yɛ anunyam mli; aduɔlɛ yɛ gbedemɔ mli, ateɔlɛ shi yɛ hewalɛ mli; aduɔ susuma [ni ji heloo] gbɔmɔtso, ateɔ mumɔ gbɔmɔtso shi. Kɛ̃ susuma gbɔmɔtso yɛ lɛ, mumɔ gbɔmɔtso hu yɛ.” (1 Kor. 15:42-44) Nohewɔ lɛ nɛkɛ mɛi ni atee amɛ shi ni “ajɔɔ” amɛ nɛɛ kɛ nitsumɔ yɛ mumɔ gbɔmɔtsei amli yɛ mumɔi ashihilɛhe lɛ tsaa deŋmei ni amɛgbɔɔ yɛ shikpɔŋ nɛɛ nɔ lɛ nɔ nɔŋŋ. Ehe ehiaaa ni amɛyawɔ yɛ gbele mli ni amɛmɛ Kristo ba ni ebaaba lɛ.
KƐ NƆNI NUNTSƆ LƐ KƐJƐƆ ŊWƐI KPELEKEƆ SHI LƐ
10. Mɛni Nuntsɔ Yesu Kristo kɛaakpeleke shi kɛaajɛ ŋwɛi yɛ be mli ni aaatee ekaselɔi ni afɔ amɛ yɛ be mli aaatee ekaselɔi ni afɔ amɛ yɛ mumɔŋ lɛ ashi lɛ?
10 Bɔfo Paulo tsɔɔ wɔ nɔni baafata Nuntsɔ lɛ mumɔŋ shikpelekemɔ kɛmiijɛ ŋwɛi lɛ he, ni ekɛɛ: “Wɔ mɛi ni wɔhiɛ kãmɔ ni baashwɛ yɛ Nuntsɔ lɛ baabe [parousia] lɛ mli lɛ, wɔtsɔŋ mɛi ni ewɔ lɛ ahiɛ [yɛ mumɔŋ gbohiiashitee namɔ gbɛfaŋ]; ejaakɛ lɛ Nuntsɔ lɛ diɛŋtsɛ kɛ oshebɔɔ kɛ ŋwɛi bɔfonukpa gbee kɛ Nyɔŋmɔ tɛtrɛmantrɛ aaajɛ ŋwɛi akpeleke shi, ni gbohii ni yɔɔ Kristo mli lɛ tsutsu baate shi.”—1 Tes. 4:15, 16.
11. Namɛi nuɔ Nuntsɔ Yesu Kristo “famɔ gbee” lɛ yɛ be mli ni ekpelekeɔ shi kɛjɛɔ ŋwɛi lɛ, ni amɛboɔ toi?
11 Ŋamɛi baanu nɛkɛ “oshebɔɔ” ni Nuntsɔ Yesu Kristo kɛaajɛ eŋwɛi gbɛhe yɛ Nyɔŋmɔ ninejurɔ nɔ kɛkpeleke shi lɛ? Anaa akɛ Kristofoi ni afɔ amɛ yɛ mumɔŋ ni kɛyaashi nakai be lɛ amɛgboi ‘yɛ Nuntsɔ lɛ mli’ lɛ ji mɛi ni baanu no. Wɔle akɛ adesa ko kwraa bɛ shikpɔŋ nɛɛ nɔ ni enu egbee kɛjɛ beyinɔ ni ekpeleke shi yɛ mumɔ mli nɛɛ, kɛjɛ ‘ba ni eba’ aloo parousia ni akɛ hiŋmɛi enaaa ni je shishi yɛ afi 1914 gbo-be mra mli lɛ nɔ kɛbaa nɛɛ. Shi “gbohii ni yɔɔ Kristo mli” lɛ nu egbee ni amɛbolɛ toi.
12. (a) Mɛɛbe nakai “naagbee gbi” ni Yesu wie he yɛ Yohane 6:53 kɛ 54 lɛ jeɔ shishi; ni te feɔ tɛɛŋ nakai kaselɔi lɛ boteɔ “naanɔ wala” mli hu? (b) Esoro enɛ yɛ gbi kroko ni atsɛɔ no hu akɛ “naagbee gbi” lɛ he yɛ mɛɛ gbɛ nɔ?
12 Mɛi ni Yesu Kristo aaatee amɛ shi lɛ fata kaselɔi ni ekɛɛ enɛ yɛ amɛhe Iɛ ahe, akɛ: “Kɛji nyɛyeee Gbɔmɔbi lɛ heloo ni nyɛnuuu elá lɛ, nyɛbɛ wala yɛ nyɛmli. Mɔni yeɔ miheloo ni enuɔ milá lɛ, eyɛ naanɔ wala [ni baaje shishi kɛaajɛ beyinɔ ni aaateelɛ shi kɛaajɛ gbohiiaje lɛ], ni mi lɛ mateelɛ shi yɛ naagbee gbi lɛ nɔ.” (Yoh. 6:53, 54) Yɛ nakai “naagbee gbi” lɛ nɔ lɛ, hewalɛ ni baanyɛ atsĩɛ ekaselɔi ni ena hegbɛ krɛdɛɛ ni kɔɔ eheloo kɛ elá lɛ he lɛ mli gbɛfaŋnɔ lɛ, ahiɛ kɛjɛ gbele wɔ mli lɛ, aaahi ‘oshe ni eeebɔ’ lɛ mli. Yɛ nɛkɛ kaselɔi ni aduro amɛ nɛɛ agbɛfaŋ lɛ, “naagbee gbi” lɛ jeɔ shishi be mli ni amɛboteɔ “naanɔ wala” mli yɛ ŋwɛi kɛtsɔ shi ni aaatee amɛ yɛ “mumɔŋ gbɔmɔtso” mli taakɛ afee Kristo lɛ, nɔ. Akɛni nɛkɛ “naagbee gbi” nɛɛ kɔɔ Kristofoi ni afɔ amɛ yɛ mumɔ mli ni yɔɔ ŋwɛi hiɛnɔkamɔ lɛ ashitee he hewɔ lɛ, esoro no yɛ nakai “naagbee gbi” ni Marta ni jɛ Betania lɛ susuɔ he lɛ he, ejaakɛ nakai beaŋ lɛ eleee mumɔŋ gbohiiashitee kɛmiiya ŋwɛi lɛ he nɔko kwraa.
13. (a) Namɔ gbee ji nɔni “gbohii ni yɔɔ Kristo mli” lɛ nuɔ; ni namɔ ji “bɔfonukpa” lɛ? (b) Mɛɛ odaseyeli ko yɔɔ Ŋmalɛi lɛ amli kɛba enɛ?
13 Nuntsɔ Yesu Kristo ni awo ehiɛ nyam lɛ kɛ “ŋwɛi bɔfonukpa gbee” hu kpelekeɔ shi. Lɛdiɛŋtsɛ egbee nɛ. Lɛ ji “ŋwɛi bɔfonukpa” lɛ. Yɛ abɛ ni ebu yɛ tooi kɛ abotiai ahe lɛ mli lɛ, Yesu wie lɛdiɛŋtsɛ ehe akɛ ŋwɛi bɔfonukpa ko ni ekɛɛ: “Beni Gbɔmɔbi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ.” (Mat. 25:31, 32) Dani ebatsɔ gbɔmɔ, be mli ni eyɔɔ ŋwɛi lɛ, atsɛɔlɛ Mikael. Ŋwanejee ko kwraa bɛ he akɛ lɛ ji mɔni awie ehe yɛ gbalɛ ko ni agba dani Kristofoi abe bashɛ yɛ Daniel 12:1 kɛ 2 lɛ mli lɛ: “Ni nakai he lɛ mli lɛ Mikael ni ji lumɔ kpeteŋkpele ni damɔ shi ha [bo Daniel] omaŋbii lɛ aaate shi adamɔ shi; shi fimɔ be ko aaaba ni anako nɔ dã kɛjɛ beyinɔ ni jeŋmaŋ yɔɔ lɛ kɛbashi nakai be lɛ mli; ni nakai be lɛ mli lɛ aaahere omaŋ lɛ mli mɔfɛɛmɔ ni aaana akɛ aŋma egbɛi yɛ wolo Iɛ mli lɛ. Ni mɛi ni wɔɔ yɛ shikpɔŋ sũ mli lɛ ateŋ mɛi pii hiɛ aaatsɛ̃; mɛikomɛi aaatee naanɔ wala mli, shi mɛikomɛi hu aaatee naanɔ hiɛgbele kɛ naanɔ nyaŋemɔ mli.”
14. Te Kpojiemɔ 12:7 kɛɛ atsɛɔ bɔfonukpa nɛɛ tɛɛŋ; ni mɛni Yuda 9 kɛɛ yɛ mpele ko ni mɔnɛ kɛ mɔko shi mra mli lɛ he?
14 Agbɛnɛ hu Kpojiemɔ 12:7 tsɔɔ akɛ bɔfoi lɛ yɛ Mikael shishi, ejaakɛ akɛɛ yɛ jɛi akɛ: “Ta te shi yɛ ŋwɛi: Mikael kɛ ebɔfoi [shi jeee Kristofoi ni afɔ amɛ yɛ mumɔ mli] lɛ fã darako lɛ nɔ ta.” Agbɛnɛ hu Yuda 9 wie ehe akɛ bɔfonukpa, ni ekɛɛ: “Bɔfonukpa Mikael lɛ, beni ekɛ Abonsam kojoɔ ni ekɛlɛ taa naa yɛ Mose gbonyo lɛ hewɔ lɛ.” Abonsam nine shɛɛɛ gbonyo lɛ nɔ.
15. Te Satan Abonsam damɔ ta ni eke bɔfonukpa Mikael wuu lɛ naa eha tɛɛŋ; ni ani ebaanyɛ etsĩ Kristo kaselɔi lɛ eshitee kɛ amɛkwɔɔ kɛ ŋwɛiyaa koni amɛyafata Yesu Kristo he Iɛ naa?
15 Satan Abonsam nine enyɛ shi yɛ mpeleshii ni kã shi jeeŋmɔ nɛɛ mli fɛɛ. Aye enɔ kunim yɛ ta ni awuu yɛ ŋwɛi lɛ mli, ni ashɛ ekɛ ebɔfoi daimonioi lɛ fɛɛ ashwie wɔshikpɔŋ nɛɛ nɔ gbɛ, tsɛbelɛ Mikael ni ji Nuntsɔ Yesu Kristo, kɛ ebɔfoi lɛ kã he amɛhi ŋwɛi akɛ kunimyelɔi. Akɛni Yesu Kristo, kunimyelɔ lɛ, kɛ “ŋwɛi bɔfonukpa gbee” tsuɔ nii yɛ be mli ni efãa mɛi ni gboi yɛ Kristo mli lɛ akɛ amɛje kpo hewɔ lɛ, ‘efamɔ gbee’ lɛ yɛ hewalɛ babaoo ni emli wa. Agbɛnɛ hu Satan Abonsam ni áye enɔ lɛ naŋ hewalɛ bɔni fa ni ekɛbaatsĩ mɛi ni egboi yɛ Kristo mli lɛ ashitee yɛ mumɔŋ lɛ gbɛ, ni enyɛŋ etsĩ amɛnaa ni amɛkabote mumɔi ashihilɛhe aloo amɛkakwɔ kɛtee ŋwɛi ni amɛkɛ Yesu Kristo, kunimyelɔ lɛ, yahi shi.
16. Mɛɛ yiŋtoo hewɔ akpaa “Nyɔŋmɔ tɛtrɛmantrɛ” lɛ yɛ be mli ni Nuntsɔ lɛ kpelekeɔ shi kɛjɛɔ ŋwɛi kɛbaa lɛ; ni namɛi baahere no nɔ klɛŋklɛŋ?
16 Nɔkroko ni fataa Kristo shikpelekemɔ kɛjɛ ŋwɛi lɛ he ji “Nyɔŋmɔ tɛtrɛmantrɛ.” (1 Tes. 4:16) Tɛtrɛmantrɛ ni atsɔɔ nɛɛ jeee tawuu okadi ko ni akɛbuaa asraafoi anaa koni amɛyawuu ta ni amɛyagbe henyɛlɔ lɛ. “Nyɔŋmɔ tɛtrɛmantrɛ” nɛɛ kpamɔ lɛ ji hejɔlɛ nɔ̃ ni akɛbuaa Yehowa webii lɛ anaa, tamɔ be mli ni yɛ Mose gbii lɛ anɔ lɛ, akpaa jwiɛtɛi tɛtrɛmantrɛi enyɔ ni akɛbaaa Israel akutsei 12 lɛ anaa lɛ. (4 Mose 10:1-10) Yɛ 1 Korintobii Awolo 15:52 lɛ, bɔfo Paulo kɛ nɛkɛ henaabuamɔ “tɛtrɛmantrɛ” ni kanyaa mɔ nɛɛ tsii Kristofoi ni egboi lɛ ashitee nɔ, ni ekɛɛ: “Beni aaakpã naagbee tɛtrɛmantrɛ lɛ; ejaakɛ abaakpã tɛtrɛmantrɛ, ni aaatee gbohii ashi ni amɛfiteŋ dɔŋŋ, ni wɔ lɛ, abaatsake wɔ.” Namɛi baahere “naagbee tɛtrɛmantrɛ” lɛ nɔ klɛŋklɛŋ be mli ni no aaajije akɛ “Nyɔŋmɔ tɛtrɛmantrɛ” ni akɛbua gbohii lɛ anaa kɛba wala mli ekoŋŋ lɛ? Yɛ enɛ hetoohamɔ mli lɛ, 1 Tesalonikabii Awolo 4:16 kɛɔ akɛ: “Gbohii ni yɔɔ Kristo mli lɛ tsutsu baate shi.”
17. Mɛni hewɔ adesai ahiŋmɛii nyɛɛɛ ana “gbohii ni yɔɔ Kristo mli” lɛ ashitee lɛ?
17 Shi yɔɔ shikpɔŋ nɛɛ nɔ lɛ kɛ amɛhiŋmɛii enaŋ “gbohii ni yɔɔ Kristo mli” lɛ ashitee. Mɛni hewɔ? Nɔhewɔ ji akɛ ahaa mɛnɛɛmɛi mumɔŋ shitee, amɛteŋ mɔfɛɛmɔ lɛ ‘ateɔlɛ shi kɛ mumɔŋ gbɔmɔtso.’ (1 Kor. 15:44) Akɛni adesai ahiŋmɛii amli waaa tsɔ bɔni amɛbaanyɛ amɛkɛna mumɔŋ gbɔmɛi hewɔ lɛ, adesai enaŋ “gbohii ni yɔɔ Kristo mli” lɛ ashitee. Nohewɔ ni kɛjɛ beyinɔ ni Kristo “ba ni eba” aloo parousia lɛ je shishi kɛjɛ afi 1914 nɔ kɛbaa nɛɛ, adesai enakolɛ, ni amɛnako ekaselɔi lɛ ashitee hu lɛ.
18, 19. (a) Yɛ nɔni Paulo kɛɛ yɛ 1 Tesalonikabii Awolo 4:17 naa lɛ ani etsɔɔ akɛ nakai Kristofoi lɛ gboiŋ dani “aaasha amɛ kɛya” lɛ? (b) Belɛ yɛ mɛɛ jwɛŋmɔ naa mɔ ‘ashaà amɛ kɛyaa’ lɛ; ni mɛɛ gbɔmɔtsei amli amɛkwɔɔ yɛ kɛyaa ŋwɛi koni amɛkɛ amɛ-Nuntsɔ lɛ ayakpe yɛ miishɛɛ mli lɛ?
18 Bɔfo Paulo wie yɛ lɛdiɛŋtsɛ ehe tamɔ nɔni ebaahi shi aahu kɛyaashi nakai nii ni baaba Kristofoi ni afɔ amɛ yɛ mumɔ mli lɛ anɔ ni yɔɔ miishɛɛ lɛ aaashɛ, ni ekɛɛ: “No Sɛɛ lɛ wɔ mɛi ni wɔhiɛ kãmɔ ni eshwɛ lɛ, aaasha wɔkɛ amɛ fɛɛ yɛ atatui amli kɛaatee Nuntsɔ lɛ kpeemɔ yɛ kɔɔyɔɔ mli, ni nakai wɔkɛ Nuntsɔ lɛ aaayahi shi daa.”—1 Tes. 4:17.
19 Biɛnɛɛ bɔfo Paulo etsɔɔɔ akɛ Kristofoi ni afɔ amɛ yɛ mumɔ mli ni tamɔlɛ lɛ gboiŋ shi moŋ ‘aaasha amɛ’ kɛ amɛ adesai agbɔmɔtsei lɛ kɛya ŋwɛi yɛ atatui diɛŋtsɛ amli. Paulo gbo. Esa akɛ Kristofoi ni afɔ amɛ yɛ mumɔŋ ni yɔɔ wala mli ŋmɛnɛ yɛ Kristo ba ni eba aloo parousia lɛ mli lɛ hu agboi. Tamɔ wui ni aduɔ yɛ sũ mli lɛ, esa akɛ ‘adu susuma gbɔmɔtso’ kɛtsɔ adesai agbele ni aaagbo nɔ. (1 Kor. 15:44) Belɛ mɛɛ gbɛ nɔ mɔ ‘ashaã amɛ kɛyaa yɛ atatui amli’ afataa mɛi ni ji “gbohii ni yɔɔ Kristo mli” ni atee amɛ shi klɛŋklɛŋ, lɛ ahe yɛ? Afeɔ no yɛ nɛkɛ gbɛ nɔ: Kɛji adu amɛ akɛ heloo gbɔmɔtsei lɛ, amɛboteee gbele wɔ ko mli. Nakai ŋmlɛtswaa lɛ nɔ nɔŋŋ lɛ, amɛnaà mumɔŋ shitee, ni amɛshĩɔ amɛ adesai agbɔmɔtsei lɛ amɛshwieɔ shi yɛ shikpɔŋ nɛɛ nɔ ni ateɔ amɛteŋ mɔfɛɛmɔ shi kɛ “mumɔŋ gbɔmɔtso.” Mumɔŋ gbɔmɔtsei amli amɛkwɔɔ yɛ kɛyaa ŋwɛi ni amɛkɛ amɛŋwɛi Nuntsɔ lɛ yakpeɔ lɛ. Yɛ yiŋtoi nɛɛ ahewɔ lɛ, esa akɛ abuɔ amɛ akɛ mɛi ni “ajɔɔ,” taakɛ Kpojiemɔ 14:13 tsɔɔ lɛ.
20. Mɛɛ “atatui” nɛkɛ amii ‘ashaà’ Kristofoi ni yɔɔ wala mli yɛ nakai beaŋ lɛ yɛ kɛyaa lɛ; ni mɛni no tsɔɔ yɛ amɛŋwɛiyaa lɛ he?
20 Shi sha ni aaasha amɛ yɛ “atatui amli” lɛ aaatsɔɔ mɛni? Atatui sɛŋ kɔɔyɔŋ yɛ ŋwɛi ni amɛtsɔɔ nɔko ni awo nɔ. Ni amɛhaaa ni wɔ mɛi ni wɔyɔɔ shikpɔŋ nɔ lɛ ana nibii ni yɔɔ nomɛi amli loo amɛyiteŋ lɛ. Jeee atatui ni wɔnaa nɛɛ diɛŋtsɛ anɔ mumɔŋ gbɔmɛi lɛ aaatsɔ koni amɛha wɔna amɛ. Nohewɔ lɛ atatui ni atsɔɔ yɛ 1 Tesalonikabii Awolo 4:17 lɛ ji okadi atatui, ni belɛ amɛhaaa mɛi ni yɔɔ shikpɔŋ nɔ lɛ ana Kristofoi ni atee amɛ shi ni ashaã amɛ kɛyaa ŋwɛi koni amɛkɛ amɛnuntsɔ ni awo enɔ lɛ ayakpe lɛ. Nyɛhaa wɔkaia bɔni yɛ Yesu Kristo shitee lɛ sɛɛ gbi ni ji 40 lɛ nɔ lɛ, eku esɛɛ kɛtee ŋwɛi, ni yɛ eŋwɛiyaa lɛ mli lɛ, “atatu ko ŋɔlɛ kɛjɛ amɛhiɛ [belɛ aatsɔɔ ekaselɔi ni kwɛɔlɛ lɛ ahiɛ] kɛtee” lɛ.—Bɔf. 1:9.
21. Ani Nuntsɔ lɛ shikpelekemɔ kɛmiijɛ ŋwɛi lɛ tsɔɔ akɛ eeba shikpɔŋ nɛɛ nɔ tɛ̃ɛ ni ekɛ mɛi abana shãramɔ yɛ biɛ; ni mɛɛbe nakai “naagbee gbi” nɔ̃ nɔ ni eteɔ ekaselɔi ni afɔ amɛ yɛ mumɔŋ lɛ ashi yɛ lɛ baaje shishi?
21 Mɛni enɛ fɛɛ tsɔɔ? Etsɔɔ enɛ: Akɛ Nuntsɔ Yesu Kristo ni kpelekeɔ shi lɛ baaa wɔshikpɔŋ nɛɛ nɔ tɛ̃ɛ ni ekɛ wɔ abana shãramɔ. Atatui, nɔ̃ mli ni afee Kristofoi ni atee amɛ shi lɛ ahe mfoniri akɛ amɛkɛ amɛŋwɛi Nuntsɔ lɛ yakpeɔ yɛ lɛ, sɛŋ kɔɔyɔɔ mli yɛ shikpɔŋ nɛɛ yiteŋ shɔŋŋ. Agbɛnɛ hu “kɔɔyɔɔ mli” ji heni Kristofoi ni atee amɛ shi lɛ kɛ amɛnuntsɔ lɛ kpeɔ yɛ, shi jeee shikpɔŋ nɛɛ nɔ, ni jeee Yerusalem, jeee Mu Gɔŋ lɛ nɔ, loo hekroko yɛ wɔshikpɔŋ nɛɛ nɔ. Agbɛnɛ hu nakai “naagbee gbi,” nɔ̃ nɔ ni abaasha mɛnɛɛmɛi kɛya lɛ jeee ŋmlɛtswai 24 gbi ko. Eji be ko ni baa naagbee kɛji ateé nɛkɛ Kristofoi ni afɔ amɛ yɛ mumɔŋ ni naa “klɛŋklɛŋ shitee” lɛ mli gbɛfaŋnɔ lɛ, ateŋ naagbeemɔ shi kɛtee ŋwɛi shihilɛ mli lɛ. (Kpoj. 20:4, 6; Yoh. 6:54) Biblia mli gbalɛ ni baa mli lɛ tsɔɔ akɛ wɔyɛ nakai “naagbee gbi” krɛdɛɛ lɛ mli amrɔ nɛɛ.a
[Shishigbɛ niŋmai]
a Ajie kɛje June 15, 1979 Blɔfo Buu-Mɔɔ lɛ mli.
Kwɛmɔ Incoming World Government—God’s Kingdom, wolo lɛ. yitso 9.
New International Version.