‘Asha Amɛ Kɛtee Koni Amɛkɛ Nuŋtsɔ lɛ Ayakpe’​—Yɛ Mɛɛ Gbɛ Nɔ?

ŊMƐNƐŊMƐNƐ yiwalɛ nibii agbɛjianɔtoo nɛɛ naagbee be lɛ kanemɔ miiyanɔ ni anyɛŋ afɔ̃ɔ. Beni ŋmɛlɛtswaa fɛɛ ŋmɛlɛtswaa, miniti fɛɛ miniti, kɛ hiŋmɛitswaa fɛɛ hiŋmɛitswaa hoɔ lɛ, belɛ wɔmiibɛŋkɛ saji ni hɛleɔ mɔ shi ni agba afɔ shi jeeŋmɔ lɛ he. Ani rapture lɛ ji enɛɛmɛi ateŋ ekome? Kɛ eko ni lɛ, belɛ mɛɛ be, ni gbɛ nɔ hu eeetsɔ eba?

Wiemɔ, “rapture” lɛ ejeee kpo yɛ Biblia lɛ mli. Shi mɛi ni heɔ enɛ amɛyeɔ lɛ tsɛɔ bɔfo Paulo wiemɔi ni yɔɔ 1 Tesalonikabii 4:17 lɛ akɛ amɛ hemɔkɛyeli lɛ nɔdaamɔ nɔ. Nyɛhaa wɔpɛia bɔ ni akɛ ŋmalɛ nɛɛ tsu nii aha lɛ fɛɛ mli. Paulo ŋma akɛ:

“Anyɛmimɛi, wɔmiisumɔ akɛ nyɛle mɛi ni ewɔ lɛ ahe sane, koni nyɛkaye ŋkɔmɔ tamɔ mɛi ni eshwɛ lɛ, mɛi ni bɛ nɔhiɛkamɔ ko lɛ. Ejaakɛ kɛ wɔheɔ wɔyeɔ akɛ Yesu gbo ni ete shi lɛ, belɛ nakai nɔŋŋ Nyɔŋmɔ baatsɔ Yesu nɔ aŋɔ mɛi ni ewɔ lɛ hu afata ehe kɛba. Ejaakɛ wɔmiikɛɛ nyɛ enɛ yɛ Nuŋtsɔ lɛ wiemɔ ko naa, akɛ, wɔ mɛi ni wɔhiɛ kamɔ ni baashwɛ yɛ Nuŋtsɔ lɛ baa be lɛ mli lɛ, wɔtsɔŋ mɛi ni ewɔ lɛ ahiɛ; ejaakɛ lɛ Nuŋtsɔ lɛ diɛŋtsɛ kɛ oshebɔɔ kɛ ŋwɛibɔfo nukpa gbee kɛ Nyɔŋmɔ tɛtrɛmantrɛ aaajɛ ŋwɛi akpeleke shi, ni gbohii ni yɔɔ Kristo mli lɛ tsutsu baate shi, no sɛɛ lɛ, wɔ mɛi ni wɔhiɛ kamɔ ni eshwɛ lɛ, aaasha wɔkɛ amɛ fɛɛ yɛ atatui amli kɛaatee Nuŋtsɔ lɛ kpeemɔ yɛ kɔɔyɔɔ mli, ni nakai wɔkɛ Nuŋtsɔ lɛ aaayahi shi daa. No hewɔ lɛ, nyɛkɛ nɛkɛ wiemɔi nɛɛ atsɛa nyɛtsui aŋmɛa nyɛmli.”​—1 Tesalonikabii 4:​13-18.

Beni Paulo ŋma eklɛŋklɛŋ wolo lɛ eyaha Kristofoi ni yɔɔ Tesalonika lɛ aaafee afi 50 Ŋ.B. lɛ, no mli lɛ kpaako ato asafo lɛ ehee. Asafo lɛ mlibii lɛ ateŋ mɛi komɛi ehao ejaakɛ amɛteŋ mɛi komɛi “miiwɔ yɛ gbele mli.” Shi nɔ ni Paulo ŋma yɛ gbohiiashitee he hiɛnɔkamɔ lɛ he lɛ shɛje nakai Tesalonikabii lɛ amii.

“Ba ni” Kristo “Eba” Lɛ

Yɛ be mli ni emaa nɔ mi akɛ abaatee anɔkwa Kristofoi ni egboi yɛ nakai beaŋ lɛ shi lɛ, Paulo kɛɛ hu akɛ: “Wɔ mɛi ni wɔhiɛ kamɔ ni baashwɛ yɛ Nuŋtsɔ lɛ baa be lɛ mli lɛ, wɔtsɔŋ mɛi ni ewɔ yɛ gbele mli lɛ ahiɛ.” (Kuku 15) Nɔ ni sa kadimɔ jogbaŋŋ ji bɔ ni bɔfo lɛ wie Nuŋtsɔ lɛ ‘baa be’ loo ba ni eba lɛ he eha lɛ. Shishijee ŋmalɛ lɛ mli wiemɔ lɛ kɛ Hela wiemɔ pa-rou-si‘an, ni eshishi diɛŋtsɛ ji “yɛ masɛi gbɛ” lɛ tsu nii yɛ biɛ.

Kɛ maŋsɛɛ Maŋ Nukpa ko yasara maŋ ko nɔ lɛ, atsiɔ be ni ekɛyɔɔ jɛmɛ lɛ ta. Ni enɛ efee anɔkwale yɛ ba ni Nuŋtsɔ Yesu Kristo eba lɛ he. Buu-Mɔɔ lɛ kɛ odaseyeli eha Biblia gbalɛ he nikaselɔi ni tsui ja lɛ shii abɔ akɛ ba ni Yesu eba yɛ Ŋwɛi Maŋtsɛyeli hewalɛ mli lɛ je shishi yɛ 1914. Nibii ni eba kɛjɛ nakai afi lɛ mli kɛbaa nɛɛ yeɔ ba ni eba ni anaaa lɛ lɛ he odase. (Mateo 24:​3-14, New World Translation) No hewɔ lɛ, Paulo kɛ kɛɛmɔ ni ekɛɛ akɛ “aaasha” Kristofoi komɛi ni yɔɔ wala mli lɛ yɛ Nuŋtsɔ lɛ baa be lɛ mli “kɛaatee Nuŋtsɔ lɛ kpeemɔ yɛ kɔɔyɔɔ mli” lɛ, tsɔɔ akɛ, mɛi ni baashwɛ lɛ kɛ Kristo ekpeŋ yɛ shikpɔŋ nɛɛ kɔɔyɔɔ mli he ko, shi moŋ yɛ ŋwɛi shihilɛ he ni anaaa jɛmɛ, he ni Yesu ta Nyɔŋmɔ ninejurɔ nɔ yɛ lɛ. (Hebribii 1:​1-3) Shi namɛi ni?

“Nyɔŋmɔ Israel Lɛ”

Ŋmalɛi lɛ wieɔ babaoo yɛ heloo naa Israel kɛ mumɔŋ “Nyɔŋmɔ Israel” lɛ hu he. Heyelilɔi ni ji Yudafoi kɛ Jeŋmajiaŋbii fɛɛ baafee kuu ni akɛ Nyɔŋmɔ mumɔ krɔŋkrɔŋ loo nifeemɔ hewalɛ lɛ efɔ amɛ mu lɛ fɛɛ. (Galatabii 6:​16; Romabii 11:​25, 26; 1 Yohane 2:​20, 27) Kpojiemɔ wolo lɛ tsɔɔ akɛ mumɔŋ Israel yibɔ lɛ fɛɛ feɔ 144,000, ni afeɔ amɛ fɛɛ he mfoniri akɛ amɛkɛ Toobi, Yesu Kristo yɛ ŋwɛi Zion Gɔŋ lɛ nɔ. Amɛkɛ Kristo baafee maŋtsɛmɛi kɛ osɔfoi yɛ ŋwɛi. (Kpojiemɔ 7:​1-8; 14:​1-4; 20:⁠6) Mɛi ni fata amɛhe ji aŋkroaŋkroi ni kɛ asafoi ni yɔɔ Tesalonika lɛ kɛ hei krokomɛi ebɔ lɛ, ni wiemɔ loo maŋ nɔ ni amɛjɛ kɔɔɔ he eko.​—Bɔfoi lɛ Asaji 10:​34, 35.

Dani mumɔŋ Israel mli bii anɔkwafoi nɛɛ ateŋ mɔ ko nine aaashɛ ŋwɛi nyɔmɔwoo nɔ lɛ, ehe baahia ni amɛtsɔ niiashikpamɔ ko mli da. Taakɛ bɔ ni Yesu gbele yɛ sɛŋmɔtso nɔ lɛ tsɔ eshitee kɛmiiya wala mli yɛ ŋwɛi lɛ hiɛ lɛ, nakai nɔŋŋ hu esa akɛ Kristofoi ni yɔɔ ŋwɛi hiɛnɔkamɔ lɛ hu agboi dani amɛnine ashɛ amɛ nyɔmɔwoo nɔ. (1 Korintobii 15:​35, 36) Enɛ baafee anɔkwale yɛ mumɔŋ Israel mli bii ni hi shi yɛ Ŋ.B. klɛŋklɛŋ afii oha lɛ mli lɛ kɛ gbɔmɛi ni tamɔ nakai ni yɔɔ wala mli bianɛ lɛ ahe.

Beni etsi “Nuŋtsɔ lɛ baa be” lɛ ta lɛ sɛɛ lɛ, Paulo tsɔɔ be mli ni mumɔŋ lsraelbii anɔkwafoi ni amɛgboi lɛ anine baashɛ amɛ ŋwɛi nyɔmɔwoo lɛ nɔ. Eŋma akɛɛ “Nuŋtsɔ lɛ diɛŋtsɛ kɛ oshebɔɔ kɛ ŋwɛibɔfo nukpa gbee kɛ Nyɔŋmɔ tɛtrɛmantrɛ aaajɛ ŋwɛi akpeleke shi, ni gbohii ni yɔɔ Kristo mli lɛ tsutsu baate shi.” (Kuku 16) No hewɔ lɛ, kɛ ba ni Yesu eba akɛ Maŋtsɛ lɛ je shishi pɛ lɛ, wɔbaakpa gbɛ ni ŋwɛi shitee lɛ aje shishi, ni ebaaje shishi kɛjɛ mumɔŋ Israel mli bii ni amɛgboi momo akɛ emuuyeli mlihiɛlɔi lɛ anɔ. (1 Korintobii 15:23) Amɛmiisɔmɔ yɛ Yesu masɛi bianɛ yɛ ŋwɛi. Shi Kristofoi ni afɔ amɛ mu lɛ ateŋ mɛi fioo ni eshwɛ ni yɔɔ wala mli lolo yɛ shikpɔŋ nɔ lɛ hu? Ani amɛmiimɛ rapture loo sha ni aaasha amɛ kɛaaya lɛ?

‘Asha Amɛ Kɛtee’​—Yɛ Mɛɛ Gbɛ Nɔ?

Yɛ be mli ni ewie Kristofoi ni afɔ amɛ mu lɛ ni amɛgboi lɛ ahe lɛ sɛɛ lɛ, Paulo kɛfata he akɛ: “No sɛɛ lɛ, wɔ mɛi ni wɔhiɛ kamɔ ni eshwɛ lɛ, aaasha wɔkɛ amɛ fɛɛ yɛ atatui amli kɛaatee Nuŋtsɔ lɛ kpeemɔ yɛ kɔɔyɔɔ mli, ni nakai wɔkɛ Nuŋtsɔ lɛ aaayahi shi daa.” (Kuku 17) “Mɛi ni . . . hiɛ kamɔ lɛ” baafee mɛi ni yɔɔ wala mli beni Kristo eba loo yɛ ebaa be lɛ mli lɛ. ‘Abaasha amɛ’ ni amɛkɛ Nuŋtsɔ Yesu ayakpe. Taakɛ eji yɛ mra be mli Kristofoi anɔkwafoi lɛ agbɛfaŋ lɛ, akɛ adesai lɛ, ehe miihia ni amɛgboi dani amɛkɛ Kristo afee ekome yɛ ŋwɛi.​—Romabii 8:​17, 35-39.

Yɛ be mli ni eŋmaa wolo eyaha Kristofoi ni yɔɔ Korinto lɛ, Paulo kɛɛ: “Anyɛmimɛi, nɔ ni mikɛɔ ji akɛ, heloo kɛ la nine shɛŋ Nyɔŋmɔ maŋtsɛyeli lɛ nɔ, ni asaŋ fitemɔ hu nine shɛŋ nɔ ni fiteee lɛ nɔ. Naa, teemɔŋ sane mikɛɔ nyɛ nɛɛ: Jeee wɔ fɛɛ wɔbaawɔ lɛ, shi abaatsake wɔ fɛɛ, trukaa, hiŋmɛitswaa mli, beni aaakpa naagbee tɛtrɛmantrɛ lɛ; ejaakɛ abaakpa tɛtrɛmantrɛ, ni aaatee gbohii ashi ni amɛfiteŋ dɔŋŋ, ni wɔ lɛ, abaatsake wɔ.” (1 Korintobii 15:​50-52) Kɛ mumɔŋ Israel shwɛɛnii lɛ ateŋ mɔ fɛɛ mɔ gbo yɛ anɔkwayeli mli yɛ be mli ni Kristo eba lɛ, enine shɛɔ eŋwɛi nyɔmɔwoo nɔ amrɔ nɔŋŋ. Ateeɔ lɛ shi akɛ mumɔŋ bɔɔ nɔ “trukaa, hiŋmɛitswaa mli,” ni ‘ashaa lɛ kɛyaa’ koni ekɛ Yesu ayakpe ni ekɛ lɛ asɔmɔ akɛ hefatalɔ nɔyelɔ yɛ ŋwɛi Maŋtsɛyeli lɛ mli. Shi mɛi fɛɛ ni eshwɛ ni sɔmɔɔ Yehowa lɛ hu? Yɛ be mli ni yiwalɛ nibii agbɛjianɔtoo nɛɛ bɛŋkɛɔ enaagbee lɛ, ani abaasha amɛ hu kɛya ŋwɛi?

Amɛnaa Yibaamɔ​—Shi Jeee Kɛtsɔ Rapture Nɔ

Akɛni ba ni Yesu eba akɛ odehe lɛ je shishi yɛ 1914 hewɔ lɛ, wɔbote je nɛɛ “naagbee be lɛ” lɛ mli vii. (Daniel 12:⁠4) Paulo bɔ kɔkɔ akɛ: “Shi bei lɛ kɛ yinɔi lɛ ahewɔ lɛ, anyɛmimɛi ehiaaa nyɛ akɛ aŋma nyɛ. Ejaakɛ nyɛ diɛŋtsɛ nyɛle krɛdɛɛ akɛ Nuŋtsɔ Yehowa gbi lɛ baaba tamɔ julɔ baa nyɔɔŋ lɛ. Ejaakɛ be mli ni amɛaakɛɛ akɛ: ‘Hejɔlɛ toiŋjɔlɛ yɛ ni wɔyɛ shweshweeshwe’ lɛ, no mli nɔŋŋ hiɛkpatamɔ aaabatua amɛ trukaa, tamɔ kɔɔmɔ tuaa yoo ni musu eda lɛ, ni amɛjeŋ mli kɔkɔɔkɔ.” (1 Tesalonikabii 5:​1-3) Shi Kristofoi ni hiɛ yɔɔ amɛhe nɔ lɛ baaje mli. Yɛ mɛɛ gbɛ nɔ?

Bolɔmɔ akɛ “Hejɔlɛ yɛ ni wɔyɛ shweshweeshwe” lɛ ji okadi ni tsɔɔ be ni Yesu tsɛ lɛ “amanehulu kpeteŋkpele” lɛ hiɛ. Yɛ be mli ni Kpojiemɔ wolo lɛ tsɔɔ “asafo babaoo” ko ni ji anɔkwafoi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ paradeiso ko mli lɛ, ekɛɛ: “Mɛnɛɛmɛi ji mɛi ni jɛ amanehulu kpeteŋkpele lɛ mli lɛ, ni amɛfɔ amɛtadei lɛ ahe ni amɛha eyɛ futaa yɛ Toobi lɛ la lɛ mli.” (Kpojiemɔ 7:​9, 14; Luka 23:43) Dabi, amɛnɔ lɛ jee rapture loo sha ni aaasha amɛ trukaa gbɛkpamɔ. Shi moŋ, amɛyɛ hiɛnɔkamɔ akɛ amɛbaana yibaamɔ yɛ biɛ, yɛ shikpɔŋ nɛɛ nɔ. Bɔni afee ni amɛsaa amɛhe kɛha enɛ lɛ, esa akɛ amɛhi shi akɛ mɛi ni hiɛ ka yɛ mumɔŋ. Mɛɛ gbɛ nɔ oootsɔ ofee enɛ ni oje gbɛjianɔtoo nɛɛ naagbee lɛ mli?

Ehe miihia ni ‘ohiɛ atsɛ ni okawɔ, shi owo hemɔkɛyeli kɛ suɔmɔ dama lɛ ni obu dade fai ni ji yiwalaheremɔ nɔhiɛkamɔ lɛ.’ (1 Tesalonikabii 5:​6-8) Be ni esa akɛ afee toiboo aha Nyɔŋmɔ gbalɛ Wiemɔ ni ji Biblia lɛ nɛ. Beni be lɛ hoɔ oyayaayai, dani nibii agbɛjianɔtoo nɛɛ naagbee aaaba lɛ, bo Paulo ŋaawoo nɛɛ toi: “Nyɛkagbea gbalɛi lɛ ahe guɔ. Shi nyɛkaa nii fiaa nyɛkwɛa, ni nɔ ni hi lɛ, nyɛmɔa mli.” (1 Tesalonikabii 5:​20, 21) Enɛ hewɔ lɛ, Yehowa Odasefoi miihere bo atuu kɛmiiba amɛ Maŋtsɛyeli Asai anɔ, he ni okɛ amɛ baana Biblia gbalɛi kɛ kɛ Nyɔŋmɔ Wiemɔ ni jɛ mumɔŋ lɛ mli nibii krokomɛi akasemɔ mli gbɛfaŋnɔ.

Yɛ be mli ni odaa yɛ anɔkwa nilee kɛ hemɔkɛyeli mli lɛ, obaayoo bɔ ni Yehowa Nyɔŋmɔ yiŋtoo akɛ ebaajie ehenyɛlɔi kɛjɛ jeŋ muu fɛɛ, ni eha shikpɔŋ lɛ atsɔ paradeiso ekoŋŋ lɛ baa mli ehaa lɛ. Kɛ okɛ hemɔkɛyeli tsu nii lɛ, ooonyɛ ofata mɛi ni baaje amanehulu kpeteŋkpele lɛ mli lɛ ahe, ni obaana hegbɛ akɛ ooohere gbɔmɛi akpekpei abɔ ni abaatee amɛ shi kɛba wala mli yɛ shikpɔŋ nɔ lɛ atuu. Ni mɛɛ miishɛɛ enɛ aaaji nɛkɛ, akɛ ooohi shi yɛ Nyɔŋmɔ Maŋtsɛyeli ni yɔɔ Yesu Kristo kɛ enanemɛi nɔyelɔi lɛ, mɛi ni no mli lɛ ‘asha amɛ kɛtee Nuŋtsɔ lɛ kpeemɔ’ kɛtsɔ amɛ gbohiiashitee kɛmiiba wala mli yɛ ŋwɛi nɔyeli he lɛ adɛŋ lɛ shishi!

Belɛ mɛni ji adesai toibolɔi fɛɛ ahiɛnɔkamɔ diɛŋtsɛ yɛ Ŋmalɛ lɛ naa? Ejeee rapture loo sha ni aaasha amɛ trukaa kɛya ŋwɛi. Shi moŋ eji naanɔ wala yɛ shikpɔŋ nɔ yɛ Nyɔŋmɔ Maŋtsɛyeli lɛ nɔyeli.

[Mfoniri ni yɔɔ baafa 7]

Mɛi ni baaje amanehulu kpeteŋkpele lɛ mli lɛ baahere mɛi ni abaatee amɛ shi kɛba wala mli yɛ paradeiso shikpɔŋ nɔ lɛ atuu yɛ Yesu kɛ mɛi ni ‘asha amɛ kɛtee’ ŋwɛi lɛ anɔyeli shishi