“NYƐFIA SHI”

10. (a) Mɛɛ su Paulo kɛ ŋmɛnɛŋmɛnɛ beaŋ “tsulɔ” kuu lɛ fɛɛ yɔɔ yɛ amɛ ‘nyɛmimɛi ni amɛsumɔɔ amɛ’ lɛ ahe? (b) Wɔ 1982 Afi Ŋmalɛ lɛ kɔɔ enɛ he yɛ mɛɛ gbɛ nɔ?

¹⁰ Paulo kɛ enaataamɔ ni ekɛfiɔ gbohiiashitee hiɛnɔkamɔ ni yɔɔ naakpɛɛ lɛ sɛɛ lɛ ba naagbee yɛ miishɛɛ kɛ hewalɛwoo mli. Ekɛɛ akɛ: “No hewɔ lɛ, minyɛmimɛi ni misumɔɔ.” Eesumɔ ni emumɔŋ nyɛmimɛi lɛ anine ashɛ oti ni ma amɛhiɛ lɛ nɔ. Nakai nɔŋŋ hu ŋmɛnɛ, “tsulɔ anɔkwafo kɛ nilelɔ” lɛ susuɔ nakai gbɔmɛi akpekpei abɔ ni yɔɔ Yehowa maŋtsɛyeli ni baa lɛ he miishɛɛ lɛ amumɔŋ shweremɔ he waa. “Tsulɔ” lɛ miisumɔ ni ena akɛ “asafo babaoo” lɛ fɛɛ he esa kɛha wala yɛ maŋtsɛyeli lɛ nɔyeli he lɛ yɛ shikpɔŋ nɔ. Amɛfeɔ enɛ kɛtsɔɔ ‘amɛ atadei ni amɛfɔɔ he’ lɛ kɛ Nyɔŋmɔ ni amɛsɔmɔɔ lɛ lɛ nɔ, bɔni afee ni amɛje “amanehulu kpeteŋkpele” lɛ mli shweshweeshwe. (Mateo 24:​45-47; Kpojiemɔ 7:​9, 14) Mɛɛ gbɛ nɔ aaatsɔ ni nine ashɛ nakai oti lɛ nɔ? No ji kɛtsɔ hiɛdɔɔ ni wɔkɛaaana gbɛfaŋnɔ yɛ wɔ-Nuŋtsɔ Yesu Kristo nitsumɔ lɛ mli lɛ nɔ. Nakai ji bɔ ni Paulo tsɔɔ, yɛ nɛkɛ wiemɔi nɛɛ ni ebatsɔ 1982 Afi Ŋmalɛ kɛha Yehowa Odasefoi lɛ:

“Nyɛfia shi ni nyɛkagbugbaa, ni nyɛtekea nɔ yɛ Nuŋtsɔ lɛ nitsumɔ lɛ mli daa nɛɛ.”​—1 Korintobii 15:⁠58.

11. Wiemɔ “nyɛfia shi” lɛ tsɔɔ mɛni?

¹¹ Shifimɔ su he miihia kɛha mɛi ni sumɔɔ akɛ ‘amɛje mli’ kɛyabote Yehowa gbɛjianɔtoo hee lɛ mli lɛ. Ni aaafi shi lɛ tsɔɔ hekamɔ, shiŋŋfeemɔ ni ahosooo kwraa. Hemɔkɛyeli ni tamɔ nɛkɛ ji nɔ ni esa akɛ wɔna, nibii ni wɔkpaa gbɛ ni jwere wɔhiɛ ni wɔnaaa lɛ anɔmimaa, shi kɛtsɔ Ŋmalɛi lɛ kasemɔ nɔ lɛ, amɛbatsɔmɔ nibii ni yɔɔ diɛŋtsɛ kɛha wɔ, tamɔ nɔ ni amɛyɛ ni wɔkɛ wɔhiŋmɛi miina diɛŋtsɛ.​—Hebribii 11:⁠1.

“NYƐKAGBUGBAA”

13. Mɛɛ gbɛ nɔ wɔbaanyɛ wɔtsɔ wɔtsɔɔ akɛ wɔji mɛi ni ‘gbugbaaa’ tamɔ Hiob?

¹³ Paulo woɔ wɔ ŋaa hu akɛ, “nyɛkagbugbaa.” Enɛ tamɔ ni mɔ ko aaafi shi. Etsɔɔ akɛ, yɛ be mIi ni wɔyeɔ Nyɔŋmɔ kitai lɛ anɔ lɛ, esaaa akɛ wɔhosoɔ yɛ wɔ emuuyeli mli kɔkɔɔkɔ. No ji su ni emuuyeli mli hiɛlɔ kpakpa, Hiob, kɛɛ yɛ e-Nyɔŋmɔ kɛ Kojolɔ lɛ he akɛ: “Kɛ eka mi ekwɛ lɛ, majie mihe shi tamɔ shika” yɔɔ. Ani wɔbaanyɛ wɔwie kɛ hekɛnɔfɔɔ nɛkɛ? Wɔbaanyɛ, kɛji akɛ wɔɔnyɛ wɔkɛɛ Yehowa, taakɛ Hiob kɛɛ lɛ: “Minyiɛ egbɛ lɛ nɔ, ni mijeee nɔ. Kita ni jɛ enaa lɛ, mijeko sɛɛ; edaaŋ wiemɔi lɛ mikɛtɔ fe mimla.” (Hiob 23:​10-12) Kɛji akɛ wɔbaatamɔ Hiob, ni wɔɔya kɛteke gbɛjianɔ ni ato kɛha wɔ daa kpeei, ni wɔgbɛlɛshi kɛtee Buu Mɔɔ Asafo lɛ woji sɔrɔtoi amli kɛha bɔ ni Nyɔŋmɔ Wiemɔ lɛ kɛ nitsumɔ yɛ ŋmɛnɛŋmɛnɛ beaŋ lɛ mlijelɛ yɔɔ lolo lɛ, ebaaye ebua wɔ, yɛ anɔkwale mli, ni wɔya nɔ wɔfi shi shiŋŋ ni wɔgbugbaaa yɛ anɔkwale lɛ mli.