Mɛni Baanyɛ Aye Abua Wɔ Koni Wɔdamɔ Shi Shiŋŋ yɛ Hemɔkɛyeli lɛ Mli?

¹ Kɛjɛ beni wɔje shishi wɔkɛ Yehowa gbɛjianɔtoo lɛ bɔi bɔɔ nɛɛ, wɔmumɔŋ hiɛyaa lɛ haa wɔnáa miishɛɛ! Ni kɛlɛ, bɔni afee ni wɔya nɔ wɔfee mɛi ni ‘wɔshishifãi emɔmɔ shi, ni amamɔ wɔ yɛ enɔ, ní wɔfĩ shi yɛ hemɔkɛyeli lɛ mli’ lɛ, daa mumɔŋ hiɛyaa he miihia. (Kol. 2:6, 7) Yɛ be mli ni mɛi babaoo eshwere yɛ mumɔŋ lɛ, mɛi komɛi ekpalaŋ kɛtee ejaakɛ ‘amɛdamɔɔɔ shi shiŋŋ yɛ hemɔkɛyeli lɛ mli.’ (1 Kor. 16:13) Wɔbaanyɛ wɔtsĩ enɛ gbɛ ni ekaba wɔnɔ. Yɛ mɛɛ gbɛ nɔ?

² Mumɔŋ Nii ni Atsuɔ Daa Gbi: Too mumɔŋ nitsumɔ he gbɛjianɔ kpakpa ni osɔmɔ yɛ Yehowa gbɛjianɔtoo lɛ mli. Biɛ ji he ni akɛ nibii babaoo ni he hiaa wɔ yɛ mumɔŋ lɛ haa wɔ yɛ. Asafoŋ kpeei, kpeei bibii, kɛ kpeei wuji kanyaa wɔ koni wɔya hiɛ babaoo yɛ mumɔŋ dalɛ kɛ shidaamɔ kpakpa mli, shi ja wɔbaa daa gbi dani wɔbaaná he sɛɛ. (Heb. 10:24, 25) Gbɛjianɔ ni atoɔ daa koni akane Biblia lɛ, Buu-Mɔɔ kɛ Awake! woji tɛtrɛbii lɛ, kɛ woji ni gbaa Nyɔŋmɔ Wiemɔ lɛ mli niyenii ni wa lɛ he saji lɛ baaha wɔmumɔŋ shishifãi lɛ aya shishi ni ená hewalɛ. (Heb. 5:14) Mumɔŋ otii ni mɔ diɛŋtsɛ kɛaamamɔ ehiɛ kɛ ekãa ni ekɛaatsu he nii lɛ hu kɛ sɛɛnamɔi ni hiɔ shi daa baaba.—Fil. 3:16.

³ Yelikɛbuamɔ ni Mɛi ni Edara yɛ Mumɔŋ lɛ Kɛaaha: Kwɛmɔ ni olɛɛ naanyobɔɔ ni kã okɛ mɛi ni edara yɛ mumɔŋ yɛ asafo lɛ mli lɛ mli. Ná ole onukpai lɛ, ejaakɛ amɛji mɛi titri ni baanyɛ awo wɔ hewalɛ. (1 Tes. 2:11, 12) Okɛ miishɛɛ akpɛlɛ ŋaawoi loo gbɛtsɔɔmɔi fɛɛ ni amɛkɛaaha bo lɛ nɔ. (Efe. 4:11-16) Asafoŋ sɔɔlɔi hu yɛ he miishɛɛ akɛ amɛaaye amɛbua mɛi krokomɛi koni amɛdamɔ shi shiŋŋ yɛ hemɔkɛyeli lɛ mli, no hewɔ lɛ yaana nyɛmimɛi nɛɛ koni amɛwo bo hewalɛ.

⁴ Ani yelikɛbuamɔ he miihia bo yɛ sɔɔmɔ nitsumɔ lɛ mli? Okɛ onukpai lɛ awie, ni obi ni aye abua bo. Ekolɛ abaanyɛ akɛ bo afata Gbɛgbalɔi Yeɔ Buaa Mɛi Krokomɛi gbɛjianɔtoo lɛ he. Ani abaptisi bo etsɛko? Our Ministry wolo lɛ kasemɔ kɛ emli saji lɛ ni okɛaatsu nii lɛ baaha oya hiɛ babaoo ni oda yɛ mumɔŋ. Ani oji fɔlɔ? Yaa nɔ oha obii lɛ amumɔŋ shidaamɔ mli awa.—Efe. 6:4.

⁵ Kɛ wɔshishifã mɔ shi ni wɔfĩ shi shiŋŋ yɛ hemɔkɛyeli lɛ mli lɛ, wɔnáa wɔkɛ Yehowa teŋ wekukpaa kɛ wɔ kɛ wɔnyɛmimɛi lɛ ateŋ naanyobɔɔ ni yɔɔ miishɛɛ lɛ mli ŋɔɔmɔ. Enɛ yeɔ ebuaa koni wɔdamɔ Satan tutuamɔi anaa, ni ehaa naanɔ wɔsɛɛ be he hiɛnɔkamɔ ni wɔyɔɔ lɛ mli bawaa waa.—1 Pet. 5:9, 10.