Hekɛnɔfɔɔ yɛ Jeŋ ni Yeee Emuu Mli

“EKPAKPA ni misumɔɔ lɛ mifeee; shi efɔŋ ni misumɔɔɔ lɛ, no moŋ mifeɔ.” Ani onaa enɛ akɛ eji anɔkwale yɛ ogbɛfaŋ? Ná hewalɛwoo akɛ ooole akɛ bɔfo Paulo kɛ nakai naagba lɛ nɔŋŋ kpe; shi kɛlɛ, eji nuu ni jie Kristofoia emuuyeli kpo yɛ gbɛ ni sa kadimɔ nɔ. Ani jeee sane ni teɔ shi woɔ ehe nɛ? Paulo tsɔɔ naagba lɛ mli faŋŋ, yɛ ewolo ni eŋma emaje Kristofoi ni yɔɔ Roma lɛ mli akɛ: “Shi kɛ́ nɔ ni misumɔɔɔ lɛ kɛ̃ mifeɔ lɛ, belɛ jeee mi mitsuɔ no dɔŋŋ, shi moŋ esha ni yɔɔ mimli lɛ tsuɔ.” Mɛɛ esha he ewieɔ nɛɛ, ni mɛɛ gbɛ nɔ etsɔ eye nɔ kunim bɔni afee ni ebatsɔ nuu ni hiɛɔ emuuyeli mli?—Romabii 7:19, 20.

Paulo ŋma kɛtsɔ hiɛ, yɛ ewolo lɛ mli akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.” “Gbɔmɔ kome” lɛ ji Adam. (Romabii 5:12, 14) Adam esha—ni ji esha ni klɛŋklɛŋ gbɔmɔ, Adam fee lɛ—ji nɔ ni kɛ emuu ni adesai aweku lɛ yeee, kɛ yiŋtoo titri hewɔ ni emuuyeli mlihiɛmɔ ji kaa diɛŋtsɛ kɛha amɛ lɛ ba.

Akpɛlɛɛɛ bɔ ni Paulo susuɔ “shishijee esha” lɛ he ehaa, taakɛ atsɛɔ lɛ be ko ni eho lɛ nɔ babaoo ŋmɛnɛ, ejaakɛ akpoo Biblia mli sane ni kɔɔ adebɔɔ he lɛ kwraa yɛ Nyɔŋmɔ jamɔ he nikaselɔi ateŋ, ni akpɛlɛɔ sutsakemɔ he susumɔi ni akaa yiŋ atsɔɔ lɛ moŋ nɔ. Ŋmɛnɛŋmɛnɛ beaŋ sane ko ni aŋma yɛ Romabii 5:12-14 he lɛ wieɔ akɛ “jeŋ nilelɔi etswa nakai sane muu lɛ fɛɛ amɛfɔ̃ afã.” Ni kɛlɛ, afii oha ni eho nɛ lɛ, Biblia he saji ŋmalalɔi kɛ gbeekpamɔ tsɔɔ mli akɛ “beni Adam fee esha lɛ . . . ekɛ nakai esha lɛ kɛ nibii ni jɛ mli kɛba lɛ wo eshwiei fɛɛ ahe muji.”a

Emuuyeli Laajemɔ Kɛjɛ Shishijee

Taakɛ bɔ ni mɛi pii ekpɛlɛɛɛ Adam, ni ji klɛŋklɛŋ gbɔmɔ lɛ nɔ ŋmɛnɛ akɛ mɔ ko ni hi shi lɛlɛŋ lɛ, nakai nɔŋŋ hu atswaa Satan, Abonsam afɔ̃ɔ afã akɛ adesã mli susumɔ ko kɛkɛ.b Shi gbɔmɔ ni nɔ kwɔ waa, ni ji Yesu Kristo kɛɔ wɔ akɛ nɛkɛ mɔ nɛɛ “[damɔɔɔ] anɔkwale lɛ mli,” ni tsɔɔ yɛ wiemɔ kroko mli akɛ esaaa mɔ ni anaa emli hekɛnɔfɔɔ. (Yohane 8:44) Ni Satan ji mɔ ni wo Adam kɛ eŋa Hawa yiŋ ni amɛtse Yehowa hiɛ atua ni amɛku amɛ emuuyeli lɛ mli yɛ kaa shishi lɛ.—1 Mose 3:1-19.

Akɛni wɔ fɛɛ wɔjɛ Adam mli hewɔ lɛ, wɔ fɛɛ wɔná henumɔ ni haa wɔfeɔ esha lɛ kɛtsɔ fɔmɔ nɔ. Nilelɔ Salomo jaje akɛ: “Gbɔmɔ ko bɛ shikpɔŋ lɛ nɔ, ni ji jalɔ, ni feɔ ekpakpa ni efeee esha.” (Jajelɔ 7:20) Shi kɛlɛ, abaanyɛ akɛ he afɔ̃ adesa fɛɛ adesa nɔ. Mɛɛ gbɛ nɔ enɛ baa lɛ nakai yɛ? Ejaakɛ ehe ehiaaa ni gbɔmɔ aye emuu dani enyɛ ehiɛ emuuyeli mli.

Nɔdaamɔ Nɔ Kɛha Emuuyeli

Israel Maŋtsɛ David tɔ̃ tɔmɔi babaoo, ni amɛteŋ ekome ji gbalafitemɔ wekukpaa ni bakã ekɛ Batsheba teŋ, ni ji anɔkwa sane ni aŋma afɔ̃ shi lɛ. (2 Samuel 11:1-27) David tɔmɔi babaoo lɛ tsuɔ nii kɛmaa nɔ mi akɛ ejeee mɔ ko ni yeɔ emuu kwraa. Shi kɛlɛ, mɛni ji nɔ ni Yehowa na yɛ nuu nɛɛ he? Beni ekɛ David binuu, Salomo wieɔ lɛ, Yehowa kɛɛ: “Ooonyiɛ yɛ mihiɛ, tamɔ bɔ ni otsɛ David nyiɛ, yɛ tsui ni eye emuu kɛ jalɛ mli [lɛ].” (1 Maŋtsɛmɛi 9:4; wɔma efã ko nɔ mi.) Yɛ etɔmɔi babaoo lɛ fɛɛ sɛɛ lɛ, Yehowa na bɔ ni David sa hekɛnɔfɔɔ kɛjɛ shishijee lɛ. Mɛni hewɔ?

David ha hetoo lɛ beni ekɛɛ Salomo akɛ: “Yehowa taoɔ tsuii fɛɛ amli, ni ele yitseiaŋ jwɛŋmɔi fɛɛ.” (1 Kronika 28:9) David tɔ̃ tɔmɔi, shi kɛlɛ eba ehe shi, ni eesumɔ ni efee nɔ ni ja. Etee nɔ ekpɛlɛ kãmɔ kɛ jajemɔ nɔ yɛ be kɛ bei amli—lɛlɛŋ, ebi koni ahã lɛ. Enibimɔ lɛ ji akɛ: “Yehowa, taomɔ mimli ni oka mi okwɛ; tsuumɔ misabai kɛ mitsui he!” (Lala 26:2) Ni eka shi faŋŋ akɛ atsuu David he hu. Akɛ nɔkwɛmɔ nɔ lɛ, nɔnyɛɛi ni jɛ esha ni ekɛ Batsheba fee lɛ mli kɛba enɔ lɛ hi shi aahu kɛyashi ewala be naagbee tɔ̃ɔ. Shi kɛlɛ, David ekaaa akɛ ebaabu etɔmɔ lɛ bem kɔkɔɔkɔ. (2 Samuel 12:1-12) Nɔ ni he hiaa fe fɛɛ ji akɛ, egbaaa afã kɛjɛɛɛ anɔkwa jamɔ he kɔkɔɔkɔ. Yiŋtoo nɛɛ, kɛ David anɔkwa heshwamɔ kɛ tsuitsakemɔ ni jɛ etsuiŋ lɛ hewɔ lɛ, Yehowa fee klalo akɛ ekɛ ehe eshai lɛ baake lɛ, koni ekpɛlɛ enɔ akɛ nuu ni hiɛɔ emuuyeli mli.—Kwɛmɔ Lala 51 hu.

Hekɛnɔfɔɔ yɛ Kaa Shishi

Satan Abonsam ka Yesu kɛ mɔdɛŋbɔɔ akɛ ebaaku emuuyeli ni ehiɛ mli lɛ mli. Ehe bahia ni ehiɛ emuuyeli mli kɛtsɔ jaramɔ shihilɛi kɛ amanehulu mli, ni esoro lɛ kwraa yɛ Adam, mɔ ni aka toiboo ni eeefee akɛ nuu ni eye emuu lɛ, kɛtsɔ famɔ ni akɛha lɛ akɛ ebo ŋwɛi mla toi lɛ nɔ lɛ he. Kɛfata he lɛ, le ni Yesu le akɛ adesa weku lɛ kpɔmɔ damɔ emuuyeli mli ni eeehiɛ lɛ nɔ lɛ kɛ lɛ wo nɔnyɛɛ shishi.—Hebribii 5:8, 9.

Satan, ni etswa efai shi akɛ ebaaku Yesu emuuyeli lɛ mli lɛ, yanina lɛ yɛ be mli ni Yesu egbɔjɔ fe fɛɛ—beni eyaye gbii 40 yɛ ŋa lɛ nɔ ni ekɛjwɛŋ saji anɔ, ni ekɛhi ŋmaa lɛ sɛɛ. Eka Yesu shii etɛ sɔŋŋ—ní eha tɛi atsɔmɔ aboloo; ní etu kɛjɛ sɔlemɔtsu lɛ yiteŋ ati lɛ nɔ ebayi shikpɔŋ, kɛ hiɛnɔkamɔ akɛ ŋwɛibɔfoi kɛ amɛhe baawo mli ni amɛhere eyiwala, koni etsɔ no nɔ efee okadi ni yɔɔ naakpɛɛ ni tsɔɔ akɛ lɛ ji Mesia lɛ; ní enine ashɛ je nɛŋ maŋtsɛyelii lɛ fɛɛ anɔyeli nɔ, ní ekɛtsake ‘jamɔ nifeemɔ’ kome pɛ ni ekɛaaha Satan. Shi Yesu tswa kaai lɛ eko fɛɛ eko efɔ̃, ni ehiɛ emuuyeli mli kɛha Yehowa.—Mateo 4:1-11; Luka 4:1-13.

Hiob Emuuyeli Lɛ

Ale Hiob shidaamɔ, ni ji emuuyeli mli ni ehiɛ yɛ kaa shishi lɛ jogbaŋŋ diɛŋtsɛ. Nɔ ni yɔɔ miishɛɛ ji akɛ, Hiob nuuu nɔ hewɔ ni amanehulu ba enɔ lɛ shishi. Eleee akɛ Satan kɛ susumɔi fɔji komɛi ahe sɔ̃i miifɔ̃ enɔ, ni eefolɔ enaa akɛ Hiob sɔmɔɔ Nyɔŋmɔ yɛ pɛsɛmkunya yiŋtoi ahewɔ, ni eekɛɛ akɛ Hiob baajɛ esuɔmɔ mli eku emuuyeli mlihiɛmɔ mli, koni ekɛhere eyiwala. Nyɔŋmɔ ŋmɛ gbɛ ni Hiob tsɔ niiashikpamɔi ni mli wa waa mli koni ekɛtsɔɔ akɛ nɔ ni Satan wie lɛ ejaaa.—Hiob 1:6-12; 2:1-8.

Amale nanemɛi etɛ ahe baje sane lɛ mli. Amɛje gbɛ amɛbawie tɛi ni Nyɔŋmɔ efolɔ eshwie shi lɛ kɛ eyiŋtoi ahe amale wiemɔi. Hiob ŋa po, ni lɛ hu enyɛɛɛ enu sane ni eba lɛ shishi lɛ, wooo ewu hewalɛ yɛ nɛkɛ hiamɔ be ni mli wa waa nɛɛ mli. (Hiob 2:9-13) Shi Hiob damɔ shi shiŋŋ. “Mibemyeli lɛ miŋmɛɛŋ he kɛyashi beyinɔ ni magbo. Mihiɛ mijalɛ lɛ mli kpɛŋŋ, ni miŋmɛɛŋ he; mitsui hu ewieee mihiɛ yɛ miwala gbii lɛ eko hewɔ.”—Hiob 27:5, 6.

Hiob nɔkwɛmɔ nɔ ni nɔ kwɔ waa nɛɛ, kɛ hii kɛ yei anɔkwafoi krokomɛi babaoo a-emuuyeli mlihiɛmɔ, taakɛ aŋmala ashwie shi yɛ Biblia lɛ mli lɛ, hãa anaa Satan akɛ amalelɔ.

Emuuyeli kɛ Kristofoi Asɔɔmɔ Nitsumɔ Lɛ

Ani emuuyeli ji su ko ni Yehowa buɔ waa yɛ lɛ diɛŋtsɛ emiishɛɛnamɔ hewɔ kɛkɛ? Dabi. Emuuyeli hiɛ mligbɛ su kpakpa ko kɛha wɔ adesai. Wɔ diɛŋtsɛ wɔ sɛɛnamɔ hewɔ ni Yesu wo wɔ ŋaa akɛ ‘wɔsumɔ Yehowa wɔ-Nyɔŋmɔ lɛ kɛ wɔtsui fɛɛ kɛ wɔsusuma fɛɛ kɛ wɔjwɛŋmɔ fɛɛ’ lɛ. Yɛ anɔkwale mli lɛ, enɛ ji “kitai lɛ amli otu kɛ ewulu,” ni ebiɔ emuuyeli yɛ nuu, yoo, loo gbekɛ gbɛfaŋ dani enyɛ eye nɔ. (Mateo 22:36-38) Mɛni enɛ biɔ, ni mɛni ji nyɔmɔwoi ni jɛɔ mli baa?

Abaanyɛ akɛ hiɛ afɔ̃ nuu ni hiɛɔ emuuyeli mli lɛ nɔ, ni jeee enaanyo gbɔmɔ kɛkɛ, shi mɔ ni he hiaa waa ji Nyɔŋmɔ. Anaa etsui mli hetsemɔ yɛ enifeemɔi amli; anaaa osatofeemɔ yɛ ehe. Efeee nii kɛteee, loo nibii fɔji. Bɔfo Paulo wie he yɛ nɛkɛ gbɛ nɔ akɛ: “Wɔgu hiɛgbejianii ni aŋɔtee lɛ, ni wɔbaaa wɔjeŋ yɛ kutumpɔo mli, ni asaŋ wɔfutuuu Nyɔŋmɔ wiemɔ lɛ, shi moŋ wɔkɛ anɔkwale lɛ kpojiemɔ lɛ jieɔ wɔhe wɔtsɔɔ gbɔmɛi ahenilee fɛɛ yɛ Nyɔŋmɔ hiɛ.”—2 Korintobii 4:2.

Kadimɔ akɛ Paulo tsĩ subaŋi komɛi ni kɔɔ Kristofoi asɔɔmɔ nitsumɔ lɛ he lɛ atã. Te aaafee tɛŋŋ ni Kristofonyo sɔɔlɔ aaasɔmɔ mɛi krokomɛi, kɛji enifeemɔi jeee nibii ni ja gbɛ, kɛ́ ejeee mɔ ni hiɛɔ emuuyeli mli? Ireland jamɔ kuu ko hiɛnyiɛlɔ, ni ŋmɛɛ enitsumɔ he nyɛsɛɛ nɛɛ nɔŋŋ lɛ feɔ oti nɛɛ he nɔkwɛmɔ nɔ jogbaŋŋ diɛŋtsɛ. Ekpɛlɛ nɔ akɛ “eŋmɛ osɔfo ko ni kɛ gbekɛbii naa bɔlɛ lɛ gbɛ ni etee nɔ ekɛ gbekɛbii tsu nii aahu, yɛ be mli ni bɔlɛnamɔ mli niseniianii ni efeɔ gbekɛbii lɛ ebaje kpo faŋŋ lɛ sɛɛ be kakadaŋŋ,” taakɛ The Independent adafitswaa wolo lɛ wie lɛ. Sane lɛ tsɔɔ mli akɛ niseniianiifeemɔ lɛ tee nɔ aahu fe afii 24. Awo osɔfo lɛ tsuŋ afii ejwɛ, shi susumɔ amanehulu ni ekɛba gbekɛbii ni efee amɛ niseniianii lɛ anɔ yɛ nakai afii lɛ amli, yɛ jeŋba mli emuuyeli ni enɔkwɛlɔ lɛ naaa ni ekɛaatsu efɔŋ nɛɛ he nii lɛ hewɔ lɛ he okwɛ!

Emuuyeli—Nyɔmɔwoi ni Jɛɔ Mli Baa

Bɔfo Yohane ji nuu ni sheee gbeyei. Hiɛdɔɔ ni naa wa tamɔ la ni amɛyɔɔ lɛ hewɔ lɛ, Yesu tsɛ́ ekɛ enyɛmi nuu Yakobo akɛ “nyɔŋmɔshiimɔ bii.” (Marko 3:17) Ákɛ nuu emuuyeli mlihiɛlɔ ni sa kadimɔ waa lɛ, Yohane fata Petro he ni etsɔɔ mli faŋŋ eha Yudafoi anɔyelɔi lɛ akɛ ‘enyɛŋ ekpa’ nibii ni ena kɛ nibii ni enu beni ekɛ Yesu nyiɛ lɛ ahe ‘wiemɔ.’ Yohane fata bɔfoi ni wie akɛ: “Esa akɛ aboɔ Nyɔŋmɔ moŋ toi fe gbɔmɛi” lɛ ahe.—Bɔfoi lɛ Asaji 4:19, 20; 5:27-32.

Etamɔ nɔ ni beni Yohane ebɛŋkɛ afii 90 lɛ naagbee gbɛ lɛ, atswa enaneshi tu kɛtee Patmos Ŋshɔkpɔ lɛ nɔ, “yɛ Nyɔŋmɔ wiemɔ lɛ kɛ Yesu Kristo he odaseyeli lɛ hewɔ.” (Kpojiemɔ 1:9) Afii abɔ ni eye lɛ hewɔ lɛ, ekolɛ esusu akɛ esɔɔmɔ nitsumɔ lɛ eba naagbee. Shi nuu ni hiɛɔ emuuyeli mli tamɔ lɛ pɛ ji mɔ ni abaanyɛ akɛ nitsumɔ awo edɛŋ ni eŋmala Kpojiemɔ ninaa ni yɔɔ miishɛɛ lɛ eshwie shi. Yohane ye anɔkwa yɛ nitsumɔ nɛɛ mli. Mɛɛ hegbɛ po eji kɛha lɛ nɛkɛ! Ni hegbɛi babaoo yɛ ni baaba lolo. Yɛ sɛɛ mli, beni eka shi faŋŋ akɛ eyɔɔ Efeso kpokpaa nɔ lɛ, eŋma e-Sanekpakpa lɛ kɛ woji etɛ. Kwɛ hegbɛi ni yɔɔ nyam ni ekɛgbe afii 70 ni ekɛsɔmɔ yɛ anɔkwayeli kɛ hekɛnɔfɔɔ mli lɛ fɛɛ naa!

Emuuyeli mlihiɛlɔ ni mɔ ko aaafee yɛ gbɛi fɛɛ nɔ lɛ kɛ tsui ni nyɔɔ mɔ mli babaoo baa. Ní mɔ ko aaafee mɔ ni akɛ hiɛ fɔɔ enɔ yɛ Nyɔŋmɔ hiɛ lɛ kɛ naanɔ nyɔmɔwoi baa. Ŋmɛnɛ, aafee “asafo babaoo,” ni ji anɔkwa jálɔi klalo kɛha jeŋ hee ni toiŋjɔlɛ kɛ gbeekpamɔ yɔɔ mli lɛ mlibotemɔ, kɛ naanɔ wala he gbɛkpamɔ. (Kpojiemɔ 7:9) Esa akɛ ahiɛ emuuyeli mli yɛ jeŋba kpakpa kɛ jamɔ he saji ni he hiaa lɛ amli, yɛ kaai ni baa kɛjɛɔ nibii agbɛjianɔtoo nɛɛ mli, kɛ jaramɔ shihilɛi ni ekolɛ Satan kɛaaba lɛ fɛɛ sɛɛ. Ná nɔmimaa akɛ obaanyɛ oye omanye, kɛtsɔ hewalɛ ni Yehowa kɛhaa lɛ nɔ!—Filipibii 4:13.

Beni ewieɔ ŋmɛnɛŋmɛnɛ beaŋ kɛ wɔsɛɛ be fɛɛ he lɛ, lalatsɛ David saa ema nɔ mi kɛha wɔ fɛɛ ekoŋŋ beni ewie yɛ shidaa sɔlemɔ mli kɛha Yehowa lɛ akɛ: “Ni mi lɛ, ohiɛ mimli yɛ mimuuyeli lɛ mli, ni okɛ mi edamɔ ohiɛ kɛmiiya naanɔ. Aaajie Yehowa . . . yi. . . . Amen, Amen.”—Lala 41:13, 14.

[Shishigbɛ niŋmai]

[Mfoniri ni yɔɔ baafa 4]

Yɛ etɔmɔi lɛ fɛɛ sɛɛ lɛ, David jie ehe kpo akɛ mɔ ni sa hekɛnɔfɔɔ

[Mfoniri ni yɔɔ baafa 5]

Yesu fee nɔkwɛmɔ nɔ ni hi fe fɛɛ efɔ̃ shi eha wɔ akɛ mɔ ni sa hekɛnɔfɔɔ

[Mfoniri ni yɔɔ baafa 7]

Kɛ oji mɔ ko ni sa hekɛnɔfɔɔ lɛ, ekɛ tsui ni nyɔɔ mɔ mli babaoo baa