Ŋwɛi La Shwieɔ Duŋ!
“Yehowa aaaha miduŋ lɛ mli atse.”—2 SAMUEL 22:29.
1. La kɔɔ shihilɛ loo wala he yɛ mɛɛ gbɛ nɔ?
“NI NYƆŊMƆ kɛɛ: ‘La aba!’ Ni la ba.” (1 Mose 1:3) Nibɔɔ he sane ni yɔɔ Mose Klɛŋklɛŋ Wolo lɛ mli lɛ kɛ nakai wiemɔi ni he hiaa lɛ haa aleɔ Yehowa akɛ la, ní kɛ jeee no lɛ wala nyɛŋ ahi shikpɔŋ nɔ lɛ jɛɛhe. Yehowa hu ji mumɔŋ la ní he hiaa kɛha wɔ gbɛtsɔɔmɔ yɛ shihilɛ mli lɛ jɛɛhe. (Lala 43:3) Maŋtsɛ David tsɔɔ tsakpaa ni bɛŋkɛ kpaakpa ni ka mumɔŋ la kɛ wala loo shihilɛ teŋ lɛ mli beni eŋma akɛ: “Ejaakɛ bo oŋɔɔ wala nubu yɔɔ; ola lɛ mli wɔnaa la yɛ.”—Lala 36:10.
2. Taakɛ Paulo tsɔɔ lɛ, la kɔɔ mɛni he kpaakpa?
2 Aaafee David beaŋ sɛɛ afii 1,000 lɛ, bɔfo Paulo wie nibɔɔ he sane lɛ he. Beni eŋmaa wolo eyaha Kristofoi asafo ni yɔɔ Korinto lɛ, ekɛɛ akɛ: “Ejaakɛ Nyɔŋmɔ ni kɛɛ akɛ la ajɛ duŋ mli akpɛ.” Kɛkɛ ni Paulo tsɔɔ akɛ mumɔŋ la kɔɔ nilee ni jɛ Yehowa ŋɔɔ lɛ he kpaakpa beni ekɛfata he akɛ: “Lɛ nɔŋŋ ekpɛ yɛ wɔtsuii amli hu, koni Nyɔŋmɔ anunyam he nilee lɛ akpɛ yɛ Yesu Kristo hiɛ.” (2 Korintobii 4:6) La nɛɛ baa wɔŋɔɔ yɛ mɛɛ gbɛ nɔ?
Biblia Lɛ—Gbɛɔ La Eshwãa
3. Mɛɛ la Yehowa tsɔɔ Biblia lɛ nɔ ekɛhaa?
3 Klɛŋklɛŋ lɛ, Yehowa kɛ mumɔŋ la tsɔɔ e-Wiemɔ ni jɛ mumɔŋ, ni ji Biblia lɛ nɔ ehaa. No hewɔ lɛ, yɛ be mli ni wɔkaseɔ Biblia lɛ ni wɔnine shɛɔ nilee ni jɛ Nyɔŋmɔ ŋɔɔ lɛ nɔ lɛ, belɛ wɔmiiha ela lɛ miikpɛ kɛmiiba wɔnɔ. Yehowa tsɔɔ Biblia lɛ nɔ ekpɛɔ la eshwieɔ eyiŋtoi anɔ, ni ekɛɔ wɔ gbɛ ni wɔɔtsɔ nɔ wɔfee esuɔmɔnaa nii. Enɛ haa yiŋtoo baa wɔshihilɛi amli ni eyeɔ ebuaa wɔ koni wɔnine ashɛ wɔmumɔŋ hiamɔ nii anɔ. (Jajelɔ 12:1; Mateo 5:3) Yesu ma nɔ mi akɛ esa akɛ wɔtsu wɔmumɔŋ hiamɔ nii ahe nii beni etsɛɔ wiemɔi kɛjɛɔ Mose Mla lɛ mli lɛ, ni ekɛɛ akɛ: “Aŋma akɛ: ‘Jeee aboloo kɛkɛ haa gbɔmɔ yi naa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.’”—Mateo 4:4; 5 Mose 8:3.
4. Yesu ji “je lɛ mli la lɛ” yɛ mɛɛ gbɛ nɔ?
4 Akɛ Yesu toɔ mumɔŋ la he kpaakpa. Yɛ anɔkwale mli lɛ, ewie lɛ diɛŋtsɛ ehe akɛ “je lɛ mli la lɛ,” ni ekɛɛ akɛ: “Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeená wala la lɛ.” (Yohane 8:12) Nɛkɛ wiemɔ nɛɛ yeɔ ebuaa wɔ ni wɔnaa nitsumɔ titri ni he hiaa ni akɛwo Yesu dɛŋ, ni ji Yehowa anɔkwale lɛ ni ekɛaaha adesai lɛ. Kɛji akɛ wɔɔkwa duŋ lɛ koni wɔnyiɛ yɛ Nyɔŋmɔ la lɛ mli lɛ, no lɛ esa akɛ wɔbo saji fɛɛ ni Yesu wieɔ lɛ toi ni wɔnyiɛ enɔkwɛmɔnɔ lɛ kɛ etsɔɔmɔi ni aŋmala ashwie shi yɛ Biblia lɛ mli lɛ sɛɛ kpaakpa.
5. Mɛɛ gbɛnaa nii bakã Yesu sɛɛnyiɛlɔi lɛ anɔ yɛ egbele sɛɛ?
5 Gbii fioo ko dani Yesu baagbo, ní ewieɔ lɛ diɛŋtsɛ ehe ekoŋŋ akɛ la lɛ, ekɛɛ ekaselɔi lɛ akɛ: “Be kukuoo kɛkɛ eshwɛ eha la lɛ yɛ nyɛteŋ. Gbii abɔ ni nyɛyɔɔ la lɛ nɛɛ, nyɛnyiɛa, koni duŋ akabanina nyɛ; shi mɔ ni nyiɛɔ duŋ mli lɛ, eleee he ni eyaa. Gbiiabɔ ni nyɛyɔɔ la lɛ nɛɛ, nyɛhea la lɛ nɔ nyɛyea, koni nyɛtsɔmɔ la bii.” (Yohane 12:35, 36) Mɛi ni batsɔmɔ la bii lɛ kase Biblia mli “tsamɔ wiemɔi” lɛ. (2 Timoteo 1:13, 14) Kɛkɛ ni amɛkɛ tsamɔ wiemɔi nɛɛ tsu nii koni amɛkɛgbala aŋkroaŋkroi ni yɔɔ tsuijurɔ lɛ kɛjɛ duŋ lɛ mli kɛba Nyɔŋmɔ la lɛ he.
6. Mɛɛ shishijee anɔkwale ko ni kɔɔ la kɛ duŋ he wɔnaa yɛ 1 Yohane 1:5?
6 Bɔfo Yohane ŋma akɛ: “Nyɔŋmɔ lɛ, la ji lɛ, ni duŋ ko bɛ emli kwraa.” (1 Yohane 1:5) Kadimɔ srɔtofeemɔ ni yɔɔ la kɛ duŋ teŋ lɛ yɛ biɛ. Mumɔŋ la baa kɛjɛɔ Yehowa ŋɔɔ, ni anyɛŋ akɛ mumɔŋ duŋ ko ato ehe kwraa. Belɛ namɔ ji duŋ lɛ jɛɛhe?
Mumɔŋ Duŋ—Ejɛɛhe
7. Namɔ hɔ mumɔŋ duŋ ni yɔɔ je lɛ mli lɛ sɛɛ, ni mɛɛ hewalɛ enáa yɛ mɛi anɔ?
7 Bɔfo Paulo wie ‘nibii agbɛjianɔtoo nɛɛ nyɔŋmɔ’ lɛ he. Ekɛ nakai wiemɔ lɛ miitsɔɔ Satan Abonsam. Etee nɔ ekɛɛ akɛ, nɛkɛ mɔ nɛɛ “eshwila mɛi ní heee yeee lɛ ajwɛŋmɔi lɛ, . . . koni Kristo, ni ji Nyɔŋmɔ subaŋ lɛ, anunyam sanekpakpa lɛ la ní tsoɔ lɛ akakpɛ́ miiha amɛ.” (2 Korintobii 4:4) Mɛi pii kɛɔ akɛ amɛheɔ Nyɔŋmɔ nɔ amɛyeɔ; ni kɛlɛ, amɛteŋ mɛi ni amɛyifalɛ yaa hiɛ lɛ heee yeee akɛ Abonsam yɛ. Mɛni hewɔ? Amɛsumɔɔɔ ni amɛkpɛlɛɔ nɔ akɛ efɔŋ ko, hewalɛ ko ni fe adesa nɔ̃ baanyɛ ahi shi, ni ákɛ enáa bɔ ni amɛsusuɔ saji ahe amɛhaa lɛ nɔ hewalɛ. Ni kɛlɛ, taakɛ Paulo tsɔɔ lɛ, Abonsam yɛ shihilɛ mli, ni enáa gbɔmɛi anɔ hewalɛ, ni enɛ haaa amɛnyɛ amɛna anɔkwale la lɛ. Anaa bɔ ni Satan yɔɔ hewalɛ ni ekɛnáa adesai asusumɔ nɔ hewalɛ lɛ yɛ bɔ ni atsɔɔ bɔ ni eji yɛ gbalɛ mli aha nɛɛ mli, akɛ, mɔ “ní shishiuɔ jeŋ muu lɛ fɛɛ lɛ.” (Kpojiemɔ 12:9) Yɛ Satan nitsumɔi lɛ ahewɔ lɛ, shihilɛ ni Yesaia gba lɛ kɔɔ adesai fɛɛ he agbɛnɛ, ja mɛi ni sɔmɔɔ Yehowa lɛ pɛ, akɛ: “Naa, duŋ hà shikpɔŋ lɛ nɔ, ni duŋ kpii hà majimaji lɛ anɔ.”—Yesaia 60:2.
8. Mɛɛ gbɛ̀i anɔ mɛi ni yɔɔ mumɔŋ duŋ mli lɛ tsɔɔ yɛ akɛ amɛjwɛŋmɔ efutu amɛ?
8 Kɛji akɛ duŋ ewo kpii lɛ, anyɛɛɛ ana nɔ ko nɔ ko. Ewaaa kwraa akɛ mɔ ko aaalaaje loo ejwɛŋmɔ aaafutu lɛ. Nakai nɔŋŋ hu mɛi ni yɔɔ mumɔŋ duŋ mli lɛ bɛ sɛɛyoomɔ ni etsɛɛɛ ni amɛyiŋ futuɔ yɛ mumɔŋ shishinumɔ naa. Amɛnyɛɛɛ amɛtsɔɔ srɔtofeemɔ ni yɔɔ anɔkwale kɛ apasa lɛ teŋ, ekpakpa kɛ efɔŋ mli. Gbalɔ Yesaia wie mɛi ni yɔɔ duŋ ni tamɔ nɛkɛ mli lɛ ahe beni eŋma akɛ: “Kpóo ha mɛi ni tsɛɔ efɔŋ akɛ ekpakpa kɛ ekpakpa hu akɛ efɔŋ! mɛi ni ŋɔɔ duŋ feɔ la, ní amɛŋɔɔ la hu amɛfeɔ duŋ, mɛi ni ŋɔɔ joomɔ feɔ ŋɔɔmɔ, ní amɛŋɔɔ ŋɔɔmɔ amɛfeɔ joomɔ lɛ!” (Yesaia 5:20) Satan Abonsam, ni ji duŋ mli nyɔŋmɔ lɛ miiná mɛi ni hiɔ mumɔŋ duŋ mli lɛ anɔ hewalɛ, ni yɛ enɛ hewɔ lɛ amɛtsi amɛhe kɛjɛ la kɛ wala jɛɛhe lɛ he.—Efesobii 4:17-19.
Kɛjɛ Duŋ Mli Kɛmiiya La Mli—Kaa Lɛ
9. Tsɔɔmɔ bɔ ni efɔŋfeelɔi kɛ duŋ diɛŋtsɛ kɛ mumɔŋ duŋ bɔɔ naanyo lɛ mli.
9 Hiob anɔkwafo lɛ tsɔɔ ekomefeemɔ ni kã efɔŋfeelɔi kɛ duŋ diɛŋtsɛ teŋ lɛ beni ekɛɛ akɛ: “Ni gbalafitelɔ hu hiŋmɛi kwɛɔ hiɛbulɛ gbɛ, ekɛɔ akɛ: Hiŋmɛi ko enaaa mi! ni ekɛ nɔhaa nɔ hu hàa ehiɛ.” (Hiob 24:15) Efɔŋfeelɔi hu yɛ mumɔŋ duŋ mli, ni duŋ ni tamɔ nɛkɛ mli wa waa diɛŋtsɛ. Bɔfo Paulo kɛɛ akɛ, bɔlɛnamɔ mli jeŋba shara, juu, hiɛjoomɔ, dãatɔɔ, mɛi ajɛmɔ, kɛ ojotswaa egbɛ eshwã mɛi ni nakai duŋ lɛ edu amɛ lɛ ateŋ. Shi mɔ fɛɛ mɔ ni tsiɔ ebɛŋkɛɔ Nyɔŋmɔ Wiemɔ lɛ mli la lɛ he lɛ baanyɛ atsake. Ákɛ tsakemɔ ni tamɔ nɛkɛ baanyɛ aba lɛ, Paulo fee enɛ faŋŋ yɛ ewolo ni eŋma ehaya Korintobii lɛ mli. Tsutsu lɛ, Kristofoi ni yɔɔ Korinto lɛ ateŋ mɛi pii kɛ amɛhe woɔ duŋ nitsumɔi lɛ amli, ni kɛlɛ Paulo kɛɛ amɛ akɛ: “Shi agbɛnɛ aju nyɛhe, ni asaŋ atsuu nyɛhe, ni abu nyɛ bem hu yɛ Nuntsɔ Yesu gbɛi kɛ wɔ-Nyɔŋmɔ lɛ Mumɔ lɛ mli.”—1 Korintobii 6:9-11.
10, 11. (a) Yesu jie mɔ he susumɔ kpo kɛha nuu ni etsa ehiŋmɛii lɛ yɛ mɛɛ gbɛ nɔ? (b) Mɛni hewɔ mɛi pii halaaa la lɛ?
10 Kɛji akɛ mɔ ko fã kpo kɛjɛ duŋ kabitii mli kɛba la hiɛ lɛ, eheɔ be fioo dani ehiŋmɛii baanyɛ ana nii jogbaŋŋ. Yesu tsa shwilafo ko yɛ Betsaida, shi efee lɛ fiofio. “Ni emɔ shwilafo lɛ nine shi, ni ekɛ lɛ je ma lɛŋ, ni etsɛ̃ lajɔ eshwie ehiŋmɛii lɛ anɔ, ni eŋɔ eniji eshwie enɔ, ni ebi lɛ akɛ eena nii lo? Ni egbele ehiŋmɛii lɛ ni ekɛɛ: Minaa gbɔmɛi tamɔ tsei ni nyiɛɔ. No sɛɛ lɛ esaa eŋɔ eniji eshwie ehiŋmɛii lɛ anɔ ekoŋŋ, ni eha egbele ehiŋmɛii lɛ, ni atsa lɛ, ni ena nii fɛɛ pɛpɛɛpɛ.” (Marko 8:23-25) Eyɛ faŋŋ akɛ Yesu tsa nuu lɛ hiŋmɛii lɛ fiofio bɔni afee ni nuu lɛ anyɛ adamɔ hulu la ni kpɛɔ lɛ naa. Wɔbaanyɛ wɔsusu miishɛɛ ni nakai nuu lɛ ná beni enyɛ ena nii lɛ he.
11 Shi kɛlɛ, miishɛɛ ni mɛi ni ayeɔ abuaa amɛ ni amɛfã kpo fiofio kɛjɛ mumɔŋ duŋ lɛ mli kɛba anɔkwale la lɛ he lɛ náa lɛ fe miishɛɛ ni nuu lɛ ná lɛ kwraa. Kɛji akɛ wɔna miishɛɛ ni amɛyɔɔ lɛ, ekolɛ wɔnaa baanyɛ akpɛ wɔhe yɛ nɔ hewɔ ni mɛi babaoo baaa la lɛ he lɛ. Yesu tsɔɔ yiŋtoo lɛ: “Shi kojomɔ lɛ nɛ, akɛ la lɛ eba je lɛ mli, ni gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ efɔji ni. Ejaakɛ mɔ fɛɛ mɔ ni tsuɔ nifɔjianii lɛ nyɛɔ la lɛ, ni ebaaa la lɛ he, koni akakã enitsumɔi lɛ.” (Yohane 3:19, 20) Hɛɛ, mɛi pii sumɔɔ ni amɛtsu “nifɔjianii”—tamɔ jeŋba shara, nɔnyɛɛ, amale, ojotswaa, kɛ juu—ni Satan mumɔŋ duŋ lɛ ji shihilɛ ni yeɔ emuu kɛha amɛ koni amɛfee nɔ ni amɛsumɔɔ.
Nɔyaa ni Anáa yɛ La lɛ Mli
12. La lɛ mli ni wɔba lɛ he eba sɛɛnamɔ kɛha wɔ yɛ mɛɛ gbɛ̀i anɔ?
12 Kɛjɛ be mli ni wɔbaná la lɛ he nilee nɛɛ, mɛɛ tsakemɔi wɔna yɛ wɔ diɛŋtsɛ wɔmli? Yɛ bei komɛi amli lɛ, ehi akɛ wɔɔfo wɔsɛɛ ni atao loo wɔkai mumɔŋ nɔyaa ni wɔná lɛ. Mɛɛ subaŋi gbohii wɔjie yɛ wɔhe wɔshɛrɛ wɔshwie? Mɛɛ wɔshihilɛ mli naagbai wɔjaje? Wɔ gbɛjianɔtoo kɛha wɔsɛɛ be etsake yɛ mɛɛ gbɛ nɔ? Yɛ Yehowa hewalɛ mli kɛ emumɔ krɔŋkrɔŋ lɛ yelikɛbuamɔ naa lɛ, wɔbaanyɛ wɔya nɔ wɔfee tsakemɔi yɛ wɔ subaŋ kɛ bɔ ni wɔsusuɔ nii ahe wɔhaa lɛ mli koni etsɔɔ akɛ wɔmiikpɛlɛ la lɛ nɔ. (Efesobii 4:23, 24) Paulo wie he yɛ nɛkɛ gbɛ nɔ akɛ: “Ejaakɛ sá lɛ duŋ ji nyɛ, shi agbɛnɛ lɛ nyɛtsɔmɔ la yɛ Nuntsɔ lɛ mli; belɛ nyɛnyiɛa tamɔ la bii. Ejaakɛ la lɛ yibii ji mlihilɛ kɛ jalɛ kɛ anɔkwale fɛɛ.” (Efesobii 5:8, 9) Gbɛ ni wɔŋmɛɔ koni Yehowa la lɛ atsɔɔ wɔ gbɛ lɛ haa wɔnáa hiɛnɔkamɔ kɛ yiŋtoo, ni ehaa mɛi ni ebɔle wɔ lɛ ashihilɛ feɔ nɔ ni yɔɔ miishɛɛ. Ni kwɛ bɔ ni Yehowa tsui nyaa babaoo yɛ nɛkɛ tsakemɔi ni wɔfeɔ nɛɛ hewɔ!—Abɛi 27:11.
13. Te wɔɔfee tɛŋŋ wɔjie wɔ shidaa kpo wɔha Yehowa la lɛ, ni mɛni he hiaa kɛha nifeemɔ ni tamɔ nɛkɛ?
13 Wɔjieɔ wɔ shidaa kpo kɛhaa miishɛɛ shihilɛ ni wɔnáa mli ŋɔɔmɔ lɛ kɛtsɔ Yehowa la lɛ ni wɔjieɔ lɛ kpo—ni ji nɔ ni wɔkase kɛjɛ Biblia lɛ mli lɛ ni wɔgbaa wɔ weku lɛ mli bii, nanemɛi, kɛ akutseiaŋbii lɛ nɔ. (Mateo 5:12-16; 24:14) Kɛha mɛi ni kpooɔ akɛ amɛaabo toi lɛ, wɔshiɛmɔ lɛ kɛ wɔ Kristofoi ashihilɛ gbɛ kpakpa ní nɔ bɛ lɛ bafeɔ kãmɔ kɛhaa amɛ. Paulo tsɔɔ mli akɛ: “Nɔ fɛɛ nɔ lɛ nyɛkaa nyɛkwɛa akɛ esa Nuntsɔ lɛ hiɛ lo; ni nyɛkɛ duŋ nitsumɔi lɛ ní wooo yibii lɛ akabɔa, shi moŋ nyɛkãa amɛ.” (Efesobii 5:10, 11) Mɛi krokomɛi ni ayeɔ abuaa amɛ koni amɛkpoo duŋ lɛ ni amɛhala la lɛ biɔ ekãafeemɔ yɛ wɔgbɛfaŋ. Nɔ ni he hiaa waa lɛ, ebiɔ musuŋtsɔlɛ kɛ mɛi krokomɛi ahesusumɔ, kɛ bɔ ni ashweɔ kɛjɛɔ tsui mli akɛ aaagba anɔkwale la lɛ he sane atsɔɔ amɛ kɛha amɛ naanɔ sɛɛnamɔ.—Mateo 28:19, 20.
Ohiɛ Ahi Ohe Nɔ yɛ Lai ni Akɛlakaa Mɛi lɛ Ahe!
14. Yɛ la sane lɛ gbɛfaŋ lɛ, mɛɛ kɔkɔbɔɔ esa akɛ wɔbo toi?
14 Kɛha mɛi ni yɔɔ ŋshɔ hiɛ yɛ beni duŋ ewo mli lɛ, la fɛɛ la bafeɔ nɔ ni asumɔɔ waa. Yɛ blema lɛ, ashɛreɔ la yɛ England tɛsaai anɔ koni akɛtsɔɔ he ni abaaná abobaahe yɛ ahum naa. Ni amlakui daa shi akɛ nɛkɛ lai nɛɛ kudɔɔ amɛ kɛyaa lɛjiadaamɔhei ni yɔɔ shweshweeshwe. Shi lai komɛi ji apasa lai ni tsɔɔ mɔ tsɔne. Yɛ nɔ najiaŋ ni amɛaaná lɛjiadaamɔhe lɛ, alaka ŋshɔ hiɛ lɛji babaoo ni amɛyasha shi yɛ ŋshɔnaa ni mli eyi obɔ kɛ tɛsaai, ni aju amɛ lɛji lɛ amli jatsui lɛ fɛɛ. Esa akɛ wɔkwɛ jogbaŋŋ yɛ jeŋ ni lakaa mɔ nɛɛ mli koni akɛ apasa lai ni baanyɛ alaka wɔ akagbala wɔ kɛmiiya mumɔŋ lɛlɛ shishamɔ mli. Akɛɛ wɔ akɛ, “Satan diɛŋtsɛ tsakeɔ ehe etsɔɔ la bɔfo.” Nakai nɔŋŋ hu etsuji ni hemɔkɛyeli kwalɔi fata he lɛ ji “nitsulɔi shishiulɔi” ni “tsakeɔ amɛhe feɔ tamɔ jalɛ sɔɔlɔi.” Kɛji akɛ wɔnya gbɔmɛi ni tamɔ nɛkɛ lɛ apasa susumɔi lɛ ahe lɛ, hekɛnɔfɔɔ ni wɔyɔɔ yɛ Yehowa anɔkwale Wiemɔ, ni ji Biblia lɛ mli lɛ baanyɛ agbɔjɔ, ni wɔbaaŋmɛɛ wɔ hemɔkɛyeli lɛ he.—2 Korintobii 11:13-15; 1 Timoteo 1:19.
15. Mɛni baaye abua wɔ koni wɔhi gbɛ ni kɛ mɔ yaa wala mli lɛ nɔ?
15 Lalatsɛ lɛ ŋma akɛ: “Owiemɔ lɛ ji kane ha minane kɛ la hu yɛ mitempɔŋ lɛ nɔ.” (Lala 119:105) Hɛɛ, wɔ suɔmɔ Nyɔŋmɔ lɛ, ni ji Yehowa, ni “sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli” lɛ ekpɛ la eshwie ‘gbɛ ni etsa ni kɛ mɔ yaa wala mli lɛ’ nɔ. (Mateo 7:14; 1 Timoteo 2:4) Biblia mli akpɔi baabu wɔhe koni wɔkakpalaŋ kɛmiijɛ nakai gbɛ ni nɔ etsa lɛ nɔ ní wɔyanyiɛ duŋ gbɛ̀i anɔ. Paulo ŋma akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ.” (2 Timoteo 3:16) Yɛ be mli ni wɔdaraa yɛ mumɔŋ lɛ, Nyɔŋmɔ wiemɔ lɛ tsɔɔ wɔ nii. Wɔbaanyɛ wɔdamɔ Nyɔŋmɔ Wiemɔ lɛ mli la lɛ nɔ wɔkã wɔ diɛŋtsɛ wɔhe, aloo kɛ ehe miihia lɛ, tookwɛlɔi ni yɔɔ suɔmɔ ni yɔɔ asafo lɛ mli lɛ akã wɔ. Nakai nɔŋŋ hu wɔbaanyɛ wɔjaje nibii ni wɔkɛ heshibaa akpɛlɛ tsɔsemɔ yɛ jalɛ mli koni wɔha wɔnaji ahi gbɛ ni kɛ mɔ yaa wala mli lɛ nɔ.
Wɔkɛ Hiɛsɔɔ Anyiɛ yɛ La lɛ Mli
16. Te wɔɔfee tɛŋŋ wɔjie hiɛsɔɔ kpo wɔha Yehowa gbɛjianɔtoo ni yɔɔ naakpɛɛ ni ji la lɛ?
16 Te wɔɔfee tɛŋŋ wɔjie hiɛsɔɔ kpo wɔha la ni Yehowa to he gbɛjianɔ fɛfɛo kɛha wɔ lɛ? Yohane yitso 9 kɛɔ wɔ akɛ, beni Yesu tsa nuu ko ni afɔ lɛ shwilafo lɛ, nɔ ko kanya nuu lɛ ni ejie ehiɛsɔɔ kpo. Yɛ mɛɛ gbɛ nɔ? Ehe Yesu eye akɛ Nyɔŋmɔ Bi, ni eha ale yɛ faŋŋ akɛ “gbalɔ” ji lɛ. Agbɛnɛ hu, ekɛ ekãa wie eshi mɛi ni bɔ mɔdɛŋ akɛ amɛaabu Yesu naakpɛɛ nii lɛ akɛ nɔ ko bibioo lɛ. (Yohane 9:17, 30-34) Bɔfo Petro tsɛ Kristofoi asafo lɛ mli bii ni afɔ amɛ mu lɛ akɛ “maŋ ni eŋɔfee enɔ̃.” Mɛni hewɔ? Ejaakɛ amɛyɛ shidaa su ni nuu ni afɔ lɛ shwilafo ni atsa lɛ lɛ yɔɔ lɛ nɔŋŋ eko. Amɛjieɔ hiɛsɔɔ kpo amɛtsɔɔ Yehowa, amɛ Ejurɔfeelɔ lɛ, ‘koni amɛjaje mɔ ni tsɛ́ amɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ’ amɛtsɔɔ. (1 Petro 2:9; Kolosebii 1:13) Mɛi ni yɔɔ shikpɔŋ nɔ hiɛnɔkamɔ lɛ hiɛ nakai shidaa su lɛ nɔŋŋ, ni amɛfiɔ amɛ nyɛmimɛi ni afɔ amɛ mu lɛ asɛɛ yɛ Yehowa “agbojee” ni amɛjajeɔ yɛ faŋŋ mli lɛ mli. Mɛɛ hegbɛ ni nɔ bɛ po Nyɔŋmɔ kɛhaa adesai ni yeee emuu lɛ nɛkɛ!
17, 18. (a) Mɛɛ gbɛnaa nii ni kã aŋkroaŋkro fɛɛ nɔ? (b) Yɛ Timoteo kasemɔ mli lɛ, aawo Kristofonyo fɛɛ Kristofonyo hewalɛ ni ekwa mɛni?
17 Tsuiŋ hiɛsɔɔ ni wɔɔná wɔha anɔkwale lɛ la lɛ he hiaa diɛŋtsɛ. Kaimɔ akɛ, afɔɔɔ wɔteŋ mɔ ko akɛ mɔ ni le anɔkwale lɛ momo. Mɛi komɛi kaseɔ beni amɛdara, ni oya nɔŋŋ ni amɛnaa bɔ ni la lɛ nɔ kwɔ kwraa fe duŋ lɛ. Mɛi krokomɛi ná hegbɛ kpele ákɛ fɔlɔi ni sheɔ Nyɔŋmɔ gbeyei tsɔse amɛ. Kɛha mɛi ni tamɔ nakai lɛ, ewaŋ kɛhaŋ amɛ akɛ amɛaabu la lɛ akɛ nɔ ko ni he ehiaaa tsɔ. Odasefonyo ko ni efɔlɔi miisɔmɔ Yehowa dani afɔ lɛ lɛ kpɛlɛɔ nɔ akɛ, ehe lɛ be kɛ mɔdɛŋbɔɔ babaoo dani enu nɔ ni anɔkwalei ni atsɔɔ lɛ kɛjɛ egbekɛbiiashi lɛ kɛ nɔ ni amɛdamɔ shi kɛha diɛŋtsɛ ji lɛ shishi. (2 Timoteo 3:15) Gbekɛbii jio, onukpai jio, ehe miihia ni wɔteŋ mɔ fɛɛ mɔ aná hiɛsɔɔ ni mli kwɔ wɔha anɔkwale lɛ ni Yehowa ejie lɛ kpo lɛ.
18 Atsɔɔ oblanyo fioo Timoteo “ŋmalɛi krɔŋkrɔŋi lɛ” kɛjɛ egbekɛbiiashi, shi ehiɛ ni lɛ diɛŋtsɛ emia yɛ esɔɔmɔ nitsumɔ lɛ mli lɛ ji nɔ ni ha eda akɛ Kristofonyo. (2 Timoteo 3:15) Ebafee mɔ ni baanyɛ aye abua bɔfo Paulo, ni wo lɛ ŋaa nɛkɛ lɛ, akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.” Eba akɛ wɔ fɛɛ, taakɛ Timoteo ji lɛ, wɔɔkwa nii ni baaha wɔhiɛ agbo—aloo aha Yehowa hiɛ agbo yɛ wɔhe lɛ feemɔ!—2 Timoteo 2:15.
19. (a) Taakɛ David ji lɛ, wɔ fɛɛ wɔyɛ yiŋtoo ni wɔɔdamɔ nɔ wɔkɛɛ mɛni? (b) Mɛni abaasusu he yɛ nikasemɔ ni nyiɛ sɛɛ lɛ mli?
19 Wɔyɛ nɔ fɛɛ nɔ ni wɔɔdamɔ nɔ wɔjie Yehowa, ni ha wɔ anɔkwale lɛ la lɛ yi. Taakɛ Maŋtsɛ David ji lɛ, wɔkɛɔ akɛ: “Ejaakɛ bo ji mikane, Yehowa, ni Yehowa aaaha miduŋ lɛ mli atse.” (2 Samuel 22:29) Ni kɛlɛ, wɔsumɔŋ ni wɔhi shi ogbɔjɔ, ejaakɛ enɛ baanyɛ aha wɔshane kɛya duŋ ni ajie wɔ kɛjɛ mli lɛ mli ekoŋŋ. No hewɔ lɛ, nikasemɔ ni nyiɛ sɛɛ lɛ baaye abua wɔ ni wɔŋmɛ bɔ ni wɔbuɔ Biblia mli anɔkwale lɛ akɛ ehe hiaa yɛ wɔshihilɛ mli lɛ wɔkwɛ.
Mɛni Okase?
• Yehowa kɛ mumɔŋ hiɛtɛjemɔ haa yɛ mɛɛ gbɛ nɔ?
• Mɛɛ kaa mumɔŋ duŋ ni ebɔle wɔ lɛ kɛbaa?
• Mɛɛ osharai esa akɛ wɔkwa?
• Te wɔɔfee tɛŋŋ wɔjie wɔ shidaa yɛ anɔkwale la lɛ he lɛ kpo?
[Mfoniri ni yɔɔ baafa 8]
Yehowa ji la diɛŋtsɛ kɛ mumɔŋ la fɛɛ jɛɛhe
[Mfoniri ni yɔɔ baafa 10]
Bɔ ni Yesuu tsá nuu shwilafo ko fiofio lɛ, nakai nɔŋŋ eyeɔ ebuaa wɔ koni wɔfã kpo kɛjɛ mumɔŋ duŋ mli
[Mfoniri ni yɔɔ baafa 11]
Satan apasa lai ni aaalaka mɔ ko lɛ kɛ mumɔŋ lɛlɛ shishamɔ baa