Miishɛjemɔ Kɛha Emuuyeli Mli Hiɛlɔi
“Ohiɛ mimli yɛ mimuuyeli lɛ hewɔ.”—LALA 41:12. NW.
1. Mɛni hewɔ miishɛjemɔ he hiaa Yehowa webii lɛ?
MIISHƐJEMƆ he miihia Yehowa emuuyeli mli hiɛlɔi odasefoi lɛ, ejaakɛ, amɛji mɛi ni awaa amɛyi. Shi, esa akɛ amɛkpa kaai ni tamɔ nɛkɛ gbɛ, ejaakɛ Yesu Kristo kɛɛ esɛɛnyiɛlɔi lɛ akɛ: “Nyɔŋ efeee enuŋtsɔ. Kɛ́ amɛwa mi yi lɛ, amɛaawa nyɛ hu yi.” (Yohane 15:20) Amrɔ nɛɛ titri ji be mli ni miishɛjemɔ he hiaa Yehowa webii. Mɛni hewɔ? Ejaakɛ shishijee emuuyeli mlikulɔ, Satan Abonsam lɛ, áshɛ lɛ afɔ shikpɔŋ nɛɛ nɔ, ni ebe ni eshwɛ lɛ faaa dɔŋŋ. No hewɔ lɛ, eebɔ enaagbee mɔdɛŋ akɛ mɔ ni wuɔ shiɔ Nyɔŋmɔ kɛ E-tsuji lɛ.—Kpojiemɔ 12:7-9, 17.
2. Te Kristofoi nuɔ amanehulu ni baa amɛnanemɛi heyelilɔi lɛ anɔ lɛ he amɛhaa tɛŋŋ?
2 Ákɛ Yehowa tsuji lɛ, wɔkɛ hiɛdɔɔ sɔleɔ waa wɔhaa wɔnyɛmimɛi hii kɛ yei ni sɔmɔɔ yɛ naatsii shishi aloo awoɔ amɛhe gbeyei, ni yiwalɔi feɔ amɛ niseniianii lɛ. (Bɔfoi lɛ Asaji 12:1; 2 Tesalonikabii 1:4) Wɔjieɔ Kristofoi ni kɛ anɔkwayeli ŋmɛɔ amɛtsui shi yɛ ahorabɔɔ ni jɛɔ hemɔkɛyeli kwalɔi kɛ mɛi krokomɛi adɛŋ baa amɛnɔ lɛ ayi. (Mateo 5:11) Wɔkɛ suɔmɔ susuɔ wɔnanemɛi heyelilɔi ni amɛwekumɛi teɔ shi woɔ amɛ waa aloo amɛhiɔ shiai ni jamɔi egbala mli lɛ amli lɛ ahe. (Mateo 10:34-36) Wɔkɛ musuŋtsɔlɛ naa emuuyeli mli hiɛlɔi ni naa amanehulu yɛ heloo mli gbɔjɔmɔi kɛ helai ni sɛɛ tsɛɔ lɛ amɔbɔ. Shi mɛni hewɔ nɔnaa babaoo nɛkɛ? Ni mɛɛ miishɛjemɔ yɔɔ kɛha hii kɛ yei ni hiɛ amɛ emuuyeli mli lɛ?
Kaimɔ Yiŋtoo Lɛ Kɛ Abobaa He Lɛ
3. Satan kɛ yiwaa tsuɔ nii ni ekɛbɔɔ mɔdɛŋ ni efee mɛni?
3 Kɛ eji nɔ ni tsɔɔ adesai aloo daimonioi anɔ lɛ, nɔ ni Abonsam taoɔ ni efee ji ni ‘emi’ Kristofoi. (1 Petro 5:8) Hɛɛ, Satan kɛ yiwaa kɛ naagbai krokomɛi tsuɔ nii koni ekɛfite wekukpaa ni ka wɔkɛ Yehowa Nyɔŋmɔ teŋ lɛ, koni eha wɔtsɔmɔ emuuyeli mli kulɔi ni yeee anɔkwale. Shi yɛ enɛɛmɛi fɛɛ mli lɛ, ani wɔbɛ nɔ ko kwraa ni buɔ wɔhe? Wɔyɛ eko diɛŋtsɛ!
4. Kɛ́ emuuyeli mli hiɛlɔi kɛ yiwaa kɛ haomɔi krokomɛi miikpe lɛ, amɛbaanyɛ amɛna nɔmimaa yɛ mɛni he?
4 Kɛ́ wɔtsɔ sɔlemɔ nɔ wɔtao eyelikɛbuamɔ lɛ, Yehowa baafee wɔ Abobaa he. Beni yiwaa kɛ haomɔi krokomɛi baa wɔ nɔ lɛ, wɔbaanyɛ wɔkpa lɛ fai taakɛ lalatsɛ David fee lɛ: “Naami mɔbɔ, Nyɔŋmɔ, naami mɔbɔ! Ejaakɛ bɔ abo misusuma baa nɛɛ, ni ofiji ashishi hɔɔŋ lɛ mli mibaa abo yɛ kɛyashi beyinɔ ni nɛkɛ osharai nɛɛ aaaho.” (Lala 57:2) Ákɛ emuuyeli mli hiɛlɔi lɛ, wɔbaanyɛ wɔna nɔmimaa akɛ yɛ be ni sa mli lɛ, kpɔmɔ baajɛ Yehowa, wɔ Abobaahe lɛ Ŋɔɔ aba. Ni wɔbaanyɛ wɔna hekɛnɔfɔɔ tamɔ David yɛ be mli ni ekɛɛ Nyɔŋmɔ yɛ sɔlemɔ mli akɛ: “Ni mi lɛ, ohiɛ yɛ mimuuyeli lɛ mli, ni okɛmi edamɔ ohiɛ kɛmiiya naanɔ” lɛ.—Lala 41:12.
5. Mɛɛ su ji nɔ ni he hiaa Kristofoi ni awaa amɛyi lɛ, ni mɛɛ hiɛnɔkamɔ wɔyɔɔ?
5 Akɛni amanehului baahi shi kɛyashi be ko hewɔ lɛ, ehe miihia ni wɔkase tsuishiŋmɛɛ. Bɔfo Paulo wo Hebri Kristofoi lɛ hewalɛ akɛ “nyɛkaia klɛŋklɛŋ gbii lɛ . . . bɔ ni nyɛmia nyɛhiɛ yɛ amanehului ata babaoo mli” lɛ. Eŋma hu akɛ: “Tsuishiŋmɛɛ he miihia nyɛ, bɔni afee ni yɛ be mli ni nyɛfee Nyɔŋmɔ suɔmɔnaa nii lɛ, nyɛnine ashɛ shiwoo lɛ mlibaa nɔ.” (Hebribii 10:32-36) Kɛha Kristofoi ni afɔ amɛ mu lɛ, Nyɔŋmɔ shiwoo lɛ mlibaa kɛ naanɔ wala jweremɔ nɔ yɛ ŋwɛi baaba abaha amɛ. Shi kɛha “asafo babaoo” lɛ, wala gbɛkpamɔ yɛ shikpɔŋ nɔ paradeiso lɛ yɛ kɛha amɛ. (Kpojiemɔ 7:9; Luka 23:43) Yɛ anɔkwale mli lɛ, kpɔmɔ kɛmiiya naanɔ wala mli yɛ kɛha mɛi fɛɛ ni baaŋmɛ amɛtsui shi kɛyashi naagbee akɛ emuuyeli mli hiɛlɔi lɛ.—Marko 13:13.
6. Mɛni hewɔ tsuishiŋmɛɛ krɛdɛɛ he hiaa Yehowa Odasefoi lɛ ateŋ mɛi komɛi lɛ, ni mɛɛ yelikɛbuamɔi amɛyɔɔ?
6 ‘Tsuishiŋmɛɛ he ebahia’ Yehowa Odasefoi, afii nyɔŋma nyɔŋmai abɔ nɛ, yɛ shikpɔji komɛi anɔ. Mɛni hewɔ? Ejaakɛ ehe ebahia ni amɛtsu amɛsɔɔmɔ krɔŋkrɔŋ lɛ he nii yɛ shikpɔŋkuku ni mli wa nɔ, aloo yɛ naagbai babaoo mli, ni nitsumɔ lɛ naa ni nɔyeli lɛ etsi hu fata he. Ekolɛ bo diɛŋtsɛ hu oŋmɛ otsui shi yɛ gbɔmɔtsoŋ hewalɛ ni obɛ loo shitee kɛ woo ni weku lɛ kɛbaa onɔ yɛ o-Kristofoi anitsumɔi lɛ asɛɛdii mli lɛ hewɔ. Nɛkɛ kaai nɛɛ baaha mɛi ni kɛ amɛhe fɔɔ adesa hewalɛ nɔ kɛkɛ lɛ akpa, shi enɛ haaa Yehowa Odasefoi akpa nitsumɔ, ejaakɛ amɛ “yelikɛbuamɔ jɛɔ Yehowa, mɔ ni fee ŋwɛi kɛ shikpɔŋ lɛ ŋɔɔ.”—Lala 121:1-3.
7. (a) Kaai ni yaa nɔ lɛ haa wɔnaa hegbɛ wɔfeɔ mɛni? (b) Mɛni hewɔ wɔbaanyɛ wɔhe nɔ ni Paulo wie yɛ Filipibii 4:13 lɛ wɔye?
7 Shihilɛi komɛi yɛ ni esa akɛ aŋmɛ tsui shi yɛ mli aahu kɛyashi nibii agbɛjianɔtoo nɛɛ naagbee. Shi kaai ni baa wɔnɔ lɛ haa wɔnaa hegbɛ ni wɔtsɔɔ bɔ ni wɔhiɛɔ wɔ emuuyeli mli wɔhaa Nyɔŋmɔ ni wɔhaa etsui hu nyaa. (Abɛi 27:11) Yɛ nakai beaŋ nɔŋŋ lɛ, Yehowa kɛ hewalɛ ni he baahia koni wɔŋmɛ wɔtsui shi yɛ anɔkwayeli mli lɛ haa. Bɔfo Paulo ŋma akɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.” (Filipibii 4:13) Obaanyɛ ohe nakai wiemɔi ni shɛjeɔ wɔmii lɛ oye, ejaakɛ eeba mli nakai yɛ “nyɛmimɛi ni yɔɔ je lɛŋ” lɛ fɛɛ nɔ.—1 Petro 5:9, 10.
Emuuyeli Mli Hiɛlɔi Woɔ Wɔ Hewalɛ
8. Feemɔ bɔ ni abaanyɛ ajɔɔ emuu mli hiɛlɔi ni yɔɔ shiai ni mli egbala lɛ amli lɛ he mfoniri.
8 Kɛ wɔna bɔ ni ‘wɔnyɛmimɛi anaanyobɔɔ muu lɛ fɛɛ ni yɔɔ je lɛŋ lɛ’ hiɛɔ amɛ emuuyeli mli lɛ, ebatsɔɔ hewalɛ jɛɛhe kpeteŋkpele kɛhaa wɔ. Awo amɛteŋ mɛi komɛi nyɔmɔ babaoo yɛ emuuyeli mli ni amɛhiɛ amɛha Yehowa yɛ shiai ni mli egbala amli lɛ hewɔ. Akɛ nɔkwɛmɔ nɔ lɛ, beni akɛ Katolek yoo ko je Biblia mli nikasemɔ shishi yɛ Ireland lɛ, ewu te shi wo lɛ waa ni ewo ehe gbeyei akɛ ekɛ lɛ baatse gbala mli. Shi kɛlɛ, etee nɔ ekase nii, ni gbi ko lɛ ekɛ wolo, Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ ekome ha lɛ. Bɔ ni wolo lɛ mli ka shi faŋŋ, ewieɔ saji pɔtɛɛ ahe, kɛ emli mfonirii fɛfɛji lɛ ha enaakpɛ ehe. Etsɛɛɛ ni ewu lɛ bɔi Biblia lɛ kasemɔ kɛ nɛkɛ wolo nɛɛ. Ekpa zigarɛt shɛremɔ, etsɛɛɛ ni mɛi enyɔ nɛɛ shi Katolek Sɔlemɔ lɛ ni amɛkpata amɛ mfonirii ni amɛkɛɛ eji krɔŋkrɔŋ lɛ fɛɛ hiɛ. Etsɛɛɛ ni abaptisi yoo lɛ ni ekɛ ehe woɔ gbɛgbalɔi awamɔ nitsumɔ lɛ mli, no mli lɛ ewu lɛ hu miishwere fɛfɛo yɛ sɔɔmɔ nitsumɔ lɛ mli. Nɛkɛ niiashikpamɔi nɛɛ baanyɛ afee hewalɛwoo diɛŋtsɛ aha mɛi ni yɔɔ shiai ni mli egbala lɛ amli ni toɔ amɛtsui shi akɛ emuuyeli mli hiɛlɔi lɛ.—1 Korintobii 7:12-16.
9. Emuuyeli mli hiɛlɔi ni amɛgbɔjɔ yɛ gbɔmɔtsoŋ lɛ baanya aye abua mɛi krokomɛi yɛ mɛɛ gbɛ nɔ?
9 Emuuyeli mii hiɛlɔi krokomɛi eye anɔkwale yɛ gbɔmɔtsoŋ gbɔjɔmɔi fɛɛ sɛɛ. Yɛ Britania lɛ, Kristofonyo ko ni nyɛɛɛ anyiɛ ni esa akɛ eta shwiili mli ni atsi lɛ lɛ mii shɛɔ ehe yɛ sɔɔmɔ nitsumɔ lɛ mli. Eŋma akɛ: “Eyɛ mli akɛ mibafee mɔ ni nyɛɛɛ atsu heloo gbɛfaŋ nitsumɔ ko kɛjɛ 1949 moŋ, shi efee Yehowa miishɛɛ akɛ ekɛmi aaatsu nii yɛ nɛkɛ be nɛɛ fɛɛ mli. No hewɔ lɛ, afii lɛ eho oyayaayai. Mikase ni miyoo akɛ yɛ bɔ ni mɔ ko gbɔmɔtsoŋ gbɔjɔmɔ lɛ naa wa ha lɛ fɛɛ sɛɛ lɛ, ehe baanyɛ aba sɛɛnamɔ aha mɛi krokomɛi. Miŋa kɛ mi fɛɛ efee nɔ ko tamɔ sɛ́kɛ kɛha mɛi pii yɛ asafo lɛ mli. Yɛ wɔshihilɛi nɛɛ hewɔ lɛ, anaa wɔ yɛ biɛ daa nɛɛ, wɔfee klalo kɛha yelikɛbuamɔ.” Hɛɛ, Kristofonyo ko ni egbɔjɔ yɛ gbɔmɔtso mli lɛ nijiaŋ akaje wui, ejaakɛ kɛ́ eji nuu loo yoo hu lɛ eeenyɛ efee hewalɛwoo jɛɛhe aha mɛi krokomɛi.
10. Kɛ́ emuuyeli mli hiɛlɔi kumɔɔɔ yɛ yiwaa shishi lɛ, amɛbaanyɛ amɛye amɛbua amɛnanemɛi heyelilɔi yɛ mɛɛ gbɛ nɔ?
10 Emuuyeli mli hiɛlɔi kumɔɔɔ yɛ yiwaa shishi. Yɛ be mli ni awo Kristofonyo ko tsuŋ akɛni ekɛ ehe wooo maŋsaji amli hewɔ lɛ, ekɛɛ akɛ: “Yii . . . bafee midaa gbi shihilɛ lɛ fa, efaa ni emli waa hu. Mibɔi gbɔjɔmɔ daa gbi ejaakɛ amɛhaaa mi niyenii yɛ be babaoo mli. Misɔleɔ mihaa Yehowa daa, ni manyɛ makai akɛ ekwako mi. Babaoo ni amɛyiɔ mi lɛ, babaoo ni minuuu he kwraa ji no.” Eyɛ mli akɛ awo lɛ tsuŋ fe afii enyɔ moŋ, shi nɛkɛ Yehowa Odasefonyo nɛɛ tee nɔ emɔ maŋsaji ni ekɛ ehe wooo mli lɛ mli. (Yesaia 2:2-4; Yohane 15:19) Emuuyeli mli hiɛlɔi krokomɛi hu ekɔ shidaamɔ ni tamɔ nakai nɔŋŋ. Yɛ anɔkwale mli lɛ, nɛkɛ emuuyeli hiɛmɔ nɛɛ kɛ hewalɛwoo he nɔkwɛmɔ nɔ ko ni baanyɛ atsirɛ nanemɛi heyelilɔi kɛya anɔkwayeli mli haa.
Miishɛjemɔ Ni Sɛɛ Efooo
11. Mɛɛ Ŋmalɛ mli nɔmimaa ni kɔɔ miishɛjemɔ he Kristofoi yɔɔ?
11 Nɔ ni wɔtsɔ hiɛ wɔkase nɛɛ ji niiashikpamɔi babaoo ni anyɛŋ akane ni yeɔ odase akɛ Yehowa kɛ ewebii anɔkwafoi yɛ lɛ. Lɛ ji “musuŋtsɔlɔi atsɛ kɛ miishɛjemɔ fɛɛ Nyɔŋmɔ lɛ.” (2 Korintobii 1:3, 4) Hɛɛ, “Nyɔŋmɔ ji wɔbobaa he kɛ wɔhewalɛ, wɔbuamɔ ni wa ni wɔnaa yɛ fimɔi amli.” (Lala 46:1-3) Wɔbaanyɛ wɔna hewalɛwoo kɛjɛ nanemɛi Yehowa jalɔi ni wɔnaa bɔ ni amɛŋmɛɔ amɛtsui shi akɛ Kristofoi yɛ shihilɛi ni mli wawai ashishi lɛ hewɔ.
12. Paulo emuuyeli mli hiɛmɔ gbɛ lɛ na hewalɛ yɛ nanemɛi Kristofoi anɔ yɛ mɛɛ gbɛ nɔ?
12 No ji nɔ ni ba yɛ be mli ni mɛi krokomɛi na bɔfo Paulo anɔkwayeli lɛ. Eŋma akɛ: “Saji ni ba minɔ lɛ eha sanekpakpa lɛ eshwere moŋ, ni eha mikpaai lɛ eje shi faŋŋ . . . ni nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo etsɔ mikpaai lɛ anɔ ena ekãa babaoo fe tsutsu lɛ kɛmiijaje Nyɔŋmɔ Wiemɔ lɛ ni amɛsheee gbeyei.”—Filipibii 1:12-14.
13. Wɔ diɛŋtsɛ wɔ emuuyeli mli hiɛmɔ lɛ baanyɛ ana hewalɛ yɛ mɛi anɔ yɛ mɛɛ gbɛ nɔ?
13 Hɛɛ, kɛ wɔna wɔle akɛ Yehowa Odasefoi krokomɛi miihiɛ amɛ emuuyeli mli kɛmiiha lɛ yɛ yiwaa shishi lɛ, ewoɔ wɔ hewalɛ koni wɔhi shi akɛ anɔkwafoi. Yɛ gbɛ kroko nɔ lɛ, kɛ wɔ diɛŋtsɛ lɛ wɔhiɛ wɔ emuuyeli mli yɛ kaa shishi lɛ, wɔwoɔ mɛi krokomɛi ahewalɛ ni amɛkɛ ekãa ajaje Nyɔŋmɔ Wiemɔ lɛ ni amɛsheee gbeyei. Ni yɛ anɔkwale mli lɛ wɔtsui baanyɛ anyɔ wɔmli akɛni wɔle akɛ wɔ anɔkwayeli lɛ ji hewalɛwoo jɛɛhe kɛ jɔɔmɔ kɛha amɛ lɛ.
14. Mɛni ji gbɛi ni yɔɔ ni Yehowa tsɔɔ nɔ ekɛshɛjeɔ wɔmii lɛ ateŋ enyɔ lɛ?
14 Yehowa tsɔɔ emumɔ krɔŋkrɔŋ lɛ nɔ ewajeɔ wɔ. Yɛ anɔkwale mli lɛ, taakɛ Petro ŋma lɛ, ‘kɛ́ Kristo gbɛi lɛ hewɔ abɔɔ wɔ ahora lɛ, wɔyɛ he miishɛɛ, ejaakɛ anunyam mumɔ lɛ hiɔ wɔnɔ, Nyɔŋmɔ mumɔ lɛ hiɔ wɔnɔ.’ (1 Petro 4:12-16) Nyɔŋmɔ hu shɛjeɔ wɔ kɛ wɔnanemɛi heyelilɔi ni naa amanehulu lɛ amii kɛtsɔɔ bɔ ni ehereɔ wɔsɔlemɔi anɔ ehaa lɛ nɔ. Paulo ŋma akɛ: “Nyɛkahaoa yɛ nɔ ko nɔ ko he, shi moŋ, nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli.” (Filipibii 4:6, 7) Ani oyɛ hekɛnɔfɔɔ ni tamɔ nakai yɛ “sɔlemɔ Toibolɔ” lɛ mli?—Lala 65:3, NW.
Miishɛjemɔ Ni Wɔɔna Kɛjɛ Nyɔŋmɔ Wiemɔ Lɛ Mli
15. Te obaanyɛ ofee anɔkwale ni Romabii 15:4 ji lɛ he nɔkwɛmɔ nɔ oha tɛŋŋ?
15 Nyɔŋmɔ Wiemɔ krɔŋkrɔŋ lɛ hu ji miishɛjemɔ babaoo jɛɛhe. Taakɛ bɔfo Paulo kɛɛ lɛ: “Ejaakɛ nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.” (Romabii 15:4) Akɛ nɔkwɛmɔ nɔ lɛ, kɛ wɔkane naakpɛɛ gbɛ ni atsɔ nɔ akpɔ̃ Israelbii lɛ kɛjɛ Mizraim aloo bɔ ni abaa Yudafoi lɛ ayi yɛ maŋnyɛ Esther gbii lɛ amli lɛ, ani no wooo wɔ hekɛnɔfɔɔ yɛ Yehowa mli akɛ Kpɔlɔ ni mɔ ko kɛ lɛ yeee egbɔ lɛ mli hewalɛ? Ni Hiob emuuyeli mli hiɛmɔ he sane kɛ naagbai wuji lɛ fɛɛ ni aŋma afɔ shi lɛ hu? Yɛ anɔkwale mli lɛ, enɛ feɔ bɔ ni Yehowa tsuji ni yɔɔ ŋmɛnɛŋmɛnɛ beaŋ lɛ baanyɛ aŋmɛ amɛtsui shi yɛ haomɔi amli yɛ hewalɛ ni Nyɔŋmɔ kɛhaa amɛ lɛ mli lɛ he nɔkwɛmɔ nɔ. “Ŋmalɛi lɛ amli miishɛjemɔ” lɛ baanyɛ ekɛ hiɛnɔkamɔ kɛ ekãa awo emuuyeli mli hiɛlɔi amli.
16. Mɛɛ miishɛjemɔ wiemɔi ni ama nɔ mi wɔnaa yɛ 1 Petro 5:6, 7 kɛ 1 Korintobii 10:13?
16 Shi kɛji akɛ wɔnaagbai lɛ haa wɔhaoɔ hu? Yɛ anɔkwale mli lɛ, Ŋmalɛ mli miishɛjemɔi anɔmimaa baanyɛ aha wɔnu he akɛ wɔyɛ shweshweeshwe yɛ Yehowa kwɛmɔ mli ni ebaanyɛ eye ebua ni eba wɔhaomɔ lɛ shi. Bɔfo Petro ŋma akɛ: “Nyɛbaa nyɛhe shi yɛ Nyɔŋmɔ nine ni wa lɛ shishi koni ewo nyɛnɔ yɛ be ni sa mli. Nyɛŋɔa nyɛhaomɔ fɛɛ nyɛfɔa enɔ, ejaakɛ lɛ ejwɛŋɔ nyɛnɔ.” Yehowa ‘jwɛŋɔ wɔhe.’ Mɛɛ susumɔ ni shɛjeɔ mɔ mii nɛ! Nɔ ko nɔ ko bɛ ni baanyɛ aba ni enaaa aloo enyɛŋ eye nɔ. Agbɛnɛ Paulo kɛ nɛkɛ nɔmimaa nɛɛ ha wɔ: “Shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ, ekɛ kaa lɛ nɔŋŋ aaaje gbɛ aha nyɛ ni nyɛje mli hu koni nyɛnyɛ mli nyɛmɔ.” (1 Korintobii 10:13) Akɛ mɔ ni otswa ofai shi akɛ obaafee emuuyeli mli hiɛlɔ lɛ, obaanyɛ okɛ ohe afɔ enɛ nɔ!
17. Mɛɛ gbɛjianɔtoi krokomɛi yɔɔ ni baanyɛ ashɛje wɔmii?
17 Sɔlemɔ nɔ ni aaatsɔ akase Nyɔŋmɔ Wiemɔ lɛ kɛ Kristofoi awoji ni “tsulɔ anɔkwafo kɛ nilelɔ” lɛ kɛha lɛ baanyɛ ekɛ miishɛjemɔ aba yɛ haomɔ bei amli. (Mateo 24:45-47; Lala 119:105) Nakai nɔŋŋ Ŋmalɛ mli ŋaawoo kpakpa ni jɛ onukpai ni yɔɔ asafo lɛ mli ni yɔɔ mlihilɛ lɛ adɛŋ lɛ baanyɛ afee. Nɔ ni fata nibii krokomɛi ni abiɔ ni amɛfee he ji akɛ, “nyɛshɛjea mɛi ni tsui faa lɛ amii; nyɛherea mɛi ni feɔ gbedee lɛ; nyɛtoa nyɛtsui shi nyɛhaa mɛi fɛɛ.”—1 Tesalonikabii 5:14.
18. Mɛɛ miishɛjemɔ yɔɔ kɛha wɔ kɛ́ heloo gbɛfaŋ nibii fioo ko pɛ wɔyɔɔ?
18 Shi mɛɛ miishɛjemɔ yɔɔ kɛji akɛ heloo gbɛfaŋ nibii fioo ko pɛ oyɔɔ? Eji miishɛjemɔ diɛŋtsɛ akɛ wɔɔle akɛ shia, niyenii babaoo kɛ heloo gbɛfaŋ jɔɔmɔi pii baahi Nyɔŋmɔ Gbɛjianɔtoo Hee lɛ mli. (Lala 72:16; 2 Petro 3:13; okɛto Yesaia 65:17-25 be.) Shi amrɔ nɛɛ po, Kristofoi ashihilɛ jieɔ shika fitemɔ yɛ zigarɛt shɛremɔ, dãa ni wa ni anuɔ babaoo, asɔshwɛmɔ, kɛ nibii krokomɛi kɛjɛɔ mli. Abaanyɛ akɛ shika ni abaafite yɛ nɛkɛ gbɛ nɔ lɛ atsu nii ni sɛɛnamɔ aba he aha weku lɛ. Nyɔŋmɔ Wiemɔ lɛ sɛɛdii hu baaye abua wɔ ni wɔmii ashɛ heloo gbɛfaŋ nibii fioo ni wɔyɔɔ lɛ he. Nakai Paulo ji, ejaakɛ ekɛɛ akɛ: “Shi lɛlɛŋ, ninamɔ kpeteŋkpele ji Nyɔŋmɔ jamɔ, kɛji mɔ ko mii shɛ enii ahe lɛ. Ejaakɛ wɔkɛ nɔ ko nɔ ko baaa je nɛŋ, no hewɔ lɛ, eyɛ faŋŋ akɛ wɔnyɛŋ wɔkɛ nɔ ko aya hu. Shi kɛ́ wɔyɛ ŋmaa kɛ hehaa nii kɛkɛ lɛ, esa akɛ wɔmii ashɛ he.” (1 Timoteo 6:6-8; Filipibii 4:11, 12) Wɔjwɛŋmɔ ni wɔkɛaama hegbɛi ni wɔyɔɔ yɛ Yehowa sɔɔmɔ mli lɛ nɔ lɛ kɛ jɔɔmɔi babaoo ni feɔ wɔ niiatsɛmɛi diɛŋtsɛ baa.—Abɛi 10:22.
19. Wɔbaanyɛ wɔŋmɛ wɔtsui shi yɛ helai ni yeɔ wɔ yɛ be kakadaŋŋ mli lɛ mli yɛ mɛɛ gbɛ nɔ?
19 Ni kɛlɛ, mɛni kɛji akɛ esa akɛ wɔŋmɛ wɔtsui shi yɛ be kakadaŋ mli yɛ hela ko mli? Wɔbaanyɛ wɔŋmɛ wɔtsui shi kɛ Yehowa yelikɛbuamɔ kɛ miishɛjemɔ ni etsɔɔ e-Wiemɔ lɛ nɔ ekɛhaa lɛ. Akɛ nɔkwɛmɔ nɔ lɛ, lalatsɛ David jaje akɛ: “Ajɔɔ mɔ ni jwɛŋɔ ohiafo nɔ! Gbi fɔŋ nɔ lɛ Yehowa aaajie lɛ . . . Yehowa aaatsɔmɔ lɛ yɛ hela saa nɔ; ni kɛ́ ehe miiye lɛ, oootsake esaa lɛ fɛɛ.” (Lala 41:2-4) Jeee naakpɛɛ hela tsamɔ be lɛ nɛ. Shi Yehowa kɛ nilee kɛ hewalɛ ni he hiaa lɛ haa Kristofoi ni he yeɔ lɛ koni amɛtsu amɛhelai lɛ ahe nii yɛ be mli ni amɛkɛ Maŋtsɛyeli lɛ yeɔ klɛŋklɛŋ gbɛhe yɛ amɛshihilɛ mli lɛ.—Mateo 6:33; 2 Korintobii 12:7-10.
20. Te wɔɔfee tɛŋŋ wɔdamɔ awerɛho naa beni suɔlɔ ko egbo lɛ?
20 Te wɔɔfee tɛŋŋ wɔnyɛ wɔdamɔ awerɛho ni baa yɛ be mli ni suɔlɔ ko egbo lɛ naa? Wɔbaanyɛ wɔna miishɛjemɔ kɛjɛ gbohiiashitee he hiɛnɔkamɔ ni Biblia lɛ kɛhaa lɛ mli. (Yohane 5:28, 29; Bɔfoi lɛ Asaji 24:15) No hewɔ lɛ, eyɛ mli akɛ suɔlɔ ko gbele haa wɔyeɔ awerɛho moŋ, shi wɔyeee ŋkɔmɔ tamɔ mɛi ni eshwɛ lɛ, mɛi ni bɛ hiɛnɔkamɔ ko lɛ.” (1 Tesalonikabii 4:13) Mɛɛ miishɛjemɔ po gbohiiashitee hiɛnɔkamɔ kɛbahaa emuuyeli mli hiɛlɔ lɛ nɛkɛ!
Hii Shi Akɛ Mɔ Ni Yɔɔ Miishɛjemɔ Nyɔŋmɔ Lɛ Mli Hekɛnɔfɔɔ
21. Yiwaa ni wɔŋmɛɔ wɔtsui shi yɛ mli lɛ kɛ mɛni baa yɛ be babaoo mli?
21 Na nɔmimaa akɛ Yehowa, “miishɛjemɔ fɛɛ Nyɔŋmɔ lɛ” kwaŋ ewebii anɔkwafoi ni amɛjɔɔ amɛhe nɔ amɛha lɛ lɛ kɔkɔɔkɔ. (2 Korintobii 1:3; Lala 94:14) Eyeɔ ebuaa kɛ wɔkai hu akɛ yiwaa ni Kristofoi ŋmɛɔ amɛtsui shi yɛ mli lɛ baanyɛ awo Nyɔŋmɔ hiɛ nyam aloo ejie eyi. Niseniianiifeemɔ nɛɛ gbalaa jwɛŋmɔ kɛyaa ewebii lɛ kɛ amɛ-Maŋtsɛyeli shiɛmɔ nitsumɔ lɛ nɔ, ni nɔ ni jɛɔ mli baa yɛ be babaoo mli ji Yehowa yijielɔi lɛ ni amɛyi faa babaoo.—Okɛto Bɔfoi lɛ Asaji 8:4-8; 19-21 he.
22. Mɛni esa akɛ efee wɔfaishitswaa yɛ emuuyeli gbɛfaŋŋ?
22 No hewɔ lɛ, yɛ Nyɔŋmɔ yelikɛbuamɔ hewɔ lɛ, nyɛhaa wɔtwaa wɔfai shi akɛ wɔŋmɛŋ wɔhe wɔhaŋ Satan ŋaatsɔi ni ekɛbaakumɔ wɔ emuuyeli lɛ. Eba akɛ wɔɔfee wɔnii yɛ hemɔkɛyeli mli ni wɔya nɔ wɔkɛ wɔhe afɔ Yehowa nɔ. Nyɛkahaa ni wɔmiiku wɔhiɛ wɔmiishwie gbɛi sɔrɔtoi babaoo ni etsɔɔ nɔ ejɔɔ wɔ, efiɔ wɔsɛɛ, ni eshɛjeɔ wɔmii akɛ etsuji lɛ anɔ. Eba akɛ wɔɔjie wɔhe kpo akɛ mɛi ni wɔtuu wɔhe wɔha lɛ, kɛ ejalɛ shishitoo mlai lɛ, ni wɔfi emaŋtsɛyeli lɛ sɛɛ. Kaimɔ hu akɛ enɛ ji sane ko ni kɔɔ wɔ diɛŋtsɛ wɔhe. Yaa nɔ ofee ŋwɛi suɔmɔnaa nii lɛ yɛ be mli ni okɛ Yehowa gbɛjianɔtoo lɛ tsuɔ nii yɛ gbii ni ekaaa nɛɛ amli. Ha omli afili bo yɛ hegbɛ ni ona akɛ oooha Yehowa tsui anya kɛtsɔ anɔkwale ni oooya nɔ oye lɛ nɔ, ni kaaha ohiɛ miikpa nɔ akɛ ekɛ miishɛjemɔ haa mɛi fɛɛ ni hiɛɔ amɛ emuuyeli mli lɛ yɛ gbɛ fɛɛ gbɛ nɔa.
[Shishigbɛ niŋmai]
a Ajie kɛjɛ February 1, 1986 Watchtower lɛ mli.
Mɛni Ji Ohetoo?
◻ Mɛni hewɔ miishɛjemɔ he maa Yehowa tsuji titri Iɛ?
◻ Mɛni hewɔ Satan kɛ yiwaa baa Kristo foi anɔ lɛ?
◻ Emuuyeli mli hiɛlɔi baanya amɛmɔ hewalɛ yɛ mɛɛ gbɛ nɔ?
◻ Te wɔɔfee tɛŋŋ wɔna miishɛjemɔ kɛjɛ Nyɔŋmɔ Wiemɔ lɛ mli?
◻ Mɛni nɔ mi ama abawɔ yɛ 1 Petro 5:6, 7 kɛ 1 Korintobii 10:13?
[Mfoniri ni yɔɔ baafa 26]
Satan miitao ekpata Yehowa tsuji ahiɛ, shi ashiko wɔ efolo ni wɔbɛ hebuu nɔ̃
[Mfoniri ni yɔɔ baafa 28]
Yehowa haa emuuyeli mli hiɛlɔi asɔlemɔi ahetoo. Ani osɔleɔ daa?
September Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)