“Hemɔkɛyeli Naa Wɔnyiɛɔ yɛ, Shi Jeee Ninamɔ Naa”

“Hemɔkɛyeli naa wɔnyiɛɔ yɛ, shi jeee ninamɔ naa.”—2 KORINTOBII 5:7.

 1. Akɛ ‘aanyiɛ yɛ hemɔkɛyeli naa’ lɛ tsɔɔ mɛni?

BE FƐ̃Ɛ be ni wɔsɔleɔ yɛ gbɛtsɔɔmɔ ni akɛha yɛ Nyɔŋmɔ Wiemɔ lɛ mli lɛ kɛ gbeekpamɔ naa lɛ, wɔtsɔɔ akɛ, kɛ hoo lɛ, wɔyɛ hemɔkɛyeli falɛ ko. Kɛ wɔje shishi wɔye Nyɔŋmɔ Maŋtsɛyeli lɛ he odase wɔtsɔɔ mɛi krokomɛi lɛ, enɛ hu tsɔɔ hemɔkɛyeli. Ni kɛ́ wɔjɔɔ wɔwala nɔ wɔha Yehowa lɛ, wɔyeɔ odase akɛ eji nɔ ni wɔshweɔ akɛ ‘wɔɔnyiɛ yɛ hemɔkɛyeli naa,’ ni ji akɛ, koni wɔdi shihilɛ gbɛ ni hemɔkɛyeli kudɔɔ lɛ lɛ sɛɛ.—2 Korintobii 5:7; Kolosebii 1:9, 10.

 2. Mɛni hewɔ asafoŋ nitsumɔi ni akɛ he woɔ mli lɛ jeee odaseyeli ni tsɔɔ akɛ mɔ lɛ yɛ hemɔkɛyeli?

² Kɛji akɛ wɔɔya nɔ wɔhi shi lɛɛlɛŋ yɛ nɛkɛ gbɛ nɔ lɛ, belɛ hemɔkɛyeli ni ma shi shiŋŋ he miihia wɔ. (Hebribii 11:1, 6) Gbɔmɛi babaoo ji mɛi ni jeŋba he tɛi ni nɔ kwɔlɔ kɛ suɔmɔ ni amɛnaà yɛ Odasefoi lɛ ateŋ lɛ ji nɔ ni gbalaa amɛ kɛbaa Yehowa Odasefoi lɛ ahe. Eji shishijee kpakpa, shi no etsɔɔɔ akɛ gbɔmɛi ni tamɔ nɛkɛ lɛ yɛ hemɔkɛyeli. Ekolɛ mɛi krokomɛi yɛ gbalashihilɛ mli hefatalɔ loo fɔlɔ ko ni yɔɔ hemɔkɛyeli ni mli wa, ni ekolɛ amɛkɛ amɛhe woɔ nitsumɔi ni nakai mɔ ni amɛsumɔɔ esane lɛ tsuɔ lɛ ekomɛi amli. Hewalɛ ni tamɔ nɛkɛ ni mɔ ko aaaná yɛ eshia mli lɛ ji jɔɔmɔ diɛŋtsɛ, shi enɛ hu jeee nɔ ni akɛtoɔ suɔmɔ ni esa akɛ mɔ aná aha Nyɔŋmɔ kɛ lɛ diɛŋtsɛ ehemɔkɛyeli ni eyɔɔ yɛ emli lɛ najiaŋ.—Luka 10:27, 28.

 3. (a) Kɛji akɛ wɔɔná hemɔkɛyeli ni ma shi shiŋŋ lɛ, mɛɛ yiŋtsɔmɔ esa akɛ wɔ diɛŋtsɛ lɛ wɔná yɛ Biblia lɛ he? (b) Mɛni hewɔ mɛi komɛi heɔ mumɔŋ ni Biblia lɛ jɛ lɛ amɛyeɔ oya fe bɔ ni mɛi krokomɛi feɔ lɛ?

³ Mɛi ni nyiɛɔ yɛ hemɔkɛyeli naa lɛɛlɛŋ lɛ heɔ yeɔ diɛŋtsɛ akɛ Biblia lɛ ji Nyɔŋmɔ Wiemɔ. Odaseyelii babaoo yɛ ni tsɔɔ akɛ Ŋmalɛi Krɔŋkrɔŋi lɛ jɛ “Nyɔŋmɔ Mumɔ lɛŋ”a lɛɛlɛŋ. (2 Timoteo 3:16) Odaseyeli nɛɛ falɛ enyiɛ esa akɛ apɛi mli dani mɔ ko yiŋ atsɔ̃? Ekolɛ no baadamɔ eniiashikpamɔ, nilee kɛ woloŋlee nɔ. Ekolɛ nɔ ni haa mɔ ko yiŋ tsɔɔ kwraa lɛ kɔneee mɔ kroko yiŋ. Yɛ shihilɛi komɛi amli lɛ, eyɛ mli akɛ akɛ odaseyelii babaoo ni anyɛŋ aje he ŋwane tsɔɔ mɔ lɛ moŋ, shi ekolɛ ekpɛlɛŋ lolo akɛ eeemu sane naa yɛ nɔ ni no tsɔɔ lɛ kɛ gbeekpamɔ naa. Mɛni hewɔ? Yɛ akɔnɔi komɛi ni yɔɔ etsui mli tɔ̃ɔ ahewɔ. (Yeremia 17:9) No hewɔ lɛ, eyɛ mli akɛ ekolɛ mɔ ko baawie akɛ eyɛ Nyɔŋmɔ yiŋtoo he miishɛɛ moŋ, shi ekolɛ etsui miishwe ni ená je lɛ nɔkpɛlɛmɔ. Ekolɛ esumɔɔɔ ni eŋmɛɛ shihilɛ gbɛ ko ni teɔ shi ewoɔ tɛi ni Biblia lɛ efolɔ eshwie shi lɛ ahe. Shi kɛlɛ, kɛji akɛ anɔkwale lɛ he hɔmɔ miiye mɔ ko lɛɛlɛŋ, ni eyeɔ lɛ diɛŋtsɛ ehe anɔkwale, ni ebaa ehe shi lɛ, ebaayoo yɛ be ni sa mli akɛ Biblia lɛ ji Nyɔŋmɔ Wiemɔ.

 4. Mɛni ataoɔ yɛ mɔ aŋkro ko dɛŋ dani ená hemɔkɛyeli?

⁴ Bei pii lɛ, yɛ nyɔji fioo pɛ sɛɛ lɛ, gbɔmɛi ni ayeɔ abuaa amɛ ni amɛkase Biblia lɛ kpɛlɛɔ nɔ akɛ ámɛkase odaseyelii ni fa ni tsɔɔ akɛ eji Nyɔŋmɔ Wiemɔ. Kɛji akɛ enɛ kanya amɛ koni amɛgbele amɛtsui mli ni Yehowa atsɔɔ amɛnii lɛ, no lɛ nɔ ni amɛkaseɔ lɛ tsakeɔ amɛmligbɛ susumɔi, amɛ akɔnɔi, kɛ amɛ kanyamɔi lɛ. (Lala 143:10) Romabii 10:10 kɛɔ akɛ, “tsui lɛ” ji nɔ ni akɛheɔ ayeɔ. Hemɔkɛyeli ni tamɔ nɛkɛ lɛ jieɔ bɔ ni mɔ aŋkro lɛ nuɔ he ehaa diɛŋtsɛ lɛ kpo, ni ebaaje kpo faŋŋ yɛ eshihilɛ gbɛ lɛ mli.

Noa Damɔ Hemɔkɛyeli ni Ma Shi Shiŋŋ nɔ Efee Nii

5, 6. Noa hemɔkɛyeli damɔ mɛni nɔ?

⁵ Noa ji mɔ ko ni yɔɔ hemɔkɛyeli ni ma shi shiŋŋ. (Hebribii 11:7) Mɛɛ nɔdaamɔnɔ eyɔɔ kɛha enɛ? Noa yɛ Nyɔŋmɔ wiemɔ lɛ, shi jeee akɛ nɔ ni áŋma afɔ shi, ákɛ nɔ ni akɛɛ lɛ. Klɛŋklɛŋ Mose 6:13 kɛɔ akɛ: “Nyɔŋmɔ kɛɛ Noa akɛ: Heloo fɛɛ naagbee eba mihiɛ; ejaakɛ shikpɔŋ lɛ nɔ eyi obɔ kɛ yiwalɛ ni jɛ amɛ.”—(Wɔma efã ko nɔ mi.) Yehowa fã Noa akɛ ekpɛ adeka, ni etsɔɔ lɛ bɔ ni ekpɛ lɛ eha. Kɛkɛ ni Nyɔŋmɔ kɛfata he akɛ: “Shi mi lɛ, naa, mikɛ nu afua miiba shikpɔŋ lɛ nɔ, koni mikɛkpata heloo fɛɛ ni wala mumɔ yɔɔ mli lɛ hiɛ kɛjɛ ŋwɛi shishi; nɔ fɛɛ nɔ ni yɔɔ shikpɔŋ lɛ nɔ aaaplenee.”—1 Mose 6:14-17.

⁶ Ani nugbɔ enɛ pɛŋ kɛtsɔ be nɛɛ hiɛ? Biblia lɛ ewieee. Klɛŋklɛŋ Mose 2:5 kɛɔ akɛ: “Yehowa Nyɔŋmɔ hako nu abanɛ yɛ shikpɔŋ lɛ nɔ.” Shi, nɛkɛ ji bɔ ni Mose, ni hi shi yɛ no sɛɛ afii ohai abɔ lɛ wie saji ahe eha, yɛ be mli ni ewie jeeŋmɔ be ko dani nakai be lɛ shɛ lɛ he shi jeee Noa gbi lɛ. Taakɛ atsɔɔ yɛ 1 Mose 7:4 lɛ, Yehowa tsi nugbɔnɛmɔ tã beni ekɛ Noa wieɔ lɛ, ni eka shi faŋŋ akɛ Noa nu nɔ ni etsɔɔ lɛ shishi. Ni kɛlɛ, Noa hemɔkɛyeli damɔɔɔ nɔ ni enyɛɔ enaa lɛ nɔ. Bɔfo Paulo ŋma akɛ akɛ ‘ŋwɛi kɔkɔbɔɔ ha Noa yɛ nii ni anako lɛ ahe.’ Nyɔŋmɔ kɛɛ Noa akɛ E-kɛ “nu afua,” loo “ŋwɛi ŋshɔ” baaba shikpɔŋ lɛ nɔ, taakɛ shishigbɛ niŋmaa ko ni yɔɔ New World Translation lɛ mli lɛ wie he yɛ 1 Mose 6:17 lɛ. Nɔ ko ni tamɔ nakai bako dã kɛbashi nakai be lɛ mli. Shi adebɔɔ mli nibii fɛɛ ni Noa naa lɛ damɔ shi akɛ odaseyeli ni anaa faŋŋ ni tsɔɔ akɛ Nyɔŋmɔ baanyɛ ekɛ nu afua ni tamɔ nɛkɛ ni kpataa nii ahiɛ lɛ aba. Hemɔkɛyeli tsirɛ lɛ, ni Noa kpɛ adeka lɛ.

 7. (a) Mɛni he ehiaaa Noa dani enyɛ efee nɔ ni Nyɔŋmɔ efã lɛ akɛ efee lɛ? (b) Noa hemɔkɛyeli ni wɔsusuɔ he lɛ he baa sɛɛnamɔ kɛhaa wɔ yɛ mɛɛ gbɛ nɔ, ni wɔhemɔkɛyeli baanyɛ atsɔ jɔɔmɔ kɛha mɛi krokomɛi yɛ mɛɛ gbɛ nɔ?

⁷ Nyɔŋmɔ etsɔko Noa gbi pɔtɛɛ nɔ ni Nu Afua lɛ baaje shishi. Shi Noa kɛ no tsuuu nii akɛ naajiemɔ ni ekɛaajie mamɛ̃-ni-makwɛ su lɛ kpo, ní ekɛ adeka lɛ kpɛɛ kɛ shiɛmɔ lɛ aye gbɛhe ni ji enyɔ yɛ eshihilɛ mli. Nyɔŋmɔ tsɔ̃ hiɛ ekɛ be ni fa saŋŋ kɛɛ Noa be ni ekɛbote adeka lɛ mli. Shi dani enɛ aaaba lɛ, “Noa fee nakai; bɔ ni Nyɔŋmɔ fã lɛ lɛ, nakai pɛpɛɛpɛ efee.” (1 Mose 6:22) Noa nyiɛ yɛ hemɔkɛyeli naa, shi jeee yɛ ninamɔ naa. Kwɛ bɔ ni wɔdaa shi akɛ efee nakai! Yɛ ehemɔkɛyeli lɛ hewɔ lɛ, wɔyɛ wala mli ŋmɛnɛ. Yɛ wɔ hu wɔgbɛfaŋ lɛ, hemɔkɛyeli ni wɔjieɔ lɛ kpo lɛ baanyɛ aná hewalɛ kpele, ni jeee yɛ nɔ ni baaba wɔnɔ wɔsɛɛ lɛ pɛ nɔ, shi moŋ nɔ ni baaba wɔbii kɛ mɛi krokomɛi hu ni amɛbɔle wɔ lɛ anɔ lɛ hu nɔ.

Abraham Hemɔkɛyeli Lɛ

8, 9. (a) Abraham kɛ ehemɔkɛyeli lɛ damɔ mɛni nɔ? (b) Yehowa “jie ehe kpo” etsɔɔ Abraham yɛ mɛɛ gbɛ nɔ?

⁸ Susumɔ nɔkwɛmɔnɔ kroko he—Abraham nɔ̃ lɛ. (Hebribii 11:8-10) Abraham kɛ ehemɔkɛyeli lɛ damɔ mɛni nɔ? Shihilɛi ni ebɔle ehe kɛkpe ni eda yɛ mli yɛ Ur yɛ Kaldeabii lɛ ateŋ ji wɔŋjamɔ kɛ heloonaa ninamɔ. Shi nibii krokomɛi hu ná Abraham susumɔi anɔ hewalɛ. Ŋwanejee ko bɛ he akɛ ebaanyɛ ni ekɛ Noa binuu Shem, ni ehi shi yɛ ebeaŋ afii 150 sɔŋŋ lɛ abɔ. Abraham bahe eye akɛ Yehowa ji “Ŋwɛi Flooflo Nyɔŋmɔ, ŋwɛi kɛ shikpɔŋ Bɔlɔ lɛ.”—1 Mose 14:22, NW.

⁹ Nɔ kroko hu ná Abraham nɔ hewalɛ waa. Yehowa “jie ehe kpo etsɔɔ . . . Abraham, beni eyɔɔ Mesopotamia, ní enako ebahi Haran lɛ, ni ekɛɛ lɛ akɛ: Jee oshikpɔŋ lɛ nɔ kɛ oweku lɛŋ kɛya shikpɔŋ ni matsɔɔo lɛ nɔ.” (Bɔfoi lɛ Asaji 7:2, 3) Mɛɛ gbɛ nɔ Yehowa tsɔ ‘ejie ehe kpo’ etsɔɔ Abraham yɛ? Abraham kɛ ehiŋmɛi enaaa Nyɔŋmɔ tɛ̃ɛ. (2 Mose 33:20) Shi kɛlɛ, Yehowa jie ehe kpo etsɔɔ Abraham yɛ lamɔ mli, kɛ naakpɛɛ anunyam kpojiemɔ ni fe adebɔɔ mli nɔ̃, aloo kɛtsɔ ŋwɛibɔfo loo najiaŋdamɔlɔ ko nɔ. (Okɛto 1 Mose 18:1-3; 28:10-15; 3 Mose 9:4, 6, 23, 24 he.) Gbɛ fɛɛ gbɛ ni Yehowa tsɔ nɔ ejie ehe kpo etsɔɔ Abraham lɛ, nakai nuu anɔkwafo lɛ yɛ hekɛnɔfɔ̃ɔ akɛ Nyɔŋmɔ kɛ hegbɛ ko ni jara wa waa miima ehiɛ. Abraham kpɛlɛ nɔ yɛ hemɔkɛyeli mli.

10. Yehowa waje Abraham hemɔkɛyeli yɛ mɛɛ gbɛ nɔ?

¹⁰ Abraham hemɔkɛyeli lɛ damɔɔɔ shikpɔŋ ni Nyɔŋmɔ fãa lɛ akɛ eya nɔ lɛ he saji ni eeele lɛ fitsofitso nɔ. Edamɔɔɔ le ni eeele be mli ni akɛ nakai shikpɔŋ lɛ baahã lɛ lɛ nɔ. Eyɛ hemɔkɛyeli ejaakɛ ele Yehowa akɛ Nyɔŋmɔ Ofe. (2 Mose 6:3) Yehowa kɛɛ Abraham akɛ ebaaná seshi, shi bei komɛi lɛ, Abraham yiŋ feɔ lɛ kɔshikɔshi yɛ bɔ ni enɛ aaanyɛ aba lɛ he. No mli lɛ eegbɔ. (1 Mose 15:3, 4) Yehowa waje Abraham hemɔkɛyeli kɛtsɔ kɛɛmɔ ni ekɛɛ lɛ akɛ ewo ehiɛ nɔ ni ekwɛ ŋulamii lɛ, ní ekane kɛji eeenyɛ lɛ nɔ. Nyɔŋmɔ kɛɛ: “Bɔ ni oseshi aaatamɔ nɛ.” Enɛ kanya Abraham tsui waa diɛŋtsɛ. Eyɛ faŋŋ akɛ nakai ŋwɛi bɔɔ nii ni yɔɔ naakpɛɛ kɛ gbeyei lɛ a-Bɔlɔ lɛ baanyɛ aha nɔ ni ewo shi yɛ he lɛ aba mli. Abraham ‘he Yehowa eye.’ (1 Mose 15:5, 6) Abraham heee eyeee kɛkɛ akɛni esumɔɔ nɔ ni enuɔ lɛ hewɔ; eyɛ hemɔkɛyeli ni mã shi shiŋŋ.

11. (a) Beni eehe eye afii 100 lɛ, te Abraham fee enii yɛ Nyɔŋmɔ shiwoo akɛ Sara ni egbɔ lɛ baafɔ binuu lɛ he eha tɛŋŋ? (b) Mɛɛ hemɔkɛyeli Abraham kɛkpee kaa ni kɔɔ ebinuu lɛ ni esa akɛ ekɛ lɛ aya Moria Gɔŋ lɛ nɔ ni ekɛ lɛ ayashã afɔle lɛ naa?

¹¹ Beni Abraham bɛŋkɛɔ afii 100, ni eŋa Sara hu bɛŋkɛɔ afii 90 lɛ, Yehowa saa etĩ eshiwoo ni ekɛha akɛ Abraham baafɔ binuu lɛ mli ekoŋŋ, ni ekɛɛ akɛ Sara baafee bi lɛ nyɛ. Abraham kɛ jwɛŋmɔ kpakpa susu amɛshihilɛ lɛ he jogbaŋŋ. “Eyiŋ efeee lɛ kɔshikɔshi yɛ Nyɔŋmɔ shiwoo lɛ he tamɔ akɛ eheee eyeee, shi moŋ ená hewalɛ yɛ hemɔkɛyeli mli, ni ewo Nyɔŋmɔ hiɛ nyam, ni eyɛ hewalɛ yɛ nɔ jogbaŋŋ, akɛ, nɔ ni ewo he shi lɛ, eeenyɛ efee hu.” (Romabii 4:19-21) Abraham le akɛ Nyɔŋmɔ shiwoo lɛ efeŋ efolo. Yɛ sɛɛ mli, yɛ ehemɔkɛyeli lɛ hewɔ lɛ, Abraham bo toi beni Nyɔŋmɔ kɛɛ lɛ akɛ ekɛ Isak aya Moria shikpɔŋ lɛ nɔ ni ekɛ lɛ ayashã afɔle lɛ. (1 Mose 22:1-12) Abraham ná hekɛnɔfɔɔ kɛmɔ shi akɛ Nyɔŋmɔ, mɔ ni hã afɔ nakai binuu lɛ yɛ naakpɛɛ gbɛ nɔ lɛ, baanyɛ ekɛ lɛ aba wala mli ekoŋŋ, bɔni afee ni eha shiwoi krokomɛi ni E-kɛha yɛ ehe lɛ anyɛ aba mli.—Hebribii 11:17-19.

12. Mɛɛ be sɛɛ jɛkɛmɔ Abraham tee nɔ ekɛnyiɛ yɛ hemɔkɛyeli naa, ni mɛɛ nyɔmɔwoo mɛɔ lɛ kɛ eweku lɛ mli bii ni jie hemɔkɛyeli ni mli wa kpo lɛ?

¹² Abraham tsɔɔ akɛ hemɔkɛyeli kudɔɔ lɛ, jeee yɛ bei komɛi amli pɛ kɛkɛ, shi moŋ yɛ shihilɛ be fɛɛ mli. Abraham nine shɛɛɛ Shiwoo Shikpɔŋ lɛ fã ko nɔ kɛjɛɛɛ Nyɔŋmɔ ŋɔɔ akɛ gboshinii yɛ eshihilɛ be fɛɛ mli. (Bɔfoi lɛ Asaji 7:5) Ni kɛlɛ, Abraham nijiaŋ ejeee wui ni eeeku esɛɛ kɛya Ur yɛ Kaldeabii lɛ ateŋ. Ehi buui amli afii 100, yɛ shikpɔŋ ni Nyɔŋmɔ fã lɛ akɛ eyahi nɔ lɛ nɔ kɛyashi egbele mli. (1 Mose 25:7) Hebribii 11:16 wieɔ ekɛ eŋa Sara, kɛ amɛbinuu Isak, kɛ amɛnabi Yakob he akɛ: “Efeee Nyɔŋmɔ hiɛgbele akɛ aaatsɛ lɛ amɛ-Nyɔŋmɔ, ejaakɛ esaa maŋ eto amɛ.” Hɛɛ, Yehowa yɛ gbɛhe ko kɛha amɛ yɛ e-Mesia Maŋtsɛyeli lɛ nɔyelihe ni yɔɔ shikpɔŋ nɔ lɛ mli.

13. Yehowa tsuji ni yɔɔ ŋmɛnɛ lɛ ateŋ namɛi yeɔ odase akɛ amɛyɛ hemɔkɛyeli ni tamɔ Abraham nɔ̃ lɛ?

¹³ Mɛi komɛi yɛ Yehowa webii ateŋ ŋmɛnɛ ni amɛtamɔ Abraham. Amɛnyiɛ yɛ hemɔkɛyeli naa afii babaoo. Amɛye gbɛtsii nii ni tamɔ gɔji anɔ kunim, yɛ hewalɛ ni Nyɔŋmɔ kɛhaa lɛ mli. (Mateo 17:20) Amɛgbɔjɔɔɔ yɛ hemɔkɛyeli mli akɛni amɛleee be pɔtɛɛ mli ni Nyɔŋmɔ kɛ gboshinii ni ewo shi yɛ he lɛ baaha amɛ lɛ hewɔ. Amɛle akɛ Yehowa wiemɔ efeŋ efolo kɔkɔɔkɔ, ni amɛbuɔ hegbɛ ni ámɛna akɛ aaakane amɛ afata e-Dasefoi lɛ ahe lɛ akɛ ejara wa waa diɛŋtsɛ. Ani nɛkɛ ji bɔ ni onuɔ he ohãa?

Hemɔkɛyeli ni Kanya Mose Lɛ

14. Mɛɛ gbɛ nɔ atsɔ ato Mose hemɔkɛyeli lɛ shishi?

¹⁴ Hemɔkɛyeli he nɔkwɛmɔnɔ kroko ji Mose. Mɛni ji ehemɔkɛyeli lɛ shishitoo nɔ̃? Ato shishi kɛjɛ egbekɛbiiashi. Eyɛ mli akɛ Farao biyoo lɛ yana Mose yɛ adaa adeka ko mli yɛ Nilo Faa lɛ naa, ni eŋɔ lɛ akɛ ebinuu moŋ, shi Mose diɛŋtsɛ nyɛ Hebri yoo, Yokebed, hã gbekɛ nuu lɛ fufɔ ni ekwɛ lɛ yɛ egbekɛbiiashi. Eka shi faŋŋ akɛ Yokebed tsɔɔ lɛ nii jogbaŋŋ, ni eha ená suɔmɔ kɛha Yehowa kɛ hiɛsɔɔ kɛha E-shiwoi ni ekɛha Abraham lɛ. Yɛ sɛɛ mli lɛ, ákɛ Farao shiabii lɛ ateŋ mɔ ko lɛ, “atsɔɔ” Mose “Mizraim nilee fɛɛ.” (Bɔfoi lɛ Asaji 7:20-22; 2 Mose 2:1-10; 6:20; Hebribii 11:23) Shi kɛlɛ, yɛ Mose gbɛhe ni duromɔ yɔɔ mli lɛ fɛɛ sɛɛ lɛ, etsui yɛ Nyɔŋmɔ webii ni ayeɔ amɛ nyɔŋ lɛ ahe.

15. Mose he ni ekɛbɔ Yehowa webii ahe lɛ tsɔɔ mɛni kɛha lɛ?

¹⁵ Beni eye afii 40 lɛ, Mose tswa Mizraimnyo ko nɔ̃ koni ekɛjie Israelnyo ko ni ekɛ lɛ yeɔ yɛ gbɛ ni ejaaa nɔ lɛ yɛ edɛŋ. Sane ni ba nɛɛ tsɔɔ bɔ ni Mose susuɔ Nyɔŋmɔ webii lɛ ahe ehãa. Yɛ anɔkwale mli lɛ, “hemɔkɛyeli Mose diɛŋtsɛ kɛkpa yɛ enɔ, beni eda lɛ, akɛ akatsɛ lɛ Farao biyoo lɛ bi.” Yɛ nɔ najiaŋ ni “eeeye esha mli ŋɔɔmɔ be fioo ko” ákɛ Mizraim maŋtsɛwe lɛ mli bii lɛ ateŋ mɔ kome lɛ, hemɔkɛyeli tsirɛ lɛ koni ekɛ ehe ayakpɛtɛ Nyɔŋmɔ webii ni afeɔ amɛ niseniianii lɛ ahe.—Hebribii 11:24, 25; Bɔfoi lɛ Asaji 7:23-25.

16. (a) Mɛɛ nitsumɔ Yehowa kɛwo Mose dɛŋ, ni Nyɔŋmɔ ye ebua lɛ yɛ mɛɛ gbɛ nɔ? (b) Mɛɛ gbɛ nɔ Mose tsɔ ejie hemɔkɛyeli kpo yɛ nɔ ni akɛwo edɛŋ lɛ he nitsumɔ mli?

¹⁶ Mose miishwe ni efee nɔ ko ni baahã ewebii lɛ ahe ajɔ amɛ, shi Nyɔŋmɔ be ni eto kɛha amɛ kpɔmɔ lɛ shɛko. Ehe bahia ni Mose ajo foi kɛjɛ Mizraim. Aaafee afii 40 sɛɛ dani Yehowa tsɔ̃ ŋwɛibɔfo ko nɔ ekɛ nitsumɔ wo Mose dɛŋ akɛ eku esɛɛ kɛya Mizraim koni eyanyiɛ Israelbii lɛ ahiɛ kɛjɛ nakai maŋ lɛ mli. (2 Mose 3:2-10) Te Mose fee enii yɛ enɛ he eha tɛŋŋ? Eyiŋ efeee lɛ kɔshikɔshi yɛ Yehowa nyɛmɔ ni ekɛaajie Israel lɛ he, shi enu he akɛ eshɛɛɛ gbɛhe ni Nyɔŋmɔ kɛmã ehiɛ lɛ he. Yehowa jɛ suɔmɔ mli ekɛ hewalɛwoo ni he hiaa Mose lɛ hã lɛ. (2 Mose 3:11–4:17) Mose hemɔkɛyeli lɛ mli bawa waa. Eku esɛɛ kɛtee Mizraim, ni ebɔ Farao kɔkɔ hiɛ-kɛ-hiɛ shii abɔ, yɛ haomɔi ni baaba Mizraim nɔ kɛ́ nakai nɔyelɔ lɛ ekpɛlɛɛɛ ni Israel aya ni amɛyaja Yehowa hewɔ lɛ he. Mose bɛ lɛ diɛŋtsɛ ehewalɛ ni ekɛaaha nakai haomɔi lɛ aba. Enyiɛ yɛ hemɔkɛyeli naa, shi jeee yɛ ninamɔ naa. Eyɛ hemɔkɛyeli yɛ Yehowa kɛ ewiemɔ lɛ mli. Farao wo Mose he gbeyei. Shi Mose damɔ shi shiŋŋ. “Hemɔkɛyeli ekɛje Mizraim ni esheee maŋtsɛ lɛ mlifu lɛ gbeyei; ejaakɛ emɔ mɔ ni anaaa lɛ lɛ mli tamɔ nɔ ni eena lɛ.” (Hebribii 11:27) Mose yeee emuu. Etɔ̃ tɔmɔi. (4 Mose 20:7-12) Shi beni Nyɔŋmɔ kɛ nitsumɔ wo edɛŋ lɛ sɛɛ lɛ, hemɔkɛyeli kudɔ eshihilɛ gbɛ fɛɛ agbɛnɛ.

17. Mɛni jɛ hemɔkɛyeli naa ni anyiɛɔ yɛ lɛ mli ba kɛha Noa, Abraham, kɛ Mose, eyɛ mli akɛ amɛhiii shi ni amɛaana Nyɔŋmɔ jeŋ hee lɛ?

¹⁷ Eba akɛ ohemɔkɛyeli aaatamɔ Noa, Abraham, kɛ Mose nɔ̃ lɛ. Eji anɔkwale akɛ amɛnaaa Nyɔŋmɔ jeŋ hee lɛ yɛ amɛgbii lɛ amli. (Hebribii 11:39) No mli lɛ Nyɔŋmɔ be ni eto lɛ shɛko; eyiŋtoo lɛ he nibii krokomɛi yɛ ni ehe miihia ni atsu nomɛi ahe nii lolo. Ni kɛlɛ hemɔkɛyeli ni amɛyɔɔ yɛ Nyɔŋmɔ wiemɔ lɛ mli lɛ hosooo, ni amɛgbɛ́i yɛ Nyɔŋmɔ wala wolo lɛ mli.

18. Mɛni hewɔ efee nɔ ni he hiaa akɛ mɛi ni atsɛ amɛ kɛha ŋwɛi shihilɛ lɛ aaanyiɛ yɛ hemɔkɛyeli naa lɛ?

¹⁸ Bɔfo Paulo ŋma akɛ: “Nyɔŋmɔ esaa nɔ ko kpakpa eto wɔ.” Ni ji akɛ, Nyɔŋmɔ tsɔ hiɛ ena nɔ ko kpakpa kɛha mɛi ni, taakɛ bɔfo Paulo ji lɛ, atsɛ amɛ ní amɛkɛ Kristo abaná wala yɛ ŋwɛi lɛ. (Hebribii 11:40) Mɛnɛɛmɛi ji mɛi titri ni yɔɔ Paulo jwɛŋmɔ mli beni eŋma wiemɔi ni yɔɔ 2 Korintobii 5:7 lɛ, akɛ: “Hemɔkɛyeli naa wɔnyiɛɔ yɛ, shi jeee ninamɔ naa” lɛ. Beni aŋma enɛ lɛ, no mli lɛ amɛteŋ mɔ ko kwraa nine shɛko amɛ ŋwɛi nyɔmɔwoo lɛ nɔ. Amɛnyɛɛɛ amɛkɛ amɛhiŋmɛii diɛŋtsɛ ana, shi hemɔkɛyeli ni amɛyɔɔ yɛ mli lɛ ma shi shiŋŋ diɛŋtsɛ. No mli lɛ atee Kristo shi kɛjɛ gbohii ateŋ, ákɛ mɛi ni akɛ ŋwɛi wala baajɔɔ amɛ lɛ ateŋ klɛŋklɛŋ mɔ. Ni odasefoi fe 500 na lɛ dani ekwɔ kɛtee ŋwɛi. (1 Korintobii 15:3-8) Amɛyɛ yiŋtoo ni fa saŋŋ ni amɛaadamɔ nɔ amɛkɛ nakai hemɔkɛyeli lɛ akudɔ amɛshihilɛ gbɛi fɛɛ. Wɔ hu wɔyɛ yiŋtoo kpakpa ni wɔɔdamɔ nɔ wɔnyiɛ yɛ hemɔkɛyeli naa.

19. Taakɛ atsɔɔ yɛ Hebribii 1:1, 2 lɛ, Nyɔŋmɔ etsɔ namɔ nɔ ekɛ wɔ ewie?

¹⁹ Ŋmɛnɛ, Yehowa tsɔɔɔ ŋwɛibɔfo nɔ ekɛ ewebii ewieee, tamɔ gbɛ ni etsɔ nɔ ekɛ Mose wie yɛ ŋmeitso ni tsoɔ lɛ he lɛ. Nyɔŋmɔ ewie kɛtsɔ e-Bi lɛ nɔ. (Hebribii 1:1, 2) Nɔ ni Nyɔŋmɔ ewie kɛtsɔ enɔ lɛ, E-ha aŋmala ashwie shi yɛ Biblia lɛ ni atsɔɔ shishi kɛtee gbɔmɛi ni yɔɔ jeŋ fɛɛ lɛ awiemɔi amli lɛ mli.

20. Mɛni hewɔ wɔshihilɛ lɛ hi kwraa fe Noa, Abraham, kɛ Mose nɔ̃ lɛ?

²⁰ Wɔyɛ nibii babaoo fe bɔ ni Noa, Abraham, kɛ Mose ná lɛ. Wɔyɛ Nyɔŋmɔ Wiemɔ muu lɛ fɛɛ—ni emli babaoo ji nɔ ni eba mli momo. Yɛ nibii fɛɛ ni Biblia lɛ wieɔ yɛ hii kɛ yei ni jie amɛhe kpo akɛ amɛji Yehowa odasefoi anɔkwafoi, yɛ kaai sɔrɔtoi fɛɛ ni amɛkɛkpe lɛ fɛɛ sɛɛ lɛ ahe lɛ hewɔ lɛ, Hebribii 12:1 woɔ wɔ hewalɛ akɛ: “Nyɛhaa wɔkɛ jatsu fɛɛ jatsu aŋmɛ̃a shi, kɛ esha ni ebɔle wɔhe kpula lɛ, ni wɔkɛ tsuishitoo ada foi ni kã wɔhiɛ lɛ.” Wɔhemɔkɛyeli lɛ jeee nɔ ko ni esa akɛ wɔku wɔhiɛ wɔfɔ̃ nɔ kɛkɛ. ‘Esha ni bɔleɔ mɔ he kpula lɛ’ ji hemɔkɛyeli ni abɛ. Ebiɔ ni wɔwu ta waa kɛ wɔɔnyɛ wɔya nɔ ‘wɔnyiɛ yɛ hemɔkɛyeli naa.’

[Shishigbɛ niŋmai]

Mɛni Obaakɛɛ?

◻ ‘Hemɔkɛyeli naa ni anyiɛɔ yɛ’ lɛ kɔɔ mɛni he?

◻ Mɛɛ gbɛ nɔ gbɛ ni Noa tsɔ nɔ ejie hemɔkɛyeli kpo lɛ he aaaba sɛɛnamɔ aha wɔ yɛ?

◻ Gbɛ ni Abraham tsɔ nɔ ejie hemɔkɛyeli kpo lɛ baaye abua wɔ yɛ mɛɛ gbɛ nɔ?

◻ Mɛni hewɔ Biblia lɛ gbalaa jwɛŋmɔ kɛyaa Mose nɔ akɛ hemɔkɛyeli he nɔkwɛmɔnɔ lɛ?

[Mfoniri ni yɔɔ baafa 10]

Abraham nyiɛ yɛ hemɔkɛyeli naa

[Mfoniri ni yɔɔ baafa 10]

Mose kɛ Aaron jie hemɔkɛyeli kpo beni amɛyɔɔ Farao hiɛ lɛ