Mɛni Kanyaa Bo Koni Osɔmɔ Nyɔŋmɔ?

“Ni suɔmɔ Nuntsɔ [Yehowa] o-Nyɔŋmɔ lɛ kɛ otsui fɛɛ, kɛ osusuma fɛɛ, kɛ ojwɛŋmɔ fɛɛ, kɛ onyɛmɔ fɛɛ!”—MARKO 12:30.

 1, 2. Mɛɛ nibii ni yɔɔ miishɛɛ atsuɔ yɛ shiɛmɔ nitsumɔ lɛ hewɔ?

JEEE bɔ ni anaa car loo tsɔne ko ahaa lɛ nɔ adamɔɔ abuɔ ejara diɛŋtsɛ. Bɔ ni apɛnte he aha lɛ baaha efee fɛo, ni bɔ ni afee lɛ ni ehe kpɛlɛɔ lɛ hu baagbala nihelɔ lɛ jwɛŋmɔ; shi nɔ ni he hiaa waa fe fɛɛ ji nibii ni akɛ hiŋmɛi enaaa amrɔ nɔŋŋ lɛ—tsɔne ni kã mli ni haa car lɛ nyiɛɔ lɛ, kɛ nibii krokomɛi ni akɛkudɔɔ tsɔne lɛ.

² Nakai eji yɛ sɔɔmɔ ni Kristofonyo lɛ kɛhaa Nyɔŋmɔ lɛ he. Yehowa Odasefoi eyi obɔ kɛ nitsumɔi ni Nyɔŋmɔ gbeyeishemɔ yɔɔ mli. Daa afi lɛ, amɛkɛ ŋmɛlɛtswai fe akpekpei akpe shiɛɔ Nyɔŋmɔ Maŋtsɛyeli lɛ he sanepakpa lɛ. Kɛfata he lɛ, amɛfeɔ Biblia mli nikasemɔi akpekpei abɔ, ni mɛi ni abaptisiɔ amɛ lɛ ayibɔ shɛɔ akpei ohai abɔ. Kɛ oji sanekpakpa lɛ jajelɔ lɛ, belɛ ona mli gbɛfaŋnɔ—kɛji akɛ efeɔ tamɔ efaaa po—yɛ akɔntaabui ni yɔɔ miishɛɛ nɛɛ amli. Ni obaanyɛ ona nɔmimaa akɛ “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛ nitsumɔ lɛ nɔ, kɛ suɔmɔ deŋme ni nyɛgbo yɛ egbɛi lɛ ahewɔ” lɛ.—Hebribii 6:10.

 3. Yɛ nitsumɔi asɛɛ lɛ, mɛni hu esa akɛ efee nɔ ni he hiaa Kristofoi waa, ni mɛni hewɔ?

³ Kɛlɛ, adamɔɔɔ osɔɔmɔ lɛ jarawalɛ—kutuu loo aŋkro—nɔ abuuu he akɔntaa yɛ yibɔi anaa pɛ. Taakɛ akɛɛ Samuel lɛ, “gbɔmɔ lɛ ekwɛɔ kponɔgbɛ nii, shi Yehowa lɛ, tsui ekwɛɔ.” (1 Samuel 16:7) Hɛɛ, nɔ ni wɔji yɛ mligbɛ lɛ Nyɔŋmɔ kwɛɔ. Eji anɔkwale akɛ nitsumɔi ahe hiaa. Nyɔŋmɔ gbeyeishemɔ kɛ hetuu-kɛhamɔ nitsumɔi wulaa Yehowa tsɔɔmɔ lɛ ni egbalaa mɛi ni sumɔɔ ni amɛfee kaselɔi lɛ. (Mateo 5:14-16; Tito 2:10; 2 Petro 3:11) Ni kɛlɛ, wɔ nitsumɔi lɛ egbaaa sane muu lɛ fɛɛ. Yesu ni atee lɛ shi lɛ yeɔ etsui yɛ Efeso asafo lɛ he—yɛ amɛ nitsumɔi kpakpai ni ale lɛ fɛɛ sɛɛ. Ekɛɛ amɛ akɛ: “Mile onitsumɔi lɛ . . . Shi kɛlɛ, mikɛo yɛ sane ko, no ji akɛ oŋmɛɛ oklɛŋklɛŋ suɔmɔ lɛ he.”—Kpojiemɔ 2:1-4.

 4. (a) Yɛ mɛɛ gbɛ nɔ sɔɔmɔ ni wɔkɛhaa Nyɔŋmɔ lɛ baanyɛ atsɔ tamɔ kusum nifeemɔ ko kɛkɛ ni esa akɛ atsu? (b) Mɛni hewɔ ehe hiaa ni wɔpɛi wɔ diɛŋtsɛ wɔmli wɔkwɛ lɛ?

⁴ Oshara yɛ. Yɛ be kpalaŋŋ ko sɛɛ lɛ, sɔɔmɔ ni wɔkɛhaa Nyɔŋmɔ lɛ baanyɛ atsɔ tamɔ kusum nifeemɔ ko ni esa akɛ atsu. Kristofonyo yoo ko tsɔɔ mli yɛ nɛkɛ gbɛ nɔ: “Mikɛ mihe woɔ sɔɔmɔ lɛ mli, miyaa kpeei, nikasemɔ, misɔleɔ—shi mifee fɛɛ tamɔ tsɔne ko ni aakudɔ lɛ, ni minaaa henumɔ ko kwraa.” Eyɛ mli moŋ akɛ esa akɛ ajie Nyɔŋmɔ tsuji ayi kɛ amɛmia amɛhiɛ yɛ be mli ni amɛnuɔ he akɛ ‘atswia wɔ shi’ loo ‘aba amɛ shi’ lɛ fɛɛ sɛɛ. (2 Korintobii 4:9; 7:6) Ni kɛlɛ, kɛ wɔ Kristofoi anifeemɔ gbɛ fee nɔ ni eyaaa hiɛ lɛ, ehe baahia ni wɔpɛi tsɔne lɛ mli wɔkwɛ yɛ okadi gbɛ nɔ. Ehe hiaa ni apɛi tsɔnei ni hi fe fɛɛ lɛ po mli akwɛ yɛ be kɛ bei amli; nakai nɔŋŋ hu ehe miihia ni Kristofoi fɛɛ aka amɛhe amɛkwɛ be fɛɛ be. (2 Korintobii 13:5) Mɛi krokomɛi baanyɛ ana wɔ nitsumɔi lɛ, shi amɛnyɛŋ amɛyoo nɔ ni kanyaa wɔnifeemɔi lɛ. No hewɔ lɛ, esa akɛ wɔteŋ mɔ fɛɛ mɔ ajwɛŋ sanebimɔ nɛɛ he: ‘Mɛni kanyaa mi ni no haa misɔmɔɔ Nyɔŋmɔ lɛ?’

Nibii ni Tsiɔ Kanyamɔ Kpakpa Gbɛ

 5. Mɛɛ kita Yesu kɛɛ no ji klɛŋklɛŋ nɔ kwraa?

⁵ Beni abi lɛ nɔ ni ji mlai ni akɛha Israel lɛ mli klɛŋklɛŋ nɔ lɛ, Yesu tsɛ kita ko ni gbalaa jwɛŋmɔ kɛyaa mligbɛ kanyamɔ lɛ nɔ, shi jeee kponɔgbɛ puemɔ nɔ lɛ sɛɛ: “Suɔmɔ Nuntsɔ [Yehowa] o-Nyɔŋmɔ lɛ kɛ otsui fɛɛ, kɛ osusuma fɛɛ, kɛ ojwɛŋmɔ fɛɛ, kɛ onyɛmɔ fɛɛ!” (Marko 12:28-30) No hewɔ lɛ, Yesu ha ale nɔ ni esa akɛ efee hewalɛ ni yɔɔ sɔɔmɔ ni wɔkɛhaa Nyɔŋmɔ lɛ sɛɛ lɛ—suɔmɔ.

 6, 7. (a) Satan etee nɔ ekɛ ŋaa fɔŋ kɛ yiwalɛ etutua weku kɔkrɔɔ lɛ yɛ mɛɛ gbɛ nɔ, ni mɛni hewɔ? (2 Korintobii 2:11) (b) Tsɔsemɔ baanyɛ asa jwɛŋmɔ ni mɔ ko baana yɛ ŋwɛi nɔyeli hegbɛ he yɛ mɛɛ gbɛ nɔ?

⁶ Satan miisumɔ ni etsĩ nyɛmɔ ni wɔyɔɔ ni wɔkɛaana su ni ji suɔmɔ ni he hiaa lɛ naa. Bɔni afee ni enyɛ efee enɛ lɛ, gbɛ kome ni ekɔ ji ni etutua weku kɔkrɔɔ lɛ. Mɛni hewɔ? Ejaakɛ biɛ wɔ klɛŋklɛŋ kadimɔ nii ni tsɛɔ fe fɛɛ lɛ jeɔ shishi kɛjɛɔ. Satan le Biblia mli shishitoo mla akɛ, nɔ ni akaseɔ kɛjɛɔ gbekɛbiiashi lɛ he baanyɛ aba sɛɛnamɔ beni adara. (Abɛi 22:6) Ekɛ hekamɔ bɔɔ mɔdɛŋ ni etsɔ gbɛ ni yɔɔ nigii nɔ ni efite bɔ ni wɔnuɔ suɔmɔ shishi wɔhaa lɛ beni wɔdarako. Ákɛ “je nɛŋ nyɔŋmɔ” lɛ, Satan naa akɛ atsuɔ eyiŋtoo he nii jogbaŋŋ beni mɛi pii daraa yɛ shiai ni suɔmɔ bɛ jɛmɛ lɛ amli, shi moŋ amɛji mlila, mlifu, kɛ jɛmɔ wiemɔi atawuu he lɛ.—2 Korintobii 4:4; Efesobii 4:31, 32; 6:4, shishigbɛ niŋmaa; Kolosebii 3:21.

⁷ Wolo, Oweku Shihilɛ Ni Oooha Efee Miishɛɛ lɛ kɛɛ akɛ gbɛ ni tsɛ ko tsɔɔ nɔ etsuɔ egbɛnaa nii akɛ fɔlɔ lɛ he nii lɛ “baanyɛ ana hewalɛ waa yɛ su ni ebii lɛ aaajie lɛ kpo yɛ sɛɛ mli yɛ nɔyeli hegbɛ, kɛha gbɔmɔ kɛ Nyɔŋmɔ fɛɛ lɛ nɔ.”a Kristofonyo nuu ko ni atsɔse lɛ yɛ tsɛ ko ni yɔɔ keketee lɛ nineshiwalɛ shishi lɛ kpɛlɛ nɔ akɛ: “Kɛha mi lɛ, toiboo kɛha Yehowa yɛ mlɛo; ni masumɔ lɛ lɛ wa babaoo kɛha mi.” Eji anɔkwale akɛ toiboo he miihia, ejaakɛ yɛ Nyɔŋmɔ hiɛ lɛ, “toiboo hi fe afɔleshãa.” (1 Samuel 15:22) Shi mɛni baanyɛ aye abua wɔ ni wɔya hiɛ kɛteke toiboo kɛkɛ ni wɔɔfee, ni wɔna suɔmɔ kɛha Yehowa akɛ hewalɛ ni kanyaa wɔ ni yɔɔ wɔjamɔ lɛ sɛɛ?

“Kristo Suɔmɔ lɛ Nyɛɔ Wɔnɔ”

 8, 9. Te esa akɛ Yesu kpɔmɔ afɔleshãa lɛ akanya suɔmɔ ni wɔyɔɔ kɛha Yehowa lɛ aha tɛŋŋ?

⁸ Kanyamɔ ni fe fɛɛ ni baaha wɔna tsui muu fɛɛ mli suɔmɔ wɔha Yehowa ji hiɛsɔɔ kɛha Yesu Kristo kpɔmɔ afɔleshãa lɛ. “Enɛ mli Nyɔŋmɔ suɔmɔ ni ekɛsumɔɔ wɔ lɛ jeɔ kpo yɛ, akɛ Nyɔŋmɔ tsu lɛ diɛŋtsɛ e-Bi koome lɛ kɛba je lɛŋ, koni wɔtsɔ enɔ wɔna wala.” (1 Yohane 4:9) Kɛ wɔnu shishi ni wɔhiɛ sɔ pɛ lɛ, suɔmɔ nifeemɔ nɛɛ teeɔ suɔmɔ nifeemɔ shi. “Wɔsumɔɔ lɛ, ejaakɛ lɛ [Yehowa] tsutsu esumɔ wɔ.”—1 Yohane 4:19.

⁹ Yesu jɛ esuɔmɔ mli ekpɛlɛ enitsumɔ akɛ esɔmɔ akɛ gbɔmɛi a-Yiwalaherelɔ lɛ nɔ. “Enɛ mli wɔyooɔ suɔmɔ lɛ yɛ, akɛ eŋɔ ewala eŋmɛ shi yɛ wɔ hewɔ.” (1 Yohane 3:16; Yohane 15:13) Esa akɛ Yesu he-kɛ-afɔleshãa suɔmɔ lɛ akanya hiɛsɔɔ nɔkpɛlɛmɔ yɛ wɔmli. Akɛ nɔkwɛmɔ nɔ lɛ: Ŋɔɔ lɛ akɛ ahere oyiwala kɛjɛ nu mli gbele mli. Ani obaaya shia kɛkɛ, ni oyatsumɔ ohe, ni oha ohiɛ akpa nɔ? Dabida! Obaanu he akɛ ohiɛ mɔ ni here oyiwala lɛ nyɔmɔ ko. Fɛɛ sɛɛ lɛ, ohiɛ nakai mɔ lɛ owala he nyɔmɔ. Ani wɔhiɛ Yehowa Nyɔŋmɔ kɛ Yesu Kristo nyɔmɔ ni shɛɛɛ enɛ? Kɛ kpɔmɔ nɔ lɛ bɛ lɛ, wɔ fɛɛ wɔbaashiu, yɛ esha kɛ gbele mli. Yɛ no najiaŋ lɛ, yɛ esuɔmɔ nifeemɔ kpeteŋkpele lɛ hewɔ lɛ, wɔyɛ gbɛkpamɔ akɛ wɔbaahi shi kɛya naanɔ yɛ paradeiso shikpɔŋ nɔ.—Romabii 5:12, 18; 1 Petro 2:24.

10. (a) Mɛɛ gbɛ nɔ wɔɔtsɔ wɔha kpɔmɔ nɔ lɛ afee nɔ ko ni kɔɔ wɔ diɛŋtsɛ wɔhe? (b) Suɔmɔ ni Kristo yɔɔ lɛ tsirɛɔ wɔ yɛ mɛɛ gbɛ nɔ?

¹⁰ Jwɛŋmɔ kpɔmɔ nɔ lɛ nɔ. Okɛtsu nii yɛ bo diɛŋtsɛ oshihilɛ mli, taakɛ Paulo fee lɛ: “Mihiɛ ni ka yɛ heloo mli agbɛnɛ nɛɛ, Nyɔŋmɔ Bi lɛ, ni sumɔ mi, ni eŋɔ ehe eha yɛ mihewɔ lɛ hemɔkɛyeli mli mihiɛ ka yɛ.” (Galatabii 2:20) Susumɔ ni tamɔ nɛkɛ baatee tsuiŋ kanyamɔ shi, ejaakɛ Paulo ŋma eyaha Korintobii lɛ akɛ: “Ejaakɛ Kristo suɔmɔ lɛ nyɛɔ wɔ nɔ . . . [ejaakɛ] egbo mɛi fɛɛ yigbele, koni mɛi ni hiɛ kamɔ lɛ ahiɛ akakamɔ miiha amɛ diɛŋtsɛ amɛhe dɔŋŋ, shi moŋ amɛhiɛ akamɔ aha mɔ ni gbo ni atee lɛ shi ekoŋŋ aha amɛ lɛ.” (2 Korintobii 5:14, 15) The Jerusalem Bible lɛ kɛɔ akɛ Kristo suɔmɔ lɛ “haa wɔnɔ.” Kɛ wɔsusu Kristo suɔmɔ lɛ he lɛ, enyɛɔ wɔ nɔ waa, etsirɛɔ wɔ waa, ehaà wɔ nɔ po. Esaa wɔtsuii ahe ni etsirɛɔ wɔ kɛhaa nifeemɔ. Taakɛ J. B. Phillips shishitsɔɔmɔ lɛ fo lɛ kuku lɛ, “wɔnifeemɔi ajɛɛhe diɛŋtsɛ ji Kristo suɔmɔ lɛ.” Kanyamɔ kroko ko nyɛŋ aha wɔna naanɔ yibiiwoo yɛ wɔmli, taakɛ Farisifoi lɛ anɔkwɛmɔ nɔ lɛ tsɔɔ lɛ.

‘Nyɛhiɛ Ahia Nyɛhe Nɔ yɛ Farisifoi lɛ Amasha Hewɔ’

11. Tsɔɔmɔ bɔ ni Farisifoi lɛ asubaŋ ji yɛ jamɔ mli nitsumɔi ahe lɛ mli.

¹¹ Farisifoi lɛ jie nɔ titri ni yɔɔ Nyɔŋmɔ jamɔ mli lɛ fɛɛ kɛjɛ mli. Yɛ nɔ najiaŋ ni amɛaama suɔmɔ kɛha Nyɔŋmɔ nɔ mi lɛ, amɛma nitsumɔi anɔ mi akɛ susumɔ kpãa kɛha mumɔŋ nibii. Bɔ ni amɛdiɔ mlai amli nibii asɛɛ trilii lɛ ha amɛbatsɔmɔ tamɔ jalɔi yɛ kponɔgbɛ, shi amɛmligbɛ “eyimɔ obɔbɔ kɛ gbohii awui kɛ muji sɔrɔtoi.”—Mateo 23:27.

12. Mɛɛ gbɛ nɔ Farisifoi lɛ jie amɛhe kpo yɛ akɛ amɛbɛ tsuiŋ henumɔ beni Yesu tsa nuu ko hela lɛ?

¹² Be ko lɛ Yesu kɛ musuŋtsɔlɛ tsa nuu ko ni enine egbo. Kwɛ miishɛɛ ni nuu nɛɛ baana beni atsa ehela ni ŋwanejee ko bɛ he akɛ egba enaa waa yɛ gbɔmɔtsoŋ kɛ henumɔŋ fɛɛ lɛ amrɔ nɔŋŋ lɛ! Ni kɛlɛ, Farisifoi lɛ kɛ lɛ nyaaa. Yɛ no najiaŋ lɛ, amɛwie amɛshi—akɛ Yesu eye ebua mɔ ko yɛ Hejɔɔmɔ Gbi nɔ. Akɛni bɔ ni amɛsumɔɔ ni amɛtsɔɔ Mla lɛ shishi amɛha amɛhe lɛ ehe amɛjwɛŋmɔ hewɔ lɛ, Farisifoi lɛ laaje shishinumɔ diɛŋtsɛ ni yɔɔ Mla lɛ mli lɛ. Ŋwanejee ko bɛ he akɛ “edɔ [Yesu] akɛ amɛtsui wa nɛkɛ!” (Marko 3:1-5) Agbɛnɛ hu ebɔ ekaselɔi lɛ kɔkɔ akɛ: “Nyɛhiɛ ahia nyɛhe nɔ yɛ Farisifoi . . . lɛ amasha lɛ hewɔ!” (Mateo 16:6) Akpa amɛnifeemɔi kɛ subaŋi ahe mama yɛ Biblia lɛ mli kɛha wɔ sɛɛnamɔ.

13. Mɛni wɔkaseɔ kɛjɛɔ Farisifoi lɛ anɔkwɛmɔ nɔ lɛ mli?

¹³ Farisifoi lɛ anɔkwɛmɔ nɔ lɛ tsɔɔ wɔ akɛ, ehe miihia ni wɔkɛ sane shishinumɔ akwɛ nitsumɔi. Eji anɔkwale akɛ nitsumɔi ahe miihia, ejaakɛ “hemɔkɛyeli ni nitsumɔi bɛ he lɛ ji hemɔkɛyeli gbonyo.” (Yakobo 2:26) Kɛlɛ, adesai ni yeee emuu lɛ yɛ su ko ni haa amɛdamɔɔ nɔ ni amɛfeɔ lɛ nɔ amɛkojoɔ mɛi krokomɛi moŋ, fe bɔ ni amɛji. Wɔbaanyɛ wɔkojo wɔ diɛŋtsɛ wɔhe po yɛ bei komɛi amli yɛ nɛkɛ gbɛ nɔ. Nɔ ni wɔtsuɔ lɛ baanyɛ ahe wɔjwɛŋmɔ fɛɛ, tamɔ nɔ ni enɛ pɛ ji taomɔ nii kɛha wɔmumɔŋ shihilɛ. Wɔhiɛ baanyɛ akpa bɔ ni ehe hiaa ni wɔpɛi wɔyiŋtoi amli wɔkwɛ lɛ nɔ. (Okɛto 2 Korintobii 5:12 he.) Wɔbaanyɛ wɔtsɔmɔ mɛi ni diɔ mla sɛɛ keketee, ni “tsereɔ nɔ̃ nɔ adɔdɔŋ, shi [wɔ]miɔ yoma,” wɔboɔ mla lɛ mli wiemɔi lɛ fɛɛ toi, shi wɔkũɔ yiŋtoo ni yɔɔ sɛɛ lɛ mli.—Mateo 23:24.

14. Farisifoi lɛ tamɔ kpulu loo kã ni he tseee yɛ mɛɛ gbɛ nɔ?

¹⁴ Nɔ ni Farisifoi lɛ ajwɛŋmɔ shɛɛɛ he ji akɛ, kɛ mɔ ko sumɔɔ Yehowa lɛlɛŋ lɛ, Nyɔŋmɔjamɔ hetuu-kɛhamɔ baanyiɛ sɛɛ. Mumɔŋ shihilɛ hoɔ kɛjɛ mligbɛ kɛbaa kponɔgbɛ. Yesu wie eshi Farisifoi lɛ waa yɛ amɛjwɛŋmɔ ni ejaaa yɛ enɛ gbɛfaŋ lɛ he, akɛ: “Kpoo ha nyɛ, woloŋmalɔi kɛ Farisifoi, osatofoi! Akɛni nyɛtsumɔɔ kpulu he kɛ kã sɛɛ; shi amɛmligbɛ eyimɔ obɔbɔ kɛ ojotswaa kɛ adufudeyeli. Farisifonyo shwilafo, ha kpulu lɛ kɛ kã lɛ mli tsutsu aje, dani esɛɛ hu aje!”—Mateo 23:25, 26.

15. Tsii nɔkwɛmɔ nii komɛi ni tsɔɔ akɛ Yesu kwɛɔ nii kɛtekeɔ kponɔgbɛ nibii lɛ ata.

¹⁵ Kpulu, kã, loo tsu po sɛɛ jieɔ nɔ ko fioo ko pɛ kpo. Yesu kaselɔi lɛ anaa kpɛ amɛhe yɛ bɔ ni Yerusalem sɔlemɔtsu lɛ ni Yesu tsɛ lɛ “ojotswalɔi abuu” yɛ nɔ ni yaa nɔ yɛ mli hewɔ lɛ he. (Marko 11:17; 13:1) Nɔ ni ji anɔkwale yɛ sɔlemɔtsu lɛ he hu ji anɔkwale yɛ akpekpei abɔ ni kɛɔ akɛ amɛji Kristofoi lɛ agbɛfaŋ, taakɛ saji ni aŋmala ashwie shi ni kɔɔ Kristendom he lɛ tsɔɔ lɛ. Yesu kɛɛ akɛ ebaakojo mɛi ni “fee hewalɛ nibii pii” yɛ egbɛi amli lɛ akɛ amɛji “mɛi ni . . . tsuɔ nibii ni ejaaa gbɛ.” (Mateo 7:22, 23) Nɔ ni tamɔɔɔ nakai kwraa lɛ, ewie yoo ko ni kɛ shika bibioo ko ni shɛɛɛ nɔ ko kwraa wo sɔlemɔtsu lɛ oniatsumɔ adeka lɛ mli lɛ he akɛ: “Nɛkɛ okulafo ohiafo nɛɛ kɛ pii ewo mli fe mɛi fɛɛ ni kɛ eko ebawo shikatoo he lɛ mli lɛ. . . . Nɔ ni eyɔɔ yɛ ehia mli ni ekɛlɛɔ ehe lɛ fɛɛ ekɛbawo mli nɛɛ.” (Marko 12:41-44) Kojomɔi ni kɛ ehe kpaaa gbee? Dabi kwraa. Yesu jie Yehowa jwɛŋmɔ lɛ kpo yɛ shihilɛi enyɔ lɛ fɛɛ mli. (Yohane 8:16) Ena yiŋtoo ni yɔɔ nitsumɔi lɛ asɛɛ lɛ, ni ekojo yɛ gbɛ ni sa nɔ.

“Bɔ ni Mɔ Fɛɛ Mɔ Aaanyɛ Akwɛ”

16. Mɛni hewɔ ehe ehiaaa ni wɔkɛ wɔ nitsumɔ ato Kristofonyo kroko nɔ̃ he be fɛɛ be lɛ?

¹⁶ Kɛ wɔyiŋtoi ja lɛ, ehe ehiaaa ni akɛ nibii ato he akwɛ. Akɛ nɔkwɛmɔ nɔ lɛ, nɔ ko fioo ko pɛ anyɛɔ atsuɔ kɛ aabɔ mɔdɛŋ ni nine ashɛ be falɛ ni Kristofonyo kroko kɛwoɔ esɔɔmɔ lɛ mli nɔ loo etamɔ mɔ kroko lɛ. Yesu kɛɛ, suɔmɔ Yehowa kɛ otsui, jwɛŋmɔ, susuma, kɛ hewalɛ fɛɛ—jeee mɔ kroko nɔ. Esoro mɔ fɛɛ mɔ nyɛmɔi, hewalɛ, kɛ shihilɛ. Kɛ shihilɛ mli ni oyɔɔ lɛ ŋmɛɔ gbɛ lɛ, suɔmɔ baakanya bo ni okɛ be pii awo sɔɔmɔ lɛ mli—ekolɛ akɛ be-fɛɛ gbɛgbalɔ sɔɔlɔ. Shi kɛ hela ko miigba onaa waa lɛ, be ni okɛwoɔ sɔɔmɔ lɛ mli lɛ faŋ bɔ ni obaasumɔ. Kaaha onijiaŋ miije wui. Jeee ŋmɛlɛtswai anɔ adamɔɔ abuɔ anɔkwa ni ayeɔ Nyɔŋmɔ lɛ he akɔntaa. Kɛ oyɛ yiŋtoi kpakpai lɛ, obaana nɔ ni ooodamɔ nɔ ona miishɛɛ. Paulo ŋma akɛ: “Shi mɔ fɛɛ mɔ aka lɛ diɛŋtsɛ enitsumɔ ekwɛ, ni no dani eeena nɔ ko yɛ lɛ diɛŋtsɛ emli kɛkɛ ni eshwa efɔ nɔ, ni jeee mɔ kroko nɔ lɛ nɔ.”—Galatabii 6:4.

17. Gbaa talentai lɛ ahe abɛbua lɛ kuku, yɛ bo diɛŋtsɛ owiemɔ mli.

¹⁷ Susumɔ Yesu abɛbua ni kɔɔ talentai lɛ, taakɛ aŋma afɔ shi yɛ Mateo 25:14-30 lɛ he. Nuu ko ni baafa gbɛ tsɛ etsuji lɛ ni etu enibii ewo amɛdɛŋ. “Ni eha mɔ kome talentai enumɔ, mɔ kome hu enyɔ, ni mɔ kome hu ekome, bɔ ni mɔ fɛɛ mɔ aaanyɛ akwɛ.” Beni nuntsɔ lɛ ku esɛɛ koni ekɛ etsuji lɛ ababu akɔntaa lɛ, mɛni ena? Tsulɔ ni akɛ talentai enumɔ eha lɛ lɛ ena enumɔ efata he. Nakai nɔŋŋ hu tsulɔ ni na talentai enyɔ lɛ na enyɔ efata he. Tsulɔ ni na talenta kome lɛ yatsa shikpɔŋ ni ekɛhɔ jɛmɛ ni efeee nɔ ko ni eeeha enuntsɔ lɛ nibii lɛ ashwere. Te nuntsɔ lɛ susu shihilɛ lɛ he eha tɛŋŋ?

18, 19. (a) Mɛni hewɔ nuntsɔ lɛ kɛ tsulɔ ni aha lɛ talentai enyɔ lɛ etooo tsulɔ ni eha lɛ talentai enumɔ lɛ he lɛ? (b) Mɛni talentai lɛ ahe abɛbua lɛ tsɔɔ wɔ yɛ yijiemɔ kɛ mɔ ko ni akɛ lɛ toɔ mɔ kroko he lɛ he? (d) Mɛni hewɔ abu tsulɔ ni ji etɛ lɛ fɔ lɛ?

¹⁸ Klɛŋklɛŋ lɛ, nyɛhaa wɔsusua tsuji ni na talentai enumɔ kɛ enyɔ lɛ ahe. Nuntsɔ lɛ kɛɛ tsuji nɛɛ ateŋ mɔ fɛɛ mɔ akɛ: “Ahekoo, tsulɔ kpakpa kɛ anɔkwafo!” Eji tsulɔ ni akɛ talentai enumɔ lɛ ha lɛ lɛ na enyɔ pɛ efata he kulɛ ani ebaakɛɛ lɛ nakai? Enyɛŋ eba lɛ nakai! Yɛ gbɛ kroko nɔ lɛ, ekɛɛɛ tsulɔ ni na talentai enyɔ lɛ akɛ: ‘Mɛni hewɔ onaaa enumɔ? Kwɛmɔ onaanyo tsulɔ lɛ, ni okwɛ bɔ ni ena eha mi!’ Dabi, nuntsɔ musuŋtsɔlɔ lɛ, ni fee Yesu he mfoniri lɛ kɛ mɔ kome etooo mɔ kroko he. Ekɛ talentai lɛ ha “bɔ ni mɔ fɛɛ mɔ aaanyɛ akwɛ,” ni ekpaaa nɔ ko ni fe bɔ ni mɔ fɛɛ mɔ aaanyɛ ekɛha gbɛ. Ajie tsuji enyɔ lɛ fɛɛ yi pɛpɛɛpɛ, ejaakɛ mɛi enyɔ lɛ fɛɛ kɛ amɛsusuma muu fɛɛ tsu nii amɛha amɛ-nuntsɔ lɛ. Wɔ fɛɛ wɔbaanyɛ wɔkase nii kɛjɛ enɛ mli.

¹⁹ Shi, ajieee tsulɔ ni ji etɛ lɛ yi. Yɛ anɔkwale mli lɛ, ashɛ lɛ afɔ gbɛsɛɛ duŋ lɛ mli. Akɛni enine shɛ talenta kome nɔ hewɔ lɛ, akpaŋ gbɛ akɛ eeena babaoo tamɔ tsulɔ ni na enumɔ lɛ. Shi, ebɔɔɔ he mɔdɛŋ kwraa po! Efɔbuu kojomɔ lɛ jɛ tsui “fɔŋ kɛ anihaolɔ” ni eji hewɔ, ni tsɔɔ suɔmɔ ni ebɛ kɛha enuntsɔ lɛ.

20. Te Yehowa susuɔ wɔ fatɔɔi ahe ehaa tɛŋŋ?

²⁰ Yehowa miikpa gbɛ ni wɔteŋ mɔ fɛɛ mɔ kɛ wɔnyɛmɔ fɛɛ asumɔ lɛ, ni kɛlɛ kwɛ bɔ ni wɔtsui nyãa akɛ “ele wɔsu kɛ wɔbaŋ, ekaiɔ akɛ sũ kɛkɛ ji wɔ.”! (Lala 103:14) Abɛi 21:2 kɛɔ akɛ, “Yehowa ji mɔ ni ŋmɛɔ tsui ekwɛɔ”—jeee akɔntaabui. Enuɔ fatɔɔi ni wɔbɛ nɔ hewalɛ lɛ shishi, kɛ amɛji shika, gbɔmɔtsoŋ, henumɔŋ, loo nɔ kroko. (Yesaia 63:9) Yɛ nakai beaŋ nɔŋŋ lɛ, ekpaa wɔ gbɛ akɛ wɔkɛ nibii ni wɔyɔɔ lɛ fɛɛ aaatsu nii jogbaŋŋ bɔ ni wɔɔnyɛ. Yehowa yeɔ emuu, shi kɛ ekɛ ejalɔi ni yeee emuu lɛ miiye lɛ, ebiii emuuyeli shi kɛjɛɛɛ amɛdɛŋ. Ejeee mɔ ni bɛ shishinumɔ yɛ enifeemɔi amli, ni asaŋ ejeee mɔ ni egbɛkpamɔi esaaa.

21. Kɛ suɔmɔ kanyaa wɔ sɔɔmɔ ni wɔkɛhaa Nyɔŋmɔ lɛ, mɛɛ nibii kpakpai baanyiɛ sɛɛ?

²¹ Ni wɔɔsumɔ Yehowa kɛ wɔtsui, susuma, jwɛŋmɔ, kɛ nyɛmɔ fɛɛ lɛ “fe shãa afɔlei kɛ afɔlei fɛɛ.” (Marko 12:33) Kɛ suɔmɔ ji nɔ ni tsirɛɔ wɔ lɛ, no lɛ wɔbaafee bɔ fɛɛ bɔ ni wɔɔnyɛ yɛ Nyɔŋmɔ sɔɔmɔ mli. Petro ŋma akɛ, kɛ Nyɔŋmɔ gbeyeishemɔ sui ni suɔmɔ fata he nɛɛ “yɛ nyɛmli ni efa lɛ, ehaŋ nyɛfee hejɔlɔi aloo mɛi ni wooo yibii yɛ wɔ-Nuntsɔ Yesu Kristo he nilee lɛ gbɛfaŋ.”—2 Petro 1:8.

[Shishigbɛ niŋmai]

Yɛ Emlitii Mli Lɛ

◻ Mɛni esa akɛ efee hewalɛ ni tsirɛɔ wɔ ni hɔ wɔ sɔɔmɔ ni wɔkɛhaa Nyɔŋmɔ lɛ sɛɛ?

◻ Kristo suɔmɔ lɛ kanyaa wɔ ni wɔsɔmɔ Yehowa yɛ mɛɛ gbɛ nɔ?

◻ Mɛɛ nitsumɔi ni Farisifoi lɛ kɛ amɛhe woɔ mli esa akɛ wɔkwa?

◻ Mɛni hewɔ nilee bɛ mli akɛ wɔɔya nɔ wɔkɛ wɔ sɔɔmɔ lɛ ato Kristofonyo kroko nɔ̃ he lɛ?

[Mfonirii ni yɔɔ baafa 16]

Aŋkroaŋkro nyɛmɔi, hewalɛ, kɛ shihilɛi yɛ sɔrɔto